੯. ਅਸਙ੍ਖਤਸਂਯੁਤ੍ਤਂ

੧. ਪਠਮਵਗ੍ਗੋ

੧. ਕਾਯਗਤਾਸਤਿਸੁਤ੍ਤਂ

੩੬੬. ਸਾਵਤ੍ਥਿਨਿਦਾਨਂ. ‘‘ਅਸਙ੍ਖਤਞ੍ਚ ਵੋ, ਭਿਕ੍ਖਵੇ, ਦੇਸੇਸ੍ਸਾਮਿ ਅਸਙ੍ਖਤਗਾਮਿਞ੍ਚ ਮਗ੍ਗਂ. ਤਂ ਸੁਣਾਥ. ਕਤਮਞ੍ਚ, ਭਿਕ੍ਖਵੇ, ਅਸਙ੍ਖਤਂ? ਯੋ, ਭਿਕ੍ਖਵੇ, ਰਾਗਕ੍ਖਯੋ ਦੋਸਕ੍ਖਯੋ ਮੋਹਕ੍ਖਯੋ – ਇਦਂ ਵੁਚ੍ਚਤਿ, ਭਿਕ੍ਖਵੇ, ਅਸਙ੍ਖਤਂ. ਕਤਮੋ ਚ, ਭਿਕ੍ਖਵੇ, ਅਸਙ੍ਖਤਗਾਮਿਮਗ੍ਗੋ? ਕਾਯਗਤਾਸਤਿ. ਅਯਂ ਵੁਚ੍ਚਤਿ, ਭਿਕ੍ਖਵੇ, ਅਸਙ੍ਖਤਗਾਮਿਮਗ੍ਗੋ’’.

‘‘ਇਤਿ ਖੋ, ਭਿਕ੍ਖਵੇ, ਦੇਸਿਤਂ ਵੋ ਮਯਾ ਅਸਙ੍ਖਤਂ, ਦੇਸਿਤੋ ਅਸਙ੍ਖਤਗਾਮਿਮਗ੍ਗੋ. ਯਂ, ਭਿਕ੍ਖਵੇ, ਸਤ੍ਥਾਰਾ ਕਰਣੀਯਂ ਸਾਵਕਾਨਂ ਹਿਤੇਸਿਨਾ ਅਨੁਕਮ੍ਪਕੇਨ ਅਨੁਕਮ੍ਪਂ ਉਪਾਦਾਯ, ਕਤਂ ਵੋ ਤਂ ਮਯਾ. ਏਤਾਨਿ, ਭਿਕ੍ਖਵੇ, ਰੁਕ੍ਖਮੂਲਾਨਿ, ਏਤਾਨਿ ਸੁਞ੍ਞਾਗਾਰਾਨਿ. ਝਾਯਥ [ਨਿਜ੍ਝਾਯਥ (ਕ.)], ਭਿਕ੍ਖਵੇ, ਮਾ ਪਮਾਦਤ੍ਥ; ਮਾ ਪਚ੍ਛਾ ਵਿਪ੍ਪਟਿਸਾਰਿਨੋ ਅਹੁਵਤ੍ਥ. ਅਯਂ ਵੋ ਅਮ੍ਹਾਕਂ ਅਨੁਸਾਸਨੀ’’ਤਿ. ਪਠਮਂ.

੨. ਸਮਥਵਿਪਸ੍ਸਨਾਸੁਤ੍ਤਂ

੩੬੭. ‘‘ਅਸਙ੍ਖਤਞ੍ਚ ਵੋ, ਭਿਕ੍ਖਵੇ, ਦੇਸੇਸ੍ਸਾਮਿ ਅਸਙ੍ਖਤਗਾਮਿਞ੍ਚ ਮਗ੍ਗਂ. ਤਂ ਸੁਣਾਥ. ਕਤਮਞ੍ਚ, ਭਿਕ੍ਖਵੇ, ਅਸਙ੍ਖਤਂ? ਯੋ, ਭਿਕ੍ਖਵੇ, ਰਾਗਕ੍ਖਯੋ ਦੋਸਕ੍ਖਯੋ ਮੋਹਕ੍ਖਯੋ – ਇਦਂ ਵੁਚ੍ਚਤਿ, ਭਿਕ੍ਖਵੇ, ਅਸਙ੍ਖਤਂ. ਕਤਮੋ ਚ, ਭਿਕ੍ਖਵੇ, ਅਸਙ੍ਖਤਗਾਮਿਮਗ੍ਗੋ? ਸਮਥੋ ਚ ਵਿਪਸ੍ਸਨਾ ਚ. ਅਯਂ ਵੁਚ੍ਚਤਿ, ਭਿਕ੍ਖਵੇ, ਅਸਙ੍ਖਤਗਾਮਿਮਗ੍ਗੋ…ਪੇ…. ਦੁਤਿਯਂ.

੩. ਸਵਿਤਕ੍ਕਸਵਿਚਾਰਸੁਤ੍ਤਂ

੩੬੮. ‘‘ਕਤਮੋ ਚ, ਭਿਕ੍ਖਵੇ, ਅਸਙ੍ਖਤਗਾਮਿਮਗ੍ਗੋ? ਸਵਿਤਕ੍ਕਸਵਿਚਾਰੋ ਸਮਾਧਿ, ਅਵਿਤਕ੍ਕਵਿਚਾਰਮਤ੍ਤੋ ਸਮਾਧਿ, ਅਵਿਤਕ੍ਕਅਵਿਚਾਰੋ ਸਮਾਧਿ – ਅਯਂ ਵੁਚ੍ਚਤਿ, ਭਿਕ੍ਖਵੇ, ਅਸਙ੍ਖਤਗਾਮਿਮਗ੍ਗੋ…ਪੇ…. ਤਤਿਯਂ.

੪. ਸੁਞ੍ਞਤਸਮਾਧਿਸੁਤ੍ਤਂ

੩੬੯. ‘‘ਕਤਮੋ ਚ, ਭਿਕ੍ਖਵੇ, ਅਸਙ੍ਖਤਗਾਮਿਮਗ੍ਗੋ? ਸੁਞ੍ਞਤੋ ਸਮਾਧਿ, ਅਨਿਮਿਤ੍ਤੋ ਸਮਾਧਿ, ਅਪ੍ਪਣਿਹਿਤੋ ਸਮਾਧਿ – ਅਯਂ ਵੁਚ੍ਚਤਿ, ਭਿਕ੍ਖਵੇ, ਅਸਙ੍ਖਤਗਾਮਿਮਗ੍ਗੋ…ਪੇ…. ਚਤੁਤ੍ਥਂ.

੫. ਸਤਿਪਟ੍ਠਾਨਸੁਤ੍ਤਂ

੩੭੦. ‘‘ਕਤਮੋ ਚ, ਭਿਕ੍ਖਵੇ, ਅਸਙ੍ਖਤਗਾਮਿਮਗ੍ਗੋ? ਚਤ੍ਤਾਰੋ ਸਤਿਪਟ੍ਠਾਨਾ. ਅਯਂ ਵੁਚ੍ਚਤਿ, ਭਿਕ੍ਖਵੇ, ਅਸਙ੍ਖਤਗਾਮਿਮਗ੍ਗੋ…ਪੇ…. ਪਞ੍ਚਮਂ.

੬. ਸਮ੍ਮਪ੍ਪਧਾਨਸੁਤ੍ਤਂ

੩੭੧. ‘‘ਕਤਮੋ ਚ, ਭਿਕ੍ਖਵੇ, ਅਸਙ੍ਖਤਗਾਮਿਮਗ੍ਗੋ? ਚਤ੍ਤਾਰੋ ਸਮ੍ਮਪ੍ਪਧਾਨਾ. ਅਯਂ ਵੁਚ੍ਚਤਿ, ਭਿਕ੍ਖਵੇ, ਅਸਙ੍ਖਤਗਾਮਿਮਗ੍ਗੋ…ਪੇ…. ਛਟ੍ਠਂ.

੭. ਇਦ੍ਧਿਪਾਦਸੁਤ੍ਤਂ

੩੭੨. ‘‘ਕਤਮੋ ਚ, ਭਿਕ੍ਖਵੇ, ਅਸਙ੍ਖਤਗਾਮਿਮਗ੍ਗੋ? ਚਤ੍ਤਾਰੋ ਇਦ੍ਧਿਪਾਦਾ. ਅਯਂ ਵੁਚ੍ਚਤਿ, ਭਿਕ੍ਖਵੇ, ਅਸਙ੍ਖਤਗਾਮਿਮਗ੍ਗੋ…ਪੇ…. ਸਤ੍ਤਮਂ.

੮. ਇਨ੍ਦ੍ਰਿਯਸੁਤ੍ਤਂ

੩੭੩. ‘‘ਕਤਮੋ ਚ, ਭਿਕ੍ਖਵੇ, ਅਸਙ੍ਖਤਗਾਮਿਮਗ੍ਗੋ? ਪਞ੍ਚਿਨ੍ਦ੍ਰਿਯਾਨਿ. ਅਯਂ ਵੁਚ੍ਚਤਿ, ਭਿਕ੍ਖਵੇ, ਅਸਙ੍ਖਤਗਾਮਿਮਗ੍ਗੋ…ਪੇ…. ਅਟ੍ਠਮਂ.

੯. ਬਲਸੁਤ੍ਤਂ

੩੭੪. ‘‘ਕਤਮੋ ਚ, ਭਿਕ੍ਖਵੇ, ਅਸਙ੍ਖਤਗਾਮਿਮਗ੍ਗੋ? ਪਞ੍ਚ ਬਲਾਨਿ. ਅਯਂ ਵੁਚ੍ਚਤਿ, ਭਿਕ੍ਖਵੇ, ਅਸਙ੍ਖਤਗਾਮਿਮਗ੍ਗੋ…ਪੇ…. ਨਵਮਂ.

੧੦. ਬੋਜ੍ਝਙ੍ਗਸੁਤ੍ਤਂ

੩੭੫. ‘‘ਕਤਮੋ ਚ, ਭਿਕ੍ਖਵੇ, ਅਸਙ੍ਖਤਗਾਮਿਮਗ੍ਗੋ? ਸਤ੍ਤ ਬੋਜ੍ਝਙ੍ਗਾ. ਅਯਂ ਵੁਚ੍ਚਤਿ, ਭਿਕ੍ਖਵੇ, ਅਸਙ੍ਖਤਗਾਮਿਮਗ੍ਗੋ…ਪੇ…. ਦਸਮਂ.

੧੧. ਮਗ੍ਗਙ੍ਗਸੁਤ੍ਤਂ

੩੭੬. ‘‘ਕਤਮੋ ਚ, ਭਿਕ੍ਖਵੇ, ਅਸਙ੍ਖਤਗਾਮਿਮਗ੍ਗੋ? ਅਰਿਯੋ ਅਟ੍ਠਙ੍ਗਿਕੋ ਮਗ੍ਗੋ. ਅਯਂ ਵੁਚ੍ਚਤਿ, ਭਿਕ੍ਖਵੇ, ਅਸਙ੍ਖਤਗਾਮਿਮਗ੍ਗੋ. ਇਤਿ ਖੋ, ਭਿਕ੍ਖਵੇ, ਦੇਸਿਤਂ ਵੋ ਮਯਾ ਅਸਙ੍ਖਤਂ, ਦੇਸਿਤੋ ਅਸਙ੍ਖਤਗਾਮਿਮਗ੍ਗੋ. ਯਂ, ਭਿਕ੍ਖਵੇ, ਸਤ੍ਥਾਰਾ ਕਰਣੀਯਂ ਸਾਵਕਾਨਂ ਹਿਤੇਸਿਨਾ ਅਨੁਕਮ੍ਪਕੇਨ ਅਨੁਕਮ੍ਪਂ ਉਪਾਦਾਯ ਕਤਂ ਵੋ ਤਂ ਮਯਾ. ਏਤਾਨਿ, ਭਿਕ੍ਖਵੇ, ਰੁਕ੍ਖਮੂਲਾਨਿ, ਏਤਾਨਿ ਸੁਞ੍ਞਾਗਾਰਾਨਿ. ਝਾਯਥ, ਭਿਕ੍ਖਵੇ, ਮਾ ਪਮਾਦਤ੍ਥ; ਮਾ ਪਚ੍ਛਾ ਵਿਪ੍ਪਟਿਸਾਰਿਨੋ ਅਹੁਵਤ੍ਥ. ਅਯਂ ਵੋ ਅਮ੍ਹਾਕਂ ਅਨੁਸਾਸਨੀ’’ਤਿ. ਏਕਾਦਸਮਂ.

ਪਠਮੋ ਵਗ੍ਗੋ.

ਤਸ੍ਸੁਦ੍ਦਾਨਂ –

ਕਾਯੋ ਸਮਥੋ ਸਵਿਤਕ੍ਕੋ, ਸੁਞ੍ਞਤੋ ਸਤਿਪਟ੍ਠਾਨਾ;

ਸਮ੍ਮਪ੍ਪਧਾਨਾ ਇਦ੍ਧਿਪਾਦਾ, ਇਨ੍ਦ੍ਰਿਯਬਲਬੋਜ੍ਝਙ੍ਗਾ;

ਮਗ੍ਗੇਨ ਏਕਾਦਸਮਂ, ਤਸ੍ਸੁਦ੍ਦਾਨਂ ਪਵੁਚ੍ਚਤਿ.

੨. ਦੁਤਿਯਵਗ੍ਗੋ

੧. ਅਸਙ੍ਖਤਸੁਤ੍ਤਂ

੩੭੭. ‘‘ਅਸਙ੍ਖਤਞ੍ਚ ਵੋ, ਭਿਕ੍ਖਵੇ, ਦੇਸੇਸ੍ਸਾਮਿ ਅਸਙ੍ਖਤਗਾਮਿਞ੍ਚ ਮਗ੍ਗਂ. ਤਂ ਸੁਣਾਥ. ਕਤਮਞ੍ਚ, ਭਿਕ੍ਖਵੇ, ਅਸਙ੍ਖਤਂ? ਯੋ, ਭਿਕ੍ਖਵੇ, ਰਾਗਕ੍ਖਯੋ ਦੋਸਕ੍ਖਯੋ ਮੋਹਕ੍ਖਯੋ – ਇਦਂ ਵੁਚ੍ਚਤਿ, ਭਿਕ੍ਖਵੇ, ਅਸਙ੍ਖਤਂ. ਕਤਮੋ ਚ, ਭਿਕ੍ਖਵੇ, ਅਸਙ੍ਖਤਗਾਮਿਮਗ੍ਗੋ? ਸਮਥੋ. ਅਯਂ ਵੁਚ੍ਚਤਿ, ਭਿਕ੍ਖਵੇ, ਅਸਙ੍ਖਤਗਾਮਿਮਗ੍ਗੋ. ਇਤਿ ਖੋ, ਭਿਕ੍ਖਵੇ, ਦੇਸਿਤਂ ਵੋ ਮਯਾ ਅਸਙ੍ਖਤਂ, ਦੇਸਿਤੋ ਅਸਙ੍ਖਤਗਾਮਿਮਗ੍ਗੋ. ਯਂ, ਭਿਕ੍ਖਵੇ, ਸਤ੍ਥਾਰਾ ਕਰਣੀਯਂ ਸਾਵਕਾਨਂ ਹਿਤੇਸਿਨਾ ਅਨੁਕਮ੍ਪਕੇਨ ਅਨੁਕਮ੍ਪਂ ਉਪਾਦਾਯ, ਕਤਂ ਵੋ ਤਂ ਮਯਾ. ਏਤਾਨਿ, ਭਿਕ੍ਖਵੇ, ਰੁਕ੍ਖਮੂਲਾਨਿ, ਏਤਾਨਿ ਸੁਞ੍ਞਾਗਾਰਾਨਿ. ਝਾਯਥ, ਭਿਕ੍ਖਵੇ, ਮਾ ਪਮਾਦਤ੍ਥ; ਮਾ ਪਚ੍ਛਾ ਵਿਪ੍ਪਟਿਸਾਰਿਨੋ ਅਹੁਵਤ੍ਥ. ਅਯਂ ਵੋ ਅਮ੍ਹਾਕਂ ਅਨੁਸਾਸਨੀਤਿ.

‘‘ਅਸਙ੍ਖਤਞ੍ਚ ਵੋ, ਭਿਕ੍ਖਵੇ, ਦੇਸੇਸ੍ਸਾਮਿ ਅਸਙ੍ਖਤਗਾਮਿਞ੍ਚ ਮਗ੍ਗਂ. ਤਂ ਸੁਣਾਥ. ਕਤਮਞ੍ਚ, ਭਿਕ੍ਖਵੇ, ਅਸਙ੍ਖਤਂ? ਯੋ, ਭਿਕ੍ਖਵੇ, ਰਾਗਕ੍ਖਯੋ ਦੋਸਕ੍ਖਯੋ ਮੋਹਕ੍ਖਯੋ – ਇਦਂ ਵੁਚ੍ਚਤਿ, ਭਿਕ੍ਖਵੇ, ਅਸਙ੍ਖਤਂ. ਕਤਮੋ ਚ, ਭਿਕ੍ਖਵੇ, ਅਸਙ੍ਖਤਗਾਮਿਮਗ੍ਗੋ? ਵਿਪਸ੍ਸਨਾ. ਅਯਂ ਵੁਚ੍ਚਤਿ, ਭਿਕ੍ਖਵੇ, ਅਸਙ੍ਖਤਗਾਮਿਮਗ੍ਗੋ. ਇਤਿ ਖੋ, ਭਿਕ੍ਖਵੇ, ਦੇਸਿਤਂ ਵੋ ਮਯਾ ਅਸਙ੍ਖਤਂ…ਪੇ… ਅਯਂ ਵੋ ਅਮ੍ਹਾਕਂ ਅਨੁਸਾਸਨੀਤਿ.

‘‘ਕਤਮੋ ਚ, ਭਿਕ੍ਖਵੇ, ਅਸਙ੍ਖਤਗਾਮਿਮਗ੍ਗੋ? ਸਵਿਤਕ੍ਕੋ ਸਵਿਚਾਰੋ ਸਮਾਧਿ. ਅਯਂ ਵੁਚ੍ਚਤਿ, ਭਿਕ੍ਖਵੇ, ਅਸਙ੍ਖਤਗਾਮਿਮਗ੍ਗੋ…ਪੇ… ਕਤਮੋ ਚ, ਭਿਕ੍ਖਵੇ, ਅਸਙ੍ਖਤਗਾਮਿਮਗ੍ਗੋ? ਅਵਿਤਕ੍ਕੋ ਵਿਚਾਰਮਤ੍ਤੋ ਸਮਾਧਿ. ਅਯਂ ਵੁਚ੍ਚਤਿ, ਭਿਕ੍ਖਵੇ, ਅਸਙ੍ਖਤਗਾਮਿਮਗ੍ਗੋ…ਪੇ… ਕਤਮੋ ਚ, ਭਿਕ੍ਖਵੇ, ਅਸਙ੍ਖਤਗਾਮਿਮਗ੍ਗੋ? ਅਵਿਤਕ੍ਕੋ ਅਵਿਚਾਰੋ ਸਮਾਧਿ. ਅਯਂ ਵੁਚ੍ਚਤਿ, ਭਿਕ੍ਖਵੇ, ਅਸਙ੍ਖਤਗਾਮਿਮਗ੍ਗੋ…ਪੇ….

‘‘ਕਤਮੋ ਚ, ਭਿਕ੍ਖਵੇ, ਅਸਙ੍ਖਤਗਾਮਿਮਗ੍ਗੋ? ਸੁਞ੍ਞਤੋ ਸਮਾਧਿ. ਅਯਂ ਵੁਚ੍ਚਤਿ, ਭਿਕ੍ਖਵੇ, ਅਸਙ੍ਖਤਗਾਮਿਮਗ੍ਗੋ…ਪੇ… ਕਤਮੋ ਚ, ਭਿਕ੍ਖਵੇ, ਅਸਙ੍ਖਤਗਾਮਿਮਗ੍ਗੋ? ਅਨਿਮਿਤ੍ਤੋ ਸਮਾਧਿ. ਅਯਂ ਵੁਚ੍ਚਤਿ, ਭਿਕ੍ਖਵੇ, ਅਸਙ੍ਖਤਗਾਮਿਮਗ੍ਗੋ…ਪੇ… ਕਤਮੋ ਚ, ਭਿਕ੍ਖਵੇ, ਅਸਙ੍ਖਤਗਾਮਿਮਗ੍ਗੋ? ਅਪ੍ਪਣਿਹਿਤੋ ਸਮਾਧਿ. ਅਯਂ ਵੁਚ੍ਚਤਿ, ਭਿਕ੍ਖਵੇ, ਅਸਙ੍ਖਤਗਾਮਿਮਗ੍ਗੋ…ਪੇ….

‘‘ਕਤਮੋ ਚ, ਭਿਕ੍ਖਵੇ, ਅਸਙ੍ਖਤਗਾਮਿਮਗ੍ਗੋ? ਇਧ, ਭਿਕ੍ਖਵੇ, ਭਿਕ੍ਖੁ ਕਾਯੇ ਕਾਯਾਨੁਪਸ੍ਸੀ ਵਿਹਰਤਿ ਆਤਾਪੀ ਸਮ੍ਪਜਾਨੋ ਸਤਿਮਾ ਵਿਨੇਯ੍ਯ ਲੋਕੇ ਅਭਿਜ੍ਝਾਦੋਮਨਸ੍ਸਂ. ਅਯਂ ਵੁਚ੍ਚਤਿ, ਭਿਕ੍ਖਵੇ, ਅਸਙ੍ਖਤਗਾਮਿਮਗ੍ਗੋ…ਪੇ… ਕਤਮੋ ਚ, ਭਿਕ੍ਖਵੇ, ਅਸਙ੍ਖਤਗਾਮਿਮਗ੍ਗੋ? ਇਧ, ਭਿਕ੍ਖਵੇ, ਭਿਕ੍ਖੁ ਵੇਦਨਾਸੁ ਵੇਦਨਾਨੁਪਸ੍ਸੀ ਵਿਹਰਤਿ…ਪੇ… ਅਯਂ ਵੁਚ੍ਚਤਿ, ਭਿਕ੍ਖਵੇ, ਅਸਙ੍ਖਤਗਾਮਿਮਗ੍ਗੋ…ਪੇ… ਕਤਮੋ ਚ, ਭਿਕ੍ਖਵੇ, ਅਸਙ੍ਖਤਗਾਮਿਮਗ੍ਗੋ? ਇਧ, ਭਿਕ੍ਖਵੇ, ਭਿਕ੍ਖੁ ਚਿਤ੍ਤੇ ਚਿਤ੍ਤਾਨੁਪਸ੍ਸੀ…ਪੇ… ਅਯਂ ਵੁਚ੍ਚਤਿ, ਭਿਕ੍ਖਵੇ, ਅਸਙ੍ਖਤਗਾਮਿਮਗ੍ਗੋ…ਪੇ… ਕਤਮੋ ਚ, ਭਿਕ੍ਖਵੇ, ਅਸਙ੍ਖਤਗਾਮਿਮਗ੍ਗੋ? ਇਧ, ਭਿਕ੍ਖਵੇ, ਭਿਕ੍ਖੁ ਧਮ੍ਮੇਸੁ ਧਮ੍ਮਾਨੁਪਸ੍ਸੀ ਵਿਹਰਤਿ…ਪੇ… ਅਯਂ ਵੁਚ੍ਚਤਿ, ਭਿਕ੍ਖਵੇ, ਅਸਙ੍ਖਤਗਾਮਿਮਗ੍ਗੋ…ਪੇ….

‘‘ਕਤਮੋ ਚ, ਭਿਕ੍ਖਵੇ, ਅਸਙ੍ਖਤਗਾਮਿਮਗ੍ਗੋ? ਇਧ, ਭਿਕ੍ਖਵੇ, ਭਿਕ੍ਖੁ ਅਨੁਪ੍ਪਨ੍ਨਾਨਂ ਪਾਪਕਾਨਂ ਅਕੁਸਲਾਨਂ ਧਮ੍ਮਾਨਂ ਅਨੁਪ੍ਪਾਦਾ ਛਨ੍ਦਂ ਜਨੇਤਿ ਵਾਯਮਤਿ ਵੀਰਿਯਂ ਆਰਭਤਿ ਚਿਤ੍ਤਂ ਪਗ੍ਗਣ੍ਹਾਤਿ ਪਦਹਤਿ. ਅਯਂ ਵੁਚ੍ਚਤਿ, ਭਿਕ੍ਖਵੇ, ਅਸਙ੍ਖਤਗਾਮਿਮਗ੍ਗੋ…ਪੇ… ਕਤਮੋ ਚ, ਭਿਕ੍ਖਵੇ, ਅਸਙ੍ਖਤਗਾਮਿਮਗ੍ਗੋ? ਇਧ, ਭਿਕ੍ਖਵੇ, ਭਿਕ੍ਖੁ ਉਪ੍ਪਨ੍ਨਾਨਂ ਪਾਪਕਾਨਂ ਅਕੁਸਲਾਨਂ ਧਮ੍ਮਾਨਂ ਪਹਾਨਾ ਛਨ੍ਦਂ ਜਨੇਤਿ ਵਾਯਮਤਿ ਵੀਰਿਯਂ ਆਰਭਤਿ ਚਿਤ੍ਤਂ ਪਗ੍ਗਣ੍ਹਾਤਿ ਪਦਹਤਿ. ਅਯਂ ਵੁਚ੍ਚਤਿ, ਭਿਕ੍ਖਵੇ, ਅਸਙ੍ਖਤਗਾਮਿਮਗ੍ਗੋ…ਪੇ… ਕਤਮੋ ਚ, ਭਿਕ੍ਖਵੇ, ਅਸਙ੍ਖਤਗਾਮਿਮਗ੍ਗੋ? ਇਧ, ਭਿਕ੍ਖਵੇ, ਭਿਕ੍ਖੁ ਅਨੁਪ੍ਪਨ੍ਨਾਨਂ ਕੁਸਲਾਨਂ ਧਮ੍ਮਾਨਂ ਉਪ੍ਪਾਦਾ ਛਨ੍ਦਂ ਜਨੇਤਿ ਵਾਯਮਤਿ ਵੀਰਿਯਂ ਆਰਭਤਿ ਚਿਤ੍ਤਂ ਪਗ੍ਗਣ੍ਹਾਤਿ ਪਦਹਤਿ. ਅਯਂ ਵੁਚ੍ਚਤਿ, ਭਿਕ੍ਖਵੇ, ਅਸਙ੍ਖਤਗਾਮਿਮਗ੍ਗੋ…ਪੇ… ਕਤਮੋ ਚ, ਭਿਕ੍ਖਵੇ, ਅਸਙ੍ਖਤਗਾਮਿਮਗ੍ਗੋ? ਇਧ, ਭਿਕ੍ਖਵੇ, ਭਿਕ੍ਖੁ ਉਪ੍ਪਨ੍ਨਾਨਂ ਕੁਸਲਾਨਂ ਧਮ੍ਮਾਨਂ ਠਿਤਿਯਾ ਅਸਮ੍ਮੋਸਾਯ ਭਿਯ੍ਯੋਭਾਵਾਯ ਵੇਪੁਲ੍ਲਾਯ ਭਾਵਨਾਯ ਪਾਰਿਪੂਰਿਯਾ ਛਨ੍ਦਂ ਜਨੇਤਿ ਵਾਯਮਤਿ ਵੀਰਿਯਂ ਆਰਭਤਿ ਚਿਤ੍ਤਂ ਪਗ੍ਗਣ੍ਹਾਤਿ ਪਦਹਤਿ. ਅਯਂ ਵੁਚ੍ਚਤਿ, ਭਿਕ੍ਖਵੇ, ਅਸਙ੍ਖਤਗਾਮਿਮਗ੍ਗੋ…ਪੇ….

‘‘ਕਤਮੋ ਚ, ਭਿਕ੍ਖਵੇ, ਅਸਙ੍ਖਤਗਾਮਿਮਗ੍ਗੋ? ਇਧ, ਭਿਕ੍ਖਵੇ, ਭਿਕ੍ਖੁ ਛਨ੍ਦਸਮਾਧਿਪਧਾਨਸਙ੍ਖਾਰਸਮਨ੍ਨਾਗਤਂ ਇਦ੍ਧਿਪਾਦਂ ਭਾਵੇਤਿ. ਅਯਂ ਵੁਚ੍ਚਤਿ, ਭਿਕ੍ਖਵੇ, ਅਸਙ੍ਖਤਗਾਮਿਮਗ੍ਗੋ …ਪੇ… ਕਤਮੋ ਚ, ਭਿਕ੍ਖਵੇ, ਅਸਙ੍ਖਤਗਾਮਿਮਗ੍ਗੋ? ਇਧ, ਭਿਕ੍ਖਵੇ, ਭਿਕ੍ਖੁ ਵੀਰਿਯਸਮਾਧਿਪਧਾਨਸਙ੍ਖਾਰਸਮਨ੍ਨਾਗਤਂ ਇਦ੍ਧਿਪਾਦਂ ਭਾਵੇਤਿ. ਅਯਂ ਵੁਚ੍ਚਤਿ, ਭਿਕ੍ਖਵੇ, ਅਸਙ੍ਖਤਗਾਮਿਮਗ੍ਗੋ…ਪੇ… ਕਤਮੋ ਚ, ਭਿਕ੍ਖਵੇ, ਅਸਙ੍ਖਤਗਾਮਿਮਗ੍ਗੋ? ਇਧ, ਭਿਕ੍ਖਵੇ, ਭਿਕ੍ਖੁ ਚਿਤ੍ਤਸਮਾਧਿਪਧਾਨਸਙ੍ਖਾਰਸਮਨ੍ਨਾਗਤਂ ਇਦ੍ਧਿਪਾਦਂ ਭਾਵੇਤਿ. ਅਯਂ ਵੁਚ੍ਚਤਿ, ਭਿਕ੍ਖਵੇ, ਅਸਙ੍ਖਤਗਾਮਿਮਗ੍ਗੋ…ਪੇ… ਕਤਮੋ ਚ, ਭਿਕ੍ਖਵੇ, ਅਸਙ੍ਖਤਗਾਮਿਮਗ੍ਗੋ? ਇਧ, ਭਿਕ੍ਖਵੇ, ਭਿਕ੍ਖੁ ਵੀਮਂਸਸਮਾਧਿਪਧਾਨਸਙ੍ਖਾਰਸਮਨ੍ਨਾਗਤਂ ਇਦ੍ਧਿਪਾਦਂ ਭਾਵੇਤਿ. ਅਯਂ ਵੁਚ੍ਚਤਿ, ਭਿਕ੍ਖਵੇ, ਅਸਙ੍ਖਤਗਾਮਿਮਗ੍ਗੋ…ਪੇ….

‘‘ਕਤਮੋ ਚ, ਭਿਕ੍ਖਵੇ, ਅਸਙ੍ਖਤਗਾਮਿਮਗ੍ਗੋ? ਇਧ, ਭਿਕ੍ਖਵੇ, ਭਿਕ੍ਖੁ ਸਦ੍ਧਿਨ੍ਦ੍ਰਿਯਂ ਭਾਵੇਤਿ ਵਿਵੇਕਨਿਸ੍ਸਿਤਂ ਵਿਰਾਗਨਿਸ੍ਸਿਤਂ ਨਿਰੋਧਨਿਸ੍ਸਿਤਂ ਵੋਸ੍ਸਗ੍ਗਪਰਿਣਾਮਿਂ. ਅਯਂ ਵੁਚ੍ਚਤਿ, ਭਿਕ੍ਖਵੇ, ਅਸਙ੍ਖਤਗਾਮਿਮਗ੍ਗੋ…ਪੇ… ਕਤਮੋ ਚ, ਭਿਕ੍ਖਵੇ, ਅਸਙ੍ਖਤਗਾਮਿਮਗ੍ਗੋ? ਇਧ, ਭਿਕ੍ਖਵੇ, ਭਿਕ੍ਖੁ ਵੀਰਿਯਿਨ੍ਦ੍ਰਿਯਂ ਭਾਵੇਤਿ ਵਿਵੇਕਨਿਸ੍ਸਿਤਂ…ਪੇ… ਅਯਂ ਵੁਚ੍ਚਤਿ, ਭਿਕ੍ਖਵੇ, ਅਸਙ੍ਖਤਗਾਮਿਮਗ੍ਗੋ…ਪੇ… ਕਤਮੋ ਚ, ਭਿਕ੍ਖਵੇ, ਅਸਙ੍ਖਤਗਾਮਿਮਗ੍ਗੋ? ਇਧ, ਭਿਕ੍ਖਵੇ, ਭਿਕ੍ਖੁ ਸਤਿਨ੍ਦ੍ਰਿਯਂ ਭਾਵੇਤਿ…ਪੇ… ਅਯਂ ਵੁਚ੍ਚਤਿ, ਭਿਕ੍ਖਵੇ, ਅਸਙ੍ਖਤਗਾਮਿਮਗ੍ਗੋ…ਪੇ… ਕਤਮੋ ਚ, ਭਿਕ੍ਖਵੇ, ਅਸਙ੍ਖਤਗਾਮਿਮਗ੍ਗੋ? ਇਧ, ਭਿਕ੍ਖਵੇ, ਭਿਕ੍ਖੁ ਸਮਾਧਿਨ੍ਦ੍ਰਿਯਂ ਭਾਵੇਤਿ…ਪੇ… ਅਯਂ ਵੁਚ੍ਚਤਿ, ਭਿਕ੍ਖਵੇ, ਅਸਙ੍ਖਤਗਾਮਿਮਗ੍ਗੋ…ਪੇ… ਕਤਮੋ ਚ, ਭਿਕ੍ਖਵੇ, ਅਸਙ੍ਖਤਗਾਮਿਮਗ੍ਗੋ? ਇਧ, ਭਿਕ੍ਖਵੇ, ਭਿਕ੍ਖੁ ਪਞ੍ਞਿਨ੍ਦ੍ਰਿਯਂ ਭਾਵੇਤਿ ਵਿਵੇਕਨਿਸ੍ਸਿਤਂ ਵਿਰਾਗਨਿਸ੍ਸਿਤਂ ਨਿਰੋਧਨਿਸ੍ਸਿਤਂ ਵੋਸ੍ਸਗ੍ਗਪਰਿਣਾਮਿਂ. ਅਯਂ ਵੁਚ੍ਚਤਿ, ਭਿਕ੍ਖਵੇ, ਅਸਙ੍ਖਤਗਾਮਿਮਗ੍ਗੋ…ਪੇ….

‘‘ਕਤਮੋ ਚ, ਭਿਕ੍ਖਵੇ, ਅਸਙ੍ਖਤਗਾਮਿਮਗ੍ਗੋ? ਇਧ, ਭਿਕ੍ਖਵੇ, ਭਿਕ੍ਖੁ ਸਦ੍ਧਾਬਲਂ ਭਾਵੇਤਿ ਵਿਵੇਕਨਿਸ੍ਸਿਤਂ…ਪੇ… ਅਯਂ ਵੁਚ੍ਚਤਿ, ਭਿਕ੍ਖਵੇ, ਅਸਙ੍ਖਤਗਾਮਿਮਗ੍ਗੋ…ਪੇ… ਕਤਮੋ ਚ, ਭਿਕ੍ਖਵੇ, ਅਸਙ੍ਖਤਗਾਮਿਮਗ੍ਗੋ? ਇਧ, ਭਿਕ੍ਖਵੇ, ਭਿਕ੍ਖੁ ਵੀਰਿਯਬਲਂ ਭਾਵੇਤਿ…ਪੇ… ਅਯਂ ਵੁਚ੍ਚਤਿ, ਭਿਕ੍ਖਵੇ, ਅਸਙ੍ਖਤਗਾਮਿਮਗ੍ਗੋ…ਪੇ… ਕਤਮੋ ਚ, ਭਿਕ੍ਖਵੇ, ਅਸਙ੍ਖਤਗਾਮਿਮਗ੍ਗੋ? ਇਧ, ਭਿਕ੍ਖਵੇ, ਭਿਕ੍ਖੁ ਸਤਿਬਲਂ ਭਾਵੇਤਿ…ਪੇ… ਅਯਂ ਵੁਚ੍ਚਤਿ, ਭਿਕ੍ਖਵੇ, ਅਸਙ੍ਖਤਗਾਮਿਮਗ੍ਗੋ…ਪੇ… ਕਤਮੋ ਚ, ਭਿਕ੍ਖਵੇ, ਅਸਙ੍ਖਤਗਾਮਿਮਗ੍ਗੋ? ਇਧ, ਭਿਕ੍ਖਵੇ, ਭਿਕ੍ਖੁ ਸਮਾਧਿਬਲਂ ਭਾਵੇਤਿ…ਪੇ… ਅਯਂ ਵੁਚ੍ਚਤਿ, ਭਿਕ੍ਖਵੇ, ਅਸਙ੍ਖਤਗਾਮਿਮਗ੍ਗੋ…ਪੇ… ਕਤਮੋ ਚ, ਭਿਕ੍ਖਵੇ, ਅਸਙ੍ਖਤਗਾਮਿਮਗ੍ਗੋ? ਇਧ, ਭਿਕ੍ਖਵੇ, ਭਿਕ੍ਖੁ ਪਞ੍ਞਾਬਲਂ ਭਾਵੇਤਿ ਵਿਵੇਕਨਿਸ੍ਸਿਤਂ ਵਿਰਾਗਨਿਸ੍ਸਿਤਂ ਨਿਰੋਧਨਿਸ੍ਸਿਤਂ ਵੋਸ੍ਸਗ੍ਗਪਰਿਣਾਮਿਂ. ਅਯਂ ਵੁਚ੍ਚਤਿ, ਭਿਕ੍ਖਵੇ, ਅਸਙ੍ਖਤਗਾਮਿਮਗ੍ਗੋ…ਪੇ….

‘‘ਕਤਮੋ ਚ, ਭਿਕ੍ਖਵੇ, ਅਸਙ੍ਖਤਗਾਮਿਮਗ੍ਗੋ? ਇਧ, ਭਿਕ੍ਖਵੇ, ਭਿਕ੍ਖੁ ਸਤਿਸਮ੍ਬੋਜ੍ਝਙ੍ਗਂ ਭਾਵੇਤਿ…ਪੇ… ਅਯਂ ਵੁਚ੍ਚਤਿ, ਭਿਕ੍ਖਵੇ, ਅਸਙ੍ਖਤਗਾਮਿਮਗ੍ਗੋ…ਪੇ… ਕਤਮੋ ਚ, ਭਿਕ੍ਖਵੇ, ਅਸਙ੍ਖਤਗਾਮਿਮਗ੍ਗੋ? ਇਧ, ਭਿਕ੍ਖਵੇ, ਭਿਕ੍ਖੁ ਧਮ੍ਮਵਿਚਯਸਮ੍ਬੋਜ੍ਝਙ੍ਗਂ ਭਾਵੇਤਿ…ਪੇ… ਵੀਰਿਯਸਮ੍ਬੋਜ੍ਝਙ੍ਗਂ ਭਾਵੇਤਿ…ਪੇ… ਪੀਤਿਸਮ੍ਬੋਜ੍ਝਙ੍ਗਂ ਭਾਵੇਤਿ…ਪੇ… ਪਸ੍ਸਦ੍ਧਿਸਮ੍ਬੋਜ੍ਝਙ੍ਗਂ ਭਾਵੇਤਿ…ਪੇ… ਸਮਾਧਿਸਮ੍ਬੋਜ੍ਝਙ੍ਗਂ ਭਾਵੇਤਿ…ਪੇ… ਉਪੇਕ੍ਖਾਸਮ੍ਬੋਜ੍ਝਙ੍ਗਂ ਭਾਵੇਤਿ ਵਿਵੇਕਨਿਸ੍ਸਿਤਂ ਵਿਰਾਗਨਿਸ੍ਸਿਤਂ ਨਿਰੋਧਨਿਸ੍ਸਿਤਂ ਵੋਸ੍ਸਗ੍ਗਪਰਿਣਾਮਿਂ. ਅਯਂ ਵੁਚ੍ਚਤਿ, ਭਿਕ੍ਖਵੇ, ਅਸਙ੍ਖਤਗਾਮਿਮਗ੍ਗੋ…ਪੇ….

‘‘ਕਤਮੋ ਚ, ਭਿਕ੍ਖਵੇ, ਅਸਙ੍ਖਤਗਾਮਿਮਗ੍ਗੋ? ਇਧ, ਭਿਕ੍ਖਵੇ, ਭਿਕ੍ਖੁ ਸਮ੍ਮਾਦਿਟ੍ਠਿਂ ਭਾਵੇਤਿ ਵਿਵੇਕਨਿਸ੍ਸਿਤਂ ਵਿਰਾਗਨਿਸ੍ਸਿਤਂ ਨਿਰੋਧਨਿਸ੍ਸਿਤਂ ਵੋਸ੍ਸਗ੍ਗਪਰਿਣਾਮਿਂ. ਅਯਂ ਵੁਚ੍ਚਤਿ, ਭਿਕ੍ਖਵੇ, ਅਸਙ੍ਖਤਗਾਮਿਮਗ੍ਗੋ…ਪੇ… ਕਤਮੋ ਚ, ਭਿਕ੍ਖਵੇ, ਅਸਙ੍ਖਤਗਾਮਿਮਗ੍ਗੋ? ਇਧ, ਭਿਕ੍ਖਵੇ, ਭਿਕ੍ਖੁ ਸਮ੍ਮਾਸਙ੍ਕਪ੍ਪਂ ਭਾਵੇਤਿ …ਪੇ… ਸਮ੍ਮਾਵਾਚਂ ਭਾਵੇਤਿ…ਪੇ… ਸਮ੍ਮਾਕਮ੍ਮਨ੍ਤਂ ਭਾਵੇਤਿ…ਪੇ… ਸਮ੍ਮਾਆਜੀਵਂ ਭਾਵੇਤਿ…ਪੇ… ਸਮ੍ਮਾਵਾਯਾਮਂ ਭਾਵੇਤਿ…ਪੇ… ਸਮ੍ਮਾਸਤਿਂ ਭਾਵੇਤਿ…ਪੇ… ਅਸਙ੍ਖਤਞ੍ਚ ਵੋ ਭਿਕ੍ਖਵੇ, ਦੇਸੇਸ੍ਸਾਮਿ ਅਸਙ੍ਖਤਗਾਮਿਞ੍ਚ ਮਗ੍ਗਂ. ਤਂ ਸੁਣਾਥ. ਕਤਮਞ੍ਚ, ਭਿਕ੍ਖਵੇ, ਅਸਙ੍ਖਤਂ…ਪੇ…? ਕਤਮੋ ਚ, ਭਿਕ੍ਖਵੇ, ਅਸਙ੍ਖਤਗਾਮਿਮਗ੍ਗੋ? ਇਧ, ਭਿਕ੍ਖਵੇ, ਭਿਕ੍ਖੁ ਸਮ੍ਮਾਸਮਾਧਿਂ ਭਾਵੇਤਿ ਵਿਵੇਕਨਿਸ੍ਸਿਤਂ ਵਿਰਾਗਨਿਸ੍ਸਿਤਂ ਨਿਰੋਧਨਿਸ੍ਸਿਤਂ ਵੋਸ੍ਸਗ੍ਗਪਰਿਣਾਮਿਂ. ਅਯਂ ਵੁਚ੍ਚਤਿ, ਭਿਕ੍ਖਵੇ, ਅਸਙ੍ਖਤਗਾਮਿਮਗ੍ਗੋ. ਇਤਿ ਖੋ, ਭਿਕ੍ਖਵੇ, ਦੇਸਿਤਂ ਵੋ ਮਯਾ ਅਸਙ੍ਖਤਂ, ਦੇਸਿਤੋ ਅਸਙ੍ਖਤਗਾਮਿਮਗ੍ਗੋ. ਯਂ, ਭਿਕ੍ਖਵੇ, ਸਤ੍ਥਾਰਾ ਕਰਣੀਯਂ ਸਾਵਕਾਨਂ ਹਿਤੇਸਿਨਾ ਅਨੁਕਮ੍ਪਕੇਨ ਅਨੁਕਮ੍ਪਂ ਉਪਾਦਾਯ, ਕਤਂ ਵੋ ਤਂ ਮਯਾ. ਏਤਾਨਿ, ਭਿਕ੍ਖਵੇ, ਰੁਕ੍ਖਮੂਲਾਨਿ, ਏਤਾਨਿ ਸੁਞ੍ਞਾਗਾਰਾਨਿ. ਝਾਯਥ, ਭਿਕ੍ਖਵੇ, ਮਾ ਪਮਾਦਤ੍ਥ; ਮਾ ਪਚ੍ਛਾ ਵਿਪ੍ਪਟਿਸਾਰਿਨੋ ਅਹੁਵਤ੍ਥ. ਅਯਂ ਵੋ ਅਮ੍ਹਾਕਂ ਅਨੁਸਾਸਨੀ’’ਤਿ. ਪਠਮਂ.

੨. ਅਨਤਸੁਤ੍ਤਂ

੩੭੮. ‘‘ਅਨਤਞ੍ਚ ਵੋ, ਭਿਕ੍ਖਵੇ, ਦੇਸੇਸ੍ਸਾਮਿ, ਅਨਤਗਾਮਿਞ੍ਚ ਮਗ੍ਗਂ. ਤਂ ਸੁਣਾਥ. ਕਤਮਞ੍ਚ, ਭਿਕ੍ਖਵੇ, ਅਨਤਂ…ਪੇ…’’. (ਯਥਾ ਅਸਙ੍ਖਤਂ ਤਥਾ ਵਿਤ੍ਥਾਰੇਤਬ੍ਬਂ). ਦੁਤਿਯਂ.

੩-੩੨. ਅਨਾਸਵਾਦਿਸੁਤ੍ਤਂ

੩੭੯-੪੦੮. ‘‘ਅਨਾਸਵਞ੍ਚ ਵੋ, ਭਿਕ੍ਖਵੇ, ਦੇਸੇਸ੍ਸਾਮਿ ਅਨਾਸਵਗਾਮਿਞ੍ਚ ਮਗ੍ਗਂ. ਤਂ ਸੁਣਾਥ. ਕਤਮਞ੍ਚ, ਭਿਕ੍ਖਵੇ, ਅਨਾਸਵਂ…ਪੇ… ਸਚ੍ਚਞ੍ਚ ਵੋ, ਭਿਕ੍ਖਵੇ, ਦੇਸੇਸ੍ਸਾਮਿ ਸਚ੍ਚਗਾਮਿਞ੍ਚ ਮਗ੍ਗਂ. ਤਂ ਸੁਣਾਥ. ਕਤਮਞ੍ਚ, ਭਿਕ੍ਖਵੇ, ਸਚ੍ਚਂ…ਪੇ… ਪਾਰਞ੍ਚ ਵੋ, ਭਿਕ੍ਖਵੇ, ਦੇਸੇਸ੍ਸਾਮਿ ਪਾਰਗਾਮਿਞ੍ਚ ਮਗ੍ਗਂ. ਤਂ ਸੁਣਾਥ. ਕਤਮਞ੍ਚ, ਭਿਕ੍ਖਵੇ, ਪਾਰਂ…ਪੇ… ਨਿਪੁਣਞ੍ਚ ਵੋ, ਭਿਕ੍ਖਵੇ, ਦੇਸੇਸ੍ਸਾਮਿ ਨਿਪੁਣਗਾਮਿਞ੍ਚ ਮਗ੍ਗਂ. ਤਂ ਸੁਣਾਥ. ਕਤਮਞ੍ਚ, ਭਿਕ੍ਖਵੇ, ਨਿਪੁਣਂ…ਪੇ… ਸੁਦੁਦ੍ਦਸਞ੍ਚ ਵੋ, ਭਿਕ੍ਖਵੇ, ਦੇਸੇਸ੍ਸਾਮਿ ਸੁਦੁਦ੍ਦਸਗਾਮਿਞ੍ਚ ਮਗ੍ਗਂ. ਤਂ ਸੁਣਾਥ. ਕਤਮਞ੍ਚ, ਭਿਕ੍ਖਵੇ, ਸੁਦੁਦ੍ਦਸਂ…ਪੇ… ਅਜਜ੍ਜਰਞ੍ਚ ਵੋ, ਭਿਕ੍ਖਵੇ, ਦੇਸੇਸ੍ਸਾਮਿ ਅਜਜ੍ਜਰਗਾਮਿਞ੍ਚ ਮਗ੍ਗਂ. ਤਂ ਸੁਣਾਥ. ਕਤਮਞ੍ਚ, ਭਿਕ੍ਖਵੇ, ਅਜਜ੍ਜਰਂ…ਪੇ… ਧੁਵਞ੍ਚ ਵੋ, ਭਿਕ੍ਖਵੇ, ਦੇਸੇਸ੍ਸਾਮਿ ਧੁਵਗਾਮਿਞ੍ਚ ਮਗ੍ਗਂ. ਤਂ ਸੁਣਾਥ. ਕਤਮਞ੍ਚ, ਭਿਕ੍ਖਵੇ, ਧੁਵਂ…ਪੇ… ਅਪਲੋਕਿਤਞ੍ਚ ਵੋ, ਭਿਕ੍ਖਵੇ, ਦੇਸੇਸ੍ਸਾਮਿ ਅਪਲੋਕਿਤਗਾਮਿਞ੍ਚ ਮਗ੍ਗਂ. ਤਂ ਸੁਣਾਥ. ਕਤਮਞ੍ਚ, ਭਿਕ੍ਖਵੇ, ਅਪਲੋਕਿਤਂ…ਪੇ… ਅਨਿਦਸ੍ਸਨਞ੍ਚ ਵੋ, ਭਿਕ੍ਖਵੇ, ਦੇਸੇਸ੍ਸਾਮਿ ਅਨਿਦਸ੍ਸਨਗਾਮਿਞ੍ਚ ਮਗ੍ਗਂ. ਤਂ ਸੁਣਾਥ. ਕਤਮਞ੍ਚ, ਭਿਕ੍ਖਵੇ, ਅਨਿਦਸ੍ਸਨਂ…ਪੇ… ਨਿਪ੍ਪਪਞ੍ਚਞ੍ਚ ਵੋ, ਭਿਕ੍ਖਵੇ, ਦੇਸੇਸ੍ਸਾਮਿ ਨਿਪ੍ਪਪਞ੍ਚਗਾਮਿਞ੍ਚ ਮਗ੍ਗਂ. ਤਂ ਸੁਣਾਥ. ਕਤਮਞ੍ਚ, ਭਿਕ੍ਖਵੇ, ਨਿਪ੍ਪਪਞ੍ਚਂ…ਪੇ…?

‘‘ਸਨ੍ਤਞ੍ਚ ਵੋ, ਭਿਕ੍ਖਵੇ, ਦੇਸੇਸ੍ਸਾਮਿ ਸਨ੍ਤਗਾਮਿਞ੍ਚ ਮਗ੍ਗਂ. ਤਂ ਸੁਣਾਥ. ਕਤਮਞ੍ਚ, ਭਿਕ੍ਖਵੇ, ਸਨ੍ਤਂ…ਪੇ… ਅਮਤਞ੍ਚ ਵੋ, ਭਿਕ੍ਖਵੇ, ਦੇਸੇਸ੍ਸਾਮਿ ਅਮਤਗਾਮਿਞ੍ਚ ਮਗ੍ਗਂ. ਤਂ ਸੁਣਾਥ. ਕਤਮਞ੍ਚ, ਭਿਕ੍ਖਵੇ, ਅਮਤਂ…ਪੇ… ਪਣੀਤਞ੍ਚ ਵੋ, ਭਿਕ੍ਖਵੇ, ਦੇਸੇਸ੍ਸਾਮਿ ਪਣੀਤਗਾਮਿਞ੍ਚ ਮਗ੍ਗਂ. ਤਂ ਸੁਣਾਥ. ਕਤਮਞ੍ਚ, ਭਿਕ੍ਖਵੇ, ਪਣੀਤਂ…ਪੇ… ਸਿਵਞ੍ਚ ਵੋ, ਭਿਕ੍ਖਵੇ, ਦੇਸੇਸ੍ਸਾਮਿ ਸਿਵਗਾਮਿਞ੍ਚ ਮਗ੍ਗਂ. ਤਂ ਸੁਣਾਥ. ਕਤਮਞ੍ਚ, ਭਿਕ੍ਖਵੇ, ਸਿਵਂ…ਪੇ… ਖੇਮਞ੍ਚ ਵੋ, ਭਿਕ੍ਖਵੇ, ਦੇਸੇਸ੍ਸਾਮਿ ਖੇਮਗਾਮਿਞ੍ਚ ਮਗ੍ਗਂ. ਤਂ ਸੁਣਾਥ. ਕਤਮਞ੍ਚ, ਭਿਕ੍ਖਵੇ, ਖੇਮਂ…ਪੇ… ਤਣ੍ਹਾਕ੍ਖਯਞ੍ਚ ਵੋ, ਭਿਕ੍ਖਵੇ, ਦੇਸੇਸ੍ਸਾਮਿ ਤਣ੍ਹਾਕ੍ਖਯਗਾਮਿਞ੍ਚ ਮਗ੍ਗਂ. ਤਂ ਸੁਣਾਥ. ਕਤਮਞ੍ਚ, ਭਿਕ੍ਖਵੇ, ਤਣ੍ਹਾਕ੍ਖਯਂ…ਪੇ…?

‘‘ਅਚ੍ਛਰਿਯਞ੍ਚ ਵੋ, ਭਿਕ੍ਖਵੇ, ਦੇਸੇਸ੍ਸਾਮਿ ਅਚ੍ਛਰਿਯਗਾਮਿਞ੍ਚ ਮਗ੍ਗਂ. ਤਂ ਸੁਣਾਥ. ਕਤਮਞ੍ਚ, ਭਿਕ੍ਖਵੇ, ਅਚ੍ਛਰਿਯਂ…ਪੇ… ਅਬ੍ਭੁਤਞ੍ਚ ਵੋ, ਭਿਕ੍ਖਵੇ, ਦੇਸੇਸ੍ਸਾਮਿ ਅਬ੍ਭੁਤਗਾਮਿਞ੍ਚ ਮਗ੍ਗਂ. ਤਂ ਸੁਣਾਥ. ਕਤਮਞ੍ਚ, ਭਿਕ੍ਖਵੇ, ਅਬ੍ਭੁਤਂ…ਪੇ… ਅਨੀਤਿਕਞ੍ਚ ਵੋ, ਭਿਕ੍ਖਵੇ, ਦੇਸੇਸ੍ਸਾਮਿ ਅਨੀਤਿਕਗਾਮਿਞ੍ਚ ਮਗ੍ਗਂ. ਤਂ ਸੁਣਾਥ. ਕਤਮਞ੍ਚ, ਭਿਕ੍ਖਵੇ, ਅਨੀਤਿਕਂ…ਪੇ… ਅਨੀਤਿਕਧਮ੍ਮਞ੍ਚ ਵੋ, ਭਿਕ੍ਖਵੇ, ਦੇਸੇਸ੍ਸਾਮਿ ਅਨੀਤਿਕਧਮ੍ਮਗਾਮਿਞ੍ਚ ਮਗ੍ਗਂ. ਤਂ ਸੁਣਾਥ. ਕਤਮਞ੍ਚ, ਭਿਕ੍ਖਵੇ, ਅਨੀਤਿਕਧਮ੍ਮਂ…ਪੇ… ਨਿਬ੍ਬਾਨਞ੍ਚ ਵੋ, ਭਿਕ੍ਖਵੇ, ਦੇਸੇਸ੍ਸਾਮਿ ਨਿਬ੍ਬਾਨਗਾਮਿਞ੍ਚ ਮਗ੍ਗਂ. ਤਂ ਸੁਣਾਥ. ਕਤਮਞ੍ਚ, ਭਿਕ੍ਖਵੇ, ਨਿਬ੍ਬਾਨਂ…ਪੇ… ਅਬ੍ਯਾਪਜ੍ਝਞ੍ਚ [ਅਬ੍ਯਾਪਜ੍ਝਞ੍ਚ (ਸੀ. ਸ੍ਯਾ. ਕਂ. ਪੀ.)] ਵੋ, ਭਿਕ੍ਖਵੇ, ਦੇਸੇਸ੍ਸਾਮਿ ਅਬ੍ਯਾਪਜ੍ਝਗਾਮਿਞ੍ਚ ਮਗ੍ਗਂ. ਤਂ ਸੁਣਾਥ. ਕਤਮਞ੍ਚ, ਭਿਕ੍ਖਵੇ, ਅਬ੍ਯਾਪਜ੍ਝਂ…ਪੇ… ਵਿਰਾਗਞ੍ਚ ਵੋ, ਭਿਕ੍ਖਵੇ, ਦੇਸੇਸ੍ਸਾਮਿ ਵਿਰਾਗਗਾਮਿਞ੍ਚ ਮਗ੍ਗਂ. ਤਂ ਸੁਣਾਥ. ਕਤਮੋ ਚ, ਭਿਕ੍ਖਵੇ, ਵਿਰਾਗੋ…ਪੇ…?

‘‘ਸੁਦ੍ਧਿਞ੍ਚ ਵੋ, ਭਿਕ੍ਖਵੇ, ਦੇਸੇਸ੍ਸਾਮਿ ਸੁਦ੍ਧਿਗਾਮਿਞ੍ਚ ਮਗ੍ਗਂ. ਤਂ ਸੁਣਾਥ. ਕਤਮਾ ਚ, ਭਿਕ੍ਖਵੇ, ਸੁਦ੍ਧਿ…ਪੇ… ਮੁਤ੍ਤਿਞ੍ਚ ਵੋ, ਭਿਕ੍ਖਵੇ, ਦੇਸੇਸ੍ਸਾਮਿ ਮੁਤ੍ਤਿਗਾਮਿਞ੍ਚ ਮਗ੍ਗਂ. ਤਂ ਸੁਣਾਥ. ਕਤਮਾ ਚ, ਭਿਕ੍ਖਵੇ, ਮੁਤ੍ਤਿ…ਪੇ… ਅਨਾਲਯਞ੍ਚ ਵੋ, ਭਿਕ੍ਖਵੇ, ਦੇਸੇਸ੍ਸਾਮਿ ਅਨਾਲਯਗਾਮਿਞ੍ਚ ਮਗ੍ਗਂ. ਤਂ ਸੁਣਾਥ. ਕਤਮੋ ਚ, ਭਿਕ੍ਖਵੇ, ਅਨਾਲਯੋ…ਪੇ… ਦੀਪਞ੍ਚ ਵੋ, ਭਿਕ੍ਖਵੇ, ਦੇਸੇਸ੍ਸਾਮਿ ਦੀਪਗਾਮਿਞ੍ਚ ਮਗ੍ਗਂ. ਤਂ ਸੁਣਾਥ. ਕਤਮਞ੍ਚ, ਭਿਕ੍ਖਵੇ, ਦੀਪਂ…ਪੇ… ਲੇਣਞ੍ਚ ਵੋ, ਭਿਕ੍ਖਵੇ, ਦੇਸੇਸ੍ਸਾਮਿ ਲੇਣਗਾਮਿਞ੍ਚ ਮਗ੍ਗਂ. ਤਂ ਸੁਣਾਥ. ਕਤਮਞ੍ਚ, ਭਿਕ੍ਖਵੇ, ਲੇਣਂ…ਪੇ… ਤਾਣਞ੍ਚ ਵੋ, ਭਿਕ੍ਖਵੇ, ਦੇਸੇਸ੍ਸਾਮਿ ਤਾਣਗਾਮਿਞ੍ਚ ਮਗ੍ਗਂ. ਤਂ ਸੁਣਾਥ. ਕਤਮਞ੍ਚ, ਭਿਕ੍ਖਵੇ, ਤਾਣਂ…ਪੇ… ਸਰਣਞ੍ਚ ਵੋ, ਭਿਕ੍ਖਵੇ, ਦੇਸੇਸ੍ਸਾਮਿ ਸਰਣਗਾਮਿਞ੍ਚ ਮਗ੍ਗਂ. ਤਂ ਸੁਣਾਥ. ਕਤਮਞ੍ਚ, ਭਿਕ੍ਖਵੇ, ਸਰਣਂ…ਪੇ…ਅਨੁਸਾਸਨੀ’’ਤਿ? ਬਾਤ੍ਤਿਂਸਤਿਮਂ.

੩੩. ਪਰਾਯਨਸੁਤ੍ਤਂ

੪੦੯. ‘‘ਪਰਾਯਨਞ੍ਚ [ਪਰਾਯਣਞ੍ਚ (ਪੀ. ਸੀ. ਅਟ੍ਠ.)] ਵੋ, ਭਿਕ੍ਖਵੇ, ਦੇਸੇਸ੍ਸਾਮਿ ਪਰਾਯਨਗਾਮਿਞ੍ਚ ਮਗ੍ਗਂ. ਤਂ ਸੁਣਾਥ. ਕਤਮਞ੍ਚ, ਭਿਕ੍ਖਵੇ, ਪਰਾਯਨਂ? ਯੋ, ਭਿਕ੍ਖਵੇ, ਰਾਗਕ੍ਖਯੋ ਦੋਸਕ੍ਖਯੋ ਮੋਹਕ੍ਖਯੋ – ਇਦਂ ਵੁਚ੍ਚਤਿ, ਭਿਕ੍ਖਵੇ, ਪਰਾਯਨਂ. ਕਤਮੋ ਚ, ਭਿਕ੍ਖਵੇ, ਪਰਾਯਨਗਾਮੀ ਮਗ੍ਗੋ? ਕਾਯਗਤਾਸਤਿ. ਅਯਂ ਵੁਚ੍ਚਤਿ, ਭਿਕ੍ਖਵੇ, ਪਰਾਯਨਗਾਮਿਮਗ੍ਗੋ. ਇਤਿ ਖੋ, ਭਿਕ੍ਖਵੇ, ਦੇਸਿਤਂ ਵੋ ਮਯਾ ਪਰਾਯਨਂ, ਦੇਸਿਤੋ ਪਰਾਯਨਗਾਮਿਮਗ੍ਗੋ. ਯਂ, ਭਿਕ੍ਖਵੇ, ਸਤ੍ਥਾਰਾ ਕਰਣੀਯਂ ਸਾਵਕਾਨਂ ਹਿਤੇਸਿਨਾ ਅਨੁਕਮ੍ਪਕੇਨ ਅਨੁਕਮ੍ਪਂ ਉਪਾਦਾਯ, ਕਤਂ ਵੋ ਤਂ ਮਯਾ. ਏਤਾਨਿ, ਭਿਕ੍ਖਵੇ, ਰੁਕ੍ਖਮੂਲਾਨਿ, ਏਤਾਨਿ ਸੁਞ੍ਞਾਗਾਰਾਨਿ. ਝਾਯਥ, ਭਿਕ੍ਖਵੇ, ਮਾ ਪਮਾਦਤ੍ਥ; ਮਾ ਪਚ੍ਛਾ ਵਿਪ੍ਪਟਿਸਾਰਿਨੋ ਅਹੁਵਤ੍ਥ. ਅਯਂ ਵੋ ਅਮ੍ਹਾਕਂ ਅਨੁਸਾਸਨੀ’’ਤਿ. (ਯਥਾ ਅਸਙ੍ਖਤਂ ਤਥਾ ਵਿਤ੍ਥਾਰੇਤਬ੍ਬਂ). ਤੇਤ੍ਤਿਂਸਤਿਮਂ.

ਦੁਤਿਯੋ ਵਗ੍ਗੋ.

ਤਸ੍ਸੁਦ੍ਦਾਨਂ –

ਅਸਙ੍ਖਤਂ ਅਨਤਂ ਅਨਾਸਵਂ, ਸਚ੍ਚਞ੍ਚ ਪਾਰਂ ਨਿਪੁਣਂ ਸੁਦੁਦ੍ਦਸਂ;

ਅਜਜ੍ਜਰਂ ਧੁਵਂ ਅਪਲੋਕਿਤਂ, ਅਨਿਦਸ੍ਸਨਂ ਨਿਪ੍ਪਪਞ੍ਚ ਸਨ੍ਤਂ.

ਅਮਤਂ ਪਣੀਤਞ੍ਚ ਸਿਵਞ੍ਚ ਖੇਮਂ, ਤਣ੍ਹਾਕ੍ਖਯੋ ਅਚ੍ਛਰਿਯਞ੍ਚ ਅਬ੍ਭੁਤਂ;

ਅਨੀਤਿਕਂ ਅਨੀਤਿਕਧਮ੍ਮਂ, ਨਿਬ੍ਬਾਨਮੇਤਂ ਸੁਗਤੇਨ ਦੇਸਿਤਂ.

ਅਬ੍ਯਾਪਜ੍ਝੋ ਵਿਰਾਗੋ ਚ, ਸੁਦ੍ਧਿ ਮੁਤ੍ਤਿ ਅਨਾਲਯੋ;

ਦੀਪੋ ਲੇਣਞ੍ਚ ਤਾਣਞ੍ਚ, ਸਰਣਞ੍ਚ ਪਰਾਯਨਨ੍ਤਿ.

ਅਸਙ੍ਖਤਸਂਯੁਤ੍ਤਂ ਸਮਤ੍ਤਂ.