੧. ਸਂਯੋਜਨਸੁਤ੍ਤਂ

੩੪੩. ਏਕਂ ਸਮਯਂ ਸਮ੍ਬਹੁਲਾ ਥੇਰਾ ਭਿਕ੍ਖੂ ਮਚ੍ਛਿਕਾਸਣ੍ਡੇ ਵਿਹਰਨ੍ਤਿ ਅਮ੍ਬਾਟਕਵਨੇ. ਤੇਨ ਖੋ ਪਨ ਸਮਯੇਨ ਸਮ੍ਬਹੁਲਾਨਂ ਥੇਰਾਨਂ ਭਿਕ੍ਖੂਨਂ ਪਚ੍ਛਾਭਤ੍ਤਂ ਪਿਣ੍ਡਪਾਤਪਟਿਕ੍ਕਨ੍ਤਾਨਂ ਮਣ੍ਡਲਮਾਲ਼ੇ ਸਨ੍ਨਿਸਿਨ੍ਨਾਨਂ ਸਨ੍ਨਿਪਤਿਤਾਨਂ ਅਯਮਨ੍ਤਰਾਕਥਾ ਉਦਪਾਦਿ – ‘‘‘ਸਂਯੋਜਨ’ਨ੍ਤਿ ਵਾ, ਆਵੁਸੋ, ‘ਸਂਯੋਜਨਿਯਾ ਧਮ੍ਮਾ’ਤਿ ਵਾ ਇਮੇ ਧਮ੍ਮਾ ਨਾਨਤ੍ਥਾ ਨਾਨਾਬ੍ਯਞ੍ਜਨਾ ਉਦਾਹੁ ਏਕਤ੍ਥਾ ਬ੍ਯਞ੍ਜਨਮੇਵ ਨਾਨ’’ਨ੍ਤਿ? ਤਤ੍ਰੇਕਚ੍ਚੇਹਿ ਥੇਰੇਹਿ ਭਿਕ੍ਖੂਹਿ ਏਵਂ ਬ੍ਯਾਕਤਂ ਹੋਤਿ – ‘‘‘ਸਂਯੋਜਨ’ਨ੍ਤਿ ਵਾ, ਆਵੁਸੋ, ‘ਸਂਯੋਜਨਿਯਾ ਧਮ੍ਮਾ’ਤਿ ਵਾ ਇਮੇ ਧਮ੍ਮਾ ਨਾਨਤ੍ਥਾ ਚੇਵ ਨਾਨਾਬ੍ਯਞ੍ਜਨਾ ਚਾ’’ਤਿ. ਏਕਚ੍ਚੇਹਿ ਥੇਰੇਹਿ ਭਿਕ੍ਖੂਹਿ ਏਵਂ ਬ੍ਯਾਕਤਂ ਹੋਤਿ – ‘‘‘ਸਂਯੋਜਨ’ਨ੍ਤਿ ਵਾ, ਆਵੁਸੋ, ‘ਸਂਯੋਜਨਿਯਾ ਧਮ੍ਮਾ’ਤਿ ਵਾ ਇਮੇ ਧਮ੍ਮਾ ਏਕਤ੍ਥਾ ਬ੍ਯਞ੍ਜਨਮੇਵ ਨਾਨ’’ਨ੍ਤਿ.

ਤੇਨ ਖੋ ਪਨ ਸਮਯੇਨ ਚਿਤ੍ਤੋ ਗਹਪਤਿ ਮਿਗਪਥਕਂ ਅਨੁਪ੍ਪਤ੍ਤੋ ਹੋਤਿ ਕੇਨਚਿਦੇਵ ਕਰਣੀਯੇਨ. ਅਸ੍ਸੋਸਿ ਖੋ ਚਿਤ੍ਤੋ ਗਹਪਤਿ ਸਮ੍ਬਹੁਲਾਨਂ ਕਿਰ ਥੇਰਾਨਂ ਭਿਕ੍ਖੂਨਂ ਪਚ੍ਛਾਭਤ੍ਤਂ ਪਿਣ੍ਡਪਾਤਪਟਿਕ੍ਕਨ੍ਤਾਨਂ ਮਣ੍ਡਲਮਾਲ਼ੇ ਸਨ੍ਨਿਸਿਨ੍ਨਾਨਂ ਸਨ੍ਨਿਪਤਿਤਾਨਂ ਅਯਮਨ੍ਤਰਾਕਥਾ ਉਦਪਾਦਿ – ‘‘‘ਸਂਯੋਜਨ’ਨ੍ਤਿ ਵਾ, ਆਵੁਸੋ, ‘ਸਂਯੋਜਨਿਯਾ ਧਮ੍ਮਾ’ਤਿ ਵਾ ਇਮੇ ਧਮ੍ਮਾ ਨਾਨਤ੍ਥਾ ਨਾਨਾਬ੍ਯਞ੍ਜਨਾ ਉਦਾਹੁ ਏਕਤ੍ਥਾ ਬ੍ਯਞ੍ਜਨਮੇਵ ਨਾਨ’’ਨ੍ਤਿ? ਤਤ੍ਰੇਕਚ੍ਚੇਹਿ ਥੇਰੇਹਿ ਭਿਕ੍ਖੂਹਿ ਏਵਂ ਬ੍ਯਾਕਤਂ – ‘‘‘ਸਂਯੋਜਨ’ਨ੍ਤਿ ਵਾ, ਆਵੁਸੋ, ‘ਸਂਯੋਜਨਿਯਾ ਧਮ੍ਮਾ’ਤਿ ਵਾ ਇਮੇ ਧਮ੍ਮਾ ਨਾਨਤ੍ਥਾ ਚੇਵ ਨਾਨਾਬ੍ਯਞ੍ਜਨਾ ਚਾ’’ਤਿ. ਏਕਚ੍ਚੇਹਿ ਥੇਰੇਹਿ ਭਿਕ੍ਖੂਹਿ ਏਵਂ ਬ੍ਯਾਕਤਂ ‘ਸਂਯੋਜਨ’ਨ੍ਤਿ ਵਾ, ਆਵੁਸੋ ‘ਸਂਯੋਜਨਿਯਾ ਧਮ੍ਮਾ’ਤਿ ਵਾ ਇਮੇ ਧਮ੍ਮਾ ਏਕਤ੍ਥਾ ਬ੍ਯਞ੍ਜਨਮੇਵ ਨਾਨਨ੍ਤਿ. ਅਥ ਖੋ ਚਿਤ੍ਤੋ ਗਹਪਤਿ ਯੇਨ ਥੇਰਾ ਭਿਕ੍ਖੂ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਥੇਰੇ ਭਿਕ੍ਖੂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨੋ ਖੋ ਚਿਤ੍ਤੋ ਗਹਪਤਿ ਥੇਰੇ ਭਿਕ੍ਖੂ ਏਤਦਵੋਚ – ‘‘ਸੁਤਂ ਮੇਤਂ, ਭਨ੍ਤੇ, ਸਮ੍ਬਹੁਲਾਨਂ ਕਿਰ ਥੇਰਾਨਂ ਭਿਕ੍ਖੂਨਂ ਪਚ੍ਛਾਭਤ੍ਤਂ ਪਿਣ੍ਡਪਾਤਪਟਿਕ੍ਕਨ੍ਤਾਨਂ ਮਣ੍ਡਲਮਾਲ਼ੇ ਸਨ੍ਨਿਸਿਨ੍ਨਾਨਂ ਸਨ੍ਨਿਪਤਿਤਾਨਂ ਅਯਮਨ੍ਤਰਾਕਥਾ ਉਦਪਾਦਿ – ‘ਸਂਯੋਜਨ’ਨ੍ਤਿ ਵਾ, ਆਵੁਸੋ, ‘ਸਂਯੋਜਨਿਯਾ ਧਮ੍ਮਾ’ਤਿ ਵਾ ਇਮੇ ਧਮ੍ਮਾ ਨਾਨਤ੍ਥਾ ਨਾਨਾਬ੍ਯਞ੍ਜਨਾ ਉਦਾਹੁ ਏਕਤ੍ਥਾ ਬ੍ਯਞ੍ਜਨਮੇਵ ਨਾਨ’’ਨ੍ਤਿ? ਏਕਚ੍ਚੇਹਿ ਥੇਰੇਹਿ ਭਿਕ੍ਖੂਹਿ ਏਵਂ ਬ੍ਯਾਕਤਂ – ‘‘‘ਸਂਯੋਜਨ’ਨ੍ਤਿ ਵਾ, ਆਵੁਸੋ, ‘ਸਂਯੋਜਨਿਯਾ ਧਮ੍ਮਾ’ਤਿ ਵਾ ਇਮੇ ਧਮ੍ਮਾ ਨਾਨਤ੍ਥਾ ਚੇਵ ਨਾਨਾਬ੍ਯਞ੍ਜਨਾ ਚਾ’’ਤਿ. ਏਕਚ੍ਚੇਹਿ ਥੇਰੇਹਿ ਭਿਕ੍ਖੂਹਿ ਏਵਂ ਬ੍ਯਾਕਤਂ ‘‘‘ਸਂਯੋਜਨ’ਨ੍ਤਿ ਵਾ, ਆਵੁਸੋ, ‘ਸਂਯੋਜਨਿਯਾ ਧਮ੍ਮਾ’ਤਿ ਵਾ ਇਮੇ ਧਮ੍ਮਾ ਏਕਤ੍ਥਾ ਬ੍ਯਞ੍ਜਨਮੇਵ ਨਾਨ’’ਨ੍ਤਿ. ‘‘ਏਵਂ, ਗਹਪਤੀ’’ਤਿ.

‘‘‘ਸਂਯੋਜਨ’ਨ੍ਤਿ ਵਾ, ਭਨ੍ਤੇ, ‘ਸਂਯੋਜਨਿਯਾ ਧਮ੍ਮਾ’ਤਿ ਵਾ ਇਮੇ ਧਮ੍ਮਾ ਨਾਨਤ੍ਥਾ ਚੇਵ ਨਾਨਾਬ੍ਯਞ੍ਜਨਾ ਚ. ਤੇਨ ਹਿ, ਭਨ੍ਤੇ, ਉਪਮਂ ਵੋ ਕਰਿਸ੍ਸਾਮਿ. ਉਪਮਾਯਪਿਧੇਕਚ੍ਚੇ ਵਿਞ੍ਞੂ ਪੁਰਿਸਾ ਭਾਸਿਤਸ੍ਸ ਅਤ੍ਥਂ ਆਜਾਨਨ੍ਤਿ. ਸੇਯ੍ਯਥਾਪਿ, ਭਨ੍ਤੇ, ਕਾਲ਼ੋ ਚ ਬਲੀਬਦ੍ਦੋ ਓਦਾਤੋ ਚ ਬਲੀਬਦ੍ਦੋ ਏਕੇਨ ਦਾਮੇਨ ਵਾ ਯੋਤ੍ਤੇਨ ਵਾ ਸਂਯੁਤ੍ਤਾ ਅਸ੍ਸੁ. ਯੋ ਨੁ ਖੋ ਏਵਂ ਵਦੇਯ੍ਯ – ‘ਕਾਲ਼ੋ ਬਲੀਬਦ੍ਦੋ ਓਦਾਤਸ੍ਸ ਬਲੀਬਦ੍ਦਸ੍ਸ ਸਂਯੋਜਨਂ, ਓਦਾਤੋ ਬਲੀਬਦ੍ਦੋ ਕਾਲ਼ਸ੍ਸ ਬਲੀਬਦ੍ਦਸ੍ਸ ਸਂਯੋਜਨ’ਨ੍ਤਿ, ਸਮ੍ਮਾ ਨੁ ਖੋ ਸੋ ਵਦਮਾਨੋ ਵਦੇਯ੍ਯਾ’’ਤਿ? ‘‘ਨੋ ਹੇਤਂ, ਗਹਪਤਿ! ਨ ਖੋ, ਗਹਪਤਿ, ਕਾਲ਼ੋ ਬਲੀਬਦ੍ਦੋ ਓਦਾਤਸ੍ਸ ਬਲੀਬਦ੍ਦਸ੍ਸ ਸਂਯੋਜਨਂ, ਨਪਿ ਓਦਾਤੋ ਬਲੀਬਦ੍ਦੋ ਕਾਲ਼ਸ੍ਸ ਬਲ਼ੀਬਦ੍ਦਸ੍ਸ ਸਂਯੋਜਨਂ; ਯੇਨ ਖੋ ਤੇ ਏਕੇਨ ਦਾਮੇਨ ਵਾ ਯੋਤ੍ਤੇਨ ਵਾ ਸਂਯੁਤ੍ਤਾ ਤਂ ਤਤ੍ਥ ਸਂਯੋਜਨ’’ਨ੍ਤਿ. ‘‘ਏਵਮੇਵ ਖੋ, ਭਨ੍ਤੇ, ਨ ਚਕ੍ਖੁ ਰੂਪਾਨਂ ਸਂਯੋਜਨਂ, ਨ ਰੂਪਾ ਚਕ੍ਖੁਸ੍ਸ ਸਂਯੋਜਨਂ; ਯਞ੍ਚ ਤਤ੍ਥ ਤਦੁਭਯਂ ਪਟਿਚ੍ਚ ਉਪ੍ਪਜ੍ਜਤਿ ਛਨ੍ਦਰਾਗੋ ਤਂ ਤਤ੍ਥ ਸਂਯੋਜਨਂ. ਨ ਸੋਤਂ ਸਦ੍ਦਾਨਂ… ਨ ਘਾਨਂ ਗਨ੍ਧਾਨਂ… ਨ ਜਿਵ੍ਹਾ ਰਸਾਨਂ… ਨ ਕਾਯੋ ਫੋਟ੍ਠਬ੍ਬਾਨਂ ਸਂਯੋਜਨਂ, ਨ ਫੋਟ੍ਠਬ੍ਬਾ ਕਾਯਸ੍ਸ ਸਂਯੋਜਨਂ; ਯਞ੍ਚ ਤਤ੍ਥ ਤਦੁਭਯਂ ਪਟਿਚ੍ਚ ਉਪ੍ਪਜ੍ਜਤਿ ਛਨ੍ਦਰਾਗੋ ਤਂ ਤਤ੍ਥ ਸਂਯੋਜਨਂ. ਨ ਮਨੋ ਧਮ੍ਮਾਨਂ ਸਂਯੋਜਨਂ, ਨ ਧਮ੍ਮਾ ਮਨਸ੍ਸ ਸਂਯੋਜਨਂ; ਯਞ੍ਚ ਤਤ੍ਥ ਤਦੁਭਯਂ ਪਟਿਚ੍ਚ ਉਪ੍ਪਜ੍ਜਤਿ ਛਨ੍ਦਰਾਗੋ ਤਂ ਤਤ੍ਥ ਸਂਯੋਜਨ’’ਨ੍ਤਿ. ‘‘ਲਾਭਾ ਤੇ, ਗਹਪਤਿ, ਸੁਲਦ੍ਧਂ ਤੇ, ਗਹਪਤਿ, ਯਸ੍ਸ ਤੇ ਗਮ੍ਭੀਰੇ ਬੁਦ੍ਧਵਚਨੇ ਪਞ੍ਞਾਚਕ੍ਖੁ ਕਮਤੀ’’ਤਿ. ਪਠਮਂ.