੩. ਬਲਵਗ੍ਗੋ

੧. ਵਿਸਾਰਦਸੁਤ੍ਤਂ

੩੦੪. ‘‘ਪਞ੍ਚਿਮਾਨਿ, ਭਿਕ੍ਖਵੇ, ਮਾਤੁਗਾਮਸ੍ਸ ਬਲਾਨਿ. ਕਤਮਾਨਿ ਪਞ੍ਚ? ਰੂਪਬਲਂ, ਭੋਗਬਲਂ, ਞਾਤਿਬਲਂ, ਪੁਤ੍ਤਬਲਂ, ਸੀਲਬਲਂ – ਇਮਾਨਿ ਖੋ, ਭਿਕ੍ਖਵੇ, ਪਞ੍ਚ ਮਾਤੁਗਾਮਸ੍ਸ ਬਲਾਨਿ. ਇਮੇਹਿ ਖੋ, ਭਿਕ੍ਖਵੇ, ਪਞ੍ਚਹਿ ਬਲੇਹਿ ਸਮਨ੍ਨਾਗਤੋ ਮਾਤੁਗਾਮੋ ਵਿਸਾਰਦੋ ਅਗਾਰਂ ਅਜ੍ਝਾਵਸਤੀ’’ਤਿ. ਪਠਮਂ.

੨. ਪਸਯ੍ਹਸੁਤ੍ਤਂ

੩੦੫. ‘‘ਪਞ੍ਚਿਮਾਨਿ, ਭਿਕ੍ਖਵੇ, ਮਾਤੁਗਾਮਸ੍ਸ ਬਲਾਨਿ. ਕਤਮਾਨਿ ਪਞ੍ਚ? ਰੂਪਬਲਂ, ਭੋਗਬਲਂ, ਞਾਤਿਬਲਂ, ਪੁਤ੍ਤਬਲਂ, ਸੀਲਬਲਂ – ਇਮਾਨਿ ਖੋ, ਭਿਕ੍ਖਵੇ, ਪਞ੍ਚ ਮਾਤੁਗਾਮਸ੍ਸ ਬਲਾਨਿ. ਇਮੇਹਿ ਖੋ, ਭਿਕ੍ਖਵੇ, ਪਞ੍ਚਹਿ ਬਲੇਹਿ ਸਮਨ੍ਨਾਗਤੋ ਮਾਤੁਗਾਮੋ ਸਾਮਿਕਂ ਪਸਯ੍ਹ ਅਗਾਰਂ ਅਜ੍ਝਾਵਸਤੀ’’ਤਿ. ਦੁਤਿਯਂ.

੩. ਅਭਿਭੁਯ੍ਯਸੁਤ੍ਤਂ

੩੦੬. ‘‘ਪਞ੍ਚਿਮਾਨਿ, ਭਿਕ੍ਖਵੇ, ਮਾਤੁਗਾਮਸ੍ਸ ਬਲਾਨਿ. ਕਤਮਾਨਿ ਪਞ੍ਚ? ਰੂਪਬਲਂ, ਭੋਗਬਲਂ, ਞਾਤਿਬਲਂ, ਪੁਤ੍ਤਬਲਂ, ਸੀਲਬਲਂ – ਇਮਾਨਿ ਖੋ, ਭਿਕ੍ਖਵੇ, ਪਞ੍ਚ ਮਾਤੁਗਾਮਸ੍ਸ ਬਲਾਨਿ. ਇਮੇਹਿ ਖੋ, ਭਿਕ੍ਖਵੇ, ਪਞ੍ਚਹਿ ਬਲੇਹਿ ਸਮਨ੍ਨਾਗਤੋ ਮਾਤੁਗਾਮੋ ਸਾਮਿਕਂ ਅਭਿਭੁਯ੍ਯ ਵਤ੍ਤਤੀ’’ਤਿ. ਤਤਿਯਂ.

੪. ਏਕਸੁਤ੍ਤਂ

੩੦੭. ‘‘ਏਕੇਨ ਚ ਖੋ, ਭਿਕ੍ਖਵੇ, ਬਲੇਨ ਸਮਨ੍ਨਾਗਤੋ ਪੁਰਿਸੋ ਮਾਤੁਗਾਮਂ ਅਭਿਭੁਯ੍ਯ ਵਤ੍ਤਤਿ. ਕਤਮੇਨ ਏਕੇਨ ਬਲੇਨ? ਇਸ੍ਸਰਿਯਬਲੇਨ ਅਭਿਭੂਤਂ ਮਾਤੁਗਾਮਂ ਨੇਵ ਰੂਪਬਲਂ ਤਾਯਤਿ, ਨ ਭੋਗਬਲਂ ਤਾਯਤਿ, ਨ ਞਾਤਿਬਲਂ ਤਾਯਤਿ, ਨ ਪੁਤ੍ਤਬਲਂ ਤਾਯਤਿ, ਨ ਸੀਲਬਲਂ ਤਾਯਤੀ’’ਤਿ. ਚਤੁਤ੍ਥਂ.

੫. ਅਙ੍ਗਸੁਤ੍ਤਂ

੩੦੮. ‘‘ਪਞ੍ਚਿਮਾਨਿ, ਭਿਕ੍ਖਵੇ, ਮਾਤੁਗਾਮਸ੍ਸ ਬਲਾਨਿ. ਕਤਮਾਨਿ ਪਞ੍ਚ? ਰੂਪਬਲਂ, ਭੋਗਬਲਂ, ਞਾਤਿਬਲਂ, ਪੁਤ੍ਤਬਲਂ, ਸੀਲਬਲਂ. ਰੂਪਬਲੇਨ ਚ, ਭਿਕ੍ਖਵੇ, ਮਾਤੁਗਾਮੋ ਸਮਨ੍ਨਾਗਤੋ ਹੋਤਿ, ਨ ਚ ਭੋਗਬਲੇਨ – ਏਵਂ ਸੋ ਤੇਨਙ੍ਗੇਨ ਅਪਰਿਪੂਰੋ ਹੋਤਿ. ਯਤੋ ਚ ਖੋ, ਭਿਕ੍ਖਵੇ, ਮਾਤੁਗਾਮੋ ਰੂਪਬਲੇਨ ਚ ਸਮਨ੍ਨਾਗਤੋ ਹੋਤਿ, ਭੋਗਬਲੇਨ ਚ – ਏਵਂ ਸੋ ਤੇਨਙ੍ਗੇਨ ਪਰਿਪੂਰੋ ਹੋਤਿ. ਰੂਪਬਲੇਨ ਚ, ਭਿਕ੍ਖਵੇ, ਮਾਤੁਗਾਮੋ ਸਮਨ੍ਨਾਗਤੋ ਹੋਤਿ, ਭੋਗਬਲੇਨ ਚ, ਨ ਚ ਞਾਤਿਬਲੇਨ – ਏਵਂ ਸੋ ਤੇਨਙ੍ਗੇਨ ਅਪਰਿਪੂਰੋ ਹੋਤਿ. ਯਤੋ ਚ ਖੋ, ਭਿਕ੍ਖਵੇ, ਮਾਤੁਗਾਮੋ ਰੂਪਬਲੇਨ ਚ ਸਮਨ੍ਨਾਗਤੋ ਹੋਤਿ, ਭੋਗਬਲੇਨ ਚ, ਞਾਤਿਬਲੇਨ ਚ – ਏਵਂ ਸੋ ਤੇਨਙ੍ਗੇਨ ਪਰਿਪੂਰੋ ਹੋਤਿ. ਰੂਪਬਲੇਨ ਚ, ਭਿਕ੍ਖਵੇ, ਮਾਤੁਗਾਮੋ ਸਮਨ੍ਨਾਗਤੋ ਹੋਤਿ, ਭੋਗਬਲੇਨ ਚ, ਞਾਤਿਬਲੇਨ ਚ, ਨ ਚ ਪੁਤ੍ਤਬਲੇਨ – ਏਵਂ ਸੋ ਤੇਨਙ੍ਗੇਨ ਅਪਰਿਪੂਰੋ ਹੋਤਿ. ਯਤੋ ਚ ਖੋ, ਭਿਕ੍ਖਵੇ, ਮਾਤੁਗਾਮੋ ਰੂਪਬਲੇਨ ਚ ਸਮਨ੍ਨਾਗਤੋ ਹੋਤਿ, ਭੋਗਬਲੇਨ ਚ, ਞਾਤਿਬਲੇਨ ਚ, ਪੁਤ੍ਤਬਲੇਨ ਚ – ਏਵਂ ਸੋ ਤੇਨਙ੍ਗੇਨ ਪਰਿਪੂਰੋ ਹੋਤਿ. ਰੂਪਬਲੇਨ ਚ, ਭਿਕ੍ਖਵੇ, ਮਾਤੁਗਾਮੋ ਸਮਨ੍ਨਾਗਤੋ ਹੋਤਿ, ਭੋਗਬਲੇਨ ਚ, ਞਾਤਿਬਲੇਨ ਚ, ਪੁਤ੍ਤਬਲੇਨ ਚ, ਨ ਚ ਸੀਲਬਲੇਨ – ਏਵਂ ਸੋ ਤੇਨਙ੍ਗੇਨ ਅਪਰਿਪੂਰੋ ਹੋਤਿ. ਯਤੋ ਚ ਖੋ, ਭਿਕ੍ਖਵੇ, ਮਾਤੁਗਾਮੋ ਰੂਪਬਲੇਨ ਚ ਸਮਨ੍ਨਾਗਤੋ ਹੋਤਿ, ਭੋਗਬਲੇਨ ਚ, ਞਾਤਿਬਲੇਨ ਚ, ਪੁਤ੍ਤਬਲੇਨ ਚ, ਸੀਲਬਲੇਨ ਚ – ਏਵਂ ਸੋ ਤੇਨਙ੍ਗੇਨ ਪਰਿਪੂਰੋ ਹੋਤਿ. ਇਮਾਨਿ ਖੋ, ਭਿਕ੍ਖਵੇ, ਪਞ੍ਚ ਮਾਤੁਗਾਮਸ੍ਸ ਬਲਾਨੀ’’ਤਿ. ਪਞ੍ਚਮਂ.

੬. ਨਾਸੇਨ੍ਤਿਸੁਤ੍ਤਂ

੩੦੯. ‘‘ਪਞ੍ਚਿਮਾਨਿ, ਭਿਕ੍ਖਵੇ, ਮਾਤੁਗਾਮਸ੍ਸ ਬਲਾਨਿ. ਕਤਮਾਨਿ ਪਞ੍ਚ? ਰੂਪਬਲਂ, ਭੋਗਬਲਂ, ਞਾਤਿਬਲਂ, ਪੁਤ੍ਤਬਲਂ, ਸੀਲਬਲਂ. ਰੂਪਬਲੇਨ ਚ, ਭਿਕ੍ਖਵੇ, ਮਾਤੁਗਾਮੋ ਸਮਨ੍ਨਾਗਤੋ ਹੋਤਿ, ਨ ਚ ਸੀਲਬਲੇਨ, ਨਾਸੇਨ੍ਤੇਵ ਨਂ, ਕੁਲੇ ਨ ਵਾਸੇਨ੍ਤਿ. ਰੂਪਬਲੇਨ ਚ, ਭਿਕ੍ਖਵੇ, ਮਾਤੁਗਾਮੋ ਸਮਨ੍ਨਾਗਤੋ ਹੋਤਿ, ਭੋਗਬਲੇਨ ਚ, ਨ ਚ ਸੀਲਬਲੇਨ, ਨਾਸੇਨ੍ਤੇਵ ਨਂ, ਕੁਲੇ ਨ ਵਾਸੇਨ੍ਤਿ. ਰੂਪਬਲੇਨ ਚ, ਭਿਕ੍ਖਵੇ, ਮਾਤੁਗਾਮੋ ਸਮਨ੍ਨਾਗਤੋ ਹੋਤਿ, ਭੋਗਬਲੇਨ ਚ, ਞਾਤਿਬਲੇਨ ਚ, ਨ ਚ ਸੀਲਬਲੇਨ, ਨਾਸੇਨ੍ਤੇਵ ਨਂ, ਕੁਲੇ ਨ ਵਾਸੇਨ੍ਤਿ. ਰੂਪਬਲੇਨ ਚ, ਭਿਕ੍ਖਵੇ, ਮਾਤੁਗਾਮੋ ਸਮਨ੍ਨਾਗਤੋ ਹੋਤਿ, ਭੋਗਬਲੇਨ ਚ, ਞਾਤਿਬਲੇਨ ਚ, ਪੁਤ੍ਤਬਲੇਨ ਚ, ਨ ਚ ਸੀਲਬਲੇਨ, ਨਾਸੇਨ੍ਤੇਵ ਨਂ, ਕੁਲੇ ਨ ਵਾਸੇਨ੍ਤਿ. ਸੀਲਬਲੇਨ ਚ, ਭਿਕ੍ਖਵੇ, ਮਾਤੁਗਾਮੋ ਸਮਨ੍ਨਾਗਤੋ ਹੋਤਿ, ਨ ਚ ਰੂਪਬਲੇਨ, ਵਾਸੇਨ੍ਤੇਵ ਨਂ, ਕੁਲੇ ਨ ਨਾਸੇਨ੍ਤਿ. ਸੀਲਬਲੇਨ ਚ, ਭਿਕ੍ਖਵੇ, ਮਾਤੁਗਾਮੋ ਸਮਨ੍ਨਾਗਤੋ ਹੋਤਿ, ਨ ਚ ਭੋਗਬਲੇਨ, ਵਾਸੇਨ੍ਤੇਵ ਨਂ, ਕੁਲੇ ਨ ਨਾਸੇਨ੍ਤਿ. ਸੀਲਬਲੇਨ ਚ, ਭਿਕ੍ਖਵੇ, ਮਾਤੁਗਾਮੋ ਸਮਨ੍ਨਾਗਤੋ ਹੋਤਿ, ਨ ਚ ਞਾਤਿਬਲੇਨ, ਵਾਸੇਨ੍ਤੇਵ ਨਂ, ਕੁਲੇ ਨ ਨਾਸੇਨ੍ਤਿ. ਸੀਲਬਲੇਨ ਚ, ਭਿਕ੍ਖਵੇ, ਮਾਤੁਗਾਮੋ ਸਮਨ੍ਨਾਗਤੋ ਹੋਤਿ, ਨ ਚ ਪੁਤ੍ਤਬਲੇਨ, ਵਾਸੇਨ੍ਤੇਵ ਨਂ, ਕੁਲੇ ਨ ਨਾਸੇਨ੍ਤਿ. ਇਮਾਨਿ ਖੋ, ਭਿਕ੍ਖਵੇ, ਪਞ੍ਚ ਮਾਤੁਗਾਮਸ੍ਸ ਬਲਾਨੀ’’ਤਿ. ਛਟ੍ਠਂ.

੭. ਹੇਤੁਸੁਤ੍ਤਂ

੩੧੦. ‘‘ਪਞ੍ਚਿਮਾਨਿ, ਭਿਕ੍ਖਵੇ, ਮਾਤੁਗਾਮਸ੍ਸ ਬਲਾਨਿ. ਕਤਮਾਨਿ ਪਞ੍ਚ? ਰੂਪਬਲਂ, ਭੋਗਬਲਂ, ਞਾਤਿਬਲਂ, ਪੁਤ੍ਤਬਲਂ, ਸੀਲਬਲਂ. ਨ, ਭਿਕ੍ਖਵੇ, ਮਾਤੁਗਾਮੋ ਰੂਪਬਲਹੇਤੁ ਵਾ ਭੋਗਬਲਹੇਤੁ ਵਾ ਞਾਤਿਬਲਹੇਤੁ ਵਾ ਪੁਤ੍ਤਬਲਹੇਤੁ ਵਾ ਕਾਯਸ੍ਸ ਭੇਦਾ ਪਰਂ ਮਰਣਾ ਸੁਗਤਿਂ ਸਗ੍ਗਂ ਲੋਕਂ ਉਪਪਜ੍ਜਤਿ. ਸੀਲਬਲਹੇਤੁ ਖੋ, ਭਿਕ੍ਖਵੇ, ਮਾਤੁਗਾਮੋ ਕਾਯਸ੍ਸ ਭੇਦਾ ਪਰਂ ਮਰਣਾ ਸੁਗਤਿਂ ਸਗ੍ਗਂ ਲੋਕਂ ਉਪਪਜ੍ਜਤਿ. ਇਮਾਨਿ ਖੋ, ਭਿਕ੍ਖਵੇ, ਪਞ੍ਚ ਮਾਤੁਗਾਮਸ੍ਸ ਬਲਾਨੀ’’ਤਿ. ਸਤ੍ਤਮਂ.

੮. ਠਾਨਸੁਤ੍ਤਂ

੩੧੧. ‘‘ਪਞ੍ਚਿਮਾਨਿ, ਭਿਕ੍ਖਵੇ, ਠਾਨਾਨਿ ਦੁਲ੍ਲਭਾਨਿ ਅਕਤਪੁਞ੍ਞੇਨ ਮਾਤੁਗਾਮੇਨ. ਕਤਮਾਨਿ ਪਞ੍ਚ? ਪਤਿਰੂਪੇ ਕੁਲੇ ਜਾਯੇਯ੍ਯਨ੍ਤਿ – ਇਦਂ, ਭਿਕ੍ਖਵੇ, ਪਠਮਂ ਠਾਨਂ ਦੁਲ੍ਲਭਂ ਅਕਤਪੁਞ੍ਞੇਨ ਮਾਤੁਗਾਮੇਨ. ਪਤਿਰੂਪੇ ਕੁਲੇ ਜਾਯਿਤ੍ਵਾ ਪਤਿਰੂਪਂ ਕੁਲਂ ਗਚ੍ਛੇਯ੍ਯਨ੍ਤਿ – ਇਦਂ, ਭਿਕ੍ਖਵੇ, ਦੁਤਿਯਂ ਠਾਨਂ ਦੁਲ੍ਲਭਂ ਅਕਤਪੁਞ੍ਞੇਨ ਮਾਤੁਗਾਮੇਨ. ਪਤਿਰੂਪੇ ਕੁਲੇ ਜਾਯਿਤ੍ਵਾ, ਪਤਿਰੂਪਂ ਕੁਲਂ ਗਨ੍ਤ੍ਵਾ, ਅਸਪਤ੍ਤਿ ਅਗਾਰਂ ਅਜ੍ਝਾਵਸੇਯ੍ਯਨ੍ਤਿ – ਇਦਂ, ਭਿਕ੍ਖਵੇ, ਤਤਿਯਂ ਠਾਨਂ ਦੁਲ੍ਲਭਂ ਅਕਤਪੁਞ੍ਞੇਨ ਮਾਤੁਗਾਮੇਨ. ਪਤਿਰੂਪੇ ਕੁਲੇ ਜਾਯਿਤ੍ਵਾ, ਪਤਿਰੂਪਂ ਕੁਲਂ ਗਨ੍ਤ੍ਵਾ, ਅਸਪਤ੍ਤਿ ਅਗਾਰਂ ਅਜ੍ਝਾਵਸਨ੍ਤੀ ਪੁਤ੍ਤਵਤੀ ਅਸ੍ਸਨ੍ਤਿ – ਇਦਂ, ਭਿਕ੍ਖਵੇ, ਚਤੁਤ੍ਥਂ ਠਾਨਂ ਦੁਲ੍ਲਭਂ ਅਕਤਪੁਞ੍ਞੇਨ ਮਾਤੁਗਾਮੇਨ. ਪਤਿਰੂਪੇ ਕੁਲੇ ਜਾਯਿਤ੍ਵਾ, ਪਤਿਰੂਪਂ ਕੁਲਂ ਗਨ੍ਤ੍ਵਾ, ਅਸਪਤ੍ਤਿ ਅਗਾਰਂ ਅਜ੍ਝਾਵਸਨ੍ਤੀ ਪੁਤ੍ਤਵਤੀ ਸਮਾਨਾ ਸਾਮਿਕਂ ਅਭਿਭੁਯ੍ਯ ਵਤ੍ਤੇਯ੍ਯਨ੍ਤਿ – ਇਦਂ, ਭਿਕ੍ਖਵੇ, ਪਞ੍ਚਮਂ ਠਾਨਂ ਦੁਲ੍ਲਭਂ ਅਕਤਪੁਞ੍ਞੇਨ ਮਾਤੁਗਾਮੇਨ. ਇਮਾਨਿ ਖੋ, ਭਿਕ੍ਖਵੇ, ਪਞ੍ਚ ਠਾਨਾਨਿ ਦੁਲ੍ਲਭਾਨਿ ਅਕਤਪੁਞ੍ਞੇਨ ਮਾਤੁਗਾਮੇਨਾਤਿ.

‘‘ਪਞ੍ਚਿਮਾਨਿ, ਭਿਕ੍ਖਵੇ, ਠਾਨਾਨਿ ਸੁਲਭਾਨਿ ਕਤਪੁਞ੍ਞੇਨ ਮਾਤੁਗਾਮੇਨ. ਕਤਮਾਨਿ ਪਞ੍ਚ? ਪਤਿਰੂਪੇ ਕੁਲੇ ਜਾਯੇਯ੍ਯਨ੍ਤਿ – ਇਦਂ, ਭਿਕ੍ਖਵੇ, ਪਠਮਂ ਠਾਨਂ ਸੁਲਭਂ ਕਤਪੁਞ੍ਞੇਨ ਮਾਤੁਗਾਮੇਨ. ਪਤਿਰੂਪੇ ਕੁਲੇ ਜਾਯਿਤ੍ਵਾ ਪਤਿਰੂਪਂ ਕੁਲਂ ਗਚ੍ਛੇਯ੍ਯਨ੍ਤਿ – ਇਦਂ, ਭਿਕ੍ਖਵੇ, ਦੁਤਿਯਂ ਠਾਨਂ ਸੁਲਭਂ ਕਤਪੁਞ੍ਞੇਨ ਮਾਤੁਗਾਮੇਨ. ਪਤਿਰੂਪੇ ਕੁਲੇ ਜਾਯਿਤ੍ਵਾ ਪਤਿਰੂਪਂ ਕੁਲਂ ਗਨ੍ਤ੍ਵਾ ਅਸਪਤ੍ਤਿ ਅਗਾਰਂ ਅਜ੍ਝਾਵਸੇਯ੍ਯਨ੍ਤਿ – ਇਦਂ, ਭਿਕ੍ਖਵੇ, ਤਤਿਯਂ ਠਾਨਂ ਸੁਲਭਂ ਕਤਪੁਞ੍ਞੇਨ ਮਾਤੁਗਾਮੇਨ. ਪਤਿਰੂਪੇ ਕੁਲੇ ਜਾਯਿਤ੍ਵਾ ਪਤਿਰੂਪਂ ਕੁਲਂ ਗਨ੍ਤ੍ਵਾ ਅਸਪਤ੍ਤਿ ਅਗਾਰਂ ਅਜ੍ਝਾਵਸਨ੍ਤੀ ਪੁਤ੍ਤਵਤੀ ਅਸ੍ਸਨ੍ਤਿ – ਇਦਂ, ਭਿਕ੍ਖਵੇ, ਚਤੁਤ੍ਥਂ ਠਾਨਂ ਸੁਲਭਂ ਕਤਪੁਞ੍ਞੇਨ ਮਾਤੁਗਾਮੇਨ. ਪਤਿਰੂਪੇ ਕੁਲੇ ਜਾਯਿਤ੍ਵਾ ਪਤਿਰੂਪਂ ਕੁਲਂ ਗਨ੍ਤ੍ਵਾ ਅਸਪਤ੍ਤਿ ਅਗਾਰਂ ਅਜ੍ਝਾਵਸਨ੍ਤੀ ਪੁਤ੍ਤਵਤੀ ਸਮਾਨਾ ਸਾਮਿਕਂ ਅਭਿਭੁਯ੍ਯ ਵਤ੍ਤੇਯ੍ਯਨ੍ਤਿ – ਇਦਂ, ਭਿਕ੍ਖਵੇ, ਪਞ੍ਚਮਂ ਠਾਨਂ ਸੁਲਭਂ ਕਤਪੁਞ੍ਞੇਨ ਮਾਤੁਗਾਮੇਨ. ਇਮਾਨਿ ਖੋ, ਭਿਕ੍ਖਵੇ, ਪਞ੍ਚ ਠਾਨਾਨਿ ਸੁਲਭਾਨਿ ਕਤਪੁਞ੍ਞੇਨ ਮਾਤੁਗਾਮੇਨਾ’’ਤਿ. ਅਟ੍ਠਮਂ.

੯. ਪਞ੍ਚਸੀਲਵਿਸਾਰਦਸੁਤ੍ਤਂ

੩੧੨. ‘‘ਪਞ੍ਚਹਿ, ਭਿਕ੍ਖਵੇ, ਧਮ੍ਮੇਹਿ ਸਮਨ੍ਨਾਗਤੋ ਮਾਤੁਗਾਮੋ ਵਿਸਾਰਦੋ ਅਗਾਰਂ ਅਜ੍ਝਾਵਸਤਿ. ਕਤਮੇਹਿ ਪਞ੍ਚਹਿ? ਪਾਣਾਤਿਪਾਤਾ ਪਟਿਵਿਰਤੋ ਚ ਹੋਤਿ, ਅਦਿਨ੍ਨਾਦਾਨਾ ਪਟਿਵਿਰਤੋ ਚ ਹੋਤਿ, ਕਾਮੇਸੁਮਿਚ੍ਛਾਚਾਰਾ ਪਟਿਵਿਰਤੋ ਚ ਹੋਤਿ, ਮੁਸਾਵਾਦਾ ਪਟਿਵਿਰਤੋ ਚ ਹੋਤਿ, ਸੁਰਾਮੇਰਯਮਜ੍ਜਪ੍ਪਮਾਦਟ੍ਠਾਨਾ ਪਟਿਵਿਰਤੋ ਚ ਹੋਤਿ – ਇਮੇਹਿ ਖੋ, ਭਿਕ੍ਖਵੇ, ਪਞ੍ਚਹਿ ਧਮ੍ਮੇਹਿ ਸਮਨ੍ਨਾਗਤੋ ਮਾਤੁਗਾਮੋ ਵਿਸਾਰਦੋ ਅਗਾਰਂ ਅਜ੍ਝਾਵਸਤੀ’’ਤਿ. ਨਵਮਂ.

੧੦. ਵਡ੍ਢੀਸੁਤ੍ਤਂ

੩੧੩. ‘‘ਪਞ੍ਚਹਿ, ਭਿਕ੍ਖਵੇ, ਵਡ੍ਢੀਹਿ ਵਡ੍ਢਮਾਨਾ ਅਰਿਯਸਾਵਿਕਾ ਅਰਿਯਾਯ ਵਡ੍ਢਿਯਾ ਵਡ੍ਢਤਿ ਸਾਰਾਦਾਯਿਨੀ ਚ ਹੋਤਿ ਵਰਾਦਾਯਿਨੀ ਚ ਕਾਯਸ੍ਸ. ਕਤਮੇਹਿ ਪਞ੍ਚਹਿ? ਸਦ੍ਧਾਯ ਵਡ੍ਢਤਿ, ਸੀਲੇਨ ਵਡ੍ਢਤਿ, ਸੁਤੇਨ ਵਡ੍ਢਤਿ, ਚਾਗੇਨ ਵਡ੍ਢਤਿ, ਪਞ੍ਞਾਯ ਵਡ੍ਢਤਿ – ਇਮੇਹਿ ਖੋ, ਭਿਕ੍ਖਵੇ, ਪਞ੍ਚਹਿ ਵਡ੍ਢੀਹਿ ਵਡ੍ਢਮਾਨਾ ਅਰਿਯਸਾਵਿਕਾ ਅਰਿਯਾਯ ਵਡ੍ਢਿਯਾ ਵਡ੍ਢਤਿ, ਸਾਰਾਦਾਯਿਨੀ ਚ ਹੋਤਿ, ਵਰਾਦਾਯਿਨੀ ਚ ਕਾਯਸ੍ਸਾ’’ਤਿ.

‘‘ਸਦ੍ਧਾਯ ਸੀਲੇਨ ਚ ਯਾਧ ਵਡ੍ਢਤਿ,

ਪਞ੍ਞਾਯ ਚਾਗੇਨ ਸੁਤੇਨ ਚੂਭਯਂ;

ਸਾ ਤਾਦਿਸੀ ਸੀਲਵਤੀ ਉਪਾਸਿਕਾ,

ਆਦੀਯਤਿ ਸਾਰਮਿਧੇਵ ਅਤ੍ਤਨੋ’’ਤਿ. ਦਸਮਂ;

ਬਲਵਗ੍ਗੋ ਤਤਿਯੋ.

ਤਸ੍ਸੁਦ੍ਦਾਨਂ –

ਵਿਸਾਰਦਾ ਪਸਯ੍ਹ ਅਭਿਭੁਯ੍ਯ, ਏਕਂ ਅਙ੍ਗੇਨ ਪਞ੍ਚਮਂ;

ਨਾਸੇਨ੍ਤਿ ਹੇਤੁ ਠਾਨਞ੍ਚ, ਵਿਸਾਰਦੋ ਵਡ੍ਢਿਨਾ ਦਸਾਤਿ.

ਮਾਤੁਗਾਮਸਂਯੁਤ੍ਤਂ ਸਮਤ੍ਤਂ.