੭. ਪਠਮਏਜਾਸੁਤ੍ਤਂ

੯੦. ‘‘ਏਜਾ, ਭਿਕ੍ਖਵੇ, ਰੋਗੋ, ਏਜਾ ਗਣ੍ਡੋ, ਏਜਾ ਸਲ੍ਲਂ. ਤਸ੍ਮਾਤਿਹ, ਭਿਕ੍ਖਵੇ, ਤਥਾਗਤੋ ਅਨੇਜੋ ਵਿਹਰਤਿ ਵੀਤਸਲ੍ਲੋ. ਤਸ੍ਮਾਤਿਹ, ਭਿਕ੍ਖਵੇ, ਭਿਕ੍ਖੁ ਚੇਪਿ ਆਕਙ੍ਖੇਯ੍ਯ ‘ਅਨੇਜੋ ਵਿਹਰੇਯ੍ਯਂ [ਵਿਹਰੇਯ੍ਯ (ਸੀ. ਪੀ. ਕ.)] ਵੀਤਸਲ੍ਲੋ’ਤਿ, ਚਕ੍ਖੁਂ ਨ ਮਞ੍ਞੇਯ੍ਯ, ਚਕ੍ਖੁਸ੍ਮਿਂ ਨ ਮਞ੍ਞੇਯ੍ਯ, ਚਕ੍ਖੁਤੋ ਨ ਮਞ੍ਞੇਯ੍ਯ, ਚਕ੍ਖੁ ਮੇਤਿ ਨ ਮਞ੍ਞੇਯ੍ਯ; ਰੂਪੇ ਨ ਮਞ੍ਞੇਯ੍ਯ, ਰੂਪੇਸੁ ਨ ਮਞ੍ਞੇਯ੍ਯ, ਰੂਪਤੋ ਨ ਮਞ੍ਞੇਯ੍ਯ, ਰੂਪਾ ਮੇਤਿ ਨ ਮਞ੍ਞੇਯ੍ਯ; ਚਕ੍ਖੁਵਿਞ੍ਞਾਣਂ ਨ ਮਞ੍ਞੇਯ੍ਯ, ਚਕ੍ਖੁਵਿਞ੍ਞਾਣਸ੍ਮਿਂ ਨ ਮਞ੍ਞੇਯ੍ਯ, ਚਕ੍ਖੁਵਿਞ੍ਞਾਣਤੋ ਨ ਮਞ੍ਞੇਯ੍ਯ, ਚਕ੍ਖੁਵਿਞ੍ਞਾਣਂ ਮੇਤਿ ਨ ਮਞ੍ਞੇਯ੍ਯ; ਚਕ੍ਖੁਸਮ੍ਫਸ੍ਸਂ ਨ ਮਞ੍ਞੇਯ੍ਯ, ਚਕ੍ਖੁਸਮ੍ਫਸ੍ਸਸ੍ਮਿਂ ਨ ਮਞ੍ਞੇਯ੍ਯ, ਚਕ੍ਖੁਸਮ੍ਫਸ੍ਸਤੋ ਨ ਮਞ੍ਞੇਯ੍ਯ, ਚਕ੍ਖੁਸਮ੍ਫਸ੍ਸੋ ਮੇਤਿ ਨ ਮਞ੍ਞੇਯ੍ਯ. ਯਮ੍ਪਿਦਂ ਚਕ੍ਖੁਸਮ੍ਫਸ੍ਸਪਚ੍ਚਯਾ ਉਪ੍ਪਜ੍ਜਤਿ ਵੇਦਯਿਤਂ ਸੁਖਂ ਵਾ ਦੁਕ੍ਖਂ ਵਾ ਅਦੁਕ੍ਖਮਸੁਖਂ ਵਾ ਤਮ੍ਪਿ ਨ ਮਞ੍ਞੇਯ੍ਯ, ਤਸ੍ਮਿਮ੍ਪਿ ਨ ਮਞ੍ਞੇਯ੍ਯ, ਤਤੋਪਿ ਨ ਮਞ੍ਞੇਯ੍ਯ, ਤਂ ਮੇਤਿ ਨ ਮਞ੍ਞੇਯ੍ਯ.

‘‘ਸੋਤਂ ਨ ਮਞ੍ਞੇਯ੍ਯ…ਪੇ… ਘਾਨਂ ਨ ਮਞ੍ਞੇਯ੍ਯ…ਪੇ… ਜਿਵ੍ਹਂ ਨ ਮਞ੍ਞੇਯ੍ਯ, ਜਿਵ੍ਹਾਯ ਨ ਮਞ੍ਞੇਯ੍ਯ, ਜਿਵ੍ਹਾਤੋ ਨ ਮਞ੍ਞੇਯ੍ਯ, ਜਿਵ੍ਹਾ ਮੇਤਿ ਨ ਮਞ੍ਞੇਯ੍ਯ; ਰਸੇ ਨ ਮਞ੍ਞੇਯ੍ਯ…ਪੇ… ਜਿਵ੍ਹਾਵਿਞ੍ਞਾਣਂ ਨ ਮਞ੍ਞੇਯ੍ਯ…ਪੇ… ਜਿਵ੍ਹਾਸਮ੍ਫਸ੍ਸਂ ਨ ਮਞ੍ਞੇਯ੍ਯ…ਪੇ… ਯਮ੍ਪਿਦਂ ਜਿਵ੍ਹਾਸਮ੍ਫਸ੍ਸਪਚ੍ਚਯਾ ਉਪ੍ਪਜ੍ਜਤਿ ਵੇਦਯਿਤਂ ਸੁਖਂ ਵਾ ਦੁਕ੍ਖਂ ਵਾ ਅਦੁਕ੍ਖਮਸੁਖਂ ਵਾ ਤਮ੍ਪਿ ਨ ਮਞ੍ਞੇਯ੍ਯ, ਤਸ੍ਮਿਮ੍ਪਿ ਨ ਮਞ੍ਞੇਯ੍ਯ, ਤਤੋਪਿ ਨ ਮਞ੍ਞੇਯ੍ਯ, ਤਂ ਮੇਤਿ ਨ ਮਞ੍ਞੇਯ੍ਯ.

‘‘ਕਾਯਂ ਨ ਮਞ੍ਞੇਯ੍ਯ…ਪੇ… ਮਨਂ ਨ ਮਞ੍ਞੇਯ੍ਯ, ਮਨਸ੍ਮਿਂ ਨ ਮਞ੍ਞੇਯ੍ਯ, ਮਨਤੋ ਨ ਮਞ੍ਞੇਯ੍ਯ, ਮਨੋ ਮੇਤਿ ਨ ਮਞ੍ਞੇਯ੍ਯ; ਧਮ੍ਮੇ ਨ ਮਞ੍ਞੇਯ੍ਯ…ਪੇ… ਮਨੋ ਵਿਞ੍ਞਾਣਂ…ਪੇ… ਮਨੋਸਮ੍ਫਸ੍ਸਂ…ਪੇ… ਯਮ੍ਪਿਦਂ ਮਨੋਸਮ੍ਫਸ੍ਸਪਚ੍ਚਯਾ ਉਪ੍ਪਜ੍ਜਤਿ ਵੇਦਯਿਤਂ ਸੁਖਂ ਵਾ ਦੁਕ੍ਖਂ ਵਾ ਅਦੁਕ੍ਖਮਸੁਖਂ ਵਾ ਤਮ੍ਪਿ ਨ ਮਞ੍ਞੇਯ੍ਯ, ਤਸ੍ਮਿਮ੍ਪਿ ਨ ਮਞ੍ਞੇਯ੍ਯ, ਤਤੋਪਿ ਨ ਮਞ੍ਞੇਯ੍ਯ, ਤਂ ਮੇਤਿ ਨ ਮਞ੍ਞੇਯ੍ਯ; ਸਬ੍ਬਂ ਨ ਮਞ੍ਞੇਯ੍ਯ, ਸਬ੍ਬਸ੍ਮਿਂ ਨ ਮਞ੍ਞੇਯ੍ਯ, ਸਬ੍ਬਤੋ ਨ ਮਞ੍ਞੇਯ੍ਯ, ਸਬ੍ਬਂ ਮੇਤਿ ਨ ਮਞ੍ਞੇਯ੍ਯ.

‘‘ਸੋ ਏਵਂ ਅਮਞ੍ਞਮਾਨੋ ਨ ਕਿਞ੍ਚਿਪਿ ਲੋਕੇ ਉਪਾਦਿਯਤਿ. ਅਨੁਪਾਦਿਯਂ ਨ ਪਰਿਤਸ੍ਸਤਿ. ਅਪਰਿਤਸ੍ਸਂ ਪਚ੍ਚਤ੍ਤਞ੍ਞੇਵ ਪਰਿਨਿਬ੍ਬਾਯਤਿ. ‘ਖੀਣਾ ਜਾਤਿ, ਵੁਸਿਤਂ ਬ੍ਰਹ੍ਮਚਰਿਯਂ, ਕਤਂ ਕਰਣੀਯਂ ਨਾਪਰਂ ਇਤ੍ਥਤ੍ਤਾਯਾ’ਤਿ ਪਜਾਨਾਤੀ’’ਤਿ. ਸਤ੍ਤਮਂ.