੭. ਉਪਸੇਨਆਸੀਵਿਸਸੁਤ੍ਤਂ

੬੯. ਏਕਂ ਸਮਯਂ ਆਯਸ੍ਮਾ ਚ ਸਾਰਿਪੁਤ੍ਤੋ ਆਯਸ੍ਮਾ ਚ ਉਪਸੇਨੋ ਰਾਜਗਹੇ ਵਿਹਰਨ੍ਤਿ ਸੀਤਵਨੇ ਸਪ੍ਪਸੋਣ੍ਡਿਕਪਬ੍ਭਾਰੇ. ਤੇਨ ਖੋ ਪਨ ਸਮਯੇਨ ਆਯਸ੍ਮਤੋ ਉਪਸੇਨਸ੍ਸ ਕਾਯੇ ਆਸੀਵਿਸੋ ਪਤਿਤੋ ਹੋਤਿ. ਅਥ ਖੋ ਆਯਸ੍ਮਾ ਉਪਸੇਨੋ ਭਿਕ੍ਖੂ ਆਮਨ੍ਤੇਸਿ – ‘‘ਏਥ ਮੇ, ਆਵੁਸੋ, ਇਮਂ ਕਾਯਂ ਮਞ੍ਚਕਂ ਆਰੋਪੇਤ੍ਵਾ ਬਹਿਦ੍ਧਾ ਨੀਹਰਥ. ਪੁਰਾਯਂ ਕਾਯੋ ਇਧੇਵ ਵਿਕਿਰਤਿ; ਸੇਯ੍ਯਥਾਪਿ ਭੁਸਮੁਟ੍ਠੀ’’ਤਿ.

ਏਵਂ ਵੁਤ੍ਤੇ, ਆਯਸ੍ਮਾ ਸਾਰਿਪੁਤ੍ਤੋ ਆਯਸ੍ਮਨ੍ਤਂ ਉਪਸੇਨਂ ਏਤਦਵੋਚ – ‘‘ਨ ਖੋ ਪਨ ਮਯਂ ਪਸ੍ਸਾਮ ਆਯਸ੍ਮਤੋ ਉਪਸੇਨਸ੍ਸ ਕਾਯਸ੍ਸ ਵਾ ਅਞ੍ਞਥਤ੍ਤਂ ਇਨ੍ਦ੍ਰਿਯਾਨਂ ਵਾ ਵਿਪਰਿਣਾਮਂ. ਅਥ ਚ ਪਨਾਯਸ੍ਮਾ ਉਪਸੇਨੋ ਏਵਮਾਹ – ‘ਏਥ ਮੇ, ਆਵੁਸੋ, ਇਮਂ ਕਾਯਂ ਮਞ੍ਚਕਂ ਆਰੋਪੇਤ੍ਵਾ ਬਹਿਦ੍ਧਾ ਨੀਹਰਥ. ਪੁਰਾਯਂ ਕਾਯੋ ਇਧੇਵ ਵਿਕਿਰਤਿ; ਸੇਯ੍ਯਥਾਪਿ ਭੁਸਮੁਟ੍ਠੀ’’’ਤਿ. ‘‘ਯਸ੍ਸ ਨੂਨ, ਆਵੁਸੋ ਸਾਰਿਪੁਤ੍ਤ, ਏਵਮਸ੍ਸ – ‘ਅਹਂ ਚਕ੍ਖੂਤਿ ਵਾ ਮਮ ਚਕ੍ਖੂਤਿ ਵਾ…ਪੇ… ਅਹਂ ਜਿਵ੍ਹਾਤਿ ਵਾ ਮਮ ਜਿਵ੍ਹਾਤਿ ਵਾ… ਅਹਂ ਮਨੋਤਿ ਵਾ ਮਮ ਮਨੋਤਿ ਵਾ’. ਤਸ੍ਸ, ਆਵੁਸੋ ਸਾਰਿਪੁਤ੍ਤ, ਸਿਯਾ ਕਾਯਸ੍ਸ ਵਾ ਅਞ੍ਞਥਤ੍ਤਂ ਇਨ੍ਦ੍ਰਿਯਾਨਂ ਵਾ ਵਿਪਰਿਣਾਮੋ. ਮਯ੍ਹਞ੍ਚ ਖੋ, ਆਵੁਸੋ ਸਾਰਿਪੁਤ੍ਤ, ਨ ਏਵਂ ਹੋਤਿ – ‘ਅਹਂ ਚਕ੍ਖੂਤਿ ਵਾ ਮਮ ਚਕ੍ਖੂਤਿ ਵਾ…ਪੇ… ਅਹਂ ਜਿਵ੍ਹਾਤਿ ਵਾ ਮਮ ਜਿਵ੍ਹਾਤਿ ਵਾ…ਪੇ… ਅਹਂ ਮਨੋਤਿ ਵਾ ਮਮ ਮਨੋਤਿ ਵਾ’. ਤਸ੍ਸ ਮਯ੍ਹਞ੍ਚ ਖੋ, ਆਵੁਸੋ ਸਾਰਿਪੁਤ੍ਤ, ਕਿਂ ਕਾਯਸ੍ਸ ਵਾ ਅਞ੍ਞਥਤ੍ਤਂ ਭਵਿਸ੍ਸਤਿ, ਇਨ੍ਦ੍ਰਿਯਾਨਂ ਵਾ ਵਿਪਰਿਣਾਮੋ’’ਤਿ!

‘‘ਤਥਾ ਹਿ ਪਨਾਯਸ੍ਮਤੋ ਉਪਸੇਨਸ੍ਸ ਦੀਘਰਤ੍ਤਂ ਅਹਙ੍ਕਾਰਮਮਙ੍ਕਾਰਮਾਨਾਨੁਸਯੋ ਸੁਸਮੂਹਤੋ. ਤਸ੍ਮਾ ਆਯਸ੍ਮਤੋ ਉਪਸੇਨਸ੍ਸ ਨ ਏਵਂ ਹੋਤਿ – ‘ਅਹਂ ਚਕ੍ਖੂਤਿ ਵਾ ਮਮ ਚਕ੍ਖੂਤਿ ਵਾ…ਪੇ… ਅਹਂ ਜਿਵ੍ਹਾਤਿ ਵਾ ਮਮ ਜਿਵ੍ਹਾਤਿ ਵਾ…ਪੇ… ਅਹਂ ਮਨੋਤਿ ਵਾ ਮਮ ਮਨੋਤਿ ਵਾ’’’ਤਿ. ਅਥ ਖੋ ਤੇ ਭਿਕ੍ਖੂ ਆਯਸ੍ਮਤੋ ਉਪਸੇਨਸ੍ਸ ਕਾਯਂ ਮਞ੍ਚਕਂ ਆਰੋਪੇਤ੍ਵਾ ਬਹਿਦ੍ਧਾ ਨੀਹਰਿਂਸੁ. ਅਥ ਖੋ ਆਯਸ੍ਮਤੋ ਉਪਸੇਨਸ੍ਸ ਕਾਯੋ ਤਤ੍ਥੇਵ ਵਿਕਿਰਿ; ਸੇਯ੍ਯਥਾਪਿ ਭੁਸਮੁਟ੍ਠੀਤਿ. ਸਤ੍ਤਮਂ.