੧੦. ਦੁਤਿਯਛਫਸ੍ਸਾਯਤਨਸੁਤ੍ਤਂ

੭੨. ‘‘ਯੋ ਹਿ ਕੋਚਿ, ਭਿਕ੍ਖਵੇ, ਭਿਕ੍ਖੁ ਛਨ੍ਨਂ ਫਸ੍ਸਾਯਤਨਾਨਂ ਸਮੁਦਯਞ੍ਚ ਅਤ੍ਥਙ੍ਗਮਞ੍ਚ ਅਸ੍ਸਾਦਞ੍ਚ ਆਦੀਨਵਞ੍ਚ ਨਿਸ੍ਸਰਣਞ੍ਚ ਯਥਾਭੂਤਂ ਨਪ੍ਪਜਾਨਾਤਿ. ਅਵੁਸਿਤਂ ਤੇਨ ਬ੍ਰਹ੍ਮਚਰਿਯਂ, ਆਰਕਾ ਸੋ ਇਮਸ੍ਮਾ ਧਮ੍ਮਵਿਨਯਾ’’ਤਿ.

ਏਵਂ ਵੁਤ੍ਤੇ, ਅਞ੍ਞਤਰੋ ਭਿਕ੍ਖੁ ਭਗਵਨ੍ਤਂ ਏਤਦਵੋਚ – ‘‘ਏਤ੍ਥਾਹਂ, ਭਨ੍ਤੇ, ਅਨਸ੍ਸਸਂ ਪਨਸ੍ਸਸਂ. ਅਹਞ੍ਹਿ, ਭਨ੍ਤੇ, ਛਨ੍ਨਂ ਫਸ੍ਸਾਯਤਨਾਨਂ ਸਮੁਦਯਞ੍ਚ ਅਤ੍ਥਙ੍ਗਮਞ੍ਚ ਅਸ੍ਸਾਦਞ੍ਚ ਆਦੀਨਵਞ੍ਚ ਨਿਸ੍ਸਰਣਞ੍ਚ ਯਥਾਭੂਤਂ ਨਪ੍ਪਜਾਨਾਮੀ’’ਤਿ.

‘‘ਤਂ ਕਿਂ ਮਞ੍ਞਸਿ, ਭਿਕ੍ਖੁ, ਚਕ੍ਖੁਂ ‘ਨੇਤਂ ਮਮ, ਨੇਸੋਹਮਸ੍ਮਿ, ਨ ਮੇਸੋ ਅਤ੍ਤਾ’ਤਿ ਸਮਨੁਪਸ੍ਸਸੀ’’ਤਿ?

‘‘ਏਵਂ, ਭਨ੍ਤੇ’’.

‘‘ਸਾਧੁ, ਭਿਕ੍ਖੁ, ਏਤ੍ਥ ਚ ਤੇ, ਭਿਕ੍ਖੁ, ਚਕ੍ਖੁ ‘ਨੇਤਂ ਮਮ, ਨੇਸੋਹਮਸ੍ਮਿ ਨ ਮੇਸੋ ਅਤ੍ਤਾ’ਤਿ ਏਵਮੇਤਂ ਯਥਾਭੂਤਂ ਸਮ੍ਮਪ੍ਪਞ੍ਞਾਯ ਸੁਦਿਟ੍ਠਂ ਭਵਿਸ੍ਸਤਿ. ਏਵਂ ਤੇ ਏਤਂ ਪਠਮਂ ਫਸ੍ਸਾਯਤਨਂ ਪਹੀਨਂ ਭਵਿਸ੍ਸਤਿ ਆਯਤਿਂ ਅਪੁਨਬ੍ਭਵਾਯ…ਪੇ….

‘‘ਜਿਵ੍ਹਂ ‘ਨੇਤਂ ਮਮ, ਨੇਸੋਹਮਸ੍ਮਿ, ਨ ਮੇਸੋ ਅਤ੍ਤਾ’ਤਿ ਸਮਨੁਪਸ੍ਸਸੀ’’ਤਿ?

‘‘ਏਵਂ, ਭਨ੍ਤੇ’’.

‘‘ਸਾਧੁ, ਭਿਕ੍ਖੁ, ਏਤ੍ਥ ਚ ਤੇ, ਭਿਕ੍ਖੁ, ਜਿਵ੍ਹਾ ‘ਨੇਤਂ ਮਮ, ਨੇਸੋਹਮਸ੍ਮਿ ਨ ਮੇਸੋ ਅਤ੍ਤਾ’ਤਿ ਏਵਮੇਤਂ ਯਥਾਭੂਤਂ ਸਮ੍ਮਪ੍ਪਞ੍ਞਾਯ ਸੁਦਿਟ੍ਠਂ ਭਵਿਸ੍ਸਤਿ. ਏਵਂ ਤੇ ਏਤਂ ਚਤੁਤ੍ਥਂ ਫਸ੍ਸਾਯਤਨਂ ਪਹੀਨਂ ਭਵਿਸ੍ਸਤਿ ਆਯਤਿਂ ਅਪੁਨਬ੍ਭਵਾਯ…ਪੇ….

‘‘ਮਨਂ ‘ਨੇਤਂ ਮਮ, ਨੇਸੋਹਮਸ੍ਮਿ, ਨ ਮੇਸੋ ਅਤ੍ਤਾ’ਤਿ ਸਮਨੁਪਸ੍ਸਸੀ’’ਤਿ?

‘‘ਏਵਂ, ਭਨ੍ਤੇ’’.

‘‘ਸਾਧੁ, ਭਿਕ੍ਖੁ, ਏਤ੍ਥ ਚ ਤੇ, ਭਿਕ੍ਖੁ, ਮਨੋ ‘ਨੇਤਂ ਮਮ, ਨੇਸੋਹਮਸ੍ਮਿ, ਨ ਮੇਸੋ ਅਤ੍ਤਾ’ਤਿ ਏਵਮੇਤਂ ਯਥਾਭੂਤਂ ਸਮ੍ਮਪ੍ਪਞ੍ਞਾਯ ਸੁਦਿਟ੍ਠਂ ਭਵਿਸ੍ਸਤਿ. ਏਵਂ ਤੇ ਏਤਂ ਛਟ੍ਠਂ ਫਸ੍ਸਾਯਤਨਂ ਪਹੀਨਂ ਭਵਿਸ੍ਸਤਿ ਆਯਤਿਂ ਅਪੁਨਬ੍ਭਵਾਯਾ’’ਤਿ. ਦਸਮਂ.