੧੭. ਸਟ੍ਠਿਪੇਯ੍ਯਾਲਵਗ੍ਗੋ

੧. ਅਜ੍ਝਤ੍ਤਅਨਿਚ੍ਚਛਨ੍ਦਸੁਤ੍ਤਂ

੧੬੮. ‘‘ਯਂ, ਭਿਕ੍ਖਵੇ, ਅਨਿਚ੍ਚਂ, ਤਤ੍ਰ ਵੋ ਛਨ੍ਦੋ ਪਹਾਤਬ੍ਬੋ. ਕਿਞ੍ਚ, ਭਿਕ੍ਖਵੇ, ਅਨਿਚ੍ਚਂ? ਚਕ੍ਖੁ, ਭਿਕ੍ਖਵੇ, ਅਨਿਚ੍ਚਂ; ਤਤ੍ਰ ਵੋ ਛਨ੍ਦੋ ਪਹਾਤਬ੍ਬੋ…ਪੇ… ਜਿਵ੍ਹਾ ਅਨਿਚ੍ਚਾ; ਤਤ੍ਰ ਵੋ ਛਨ੍ਦੋ ਪਹਾਤਬ੍ਬੋ…ਪੇ… ਮਨੋ ਅਨਿਚ੍ਚੋ; ਤਤ੍ਰ ਵੋ ਛਨ੍ਦੋ ਪਹਾਤਬ੍ਬੋ. ਯਂ, ਭਿਕ੍ਖਵੇ, ਅਨਿਚ੍ਚਂ, ਤਤ੍ਰ ਵੋ ਛਨ੍ਦੋ ਪਹਾਤਬ੍ਬੋ’’ਤਿ.

੨. ਅਜ੍ਝਤ੍ਤਅਨਿਚ੍ਚਰਾਗਸੁਤ੍ਤਂ

੧੬੯. ‘‘ਯਂ, ਭਿਕ੍ਖਵੇ, ਅਨਿਚ੍ਚਂ, ਤਤ੍ਰ ਵੋ ਰਾਗੋ ਪਹਾਤਬ੍ਬੋ. ਕਿਞ੍ਚ, ਭਿਕ੍ਖਵੇ, ਅਨਿਚ੍ਚਂ? ਚਕ੍ਖੁ, ਭਿਕ੍ਖਵੇ, ਅਨਿਚ੍ਚਂ; ਤਤ੍ਰ ਵੋ ਰਾਗੋ ਪਹਾਤਬ੍ਬੋ…ਪੇ… ਜਿਵ੍ਹਾ ਅਨਿਚ੍ਚਾ; ਤਤ੍ਰ ਵੋ ਰਾਗੋ ਪਹਾਤਬ੍ਬੋ…ਪੇ… ਮਨੋ ਅਨਿਚ੍ਚੋ; ਤਤ੍ਰ ਵੋ ਰਾਗੋ ਪਹਾਤਬ੍ਬੋ. ਯਂ, ਭਿਕ੍ਖਵੇ, ਅਨਿਚ੍ਚਂ, ਤਤ੍ਰ ਵੋ ਰਾਗੋ ਪਹਾਤਬ੍ਬੋ’’ਤਿ.

੩. ਅਜ੍ਝਤ੍ਤਅਨਿਚ੍ਚਛਨ੍ਦਰਾਗਸੁਤ੍ਤਂ

੧੭੦. ‘‘ਯਂ, ਭਿਕ੍ਖਵੇ, ਅਨਿਚ੍ਚਂ, ਤਤ੍ਰ ਵੋ ਛਨ੍ਦਰਾਗੋ ਪਹਾਤਬ੍ਬੋ. ਕਿਞ੍ਚ, ਭਿਕ੍ਖਵੇ, ਅਨਿਚ੍ਚਂ? ਚਕ੍ਖੁ, ਭਿਕ੍ਖਵੇ, ਅਨਿਚ੍ਚਂ; ਤਤ੍ਰ ਵੋ ਛਨ੍ਦਰਾਗੋ ਪਹਾਤਬ੍ਬੋ…ਪੇ… ਜਿਵ੍ਹਾ ਅਨਿਚ੍ਚਾ; ਤਤ੍ਰ ਵੋ ਛਨ੍ਦਰਾਗੋ ਪਹਾਤਬ੍ਬੋ…ਪੇ… ਮਨੋ ਅਨਿਚ੍ਚੋ; ਤਤ੍ਰ ਵੋ ਛਨ੍ਦਰਾਗੋ ਪਹਾਤਬ੍ਬੋ. ਯਂ, ਭਿਕ੍ਖਵੇ, ਅਨਿਚ੍ਚਂ, ਤਤ੍ਰ ਵੋ ਛਨ੍ਦਰਾਗੋ ਪਹਾਤਬ੍ਬੋ’’ਤਿ.

੪-੬. ਦੁਕ੍ਖਛਨ੍ਦਾਦਿਸੁਤ੍ਤਂ

੧੭੧-੧੭੩. ‘‘ਯਂ, ਭਿਕ੍ਖਵੇ, ਦੁਕ੍ਖਂ, ਤਤ੍ਰ ਵੋ ਛਨ੍ਦੋ ਪਹਾਤਬ੍ਬੋ, ਰਾਗੋ ਪਹਾਤਬ੍ਬੋ, ਛਨ੍ਦਰਾਗੋ ਪਹਾਤਬ੍ਬੋ. ਕਿਞ੍ਚ, ਭਿਕ੍ਖਵੇ, ਦੁਕ੍ਖਂ? ਚਕ੍ਖੁ, ਭਿਕ੍ਖਵੇ, ਦੁਕ੍ਖਂ; ਤਤ੍ਰ ਵੋ ਛਨ੍ਦੋ ਪਹਾਤਬ੍ਬੋ, ਰਾਗੋ ਪਹਾਤਬ੍ਬੋ, ਛਨ੍ਦਰਾਗੋ ਪਹਾਤਬ੍ਬੋ…ਪੇ… ਜਿਵ੍ਹਾ ਦੁਕ੍ਖਾ…ਪੇ… ਮਨੋ ਦੁਕ੍ਖੋ; ਤਤ੍ਰ ਵੋ ਛਨ੍ਦੋ ਪਹਾਤਬ੍ਬੋ, ਰਾਗੋ ਪਹਾਤਬ੍ਬੋ, ਛਨ੍ਦਰਾਗੋ ਪਹਾਤਬ੍ਬੋ. ਯਂ, ਭਿਕ੍ਖਵੇ, ਦੁਕ੍ਖਂ ਤਤ੍ਰ ਵੋ ਛਨ੍ਦੋ ਪਹਾਤਬ੍ਬੋ, ਰਾਗੋ ਪਹਾਤਬ੍ਬੋ, ਛਨ੍ਦਰਾਗੋ ਪਹਾਤਬ੍ਬੋ’’ਤਿ.

੭-੯. ਅਨਤ੍ਤਛਨ੍ਦਾਦਿਸੁਤ੍ਤਂ

੧੭੪-੧੭੬. ‘‘ਯੋ, ਭਿਕ੍ਖਵੇ, ਅਨਤ੍ਤਾ, ਤਤ੍ਰ ਵੋ ਛਨ੍ਦੋ ਪਹਾਤਬ੍ਬੋ, ਰਾਗੋ ਪਹਾਤਬ੍ਬੋ, ਛਨ੍ਦਰਾਗੋ ਪਹਾਤਬ੍ਬੋ. ਕੋ ਚ, ਭਿਕ੍ਖਵੇ, ਅਨਤ੍ਤਾ? ਚਕ੍ਖੁ, ਭਿਕ੍ਖਵੇ, ਅਨਤ੍ਤਾ; ਤਤ੍ਰ ਵੋ ਛਨ੍ਦੋ ਪਹਾਤਬ੍ਬੋ, ਰਾਗੋ ਪਹਾਤਬ੍ਬੋ, ਛਨ੍ਦਰਾਗੋ ਪਹਾਤਬ੍ਬੋ…ਪੇ… ਜਿਵ੍ਹਾ ਅਨਤ੍ਤਾ; ਤਤ੍ਰ ਵੋ ਛਨ੍ਦੋ ਪਹਾਤਬ੍ਬੋ, ਰਾਗੋ ਪਹਾਤਬ੍ਬੋ, ਛਨ੍ਦਰਾਗੋ ਪਹਾਤਬ੍ਬੋ…ਪੇ… ਮਨੋ ਅਨਤ੍ਤਾ; ਤਤ੍ਰ ਵੋ ਛਨ੍ਦੋ ਪਹਾਤਬ੍ਬੋ, ਰਾਗੋ ਪਹਾਤਬ੍ਬੋ, ਛਨ੍ਦਰਾਗੋ ਪਹਾਤਬ੍ਬੋ. ਯੋ, ਭਿਕ੍ਖਵੇ, ਅਨਤ੍ਤਾ ਤਤ੍ਰ ਵੋ ਛਨ੍ਦੋ ਪਹਾਤਬ੍ਬੋ, ਰਾਗੋ ਪਹਾਤਬ੍ਬੋ, ਛਨ੍ਦਰਾਗੋ ਪਹਾਤਬ੍ਬੋ’’ਤਿ.

੧੦-੧੨. ਬਾਹਿਰਾਨਿਚ੍ਚਛਨ੍ਦਾਦਿਸੁਤ੍ਤਂ

੧੭੭-੧੭੯. ‘‘ਯਂ, ਭਿਕ੍ਖਵੇ, ਅਨਿਚ੍ਚਂ, ਤਤ੍ਰ ਵੋ ਛਨ੍ਦੋ ਪਹਾਤਬ੍ਬੋ, ਰਾਗੋ ਪਹਾਤਬ੍ਬੋ, ਛਨ੍ਦਰਾਗੋ ਪਹਾਤਬ੍ਬੋ. ਕਿਞ੍ਚ, ਭਿਕ੍ਖਵੇ, ਅਨਿਚ੍ਚਂ? ਰੂਪਾ, ਭਿਕ੍ਖਵੇ, ਅਨਿਚ੍ਚਾ; ਤਤ੍ਰ ਵੋ ਛਨ੍ਦੋ ਪਹਾਤਬ੍ਬੋ, ਰਾਗੋ ਪਹਾਤਬ੍ਬੋ, ਛਨ੍ਦਰਾਗੋ ਪਹਾਤਬ੍ਬੋ. ਸਦ੍ਦਾ ਅਨਿਚ੍ਚਾ; ਤਤ੍ਰ ਵੋ ਛਨ੍ਦੋ ਪਹਾਤਬ੍ਬੋ, ਰਾਗੋ ਪਹਾਤਬ੍ਬੋ, ਛਨ੍ਦਰਾਗੋ ਪਹਾਤਬ੍ਬੋ. ਗਨ੍ਧਾ ਅਨਿਚ੍ਚਾ; ਤਤ੍ਰ ਵੋ ਛਨ੍ਦੋ ਪਹਾਤਬ੍ਬੋ, ਰਾਗੋ ਪਹਾਤਬ੍ਬੋ, ਛਨ੍ਦਰਾਗੋ ਪਹਾਤਬ੍ਬੋ. ਰਸਾ ਅਨਿਚ੍ਚਾ; ਤਤ੍ਰ ਵੋ ਛਨ੍ਦੋ ਪਹਾਤਬ੍ਬੋ, ਰਾਗੋ ਪਹਾਤਬ੍ਬੋ, ਛਨ੍ਦਰਾਗੋ ਪਹਾਤਬ੍ਬੋ. ਫੋਟ੍ਠਬ੍ਬਾ ਅਨਿਚ੍ਚਾ; ਤਤ੍ਰ ਵੋ ਛਨ੍ਦੋ ਪਹਾਤਬ੍ਬੋ, ਰਾਗੋ ਪਹਾਤਬ੍ਬੋ, ਛਨ੍ਦਰਾਗੋ ਪਹਾਤਬ੍ਬੋ. ਧਮ੍ਮਾ ਅਨਿਚ੍ਚਾ; ਤਤ੍ਰ ਵੋ ਛਨ੍ਦੋ ਪਹਾਤਬ੍ਬੋ, ਰਾਗੋ ਪਹਾਤਬ੍ਬੋ, ਛਨ੍ਦਰਾਗੋ ਪਹਾਤਬ੍ਬੋ. ਯਂ, ਭਿਕ੍ਖਵੇ, ਅਨਿਚ੍ਚਂ ਤਤ੍ਰ ਵੋ ਛਨ੍ਦੋ ਪਹਾਤਬ੍ਬੋ, ਰਾਗੋ ਪਹਾਤਬ੍ਬੋ, ਛਨ੍ਦਰਾਗੋ ਪਹਾਤਬ੍ਬੋ’’ਤਿ.

੧੩-੧੫. ਬਾਹਿਰਦੁਕ੍ਖਛਨ੍ਦਾਦਿਸੁਤ੍ਤਂ

੧੮੦-੧੮੨. ‘‘ਯਂ, ਭਿਕ੍ਖਵੇ, ਦੁਕ੍ਖਂ, ਤਤ੍ਰ ਵੋ ਛਨ੍ਦੋ ਪਹਾਤਬ੍ਬੋ, ਰਾਗੋ ਪਹਾਤਬ੍ਬੋ, ਛਨ੍ਦਰਾਗੋ ਪਹਾਤਬ੍ਬੋ. ਕਿਞ੍ਚ, ਭਿਕ੍ਖਵੇ, ਦੁਕ੍ਖਂ? ਰੂਪਾ, ਭਿਕ੍ਖਵੇ, ਦੁਕ੍ਖਾ; ਤਤ੍ਰ ਵੋ ਛਨ੍ਦੋ ਪਹਾਤਬ੍ਬੋ, ਰਾਗੋ ਪਹਾਤਬ੍ਬੋ, ਛਨ੍ਦਰਾਗੋ ਪਹਾਤਬ੍ਬੋ. ਸਦ੍ਦਾ… ਗਨ੍ਧਾ… ਰਸਾ… ਫੋਟ੍ਠਬ੍ਬਾ… ਧਮ੍ਮਾ ਦੁਕ੍ਖਾ; ਤਤ੍ਰ ਵੋ ਛਨ੍ਦੋ ਪਹਾਤਬ੍ਬੋ, ਰਾਗੋ ਪਹਾਤਬ੍ਬੋ, ਛਨ੍ਦਰਾਗੋ ਪਹਾਤਬ੍ਬੋ. ਯਂ, ਭਿਕ੍ਖਵੇ, ਦੁਕ੍ਖਂ, ਤਤ੍ਰ ਵੋ ਛਨ੍ਦੋ ਪਹਾਤਬ੍ਬੋ, ਰਾਗੋ ਪਹਾਤਬ੍ਬੋ, ਛਨ੍ਦਰਾਗੋ ਪਹਾਤਬ੍ਬੋ’’ਤਿ.

੧੬-੧੮. ਬਾਹਿਰਾਨਤ੍ਤਛਨ੍ਦਾਦਿਸੁਤ੍ਤਂ

੧੮੩-੧੮੫. ‘‘ਯੋ, ਭਿਕ੍ਖਵੇ, ਅਨਤ੍ਤਾ, ਤਤ੍ਰ ਵੋ ਛਨ੍ਦੋ ਪਹਾਤਬ੍ਬੋ, ਰਾਗੋ ਪਹਾਤਬ੍ਬੋ, ਛਨ੍ਦਰਾਗੋ ਪਹਾਤਬ੍ਬੋ. ਕੋ ਚ, ਭਿਕ੍ਖਵੇ, ਅਨਤ੍ਤਾ? ਰੂਪਾ, ਭਿਕ੍ਖਵੇ, ਅਨਤ੍ਤਾ; ਤਤ੍ਰ ਵੋ ਛਨ੍ਦੋ ਪਹਾਤਬ੍ਬੋ, ਰਾਗੋ ਪਹਾਤਬ੍ਬੋ, ਛਨ੍ਦਰਾਗੋ ਪਹਾਤਬ੍ਬੋ. ਸਦ੍ਦਾ… ਗਨ੍ਧਾ… ਰਸਾ… ਫੋਟ੍ਠਬ੍ਬਾ… ਧਮ੍ਮਾ ਅਨਤ੍ਤਾ; ਤਤ੍ਰ ਵੋ ਛਨ੍ਦੋ ਪਹਾਤਬ੍ਬੋ, ਰਾਗੋ ਪਹਾਤਬ੍ਬੋ, ਛਨ੍ਦਰਾਗੋ ਪਹਾਤਬ੍ਬੋ. ਯੋ, ਭਿਕ੍ਖਵੇ, ਅਨਤ੍ਤਾ ਤਤ੍ਰ ਵੋ ਛਨ੍ਦੋ ਪਹਾਤਬ੍ਬੋ, ਰਾਗੋ ਪਹਾਤਬ੍ਬੋ, ਛਨ੍ਦਰਾਗੋ ਪਹਾਤਬ੍ਬੋ’’ਤਿ.

੧੯. ਅਜ੍ਝਤ੍ਤਾਤੀਤਾਨਿਚ੍ਚਸੁਤ੍ਤਂ

੧੮੬. ‘‘ਚਕ੍ਖੁ, ਭਿਕ੍ਖਵੇ, ਅਨਿਚ੍ਚਂ ਅਤੀਤਂ…ਪੇ… ਜਿਵ੍ਹਾ ਅਨਿਚ੍ਚਾ ਅਤੀਤਾ…ਪੇ… ਮਨੋ ਅਨਿਚ੍ਚੋ ਅਤੀਤੋ. ਏਵਂ ਪਸ੍ਸਂ, ਭਿਕ੍ਖਵੇ, ਸੁਤਵਾ ਅਰਿਯਸਾਵਕੋ ਚਕ੍ਖੁਸ੍ਮਿਮ੍ਪਿ ਨਿਬ੍ਬਿਨ੍ਦਤਿ…ਪੇ… ਜਿਵ੍ਹਾਯਪਿ ਨਿਬ੍ਬਿਨ੍ਦਤਿ…ਪੇ… ਮਨਸ੍ਮਿਮ੍ਪਿ ਨਿਬ੍ਬਿਨ੍ਦਤਿ. ਨਿਬ੍ਬਿਨ੍ਦਂ ਵਿਰਜ੍ਜਤਿ; ਵਿਰਾਗਾ ਵਿਮੁਚ੍ਚਤਿ; ਵਿਮੁਤ੍ਤਸ੍ਮਿਂ ਵਿਮੁਤ੍ਤਮਿਤਿ ਞਾਣਂ ਹੋਤਿ. ‘ਖੀਣਾ ਜਾਤਿ, ਵੁਸਿਤਂ ਬ੍ਰਹ੍ਮਚਰਿਯਂ, ਕਤਂ ਕਰਣੀਯਂ, ਨਾਪਰਂ ਇਤ੍ਥਤ੍ਤਾਯਾ’ਤਿ ਪਜਾਨਾਤੀ’’ਤਿ.

੨੦. ਅਜ੍ਝਤ੍ਤਾਨਾਗਤਾਨਿਚ੍ਚਸੁਤ੍ਤਂ

੧੮੭. ‘‘ਚਕ੍ਖੁ, ਭਿਕ੍ਖਵੇ, ਅਨਿਚ੍ਚਂ ਅਨਾਗਤਂ…ਪੇ… ਜਿਵ੍ਹਾ ਅਨਿਚ੍ਚਾ ਅਨਾਗਤਾ…ਪੇ… ਮਨੋ ਅਨਿਚ੍ਚੋ ਅਨਾਗਤੋ. ਏਵਂ ਪਸ੍ਸਂ…ਪੇ… ਨਾਪਰਂ ਇਤ੍ਥਤ੍ਤਾਯਾਤਿ ਪਜਾਨਾਤੀ’’ਤਿ.

੨੧. ਅਜ੍ਝਤ੍ਤਪਚ੍ਚੁਪ੍ਪਨ੍ਨਾਨਿਚ੍ਚਸੁਤ੍ਤਂ

੧੮੮. ‘‘ਚਕ੍ਖੁ, ਭਿਕ੍ਖਵੇ, ਅਨਿਚ੍ਚਂ ਪਚ੍ਚੁਪ੍ਪਨ੍ਨਂ…ਪੇ… ਜਿਵ੍ਹਾ ਅਨਿਚ੍ਚਾ ਪਚ੍ਚੁਪ੍ਪਨ੍ਨਾ…ਪੇ… ਮਨੋ ਅਨਿਚ੍ਚੋ ਪਚ੍ਚੁਪ੍ਪਨ੍ਨੋ. ਏਵਂ ਪਸ੍ਸਂ…ਪੇ… ਨਾਪਰਂ ਇਤ੍ਥਤ੍ਤਾਯਾਤਿ ਪਜਾਨਾਤੀ’’ਤਿ.

੨੨-੨੪. ਅਜ੍ਝਤ੍ਤਾਤੀਤਾਦਿਦੁਕ੍ਖਸੁਤ੍ਤਂ

੧੮੯-੧੯੧. ‘‘ਚਕ੍ਖੁ, ਭਿਕ੍ਖਵੇ, ਦੁਕ੍ਖਂ ਅਤੀਤਂ ਅਨਾਗਤਂ ਪਚ੍ਚੁਪ੍ਪਨ੍ਨਂ…ਪੇ… ਜਿਵ੍ਹਾ ਦੁਕ੍ਖਾ ਅਤੀਤਾ ਅਨਾਗਤਾ ਪਚ੍ਚੁਪ੍ਪਨ੍ਨਾ…ਪੇ… ਮਨੋ ਦੁਕ੍ਖੋ ਅਤੀਤੋ ਅਨਾਗਤੋ ਪਚ੍ਚੁਪ੍ਪਨ੍ਨੋ. ਏਵਂ ਪਸ੍ਸਂ, ਭਿਕ੍ਖਵੇ…ਪੇ… ਨਾਪਰਂ ਇਤ੍ਥਤ੍ਤਾਯਾਤਿ ਪਜਾਨਾਤੀ’’ਤਿ.

੨੫-੨੭. ਅਜ੍ਝਤ੍ਤਾਤੀਤਾਦਿਅਨਤ੍ਤਸੁਤ੍ਤਂ

੧੯੨-੧੯੪. ‘‘ਚਕ੍ਖੁ, ਭਿਕ੍ਖਵੇ, ਅਨਤ੍ਤਾ ਅਤੀਤਂ ਅਨਾਗਤਂ ਪਚ੍ਚੁਪ੍ਪਨ੍ਨਂ…ਪੇ… ਜਿਵ੍ਹਾ ਅਨਤ੍ਤਾ…ਪੇ… ਮਨੋ ਅਨਤ੍ਤਾ ਅਤੀਤੋ ਅਨਾਗਤੋ ਪਚ੍ਚੁਪ੍ਪਨ੍ਨੋ. ਏਵਂ ਪਸ੍ਸਂ…ਪੇ… ਨਾਪਰਂ ਇਤ੍ਥਤ੍ਤਾਯਾਤਿ ਪਜਾਨਾਤੀ’’ਤਿ.

੨੮-੩੦. ਬਾਹਿਰਾਤੀਤਾਦਿਅਨਿਚ੍ਚਸੁਤ੍ਤਂ

੧੯੫-੧੯੭. ‘‘ਰੂਪਾ, ਭਿਕ੍ਖਵੇ, ਅਨਿਚ੍ਚਾ ਅਤੀਤਾ ਅਨਾਗਤਾ ਪਚ੍ਚੁਪ੍ਪਨ੍ਨਾ. ਸਦ੍ਦਾ… ਗਨ੍ਧਾ… ਰਸਾ… ਫੋਟ੍ਠਬ੍ਬਾ… ਧਮ੍ਮਾ ਅਨਿਚ੍ਚਾ ਅਤੀਤਾ ਅਨਾਗਤਾ ਪਚ੍ਚੁਪ੍ਪਨ੍ਨਾ. ਏਵਂ ਪਸ੍ਸਂ…ਪੇ… ਨਾਪਰਂ ਇਤ੍ਥਤ੍ਤਾਯਾਤਿ ਪਜਾਨਾਤੀ’’ਤਿ.

੩੧-੩੩. ਬਾਹਿਰਾਤੀਤਾਦਿਦੁਕ੍ਖਸੁਤ੍ਤਂ

੧੯੮-੨੦੦. ‘‘ਰੂਪਾ, ਭਿਕ੍ਖਵੇ, ਦੁਕ੍ਖਾ ਅਤੀਤਾ ਅਨਾਗਤਾ ਪਚ੍ਚੁਪ੍ਪਨ੍ਨਾ. ਸਦ੍ਦਾ… ਗਨ੍ਧਾ… ਰਸਾ… ਫੋਟ੍ਠਬ੍ਬਾ… ਧਮ੍ਮਾ ਦੁਕ੍ਖਾ ਅਤੀਤਾ ਅਨਾਗਤਾ ਪਚ੍ਚੁਪ੍ਪਨ੍ਨਾ. ਏਵਂ ਪਸ੍ਸਂ…ਪੇ… ਨਾਪਰਂ ਇਤ੍ਥਤ੍ਤਾਯਾਤਿ ਪਜਾਨਾਤੀ’’ਤਿ.

੩੪-੩੬. ਬਾਹਿਰਾਤੀਤਾਦਿਅਨਤ੍ਤਸੁਤ੍ਤਂ

੨੦੧-੨੦੩. ‘‘ਰੂਪਾ, ਭਿਕ੍ਖਵੇ, ਅਨਤ੍ਤਾ ਅਤੀਤਾ ਅਨਾਗਤਾ ਪਚ੍ਚੁਪ੍ਪਨ੍ਨਾ. ਸਦ੍ਦਾ… ਗਨ੍ਧਾ… ਰਸਾ… ਫੋਟ੍ਠਬ੍ਬਾ… ਧਮ੍ਮਾ ਅਨਤ੍ਤਾ ਅਤੀਤਾ ਅਨਾਗਤਾ ਪਚ੍ਚੁਪ੍ਪਨ੍ਨਾ. ਏਵਂ ਪਸ੍ਸਂ…ਪੇ… ਨਾਪਰਂ ਇਤ੍ਥਤ੍ਤਾਯਾਤਿ ਪਜਾਨਾਤੀ’’ਤਿ.

੩੭. ਅਜ੍ਝਤ੍ਤਾਤੀਤਯਦਨਿਚ੍ਚਸੁਤ੍ਤਂ

੨੦੪. ‘‘ਚਕ੍ਖੁ, ਭਿਕ੍ਖਵੇ, ਅਨਿਚ੍ਚਂ ਅਤੀਤਂ. ਯਦਨਿਚ੍ਚਂ, ਤਂ ਦੁਕ੍ਖਂ. ਯਂ ਦੁਕ੍ਖਂ, ਤਦਨਤ੍ਤਾ. ਯਦਨਤ੍ਤਾ, ਤਂ ‘ਨੇਤਂ ਮਮ, ਨੇਸੋਹਮਸ੍ਮਿ, ਨ ਮੇਸੋ ਅਤ੍ਤਾ’ਤਿ ਏਵਮੇਤਂ ਯਥਾਭੂਤਂ ਸਮ੍ਮਪ੍ਪਞ੍ਞਾਯ ਦਟ੍ਠਬ੍ਬਂ…ਪੇ… ਜਿਵ੍ਹਾ ਅਨਿਚ੍ਚਾ ਅਤੀਤਾ. ਯਦਨਿਚ੍ਚਂ, ਤਂ ਦੁਕ੍ਖਂ. ਯਂ ਦੁਕ੍ਖਂ, ਤਦਨਤ੍ਤਾ. ਯਦਨਤ੍ਤਾ, ਤਂ ‘ਨੇਤਂ ਮਮ, ਨੇਸੋਹਮਸ੍ਮਿ, ਨ ਮੇਸੋ ਅਤ੍ਤਾ’ਤਿ ਏਵਮੇਤਂ ਯਥਾਭੂਤਂ ਸਮ੍ਮਪ੍ਪਞ੍ਞਾਯ ਦਟ੍ਠਬ੍ਬਂ…ਪੇ… ਮਨੋ ਅਨਿਚ੍ਚੋ ਅਤੀਤੋ. ਯਦਨਿਚ੍ਚਂ, ਤਂ ਦੁਕ੍ਖਂ. ਯਂ ਦੁਕ੍ਖਂ, ਤਦਨਤ੍ਤਾ. ਯਦਨਤ੍ਤਾ, ਤਂ ‘ਨੇਤਂ ਮਮ, ਨੇਸੋਹਮਸ੍ਮਿ, ਨ ਮੇਸੋ ਅਤ੍ਤਾ’ਤਿ ਏਵਮੇਤਂ ਯਥਾਭੂਤਂ ਸਮ੍ਮਪ੍ਪਞ੍ਞਾਯ ਦਟ੍ਠਬ੍ਬਂ. ਏਵਂ ਪਸ੍ਸਂ…ਪੇ… ਨਾਪਰਂ ਇਤ੍ਥਤ੍ਤਾਯਾਤਿ ਪਜਾਨਾਤੀ’’ਤਿ.

੩੮. ਅਜ੍ਝਤ੍ਤਾਨਾਗਤਯਦਨਿਚ੍ਚਸੁਤ੍ਤਂ

੨੦੫. ‘‘ਚਕ੍ਖੁ, ਭਿਕ੍ਖਵੇ, ਅਨਿਚ੍ਚਂ ਅਨਾਗਤਂ. ਯਦਨਿਚ੍ਚਂ, ਤਂ ਦੁਕ੍ਖਂ. ਯਂ ਦੁਕ੍ਖਂ, ਤਦਨਤ੍ਤਾ. ਯਦਨਤ੍ਤਾ ਤਂ ‘ਨੇਤਂ ਮਮ, ਨੇਸੋਹਮਸ੍ਮਿ, ਨ ਮੇਸੋ ਅਤ੍ਤਾ’ਤਿ ਏਵਮੇਤਂ ਯਥਾਭੂਤਂ ਸਮ੍ਮਪ੍ਪਞ੍ਞਾਯ ਦਟ੍ਠਬ੍ਬਂ…ਪੇ… ਜਿਵ੍ਹਾ ਅਨਿਚ੍ਚਾ ਅਨਾਗਤਾ. ਯਦਨਿਚ੍ਚਂ, ਤਂ ਦੁਕ੍ਖਂ. ਯਂ ਦੁਕ੍ਖਂ, ਤਦਨਤ੍ਤਾ. ਯਦਨਤ੍ਤਾ, ਤਂ ‘ਨੇਤਂ ਮਮ, ਨੇਸੋਹਮਸ੍ਮਿ, ਨ ਮੇਸੋ ਅਤ੍ਤਾ’ਤਿ ਏਵਮੇਤਂ ਯਥਾਭੂਤਂ ਸਮ੍ਮਪ੍ਪਞ੍ਞਾਯ ਦਟ੍ਠਬ੍ਬਂ…ਪੇ… ਮਨੋ ਅਨਿਚ੍ਚੋ ਅਨਾਗਤੋ. ਯਦਨਿਚ੍ਚਂ, ਤਂ ਦੁਕ੍ਖਂ. ਯਂ ਦੁਕ੍ਖਂ, ਤਦਨਤ੍ਤਾ. ਯਦਨਤ੍ਤਾ, ਤਂ ‘ਨੇਤਂ ਮਮ, ਨੇਸੋਹਮਸ੍ਮਿ, ਨ ਮੇਸੋ ਅਤ੍ਤਾ’ਤਿ ਏਵਮੇਤਂ ਯਥਾਭੂਤਂ ਸਮ੍ਮਪ੍ਪਞ੍ਞਾਯ ਦਟ੍ਠਬ੍ਬਂ. ਏਵਂ ਪਸ੍ਸਂ, ਭਿਕ੍ਖਵੇ…ਪੇ… ਨਾਪਰਂ ਇਤ੍ਥਤ੍ਤਾਯਾਤਿ ਪਜਾਨਾਤੀ’’ਤਿ.

੩੯. ਅਜ੍ਝਤ੍ਤਪਚ੍ਚੁਪ੍ਪਨ੍ਨਯਦਨਿਚ੍ਚਸੁਤ੍ਤਂ

੨੦੬. ‘‘ਚਕ੍ਖੁ, ਭਿਕ੍ਖਵੇ, ਅਨਿਚ੍ਚਂ ਪਚ੍ਚੁਪ੍ਪਨ੍ਨਂ. ਯਦਨਿਚ੍ਚਂ, ਤਂ ਦੁਕ੍ਖਂ. ਯਂ ਦੁਕ੍ਖਂ, ਤਦਨਤ੍ਤਾ. ਯਦਨਤ੍ਤਾ ਤਂ ‘ਨੇਤਂ ਮਮ, ਨੇਸੋਹਮਸ੍ਮਿ, ਨ ਮੇਸੋ ਅਤ੍ਤਾ’ਤਿ ਏਵਮੇਤਂ ਯਥਾਭੂਤਂ ਸਮ੍ਮਪ੍ਪਞ੍ਞਾਯ ਦਟ੍ਠਬ੍ਬਂ…ਪੇ… ਜਿਵ੍ਹਾ ਅਨਿਚ੍ਚਾ ਪਚ੍ਚੁਪ੍ਪਨ੍ਨਾ. ਯਦਨਿਚ੍ਚਂ, ਤਂ ਦੁਕ੍ਖਂ. ਯਂ ਦੁਕ੍ਖਂ, ਤਦਨਤ੍ਤਾ. ਯਦਨਤ੍ਤਾ, ਤਂ ‘ਨੇਤਂ ਮਮ, ਨੇਸੋਹਮਸ੍ਮਿ, ਨ ਮੇਸੋ ਅਤ੍ਤਾ’ਤਿ ਏਵਮੇਤਂ ਯਥਾਭੂਤਂ ਸਮ੍ਮਪ੍ਪਞ੍ਞਾਯ ਦਟ੍ਠਬ੍ਬਂ…ਪੇ… ਮਨੋ ਅਨਿਚ੍ਚੋ ਪਚ੍ਚੁਪ੍ਪਨ੍ਨੋ. ਯਦਨਿਚ੍ਚਂ ਤਂ ਦੁਕ੍ਖਂ. ਯਂ ਦੁਕ੍ਖਂ ਤਦਨਤ੍ਤਾ. ਯਦਨਤ੍ਤਾ, ਤਂ ‘ਨੇਤਂ ਮਮ, ਨੇਸੋਹਮਸ੍ਮਿ, ਨ ਮੇਸੋ ਅਤ੍ਤਾ’ਤਿ ਏਵਮੇਤਂ ਯਥਾਭੂਤਂ ਸਮ੍ਮਪ੍ਪਞ੍ਞਾਯ ਦਟ੍ਠਬ੍ਬਂ. ਏਵਂ ਪਸ੍ਸਂ…ਪੇ… ਨਾਪਰਂ ਇਤ੍ਥਤ੍ਤਾਯਾਤਿ ਪਜਾਨਾਤੀ’’ਤਿ.

੪੦-੪੨. ਅਜ੍ਝਤ੍ਤਾਤੀਤਾਦਿਯਂਦੁਕ੍ਖਸੁਤ੍ਤਂ

੨੦੭-੨੦੯. ‘‘ਚਕ੍ਖੁ, ਭਿਕ੍ਖਵੇ, ਦੁਕ੍ਖਂ ਅਤੀਤਂ ਅਨਾਗਤਂ ਪਚ੍ਚੁਪ੍ਪਨ੍ਨਂ. ਯਂ ਦੁਕ੍ਖਂ, ਤਦਨਤ੍ਤਾ. ਯਦਨਤ੍ਤਾ, ਤਂ ‘ਨੇਤਂ ਮਮ, ਨੇਸੋਹਮਸ੍ਮਿ, ਨ ਮੇਸੋ ਅਤ੍ਤਾ’ਤਿ ਏਵਮੇਤਂ ਯਥਾਭੂਤਂ ਸਮ੍ਮਪ੍ਪਞ੍ਞਾਯ ਦਟ੍ਠਬ੍ਬਂ…ਪੇ… ਜਿਵ੍ਹਾ ਦੁਕ੍ਖਾ…ਪੇ… ਮਨੋ ਦੁਕ੍ਖੋ ਅਤੀਤੋ ਅਨਾਗਤੋ ਪਚ੍ਚੁਪ੍ਪਨ੍ਨੋ. ਯਂ ਦੁਕ੍ਖਂ, ਤਦਨਤ੍ਤਾ. ਯਦਨਤ੍ਤਾ, ਤਂ ‘ਨੇਤਂ ਮਮ, ਨੇਸੋਹਮਸ੍ਮਿ, ਨ ਮੇਸੋ ਅਤ੍ਤਾ’ਤਿ ਏਵਮੇਤਂ ਯਥਾਭੂਤਂ ਸਮ੍ਮਪ੍ਪਞ੍ਞਾਯ ਦਟ੍ਠਬ੍ਬਂ. ਏਵਂ ਪਸ੍ਸਂ…ਪੇ… ਨਾਪਰਂ ਇਤ੍ਥਤ੍ਤਾਯਾਤਿ ਪਜਾਨਾਤੀ’’ਤਿ.

੪੩-੪੫. ਅਜ੍ਝਤ੍ਤਾਤੀਤਾਦਿਯਦਨਤ੍ਤਸੁਤ੍ਤਂ

੨੧੦-੨੧੨. ‘‘ਚਕ੍ਖੁ, ਭਿਕ੍ਖਵੇ, ਅਨਤ੍ਤਾ ਅਤੀਤਂ ਅਨਾਗਤਂ ਪਚ੍ਚੁਪ੍ਪਨ੍ਨਂ. ਯਦਨਤ੍ਤਾ, ਤਂ ‘ਨੇਤਂ ਮਮ, ਨੇਸੋਹਮਸ੍ਮਿ, ਨ ਮੇਸੋ ਅਤ੍ਤਾ’ਤਿ ਏਵਮੇਤਂ ਯਥਾਭੂਤਂ ਸਮ੍ਮਪ੍ਪਞ੍ਞਾਯ ਦਟ੍ਠਬ੍ਬਂ…ਪੇ… ਜਿਵ੍ਹਾ ਅਨਤ੍ਤਾ…ਪੇ… ਮਨੋ ਅਨਤ੍ਤਾ ਅਤੀਤੋ ਅਨਾਗਤੋ ਪਚ੍ਚੁਪ੍ਪਨ੍ਨੋ. ਯਦਨਤ੍ਤਾ ਤਂ ‘ਨੇਤਂ ਮਮ, ਨੇਸੋਹਮਸ੍ਮਿ, ਨ ਮੇਸੋ ਅਤ੍ਤਾ’ਤਿ ਏਵਮੇਤਂ ਯਥਾਭੂਤਂ ਸਮ੍ਮਪ੍ਪਞ੍ਞਾਯ ਦਟ੍ਠਬ੍ਬਂ. ਏਵਂ ਪਸ੍ਸਂ…ਪੇ… ਨਾਪਰਂ ਇਤ੍ਥਤ੍ਤਾਯਾਤਿ ਪਜਾਨਾਤੀ’’ਤਿ.

੪੬-੪੮. ਬਾਹਿਰਾਤੀਤਾਦਿਯਦਨਿਚ੍ਚਸੁਤ੍ਤਂ

੨੧੩-੨੧੫. ‘‘ਰੂਪਾ, ਭਿਕ੍ਖਵੇ, ਅਨਿਚ੍ਚਾ ਅਤੀਤਾ ਅਨਾਗਤਾ ਪਚ੍ਚੁਪ੍ਪਨ੍ਨਾ. ਯਦਨਿਚ੍ਚਂ, ਤਂ ਦੁਕ੍ਖਂ. ਯਂ ਦੁਕ੍ਖਂ, ਤਦਨਤ੍ਤਾ. ਯਦਨਤ੍ਤਾ, ਤਂ ‘ਨੇਤਂ ਮਮ, ਨੇਸੋਹਮਸ੍ਮਿ, ਨ ਮੇਸੋ ਅਤ੍ਤਾ’ਤਿ ਏਵਮੇਤਂ ਯਥਾਭੂਤਂ ਸਮ੍ਮਪ੍ਪਞ੍ਞਾਯ ਦਟ੍ਠਬ੍ਬਂ. ਸਦ੍ਦਾ… ਗਨ੍ਧਾ… ਰਸਾ… ਫੋਟ੍ਠਬ੍ਬਾ… ਧਮ੍ਮਾ ਅਨਿਚ੍ਚਾ ਅਤੀਤਾ ਅਨਾਗਤਾ ਪਚ੍ਚੁਪ੍ਪਨ੍ਨਾ. ਯਦਨਿਚ੍ਚਂ ਤਂ ਦੁਕ੍ਖਂ. ਯਂ ਦੁਕ੍ਖਂ ਤਦਨਤ੍ਤਾ. ਯਦਨਤ੍ਤਾ ਤਂ ‘ਨੇਤਂ ਮਮ, ਨੇਸੋਹਮਸ੍ਮਿ, ਨ ਮੇਸੋ ਅਤ੍ਤਾ’ਤਿ ਏਵਮੇਤਂ ਯਥਾਭੂਤਂ ਸਮ੍ਮਪ੍ਪਞ੍ਞਾਯ ਦਟ੍ਠਬ੍ਬਂ. ਏਵਂ ਪਸ੍ਸਂ…ਪੇ… ਨਾਪਰਂ ਇਤ੍ਥਤ੍ਤਾਯਾਤਿ ਪਜਾਨਾਤੀ’’ਤਿ.

੪੯-੫੧. ਬਾਹਿਰਾਤੀਤਾਦਿਯਂਦੁਕ੍ਖਸੁਤ੍ਤਂ

੨੧੬-੨੧੮. ‘‘ਰੂਪਾ, ਭਿਕ੍ਖਵੇ, ਦੁਕ੍ਖਾ ਅਤੀਤਾ ਅਨਾਗਤਾ ਪਚ੍ਚੁਪ੍ਪਨ੍ਨਾ. ਯਂ ਦੁਕ੍ਖਂ, ਤਦਨਤ੍ਤਾ. ਯਦਨਤ੍ਤਾ, ਤਂ ‘ਨੇਤਂ ਮਮ, ਨੇਸੋਹਮਸ੍ਮਿ, ਨ ਮੇਸੋ ਅਤ੍ਤਾ’ਤਿ ਏਵਮੇਤਂ ਯਥਾਭੂਤਂ ਸਮ੍ਮਪ੍ਪਞ੍ਞਾਯ ਦਟ੍ਠਬ੍ਬਂ. ਸਦ੍ਦਾ… ਗਨ੍ਧਾ… ਰਸਾ… ਫੋਟ੍ਠਬ੍ਬਾ… ਧਮ੍ਮਾ ਦੁਕ੍ਖਾ ਅਤੀਤਾ ਅਨਾਗਤਾ ਪਚ੍ਚੁਪ੍ਪਨ੍ਨਾ. ਯਂ ਦੁਕ੍ਖਂ, ਤਦਨਤ੍ਤਾ. ਯਦਨਤ੍ਤਾ, ਤਂ ‘ਨੇਤਂ ਮਮ, ਨੇਸੋਹਮਸ੍ਮਿ, ਨ ਮੇਸੋ ਅਤ੍ਤਾ’ਤਿ ਏਵਮੇਤਂ ਯਥਾਭੂਤਂ ਸਮ੍ਮਪ੍ਪਞ੍ਞਾਯ ਦਟ੍ਠਬ੍ਬਂ. ਏਵਂ ਪਸ੍ਸਂ…ਪੇ… ਨਾਪਰਂ ਇਤ੍ਥਤ੍ਤਾਯਾਤਿ ਪਜਾਨਾਤੀ’’ਤਿ.

੫੨-੫੪. ਬਾਹਿਰਾਤੀਤਾਦਿਯਦਨਤ੍ਤਸੁਤ੍ਤਂ

੨੧੯-੨੨੧. ‘‘ਰੂਪਾ, ਭਿਕ੍ਖਵੇ, ਅਨਤ੍ਤਾ ਅਤੀਤਾ ਅਨਾਗਤਾ ਪਚ੍ਚੁਪ੍ਪਨ੍ਨਾ. ਯਦਨਤ੍ਤਾ, ਤਂ ‘ਨੇਤਂ ਮਮ, ਨੇਸੋਹਮਸ੍ਮਿ, ਨ ਮੇਸੋ ਅਤ੍ਤਾ’ਤਿ ਏਵਮੇਤਂ ਯਥਾਭੂਤਂ ਸਮ੍ਮਪ੍ਪਞ੍ਞਾਯ ਦਟ੍ਠਬ੍ਬਂ. ਸਦ੍ਦਾ… ਗਨ੍ਧਾ… ਰਸਾ… ਫੋਟ੍ਠਬ੍ਬਾ… ਧਮ੍ਮਾ ਅਨਤ੍ਤਾ ਅਤੀਤਾ ਅਨਾਗਤਾ ਪਚ੍ਚੁਪ੍ਪਨ੍ਨਾ. ਯਦਨਤ੍ਤਾ, ਤਂ ‘ਨੇਤਂ ਮਮ, ਨੇਸੋਹਮਸ੍ਮਿ, ਨ ਮੇਸੋ ਅਤ੍ਤਾ’ਤਿ ਏਵਮੇਤਂ ਯਥਾਭੂਤਂ ਸਮ੍ਮਪ੍ਪਞ੍ਞਾਯ ਦਟ੍ਠਬ੍ਬਂ. ਏਵਂ ਪਸ੍ਸਂ…ਪੇ… ਨਾਪਰਂ ਇਤ੍ਥਤ੍ਤਾਯਾਤਿ ਪਜਾਨਾਤੀ’’ਤਿ.

੫੫. ਅਜ੍ਝਤ੍ਤਾਯਤਨਅਨਿਚ੍ਚਸੁਤ੍ਤਂ

੨੨੨. ‘‘ਚਕ੍ਖੁ, ਭਿਕ੍ਖਵੇ, ਅਨਿਚ੍ਚਂ…ਪੇ… ਜਿਵ੍ਹਾ ਅਨਿਚ੍ਚਾ…ਪੇ… ਮਨੋ ਅਨਿਚ੍ਚੋ. ਏਵਂ ਪਸ੍ਸਂ…ਪੇ… ਨਾਪਰਂ ਇਤ੍ਥਤ੍ਤਾਯਾਤਿ ਪਜਾਨਾਤੀ’’ਤਿ.

੫੬. ਅਜ੍ਝਤ੍ਤਾਯਤਨਦੁਕ੍ਖਸੁਤ੍ਤਂ

੨੨੩. ‘‘ਚਕ੍ਖੁ, ਭਿਕ੍ਖਵੇ, ਦੁਕ੍ਖਂ…ਪੇ… ਜਿਵ੍ਹਾ ਦੁਕ੍ਖਾ…ਪੇ… ਮਨੋ ਦੁਕ੍ਖੋ. ਏਵਂ ਪਸ੍ਸਂ…ਪੇ… ਨਾਪਰਂ ਇਤ੍ਥਤ੍ਤਾਯਾਤਿ ਪਜਾਨਾਤੀ’’ਤਿ.

੫੭. ਅਜ੍ਝਤ੍ਤਾਯਤਨਅਨਤ੍ਤਸੁਤ੍ਤਂ

੨੨੪. ‘‘ਚਕ੍ਖੁ, ਭਿਕ੍ਖਵੇ, ਅਨਤ੍ਤਾ…ਪੇ… ਜਿਵ੍ਹਾ ਅਨਤ੍ਤਾ…ਪੇ… ਮਨੋ ਅਨਤ੍ਤਾ. ਏਵਂ ਪਸ੍ਸਂ…ਪੇ… ਨਾਪਰਂ ਇਤ੍ਥਤ੍ਤਾਯਾਤਿ ਪਜਾਨਾਤੀ’’ਤਿ.

੫੮. ਬਾਹਿਰਾਯਤਨਅਨਿਚ੍ਚਸੁਤ੍ਤਂ

੨੨੫. ‘‘ਰੂਪਾ, ਭਿਕ੍ਖਵੇ, ਅਨਿਚ੍ਚਾ. ਸਦ੍ਦਾ… ਗਨ੍ਧਾ… ਰਸਾ… ਫੋਟ੍ਠਬ੍ਬਾ… ਧਮ੍ਮਾ ਅਨਿਚ੍ਚਾ. ਏਵਂ ਪਸ੍ਸਂ…ਪੇ… ਨਾਪਰਂ ਇਤ੍ਥਤ੍ਤਾਯਾਤਿ ਪਜਾਨਾਤੀ’’ਤਿ.

੫੯. ਬਾਹਿਰਾਯਤਨਦੁਕ੍ਖਸੁਤ੍ਤਂ

੨੨੬. ‘‘ਰੂਪਾ, ਭਿਕ੍ਖਵੇ, ਦੁਕ੍ਖਾ. ਸਦ੍ਦਾ… ਗਨ੍ਧਾ… ਰਸਾ… ਫੋਟ੍ਠਬ੍ਬਾ… ਧਮ੍ਮਾ ਦੁਕ੍ਖਾ. ਏਵਂ ਪਸ੍ਸਂ…ਪੇ… ਨਾਪਰਂ ਇਤ੍ਥਤ੍ਤਾਯਾਤਿ ਪਜਾਨਾਤੀ’’ਤਿ.

੬੦. ਬਾਹਿਰਾਯਤਨਅਨਤ੍ਤਸੁਤ੍ਤਂ

੨੨੭. ‘‘ਰੂਪਾ, ਭਿਕ੍ਖਵੇ, ਅਨਤ੍ਤਾ. ਸਦ੍ਦਾ… ਗਨ੍ਧਾ… ਰਸਾ… ਫੋਟ੍ਠਬ੍ਬਾ… ਧਮ੍ਮਾ ਅਨਤ੍ਤਾ. ਏਵਂ ਪਸ੍ਸਂ…ਪੇ… ਨਾਪਰਂ ਇਤ੍ਥਤ੍ਤਾਯਾਤਿ ਪਜਾਨਾਤੀ’’ਤਿ.

ਸਟ੍ਠਿਪੇਯ੍ਯਾਲਵਗ੍ਗੋ ਸਤ੍ਤਰਸਮੋ.

ਤਸ੍ਸੁਦ੍ਦਾਨਂ –

ਛਨ੍ਦੇਨਟ੍ਠਾਰਸ ਹੋਨ੍ਤਿ, ਅਤੀਤੇਨ ਚ ਦ੍ਵੇ ਨਵ;

ਯਦਨਿਚ੍ਚਾਟ੍ਠਾਰਸ ਵੁਤ੍ਤਾ, ਤਯੋ ਅਜ੍ਝਤ੍ਤਬਾਹਿਰਾ;

ਪੇਯ੍ਯਾਲੋ ਸਟ੍ਠਿਕੋ ਵੁਤ੍ਤੋ, ਬੁਦ੍ਧੇਨਾਦਿਚ੍ਚਬਨ੍ਧੁਨਾਤਿ.

ਸੁਤ੍ਤਨ੍ਤਾਨਿ ਸਟ੍ਠਿ.