੪. ਪਮਾਦਵਿਹਾਰੀਸੁਤ੍ਤਂ

੯੭. ‘‘ਪਮਾਦਵਿਹਾਰਿਞ੍ਚ ਵੋ, ਭਿਕ੍ਖਵੇ, ਦੇਸੇਸ੍ਸਾਮਿ ਅਪ੍ਪਮਾਦਵਿਹਾਰਿਞ੍ਚ. ਤਂ ਸੁਣਾਥ. ਕਥਞ੍ਚ, ਭਿਕ੍ਖਵੇ, ਪਮਾਦਵਿਹਾਰੀ ਹੋਤਿ? ਚਕ੍ਖੁਨ੍ਦ੍ਰਿਯਂ ਅਸਂਵੁਤਸ੍ਸ, ਭਿਕ੍ਖਵੇ, ਵਿਹਰਤੋ ਚਿਤ੍ਤਂ ਬ੍ਯਾਸਿਞ੍ਚਤਿ [ਬ੍ਯਾਸਿਚ੍ਚਤਿ (ਸੀ. ਸ੍ਯਾ. ਕਂ.)]. ਚਕ੍ਖੁਵਿਞ੍ਞੇਯ੍ਯੇਸੁ ਰੂਪੇਸੁ ਤਸ੍ਸ ਬ੍ਯਾਸਿਤ੍ਤਚਿਤ੍ਤਸ੍ਸ ਪਾਮੋਜ੍ਜਂ ਨ ਹੋਤਿ. ਪਾਮੋਜ੍ਜੇ ਅਸਤਿ ਪੀਤਿ ਨ ਹੋਤਿ. ਪੀਤਿਯਾ ਅਸਤਿ ਪਸ੍ਸਦ੍ਧਿ ਨ ਹੋਤਿ. ਪਸ੍ਸਦ੍ਧਿਯਾ ਅਸਤਿ ਦੁਕ੍ਖਂ ਹੋਤਿ. ਦੁਕ੍ਖਿਨੋ ਚਿਤ੍ਤਂ ਨ ਸਮਾਧਿਯਤਿ. ਅਸਮਾਹਿਤੇ ਚਿਤ੍ਤੇ ਧਮ੍ਮਾ ਨ ਪਾਤੁਭਵਨ੍ਤਿ. ਧਮ੍ਮਾਨਂ ਅਪਾਤੁਭਾਵਾ ਪਮਾਦਵਿਹਾਰੀ ਤ੍ਵੇਵ ਸਙ੍ਖਂ ਗਚ੍ਛਤਿ…ਪੇ… ਜਿਵ੍ਹਿਨ੍ਦ੍ਰਿਯਂ ਅਸਂਵੁਤਸ੍ਸ, ਭਿਕ੍ਖਵੇ, ਵਿਹਰਤੋ ਚਿਤ੍ਤਂ ਬ੍ਯਾਸਿਞ੍ਚਤਿ ਜਿਵ੍ਹਾਵਿਞ੍ਞੇਯ੍ਯੇਸੁ ਰਸੇਸੁ, ਤਸ੍ਸ ਬ੍ਯਾਸਿਤ੍ਤਚਿਤ੍ਤਸ੍ਸ…ਪੇ… ਪਮਾਦਵਿਹਾਰੀ ਤ੍ਵੇਵ ਸਙ੍ਖਂ ਗਚ੍ਛਤਿ…ਪੇ… ਮਨਿਨ੍ਦ੍ਰਿਯਂ ਅਸਂਵੁਤਸ੍ਸ, ਭਿਕ੍ਖਵੇ, ਵਿਹਰਤੋ ਚਿਤ੍ਤਂ ਬ੍ਯਾਸਿਞ੍ਚਤਿ ਮਨੋਵਿਞ੍ਞੇਯ੍ਯੇਸੁ ਧਮ੍ਮੇਸੁ, ਤਸ੍ਸ ਬ੍ਯਾਸਿਤ੍ਤਚਿਤ੍ਤਸ੍ਸ ਪਾਮੋਜ੍ਜਂ ਨ ਹੋਤਿ. ਪਾਮੋਜ੍ਜੇ ਅਸਤਿ ਪੀਤਿ ਨ ਹੋਤਿ. ਪੀਤਿਯਾ ਅਸਤਿ ਪਸ੍ਸਦ੍ਧਿ ਨ ਹੋਤਿ. ਪਸ੍ਸਦ੍ਧਿਯਾ ਅਸਤਿ ਦੁਕ੍ਖਂ ਹੋਤਿ. ਦੁਕ੍ਖਿਨੋ ਚਿਤ੍ਤਂ ਨ ਸਮਾਧਿਯਤਿ. ਅਸਮਾਹਿਤੇ ਚਿਤ੍ਤੇ ਧਮ੍ਮਾ ਨ ਪਾਤੁਭਵਨ੍ਤਿ. ਧਮ੍ਮਾਨਂ ਅਪਾਤੁਭਾਵਾ ਪਮਾਦਵਿਹਾਰੀ ਤ੍ਵੇਵ ਸਙ੍ਖਂ ਗਚ੍ਛਤਿ. ਏਵਂ ਖੋ, ਭਿਕ੍ਖਵੇ, ਪਮਾਦਵਿਹਾਰੀ ਹੋਤਿ.

‘‘ਕਥਞ੍ਚ, ਭਿਕ੍ਖਵੇ, ਅਪ੍ਪਮਾਦਵਿਹਾਰੀ ਹੋਤਿ? ਚਕ੍ਖੁਨ੍ਦ੍ਰਿਯਂ ਸਂਵੁਤਸ੍ਸ, ਭਿਕ੍ਖਵੇ, ਵਿਹਰਤੋ ਚਿਤ੍ਤਂ ਨ ਬ੍ਯਾਸਿਞ੍ਚਤਿ ਚਕ੍ਖੁਵਿਞ੍ਞੇਯ੍ਯੇਸੁ ਰੂਪੇਸੁ, ਤਸ੍ਸ ਅਬ੍ਯਾਸਿਤ੍ਤਚਿਤ੍ਤਸ੍ਸ ਪਾਮੋਜ੍ਜਂ ਜਾਯਤਿ. ਪਮੁਦਿਤਸ੍ਸ ਪੀਤਿ ਜਾਯਤਿ. ਪੀਤਿਮਨਸ੍ਸ ਕਾਯੋ ਪਸ੍ਸਮ੍ਭਤਿ. ਪਸ੍ਸਦ੍ਧਕਾਯੋ ਸੁਖਂ ਵਿਹਰਤਿ. ਸੁਖਿਨੋ ਚਿਤ੍ਤਂ ਸਮਾਧਿਯਤਿ. ਸਮਾਹਿਤੇ ਚਿਤ੍ਤੇ ਧਮ੍ਮਾ ਪਾਤੁਭਵਨ੍ਤਿ. ਧਮ੍ਮਾਨਂ ਪਾਤੁਭਾਵਾ ਅਪ੍ਪਮਾਦਵਿਹਾਰੀ ਤ੍ਵੇਵ ਸਙ੍ਖਂ ਗਚ੍ਛਤਿ…ਪੇ… ਜਿਵ੍ਹਿਨ੍ਦ੍ਰਿਯਂ ਸਂਵੁਤਸ੍ਸ, ਭਿਕ੍ਖਵੇ, ਵਿਹਰਤੋ ਚਿਤ੍ਤਂ ਨ ਬ੍ਯਾਸਿਞ੍ਚਤਿ…ਪੇ… ਅਪ੍ਪਮਾਦਵਿਹਾਰੀ ਤ੍ਵੇਵ ਸਙ੍ਖਂ ਗਚ੍ਛਤਿ. ਮਨਿਨ੍ਦ੍ਰਿਯਂ ਸਂਵੁਤਸ੍ਸ, ਭਿਕ੍ਖਵੇ, ਵਿਹਰਤੋ ਚਿਤ੍ਤਂ ਨ ਬ੍ਯਾਸਿਞ੍ਚਤਿ, ਮਨੋਵਿਞ੍ਞੇਯ੍ਯੇਸੁ ਧਮ੍ਮੇਸੁ, ਤਸ੍ਸ ਅਬ੍ਯਾਸਿਤ੍ਤਚਿਤ੍ਤਸ੍ਸ ਪਾਮੋਜ੍ਜਂ ਜਾਯਤਿ. ਪਮੁਦਿਤਸ੍ਸ ਪੀਤਿ ਜਾਯਤਿ. ਪੀਤਿਮਨਸ੍ਸ ਕਾਯੋ ਪਸ੍ਸਮ੍ਭਤਿ. ਪਸ੍ਸਦ੍ਧਕਾਯੋ ਸੁਖਂ ਵਿਹਰਤਿ. ਸੁਖਿਨੋ ਚਿਤ੍ਤਂ ਸਮਾਧਿਯਤਿ. ਸਮਾਹਿਤੇ ਚਿਤ੍ਤੇ ਧਮ੍ਮਾ ਪਾਤੁਭਵਨ੍ਤਿ. ਧਮ੍ਮਾਨਂ ਪਾਤੁਭਾਵਾ ਅਪ੍ਪਮਾਦਵਿਹਾਰੀ ਤ੍ਵੇਵ ਸਙ੍ਖਂ ਗਚ੍ਛਤਿ. ਏਵਂ ਖੋ, ਭਿਕ੍ਖਵੇ, ਅਪ੍ਪਮਾਦਵਿਹਾਰੀ ਹੋਤੀ’’ਤਿ. ਚਤੁਤ੍ਥਂ.