੧੦. ਉਦਕਸੁਤ੍ਤਂ

੧੦੩. ‘‘ਉਦਕੋ [ਉਦ੍ਦਕੋ (ਸੀ. ਪੀ.)] ਸੁਦਂ, ਭਿਕ੍ਖਵੇ, ਰਾਮਪੁਤ੍ਤੋ ਏਵਂ ਵਾਚਂ ਭਾਸਤਿ – ‘ਇਦਂ ਜਾਤੁ ਵੇਦਗੂ, ਇਦਂ ਜਾਤੁ ਸਬ੍ਬਜੀ [ਸਬ੍ਬਜਿ (ਪੀ.)], ਇਦਂ ਜਾਤੁ ਅਪਲਿਖਤਂ ਗਣ੍ਡਮੂਲਂ ਪਲਿਖਣਿ’ਨ੍ਤਿ. ਤਂ ਖੋ ਪਨੇਤਂ, ਭਿਕ੍ਖਵੇ, ਉਦਕੋ ਰਾਮਪੁਤ੍ਤੋ ਅਵੇਦਗੂਯੇਵ ਸਮਾਨੋ ‘ਵੇਦਗੂਸ੍ਮੀ’ਤਿ ਭਾਸਤਿ, ਅਸਬ੍ਬਜੀਯੇਵ ਸਮਾਨੋ ‘ਸਬ੍ਬਜੀਸ੍ਮੀ’ਤਿ ਭਾਸਤਿ, ਅਪਲਿਖਤਂਯੇਵ ਗਣ੍ਡਮੂਲਂ ਪਲਿਖਤਂ ਮੇ ‘ਗਣ੍ਡਮੂਲ’ਨ੍ਤਿ ਭਾਸਤਿ. ਇਧ ਖੋ ਤਂ, ਭਿਕ੍ਖਵੇ, ਭਿਕ੍ਖੁ ਸਮ੍ਮਾ ਵਦਮਾਨੋ ਵਦੇਯ੍ਯ – ‘ਇਦਂ ਜਾਤੁ ਵੇਦਗੂ, ਇਦਂ ਜਾਤੁ ਸਬ੍ਬਜੀ, ਇਦਂ ਜਾਤੁ ਅਪਲਿਖਤਂ ਗਣ੍ਡਮੂਲਂ ਪਲਿਖਣਿ’’’ਨ੍ਤਿ.

‘‘ਕਥਞ੍ਚ, ਭਿਕ੍ਖਵੇ, ਵੇਦਗੂ ਹੋਤਿ? ਯਤੋ ਖੋ, ਭਿਕ੍ਖਵੇ, ਭਿਕ੍ਖੁ ਛਨ੍ਨਂ ਫਸ੍ਸਾਯਤਨਾਨਂ ਸਮੁਦਯਞ੍ਚ ਅਤ੍ਥਙ੍ਗਮਞ੍ਚ ਅਸ੍ਸਾਦਞ੍ਚ ਆਦੀਨਵਞ੍ਚ ਨਿਸ੍ਸਰਣਞ੍ਚ ਯਥਾਭੂਤਂ ਪਜਾਨਾਤਿ; ਏਵਂ ਖੋ, ਭਿਕ੍ਖਵੇ, ਭਿਕ੍ਖੁ ਵੇਦਗੂ ਹੋਤਿ.

‘‘ਕਥਞ੍ਚ, ਭਿਕ੍ਖਵੇ, ਭਿਕ੍ਖੁ ਸਬ੍ਬਜੀ ਹੋਤਿ? ਯਤੋ ਖੋ, ਭਿਕ੍ਖਵੇ, ਭਿਕ੍ਖੁ ਛਨ੍ਨਂ ਫਸ੍ਸਾਯਤਨਾਨਂ ਸਮੁਦਯਞ੍ਚ ਅਤ੍ਥਙ੍ਗਮਞ੍ਚ ਅਸ੍ਸਾਦਞ੍ਚ ਆਦੀਨਵਞ੍ਚ ਨਿਸ੍ਸਰਣਞ੍ਚ ਯਥਾਭੂਤਂ ਵਿਦਿਤ੍ਵਾ ਅਨੁਪਾਦਾਵਿਮੁਤ੍ਤੋ ਹੋਤਿ; ਏਵਂ ਖੋ, ਭਿਕ੍ਖਵੇ, ਭਿਕ੍ਖੁ ਸਬ੍ਬਜੀ ਹੋਤਿ.

‘‘ਕਥਞ੍ਚ, ਭਿਕ੍ਖਵੇ, ਭਿਕ੍ਖੁਨੋ ਅਪਲਿਖਤਂ ਗਣ੍ਡਮੂਲਂ ਪਲਿਖਤਂ ਹੋਤਿ? ਗਣ੍ਡੋਤਿ ਖੋ, ਭਿਕ੍ਖਵੇ, ਇਮਸ੍ਸੇਤਂ ਚਾਤੁਮਹਾਭੂਤਿਕਸ੍ਸ ਕਾਯਸ੍ਸ ਅਧਿਵਚਨਂ ਮਾਤਾਪੇਤ੍ਤਿਕਸਮ੍ਭਵਸ੍ਸ ਓਦਨਕੁਮ੍ਮਾਸੂਪਚਯਸ੍ਸ ਅਨਿਚ੍ਚੁਚ੍ਛਾਦਨਪਰਿਮਦ੍ਦਨਭੇਦਨਵਿਦ੍ਧਂਸਨਧਮ੍ਮਸ੍ਸ. ਗਣ੍ਡਮੂਲਨ੍ਤਿ ਖੋ, ਭਿਕ੍ਖਵੇ, ਤਣ੍ਹਾਯੇਤਂ ਅਧਿਵਚਨਂ. ਯਤੋ ਖੋ, ਭਿਕ੍ਖਵੇ, ਭਿਕ੍ਖੁਨੋ ਤਣ੍ਹਾ ਪਹੀਨਾ ਹੋਤਿ ਉਚ੍ਛਿਨ੍ਨਮੂਲਾ ਤਾਲਾਵਤ੍ਥੁਕਤਾ ਅਨਭਾਵਙ੍ਕਤਾ ਆਯਤਿਂ ਅਨੁਪ੍ਪਾਦਧਮ੍ਮਾ; ਏਵਂ ਖੋ, ਭਿਕ੍ਖਵੇ, ਭਿਕ੍ਖੁਨੋ ਅਪਲਿਖਤਂ ਗਣ੍ਡਮੂਲਂ ਪਲਿਖਤਂ ਹੋਤਿ.

‘‘ਉਦਕੋ ਸੁਦਂ, ਭਿਕ੍ਖਵੇ, ਰਾਮਪੁਤ੍ਤੋ ਏਵਂ ਵਾਚਂ ਭਾਸਤਿ – ‘ਇਦਂ ਜਾਤੁ ਵੇਦਗੂ, ਇਦਂ ਜਾਤੁ ਸਬ੍ਬਜੀ, ਇਦਂ ਜਾਤੁ ਅਪਲਿਖਤਂ ਗਣ੍ਡਮੂਲਂ ਪਲਿਖਣਿ’ਨ੍ਤਿ. ਤਂ ਖੋ ਪਨੇਤਂ, ਭਿਕ੍ਖਵੇ, ਉਦਕੋ ਰਾਮਪੁਤ੍ਤੋ ਅਵੇਦਗੂਯੇਵ ਸਮਾਨੋ ‘ਵੇਦਗੂਸ੍ਮੀ’ਤਿ ਭਾਸਤਿ, ਅਸਬ੍ਬਜੀਯੇਵ ਸਮਾਨੋ ‘ਸਬ੍ਬਜੀਸ੍ਮੀ’ਤਿ ਭਾਸਤਿ; ਅਪਲਿਖਤਂਯੇਵ ਗਣ੍ਡਮੂਲਂ ‘ਪਲਿਖਤਂ ਮੇ ਗਣ੍ਡਮੂਲ’ਨ੍ਤਿ ਭਾਸਤਿ. ਇਧ ਖੋ ਤਂ, ਭਿਕ੍ਖਵੇ, ਭਿਕ੍ਖੁ ਸਮ੍ਮਾ ਵਦਮਾਨੋ ਵਦੇਯ੍ਯ – ‘ਇਦਂ ਜਾਤੁ ਵੇਦਗੂ, ਇਦਂ ਜਾਤੁ ਸਬ੍ਬਜੀ, ਇਦਂ ਜਾਤੁ ਅਪਲਿਖਤਂ ਗਣ੍ਡਮੂਲਂ ਪਲਿਖਣਿ’’’ਨ੍ਤਿ. ਦਸਮਂ.

ਸਲ਼ਵਗ੍ਗੋ ਦਸਮੋ.

ਤਸ੍ਸੁਦ੍ਦਾਨਂ –

ਦ੍ਵੇ ਸਂਗਯ੍ਹਾ ਪਰਿਹਾਨਂ, ਪਮਾਦਵਿਹਾਰੀ ਚ ਸਂਵਰੋ;

ਸਮਾਧਿ ਪਟਿਸਲ੍ਲਾਨਂ, ਦ੍ਵੇ ਨਤੁਮ੍ਹਾਕੇਨ ਉਦ੍ਦਕੋਤਿ.

ਸਲ਼ਾਯਤਨਵਗ੍ਗੇ ਦੁਤਿਯਪਣ੍ਣਾਸਕੋ ਸਮਤ੍ਤੋ.

ਤਸ੍ਸ ਵਗ੍ਗੁਦ੍ਦਾਨਂ –

ਅਵਿਜ੍ਜਾ ਮਿਗਜਾਲਞ੍ਚ, ਗਿਲਾਨਂ ਛਨ੍ਨਂ ਚਤੁਤ੍ਥਕਂ;

ਸਲ਼ਵਗ੍ਗੇਨ ਪਞ੍ਞਾਸਂ, ਦੁਤਿਯੋ ਪਣ੍ਣਾਸਕੋ ਅਯਨ੍ਤਿ.

ਪਠਮਸਤਕਂ.