੯. ਸੁਪਣ੍ਣਸਂਯੁਤ੍ਤਂ

੧. ਸੁਦ੍ਧਿਕਸੁਤ੍ਤਂ

੩੯੨. ਸਾਵਤ੍ਥਿਨਿਦਾਨਂ. ‘‘ਚਤਸ੍ਸੋ ਇਮਾ, ਭਿਕ੍ਖਵੇ, ਸੁਪਣ੍ਣਯੋਨਿਯੋ. ਕਤਮਾ ਚਤਸ੍ਸੋ? ਅਣ੍ਡਜਾ ਸੁਪਣ੍ਣਾ, ਜਲਾਬੁਜਾ ਸੁਪਣ੍ਣਾ, ਸਂਸੇਦਜਾ ਸੁਪਣ੍ਣਾ, ਓਪਪਾਤਿਕਾ ਸੁਪਣ੍ਣਾ – ਇਮਾ ਖੋ, ਭਿਕ੍ਖਵੇ, ਚਤਸ੍ਸੋ ਸੁਪਣ੍ਣਯੋਨਿਯੋ’’ਤਿ. ਪਠਮਂ.

੨. ਹਰਨ੍ਤਿਸੁਤ੍ਤਂ

੩੯੩. ਸਾਵਤ੍ਥਿਨਿਦਾਨਂ. ‘‘ਚਤਸ੍ਸੋ ਇਮਾ, ਭਿਕ੍ਖਵੇ, ਸੁਪਣ੍ਣਯੋਨਿਯੋ. ਕਤਮਾ ਚਤਸ੍ਸੋ? ਅਣ੍ਡਜਾ…ਪੇ… ਇਮਾ ਖੋ, ਭਿਕ੍ਖਵੇ, ਚਤਸ੍ਸੋ ਸੁਪਣ੍ਣਯੋਨਿਯੋ. ਤਤ੍ਰ, ਭਿਕ੍ਖਵੇ, ਅਣ੍ਡਜਾ ਸੁਪਣ੍ਣਾ ਅਣ੍ਡਜੇਵ ਨਾਗੇ ਹਰਨ੍ਤਿ, ਨ ਜਲਾਬੁਜੇ, ਨ ਸਂਸੇਦਜੇ, ਨ ਓਪਪਾਤਿਕੇ. ਤਤ੍ਰ, ਭਿਕ੍ਖਵੇ, ਜਲਾਬੁਜਾ ਸੁਪਣ੍ਣਾ ਅਣ੍ਡਜੇ ਚ ਜਲਾਬੁਜੇ ਚ ਨਾਗੇ ਹਰਨ੍ਤਿ, ਨ ਸਂਸੇਦਜੇ, ਨ ਓਪਪਾਤਿਕੇ. ਤਤ੍ਰ, ਭਿਕ੍ਖਵੇ, ਸਂਸੇਦਜਾ ਸੁਪਣ੍ਣਾ ਅਣ੍ਡਜੇ ਚ ਜਲਾਬੁਜੇ ਚ ਸਂਸੇਦਜੇ ਚ ਨਾਗੇ ਹਰਨ੍ਤਿ, ਨ ਓਪਪਾਤਿਕੇ. ਤਤ੍ਰ, ਭਿਕ੍ਖਵੇ, ਓਪਪਾਤਿਕਾ ਸੁਪਣ੍ਣਾ ਅਣ੍ਡਜੇ ਚ ਜਲਾਬੁਜੇ ਚ ਸਂਸੇਦਜੇ ਚ ਓਪਪਾਤਿਕੇ ਚ ਨਾਗੇ ਹਰਨ੍ਤਿ. ਇਮਾ ਖੋ, ਭਿਕ੍ਖਵੇ, ਚਤਸ੍ਸੋ ਸੁਪਣ੍ਣਯੋਨਿਯੋ’’ਤਿ. ਦੁਤਿਯਂ.

੩. ਦ੍ਵਯਕਾਰੀਸੁਤ੍ਤਂ

੩੯੪. ਸਾਵਤ੍ਥਿਨਿਦਾਨਂ. ਅਞ੍ਞਤਰੋ ਭਿਕ੍ਖੁ ਯੇਨ ਭਗਵਾ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨੋ ਖੋ ਸੋ ਭਿਕ੍ਖੁ ਭਗਵਨ੍ਤਂ ਏਤਦਵੋਚ – ‘‘ਕੋ ਨੁ ਖੋ, ਭਨ੍ਤੇ, ਹੇਤੁ, ਕੋ ਪਚ੍ਚਯੋ, ਯੇਨ ਮਿਧੇਕਚ੍ਚੋ ਕਾਯਸ੍ਸ ਭੇਦਾ ਪਰਂ ਮਰਣਾ ਅਣ੍ਡਜਾਨਂ ਸੁਪਣ੍ਣਾਨਂ ਸਹਬ੍ਯਤਂ ਉਪਪਜ੍ਜਤੀ’’ਤਿ? ‘‘ਇਧ, ਭਿਕ੍ਖੁ, ਏਕਚ੍ਚੋ ਕਾਯੇਨ ਦ੍ਵਯਕਾਰੀ ਹੋਤਿ, ਵਾਚਾਯ ਦ੍ਵਯਕਾਰੀ, ਮਨਸਾ ਦ੍ਵਯਕਾਰੀ. ਤਸ੍ਸ ਸੁਤਂ ਹੋਤਿ – ‘ਅਣ੍ਡਜਾ ਸੁਪਣ੍ਣਾ ਦੀਘਾਯੁਕਾ ਵਣ੍ਣਵਨ੍ਤੋ ਸੁਖਬਹੁਲਾ’ਤਿ. ਤਸ੍ਸ ਏਵਂ ਹੋਤਿ – ‘ਅਹੋ ਵਤਾਹਂ ਕਾਯਸ੍ਸ ਭੇਦਾ ਪਰਂ ਮਰਣਾ ਅਣ੍ਡਜਾਨਂ ਸੁਪਣ੍ਣਾਨਂ ਸਹਬ੍ਯਤਂ ਉਪਪਜ੍ਜੇਯ੍ਯ’ਨ੍ਤਿ. ਸੋ ਕਾਯਸ੍ਸ ਭੇਦਾ ਪਰਂ ਮਰਣਾ ਅਣ੍ਡਜਾਨਂ ਸੁਪਣ੍ਣਾਨਂ ਸਹਬ੍ਯਤਂ ਉਪਪਜ੍ਜਤਿ. ਅਯਂ ਖੋ, ਭਿਕ੍ਖੁ, ਹੇਤੁ, ਅਯਂ ਪਚ੍ਚਯੋ, ਯੇਨ ਮਿਧੇਕਚ੍ਚੋ ਕਾਯਸ੍ਸ ਭੇਦਾ ਪਰਂ ਮਰਣਾ ਅਣ੍ਡਜਾਨਂ ਸੁਪਣ੍ਣਾਨਂ ਸਹਬ੍ਯਤਂ ਉਪਪਜ੍ਜਤੀ’’ਤਿ. ਤਤਿਯਂ.

੪-੬. ਦੁਤਿਯਾਦਿਦ੍ਵਯਕਾਰੀਸੁਤ੍ਤਤ੍ਤਿਕਂ

੩੯੫-੩੯੭. ਸਾਵਤ੍ਥਿਨਿਦਾਨਂ. ਏਕਮਨ੍ਤਂ ਨਿਸਿਨ੍ਨੋ ਖੋ ਸੋ ਭਿਕ੍ਖੁ ਭਗਵਨ੍ਤਂ ਏਤਦਵੋਚ – ‘‘ਕੋ ਨੁ ਖੋ, ਭਨ੍ਤੇ, ਹੇਤੁ, ਕੋ ਪਚ੍ਚਯੋ, ਯੇਨ ਮਿਧੇਕਚ੍ਚੋ ਕਾਯਸ੍ਸ ਭੇਦਾ ਪਰਂ ਮਰਣਾ ਜਲਾਬੁਜਾਨਂ ਸੁਪਣ੍ਣਾਨਂ…ਪੇ… ਸਂਸੇਦਜਾਨਂ ਸੁਪਣ੍ਣਾਨਂ…ਪੇ… ਓਪਪਾਤਿਕਾਨਂ ਸੁਪਣ੍ਣਾਨਂ ਸਹਬ੍ਯਤਂ ਉਪਪਜ੍ਜਤੀ’’ਤਿ? ‘‘ਇਧ, ਭਿਕ੍ਖੁ, ਏਕਚ੍ਚੋ ਕਾਯੇਨ ਦ੍ਵਯਕਾਰੀ ਹੋਤਿ, ਵਾਚਾਯ ਦ੍ਵਯਕਾਰੀ, ਮਨਸਾ ਦ੍ਵਯਕਾਰੀ. ਤਸ੍ਸ ਸੁਤਂ ਹੋਤਿ – ‘ਓਪਪਾਤਿਕਾ ਸੁਪਣ੍ਣਾ ਦੀਘਾਯੁਕਾ ਵਣ੍ਣਵਨ੍ਤੋ ਸੁਖਬਹੁਲਾ’ਤਿ. ਤਸ੍ਸ ਏਵਂ ਹੋਤਿ – ‘ਅਹੋ ਵਤਾਹਂ ਕਾਯਸ੍ਸ ਭੇਦਾ ਪਰਂ ਮਰਣਾ ਓਪਪਾਤਿਕਾਨਂ ਸੁਪਣ੍ਣਾਨਂ ਸਹਬ੍ਯਤਂ ਉਪਪਜ੍ਜੇਯ੍ਯ’ਨ੍ਤਿ. ਸੋ ਕਾਯਸ੍ਸ ਭੇਦਾ ਪਰਂ ਮਰਣਾ ਓਪਪਾਤਿਕਾਨਂ ਸੁਪਣ੍ਣਾਨਂ ਸਹਬ੍ਯਤਂ ਉਪਪਜ੍ਜਤਿ. ਅਯਂ ਖੋ, ਭਿਕ੍ਖੁ, ਹੇਤੁ, ਅਯਂ ਪਚ੍ਚਯੋ, ਯੇਨ ਮਿਧੇਕਚ੍ਚੋ ਕਾਯਸ੍ਸ ਭੇਦਾ ਪਰਂ ਮਰਣਾ ਓਪਪਾਤਿਕਾਨਂ ਸੁਪਣ੍ਣਾਨਂ ਸਹਬ੍ਯਤਂ ਉਪਪਜ੍ਜਤੀ’’ਤਿ. ਛਟ੍ਠਂ.

੭-੧੬. ਅਣ੍ਡਜਦਾਨੂਪਕਾਰਸੁਤ੍ਤਦਸਕਂ

੩੯੮-੪੦੭. ਸਾਵਤ੍ਥਿਨਿਦਾਨਂ. ਏਕਮਨ੍ਤਂ ਨਿਸਿਨ੍ਨੋ ਖੋ ਸੋ ਭਿਕ੍ਖੁ ਭਗਵਨ੍ਤਂ ਏਤਦਵੋਚ – ‘‘ਕੋ ਨੁ ਖੋ, ਭਨ੍ਤੇ, ਹੇਤੁ, ਕੋ ਪਚ੍ਚਯੋ, ਯੇਨ ਮਿਧੇਕਚ੍ਚੋ ਕਾਯਸ੍ਸ ਭੇਦਾ ਪਰਂ ਮਰਣਾ ਅਣ੍ਡਜਾਨਂ ਸੁਪਣ੍ਣਾਨਂ ਸਹਬ੍ਯਤਂ ਉਪਪਜ੍ਜਤੀ’’ਤਿ? ‘‘ਇਧ, ਭਿਕ੍ਖੁ, ਏਕਚ੍ਚੋ ਕਾਯੇਨ ਦ੍ਵਯਕਾਰੀ ਹੋਤਿ, ਵਾਚਾਯ ਦ੍ਵਯਕਾਰੀ, ਮਨਸਾ ਦ੍ਵਯਕਾਰੀ. ਤਸ੍ਸ ਸੁਤਂ ਹੋਤਿ – ‘ਅਣ੍ਡਜਾ ਸੁਪਣ੍ਣਾ ਦੀਘਾਯੁਕਾ ਵਣ੍ਣਵਨ੍ਤੋ ਸੁਖਬਹੁਲਾ’ਤਿ. ਤਸ੍ਸ ਏਵਂ ਹੋਤਿ – ‘ਅਹੋ ਵਤਾਹਂ ਕਾਯਸ੍ਸ ਭੇਦਾ ਪਰਂ ਮਰਣਾ ਅਣ੍ਡਜਾਨਂ ਸੁਪਣ੍ਣਾਨਂ ਸਹਬ੍ਯਤਂ ਉਪਪਜ੍ਜੇਯ੍ਯ’ਨ੍ਤਿ. ਸੋ ਅਨ੍ਨਂ ਦੇਤਿ…ਪੇ… ਪਾਨਂ ਦੇਤਿ… ਵਤ੍ਥਂ ਦੇਤਿ… ਯਾਨਂ ਦੇਤਿ… ਮਾਲਂ ਦੇਤਿ… ਗਨ੍ਧਂ ਦੇਤਿ… ਵਿਲੇਪਨਂ ਦੇਤਿ… ਸੇਯ੍ਯਂ ਦੇਤਿ… ਆਵਸਥਂ ਦੇਤਿ… ਪਦੀਪੇਯ੍ਯਂ ਦੇਤਿ. ਸੋ ਕਾਯਸ੍ਸ ਭੇਦਾ ਪਰਂ ਮਰਣਾ ਅਣ੍ਡਜਾਨਂ ਸੁਪਣ੍ਣਾਨਂ ਸਹਬ੍ਯਤਂ ਉਪਪਜ੍ਜਤਿ. ਅਯਂ ਖੋ, ਭਿਕ੍ਖੁ, ਹੇਤੁ, ਅਯਂ ਪਚ੍ਚਯੋ, ਯੇਨ ਮਿਧੇਕਚ੍ਚੋ ਕਾਯਸ੍ਸ ਭੇਦਾ ਪਰਂ ਮਰਣਾ ਅਣ੍ਡਜਾਨਂ ਸੁਪਣ੍ਣਾਨਂ ਸਹਬ੍ਯਤਂ ਉਪਪਜ੍ਜਤੀ’’ਤਿ. ਸੋਲ਼ਸਮਂ.

੧੭-੪੬. ਜਲਾਬੁਜਾਦਿਦਾਨੂਪਕਾਰਸੁਤ੍ਤਤਿਂਸਕਂ

੪੦੮-੪੩੭. ਸਾਵਤ੍ਥਿਨਿਦਾਨਂ. ਏਕਮਨ੍ਤਂ ਨਿਸਿਨ੍ਨੋ ਖੋ ਸੋ ਭਿਕ੍ਖੁ ਭਗਵਨ੍ਤਂ ਏਤਦਵੋਚ – ‘‘ਕੋ ਨੁ ਖੋ, ਭਨ੍ਤੇ, ਹੇਤੁ, ਕੋ ਪਚ੍ਚਯੋ, ਯੇਨ ਮਿਧੇਕਚ੍ਚੋ ਕਾਯਸ੍ਸ ਭੇਦਾ ਪਰਂ ਮਰਣਾ ਜਲਾਬੁਜਾਨਂ ਸੁਪਣ੍ਣਾਨਂ…ਪੇ… ਸਂਸੇਦਜਾਨਂ ਸੁਪਣ੍ਣਾਨਂ…ਪੇ… ਓਪਪਾਤਿਕਾਨਂ ਸੁਪਣ੍ਣਾਨਂ ਸਹਬ੍ਯਤਂ ਉਪਪਜ੍ਜਤੀ’’ਤਿ? ‘‘ਇਧ, ਭਿਕ੍ਖੁ, ਏਕਚ੍ਚੋ ਕਾਯੇਨ ਦ੍ਵਯਕਾਰੀ ਹੋਤਿ, ਵਾਚਾਯ ਦ੍ਵਯਕਾਰੀ, ਮਨਸਾ ਦ੍ਵਯਕਾਰੀ. ਤਸ੍ਸ ਸੁਤਂ ਹੋਤਿ – ‘ਓਪਪਾਤਿਕਾ ਸੁਪਣ੍ਣਾ ਦੀਘਾਯੁਕਾ ਵਣ੍ਣਵਨ੍ਤੋ ਸੁਖਬਹੁਲਾ’ਤਿ. ਤਸ੍ਸ ਏਵਂ ਹੋਤਿ – ‘ਅਹੋ ਵਤਾਹਂ ਕਾਯਸ੍ਸ ਭੇਦਾ ਪਰਂ ਮਰਣਾ ਓਪਪਾਤਿਕਾਨਂ ਸੁਪਣ੍ਣਾਨਂ ਸਹਬ੍ਯਤਂ ਉਪਪਜ੍ਜੇਯ੍ਯ’ਨ੍ਤਿ. ਸੋ ਅਨ੍ਨਂ ਦੇਤਿ…ਪੇ… ਪਾਨਂ ਦੇਤਿ…ਪੇ… ਪਦੀਪੇਯ੍ਯਂ ਦੇਤਿ. ਸੋ ਕਾਯਸ੍ਸ ਭੇਦਾ ਪਰਂ ਮਰਣਾ ਓਪਪਾਤਿਕਾਨਂ ਸੁਪਣ੍ਣਾਨਂ ਸਹਬ੍ਯਤਂ ਉਪਪਜ੍ਜਤਿ. ਅਯਂ ਖੋ, ਭਿਕ੍ਖੁ, ਹੇਤੁ, ਅਯਂ ਪਚ੍ਚਯੋ, ਯੇਨ ਮਿਧੇਕਚ੍ਚੋ ਕਾਯਸ੍ਸ ਭੇਦਾ ਪਰਂ ਮਰਣਾ ਓਪਪਾਤਿਕਾਨਂ ਸੁਪਣ੍ਣਾਨਂ ਸਹਬ੍ਯਤਂ ਉਪਪਜ੍ਜਤੀ’’ਤਿ. ਛਚਤ੍ਤਾਲੀਸਮਂ.

(ਏਵਂ ਪਿਣ੍ਡਕੇਨ ਛਚਤ੍ਤਾਲੀਸਂ ਸੁਤ੍ਤਨ੍ਤਾ ਹੋਨ੍ਤਿ.)

ਸੁਪਣ੍ਣਸਂਯੁਤ੍ਤਂ ਸਮਤ੍ਤਂ.