੮. ਨਾਗਸਂਯੁਤ੍ਤਂ

੧. ਸੁਦ੍ਧਿਕਸੁਤ੍ਤਂ

੩੪੨. ਸਾਵਤ੍ਥਿਨਿਦਾਨਂ. ‘‘ਚਤਸ੍ਸੋ ਇਮਾ, ਭਿਕ੍ਖਵੇ, ਨਾਗਯੋਨਿਯੋ. ਕਤਮਾ ਚਤਸ੍ਸੋ? ਅਣ੍ਡਜਾ ਨਾਗਾ, ਜਲਾਬੁਜਾ ਨਾਗਾ, ਸਂਸੇਦਜਾ ਨਾਗਾ, ਓਪਪਾਤਿਕਾ ਨਾਗਾ – ਇਮਾ ਖੋ, ਭਿਕ੍ਖਵੇ, ਚਤਸ੍ਸੋ ਨਾਗਯੋਨਿਯੋ’’ਤਿ. ਪਠਮਂ.

੨. ਪਣੀਤਤਰਸੁਤ੍ਤਂ

੩੪੩. ਸਾਵਤ੍ਥਿਨਿਦਾਨਂ. ‘‘ਚਤਸ੍ਸੋ ਇਮਾ, ਭਿਕ੍ਖਵੇ, ਨਾਗਯੋਨਿਯੋ. ਕਤਮਾ ਚਤਸ੍ਸੋ? ਅਣ੍ਡਜਾ ਨਾਗਾ, ਜਲਾਬੁਜਾ ਨਾਗਾ, ਸਂਸੇਦਜਾ ਨਾਗਾ, ਓਪਪਾਤਿਕਾ ਨਾਗਾ. ਤਤ੍ਰ, ਭਿਕ੍ਖਵੇ, ਅਣ੍ਡਜੇਹਿ ਨਾਗੇਹਿ ਜਲਾਬੁਜਾ ਚ ਸਂਸੇਦਜਾ ਚ ਓਪਪਾਤਿਕਾ ਚ ਨਾਗਾ ਪਣੀਤਤਰਾ. ਤਤ੍ਰ, ਭਿਕ੍ਖਵੇ, ਅਣ੍ਡਜੇਹਿ ਚ ਜਲਾਬੁਜੇਹਿ ਚ ਨਾਗੇਹਿ ਸਂਸੇਦਜਾ ਚ ਓਪਪਾਤਿਕਾ ਚ ਨਾਗਾ ਪਣੀਤਤਰਾ. ਤਤ੍ਰ, ਭਿਕ੍ਖਵੇ, ਅਣ੍ਡਜੇਹਿ ਚ ਜਲਾਬੁਜੇਹਿ ਚ ਸਂਸੇਦਜੇਹਿ ਚ ਨਾਗੇਹਿ ਓਪਪਾਤਿਕਾ ਨਾਗਾ ਪਣੀਤਤਰਾ. ਇਮਾ ਖੋ, ਭਿਕ੍ਖਵੇ, ਚਤਸ੍ਸੋ ਨਾਗਯੋਨਿਯੋ’’ਤਿ. ਦੁਤਿਯਂ.

੩. ਉਪੋਸਥਸੁਤ੍ਤਂ

੩੪੪. ਏਕਂ ਸਮਯਂ ਭਗਵਾ ਸਾਵਤ੍ਥਿਯਂ ਵਿਹਰਤਿ ਜੇਤਵਨੇ ਅਨਾਥਪਿਣ੍ਡਿਕਸ੍ਸ ਆਰਾਮੇ. ਅਥ ਖੋ ਅਞ੍ਞਤਰੋ ਭਿਕ੍ਖੁ ਯੇਨ ਭਗਵਾ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨੋ ਖੋ ਸੋ ਭਿਕ੍ਖੁ ਭਗਵਨ੍ਤਂ ਏਤਦਵੋਚ – ‘‘ਕੋ ਨੁ ਖੋ, ਭਨ੍ਤੇ, ਹੇਤੁ, ਕੋ ਪਚ੍ਚਯੋ, ਯੇਨ ਮਿਧੇਕਚ੍ਚੇ ਅਣ੍ਡਜਾ ਨਾਗਾ ਉਪੋਸਥਂ ਉਪਵਸਨ੍ਤਿ ਵੋਸ੍ਸਟ੍ਠਕਾਯਾ ਚ ਭਵਨ੍ਤੀ’’ਤਿ?

‘‘ਇਧ, ਭਿਕ੍ਖੁ, ਏਕਚ੍ਚਾਨਂ ਅਣ੍ਡਜਾਨਂ ਨਾਗਾਨਂ ਏਵਂ ਹੋਤਿ – ‘ਮਯਂ ਖੋ ਪੁਬ੍ਬੇ ਕਾਯੇਨ ਦ੍ਵਯਕਾਰਿਨੋ ਅਹੁਮ੍ਹ, ਵਾਚਾਯ ਦ੍ਵਯਕਾਰਿਨੋ, ਮਨਸਾ ਦ੍ਵਯਕਾਰਿਨੋ. ਤੇ ਮਯਂ ਕਾਯੇਨ ਦ੍ਵਯਕਾਰਿਨੋ, ਵਾਚਾਯ ਦ੍ਵਯਕਾਰਿਨੋ, ਮਨਸਾ ਦ੍ਵਯਕਾਰਿਨੋ, ਕਾਯਸ੍ਸ ਭੇਦਾ ਪਰਂ ਮਰਣਾ ਅਣ੍ਡਜਾਨਂ ਨਾਗਾਨਂ ਸਹਬ੍ਯਤਂ ਉਪਪਨ੍ਨਾ. ਸਚਜ੍ਜ ਮਯਂ ਕਾਯੇਨ ਸੁਚਰਿਤਂ ਚਰੇਯ੍ਯਾਮ, ਵਾਚਾਯ ਸੁਚਰਿਤਂ ਚਰੇਯ੍ਯਾਮ, ਮਨਸਾ ਸੁਚਰਿਤਂ ਚਰੇਯ੍ਯਾਮ, ਏਵਂ ਮਯਂ ਕਾਯਸ੍ਸ ਭੇਦਾ ਪਰਂ ਮਰਣਾ ਸੁਗਤਿਂ ਸਗ੍ਗਂ ਲੋਕਂ ਉਪਪਜ੍ਜੇਯ੍ਯਾਮ. ਹਨ੍ਦ, ਮਯਂ ਏਤਰਹਿ ਕਾਯੇਨ ਸੁਚਰਿਤਂ ਚਰਾਮ, ਵਾਚਾਯ ਸੁਚਰਿਤਂ ਚਰਾਮ, ਮਨਸਾ ਸੁਚਰਿਤਂ ਚਰਾਮਾ’ਤਿ. ਅਯਂ ਖੋ, ਭਿਕ੍ਖੁ, ਹੇਤੁ, ਅਯਂ ਪਚ੍ਚਯੋ, ਯੇਨ ਮਿਧੇਕਚ੍ਚੇ ਅਣ੍ਡਜਾ ਨਾਗਾ ਉਪੋਸਥਂ ਉਪਵਸਨ੍ਤਿ ਵੋਸ੍ਸਟ੍ਠਕਾਯਾ ਚ ਭਵਨ੍ਤੀ’’ਤਿ. ਤਤਿਯਂ.

੪. ਦੁਤਿਯਉਪੋਸਥਸੁਤ੍ਤਂ

੩੪੫. ਸਾਵਤ੍ਥਿਨਿਦਾਨਂ. ਅਥ ਖੋ ਅਞ੍ਞਤਰੋ ਭਿਕ੍ਖੁ ਯੇਨ ਭਗਵਾ…ਪੇ… ਏਕਮਨ੍ਤਂ ਨਿਸਿਨ੍ਨੋ ਖੋ ਸੋ ਭਿਕ੍ਖੁ ਭਗਵਨ੍ਤਂ ਏਤਦਵੋਚ – ‘‘ਕੋ ਨੁ ਖੋ, ਭਨ੍ਤੇ, ਹੇਤੁ, ਕੋ ਪਚ੍ਚਯੋ, ਯੇਨ ਮਿਧੇਕਚ੍ਚੇ ਜਲਾਬੁਜਾ ਨਾਗਾ ਉਪੋਸਥਂ ਉਪਵਸਨ੍ਤਿ ਵੋਸ੍ਸਟ੍ਠਕਾਯਾ ਚ ਭਵਨ੍ਤੀ’’ਤਿ? ‘‘ਇਧ, ਭਿਕ੍ਖੁ…ਪੇ… ਅਯਂ ਖੋ, ਭਿਕ੍ਖੁ, ਹੇਤੁ, ਅਯਂ ਪਚ੍ਚਯੋ, ਯੇਨ ਮਿਧੇਕਚ੍ਚੇ ਜਲਾਬੁਜਾ ਨਾਗਾ ਉਪੋਸਥਂ ਉਪਵਸਨ੍ਤਿ ਵੋਸ੍ਸਟ੍ਠਕਾਯਾ ਚ ਭਵਨ੍ਤੀ’’ਤਿ. ਚਤੁਤ੍ਥਂ.

੫. ਤਤਿਯਉਪੋਸਥਸੁਤ੍ਤਂ

੩੪੬. ਸਾਵਤ੍ਥਿਨਿਦਾਨਂ. ਏਕਮਨ੍ਤਂ ਨਿਸਿਨ੍ਨੋ ਖੋ ਸੋ ਭਿਕ੍ਖੁ ਭਗਵਨ੍ਤਂ ਏਤਦਵੋਚ – ‘‘ਕੋ ਨੁ ਖੋ, ਭਨ੍ਤੇ, ਹੇਤੁ, ਕੋ ਪਚ੍ਚਯੋ, ਯੇਨ ਮਿਧੇਕਚ੍ਚੇ ਸਂਸੇਦਜਾ ਨਾਗਾ ਉਪੋਸਥਂ ਉਪਵਸਨ੍ਤਿ ਵੋਸ੍ਸਟ੍ਠਕਾਯਾ ਚ ਭਵਨ੍ਤੀ’’ਤਿ? ‘‘ਇਧ, ਭਿਕ੍ਖੁ…ਪੇ… ਅਯਂ ਖੋ, ਭਿਕ੍ਖੁ, ਹੇਤੁ, ਅਯਂ ਪਚ੍ਚਯੋ, ਯੇਨ ਮਿਧੇਕਚ੍ਚੇ ਸਂਸੇਦਜਾ ਨਾਗਾ ਉਪੋਸਥਂ ਉਪਵਸਨ੍ਤਿ ਵੋਸ੍ਸਟ੍ਠਕਾਯਾ ਚ ਭਵਨ੍ਤੀ’’ਤਿ. ਪਞ੍ਚਮਂ.

੬. ਚਤੁਤ੍ਥਉਪੋਸਥਸੁਤ੍ਤਂ

੩੪੭. ਸਾਵਤ੍ਥਿਨਿਦਾਨਂ. ਏਕਮਨ੍ਤਂ ਨਿਸਿਨ੍ਨੋ ਖੋ ਸੋ ਭਿਕ੍ਖੁ ਭਗਵਨ੍ਤਂ ਏਤਦਵੋਚ – ‘‘ਕੋ ਨੁ ਖੋ, ਭਨ੍ਤੇ, ਹੇਤੁ, ਕੋ ਪਚ੍ਚਯੋ, ਯੇਨ ਮਿਧੇਕਚ੍ਚੇ ਓਪਪਾਤਿਕਾ ਨਾਗਾ ਉਪੋਸਥਂ ਉਪਵਸਨ੍ਤਿ ਵੋਸ੍ਸਟ੍ਠਕਾਯਾ ਚ ਭਵਨ੍ਤੀ’’ਤਿ?

‘‘ਇਧ, ਭਿਕ੍ਖੁ, ਏਕਚ੍ਚਾਨਂ ਓਪਪਾਤਿਕਾਨਂ ਨਾਗਾਨਂ ਏਵਂ ਹੋਤਿ – ‘ਮਯਂ ਖੋ ਪੁਬ੍ਬੇ ਕਾਯੇਨ ਦ੍ਵਯਕਾਰਿਨੋ ਅਹੁਮ੍ਹ, ਵਾਚਾਯ ਦ੍ਵਯਕਾਰਿਨੋ, ਮਨਸਾ ਦ੍ਵਯਕਾਰਿਨੋ. ਤੇ ਮਯਂ ਕਾਯੇਨ ਦ੍ਵਯਕਾਰਿਨੋ, ਵਾਚਾਯ ਦ੍ਵਯਕਾਰਿਨੋ, ਮਨਸਾ ਦ੍ਵਯਕਾਰਿਨੋ, ਕਾਯਸ੍ਸ ਭੇਦਾ ਪਰਂ ਮਰਣਾ ਓਪਪਾਤਿਕਾਨਂ ਨਾਗਾਨਂ ਸਹਬ੍ਯਤਂ ਉਪਪਨ੍ਨਾ. ਸਚਜ੍ਜ ਮਯਂ ਕਾਯੇਨ ਸੁਚਰਿਤਂ ਚਰੇਯ੍ਯਾਮ, ਵਾਚਾਯ… ਮਨਸਾ ਸੁਚਰਿਤਂ ਚਰੇਯ੍ਯਾਮ, ਏਵਂ ਮਯਂ ਕਾਯਸ੍ਸ ਭੇਦਾ ਪਰਂ ਮਰਣਾ ਸੁਗਤਿਂ ਸਗ੍ਗਂ ਲੋਕਂ ਉਪਪਜ੍ਜੇਯ੍ਯਾਮ. ਹਨ੍ਦ, ਮਯਂ ਏਤਰਹਿ ਕਾਯੇਨ ਸੁਚਰਿਤਂ ਚਰਾਮ, ਵਾਚਾਯ… ਮਨਸਾ ਸੁਚਰਿਤਂ ਚਰਾਮਾ’ਤਿ. ਅਯਂ ਖੋ, ਭਿਕ੍ਖੁ, ਹੇਤੁ, ਅਯਂ ਪਚ੍ਚਯੋ, ਯੇਨ ਮਿਧੇਕਚ੍ਚੇ ਓਪਪਾਤਿਕਾ ਨਾਗਾ ਉਪੋਸਥਂ ਉਪਵਸਨ੍ਤਿ ਵੋਸ੍ਸਟ੍ਠਕਾਯਾ ਚ ਭਵਨ੍ਤੀ’’ਤਿ. ਛਟ੍ਠਂ.

੭. ਸੁਤਸੁਤ੍ਤਂ

੩੪੮. ਸਾਵਤ੍ਥਿਨਿਦਾਨਂ. ਏਕਮਨ੍ਤਂ ਨਿਸਿਨ੍ਨੋ ਖੋ ਸੋ ਭਿਕ੍ਖੁ ਭਗਵਨ੍ਤਂ ਏਤਦਵੋਚ – ‘‘ਕੋ ਨੁ ਖੋ, ਭਨ੍ਤੇ, ਹੇਤੁ, ਕੋ ਪਚ੍ਚਯੋ, ਯੇਨ ਮਿਧੇਕਚ੍ਚੋ ਕਾਯਸ੍ਸ ਭੇਦਾ ਪਰਂ ਮਰਣਾ ਅਣ੍ਡਜਾਨਂ ਨਾਗਾਨਂ ਸਹਬ੍ਯਤਂ ਉਪਪਜ੍ਜਤੀ’’ਤਿ?

‘‘ਇਧ, ਭਿਕ੍ਖੁ, ਏਕਚ੍ਚੋ ਕਾਯੇਨ ਦ੍ਵਯਕਾਰੀ ਹੋਤਿ, ਵਾਚਾਯ ਦ੍ਵਯਕਾਰੀ ਹੋਤਿ, ਮਨਸਾ ਦ੍ਵਯਕਾਰੀ ਹੋਤਿ. ਤਸ੍ਸ ਸੁਤਂ ਹੋਤਿ – ‘ਅਣ੍ਡਜਾ ਨਾਗਾ ਦੀਘਾਯੁਕਾ ਵਣ੍ਣਵਨ੍ਤੋ ਸੁਖਬਹੁਲਾ’ਤਿ. ਤਸ੍ਸ ਏਵਂ ਹੋਤਿ – ‘ਅਹੋ ਵਤਾਹਂ ਕਾਯਸ੍ਸ ਭੇਦਾ ਪਰਂ ਮਰਣਾ ਅਣ੍ਡਜਾਨਂ ਨਾਗਾਨਂ ਸਹਬ੍ਯਤਂ ਉਪਪਜ੍ਜੇਯ੍ਯ’ਨ੍ਤਿ. ਸੋ ਕਾਯਸ੍ਸ ਭੇਦਾ ਪਰਂ ਮਰਣਾ ਅਣ੍ਡਜਾਨਂ ਨਾਗਾਨਂ ਸਹਬ੍ਯਤਂ ਉਪਪਜ੍ਜਤਿ. ਅਯਂ ਖੋ, ਭਿਕ੍ਖੁ, ਹੇਤੁ, ਅਯਂ ਪਚ੍ਚਯੋ, ਯੇਨ ਮਿਧੇਕਚ੍ਚੋ ਕਾਯਸ੍ਸ ਭੇਦਾ ਪਰਂ ਮਰਣਾ ਅਣ੍ਡਜਾਨਂ ਨਾਗਾਨਂ ਸਹਬ੍ਯਤਂ ਉਪਪਜ੍ਜਤੀ’’ਤਿ. ਸਤ੍ਤਮਂ.

੮. ਦੁਤਿਯਸੁਤਸੁਤ੍ਤਂ

੩੪੯. ਸਾਵਤ੍ਥਿਨਿਦਾਨਂ. ਏਕਮਨ੍ਤਂ ਨਿਸਿਨ੍ਨੋ ਖੋ ਸੋ ਭਿਕ੍ਖੁ ਭਗਵਨ੍ਤਂ ਏਤਦਵੋਚ – ‘‘ਕੋ ਨੁ ਖੋ, ਭਨ੍ਤੇ, ਹੇਤੁ, ਕੋ ਪਚ੍ਚਯੋ, ਯੇਨ ਮਿਧੇਕਚ੍ਚੋ ਕਾਯਸ੍ਸ ਭੇਦਾ ਪਰਂ ਮਰਣਾ ਜਲਾਬੁਜਾਨਂ ਨਾਗਾਨਂ ਸਹਬ੍ਯਤਂ ਉਪਪਜ੍ਜਤੀ’’ਤਿ?…ਪੇ… ਅਯਂ ਖੋ, ਭਿਕ੍ਖੁ, ਹੇਤੁ, ਅਯਂ ਪਚ੍ਚਯੋ, ਯੇਨ ਮਿਧੇਕਚ੍ਚੋ ਕਾਯਸ੍ਸ ਭੇਦਾ ਪਰਂ ਮਰਣਾ ਜਲਾਬੁਜਾਨਂ ਨਾਗਾਨਂ ਸਹਬ੍ਯਤਂ ਉਪਪਜ੍ਜਤੀਤਿ. ਅਟ੍ਠਮਂ.

੯. ਤਤਿਯਸੁਤਸੁਤ੍ਤਂ

੩੫੦. ਸਾਵਤ੍ਥਿਨਿਦਾਨਂ. ਏਕਮਨ੍ਤਂ ਨਿਸਿਨ੍ਨੋ ਖੋ ਸੋ ਭਿਕ੍ਖੁ ਭਗਵਨ੍ਤਂ ਏਤਦਵੋਚ – ‘‘ਕੋ ਨੁ ਖੋ, ਭਨ੍ਤੇ, ਹੇਤੁ, ਕੋ ਪਚ੍ਚਯੋ, ਯੇਨ ਮਿਧੇਕਚ੍ਚੋ ਕਾਯਸ੍ਸ ਭੇਦਾ ਪਰਂ ਮਰਣਾ ਸਂਸੇਦਜਾਨਂ ਨਾਗਾਨਂ ਸਹਬ੍ਯਤਂ ਉਪਪਜ੍ਜਤੀ’’ਤਿ?…ਪੇ… ਅਯਂ ਖੋ, ਭਿਕ੍ਖੁ, ਹੇਤੁ, ਅਯਂ ਪਚ੍ਚਯੋ, ਯੇਨ ਮਿਧੇਕਚ੍ਚੋ ਕਾਯਸ੍ਸ ਭੇਦਾ ਪਰਂ ਮਰਣਾ ਸਂਸੇਦਜਾਨਂ ਨਾਗਾਨਂ ਸਹਬ੍ਯਤਂ ਉਪਪਜ੍ਜਤੀਤਿ. ਨਵਮਂ.

੧੦. ਚਤੁਤ੍ਥਸੁਤਸੁਤ੍ਤਂ

੩੫੧. ਸਾਵਤ੍ਥਿਨਿਦਾਨਂ. ਏਕਮਨ੍ਤਂ ਨਿਸਿਨ੍ਨੋ ਖੋ ਸੋ ਭਿਕ੍ਖੁ ਭਗਵਨ੍ਤਂ ਏਤਦਵੋਚ – ‘‘ਕੋ ਨੁ ਖੋ, ਭਨ੍ਤੇ, ਹੇਤੁ, ਕੋ ਪਚ੍ਚਯੋ, ਯੇਨ ਮਿਧੇਕਚ੍ਚੋ ਕਾਯਸ੍ਸ ਭੇਦਾ ਪਰਂ ਮਰਣਾ ਓਪਪਾਤਿਕਾਨਂ ਨਾਗਾਨਂ ਸਹਬ੍ਯਤਂ ਉਪਪਜ੍ਜਤੀ’’ਤਿ?

‘‘ਇਧ, ਭਿਕ੍ਖੁ, ਏਕਚ੍ਚੋ ਕਾਯੇਨ ਦ੍ਵਯਕਾਰੀ ਹੋਤਿ, ਵਾਚਾਯ ਦ੍ਵਯਕਾਰੀ, ਮਨਸਾ ਦ੍ਵਯਕਾਰੀ. ਤਸ੍ਸ ਸੁਤਂ ਹੋਤਿ – ‘ਓਪਪਾਤਿਕਾ ਨਾਗਾ ਦੀਘਾਯੁਕਾ ਵਣ੍ਣਵਨ੍ਤੋ ਸੁਖਬਹੁਲਾ’ਤਿ. ਤਸ੍ਸ ਏਵਂ ਹੋਤਿ – ‘ਅਹੋ ਵਤਾਹਂ ਕਾਯਸ੍ਸ ਭੇਦਾ ਪਰਂ ਮਰਣਾ ਓਪਪਾਤਿਕਾਨਂ ਨਾਗਾਨਂ ਸਹਬ੍ਯਤਂ ਉਪਪਜ੍ਜੇਯ੍ਯ’ਨ੍ਤਿ. ਸੋ ਕਾਯਸ੍ਸ ਭੇਦਾ ਪਰਂ ਮਰਣਾ ਓਪਪਾਤਿਕਾਨਂ ਨਾਗਾਨਂ ਸਹਬ੍ਯਤਂ ਉਪਪਜ੍ਜਤਿ. ਅਯਂ ਖੋ, ਭਿਕ੍ਖੁ, ਹੇਤੁ, ਅਯਂ ਪਚ੍ਚਯੋ, ਯੇਨ ਮਿਧੇਕਚ੍ਚੋ ਕਾਯਸ੍ਸ ਭੇਦਾ ਪਰਂ ਮਰਣਾ ਓਪਪਾਤਿਕਾਨਂ ਨਾਗਾਨਂ ਸਹਬ੍ਯਤਂ ਉਪਪਜ੍ਜਤੀ’’ਤਿ. ਦਸਮਂ.

੧੧-੨੦. ਅਣ੍ਡਜਦਾਨੂਪਕਾਰਸੁਤ੍ਤਦਸਕਂ

੩੫੨-੩੬੧. ਏਕਮਨ੍ਤਂ ਨਿਸਿਨ੍ਨੋ ਖੋ ਸੋ ਭਿਕ੍ਖੁ ਭਗਵਨ੍ਤਂ ਏਤਦਵੋਚ – ‘‘ਕੋ ਨੁ ਖੋ, ਭਨ੍ਤੇ, ਹੇਤੁ, ਕੋ ਪਚ੍ਚਯੋ, ਯੇਨ ਮਿਧੇਕਚ੍ਚੋ ਕਾਯਸ੍ਸ ਭੇਦਾ ਪਰਂ ਮਰਣਾ ਅਣ੍ਡਜਾਨਂ ਨਾਗਾਨਂ ਸਹਬ੍ਯਤਂ ਉਪਪਜ੍ਜਤੀ’’ਤਿ?

‘‘ਇਧ, ਭਿਕ੍ਖੁ, ਏਕਚ੍ਚੋ ਕਾਯੇਨ ਦ੍ਵਯਕਾਰੀ ਹੋਤਿ, ਵਾਚਾਯ ਦ੍ਵਯਕਾਰੀ, ਮਨਸਾ ਦ੍ਵਯਕਾਰੀ. ਤਸ੍ਸ ਸੁਤਂ ਹੋਤਿ – ‘ਅਣ੍ਡਜਾ ਨਾਗਾ ਦੀਘਾਯੁਕਾ ਵਣ੍ਣਵਨ੍ਤੋ ਸੁਖਬਹੁਲਾ’ਤਿ. ਤਸ੍ਸ ਏਵਂ ਹੋਤਿ – ‘ਅਹੋ ਵਤਾਹਂ ਕਾਯਸ੍ਸ ਭੇਦਾ ਪਰਂ ਮਰਣਾ ਅਣ੍ਡਜਾਨਂ ਨਾਗਾਨਂ ਸਹਬ੍ਯਤਂ ਉਪਪਜ੍ਜੇਯ੍ਯ’ਨ੍ਤਿ. ਸੋ ਅਨ੍ਨਂ ਦੇਤਿ. ਸੋ ਕਾਯਸ੍ਸ ਭੇਦਾ ਪਰਂ ਮਰਣਾ ਅਣ੍ਡਜਾਨਂ ਨਾਗਾਨਂ ਸਹਬ੍ਯਤਂ ਉਪਪਜ੍ਜਤਿ. ਅਯਂ ਖੋ, ਭਿਕ੍ਖੁ, ਹੇਤੁ…ਪੇ… ਉਪਪਜ੍ਜਤੀਤਿ…ਪੇ… ਸੋ ਪਾਨਂ ਦੇਤਿ…ਪੇ… ਵਤ੍ਥਂ ਦੇਤਿ…ਪੇ… ਯਾਨਂ ਦੇਤਿ…ਪੇ… ਮਾਲਂ ਦੇਤਿ…ਪੇ… ਗਨ੍ਧਂ ਦੇਤਿ…ਪੇ… ਵਿਲੇਪਨਂ ਦੇਤਿ…ਪੇ… ਸੇਯ੍ਯਂ ਦੇਤਿ…ਪੇ… ਆਵਸਥਂ ਦੇਤਿ…ਪੇ… ਪਦੀਪੇਯ੍ਯਂ ਦੇਤਿ. ਸੋ ਕਾਯਸ੍ਸ ਭੇਦਾ ਪਰਂ ਮਰਣਾ ਅਣ੍ਡਜਾਨਂ ਨਾਗਾਨਂ ਸਹਬ੍ਯਤਂ ਉਪਪਜ੍ਜਤਿ. ਅਯਂ ਖੋ, ਭਿਕ੍ਖੁ, ਹੇਤੁ, ਅਯਂ ਪਚ੍ਚਯੋ, ਯੇਨ ਮਿਧੇਕਚ੍ਚੋ ਕਾਯਸ੍ਸ ਭੇਦਾ ਪਰਂ ਮਰਣਾ ਅਣ੍ਡਜਾਨਂ ਨਾਗਾਨਂ ਸਹਬ੍ਯਤਂ ਉਪਪਜ੍ਜਤੀ’’ਤਿ. ਵੀਸਤਿਮਂ.

੨੧-੫੦. ਜਲਾਬੁਜਾਦਿਦਾਨੂਪਕਾਰਸੁਤ੍ਤਤ੍ਤਿਂਸਕਂ

੩੬੨-੩੯੧. ਸਾਵਤ੍ਥਿਨਿਦਾਨਂ. ਏਕਮਨ੍ਤਂ ਨਿਸਿਨ੍ਨੋ ਖੋ ਸੋ ਭਿਕ੍ਖੁ ਭਗਵਨ੍ਤਂ ਏਤਦਵੋਚ – ‘‘ਕੋ ਨੁ ਖੋ, ਭਨ੍ਤੇ, ਹੇਤੁ, ਕੋ ਪਚ੍ਚਯੋ, ਯੇਨ ਮਿਧੇਕਚ੍ਚੋ ਕਾਯਸ੍ਸ ਭੇਦਾ ਪਰਂ ਮਰਣਾ ਜਲਾਬੁਜਾਨਂ ਨਾਗਾਨਂ…ਪੇ… ਸਂਸੇਦਜਾਨਂ ਨਾਗਾਨਂ…ਪੇ… ਓਪਪਾਤਿਕਾਨਂ ਨਾਗਾਨਂ ਸਹਬ੍ਯਤਂ ਉਪਪਜ੍ਜਤੀ’’ਤਿ?

‘‘ਇਧ, ਭਿਕ੍ਖੁ, ਏਕਚ੍ਚੋ ਕਾਯੇਨ ਦ੍ਵਯਕਾਰੀ ਹੋਤਿ, ਵਾਚਾਯ ਦ੍ਵਯਕਾਰੀ, ਮਨਸਾ ਦ੍ਵਯਕਾਰੀ. ਤਸ੍ਸ ਸੁਤਂ ਹੋਤਿ – ‘ਓਪਪਾਤਿਕਾ ਨਾਗਾ ਦੀਘਾਯੁਕਾ ਵਣ੍ਣਵਨ੍ਤੋ ਸੁਖਬਹੁਲਾ’ਤਿ. ਤਸ੍ਸ ਏਵਂ ਹੋਤਿ – ‘ਅਹੋ ਵਤਾਹਂ ਕਾਯਸ੍ਸ ਭੇਦਾ ਪਰਂ ਮਰਣਾ ਓਪਪਾਤਿਕਾਨਂ ਨਾਗਾਨਂ ਸਹਬ੍ਯਤਂ ਉਪਪਜ੍ਜੇਯ੍ਯ’ਨ੍ਤਿ. ਸੋ ਅਨ੍ਨਂ ਦੇਤਿ…ਪੇ… ਪਾਨਂ ਦੇਤਿ…ਪੇ… ਪਦੀਪੇਯ੍ਯਂ ਦੇਤਿ. ਸੋ ਕਾਯਸ੍ਸ ਭੇਦਾ ਪਰਂ ਮਰਣਾ ਓਪਪਾਤਿਕਾਨਂ ਨਾਗਾਨਂ ਸਹਬ੍ਯਤਂ ਉਪਪਜ੍ਜਤਿ. ਅਯਂ ਖੋ, ਭਿਕ੍ਖੁ, ਹੇਤੁ, ਅਯਂ ਪਚ੍ਚਯੋ, ਯੇਨ ਮਿਧੇਕਚ੍ਚੋ ਕਾਯਸ੍ਸ ਭੇਦਾ ਪਰਂ ਮਰਣਾ ਓਪਪਾਤਿਕਾਨਂ ਨਾਗਾਨਂ ਸਹਬ੍ਯਤਂ ਉਪਪਜ੍ਜਤੀ’’ਤਿ.

(ਇਮਿਨਾ ਪੇਯ੍ਯਾਲੇਨ ਦਸ ਦਸ ਸੁਤ੍ਤਨ੍ਤਾ ਕਾਤਬ੍ਬਾ. ਏਵਂ ਚਤੂਸੁ ਯੋਨੀਸੁ ਚਤ੍ਤਾਲੀਸਂ ਵੇਯ੍ਯਾਕਰਣਾ ਹੋਨ੍ਤਿ. ਪੁਰਿਮੇਹਿ ਪਨ ਦਸਹਿ ਸੁਤ੍ਤਨ੍ਤੇਹਿ ਸਹ ਹੋਨ੍ਤਿ ਪਣ੍ਣਾਸਸੁਤ੍ਤਨ੍ਤਾਤਿ.)

ਨਾਗਸਂਯੁਤ੍ਤਂ ਸਮਤ੍ਤਂ.