੭. ਸਾਰਿਪੁਤ੍ਤਸਂਯੁਤ੍ਤਂ

੧. ਵਿਵੇਕਜਸੁਤ੍ਤਂ

੩੩੨. ਏਕਂ ਸਮਯਂ ਆਯਸ੍ਮਾ ਸਾਰਿਪੁਤ੍ਤੋ ਸਾਵਤ੍ਥਿਯਂ ਵਿਹਰਤਿ ਜੇਤਵਨੇ ਅਨਾਥਪਿਣ੍ਡਿਕਸ੍ਸ ਆਰਾਮੇ. ਅਥ ਖੋ ਆਯਸ੍ਮਾ ਸਾਰਿਪੁਤ੍ਤੋ ਪੁਬ੍ਬਣ੍ਹਸਮਯਂ ਨਿਵਾਸੇਤ੍ਵਾ ਪਤ੍ਤਚੀਵਰਮਾਦਾਯ ਸਾਵਤ੍ਥਿਂ ਪਿਣ੍ਡਾਯ ਪਾਵਿਸਿ. ਸਾਵਤ੍ਥਿਯਂ ਪਿਣ੍ਡਾਯ ਚਰਿਤ੍ਵਾ ਪਚ੍ਛਾਭਤ੍ਤਂ ਪਿਣ੍ਡਪਾਤਪਟਿਕ੍ਕਨ੍ਤੋ ਯੇਨ ਅਨ੍ਧਵਨਂ ਤੇਨੁਪਸਙ੍ਕਮਿ ਦਿਵਾਵਿਹਾਰਾਯ. ਅਨ੍ਧਵਨਂ ਅਜ੍ਝੋਗਾਹੇਤ੍ਵਾ ਅਞ੍ਞਤਰਸ੍ਮਿਂ ਰੁਕ੍ਖਮੂਲੇ ਦਿਵਾਵਿਹਾਰਂ ਨਿਸੀਦਿ.

ਅਥ ਖੋ ਆਯਸ੍ਮਾ ਸਾਰਿਪੁਤ੍ਤੋ ਸਾਯਨ੍ਹਸਮਯਂ ਪਟਿਸਲ੍ਲਾਨਾ ਵੁਟ੍ਠਿਤੋ ਯੇਨ ਜੇਤਵਨਂ ਅਨਾਥਪਿਣ੍ਡਿਕਸ੍ਸ ਆਰਾਮੋ ਤੇਨੁਪਸਙ੍ਕਮਿ. ਅਦ੍ਦਸਾ ਖੋ ਆਯਸ੍ਮਾ ਆਨਨ੍ਦੋ ਆਯਸ੍ਮਨ੍ਤਂ ਸਾਰਿਪੁਤ੍ਤਂ ਦੂਰਤੋਵ ਆਗਚ੍ਛਨ੍ਤਂ. ਦਿਸ੍ਵਾਨ ਆਯਸ੍ਮਨ੍ਤਂ ਸਾਰਿਪੁਤ੍ਤਂ ਏਤਦਵੋਚ – ‘‘ਵਿਪ੍ਪਸਨ੍ਨਾਨਿ ਖੋ ਤੇ, ਆਵੁਸੋ ਸਾਰਿਪੁਤ੍ਤ, ਇਨ੍ਦ੍ਰਿਯਾਨਿ; ਪਰਿਸੁਦ੍ਧੋ ਮੁਖਵਣ੍ਣੋ ਪਰਿਯੋਦਾਤੋ. ਕਤਮੇਨਾਯਸ੍ਮਾ ਸਾਰਿਪੁਤ੍ਤੋ ਅਜ੍ਜ ਵਿਹਾਰੇਨ ਵਿਹਾਸੀ’’ਤਿ?

‘‘ਇਧਾਹਂ, ਆਵੁਸੋ, ਵਿਵਿਚ੍ਚੇਵ ਕਾਮੇਹਿ ਵਿਵਿਚ੍ਚ ਅਕੁਸਲੇਹਿ ਧਮ੍ਮੇਹਿ ਸਵਿਤਕ੍ਕਂ ਸਵਿਚਾਰਂ ਵਿਵੇਕਜਂ ਪੀਤਿਸੁਖਂ ਪਠਮਂ ਝਾਨਂ ਉਪਸਮ੍ਪਜ੍ਜ ਵਿਹਰਾਮਿ. ਤਸ੍ਸ ਮਯ੍ਹਂ, ਆਵੁਸੋ, ਨ ਏਵਂ ਹੋਤਿ – ‘ਅਹਂ ਪਠਮਂ ਝਾਨਂ ਸਮਾਪਜ੍ਜਾਮੀ’ਤਿ ਵਾ ‘ਅਹਂ ਪਠਮਂ ਝਾਨਂ ਸਮਾਪਨ੍ਨੋ’ਤਿ ਵਾ ‘ਅਹਂ ਪਠਮਾ ਝਾਨਾ ਵੁਟ੍ਠਿਤੋ’ਤਿ ਵਾ’’ਤਿ. ‘‘ਤਥਾ ਹਿ ਪਨਾਯਸ੍ਮਤੋ ਸਾਰਿਪੁਤ੍ਤਸ੍ਸ ਦੀਘਰਤ੍ਤਂ ਅਹਙ੍ਕਾਰਮਮਙ੍ਕਾਰਮਾਨਾਨੁਸਯਾ ਸੁਸਮੂਹਤਾ. ਤਸ੍ਮਾ ਆਯਸ੍ਮਤੋ ਸਾਰਿਪੁਤ੍ਤਸ੍ਸ ਨ ਏਵਂ ਹੋਤਿ – ‘ਅਹਂ ਪਠਮਂ ਝਾਨਂ ਸਮਾਪਜ੍ਜਾਮੀ’ਤਿ ਵਾ ‘ਅਹਂ ਪਠਮਂ ਝਾਨਂ ਸਮਾਪਨ੍ਨੋ’ਤਿ ਵਾ ‘ਅਹਂ ਪਠਮਾ ਝਾਨਾ ਵੁਟ੍ਠਿਤੋ’ਤਿ ਵਾ’’ਤਿ. ਪਠਮਂ.

੨. ਅਵਿਤਕ੍ਕਸੁਤ੍ਤਂ

੩੩੩. ਸਾਵਤ੍ਥਿਨਿਦਾਨਂ. ਅਦ੍ਦਸਾ ਖੋ ਆਯਸ੍ਮਾ ਆਨਨ੍ਦੋ…ਪੇ… ਆਯਸ੍ਮਨ੍ਤਂ ਸਾਰਿਪੁਤ੍ਤਂ ਏਤਦਵੋਚ – ‘‘ਵਿਪ੍ਪਸਨ੍ਨਾਨਿ ਖੋ ਤੇ, ਆਵੁਸੋ ਸਾਰਿਪੁਤ੍ਤ, ਇਨ੍ਦ੍ਰਿਯਾਨਿ; ਪਰਿਸੁਦ੍ਧੋ ਮੁਖਵਣ੍ਣੋ ਪਰਿਯੋਦਾਤੋ. ਕਤਮੇਨਾਯਸ੍ਮਾ ਸਾਰਿਪੁਤ੍ਤੋ ਅਜ੍ਜ ਵਿਹਾਰੇਨ ਵਿਹਾਸੀ’’ਤਿ?

‘‘ਇਧਾਹਂ, ਆਵੁਸੋ, ਵਿਤਕ੍ਕਵਿਚਾਰਾਨਂ ਵੂਪਸਮਾ ਅਜ੍ਝਤ੍ਤਂ ਸਮ੍ਪਸਾਦਨਂ ਚੇਤਸੋ ਏਕੋਦਿਭਾਵਂ ਅਵਿਤਕ੍ਕਂ ਅਵਿਚਾਰਂ ਸਮਾਧਿਜਂ ਪੀਤਿਸੁਖਂ ਦੁਤਿਯਂ ਝਾਨਂ ਉਪਸਮ੍ਪਜ੍ਜ ਵਿਹਰਾਮਿ. ਤਸ੍ਸ ਮਯ੍ਹਂ, ਆਵੁਸੋ, ਨ ਏਵਂ ਹੋਤਿ – ‘ਅਹਂ ਦੁਤਿਯਂ ਝਾਨਂ ਸਮਾਪਜ੍ਜਾਮੀ’ਤਿ ਵਾ ‘ਅਹਂ ਦੁਤਿਯਂ ਝਾਨਂ ਸਮਾਪਨ੍ਨੋ’ਤਿ ਵਾ ‘ਅਹਂ ਦੁਤਿਯਾ ਝਾਨਾ ਵੁਟ੍ਠਿਤੋ’ਤਿ ਵਾ’’ਤਿ. ‘‘ਤਥਾ ਹਿ ਪਨਾਯਸ੍ਮਤੋ ਸਾਰਿਪੁਤ੍ਤਸ੍ਸ ਦੀਘਰਤ੍ਤਂ ਅਹਙ੍ਕਾਰਮਮਙ੍ਕਾਰਮਾਨਾਨੁਸਯਾ ਸੁਸਮੂਹਤਾ. ਤਸ੍ਮਾ ਆਯਸ੍ਮਤੋ ਸਾਰਿਪੁਤ੍ਤਸ੍ਸ ਨ ਏਵਂ ਹੋਤਿ – ‘ਅਹਂ ਦੁਤਿਯਂ ਝਾਨਂ ਸਮਾਪਜ੍ਜਾਮੀ’ਤਿ ਵਾ ‘ਅਹਂ ਦੁਤਿਯਂ ਝਾਨਂ ਸਮਾਪਨ੍ਨੋ’ਤਿ ਵਾ ‘ਅਹਂ ਦੁਤਿਯਾ ਝਾਨਾ ਵੁਟ੍ਠਿਤੋ’ਤਿ ਵਾ’’ਤਿ. ਦੁਤਿਯਂ.

੩. ਪੀਤਿਸੁਤ੍ਤਂ

੩੩੪. ਸਾਵਤ੍ਥਿਨਿਦਾਨਂ. ਅਦ੍ਦਸਾ ਖੋ ਆਯਸ੍ਮਾ ਆਨਨ੍ਦੋ…ਪੇ… ‘‘ਵਿਪ੍ਪਸਨ੍ਨਾਨਿ ਖੋ ਤੇ, ਆਵੁਸੋ ਸਾਰਿਪੁਤ੍ਤ, ਇਨ੍ਦ੍ਰਿਯਾਨਿ; ਪਰਿਸੁਦ੍ਧੋ ਮੁਖਵਣ੍ਣੋ ਪਰਿਯੋਦਾਤੋ. ਕਤਮੇਨਾਯਸ੍ਮਾ ਸਾਰਿਪੁਤ੍ਤੋ ਅਜ੍ਜ ਵਿਹਾਰੇਨ ਵਿਹਾਸੀ’’ਤਿ?

‘‘ਇਧਾਹਂ, ਆਵੁਸੋ, ਪੀਤਿਯਾ ਚ ਵਿਰਾਗਾ ਉਪੇਕ੍ਖਕੋ ਚ ਵਿਹਾਸਿਂ ਸਤੋ ਚ ਸਮ੍ਪਜਾਨੋ ਸੁਖਞ੍ਚ ਕਾਯੇਨ ਪਟਿਸਂਵੇਦੇਮਿ; ਯਂ ਤਂ ਅਰਿਯਾ ਆਚਿਕ੍ਖਨ੍ਤਿ ‘ਉਪੇਕ੍ਖਕੋ ਸਤਿਮਾ ਸੁਖਵਿਹਾਰੀ’ਤਿ ਤਤਿਯਂ ਝਾਨਂ ਉਪਸਮ੍ਪਜ੍ਜ ਵਿਹਰਾਮਿ. ਤਸ੍ਸ ਮਯ੍ਹਂ, ਆਵੁਸੋ, ਨ ਏਵਂ ਹੋਤਿ – ‘ਅਹਂ ਤਤਿਯਂ ਝਾਨਂ ਸਮਾਪਜ੍ਜਾਮੀ’ਤਿ ਵਾ ‘ਅਹਂ ਤਤਿਯਂ ਝਾਨਂ ਸਮਾਪਨ੍ਨੋ’ਤਿ ਵਾ ‘ਅਹਂ ਤਤਿਯਾ ਝਾਨਾ ਵੁਟ੍ਠਿਤੋ’ਤਿ ਵਾ’’ਤਿ. ‘‘ਤਥਾ ਹਿ ਪਨਾਯਸ੍ਮਤੋ ਸਾਰਿਪੁਤ੍ਤਸ੍ਸ ਦੀਘਰਤ੍ਤਂ ਅਹਙ੍ਕਾਰਮਮਙ੍ਕਾਰਮਾਨਾਨੁਸਯਾ ਸੁਸਮੂਹਤਾ. ਤਸ੍ਮਾ ਆਯਸ੍ਮਤੋ ਸਾਰਿਪੁਤ੍ਤਸ੍ਸ ਨ ਏਵਂ ਹੋਤਿ – ‘ਅਹਂ ਤਤਿਯਂ ਝਾਨਂ ਸਮਾਪਜ੍ਜਾਮੀ’ਤਿ ਵਾ ‘ਅਹਂ ਤਤਿਯਂ ਝਾਨਂ ਸਮਾਪਨ੍ਨੋ’ਤਿ ਵਾ ‘ਅਹਂ ਤਤਿਯਾ ਝਾਨਾ ਵੁਟ੍ਠਿਤੋ’ਤਿ ਵਾ’’ਤਿ. ਤਤਿਯਂ.

੪. ਉਪੇਕ੍ਖਾਸੁਤ੍ਤਂ

੩੩੫. ਸਾਵਤ੍ਥਿਨਿਦਾਨਂ. ਅਦ੍ਦਸਾ ਖੋ ਆਯਸ੍ਮਾ ਆਨਨ੍ਦੋ…ਪੇ… ‘‘ਵਿਪ੍ਪਸਨ੍ਨਾਨਿ ਖੋ ਤੇ, ਆਵੁਸੋ ਸਾਰਿਪੁਤ੍ਤ, ਇਨ੍ਦ੍ਰਿਯਾਨਿ; ਪਰਿਸੁਦ੍ਧੋ ਮੁਖਵਣ੍ਣੋ ਪਰਿਯੋਦਾਤੋ. ਕਤਮੇਨਾਯਸ੍ਮਾ ਸਾਰਿਪੁਤ੍ਤੋ ਅਜ੍ਜ ਵਿਹਾਰੇਨ ਵਿਹਾਸੀ’’ਤਿ?

‘‘ਇਧਾਹਂ, ਆਵੁਸੋ, ਸੁਖਸ੍ਸ ਚ ਪਹਾਨਾ ਦੁਕ੍ਖਸ੍ਸ ਚ ਪਹਾਨਾ ਪੁਬ੍ਬੇਵ ਸੋਮਨਸ੍ਸਦੋਮਨਸ੍ਸਾਨਂ ਅਤ੍ਥਙ੍ਗਮਾ ਅਦੁਕ੍ਖਮਸੁਖਂ ਉਪੇਕ੍ਖਾਸਤਿਪਾਰਿਸੁਦ੍ਧਿਂ ਚਤੁਤ੍ਥਂ ਝਾਨਂ ਉਪਸਮ੍ਪਜ੍ਜ ਵਿਹਰਾਮਿ. ਤਸ੍ਸ ਮਯ੍ਹਂ, ਆਵੁਸੋ, ਨ ਏਵਂ ਹੋਤਿ – ‘ਅਹਂ ਚਤੁਤ੍ਥਂ ਝਾਨਂ ਸਮਾਪਜ੍ਜਾਮੀ’ਤਿ ਵਾ ‘ਅਹਂ ਚਤੁਤ੍ਥਂ ਝਾਨਂ ਸਮਾਪਨ੍ਨੋ’ਤਿ ਵਾ ‘ਅਹਂ ਚਤੁਤ੍ਥਾ ਝਾਨਾ ਵੁਟ੍ਠਿਤੋ’ਤਿ ਵਾ’’ਤਿ. ‘‘ਤਥਾ ਹਿ ਪਨਾਯਸ੍ਮਤੋ ਸਾਰਿਪੁਤ੍ਤਸ੍ਸ ਦੀਘਰਤ੍ਤਂ ਅਹਙ੍ਕਾਰਮਮਙ੍ਕਾਰਮਾਨਾਨੁਸਯਾ ਸੁਸਮੂਹਤਾ. ਤਸ੍ਮਾ ਆਯਸ੍ਮਤੋ ਸਾਰਿਪੁਤ੍ਤਸ੍ਸ ਨ ਏਵਂ ਹੋਤਿ – ‘ਅਹਂ ਚਤੁਤ੍ਥਂ ਝਾਨਂ ਸਮਾਪਜ੍ਜਾਮੀ’ਤਿ ਵਾ ‘ਅਹਂ ਚਤੁਤ੍ਥਂ ਝਾਨਂ ਸਮਾਪਨ੍ਨੋ’ਤਿ ਵਾ ‘ਅਹਂ ਚਤੁਤ੍ਥਾ ਝਾਨਾ ਵੁਟ੍ਠਿਤੋ’ਤਿ ਵਾ’’ਤਿ. ਚਤੁਤ੍ਥਂ.

੫. ਆਕਾਸਾਨਞ੍ਚਾਯਤਨਸੁਤ੍ਤਂ

੩੩੬. ਸਾਵਤ੍ਥਿਨਿਦਾਨਂ. ਅਦ੍ਦਸਾ ਖੋ ਆਯਸ੍ਮਾ ਆਨਨ੍ਦੋ…ਪੇ… ‘‘ਇਧਾਹਂ, ਆਵੁਸੋ, ਸਬ੍ਬਸੋ ਰੂਪਸਞ੍ਞਾਨਂ ਸਮਤਿਕ੍ਕਮਾ ਪਟਿਘਸਞ੍ਞਾਨਂ ਅਤ੍ਥਙ੍ਗਮਾ ਨਾਨਤ੍ਤਸਞ੍ਞਾਨਂ ਅਮਨਸਿਕਾਰਾ ਅਨਨ੍ਤੋ ਆਕਾਸੋਤਿ ਆਕਾਸਾਨਞ੍ਚਾਯਤਨਂ ਉਪਸਮ੍ਪਜ੍ਜ ਵਿਹਰਾਮਿ…ਪੇ… ਵੁਟ੍ਠਿਤੋਤਿ ਵਾ’’ਤਿ. ਪਞ੍ਚਮਂ.

੬. ਵਿਞ੍ਞਾਣਞ੍ਚਾਯਤਨਸੁਤ੍ਤਂ

੩੩੭. ਸਾਵਤ੍ਥਿਨਿਦਾਨਂ. ਅਦ੍ਦਸਾ ਖੋ ਆਯਸ੍ਮਾ ਆਨਨ੍ਦੋ…ਪੇ… ‘‘ਇਧਾਹਂ, ਆਵੁਸੋ, ਸਬ੍ਬਸੋ ਆਕਾਸਾਨਞ੍ਚਾਯਤਨਂ ਸਮਤਿਕ੍ਕਮ੍ਮ ਅਨਨ੍ਤਂ ਵਿਞ੍ਞਾਣਨ੍ਤਿ ਵਿਞ੍ਞਾਣਞ੍ਚਾਯਤਨਂ ਉਪਸਮ੍ਪਜ੍ਜ ਵਿਹਰਾਮਿ…ਪੇ… ਵੁਟ੍ਠਿਤੋਤਿ ਵਾ’’ਤਿ. ਛਟ੍ਠਂ.

੭. ਆਕਿਞ੍ਚਞ੍ਞਾਯਤਨਸੁਤ੍ਤਂ

੩੩੮. ਸਾਵਤ੍ਥਿਨਿਦਾਨਂ. ਅਥ ਖੋ ਆਯਸ੍ਮਾ ਸਾਰਿਪੁਤ੍ਤੋ…ਪੇ… ‘‘ਇਧਾਹਂ, ਆਵੁਸੋ, ਸਬ੍ਬਸੋ ਵਿਞ੍ਞਾਣਞ੍ਚਾਯਤਨਂ ਸਮਤਿਕ੍ਕਮ੍ਮ, ਨਤ੍ਥਿ ਕਿਞ੍ਚੀਤਿ ਆਕਿਞ੍ਚਞ੍ਞਾਯਤਨਂ ਉਪਸਮ੍ਪਜ੍ਜ ਵਿਹਰਾਮਿ…ਪੇ… ਵੁਟ੍ਠਿਤੋਤਿ ਵਾ’’ਤਿ. ਸਤ੍ਤਮਂ.

੮. ਨੇਵਸਞ੍ਞਾਨਾਸਞ੍ਞਾਯਤਨਸੁਤ੍ਤਂ

੩੩੯. ਸਾਵਤ੍ਥਿਨਿਦਾਨਂ. ਅਥ ਖੋ ਆਯਸ੍ਮਾ ਸਾਰਿਪੁਤ੍ਤੋ…ਪੇ… ‘‘ਇਧਾਹਂ, ਆਵੁਸੋ, ਆਕਿਞ੍ਚਞ੍ਞਾਯਤਨਂ ਸਮਤਿਕ੍ਕਮ੍ਮ ਨੇਵਸਞ੍ਞਾਨਾਸਞ੍ਞਾਯਤਨਂ ਉਪਸਮ੍ਪਜ੍ਜ ਵਿਹਰਾਮਿ…ਪੇ… ਵੁਟ੍ਠਿਤੋਤਿ ਵਾ’’ਤਿ. ਅਟ੍ਠਮਂ.

੯. ਨਿਰੋਧਸਮਾਪਤ੍ਤਿਸੁਤ੍ਤਂ

੩੪੦. ਸਾਵਤ੍ਥਿਨਿਦਾਨਂ. ਅਥ ਖੋ ਆਯਸ੍ਮਾ ਸਾਰਿਪੁਤ੍ਤੋ…ਪੇ…. ‘‘ਇਧਾਹਂ, ਆਵੁਸੋ, ਸਬ੍ਬਸੋ ਨੇਵਸਞ੍ਞਾਨਾਸਞ੍ਞਾਯਤਨਂ ਸਮਤਿਕ੍ਕਮ੍ਮ ਸਞ੍ਞਾਵੇਦਯਿਤਨਿਰੋਧਂ ਉਪਸਮ੍ਪਜ੍ਜ ਵਿਹਰਾਮਿ. ਤਸ੍ਸ ਮਯ੍ਹਂ, ਆਵੁਸੋ, ਨ ਏਵਂ ਹੋਤਿ – ‘ਅਹਂ ਸਞ੍ਞਾਵੇਦਯਿਤਨਿਰੋਧਂ ਸਮਾਪਜ੍ਜਾਮੀ’ਤਿ ਵਾ ‘ਅਹਂ ਸਞ੍ਞਾਵੇਦਯਿਤਨਿਰੋਧਂ ਸਮਾਪਨ੍ਨੋ’ਤਿ ਵਾ ‘ਅਹਂ ਸਞ੍ਞਾਵੇਦਯਿਤਨਿਰੋਧਾ ਵੁਟ੍ਠਿਤੋ’ਤਿ ਵਾ’’ਤਿ. ‘‘ਤਥਾ ਹਿ ਪਨਾਯਸ੍ਮਤੋ ਸਾਰਿਪੁਤ੍ਤਸ੍ਸ ਦੀਘਰਤ੍ਤਂ ਅਹਙ੍ਕਾਰਮਮਙ੍ਕਾਰਮਾਨਾਨੁਸਯਾ ਸੁਸਮੂਹਤਾ. ਤਸ੍ਮਾ ਆਯਸ੍ਮਤੋ ਸਾਰਿਪੁਤ੍ਤਸ੍ਸ ਨ ਏਵਂ ਹੋਤਿ – ‘ਅਹਂ ਸਞ੍ਞਾਵੇਦਯਿਤਨਿਰੋਧਂ ਸਮਾਪਜ੍ਜਾਮੀ’ਤਿ ਵਾ ‘ਅਹਂ ਸਞ੍ਞਾਵੇਦਯਿਤਨਿਰੋਧਂ ਸਮਾਪਨ੍ਨੋ’ਤਿ ਵਾ ‘ਅਹਂ ਸਞ੍ਞਾਵੇਦਯਿਤਨਿਰੋਧਾ ਵੁਟ੍ਠਿਤੋ’ਤਿ ਵਾ’’ਤਿ. ਨਵਮਂ.

੧੦. ਸੂਚਿਮੁਖੀਸੁਤ੍ਤਂ

੩੪੧. ਏਕਂ ਸਮਯਂ ਆਯਸ੍ਮਾ ਸਾਰਿਪੁਤ੍ਤੋ ਰਾਜਗਹੇ ਵਿਹਰਤਿ ਵੇਲ਼ੁਵਨੇ ਕਲਨ੍ਦਕਨਿਵਾਪੇ. ਅਥ ਖੋ ਆਯਸ੍ਮਾ ਸਾਰਿਪੁਤ੍ਤੋ ਪੁਬ੍ਬਣ੍ਹਸਮਯਂ ਨਿਵਾਸੇਤ੍ਵਾ ਪਤ੍ਤਚੀਵਰਮਾਦਾਯ ਰਾਜਗਹੇ ਪਿਣ੍ਡਾਯ ਪਾਵਿਸਿ. ਰਾਜਗਹੇ ਸਪਦਾਨਂ ਪਿਣ੍ਡਾਯ ਚਰਿਤ੍ਵਾ ਤਂ ਪਿਣ੍ਡਪਾਤਂ ਅਞ੍ਞਤਰਂ ਕੁਟ੍ਟਮੂਲਂ [ਕੁਡ੍ਡਮੂਲਂ (ਸੀ. ਸ੍ਯਾ. ਕਂ.), ਕੁਡ੍ਡਂ (ਪੀ.)] ਨਿਸ੍ਸਾਯ ਪਰਿਭੁਞ੍ਜਤਿ. ਅਥ ਖੋ ਸੂਚਿਮੁਖੀ ਪਰਿਬ੍ਬਾਜਿਕਾ ਯੇਨਾਯਸ੍ਮਾ ਸਾਰਿਪੁਤ੍ਤੋ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਆਯਸ੍ਮਨ੍ਤਂ ਸਾਰਿਪੁਤ੍ਤਂ ਏਤਦਵੋਚ –

‘‘ਕਿਂ ਨੁ ਖੋ, ਸਮਣ, ਅਧੋਮੁਖੋ ਭੁਞ੍ਜਸੀ’’ਤਿ? ‘‘ਨ ਖ੍ਵਾਹਂ, ਭਗਿਨਿ, ਅਧੋਮੁਖੋ ਭੁਞ੍ਜਾਮੀ’’ਤਿ. ‘‘ਤੇਨ ਹਿ, ਸਮਣ, ਉਬ੍ਭਮੁਖੋ [ਉਦ੍ਧਂਮੁਖੋ (ਸੀ. ਅਟ੍ਠ.)] ਭੁਞ੍ਜਸੀ’’ਤਿ? ‘‘ਨ ਖ੍ਵਾਹਂ, ਭਗਿਨਿ, ਉਬ੍ਭਮੁਖੋ ਭੁਞ੍ਜਾਮੀ’’ਤਿ. ‘‘ਤੇਨ ਹਿ, ਸਮਣ, ਦਿਸਾਮੁਖੋ ਭੁਞ੍ਜਸੀ’’ਤਿ? ‘‘ਨ ਖ੍ਵਾਹਂ, ਭਗਿਨਿ, ਦਿਸਾਮੁਖੋ ਭੁਞ੍ਜਾਮੀ’’ਤਿ. ‘‘ਤੇਨ ਹਿ, ਸਮਣ, ਵਿਦਿਸਾਮੁਖੋ ਭੁਞ੍ਜਸੀ’’ਤਿ? ‘‘ਨ ਖ੍ਵਾਹਂ, ਭਗਿਨਿ, ਵਿਦਿਸਾਮੁਖੋ ਭੁਞ੍ਜਾਮੀ’’ਤਿ.

‘‘‘ਕਿਂ ਨੁ, ਸਮਣ, ਅਧੋਮੁਖੋ ਭੁਞ੍ਜਸੀ’ਤਿ ਇਤਿ ਪੁਟ੍ਠੋ ਸਮਾਨੋ ‘ਨ ਖ੍ਵਾਹਂ, ਭਗਿਨਿ, ਅਧੋਮੁਖੋ ਭੁਞ੍ਜਾਮੀ’ਤਿ ਵਦੇਸਿ. ‘ਤੇਨ ਹਿ, ਸਮਣ, ਉਬ੍ਭਮੁਖੋ ਭੁਞ੍ਜਸੀ’ਤਿ ਇਤਿ ਪੁਟ੍ਠੋ ਸਮਾਨੋ ‘ਨ ਖ੍ਵਾਹਂ, ਭਗਿਨਿ, ਉਬ੍ਭਮੁਖੋ ਭੁਞ੍ਜਾਮੀ’ਤਿ ਵਦੇਸਿ. ‘ਤੇਨ ਹਿ, ਸਮਣ, ਦਿਸਾਮੁਖੋ ਭੁਞ੍ਜਸੀ’ਤਿ ਇਤਿ ਪੁਟ੍ਠੋ ਸਮਾਨੋ ‘ਨ ਖ੍ਵਾਹਂ, ਭਗਿਨਿ, ਦਿਸਾਮੁਖੋ ਭੁਞ੍ਜਾਮੀ’ਤਿ ਵਦੇਸਿ. ‘ਤੇਨ ਹਿ, ਸਮਣ, ਵਿਦਿਸਾਮੁਖੋ ਭੁਞ੍ਜਸੀ’ਤਿ ਇਤਿ ਪੁਟ੍ਠੋ ਸਮਾਨੋ ‘ਨ ਖ੍ਵਾਹਂ, ਭਗਿਨਿ, ਵਿਦਿਸਾਮੁਖੋ ਭੁਞ੍ਜਾਮੀ’ਤਿ ਵਦੇਸਿ’’.

‘‘ਕਥਞ੍ਚਰਹਿ, ਸਮਣ, ਭੁਞ੍ਜਸੀ’’ਤਿ? ‘‘ਯੇ ਹਿ ਕੇਚਿ, ਭਗਿਨਿ, ਸਮਣਬ੍ਰਾਹ੍ਮਣਾ [ਸਮਣਾ ਵਾ ਬ੍ਰਾਹ੍ਮਣਾ ਵਾ (ਸੀ.) ਨਿਗਮਨਵਾਕ੍ਯੇ ਪਨ ਸਬ੍ਬਤ੍ਥਾਪਿ ਸਮਾਸੋਯੇਵ ਦਿਸ੍ਸਤਿ] ਵਤ੍ਥੁਵਿਜ੍ਜਾਤਿਰਚ੍ਛਾਨਵਿਜ੍ਜਾਯ ਮਿਚ੍ਛਾਜੀਵੇਨ ਜੀਵਿਕਂ [ਜੀਵਿਤਂ (ਕ.)] ਕਪ੍ਪੇਨ੍ਤਿ, ਇਮੇ ਵੁਚ੍ਚਨ੍ਤਿ, ਭਗਿਨਿ, ਸਮਣਬ੍ਰਾਹ੍ਮਣਾ ‘ਅਧੋਮੁਖਾ ਭੁਞ੍ਜਨ੍ਤੀ’ਤਿ. ਯੇ ਹਿ ਕੇਚਿ, ਭਗਿਨਿ, ਸਮਣਬ੍ਰਾਹ੍ਮਣਾ ਨਕ੍ਖਤ੍ਤਵਿਜ੍ਜਾਤਿਰਚ੍ਛਾਨਵਿਜ੍ਜਾਯ ਮਿਚ੍ਛਾਜੀਵੇਨ ਜੀਵਿਕਂ ਕਪ੍ਪੇਨ੍ਤਿ, ਇਮੇ ਵੁਚ੍ਚਨ੍ਤਿ, ਭਗਿਨਿ, ਸਮਣਬ੍ਰਾਹ੍ਮਣਾ ‘ਉਬ੍ਭਮੁਖਾ ਭੁਞ੍ਜਨ੍ਤੀ’ਤਿ. ਯੇ ਹਿ ਕੇਚਿ, ਭਗਿਨਿ, ਸਮਣਬ੍ਰਾਹ੍ਮਣਾ ਦੂਤੇਯ੍ਯਪਹਿਣਗਮਨਾਨੁਯੋਗਾਯ [… ਨੁਯੋਗਾ (ਸੀ. ਸ੍ਯਾ. ਕਂ. ਪੀ.), … ਨੁਯੋਗੇਨ (?)] ਮਿਚ੍ਛਾਜੀਵੇਨ ਜੀਵਿਕਂ ਕਪ੍ਪੇਨ੍ਤਿ, ਇਮੇ ਵੁਚ੍ਚਨ੍ਤਿ, ਭਗਿਨਿ, ਸਮਣਬ੍ਰਾਹ੍ਮਣਾ ‘ਦਿਸਾਮੁਖਾ ਭੁਞ੍ਜਨ੍ਤੀ’ਤਿ. ਯੇ ਹਿ ਕੇਚਿ, ਭਗਿਨਿ, ਸਮਣਬ੍ਰਾਹ੍ਮਣਾ ਅਙ੍ਗਵਿਜ੍ਜਾਤਿਰਚ੍ਛਾਨਵਿਜ੍ਜਾਯ ਮਿਚ੍ਛਾਜੀਵੇਨ ਜੀਵਿਕਂ ਕਪ੍ਪੇਨ੍ਤਿ, ਇਮੇ ਵੁਚ੍ਚਨ੍ਤਿ, ਭਗਿਨਿ, ਸਮਣਬ੍ਰਾਹ੍ਮਣਾ ‘ਵਿਦਿਸਾਮੁਖਾ ਭੁਞ੍ਜਨ੍ਤੀ’’’ਤਿ.

‘‘ਸੋ ਖ੍ਵਾਹਂ, ਭਗਿਨਿ, ਨ ਵਤ੍ਥੁਵਿਜ੍ਜਾਤਿਰਚ੍ਛਾਨਵਿਜ੍ਜਾਯ ਮਿਚ੍ਛਾਜੀਵੇਨ ਜੀਵਿਕਂ ਕਪ੍ਪੇਮਿ, ਨ ਨਕ੍ਖਤ੍ਤਵਿਜ੍ਜਾਤਿਰਚ੍ਛਾਨਵਿਜ੍ਜਾਯ ਮਿਚ੍ਛਾਜੀਵੇਨ ਜੀਵਿਕਂ ਕਪ੍ਪੇਮਿ, ਨ ਦੂਤੇਯ੍ਯਪਹਿਣਗਮਨਾਨੁਯੋਗਾਯ ਮਿਚ੍ਛਾਜੀਵੇਨ ਜੀਵਿਕਂ ਕਪ੍ਪੇਮਿ, ਨ ਅਙ੍ਗਵਿਜ੍ਜਾਤਿਰਚ੍ਛਾਨਵਿਜ੍ਜਾਯ ਮਿਚ੍ਛਾਜੀਵੇਨ ਜੀਵਿਕਂ ਕਪ੍ਪੇਮਿ. ਧਮ੍ਮੇਨ ਭਿਕ੍ਖਂ ਪਰਿਯੇਸਾਮਿ; ਧਮ੍ਮੇਨ ਭਿਕ੍ਖਂ ਪਰਿਯੇਸਿਤ੍ਵਾ ਭੁਞ੍ਜਾਮੀ’’ਤਿ.

ਅਥ ਖੋ ਸੂਚਿਮੁਖੀ ਪਰਿਬ੍ਬਾਜਿਕਾ ਰਾਜਗਹੇ ਰਥਿਯਾਯ ਰਥਿਯਂ, ਸਿਙ੍ਘਾਟਕੇਨ ਸਿਙ੍ਘਾਟਕਂ ਉਪਸਙ੍ਕਮਿਤ੍ਵਾ ਏਵਮਾਰੋਚੇਸਿ – ‘‘ਧਮ੍ਮਿਕਂ ਸਮਣਾ ਸਕ੍ਯਪੁਤ੍ਤਿਯਾ ਆਹਾਰਂ ਆਹਾਰੇਨ੍ਤਿ; ਅਨਵਜ੍ਜਂ [ਅਨਵਜ੍ਜੇਨ (ਕ.)] ਸਮਣਾ ਸਕ੍ਯਪੁਤ੍ਤਿਯਾ ਆਹਾਰਂ ਆਹਾਰੇਨ੍ਤਿ. ਦੇਥ ਸਮਣਾਨਂ ਸਕ੍ਯਪੁਤ੍ਤਿਯਾਨਂ ਪਿਣ੍ਡ’’ਨ੍ਤਿ. ਦਸਮਂ.

ਸਾਰਿਪੁਤ੍ਤਸਂਯੁਤ੍ਤਂ ਸਮਤ੍ਤਂ.