੬. ਕਿਲੇਸਸਂਯੁਤ੍ਤਂ

੧. ਚਕ੍ਖੁਸੁਤ੍ਤਂ

੩੨੨. ਸਾਵਤ੍ਥਿਨਿਦਾਨਂ. ‘‘ਯੋ, ਭਿਕ੍ਖਵੇ, ਚਕ੍ਖੁਸ੍ਮਿਂ ਛਨ੍ਦਰਾਗੋ, ਚਿਤ੍ਤਸ੍ਸੇਸੋ ਉਪਕ੍ਕਿਲੇਸੋ. ਯੋ ਸੋਤਸ੍ਮਿਂ ਛਨ੍ਦਰਾਗੋ, ਚਿਤ੍ਤਸ੍ਸੇਸੋ ਉਪਕ੍ਕਿਲੇਸੋ. ਯੋ ਘਾਨਸ੍ਮਿਂ ਛਨ੍ਦਰਾਗੋ, ਚਿਤ੍ਤਸ੍ਸੇਸੋ ਉਪਕ੍ਕਿਲੇਸੋ. ਯੋ ਜਿਵ੍ਹਾਯ ਛਨ੍ਦਰਾਗੋ, ਚਿਤ੍ਤਸ੍ਸੇਸੋ ਉਪਕ੍ਕਿਲੇਸੋ. ਯੋ ਕਾਯਸ੍ਮਿਂ ਛਨ੍ਦਰਾਗੋ, ਚਿਤ੍ਤਸ੍ਸੇਸੋ ਉਪਕ੍ਕਿਲੇਸੋ. ਯੋ ਮਨਸ੍ਮਿਂ ਛਨ੍ਦਰਾਗੋ, ਚਿਤ੍ਤਸ੍ਸੇਸੋ ਉਪਕ੍ਕਿਲੇਸੋ. ਯਤੋ ਖੋ, ਭਿਕ੍ਖਵੇ, ਭਿਕ੍ਖੁਨੋ ਇਮੇਸੁ ਛਸੁ ਠਾਨੇਸੁ ਚੇਤਸੋ ਉਪਕ੍ਕਿਲੇਸੋ ਪਹੀਨੋ ਹੋਤਿ, ਨੇਕ੍ਖਮ੍ਮਨਿਨ੍ਨਞ੍ਚਸ੍ਸ ਚਿਤ੍ਤਂ ਹੋਤਿ. ਨੇਕ੍ਖਮ੍ਮਪਰਿਭਾਵਿਤਂ ਚਿਤ੍ਤਂ ਕਮ੍ਮਨਿਯਂ ਖਾਯਤਿ, ਅਭਿਞ੍ਞਾ ਸਚ੍ਛਿਕਰਣੀਯੇਸੁ ਧਮ੍ਮੇਸੂ’’ਤਿ. ਪਠਮਂ.

੨. ਰੂਪਸੁਤ੍ਤਂ

੩੨੩. ਸਾਵਤ੍ਥਿਨਿਦਾਨਂ. ‘‘ਯੋ, ਭਿਕ੍ਖਵੇ, ਰੂਪੇਸੁ ਛਨ੍ਦਰਾਗੋ, ਚਿਤ੍ਤਸ੍ਸੇਸੋ ਉਪਕ੍ਕਿਲੇਸੋ. ਯੋ ਸਦ੍ਦੇਸੁ… ਯੋ ਗਨ੍ਧੇਸੁ… ਯੋ ਰਸੇਸੁ… ਯੋ ਫੋਟ੍ਠਬ੍ਬੇਸੁ… ਯੋ ਧਮ੍ਮੇਸੁ ਛਨ੍ਦਰਾਗੋ, ਚਿਤ੍ਤਸ੍ਸੇਸੋ ਉਪਕ੍ਕਿਲੇਸੋ. ਯਤੋ ਖੋ, ਭਿਕ੍ਖਵੇ, ਭਿਕ੍ਖੁਨੋ ਇਮੇਸੁ ਛਸੁ ਠਾਨੇਸੁ ਚੇਤਸੋ ਉਪਕ੍ਕਿਲੇਸੋ ਪਹੀਨੋ ਹੋਤਿ, ਨੇਕ੍ਖਮ੍ਮਨਿਨ੍ਨਞ੍ਚਸ੍ਸ ਚਿਤ੍ਤਂ ਹੋਤਿ. ਨੇਕ੍ਖਮ੍ਮਪਰਿਭਾਵਿਤਂ ਚਿਤ੍ਤਂ ਕਮ੍ਮਨਿਯਂ ਖਾਯਤਿ, ਅਭਿਞ੍ਞਾ ਸਚ੍ਛਿਕਰਣੀਯੇਸੁ ਧਮ੍ਮੇਸੂ’’ਤਿ. ਦੁਤਿਯਂ.

੩. ਵਿਞ੍ਞਾਣਸੁਤ੍ਤਂ

੩੨੪. ਸਾਵਤ੍ਥਿਨਿਦਾਨਂ. ‘‘ਯੋ, ਭਿਕ੍ਖਵੇ, ਚਕ੍ਖੁਵਿਞ੍ਞਾਣਸ੍ਮਿਂ ਛਨ੍ਦਰਾਗੋ, ਚਿਤ੍ਤਸ੍ਸੇਸੋ ਉਪਕ੍ਕਿਲੇਸੋ. ਯੋ ਸੋਤਵਿਞ੍ਞਾਣਸ੍ਮਿਂ… ਯੋ ਘਾਨਵਿਞ੍ਞਾਣਸ੍ਮਿਂ… ਯੋ ਜਿਵ੍ਹਾਵਿਞ੍ਞਾਣਸ੍ਮਿਂ… ਯੋ ਕਾਯਵਿਞ੍ਞਾਣਸ੍ਮਿਂ… ਯੋ ਮਨੋਵਿਞ੍ਞਾਣਸ੍ਮਿਂ ਛਨ੍ਦਰਾਗੋ, ਚਿਤ੍ਤਸ੍ਸੇਸੋ ਉਪਕ੍ਕਿਲੇਸੋ. ਯਤੋ ਖੋ, ਭਿਕ੍ਖਵੇ, ਭਿਕ੍ਖੁਨੋ ਇਮੇਸੁ ਛਸੁ ਠਾਨੇਸੁ ਚੇਤਸੋ ਉਪਕ੍ਕਿਲੇਸੋ ਪਹੀਨੋ ਹੋਤਿ, ਨੇਕ੍ਖਮ੍ਮਨਿਨ੍ਨਞ੍ਚਸ੍ਸ ਚਿਤ੍ਤਂ ਹੋਤਿ. ਨੇਕ੍ਖਮ੍ਮਪਰਿਭਾਵਿਤਂ ਚਿਤ੍ਤਂ ਕਮ੍ਮਨਿਯਂ ਖਾਯਤਿ, ਅਭਿਞ੍ਞਾ ਸਚ੍ਛਿਕਰਣੀਯੇਸੁ ਧਮ੍ਮੇਸੂ’’ਤਿ. ਤਤਿਯਂ.

੪. ਸਮ੍ਫਸ੍ਸਸੁਤ੍ਤਂ

੩੨੫. ਸਾਵਤ੍ਥਿਨਿਦਾਨਂ. ‘‘ਯੋ, ਭਿਕ੍ਖਵੇ, ਚਕ੍ਖੁਸਮ੍ਫਸ੍ਸਸ੍ਮਿਂ ਛਨ੍ਦਰਾਗੋ, ਚਿਤ੍ਤਸ੍ਸੇਸੋ ਉਪਕ੍ਕਿਲੇਸੋ. ਯੋ ਸੋਤਸਮ੍ਫਸ੍ਸਸ੍ਮਿਂ… ਯੋ ਘਾਨਸਮ੍ਫਸ੍ਸਸ੍ਮਿਂ… ਯੋ ਜਿਵ੍ਹਾਸਮ੍ਫਸ੍ਸਸ੍ਮਿਂ… ਯੋ ਕਾਯਸਮ੍ਫਸ੍ਸਸ੍ਮਿਂ… ਯੋ ਮਨੋਸਮ੍ਫਸ੍ਸਸ੍ਮਿਂ ਛਨ੍ਦਰਾਗੋ, ਚਿਤ੍ਤਸ੍ਸੇਸੋ ਉਪਕ੍ਕਿਲੇਸੋ. ਯਤੋ ਖੋ, ਭਿਕ੍ਖਵੇ, ਭਿਕ੍ਖੁਨੋ…ਪੇ… ਅਭਿਞ੍ਞਾ ਸਚ੍ਛਿਕਰਣੀਯੇਸੁ ਧਮ੍ਮੇਸੂ’’ਤਿ. ਚਤੁਤ੍ਥਂ.

੫. ਸਮ੍ਫਸ੍ਸਜਸੁਤ੍ਤਂ

੩੨੬. ਸਾਵਤ੍ਥਿਨਿਦਾਨਂ. ‘‘ਯੋ, ਭਿਕ੍ਖਵੇ, ਚਕ੍ਖੁਸਮ੍ਫਸ੍ਸਜਾਯ ਵੇਦਨਾਯ ਛਨ੍ਦਰਾਗੋ, ਚਿਤ੍ਤਸ੍ਸੇਸੋ ਉਪਕ੍ਕਿਲੇਸੋ. ਯੋ ਸੋਤਸਮ੍ਫਸ੍ਸਜਾਯ ਵੇਦਨਾਯ… ਯੋ ਘਾਨਸਮ੍ਫਸ੍ਸਜਾਯ ਵੇਦਨਾਯ… ਯੋ ਜਿਵ੍ਹਾਸਮ੍ਫਸ੍ਸਜਾਯ ਵੇਦਨਾਯ… ਯੋ ਕਾਯਸਮ੍ਫਸ੍ਸਜਾਯ ਵੇਦਨਾਯ… ਯੋ ਮਨੋਸਮ੍ਫਸ੍ਸਜਾਯ ਵੇਦਨਾਯ ਛਨ੍ਦਰਾਗੋ, ਚਿਤ੍ਤਸ੍ਸੇਸੋ ਉਪਕ੍ਕਿਲੇਸੋ. ਯਤੋ ਖੋ, ਭਿਕ੍ਖਵੇ, ਭਿਕ੍ਖੁਨੋ…ਪੇ… ਅਭਿਞ੍ਞਾ ਸਚ੍ਛਿਕਰਣੀਯੇਸੁ ਧਮ੍ਮੇਸੂ’’ਤਿ. ਪਞ੍ਚਮਂ.

੬. ਸਞ੍ਞਾਸੁਤ੍ਤਂ

੩੨੭. ਸਾਵਤ੍ਥਿਨਿਦਾਨਂ. ‘‘ਯੋ, ਭਿਕ੍ਖਵੇ, ਰੂਪਸਞ੍ਞਾਯ ਛਨ੍ਦਰਾਗੋ, ਚਿਤ੍ਤਸ੍ਸੇਸੋ ਉਪਕ੍ਕਿਲੇਸੋ. ਯੋ ਸਦ੍ਦਸਞ੍ਞਾਯ… ਯੋ ਗਨ੍ਧਸਞ੍ਞਾਯ… ਯੋ ਰਸਸਞ੍ਞਾਯ… ਯੋ ਫੋਟ੍ਠਬ੍ਬਸਞ੍ਞਾਯ… ਯੋ ਧਮ੍ਮਸਞ੍ਞਾਯ ਛਨ੍ਦਰਾਗੋ, ਚਿਤ੍ਤਸ੍ਸੇਸੋ ਉਪਕ੍ਕਿਲੇਸੋ. ਯਤੋ ਖੋ, ਭਿਕ੍ਖਵੇ, ਭਿਕ੍ਖੁਨੋ…ਪੇ… ਅਭਿਞ੍ਞਾ ਸਚ੍ਛਿਕਰਣੀਯੇਸੁ ਧਮ੍ਮੇਸੂ’’ਤਿ. ਛਟ੍ਠਂ.

੭. ਸਞ੍ਚੇਤਨਾਸੁਤ੍ਤਂ

੩੨੮. ਸਾਵਤ੍ਥਿਨਿਦਾਨਂ. ‘‘ਯੋ, ਭਿਕ੍ਖਵੇ, ਰੂਪਸਞ੍ਚੇਤਨਾਯ ਛਨ੍ਦਰਾਗੋ, ਚਿਤ੍ਤਸ੍ਸੇਸੋ ਉਪਕ੍ਕਿਲੇਸੋ. ਯੋ ਸਦ੍ਦਸਞ੍ਚੇਤਨਾਯ… ਯੋ ਗਨ੍ਧਸਞ੍ਚੇਤਨਾਯ… ਯੋ ਰਸਸਞ੍ਚੇਤਨਾਯ… ਯੋ ਫੋਟ੍ਠਬ੍ਬਸਞ੍ਚੇਤਨਾਯ… ਯੋ ਧਮ੍ਮਸਞ੍ਚੇਤਨਾਯ ਛਨ੍ਦਰਾਗੋ, ਚਿਤ੍ਤਸ੍ਸੇਸੋ ਉਪਕ੍ਕਿਲੇਸੋ. ਯਤੋ ਖੋ, ਭਿਕ੍ਖਵੇ, ਭਿਕ੍ਖੁਨੋ…ਪੇ… ਅਭਿਞ੍ਞਾ ਸਚ੍ਛਿਕਰਣੀਯੇਸੁ ਧਮ੍ਮੇਸੂ’’ਤਿ. ਸਤ੍ਤਮਂ.

੮. ਤਣ੍ਹਾਸੁਤ੍ਤਂ

੩੨੯. ਸਾਵਤ੍ਥਿਨਿਦਾਨਂ. ‘‘ਯੋ, ਭਿਕ੍ਖਵੇ, ਰੂਪਤਣ੍ਹਾਯ ਛਨ੍ਦਰਾਗੋ, ਚਿਤ੍ਤਸ੍ਸੇਸੋ ਉਪਕ੍ਕਿਲੇਸੋ. ਯੋ ਸਦ੍ਦਤਣ੍ਹਾਯ… ਯੋ ਗਨ੍ਧਤਣ੍ਹਾਯ… ਯੋ ਰਸਤਣ੍ਹਾਯ… ਯੋ ਫੋਟ੍ਠਬ੍ਬਤਣ੍ਹਾਯ… ਯੋ ਧਮ੍ਮਤਣ੍ਹਾਯ ਛਨ੍ਦਰਾਗੋ, ਚਿਤ੍ਤਸ੍ਸੇਸੋ ਉਪਕ੍ਕਿਲੇਸੋ. ਯਤੋ ਖੋ, ਭਿਕ੍ਖਵੇ, ਭਿਕ੍ਖੁਨੋ…ਪੇ… ਅਭਿਞ੍ਞਾ ਸਚ੍ਛਿਕਰਣੀਯੇਸੁ ਧਮ੍ਮੇਸੂ’’ਤਿ. ਅਟ੍ਠਮਂ.

੯. ਧਾਤੁਸੁਤ੍ਤਂ

੩੩੦. ਸਾਵਤ੍ਥਿਨਿਦਾਨਂ. ‘‘ਯੋ, ਭਿਕ੍ਖਵੇ, ਪਥਵੀਧਾਤੁਯਾ ਛਨ੍ਦਰਾਗੋ, ਚਿਤ੍ਤਸ੍ਸੇਸੋ ਉਪਕ੍ਕਿਲੇਸੋ. ਯੋ ਆਪੋਧਾਤੁਯਾ… ਯੋ ਤੇਜੋਧਾਤੁਯਾ… ਯੋ ਵਾਯੋਧਾਤੁਯਾ… ਯੋ ਆਕਾਸਧਾਤੁਯਾ… ਯੋ ਵਿਞ੍ਞਾਣਧਾਤੁਯਾ ਛਨ੍ਦਰਾਗੋ, ਚਿਤ੍ਤਸ੍ਸੇਸੋ ਉਪਕ੍ਕਿਲੇਸੋ. ਯਤੋ ਖੋ, ਭਿਕ੍ਖਵੇ, ਭਿਕ੍ਖੁਨੋ ਇਮੇਸੁ ਛਸੁ ਠਾਨੇਸੁ ਚੇਤਸੋ ਉਪਕ੍ਕਿਲੇਸੋ ਪਹੀਨੋ ਹੋਤਿ, ਨੇਕ੍ਖਮ੍ਮਨਿਨ੍ਨਞ੍ਚਸ੍ਸ ਚਿਤ੍ਤਂ ਹੋਤਿ. ਨੇਕ੍ਖਮ੍ਮਪਰਿਭਾਵਿਤਂ ਚਿਤ੍ਤਂ ਕਮ੍ਮਨਿਯਂ ਖਾਯਤਿ, ਅਭਿਞ੍ਞਾ ਸਚ੍ਛਿਕਰਣੀਯੇਸੁ ਧਮ੍ਮੇਸੂ’’ਤਿ. ਨਵਮਂ.

੧੦. ਖਨ੍ਧਸੁਤ੍ਤਂ

੩੩੧. ਸਾਵਤ੍ਥਿਨਿਦਾਨਂ. ‘‘ਯੋ, ਭਿਕ੍ਖਵੇ, ਰੂਪਸ੍ਮਿਂ ਛਨ੍ਦਰਾਗੋ, ਚਿਤ੍ਤਸ੍ਸੇਸੋ ਉਪਕ੍ਕਿਲੇਸੋ…ਪੇ… ਯੋ ਵਿਞ੍ਞਾਣਸ੍ਮਿਂ ਛਨ੍ਦਰਾਗੋ, ਚਿਤ੍ਤਸ੍ਸੇਸੋ ਉਪਕ੍ਕਿਲੇਸੋ. ਯਤੋ ਖੋ, ਭਿਕ੍ਖਵੇ, ਭਿਕ੍ਖੁਨੋ ਇਮੇਸੁ ਪਞ੍ਚਸੁ ਠਾਨੇਸੁ ਚੇਤਸੋ ਉਪਕ੍ਕਿਲੇਸੋ ਪਹੀਨੋ ਹੋਤਿ, ਨੇਕ੍ਖਮ੍ਮਨਿਨ੍ਨਞ੍ਚਸ੍ਸ ਚਿਤ੍ਤਂ ਹੋਤਿ. ਨੇਕ੍ਖਮ੍ਮਪਰਿਭਾਵਿਤਂ ਚਿਤ੍ਤਂ ਕਮ੍ਮਨਿਯਂ ਖਾਯਤਿ, ਅਭਿਞ੍ਞਾ ਸਚ੍ਛਿਕਰਣੀਯੇਸੁ ਧਮ੍ਮੇਸੂ’’ਤਿ. ਦਸਮਂ.

ਕਿਲੇਸਸਂਯੁਤ੍ਤਂ ਸਮਤ੍ਤਂ.