੫. ਉਪ੍ਪਾਦਸਂਯੁਤ੍ਤਂ

੧. ਚਕ੍ਖੁਸੁਤ੍ਤਂ

੩੧੨. ਸਾਵਤ੍ਥਿਨਿਦਾਨਂ. ‘‘ਯੋ ਖੋ, ਭਿਕ੍ਖਵੇ, ਚਕ੍ਖੁਸ੍ਸ ਉਪ੍ਪਾਦੋ ਠਿਤਿ ਅਭਿਨਿਬ੍ਬਤ੍ਤਿ ਪਾਤੁਭਾਵੋ, ਦੁਕ੍ਖਸ੍ਸੇਸੋ ਉਪ੍ਪਾਦੋ, ਰੋਗਾਨਂ ਠਿਤਿ, ਜਰਾਮਰਣਸ੍ਸ ਪਾਤੁਭਾਵੋ. ਯੋ ਸੋਤਸ੍ਸ ਉਪ੍ਪਾਦੋ ਠਿਤਿ…ਪੇ… ਯੋ ਘਾਨਸ੍ਸ ਉਪ੍ਪਾਦੋ ਠਿਤਿ… ਯੋ ਜਿਵ੍ਹਾਯ ਉਪ੍ਪਾਦੋ ਠਿਤਿ… ਯੋ ਕਾਯਸ੍ਸ ਉਪ੍ਪਾਦੋ ਠਿਤਿ… ਯੋ ਮਨਸ੍ਸ ਉਪ੍ਪਾਦੋ ਠਿਤਿ ਅਭਿਨਿਬ੍ਬਤ੍ਤਿ ਪਾਤੁਭਾਵੋ, ਦੁਕ੍ਖਸ੍ਸੇਸੋ ਉਪ੍ਪਾਦੋ, ਰੋਗਾਨਂ ਠਿਤਿ, ਜਰਾਮਰਣਸ੍ਸ ਪਾਤੁਭਾਵੋ. ਯੋ ਚ, ਭਿਕ੍ਖਵੇ, ਚਕ੍ਖੁਸ੍ਸ ਨਿਰੋਧੋ ਵੂਪਸਮੋ ਅਤ੍ਥਙ੍ਗਮੋ, ਦੁਕ੍ਖਸ੍ਸੇਸੋ ਨਿਰੋਧੋ, ਰੋਗਾਨਂ ਵੂਪਸਮੋ, ਜਰਾਮਰਣਸ੍ਸ ਅਤ੍ਥਙ੍ਗਮੋ. ਯੋ ਸੋਤਸ੍ਸ ਨਿਰੋਧੋ…ਪੇ… ਯੋ ਘਾਨਸ੍ਸ ਨਿਰੋਧੋ… ਯੋ ਜਿਵ੍ਹਾਯ ਨਿਰੋਧੋ… ਯੋ ਕਾਯਸ੍ਸ ਨਿਰੋਧੋ… ਯੋ ਮਨਸ੍ਸ ਨਿਰੋਧੋ ਵੂਪਸਮੋ ਅਤ੍ਥਙ੍ਗਮੋ, ਦੁਕ੍ਖਸ੍ਸੇਸੋ ਨਿਰੋਧੋ, ਰੋਗਾਨਂ ਵੂਪਸਮੋ, ਜਰਾਮਰਣਸ੍ਸ ਅਤ੍ਥਙ੍ਗਮੋ’’ਤਿ. ਪਠਮਂ.

੨. ਰੂਪਸੁਤ੍ਤਂ

੩੧੩. ਸਾਵਤ੍ਥਿਨਿਦਾਨਂ. ‘‘ਯੋ ਖੋ, ਭਿਕ੍ਖਵੇ, ਰੂਪਾਨਂ ਉਪ੍ਪਾਦੋ ਠਿਤਿ ਅਭਿਨਿਬ੍ਬਤ੍ਤਿ ਪਾਤੁਭਾਵੋ, ਦੁਕ੍ਖਸ੍ਸੇਸੋ ਉਪ੍ਪਾਦੋ, ਰੋਗਾਨਂ ਠਿਤਿ, ਜਰਾਮਰਣਸ੍ਸ ਪਾਤੁਭਾਵੋ. ਯੋ ਸਦ੍ਦਾਨਂ… ਯੋ ਗਨ੍ਧਾਨਂ… ਯੋ ਰਸਾਨਂ… ਯੋ ਫੋਟ੍ਠਬ੍ਬਾਨਂ… ਯੋ ਧਮ੍ਮਾਨਂ ਉਪ੍ਪਾਦੋ ਠਿਤਿ ਅਭਿਨਿਬ੍ਬਤ੍ਤਿ ਪਾਤੁਭਾਵੋ, ਦੁਕ੍ਖਸ੍ਸੇਸੋ ਉਪ੍ਪਾਦੋ, ਰੋਗਾਨਂ ਠਿਤਿ, ਜਰਾਮਰਣਸ੍ਸ ਪਾਤੁਭਾਵੋ. ਯੋ ਚ ਖੋ, ਭਿਕ੍ਖਵੇ, ਰੂਪਾਨਂ ਨਿਰੋਧੋ ਵੂਪਸਮੋ ਅਤ੍ਥਙ੍ਗਮੋ, ਦੁਕ੍ਖਸ੍ਸੇਸੋ ਨਿਰੋਧੋ, ਰੋਗਾਨਂ ਵੂਪਸਮੋ, ਜਰਾਮਰਣਸ੍ਸ ਅਤ੍ਥਙ੍ਗਮੋ. ਯੋ ਸਦ੍ਦਾਨਂ… ਯੋ ਗਨ੍ਧਾਨਂ… ਯੋ ਰਸਾਨਂ… ਯੋ ਫੋਟ੍ਠਬ੍ਬਾਨਂ… ਯੋ ਧਮ੍ਮਾਨਂ ਨਿਰੋਧੋ ਵੂਪਸਮੋ ਅਤ੍ਥਙ੍ਗਮੋ, ਦੁਕ੍ਖਸ੍ਸੇਸੋ ਨਿਰੋਧੋ, ਰੋਗਾਨਂ ਵੂਪਸਮੋ, ਜਰਾਮਰਣਸ੍ਸ ਅਤ੍ਥਙ੍ਗਮੋ’’ਤਿ. ਦੁਤਿਯਂ.

੩. ਵਿਞ੍ਞਾਣਸੁਤ੍ਤਂ

੩੧੪. ਸਾਵਤ੍ਥਿਨਿਦਾਨਂ. ‘‘ਯੋ ਖੋ, ਭਿਕ੍ਖਵੇ, ਚਕ੍ਖੁਵਿਞ੍ਞਾਣਸ੍ਸ ਉਪ੍ਪਾਦੋ ਠਿਤਿ…ਪੇ… ਜਰਾਮਰਣਸ੍ਸ ਪਾਤੁਭਾਵੋ…ਪੇ… ਯੋ ਮਨੋਵਿਞ੍ਞਾਣਸ੍ਸ ਉਪ੍ਪਾਦੋ ਠਿਤਿ…ਪੇ… ਜਰਾਮਰਣਸ੍ਸ ਪਾਤੁਭਾਵੋ. ਯੋ ਚ ਖੋ, ਭਿਕ੍ਖਵੇ, ਚਕ੍ਖੁਵਿਞ੍ਞਾਣਸ੍ਸ ਨਿਰੋਧੋ…ਪੇ… ਜਰਾਮਰਣਸ੍ਸ ਅਤ੍ਥਙ੍ਗਮੋ…ਪੇ… ਯੋ ਮਨੋਵਿਞ੍ਞਾਣਸ੍ਸ ਨਿਰੋਧੋ…ਪੇ… ਜਰਾਮਰਣਸ੍ਸ ਅਤ੍ਥਙ੍ਗਮੋ’’ਤਿ. ਤਤਿਯਂ.

੪. ਸਮ੍ਫਸ੍ਸਸੁਤ੍ਤਂ

੩੧੫. ਸਾਵਤ੍ਥਿਨਿਦਾਨਂ. ‘‘ਯੋ ਖੋ, ਭਿਕ੍ਖਵੇ, ਚਕ੍ਖੁਸਮ੍ਫਸ੍ਸਸ੍ਸ ਉਪ੍ਪਾਦੋ ਠਿਤਿ…ਪੇ… ਜਰਾਮਰਣਸ੍ਸ ਪਾਤੁਭਾਵੋ…ਪੇ… ਯੋ ਮਨੋਸਮ੍ਫਸ੍ਸਸ੍ਸ ਉਪ੍ਪਾਦੋ ਠਿਤਿ…ਪੇ… ਜਰਾਮਰਣਸ੍ਸ ਪਾਤੁਭਾਵੋ. ਯੋ ਚ ਖੋ, ਭਿਕ੍ਖਵੇ, ਚਕ੍ਖੁਸਮ੍ਫਸ੍ਸਸ੍ਸ ਨਿਰੋਧੋ…ਪੇ… ਜਰਾਮਰਣਸ੍ਸ ਅਤ੍ਥਙ੍ਗਮੋ…ਪੇ… ਯੋ ਮਨੋਸਮ੍ਫਸ੍ਸਸ੍ਸ ਨਿਰੋਧੋ…ਪੇ… ਜਰਾਮਰਣਸ੍ਸ ਅਤ੍ਥਙ੍ਗਮੋ’’ਤਿ. ਚਤੁਤ੍ਥਂ.

੫. ਸਮ੍ਫਸ੍ਸਜਸੁਤ੍ਤਂ

੩੧੬. ਸਾਵਤ੍ਥਿਨਿਦਾਨਂ. ‘‘ਯੋ ਖੋ, ਭਿਕ੍ਖਵੇ, ਚਕ੍ਖੁਸਮ੍ਫਸ੍ਸਜਾਯ ਵੇਦਨਾਯ ਉਪ੍ਪਾਦੋ ਠਿਤਿ…ਪੇ… ਜਰਾਮਰਣਸ੍ਸ ਪਾਤੁਭਾਵੋ…ਪੇ….

ਯੋ ਮਨੋਸਮ੍ਫਸ੍ਸਜਾਯ ਵੇਦਨਾਯ ਉਪ੍ਪਾਦੋ ਠਿਤਿ…ਪੇ… ਜਰਾਮਰਣਸ੍ਸ ਪਾਤੁਭਾਵੋ. ਯੋ ਚ ਖੋ, ਭਿਕ੍ਖਵੇ, ਚਕ੍ਖੁਸਮ੍ਫਸ੍ਸਜਾਯ ਵੇਦਨਾਯ ਨਿਰੋਧੋ ਵੂਪਸਮੋ…ਪੇ… ਜਰਾਮਰਣਸ੍ਸ ਅਤ੍ਥਙ੍ਗਮੋ…ਪੇ… ਯੋ ਮਨੋਸਮ੍ਫਸ੍ਸਜਾਯ ਵੇਦਨਾਯ ਨਿਰੋਧੋ ਵੂਪਸਮੋ ਅਤ੍ਥਙ੍ਗਮੋ, ਦੁਕ੍ਖਸ੍ਸੇਸੋ ਨਿਰੋਧੋ, ਰੋਗਾਨਂ ਵੂਪਸਮੋ, ਜਰਾਮਰਣਸ੍ਸ ਅਤ੍ਥਙ੍ਗਮੋ’’ਤਿ. ਪਞ੍ਚਮਂ.

੬. ਸਞ੍ਞਾਸੁਤ੍ਤਂ

੩੧੭. ਸਾਵਤ੍ਥਿਨਿਦਾਨਂ. ‘‘ਯੋ ਖੋ, ਭਿਕ੍ਖਵੇ, ਰੂਪਸਞ੍ਞਾਯ ਉਪ੍ਪਾਦੋ ਠਿਤਿ…ਪੇ… ਜਰਾਮਰਣਸ੍ਸ ਪਾਤੁਭਾਵੋ…ਪੇ… ਯੋ ਧਮ੍ਮਸਞ੍ਞਾਯ ਉਪ੍ਪਾਦੋ ਠਿਤਿ ਅਭਿਨਿਬ੍ਬਤ੍ਤਿ ਪਾਤੁਭਾਵੋ, ਦੁਕ੍ਖਸ੍ਸੇਸੋ ਉਪ੍ਪਾਦੋ, ਰੋਗਾਨਂ ਠਿਤਿ, ਜਰਾਮਰਣਸ੍ਸ ਪਾਤੁਭਾਵੋ. ਯੋ ਚ ਖੋ, ਭਿਕ੍ਖਵੇ, ਰੂਪਸਞ੍ਞਾਯ ਨਿਰੋਧੋ…ਪੇ… ਜਰਾਮਰਣਸ੍ਸ ਅਤ੍ਥਙ੍ਗਮੋ…ਪੇ… ਯੋ ਧਮ੍ਮਸਞ੍ਞਾਯ ਨਿਰੋਧੋ ਵੂਪਸਮੋ ਅਤ੍ਥਙ੍ਗਮੋ, ਦੁਕ੍ਖਸ੍ਸੇਸੋ ਨਿਰੋਧੋ, ਰੋਗਾਨਂ ਵੂਪਸਮੋ, ਜਰਾਮਰਣਸ੍ਸ ਅਤ੍ਥਙ੍ਗਮੋ’’ਤਿ. ਛਟ੍ਠਂ.

੭. ਸਞ੍ਚੇਤਨਾਸੁਤ੍ਤਂ

੩੧੮. ਸਾਵਤ੍ਥਿਨਿਦਾਨਂ. ‘‘ਯੋ ਖੋ, ਭਿਕ੍ਖਵੇ, ਰੂਪਸਞ੍ਚੇਤਨਾਯ ਉਪ੍ਪਾਦੋ ਠਿਤਿ…ਪੇ… ਜਰਾਮਰਣਸ੍ਸ ਪਾਤੁਭਾਵੋ…ਪੇ… ਯੋ ਧਮ੍ਮਸਞ੍ਚੇਤਨਾਯ ਉਪ੍ਪਾਦੋ ਠਿਤਿ ਅਭਿਨਿਬ੍ਬਤ੍ਤਿ ਪਾਤੁਭਾਵੋ, ਦੁਕ੍ਖਸ੍ਸੇਸੋ ਉਪ੍ਪਾਦੋ, ਰੋਗਾਨਂ ਠਿਤਿ, ਜਰਾਮਰਣਸ੍ਸ ਪਾਤੁਭਾਵੋ. ਯੋ ਚ ਖੋ, ਭਿਕ੍ਖਵੇ, ਰੂਪਸਞ੍ਚੇਤਨਾਯ ਨਿਰੋਧੋ…ਪੇ… ਜਰਾਮਰਣਸ੍ਸ ਅਤ੍ਥਙ੍ਗਮੋ…ਪੇ… ਯੋ ਧਮ੍ਮਸਞ੍ਚੇਤਨਾਯ ਨਿਰੋਧੋ ਵੂਪਸਮੋ ਅਤ੍ਥਙ੍ਗਮੋ, ਦੁਕ੍ਖਸ੍ਸੇਸੋ ਨਿਰੋਧੋ, ਰੋਗਾਨਂ ਵੂਪਸਮੋ, ਜਰਾਮਰਣਸ੍ਸ ਅਤ੍ਥਙ੍ਗਮੋ’’ਤਿ. ਸਤ੍ਤਮਂ.

੮. ਤਣ੍ਹਾਸੁਤ੍ਤਂ

੩੧੯. ਸਾਵਤ੍ਥਿਨਿਦਾਨਂ. ‘‘ਯੋ ਖੋ, ਭਿਕ੍ਖਵੇ, ਰੂਪਤਣ੍ਹਾਯ ਉਪ੍ਪਾਦੋ ਠਿਤਿ…ਪੇ… ਜਰਾਮਰਣਸ੍ਸ ਪਾਤੁਭਾਵੋ…ਪੇ… ਯੋ ਧਮ੍ਮਤਣ੍ਹਾਯ ਉਪ੍ਪਾਦੋ ਠਿਤਿ ਅਭਿਨਿਬ੍ਬਤ੍ਤਿ ਪਾਤੁਭਾਵੋ, ਦੁਕ੍ਖਸ੍ਸੇਸੋ ਉਪ੍ਪਾਦੋ, ਰੋਗਾਨਂ ਠਿਤਿ, ਜਰਾਮਰਣਸ੍ਸ ਪਾਤੁਭਾਵੋ. ਯੋ ਚ ਖੋ, ਭਿਕ੍ਖਵੇ, ਰੂਪਤਣ੍ਹਾਯ ਨਿਰੋਧੋ…ਪੇ… ਜਰਾਮਰਣਸ੍ਸ ਅਤ੍ਥਙ੍ਗਮੋ…ਪੇ… ਯੋ ਧਮ੍ਮਤਣ੍ਹਾਯ ਨਿਰੋਧੋ ਵੂਪਸਮੋ ਅਤ੍ਥਙ੍ਗਮੋ, ਦੁਕ੍ਖਸ੍ਸੇਸੋ ਨਿਰੋਧੋ, ਰੋਗਾਨਂ ਵੂਪਸਮੋ, ਜਰਾਮਰਣਸ੍ਸ ਅਤ੍ਥਙ੍ਗਮੋ’’ਤਿ. ਅਟ੍ਠਮਂ.

੯. ਧਾਤੁਸੁਤ੍ਤਂ

੩੨੦. ਸਾਵਤ੍ਥਿਨਿਦਾਨਂ. ‘‘ਯੋ ਖੋ, ਭਿਕ੍ਖਵੇ, ਪਥਵੀਧਾਤੁਯਾ ਉਪ੍ਪਾਦੋ ਠਿਤਿ ਅਭਿਨਿਬ੍ਬਤ੍ਤਿ ਪਾਤੁਭਾਵੋ…ਪੇ… ਜਰਾਮਰਣਸ੍ਸ ਪਾਤੁਭਾਵੋ; ਯੋ ਆਪੋਧਾਤੁਯਾ… ਯੋ ਤੇਜੋਧਾਤੁਯਾ… ਯੋ ਵਾਯੋਧਾਤੁਯਾ… ਯੋ ਆਕਾਸਧਾਤੁਯਾ… ਯੋ ਵਿਞ੍ਞਾਣਧਾਤੁਯਾ ਉਪ੍ਪਾਦੋ ਠਿਤਿ ਅਭਿਨਿਬ੍ਬਤ੍ਤਿ ਪਾਤੁਭਾਵੋ, ਦੁਕ੍ਖਸ੍ਸੇਸੋ ਉਪ੍ਪਾਦੋ, ਰੋਗਾਨਂ ਠਿਤਿ, ਜਰਾਮਰਣਸ੍ਸ ਪਾਤੁਭਾਵੋ. ਯੋ ਚ ਖੋ, ਭਿਕ੍ਖਵੇ, ਪਥਵੀਧਾਤੁਯਾ ਨਿਰੋਧੋ…ਪੇ… ਜਰਾਮਰਣਸ੍ਸ ਅਤ੍ਥਙ੍ਗਮੋ; ਯੋ ਆਪੋਧਾਤੁਯਾ ਨਿਰੋਧੋ… ਯੋ ਤੇਜੋਧਾਤੁਯਾ ਨਿਰੋਧੋ… ਯੋ ਵਾਯੋਧਾਤੁਯਾ ਨਿਰੋਧੋ… ਯੋ ਆਕਾਸਧਾਤੁਯਾ ਨਿਰੋਧੋ… ਯੋ ਵਿਞ੍ਞਾਣਧਾਤੁਯਾ ਨਿਰੋਧੋ ਵੂਪਸਮੋ ਅਤ੍ਥਙ੍ਗਮੋ, ਦੁਕ੍ਖਸ੍ਸੇਸੋ ਨਿਰੋਧੋ, ਰੋਗਾਨਂ ਵੂਪਸਮੋ, ਜਰਾਮਰਣਸ੍ਸ ਅਤ੍ਥਙ੍ਗਮੋ’’ਤਿ. ਨਵਮਂ.

੧੦. ਖਨ੍ਧਸੁਤ੍ਤਂ

੩੨੧. ਸਾਵਤ੍ਥਿਨਿਦਾਨਂ. ‘‘ਯੋ ਖੋ, ਭਿਕ੍ਖਵੇ, ਰੂਪਸ੍ਸ ਉਪ੍ਪਾਦੋ ਠਿਤਿ ਅਭਿਨਿਬ੍ਬਤ੍ਤਿ ਪਾਤੁਭਾਵੋ, ਦੁਕ੍ਖਸ੍ਸੇਸੋ ਉਪ੍ਪਾਦੋ, ਰੋਗਾਨਂ ਠਿਤਿ, ਜਰਾਮਰਣਸ੍ਸ ਪਾਤੁਭਾਵੋ. ਯੋ ਵੇਦਨਾਯ… ਯੋ ਸਞ੍ਞਾਯ… ਯੋ ਸਙ੍ਖਾਰਾਨਂ… ਯੋ ਵਿਞ੍ਞਾਣਸ੍ਸ ਉਪ੍ਪਾਦੋ ਠਿਤਿ ਅਭਿਨਿਬ੍ਬਤ੍ਤਿ ਪਾਤੁਭਾਵੋ, ਦੁਕ੍ਖਸ੍ਸੇਸੋ ਉਪ੍ਪਾਦੋ, ਰੋਗਾਨਂ ਠਿਤਿ, ਜਰਾਮਰਣਸ੍ਸ ਪਾਤੁਭਾਵੋ. ਯੋ ਚ ਖੋ, ਭਿਕ੍ਖਵੇ, ਰੂਪਸ੍ਸ ਨਿਰੋਧੋ ਵੂਪਸਮੋ ਅਤ੍ਥਙ੍ਗਮੋ, ਦੁਕ੍ਖਸ੍ਸੇਸੋ ਨਿਰੋਧੋ, ਰੋਗਾਨਂ ਵੂਪਸਮੋ, ਜਰਾਮਰਣਸ੍ਸ ਅਤ੍ਥਙ੍ਗਮੋ. ਯੋ ਵੇਦਨਾਯ… ਯੋ ਸਞ੍ਞਾਯ… ਯੋ ਸਙ੍ਖਾਰਾਨਂ… ਯੋ ਵਿਞ੍ਞਾਣਸ੍ਸ ਨਿਰੋਧੋ ਵੂਪਸਮੋ ਅਤ੍ਥਙ੍ਗਮੋ, ਦੁਕ੍ਖਸ੍ਸੇਸੋ ਨਿਰੋਧੋ, ਰੋਗਾਨਂ ਵੂਪਸਮੋ, ਜਰਾਮਰਣਸ੍ਸ ਅਤ੍ਥਙ੍ਗਮੋ’’ਤਿ. ਦਸਮਂ.

ਉਪ੍ਪਾਦਸਂਯੁਤ੍ਤਂ ਸਮਤ੍ਤਂ.