੪. ਓਕ੍ਕਨ੍ਤਸਂਯੁਤ੍ਤਂ

੧. ਚਕ੍ਖੁਸੁਤ੍ਤਂ

੩੦੨. ਸਾਵਤ੍ਥਿਨਿਦਾਨਂ. ‘‘ਚਕ੍ਖੁਂ, ਭਿਕ੍ਖਵੇ, ਅਨਿਚ੍ਚਂ ਵਿਪਰਿਣਾਮਿ ਅਞ੍ਞਥਾਭਾਵਿ; ਸੋਤਂ ਅਨਿਚ੍ਚਂ ਵਿਪਰਿਣਾਮਿ ਅਞ੍ਞਥਾਭਾਵਿ; ਘਾਨਂ ਅਨਿਚ੍ਚਂ ਵਿਪਰਿਣਾਮਿ ਅਞ੍ਞਥਾਭਾਵਿ; ਜਿਵ੍ਹਾ ਅਨਿਚ੍ਚਾ ਵਿਪਰਿਣਾਮੀ ਅਞ੍ਞਥਾਭਾਵੀ [ਵਿਪਰਿਣਾਮਿਨੀ ਅਞ੍ਞਥਾਭਾਵਿਨੀ (?)]; ਕਾਯੋ ਅਨਿਚ੍ਚੋ ਵਿਪਰਿਣਾਮੀ ਅਞ੍ਞਥਾਭਾਵੀ; ਮਨੋ ਅਨਿਚ੍ਚੋ ਵਿਪਰਿਣਾਮੀ ਅਞ੍ਞਥਾਭਾਵੀ. ਯੋ, ਭਿਕ੍ਖਵੇ, ਇਮੇ ਧਮ੍ਮੇ ਏਵਂ ਸਦ੍ਦਹਤਿ ਅਧਿਮੁਚ੍ਚਤਿ – ਅਯਂ ਵੁਚ੍ਚਤਿ ਸਦ੍ਧਾਨੁਸਾਰੀ, ਓਕ੍ਕਨ੍ਤੋ ਸਮ੍ਮਤ੍ਤਨਿਯਾਮਂ, ਸਪ੍ਪੁਰਿਸਭੂਮਿਂ ਓਕ੍ਕਨ੍ਤੋ, ਵੀਤਿਵਤ੍ਤੋ ਪੁਥੁਜ੍ਜਨਭੂਮਿਂ; ਅਭਬ੍ਬੋ ਤਂ ਕਮ੍ਮਂ ਕਾਤੁਂ, ਯਂ ਕਮ੍ਮਂ ਕਤ੍ਵਾ ਨਿਰਯਂ ਵਾ ਤਿਰਚ੍ਛਾਨਯੋਨਿਂ ਵਾ ਪੇਤ੍ਤਿਵਿਸਯਂ ਵਾ ਉਪਪਜ੍ਜੇਯ੍ਯ; ਅਭਬ੍ਬੋ ਚ [ਅਭਬ੍ਬੋਵ (ਸੀ. ਸ੍ਯਾ. ਕਂ.)] ਤਾਵ ਕਾਲਂ ਕਾਤੁਂ ਯਾਵ ਨ ਸੋਤਾਪਤ੍ਤਿਫਲਂ ਸਚ੍ਛਿਕਰੋਤਿ’’.

‘‘ਯਸ੍ਸ ਖੋ, ਭਿਕ੍ਖਵੇ, ਇਮੇ ਧਮ੍ਮਾ ਏਵਂ ਪਞ੍ਞਾਯ ਮਤ੍ਤਸੋ ਨਿਜ੍ਝਾਨਂ ਖਮਨ੍ਤਿ, ਅਯਂ ਵੁਚ੍ਚਤਿ – ‘ਧਮ੍ਮਾਨੁਸਾਰੀ, ਓਕ੍ਕਨ੍ਤੋ ਸਮ੍ਮਤ੍ਤਨਿਯਾਮਂ, ਸਪ੍ਪੁਰਿਸਭੂਮਿਂ ਓਕ੍ਕਨ੍ਤੋ, ਵੀਤਿਵਤ੍ਤੋ ਪੁਥੁਜ੍ਜਨਭੂਮਿਂ; ਅਭਬ੍ਬੋ ਤਂ ਕਮ੍ਮਂ ਕਾਤੁਂ, ਯਂ ਕਮ੍ਮਂ ਕਤ੍ਵਾ ਨਿਰਯਂ ਵਾ ਤਿਰਚ੍ਛਾਨਯੋਨਿਂ ਵਾ ਪੇਤ੍ਤਿਵਿਸਯਂ ਵਾ ਉਪਪਜ੍ਜੇਯ੍ਯ; ਅਭਬ੍ਬੋ ਚ ਤਾਵ ਕਾਲਂ ਕਾਤੁਂ ਯਾਵ ਨ ਸੋਤਾਪਤ੍ਤਿਫਲਂ ਸਚ੍ਛਿਕਰੋਤਿ’. ਯੋ, ਭਿਕ੍ਖਵੇ, ਇਮੇ ਧਮ੍ਮੇ ਏਵਂ ਪਜਾਨਾਤਿ ਏਵਂ ਪਸ੍ਸਤਿ, ਅਯਂ ਵੁਚ੍ਚਤਿ – ‘ਸੋਤਾਪਨ੍ਨੋ ਅਵਿਨਿਪਾਤਧਮ੍ਮੋ ਨਿਯਤੋ ਸਮ੍ਬੋਧਿਪਰਾਯਨੋ’’’ਤਿ. ਪਠਮਂ.

੨. ਰੂਪਸੁਤ੍ਤਂ

੩੦੩. ਸਾਵਤ੍ਥਿਨਿਦਾਨਂ. ‘‘ਰੂਪਾ, ਭਿਕ੍ਖਵੇ, ਅਨਿਚ੍ਚਾ ਵਿਪਰਿਣਾਮਿਨੋ ਅਞ੍ਞਥਾਭਾਵਿਨੋ; ਸਦ੍ਦਾ ਅਨਿਚ੍ਚਾ ਵਿਪਰਿਣਾਮਿਨੋ ਅਞ੍ਞਥਾਭਾਵਿਨੋ; ਗਨ੍ਧਾ ਅਨਿਚ੍ਚਾ ਵਿਪਰਿਣਾਮਿਨੋ ਅਞ੍ਞਥਾਭਾਵਿਨੋ; ਰਸਾ ਅਨਿਚ੍ਚਾ ਵਿਪਰਿਣਾਮਿਨੋ ਅਞ੍ਞਥਾਭਾਵਿਨੋ; ਫੋਟ੍ਠਬ੍ਬਾ ਅਨਿਚ੍ਚਾ ਵਿਪਰਿਣਾਮਿਨੋ ਅਞ੍ਞਥਾਭਾਵਿਨੋ; ਧਮ੍ਮਾ ਅਨਿਚ੍ਚਾ ਵਿਪਰਿਣਾਮਿਨੋ ਅਞ੍ਞਥਾਭਾਵਿਨੋ. ਯੋ, ਭਿਕ੍ਖਵੇ, ਇਮੇ ਧਮ੍ਮੇ ਏਵਂ ਸਦ੍ਦਹਤਿ ਅਧਿਮੁਚ੍ਚਤਿ, ਅਯਂ ਵੁਚ੍ਚਤਿ ਸਦ੍ਧਾਨੁਸਾਰੀ, ਓਕ੍ਕਨ੍ਤੋ ਸਮ੍ਮਤ੍ਤਨਿਯਾਮਂ, ਸਪ੍ਪੁਰਿਸਭੂਮਿਂ ਓਕ੍ਕਨ੍ਤੋ, ਵੀਤਿਵਤ੍ਤੋ ਪੁਥੁਜ੍ਜਨਭੂਮਿਂ; ਅਭਬ੍ਬੋ ਤਂ ਕਮ੍ਮਂ ਕਾਤੁਂ, ਯਂ ਕਮ੍ਮਂ ਕਤ੍ਵਾ ਨਿਰਯਂ ਵਾ ਤਿਰਚ੍ਛਾਨਯੋਨਿਂ ਵਾ ਪੇਤ੍ਤਿਵਿਸਯਂ ਵਾ ਉਪਪਜ੍ਜੇਯ੍ਯ; ਅਭਬ੍ਬੋ ਚ ਤਾਵ ਕਾਲਂ ਕਾਤੁਂ ਯਾਵ ਨ ਸੋਤਾਪਤ੍ਤਿਫਲਂ ਸਚ੍ਛਿਕਰੋਤਿ’’.

‘‘ਯਸ੍ਸ ਖੋ, ਭਿਕ੍ਖਵੇ, ਇਮੇ ਧਮ੍ਮਾ ਏਵਂ ਪਞ੍ਞਾਯ ਮਤ੍ਤਸੋ ਨਿਜ੍ਝਾਨਂ ਖਮਨ੍ਤਿ, ਅਯਂ ਵੁਚ੍ਚਤਿ – ‘ਧਮ੍ਮਾਨੁਸਾਰੀ, ਓਕ੍ਕਨ੍ਤੋ ਸਮ੍ਮਤ੍ਤਨਿਯਾਮਂ, ਸਪ੍ਪੁਰਿਸਭੂਮਿਂ ਓਕ੍ਕਨ੍ਤੋ, ਵੀਤਿਵਤ੍ਤੋ ਪੁਥੁਜ੍ਜਨਭੂਮਿਂ; ਅਭਬ੍ਬੋ ਤਂ ਕਮ੍ਮਂ ਕਾਤੁਂ, ਯਂ ਕਮ੍ਮਂ ਕਤ੍ਵਾ ਨਿਰਯਂ ਵਾ ਤਿਰਚ੍ਛਾਨਯੋਨਿਂ ਵਾ ਪੇਤ੍ਤਿਵਿਸਯਂ ਵਾ ਉਪਪਜ੍ਜੇਯ੍ਯ; ਅਭਬ੍ਬੋ ਚ ਤਾਵ ਕਾਲਂ ਕਾਤੁਂ ਯਾਵ ਨ ਸੋਤਾਪਤ੍ਤਿਫਲਂ ਸਚ੍ਛਿਕਰੋਤਿ’. ਯੋ, ਭਿਕ੍ਖਵੇ, ਇਮੇ ਧਮ੍ਮੇ ਏਵਂ ਪਜਾਨਾਤਿ ਏਵਂ ਪਸ੍ਸਤਿ, ਅਯਂ ਵੁਚ੍ਚਤਿ – ‘ਸੋਤਾਪਨ੍ਨੋ ਅਵਿਨਿਪਾਤਧਮ੍ਮੋ ਨਿਯਤੋ ਸਮ੍ਬੋਧਿਪਰਾਯਨੋ’’’ਤਿ. ਦੁਤਿਯਂ.

੩. ਵਿਞ੍ਞਾਣਸੁਤ੍ਤਂ

੩੦੪. ਸਾਵਤ੍ਥਿਨਿਦਾਨਂ. ‘‘ਚਕ੍ਖੁਵਿਞ੍ਞਾਣਂ, ਭਿਕ੍ਖਵੇ, ਅਨਿਚ੍ਚਂ ਵਿਪਰਿਣਾਮਿ ਅਞ੍ਞਥਾਭਾਵਿ; ਸੋਤਵਿਞ੍ਞਾਣਂ… ਘਾਨਵਿਞ੍ਞਾਣਂ… ਜਿਵ੍ਹਾਵਿਞ੍ਞਾਣਂ… ਕਾਯਵਿਞ੍ਞਾਣਂ… ਮਨੋਵਿਞ੍ਞਾਣਂ ਅਨਿਚ੍ਚਂ ਵਿਪਰਿਣਾਮਿ ਅਞ੍ਞਥਾਭਾਵਿ. ਯੋ ਭਿਕ੍ਖਵੇ…ਪੇ… ਸਮ੍ਬੋਧਿਪਰਾਯਨੋ’’ਤਿ. ਤਤਿਯਂ.

੪. ਸਮ੍ਫਸ੍ਸਸੁਤ੍ਤਂ

੩੦੫. ਸਾਵਤ੍ਥਿਨਿਦਾਨਂ. ‘‘ਚਕ੍ਖੁਸਮ੍ਫਸ੍ਸੋ, ਭਿਕ੍ਖਵੇ, ਅਨਿਚ੍ਚੋ ਵਿਪਰਿਣਾਮੀ ਅਞ੍ਞਥਾਭਾਵੀ; ਸੋਤਸਮ੍ਫਸ੍ਸੋ… ਘਾਨਸਮ੍ਫਸ੍ਸੋ… ਜਿਵ੍ਹਾਸਮ੍ਫਸ੍ਸੋ… ਕਾਯਸਮ੍ਫਸ੍ਸੋ… ਮਨੋਸਮ੍ਫਸ੍ਸੋ ਅਨਿਚ੍ਚੋ ਵਿਪਰਿਣਾਮੀ ਅਞ੍ਞਥਾਭਾਵੀ. ਯੋ, ਭਿਕ੍ਖਵੇ, ਇਮੇ ਧਮ੍ਮੇ ਏਵਂ ਸਦ੍ਦਹਤਿ ਅਧਿਮੁਚ੍ਚਤਿ, ਅਯਂ ਵੁਚ੍ਚਤਿ ‘ਸਦ੍ਧਾਨੁਸਾਰੀ…ਪੇ… ਸਮ੍ਬੋਧਿਪਰਾਯਨੋ’’’ਤਿ. ਚਤੁਤ੍ਥਂ.

੫. ਸਮ੍ਫਸ੍ਸਜਾਸੁਤ੍ਤਂ

੩੦੬. ਸਾਵਤ੍ਥਿਨਿਦਾਨਂ. ‘‘ਚਕ੍ਖੁਸਮ੍ਫਸ੍ਸਜਾ, ਭਿਕ੍ਖਵੇ, ਵੇਦਨਾ ਅਨਿਚ੍ਚਾ ਵਿਪਰਿਣਾਮੀ ਅਞ੍ਞਥਾਭਾਵੀ; ਸੋਤਸਮ੍ਫਸ੍ਸਜਾ ਵੇਦਨਾ…ਪੇ… ਘਾਨਸਮ੍ਫਸ੍ਸਜਾ ਵੇਦਨਾ…ਪੇ… ਜਿਵ੍ਹਾਸਮ੍ਫਸ੍ਸਜਾ ਵੇਦਨਾ…ਪੇ… ਕਾਯਸਮ੍ਫਸ੍ਸਜਾ ਵੇਦਨਾ…ਪੇ… ਮਨੋਸਮ੍ਫਸ੍ਸਜਾ ਵੇਦਨਾ ਅਨਿਚ੍ਚਾ ਵਿਪਰਿਣਾਮੀ ਅਞ੍ਞਥਾਭਾਵੀ. ਯੋ, ਭਿਕ੍ਖਵੇ, ਇਮੇ ਧਮ੍ਮੇ ਏਵਂ ਸਦ੍ਦਹਤਿ ਅਧਿਮੁਚ੍ਚਤਿ, ਅਯਂ ਵੁਚ੍ਚਤਿ ‘ਸਦ੍ਧਾਨੁਸਾਰੀ…ਪੇ… ਸਮ੍ਬੋਧਿਪਰਾਯਨੋ’’’ਤਿ. ਪਞ੍ਚਮਂ.

੬. ਰੂਪਸਞ੍ਞਾਸੁਤ੍ਤਂ

੩੦੭. ਸਾਵਤ੍ਥਿਨਿਦਾਨਂ. ‘‘ਰੂਪਸਞ੍ਞਾ, ਭਿਕ੍ਖਵੇ, ਅਨਿਚ੍ਚਾ ਵਿਪਰਿਣਾਮੀ ਅਞ੍ਞਥਾਭਾਵੀ; ਸਦ੍ਦਸਞ੍ਞਾ… ਗਨ੍ਧਸਞ੍ਞਾ… ਰਸਸਞ੍ਞਾ… ਫੋਟ੍ਠਬ੍ਬਸਞ੍ਞਾ… ਧਮ੍ਮਸਞ੍ਞਾ ਅਨਿਚ੍ਚਾ ਵਿਪਰਿਣਾਮੀ ਅਞ੍ਞਥਾਭਾਵੀ. ਯੋ, ਭਿਕ੍ਖਵੇ, ਇਮੇ ਧਮ੍ਮੇ ਏਵਂ ਸਦ੍ਦਹਤਿ ਅਧਿਮੁਚ੍ਚਤਿ, ਅਯਂ ਵੁਚ੍ਚਤਿ ‘ਸਦ੍ਧਾਨੁਸਾਰੀ…ਪੇ… ਸਮ੍ਬੋਧਿਪਰਾਯਨੋ’’’ਤਿ. ਛਟ੍ਠਂ.

੭. ਰੂਪਸਞ੍ਚੇਤਨਾਸੁਤ੍ਤਂ

੩੦੮. ਸਾਵਤ੍ਥਿਨਿਦਾਨਂ. ‘‘ਰੂਪਸਞ੍ਚੇਤਨਾ, ਭਿਕ੍ਖਵੇ, ਅਨਿਚ੍ਚਾ ਵਿਪਰਿਣਾਮੀ ਅਞ੍ਞਥਾਭਾਵੀ; ਸਦ੍ਦਸਞ੍ਚੇਤਨਾ… ਗਨ੍ਧਸਞ੍ਚੇਤਨਾ… ਰਸਸਞ੍ਚੇਤਨਾ… ਫੋਟ੍ਠਬ੍ਬਸਞ੍ਚੇਤਨਾ… ਧਮ੍ਮਸਞ੍ਚੇਤਨਾ ਅਨਿਚ੍ਚਾ ਵਿਪਰਿਣਾਮੀ ਅਞ੍ਞਥਾਭਾਵੀ. ਯੋ, ਭਿਕ੍ਖਵੇ, ਇਮੇ ਧਮ੍ਮੇ ਏਵਂ ਸਦ੍ਦਹਤਿ ਅਧਿਮੁਚ੍ਚਤਿ, ਅਯਂ ਵੁਚ੍ਚਤਿ ‘ਸਦ੍ਧਾਨੁਸਾਰੀ…ਪੇ… ਸਮ੍ਬੋਧਿਪਰਾਯਨੋ’’’ਤਿ. ਸਤ੍ਤਮਂ.

੮. ਰੂਪਤਣ੍ਹਾਸੁਤ੍ਤਂ

੩੦੯. ਸਾਵਤ੍ਥਿਨਿਦਾਨਂ. ‘‘ਰੂਪਤਣ੍ਹਾ, ਭਿਕ੍ਖਵੇ, ਅਨਿਚ੍ਚਾ ਵਿਪਰਿਣਾਮੀ ਅਞ੍ਞਥਾਭਾਵੀ; ਸਦ੍ਦਤਣ੍ਹਾ… ਗਨ੍ਧਤਣ੍ਹਾ… ਰਸਤਣ੍ਹਾ… ਫੋਟ੍ਠਬ੍ਬਤਣ੍ਹਾ… ਧਮ੍ਮਤਣ੍ਹਾ ਅਨਿਚ੍ਚਾ ਵਿਪਰਿਣਾਮੀ ਅਞ੍ਞਥਾਭਾਵੀ. ਯੋ, ਭਿਕ੍ਖਵੇ, ਇਮੇ ਧਮ੍ਮੇ ਏਵਂ ਸਦ੍ਦਹਤਿ ਅਧਿਮੁਚ੍ਚਤਿ, ਅਯਂ ਵੁਚ੍ਚਤਿ ‘ਸਦ੍ਧਾਨੁਸਾਰੀ…ਪੇ… ਸਮ੍ਬੋਧਿਪਰਾਯਨੋ’’’ਤਿ. ਅਟ੍ਠਮਂ.

੯. ਪਥਵੀਧਾਤੁਸੁਤ੍ਤਂ

੩੧੦. ਸਾਵਤ੍ਥਿਨਿਦਾਨਂ. ‘‘ਪਥਵੀਧਾਤੁ, ਭਿਕ੍ਖਵੇ, ਅਨਿਚ੍ਚਾ ਵਿਪਰਿਣਾਮੀ ਅਞ੍ਞਥਾਭਾਵੀ; ਆਪੋਧਾਤੁ… ਤੇਜੋਧਾਤੁ… ਵਾਯੋਧਾਤੁ… ਆਕਾਸਧਾਤੁ… ਵਿਞ੍ਞਾਣਧਾਤੁ ਅਨਿਚ੍ਚਾ ਵਿਪਰਿਣਾਮੀ ਅਞ੍ਞਥਾਭਾਵੀ. ਯੋ, ਭਿਕ੍ਖਵੇ, ਇਮੇ ਧਮ੍ਮੇ ਏਵਂ ਸਦ੍ਦਹਤਿ ਅਧਿਮੁਚ੍ਚਤਿ, ਅਯਂ ਵੁਚ੍ਚਤਿ ‘ਸਦ੍ਧਾਨੁਸਾਰੀ…ਪੇ… ਸਮ੍ਬੋਧਿਪਰਾਯਨੋ’’’ਤਿ. ਨਵਮਂ.

੧੦. ਖਨ੍ਧਸੁਤ੍ਤਂ

੩੧੧. ਸਾਵਤ੍ਥਿਨਿਦਾਨਂ. ‘‘ਰੂਪਂ, ਭਿਕ੍ਖਵੇ, ਅਨਿਚ੍ਚਂ ਵਿਪਰਿਣਾਮਿ ਅਞ੍ਞਥਾਭਾਵਿ; ਵੇਦਨਾ ਅਨਿਚ੍ਚਾ ਵਿਪਰਿਣਾਮੀ ਅਞ੍ਞਥਾਭਾਵੀ; ਸਞ੍ਞਾ… ਸਙ੍ਖਾਰਾ ਅਨਿਚ੍ਚਾ ਵਿਪਰਿਣਾਮਿਨੋ ਅਞ੍ਞਥਾਭਾਵਿਨੋ; ਵਿਞ੍ਞਾਣਂ ਅਨਿਚ੍ਚਂ ਵਿਪਰਿਣਾਮਿ ਅਞ੍ਞਥਾਭਾਵਿ. ਯੋ, ਭਿਕ੍ਖਵੇ, ਇਮੇ ਧਮ੍ਮੇ ਏਵਂ ਸਦ੍ਦਹਤਿ ਅਧਿਮੁਚ੍ਚਤਿ, ਅਯਂ ਵੁਚ੍ਚਤਿ ਸਦ੍ਧਾਨੁਸਾਰੀ, ਓਕ੍ਕਨ੍ਤੋ ਸਮ੍ਮਤ੍ਤਨਿਯਾਮਂ, ਸਪ੍ਪੁਰਿਸਭੂਮਿਂ ਓਕ੍ਕਨ੍ਤੋ, ਵੀਤਿਵਤ੍ਤੋ ਪੁਥੁਜ੍ਜਨਭੂਮਿਂ; ਅਭਬ੍ਬੋ ਤਂ ਕਮ੍ਮਂ ਕਾਤੁਂ, ਯਂ ਕਮ੍ਮਂ ਕਤ੍ਵਾ ਨਿਰਯਂ ਵਾ ਤਿਰਚ੍ਛਾਨਯੋਨਿਂ ਵਾ ਪੇਤ੍ਤਿਵਿਸਯਂ ਵਾ ਉਪਪਜ੍ਜੇਯ੍ਯ; ਅਭਬ੍ਬੋ ਚ ਤਾਵ ਕਾਲਂ ਕਾਤੁਂ ਯਾਵ ਨ ਸੋਤਾਪਤ੍ਤਿਫਲਂ ਸਚ੍ਛਿਕਰੋਤਿ’’.

‘‘ਯਸ੍ਸ ਖੋ, ਭਿਕ੍ਖਵੇ, ਇਮੇ ਧਮ੍ਮਾ ਏਵਂ ਪਞ੍ਞਾਯ ਮਤ੍ਤਸੋ ਨਿਜ੍ਝਾਨਂ ਖਮਨ੍ਤਿ, ਅਯਂ ਵੁਚ੍ਚਤਿ – ‘ਧਮ੍ਮਾਨੁਸਾਰੀ, ਓਕ੍ਕਨ੍ਤੋ ਸਮ੍ਮਤ੍ਤਨਿਯਾਮਂ, ਸਪ੍ਪੁਰਿਸਭੂਮਿਂ ਓਕ੍ਕਨ੍ਤੋ, ਵੀਤਿਵਤ੍ਤੋ ਪੁਥੁਜ੍ਜਨਭੂਮਿਂ; ਅਭਬ੍ਬੋ ਤਂ ਕਮ੍ਮਂ ਕਾਤੁਂ, ਯਂ ਕਮ੍ਮਂ ਕਤ੍ਵਾ ਨਿਰਯਂ ਵਾ ਤਿਰਚ੍ਛਾਨਯੋਨਿਂ ਵਾ ਪੇਤ੍ਤਿਵਿਸਯਂ ਵਾ ਉਪਪਜ੍ਜੇਯ੍ਯ; ਅਭਬ੍ਬੋ ਚ ਤਾਵ ਕਾਲਂ ਕਾਤੁਂ ਯਾਵ ਨ ਸੋਤਾਪਤ੍ਤਿਫਲਂ ਸਚ੍ਛਿਕਰੋਤਿ’. ਯੋ, ਭਿਕ੍ਖਵੇ, ਇਮੇ ਧਮ੍ਮੇ ਏਵਂ ਪਜਾਨਾਤਿ ਏਵਂ ਪਸ੍ਸਤਿ, ਅਯਂ ਵੁਚ੍ਚਤਿ – ‘ਸੋਤਾਪਨ੍ਨੋ ਅਵਿਨਿਪਾਤਧਮ੍ਮੋ ਨਿਯਤੋ ਸਮ੍ਬੋਧਿਪਰਾਯਨੋ’’’ਤਿ. ਦਸਮਂ.

ਓਕ੍ਕਨ੍ਤਸਂਯੁਤ੍ਤਂ [ਓਕ੍ਕਨ੍ਤਿਕਸਂਯੁਤ੍ਤਂ (ਪੀ. ਕ.)] ਸਮਤ੍ਤਂ.