੧੦. ਸਜ੍ਝਾਯਸੁਤ੍ਤਂ

੨੩੦. ਏਕਂ ਸਮਯਂ ਅਞ੍ਞਤਰੋ ਭਿਕ੍ਖੁ ਕੋਸਲੇਸੁ ਵਿਹਰਤਿ ਅਞ੍ਞਤਰਸ੍ਮਿਂ ਵਨਸਣ੍ਡੇ. ਤੇਨ ਖੋ ਪਨ ਸਮਯੇਨ ਸੋ ਭਿਕ੍ਖੁ ਯਂ ਸੁਦਂ ਪੁਬ੍ਬੇ ਅਤਿਵੇਲਂ ਸਜ੍ਝਾਯਬਹੁਲੋ ਵਿਹਰਤਿ ਸੋ ਅਪਰੇਨ ਸਮਯੇਨ ਅਪ੍ਪੋਸ੍ਸੁਕ੍ਕੋ ਤੁਣ੍ਹੀਭੂਤੋ ਸਙ੍ਕਸਾਯਤਿ. ਅਥ ਖੋ ਯਾ ਤਸ੍ਮਿਂ ਵਨਸਣ੍ਡੇ ਅਧਿਵਤ੍ਥਾ ਦੇਵਤਾ ਤਸ੍ਸ ਭਿਕ੍ਖੁਨੋ ਧਮ੍ਮਂ ਅਸੁਣਨ੍ਤੀ ਯੇਨ ਸੋ ਭਿਕ੍ਖੁ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਤਂ ਭਿਕ੍ਖੁਂ ਗਾਥਾਯ ਅਜ੍ਝਭਾਸਿ –

‘‘ਕਸ੍ਮਾ ਤੁਵਂ ਧਮ੍ਮਪਦਾਨਿ ਭਿਕ੍ਖੁ, ਨਾਧੀਯਸਿ ਭਿਕ੍ਖੂਹਿ ਸਂਵਸਨ੍ਤੋ;

ਸੁਤ੍ਵਾਨ ਧਮ੍ਮਂ ਲਭਤਿਪ੍ਪਸਾਦਂ, ਦਿਟ੍ਠੇਵ ਧਮ੍ਮੇ ਲਭਤਿਪ੍ਪਸਂਸ’’ਨ੍ਤਿ.

‘‘ਅਹੁ ਪੁਰੇ ਧਮ੍ਮਪਦੇਸੁ ਛਨ੍ਦੋ, ਯਾਵ ਵਿਰਾਗੇਨ ਸਮਾਗਮਿਮ੍ਹ;

ਯਤੋ ਵਿਰਾਗੇਨ ਸਮਾਗਮਿਮ੍ਹ, ਯਂ ਕਿਞ੍ਚਿ ਦਿਟ੍ਠਂਵ ਸੁਤਂ ਮੁਤਂ ਵਾ;

ਅਞ੍ਞਾਯ ਨਿਕ੍ਖੇਪਨਮਾਹੁ ਸਨ੍ਤੋ’’ਤਿ.