੭. ਨਵਕਮ੍ਮਿਕਸੁਤ੍ਤਂ

੨੦੩. ਏਕਂ ਸਮਯਂ ਭਗਵਾ ਕੋਸਲੇਸੁ ਵਿਹਰਤਿ ਅਞ੍ਞਤਰਸ੍ਮਿਂ ਵਨਸਣ੍ਡੇ. ਤੇਨ ਖੋ ਪਨ ਸਮਯੇਨ ਨਵਕਮ੍ਮਿਕਭਾਰਦ੍ਵਾਜੋ ਬ੍ਰਾਹ੍ਮਣੋ ਤਸ੍ਮਿਂ ਵਨਸਣ੍ਡੇ ਕਮ੍ਮਨ੍ਤਂ ਕਾਰਾਪੇਤਿ. ਅਦ੍ਦਸਾ ਖੋ ਨਵਕਮ੍ਮਿਕਭਾਰਦ੍ਵਾਜੋ ਬ੍ਰਾਹ੍ਮਣੋ ਭਗਵਨ੍ਤਂ ਅਞ੍ਞਤਰਸ੍ਮਿਂ ਸਾਲਰੁਕ੍ਖਮੂਲੇ ਨਿਸਿਨ੍ਨਂ ਪਲ੍ਲਙ੍ਕਂ ਆਭੁਜਿਤ੍ਵਾ ਉਜੁਂ ਕਾਯਂ ਪਣਿਧਾਯ ਪਰਿਮੁਖਂ ਸਤਿਂ ਉਪਟ੍ਠਪੇਤ੍ਵਾ. ਦਿਸ੍ਵਾਨਸ੍ਸ ਏਤਦਹੋਸਿ – ‘‘ਅਹਂ ਖੋ ਇਮਸ੍ਮਿਂ ਵਨਸਣ੍ਡੇ ਕਮ੍ਮਨ੍ਤਂ ਕਾਰਾਪੇਨ੍ਤੋ ਰਮਾਮਿ. ਅਯਂ ਸਮਣੋ ਗੋਤਮੋ ਕਿਂ ਕਾਰਾਪੇਨ੍ਤੋ ਰਮਤੀ’’ਤਿ? ਅਥ ਖੋ ਨਵਕਮ੍ਮਿਕਭਾਰਦ੍ਵਾਜੋ ਬ੍ਰਾਹ੍ਮਣੋ ਯੇਨ ਭਗਵਾ ਤੇਨੁਪਸਙ੍ਕਮਿ. ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਗਾਥਾਯ ਅਜ੍ਝਭਾਸਿ –

‘‘ਕੇ ਨੁ ਕਮ੍ਮਨ੍ਤਾ ਕਰੀਯਨ੍ਤਿ, ਭਿਕ੍ਖੁ ਸਾਲਵਨੇ ਤਵ;

ਯਦੇਕਕੋ ਅਰਞ੍ਞਸ੍ਮਿਂ, ਰਤਿਂ ਵਿਨ੍ਦਤਿ ਗੋਤਮੋ’’ਤਿ.

‘‘ਨ ਮੇ ਵਨਸ੍ਮਿਂ ਕਰਣੀਯਮਤ੍ਥਿ,

ਉਚ੍ਛਿਨ੍ਨਮੂਲਂ ਮੇ ਵਨਂ ਵਿਸੂਕਂ;

ਸ੍ਵਾਹਂ ਵਨੇ ਨਿਬ੍ਬਨਥੋ ਵਿਸਲ੍ਲੋ,

ਏਕੋ ਰਮੇ ਅਰਤਿਂ ਵਿਪ੍ਪਹਾਯਾ’’ਤਿ.

ਏਵਂ ਵੁਤ੍ਤੇ, ਨਵਕਮ੍ਮਿਕਭਾਰਦ੍ਵਾਜੋ ਬ੍ਰਾਹ੍ਮਣੋ ਭਗਵਨ੍ਤਂ ਏਤਦਵੋਚ – ‘‘ਅਭਿਕ੍ਕਨ੍ਤਂ, ਭੋ ਗੋਤਮ…ਪੇ… ਉਪਾਸਕਂ ਮਂ ਭਵਂ ਗੋਤਮੋ ਧਾਰੇਤੁ ਅਜ੍ਜਤਗ੍ਗੇ ਪਾਣੁਪੇਤਂ ਸਰਣਂ ਗਤ’’ਨ੍ਤਿ.