੮. ਕਟ੍ਠਹਾਰਸੁਤ੍ਤਂ

੨੦੪. ਏਕਂ ਸਮਯਂ ਭਗਵਾ ਕੋਸਲੇਸੁ ਵਿਹਰਤਿ ਅਞ੍ਞਤਰਸ੍ਮਿਂ ਵਨਸਣ੍ਡੇ. ਤੇਨ ਖੋ ਪਨ ਸਮਯੇਨ ਅਞ੍ਞਤਰਸ੍ਸ ਭਾਰਦ੍ਵਾਜਗੋਤ੍ਤਸ੍ਸ ਬ੍ਰਾਹ੍ਮਣਸ੍ਸ ਸਮ੍ਬਹੁਲਾ ਅਨ੍ਤੇਵਾਸਿਕਾ ਕਟ੍ਠਹਾਰਕਾ ਮਾਣਵਕਾ ਯੇਨ ਵਨਸਣ੍ਡੋ ਤੇਨੁਪਸਙ੍ਕਮਿਂਸੁ; ਉਪਸਙ੍ਕਮਿਤ੍ਵਾ ਅਦ੍ਦਸਂਸੁ ਭਗਵਨ੍ਤਂ ਤਸ੍ਮਿਂ ਵਨਸਣ੍ਡੇ ਨਿਸਿਨ੍ਨਂ ਪਲ੍ਲਙ੍ਕਂ ਆਭੁਜਿਤ੍ਵਾ ਉਜੁਂ ਕਾਯਂ ਪਣਿਧਾਯ ਪਰਿਮੁਖਂ ਸਤਿਂ ਉਪਟ੍ਠਪੇਤ੍ਵਾ. ਦਿਸ੍ਵਾਨ ਯੇਨ ਭਾਰਦ੍ਵਾਜਗੋਤ੍ਤੋ ਬ੍ਰਾਹ੍ਮਣੋ ਤੇਨੁਪਸਙ੍ਕਮਿਂਸੁ; ਉਪਸਙ੍ਕਮਿਤ੍ਵਾ ਭਾਰਦ੍ਵਾਜਗੋਤ੍ਤਂ ਬ੍ਰਾਹ੍ਮਣਂ ਏਤਦਵੋਚੁਂ – ‘‘ਯਗ੍ਘੇ, ਭਵਂ ਜਾਨੇਯ੍ਯਾਸਿ! ਅਸੁਕਸ੍ਮਿਂ ਵਨਸਣ੍ਡੇ ਸਮਣੋ ਨਿਸਿਨ੍ਨੋ ਪਲ੍ਲਙ੍ਕਂ ਆਭੁਜਿਤ੍ਵਾ ਉਜੁਂ ਕਾਯਂ ਪਣਿਧਾਯ ਪਰਿਮੁਖਂ ਸਤਿਂ ਉਪਟ੍ਠਪੇਤ੍ਵਾ’’. ਅਥ ਖੋ ਭਾਰਦ੍ਵਾਜਗੋਤ੍ਤੋ ਬ੍ਰਾਹ੍ਮਣੋ ਤੇਹਿ ਮਾਣਵਕੇਹਿ ਸਦ੍ਧਿਂ ਯੇਨ ਸੋ ਵਨਸਣ੍ਡੋ ਤੇਨੁਪਸਙ੍ਕਮਿ. ਅਦ੍ਦਸਾ ਖੋ ਭਗਵਨ੍ਤਂ ਤਸ੍ਮਿਂ ਵਨਸਣ੍ਡੇ ਨਿਸਿਨ੍ਨਂ ਪਲ੍ਲਙ੍ਕਂ ਆਭੁਜਿਤ੍ਵਾ ਉਜੁਂ ਕਾਯਂ ਪਣਿਧਾਯ ਪਰਿਮੁਖਂ ਸਤਿਂ ਉਪਟ੍ਠਪੇਤ੍ਵਾ. ਦਿਸ੍ਵਾਨ ਯੇਨ ਭਗਵਾ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਗਾਥਾਯ ਅਜ੍ਝਭਾਸਿ –

‘‘ਗਮ੍ਭੀਰਰੂਪੇ ਬਹੁਭੇਰਵੇ ਵਨੇ,

ਸੁਞ੍ਞਂ ਅਰਞ੍ਞਂ ਵਿਜਨਂ ਵਿਗਾਹਿਯ;

ਅਨਿਞ੍ਜਮਾਨੇਨ ਠਿਤੇਨ ਵਗ੍ਗੁਨਾ,

ਸੁਚਾਰੁਰੂਪਂ ਵਤ ਭਿਕ੍ਖੁ ਝਾਯਸਿ.

‘‘ਨ ਯਤ੍ਥ ਗੀਤਂ ਨਪਿ ਯਤ੍ਥ ਵਾਦਿਤਂ,

ਏਕੋ ਅਰਞ੍ਞੇ ਵਨਵਸ੍ਸਿਤੋ ਮੁਨਿ;

ਅਚ੍ਛੇਰਰੂਪਂ ਪਟਿਭਾਤਿ ਮਂ ਇਦਂ,

ਯਦੇਕਕੋ ਪੀਤਿਮਨੋ ਵਨੇ ਵਸੇ.

‘‘ਮਞ੍ਞਾਮਹਂ ਲੋਕਾਧਿਪਤਿਸਹਬ੍ਯਤਂ,

ਆਕਙ੍ਖਮਾਨੋ ਤਿਦਿਵਂ ਅਨੁਤ੍ਤਰਂ;

ਕਸ੍ਮਾ ਭਵਂ ਵਿਜਨਮਰਞ੍ਞਮਸ੍ਸਿਤੋ,

ਤਪੋ ਇਧ ਕੁਬ੍ਬਸਿ ਬ੍ਰਹ੍ਮਪਤ੍ਤਿਯਾ’’ਤਿ.

‘‘ਯਾ ਕਾਚਿ ਕਙ੍ਖਾ ਅਭਿਨਨ੍ਦਨਾ ਵਾ,

ਅਨੇਕਧਾਤੂਸੁ ਪੁਥੂ ਸਦਾਸਿਤਾ;

ਅਞ੍ਞਾਣਮੂਲਪ੍ਪਭਵਾ ਪਜਪ੍ਪਿਤਾ,

ਸਬ੍ਬਾ ਮਯਾ ਬ੍ਯਨ੍ਤਿਕਤਾ ਸਮੂਲਿਕਾ.

‘‘ਸ੍ਵਾਹਂ ਅਕਙ੍ਖੋ ਅਸਿਤੋ ਅਨੂਪਯੋ,

ਸਬ੍ਬੇਸੁ ਧਮ੍ਮੇਸੁ ਵਿਸੁਦ੍ਧਦਸ੍ਸਨੋ;

ਪਪ੍ਪੁਯ੍ਯ ਸਮ੍ਬੋਧਿਮਨੁਤ੍ਤਰਂ ਸਿਵਂ,

ਝਾਯਾਮਹਂ ਬ੍ਰਹ੍ਮ ਰਹੋ ਵਿਸਾਰਦੋ’’ਤਿ.

ਏਵਂ ਵੁਤ੍ਤੇ, ਭਾਰਦ੍ਵਾਜਗੋਤ੍ਤੋ ਬ੍ਰਾਹ੍ਮਣੋ ਭਗਵਨ੍ਤਂ ਏਤਦਵੋਚ – ‘‘ਅਭਿਕ੍ਕਨ੍ਤਂ, ਭੋ ਗੋਤਮ ਅਭਿਕ੍ਕਨ੍ਤਂ, ਭੋ ਗੋਤਮ…ਪੇ… ਅਜ੍ਜਤਗ੍ਗੇ ਪਾਣੁਪੇਤਂ ਸਰਣਂ ਗਤ’’ਨ੍ਤਿ.