੬. ਪਚ੍ਚਨੀਕਸੁਤ੍ਤਂ

੨੦੨. ਸਾਵਤ੍ਥਿਨਿਦਾਨਂ. ਤੇਨ ਖੋ ਪਨ ਸਮਯੇਨ ਪਚ੍ਚਨੀਕਸਾਤੋ ਨਾਮ ਬ੍ਰਾਹ੍ਮਣੋ ਸਾਵਤ੍ਥਿਯਂ ਪਟਿਵਸਤਿ. ਅਥ ਖੋ ਪਚ੍ਚਨੀਕਸਾਤਸ੍ਸ ਬ੍ਰਾਹ੍ਮਣਸ੍ਸ ਏਤਦਹੋਸਿ – ‘‘ਯਂਨੂਨਾਹਂ ਯੇਨ ਸਮਣੋ ਗੋਤਮੋ ਤੇਨੁਪਸਙ੍ਕਮੇਯ੍ਯਂ. ਯਂ ਯਦੇਵ ਸਮਣੋ ਗੋਤਮੋ ਭਾਸਿਸ੍ਸਤਿ ਤਂ ਤਦੇਵਸ੍ਸਾਹਂ [ਤਦੇਵ ਸਾਹਂ (ਕ.)] ਪਚ੍ਚਨੀਕਾਸ੍ਸ’’ਨ੍ਤਿ [ਪਚ੍ਚਨੀਕਸ੍ਸਨ੍ਤਿ (ਪੀ.), ਪਚ੍ਚਨੀਕਸਾਤਨ੍ਤਿ (ਕ.)]. ਤੇਨ ਖੋ ਪਨ ਸਮਯੇਨ ਭਗਵਾ ਅਬ੍ਭੋਕਾਸੇ ਚਙ੍ਕਮਤਿ. ਅਥ ਖੋ ਪਚ੍ਚਨੀਕਸਾਤੋ ਬ੍ਰਾਹ੍ਮਣੋ ਯੇਨ ਭਗਵਾ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਚਙ੍ਕਮਨ੍ਤਂ ਏਤਦਵੋਚ – ‘ਭਣ ਸਮਣਧਮ੍ਮ’ਨ੍ਤਿ.

‘‘ਨ ਪਚ੍ਚਨੀਕਸਾਤੇਨ, ਸੁਵਿਜਾਨਂ ਸੁਭਾਸਿਤਂ;

ਉਪਕ੍ਕਿਲਿਟ੍ਠਚਿਤ੍ਤੇਨ, ਸਾਰਮ੍ਭਬਹੁਲੇਨ ਚ.

‘‘ਯੋ ਚ ਵਿਨੇਯ੍ਯ ਸਾਰਮ੍ਭਂ, ਅਪ੍ਪਸਾਦਞ੍ਚ ਚੇਤਸੋ;

ਆਘਾਤਂ ਪਟਿਨਿਸ੍ਸਜ੍ਜ, ਸ ਵੇ [ਸਚੇ (ਸ੍ਯਾ. ਕਂ. ਕ.)] ਜਞ੍ਞਾ ਸੁਭਾਸਿਤ’’ਨ੍ਤਿ.

ਏਵਂ ਵੁਤ੍ਤੇ, ਪਚ੍ਚਨੀਕਸਾਤੋ ਬ੍ਰਾਹ੍ਮਣੋ ਭਗਵਨ੍ਤਂ ਏਤਦਵੋਚ – ‘‘ਅਭਿਕ੍ਕਨ੍ਤਂ, ਭੋ ਗੋਤਮ, ਅਭਿਕ੍ਕਨ੍ਤਂ, ਭੋ ਗੋਤਮ…ਪੇ… ਉਪਾਸਕਂ ਮਂ ਭਵਂ ਗੋਤਮੋ ਧਾਰੇਤੁ ਅਜ੍ਜਤਗ੍ਗੇ ਪਾਣੁਪੇਤਂ ਸਰਣਂ ਗਤ’’ਨ੍ਤਿ.