੧੨. ਖੋਮਦੁਸ੍ਸਸੁਤ੍ਤਂ

੨੦੮. ਏਵਂ ਮੇ ਸੁਤਂ – ਏਕਂ ਸਮਯਂ ਭਗਵਾ ਸਕ੍ਕੇਸੁ ਵਿਹਰਤਿ ਖੋਮਦੁਸ੍ਸਂ ਨਾਮਂ ਸਕ੍ਯਾਨਂ ਨਿਗਮੋ. ਅਥ ਖੋ ਭਗਵਾ ਪੁਬ੍ਬਣ੍ਹਸਮਯਂ ਨਿਵਾਸੇਤ੍ਵਾ ਪਤ੍ਤਚੀਵਰਮਾਦਾਯ ਖੋਮਦੁਸ੍ਸਂ ਨਿਗਮਂ ਪਿਣ੍ਡਾਯ ਪਾਵਿਸਿ. ਤੇਨ ਖੋ ਪਨ ਸਮਯੇਨ ਖੋਮਦੁਸ੍ਸਕਾ ਬ੍ਰਾਹ੍ਮਣਗਹਪਤਿਕਾ ਸਭਾਯਂ ਸਨ੍ਨਿਪਤਿਤਾ ਹੋਨ੍ਤਿ ਕੇਨਚਿਦੇਵ ਕਰਣੀਯੇਨ, ਦੇਵੋ ਚ ਏਕਮੇਕਂ ਫੁਸਾਯਤਿ. ਅਥ ਖੋ ਭਗਵਾ ਯੇਨ ਸਾ ਸਭਾ ਤੇਨੁਪਸਙ੍ਕਮਿ. ਅਦ੍ਦਸਂਸੁ ਖੋਮਦੁਸ੍ਸਕਾ ਬ੍ਰਾਹ੍ਮਣਗਹਪਤਿਕਾ ਭਗਵਨ੍ਤਂ ਦੂਰਤੋਵ ਆਗਚ੍ਛਨ੍ਤਂ. ਦਿਸ੍ਵਾਨ ਏਤਦਵੋਚੁਂ – ‘‘ਕੇ ਚ ਮੁਣ੍ਡਕਾ ਸਮਣਕਾ, ਕੇ ਚ ਸਭਾਧਮ੍ਮਂ ਜਾਨਿਸ੍ਸਨ੍ਤੀ’’ਤਿ? ਅਥ ਖੋ ਭਗਵਾ ਖੋਮਦੁਸ੍ਸਕੇ ਬ੍ਰਾਹ੍ਮਣਗਹਪਤਿਕੇ ਗਾਥਾਯ ਅਜ੍ਝਭਾਸਿ –

‘‘ਨੇਸਾ ਸਭਾ ਯਤ੍ਥ ਨ ਸਨ੍ਤਿ ਸਨ੍ਤੋ,

ਸਨ੍ਤੋ ਨ ਤੇ ਯੇ ਨ ਵਦਨ੍ਤਿ ਧਮ੍ਮਂ;

ਰਾਗਞ੍ਚ ਦੋਸਞ੍ਚ ਪਹਾਯ ਮੋਹਂ,

ਧਮ੍ਮਂ ਵਦਨ੍ਤਾ ਚ ਭਵਨ੍ਤਿ ਸਨ੍ਤੋ’’ਤਿ.

ਏਵਂ ਵੁਤ੍ਤੇ, ਖੋਮਦੁਸ੍ਸਕਾ ਬ੍ਰਾਹ੍ਮਣਗਹਪਤਿਕਾ ਭਗਵਨ੍ਤਂ ਏਤਦਵੋਚੁਂ – ‘‘ਅਭਿਕ੍ਕਨ੍ਤਂ, ਭੋ ਗੋਤਮ, ਅਭਿਕ੍ਕਨ੍ਤਂ, ਭੋ ਗੋਤਮ; ਸੇਯ੍ਯਥਾਪਿ, ਭੋ ਗੋਤਮ, ਨਿਕ੍ਕੁਜ੍ਜਿਤਂ ਵਾ ਉਕ੍ਕੁਜ੍ਜੇਯ੍ਯ, ਪਟਿਚ੍ਛਨ੍ਨਂ ਵਾ ਵਿਵਰੇਯ੍ਯ, ਮੂਲ਼੍ਹਸ੍ਸ ਵਾ ਮਗ੍ਗਂ ਆਚਿਕ੍ਖੇਯ੍ਯ, ਅਨ੍ਧਕਾਰੇ ਵਾ ਤੇਲਪਜ੍ਜੋਤਂ ਧਾਰੇਯ੍ਯ – ਚਕ੍ਖੁਮਨ੍ਤੋ ਰੂਪਾਨਿ ਦਕ੍ਖਨ੍ਤੀਤਿ, ਏਵਮੇਵਂ ਭੋਤਾ ਗੋਤਮੇਨ ਅਨੇਕਪਰਿਯਾਯੇਨ ਧਮ੍ਮੋ ਪਕਾਸਿਤੋ. ਏਤੇ ਮਯਂ ਭਵਨ੍ਤਂ ਗੋਤਮਂ ਸਰਣਂ ਗਚ੍ਛਾਮ ਧਮ੍ਮਞ੍ਚ ਭਿਕ੍ਖੁਸਙ੍ਘਞ੍ਚ. ਉਪਾਸਕੇ ਨੋ ਭਵਂ ਗੋਤਮੋ ਧਾਰੇਤੁ ਅਜ੍ਜਤਗ੍ਗੇ ਪਾਣੁਪੇਤੇ ਸਰਣਂ ਗਤੇ’’ਤਿ.

ਉਪਾਸਕਵਗ੍ਗੋ ਦੁਤਿਯੋ.

ਤਸ੍ਸੁਦ੍ਦਾਨਂ –

ਕਸਿ ਉਦਯੋ ਦੇਵਹਿਤੋ, ਅਞ੍ਞਤਰਮਹਾਸਾਲਂ;

ਮਾਨਥਦ੍ਧਂ ਪਚ੍ਚਨੀਕਂ, ਨਵਕਮ੍ਮਿਕਕਟ੍ਠਹਾਰਂ;

ਮਾਤੁਪੋਸਕਂ ਭਿਕ੍ਖਕੋ, ਸਙ੍ਗਾਰਵੋ ਚ ਖੋਮਦੁਸ੍ਸੇਨ ਦ੍ਵਾਦਸਾਤਿ.

ਬ੍ਰਾਹ੍ਮਣਸਂਯੁਤ੍ਤਂ ਸਮਤ੍ਤਂ.