੫. ਉਪ੍ਪਲਵਣ੍ਣਾਸੁਤ੍ਤਂ

੧੬੬. ਸਾਵਤ੍ਥਿਨਿਦਾਨਂ. ਅਥ ਖੋ ਉਪ੍ਪਲਵਣ੍ਣਾ ਭਿਕ੍ਖੁਨੀ ਪੁਬ੍ਬਣ੍ਹਸਮਯਂ ਨਿਵਾਸੇਤ੍ਵਾ…ਪੇ… ਅਞ੍ਞਤਰਸ੍ਮਿਂ ਸੁਪੁਪ੍ਫਿਤਸਾਲਰੁਕ੍ਖਮੂਲੇ ਅਟ੍ਠਾਸਿ. ਅਥ ਖੋ ਮਾਰੋ ਪਾਪਿਮਾ ਉਪ੍ਪਲਵਣ੍ਣਾਯ ਭਿਕ੍ਖੁਨਿਯਾ ਭਯਂ ਛਮ੍ਭਿਤਤ੍ਤਂ ਲੋਮਹਂਸਂ ਉਪ੍ਪਾਦੇਤੁਕਾਮੋ ਸਮਾਧਿਮ੍ਹਾ ਚਾਵੇਤੁਕਾਮੋ ਯੇਨ ਉਪ੍ਪਲਵਣ੍ਣਾ ਭਿਕ੍ਖੁਨੀ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਉਪ੍ਪਲਵਣ੍ਣਂ ਭਿਕ੍ਖੁਨਿਂ ਗਾਥਾਯ ਅਜ੍ਝਭਾਸਿ –

‘‘ਸੁਪੁਪ੍ਫਿਤਗ੍ਗਂ ਉਪਗਮ੍ਮ ਭਿਕ੍ਖੁਨਿ,

ਏਕਾ ਤੁਵਂ ਤਿਟ੍ਠਸਿ ਸਾਲਮੂਲੇ;

ਨ ਚਤ੍ਥਿ ਤੇ ਦੁਤਿਯਾ ਵਣ੍ਣਧਾਤੁ,

ਬਾਲੇ ਨ ਤ੍ਵਂ ਭਾਯਸਿ ਧੁਤ੍ਤਕਾਨ’’ਨ੍ਤਿ.

ਅਥ ਖੋ ਉਪ੍ਪਲਵਣ੍ਣਾਯ ਭਿਕ੍ਖੁਨਿਯਾ ਏਤਦਹੋਸਿ – ‘‘ਕੋ ਨੁ ਖ੍ਵਾਯਂ ਮਨੁਸ੍ਸੋ ਵਾ ਅਮਨੁਸ੍ਸੋ ਵਾ ਗਾਥਂ ਭਾਸਤੀ’’ਤਿ? ਅਥ ਖੋ ਉਪ੍ਪਲਵਣ੍ਣਾਯ ਭਿਕ੍ਖੁਨਿਯਾ ਏਤਦਹੋਸਿ – ‘‘ਮਾਰੋ ਖੋ ਅਯਂ ਪਾਪਿਮਾ ਮਮ ਭਯਂ ਛਮ੍ਭਿਤਤ੍ਤਂ ਲੋਮਹਂਸਂ ਉਪ੍ਪਾਦੇਤੁਕਾਮੋ ਸਮਾਧਿਮ੍ਹਾ ਚਾਵੇਤੁਕਾਮੋ ਗਾਥਂ ਭਾਸਤੀ’’ਤਿ. ਅਥ ਖੋ ਉਪ੍ਪਲਵਣ੍ਣਾ ਭਿਕ੍ਖੁਨੀ ‘‘ਮਾਰੋ ਅਯਂ ਪਾਪਿਮਾ’’ ਇਤਿ ਵਿਦਿਤ੍ਵਾ ਮਾਰਂ ਪਾਪਿਮਨ੍ਤਂ ਗਾਥਾਹਿ ਪਚ੍ਚਭਾਸਿ –

‘‘ਸਤਂ ਸਹਸ੍ਸਾਨਿਪਿ ਧੁਤ੍ਤਕਾਨਂ,

ਇਧਾਗਤਾ ਤਾਦਿਸਕਾ ਭਵੇਯ੍ਯੁਂ;

ਲੋਮਂ ਨ ਇਞ੍ਜਾਮਿ ਨ ਸਨ੍ਤਸਾਮਿ,

ਨ ਮਾਰ ਭਾਯਾਮਿ ਤਮੇਕਿਕਾਪਿ.

‘‘ਏਸਾ ਅਨ੍ਤਰਧਾਯਾਮਿ, ਕੁਚ੍ਛਿਂ ਵਾ ਪਵਿਸਾਮਿ ਤੇ;

ਪਖੁਮਨ੍ਤਰਿਕਾਯਮ੍ਪਿ, ਤਿਟ੍ਠਨ੍ਤਿਂ ਮਂ ਨ ਦਕ੍ਖਸਿ.

‘‘ਚਿਤ੍ਤਸ੍ਮਿਂ ਵਸੀਭੂਤਾਮ੍ਹਿ, ਇਦ੍ਧਿਪਾਦਾ ਸੁਭਾਵਿਤਾ;

ਸਬ੍ਬਬਨ੍ਧਨਮੁਤ੍ਤਾਮ੍ਹਿ, ਨ ਤਂ ਭਾਯਾਮਿ ਆਵੁਸੋ’’ਤਿ.

ਅਥ ਖੋ ਮਾਰੋ ਪਾਪਿਮਾ ‘‘ਜਾਨਾਤਿ ਮਂ ਉਪ੍ਪਲਵਣ੍ਣਾ ਭਿਕ੍ਖੁਨੀ’’ਤਿ ਦੁਕ੍ਖੀ ਦੁਮ੍ਮਨੋ ਤਤ੍ਥੇਵਨ੍ਤਰਧਾਯੀਤਿ.