੨. ਦੁਤਿਯਵਗ੍ਗੋ

੧. ਪਾਸਾਣਸੁਤ੍ਤਂ

੧੪੭. ਏਕਂ ਸਮਯਂ ਭਗਵਾ ਰਾਜਗਹੇ ਵਿਹਰਤਿ ਗਿਜ੍ਝਕੂਟੇ ਪਬ੍ਬਤੇ. ਤੇਨ ਖੋ ਪਨ ਸਮਯੇਨ ਭਗਵਾ ਰਤ੍ਤਨ੍ਧਕਾਰਤਿਮਿਸਾਯਂ ਅਬ੍ਭੋਕਾਸੇ ਨਿਸਿਨ੍ਨੋ ਹੋਤਿ, ਦੇਵੋ ਚ ਏਕਮੇਕਂ ਫੁਸਾਯਤਿ. ਅਥ ਖੋ ਮਾਰੋ ਪਾਪਿਮਾ ਭਗਵਤੋ ਭਯਂ ਛਮ੍ਭਿਤਤ੍ਤਂ ਲੋਮਹਂਸਂ ਉਪ੍ਪਾਦੇਤੁਕਾਮੋ ਯੇਨ ਭਗਵਾ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਭਗਵਤੋ ਅਵਿਦੂਰੇ ਮਹਨ੍ਤੇ ਪਾਸਾਣੇ ਪਦਾਲੇਸਿ.

ਅਥ ਖੋ ਭਗਵਾ ‘‘ਮਾਰੋ ਅਯਂ ਪਾਪਿਮਾ’’ ਇਤਿ ਵਿਦਿਤ੍ਵਾ ਮਾਰਂ ਪਾਪਿਮਨ੍ਤਂ ਗਾਥਾਯ ਅਜ੍ਝਭਾਸਿ –

‘‘ਸਚੇਪਿ ਕੇਵਲਂ ਸਬ੍ਬਂ, ਗਿਜ੍ਝਕੂਟਂ ਚਲੇਸ੍ਸਸਿ [ਗਲ਼ੇਯ੍ਯਸਿ (ਸ੍ਯਾ. ਕਂ.), ਚਲੇਯ੍ਯਾਸਿ (ਕ.)];

ਨੇਵ ਸਮ੍ਮਾਵਿਮੁਤ੍ਤਾਨਂ, ਬੁਦ੍ਧਾਨਂ ਅਤ੍ਥਿ ਇਞ੍ਜਿਤ’’ਨ੍ਤਿ.

ਅਥ ਖੋ ਮਾਰੋ ਪਾਪਿਮਾ ‘‘ਜਾਨਾਤਿ ਮਂ ਭਗਵਾ, ਜਾਨਾਤਿ ਮਂ ਸੁਗਤੋ’’ਤਿ ਦੁਕ੍ਖੀ ਦੁਮ੍ਮਨੋ ਤਤ੍ਥੇਵਨ੍ਤਰਧਾਯੀਤਿ.

੨. ਕਿਨ੍ਨੁਸੀਹਸੁਤ੍ਤਂ

੧੪੮. ਏਕਂ ਸਮਯਂ ਭਗਵਾ ਸਾਵਤ੍ਥਿਯਂ ਵਿਹਰਤਿ ਜੇਤਵਨੇ ਅਨਾਥਪਿਣ੍ਡਿਕਸ੍ਸ ਆਰਾਮੇ. ਤੇਨ ਖੋ ਪਨ ਸਮਯੇਨ ਭਗਵਾ ਮਹਤਿਯਾ ਪਰਿਸਾਯ ਪਰਿਵੁਤੋ ਧਮ੍ਮਂ ਦੇਸੇਤਿ.

ਅਥ ਖੋ ਮਾਰਸ੍ਸ ਪਾਪਿਮਤੋ ਏਤਦਹੋਸਿ – ‘‘ਅਯਂ ਖੋ ਸਮਣੋ ਗੋਤਮੋ ਮਹਤਿਯਾ ਪਰਿਸਾਯ ਪਰਿਵੁਤੋ ਧਮ੍ਮਂ ਦੇਸੇਤਿ. ਯਂਨੂਨਾਹਂ ਯੇਨ ਸਮਣੋ ਗੋਤਮੋ ਤੇਨੁਪਸਙ੍ਕਮੇਯ੍ਯਂ ਵਿਚਕ੍ਖੁਕਮ੍ਮਾਯਾ’’ਤਿ. ਅਥ ਖੋ ਮਾਰੋ ਪਾਪਿਮਾ ਯੇਨ ਭਗਵਾ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਗਾਥਾਯ ਅਜ੍ਝਭਾਸਿ –

‘‘ਕਿਨ੍ਨੁ ਸੀਹੋਵ ਨਦਸਿ, ਪਰਿਸਾਯਂ ਵਿਸਾਰਦੋ;

ਪਟਿਮਲ੍ਲੋ ਹਿ ਤੇ ਅਤ੍ਥਿ, ਵਿਜਿਤਾਵੀ ਨੁ ਮਞ੍ਞਸੀ’’ਤਿ.

‘‘ਨਦਨ੍ਤਿ ਵੇ ਮਹਾਵੀਰਾ, ਪਰਿਸਾਸੁ ਵਿਸਾਰਦਾ;

ਤਥਾਗਤਾ ਬਲਪ੍ਪਤ੍ਤਾ, ਤਿਣ੍ਣਾ ਲੋਕੇ ਵਿਸਤ੍ਤਿਕ’’ਨ੍ਤਿ.

ਅਥ ਖੋ ਮਾਰੋ ਪਾਪਿਮਾ ‘‘ਜਾਨਾਤਿ ਮਂ ਭਗਵਾ, ਜਾਨਾਤਿ ਮਂ ਸੁਗਤੋ’’ਤਿ ਦੁਕ੍ਖੀ ਦੁਮ੍ਮਨੋ ਤਤ੍ਥੇਵਨ੍ਤਰਧਾਯੀਤਿ.

੩. ਸਕਲਿਕਸੁਤ੍ਤਂ

੧੪੯. ਏਵਂ ਮੇ ਸੁਤਂ – ਏਕਂ ਸਮਯਂ ਭਗਵਾ ਰਾਜਗਹੇ ਵਿਹਰਤਿ ਮਦ੍ਦਕੁਚ੍ਛਿਸ੍ਮਿਂ ਮਿਗਦਾਯੇ. ਤੇਨ ਖੋ ਪਨ ਸਮਯੇਨ ਭਗਵਤੋ ਪਾਦੋ ਸਕਲਿਕਾਯ ਖਤੋ ਹੋਤਿ, ਭੁਸਾ ਸੁਦਂ ਭਗਵਤੋ ਵੇਦਨਾ ਵਤ੍ਤਨ੍ਤਿ ਸਾਰੀਰਿਕਾ ਦੁਕ੍ਖਾ ਤਿਬ੍ਬਾ ਖਰਾ ਕਟੁਕਾ ਅਸਾਤਾ ਅਮਨਾਪਾ. ਤਾ ਸੁਦਂ ਭਗਵਾ ਸਤੋ ਸਮ੍ਪਜਾਨੋ ਅਧਿਵਾਸੇਤਿ ਅਵਿਹਞ੍ਞਮਾਨੋ. ਅਥ ਖੋ ਭਗਵਾ ਚਤੁਗ੍ਗੁਣਂ ਸਙ੍ਘਾਟਿਂ ਪਞ੍ਞਪੇਤ੍ਵਾ ਦਕ੍ਖਿਣੇਨ ਪਸ੍ਸੇਨ ਸੀਹਸੇਯ੍ਯਂ ਕਪ੍ਪੇਸਿ ਪਾਦੇ ਪਾਦਂ ਅਚ੍ਚਾਧਾਯ ਸਤੋ ਸਮ੍ਪਜਾਨੋ. ਅਥ ਖੋ ਮਾਰੋ ਪਾਪਿਮਾ ਯੇਨ ਭਗਵਾ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਗਾਥਾਯ ਅਜ੍ਝਭਾਸਿ –

‘‘ਮਨ੍ਦਿਯਾ ਨੁ ਖੋ ਸੇਸਿ ਉਦਾਹੁ ਕਾਵੇਯ੍ਯਮਤ੍ਤੋ,

ਅਤ੍ਥਾ ਨੁ ਤੇ ਸਮ੍ਪਚੁਰਾ ਨ ਸਨ੍ਤਿ;

ਏਕੋ ਵਿਵਿਤ੍ਤੇ ਸਯਨਾਸਨਮ੍ਹਿ,

ਨਿਦ੍ਦਾਮੁਖੋ ਕਿਮਿਦਂ ਸੋਪ੍ਪਸੇ ਵਾ’’ਤਿ.

‘‘ਨ ਮਨ੍ਦਿਯਾ ਸਯਾਮਿ ਨਾਪਿ ਕਾਵੇਯ੍ਯਮਤ੍ਤੋ,

ਅਤ੍ਥਂ ਸਮੇਚ੍ਚਾਹਮਪੇਤਸੋਕੋ;

ਏਕੋ ਵਿਵਿਤ੍ਤੇ ਸਯਨਾਸਨਮ੍ਹਿ,

ਸਯਾਮਹਂ ਸਬ੍ਬਭੂਤਾਨੁਕਮ੍ਪੀ.

‘‘ਯੇਸਮ੍ਪਿ ਸਲ੍ਲਂ ਉਰਸਿ ਪਵਿਟ੍ਠਂ,

ਮੁਹੁਂ ਮੁਹੁਂ ਹਦਯਂ ਵੇਧਮਾਨਂ;

ਤੇਪੀਧ ਸੋਪ੍ਪਂ ਲਭਰੇ ਸਸਲ੍ਲਾ,

ਤਸ੍ਮਾ ਅਹਂ ਨ ਸੁਪੇ ਵੀਤਸਲ੍ਲੋ.

‘‘ਜਗ੍ਗਂ ਨ ਸਙ੍ਕੇ ਨਪਿ ਭੇਮਿ ਸੋਤ੍ਤੁਂ,

ਰਤ੍ਤਿਨ੍ਦਿਵਾ ਨਾਨੁਤਪਨ੍ਤਿ ਮਾਮਂ;

ਹਾਨਿਂ ਨ ਪਸ੍ਸਾਮਿ ਕੁਹਿਞ੍ਚਿ ਲੋਕੇ,

ਤਸ੍ਮਾ ਸੁਪੇ ਸਬ੍ਬਭੂਤਾਨੁਕਮ੍ਪੀ’’ਤਿ.

ਅਥ ਖੋ ਮਾਰੋ ਪਾਪਿਮਾ ‘‘ਜਾਨਾਤਿ ਮਂ ਭਗਵਾ, ਜਾਨਾਤਿ ਮਂ ਸੁਗਤੋ’’ਤਿ ਦੁਕ੍ਖੀ ਦੁਮ੍ਮਨੋ ਤਤ੍ਥੇਵਨ੍ਤਰਧਾਯੀਤਿ.

੪. ਪਤਿਰੂਪਸੁਤ੍ਤਂ

੧੫੦. ਏਕਂ ਸਮਯਂ ਭਗਵਾ ਕੋਸਲੇਸੁ ਵਿਹਰਤਿ ਏਕਸਾਲਾਯਂ ਬ੍ਰਾਹ੍ਮਣਗਾਮੇ. ਤੇਨ ਖੋ ਪਨ ਸਮਯੇਨ ਭਗਵਾ ਮਹਤਿਯਾ ਗਿਹਿਪਰਿਸਾਯ ਪਰਿਵੁਤੋ ਧਮ੍ਮਂ ਦੇਸੇਤਿ.

ਅਥ ਖੋ ਮਾਰਸ੍ਸ ਪਾਪਿਮਤੋ ਏਤਦਹੋਸਿ – ‘‘ਅਯਂ ਖੋ ਸਮਣੋ ਗੋਤਮੋ ਮਹਤਿਯਾ ਗਿਹਿਪਰਿਸਾਯ ਪਰਿਵੁਤੋ ਧਮ੍ਮਂ ਦੇਸੇਤਿ. ਯਂਨੂਨਾਹਂ ਯੇਨ ਸਮਣੋ ਗੋਤਮੋ ਤੇਨੁਪਸਙ੍ਕਮੇਯ੍ਯਂ ਵਿਚਕ੍ਖੁਕਮ੍ਮਾਯਾ’’ਤਿ. ਅਥ ਖੋ ਮਾਰੋ ਪਾਪਿਮਾ ਯੇਨ ਭਗਵਾ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਗਾਥਾਯ ਅਜ੍ਝਭਾਸਿ –

‘‘ਨੇਤਂ ਤਵ ਪਤਿਰੂਪਂ, ਯਦਞ੍ਞਮਨੁਸਾਸਸਿ;

ਅਨੁਰੋਧਵਿਰੋਧੇਸੁ, ਮਾ ਸਜ੍ਜਿਤ੍ਥੋ ਤਦਾਚਰ’’ਨ੍ਤਿ.

‘‘ਹਿਤਾਨੁਕਮ੍ਪੀ ਸਮ੍ਬੁਦ੍ਧੋ, ਯਦਞ੍ਞਮਨੁਸਾਸਤਿ;

ਅਨੁਰੋਧਵਿਰੋਧੇਹਿ, ਵਿਪ੍ਪਮੁਤ੍ਤੋ ਤਥਾਗਤੋ’’ਤਿ.

ਅਥ ਖੋ ਮਾਰੋ ਪਾਪਿਮਾ ‘‘ਜਾਨਾਤਿ ਮਂ ਭਗਵਾ, ਜਾਨਾਤਿ ਮਂ ਸੁਗਤੋ’’ਤਿ ਦੁਕ੍ਖੀ ਦੁਮ੍ਮਨੋ ਤਤ੍ਥੇਵਨ੍ਤਰਧਾਯੀਤਿ.

੫. ਮਾਨਸਸੁਤ੍ਤਂ

੧੫੧. ਏਵਂ ਮੇ ਸੁਤਂ – ਏਕਂ ਸਮਯਂ ਭਗਵਾ ਸਾਵਤ੍ਥਿਯਂ ਵਿਹਰਤਿ ਜੇਤਵਨੇ ਅਨਾਥਪਿਣ੍ਡਿਕਸ੍ਸ ਆਰਾਮੇ. ਅਥ ਖੋ ਮਾਰੋ ਪਾਪਿਮਾ ਯੇਨ ਭਗਵਾ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਗਾਥਾਯ ਅਜ੍ਝਭਾਸਿ –

‘‘ਅਨ੍ਤਲਿਕ੍ਖਚਰੋ ਪਾਸੋ, ਯ੍ਵਾਯਂ ਚਰਤਿ ਮਾਨਸੋ;

ਤੇਨ ਤਂ ਬਾਧਯਿਸ੍ਸਾਮਿ, ਨ ਮੇ ਸਮਣ ਮੋਕ੍ਖਸੀ’’ਤਿ.

‘‘ਰੂਪਾ ਸਦ੍ਦਾ ਰਸਾ ਗਨ੍ਧਾ, ਫੋਟ੍ਠਬ੍ਬਾ ਚ ਮਨੋਰਮਾ;

ਏਤ੍ਥ ਮੇ ਵਿਗਤੋ ਛਨ੍ਦੋ, ਨਿਹਤੋ ਤ੍ਵਮਸਿ ਅਨ੍ਤਕਾ’’ਤਿ.

ਅਥ ਖੋ ਮਾਰੋ ਪਾਪਿਮਾ ‘‘ਜਾਨਾਤਿ ਮਂ ਭਗਵਾ, ਜਾਨਾਤਿ ਮਂ ਸੁਗਤੋ’’ਤਿ ਦੁਕ੍ਖੀ ਦੁਮ੍ਮਨੋ ਤਤ੍ਥੇਵਨ੍ਤਰਧਾਯੀਤਿ.

੬. ਪਤ੍ਤਸੁਤ੍ਤਂ

੧੫੨. ਸਾਵਤ੍ਥਿਨਿਦਾਨਂ. ਤੇਨ ਖੋ ਪਨ ਸਮਯੇਨ ਭਗਵਾ ਪਞ੍ਚਨ੍ਨਂ ਉਪਾਦਾਨਕ੍ਖਨ੍ਧਾਨਂ ਉਪਾਦਾਯ ਭਿਕ੍ਖੂਨਂ ਧਮ੍ਮਿਯਾ ਕਥਾਯ ਸਨ੍ਦਸ੍ਸੇਤਿ ਸਮਾਦਪੇਤਿ [ਸਮਾਦਾਪੇਤਿ (?)] ਸਮੁਤ੍ਤੇਜੇਤਿ ਸਮ੍ਪਹਂਸੇਤਿ. ਤੇ ਚ ਭਿਕ੍ਖੂ ਅਟ੍ਠਿਂ ਕਤ੍ਵਾ [ਅਟ੍ਠਿਕਤ੍ਵਾ (ਸੀ. ਸ੍ਯਾ. ਕਂ. ਪੀ.)] ਮਨਸਿ ਕਤ੍ਵਾ ਸਬ੍ਬਚੇਤਸਾ [ਸਬ੍ਬਚੇਤਸੋ (ਸੀ. ਸ੍ਯਾ. ਕਂ. ਪੀ.), ਸਬ੍ਬਂ ਚੇਤਸਾ (ਕ.)] ਸਮਨ੍ਨਾਹਰਿਤ੍ਵਾ ਓਹਿਤਸੋਤਾ ਧਮ੍ਮਂ ਸੁਣਨ੍ਤਿ.

ਅਥ ਖੋ ਮਾਰਸ੍ਸ ਪਾਪਿਮਤੋ ਏਤਦਹੋਸਿ – ‘‘ਅਯਂ ਖੋ ਸਮਣੋ ਗੋਤਮੋ ਪਞ੍ਚਨ੍ਨਂ ਉਪਾਦਾਨਕ੍ਖਨ੍ਧਾਨਂ ਉਪਾਦਾਯ ਭਿਕ੍ਖੂਨਂ ਧਮ੍ਮਿਯਾ ਕਥਾਯ ਸਨ੍ਦਸ੍ਸੇਤਿ ਸਮਾਦਪੇਤਿ ਸਮੁਤ੍ਤੇਜੇਤਿ ਸਮ੍ਪਹਂਸੇਤਿ. ਤੇ ਚ ਭਿਕ੍ਖੂ ਅਟ੍ਠਿਂ ਕਤ੍ਵਾ ਮਨਸਿ ਕਤ੍ਵਾ ਸਬ੍ਬਚੇਤਸਾ ਸਮਨ੍ਨਾਹਰਿਤ੍ਵਾ ਓਹਿਤਸੋਤਾ ਧਮ੍ਮਂ ਸੁਣਨ੍ਤਿ. ਯਂਨੂਨਾਹਂ ਯੇਨ ਸਮਣੋ ਗੋਤਮੋ ਤੇਨੁਪਸਙ੍ਕਮੇਯ੍ਯਂ ਵਿਚਕ੍ਖੁਕਮ੍ਮਾਯਾ’’ਤਿ.

ਤੇਨ ਖੋ ਪਨ ਸਮਯੇਨ ਸਮ੍ਬਹੁਲਾ ਪਤ੍ਤਾ ਅਬ੍ਭੋਕਾਸੇ ਨਿਕ੍ਖਿਤ੍ਤਾ ਹੋਨ੍ਤਿ. ਅਥ ਖੋ ਮਾਰੋ ਪਾਪਿਮਾ ਬਲੀਬਦ੍ਦਵਣ੍ਣਂ ਅਭਿਨਿਮ੍ਮਿਨਿਤ੍ਵਾ ਯੇਨ ਤੇ ਪਤ੍ਤਾ ਤੇਨੁਪਸਙ੍ਕਮਿ. ਅਥ ਖੋ ਅਞ੍ਞਤਰੋ ਭਿਕ੍ਖੁ ਅਞ੍ਞਤਰਂ ਭਿਕ੍ਖੁਂ ਏਤਦਵੋਚ – ‘‘ਭਿਕ੍ਖੁ, ਭਿਕ੍ਖੁ, ਏਸੋ ਬਲੀਬਦ੍ਦੋ ਪਤ੍ਤੇ ਭਿਨ੍ਦੇਯ੍ਯਾ’’ਤਿ. ਏਵਂ ਵੁਤ੍ਤੇ ਭਗਵਾ ਤਂ ਭਿਕ੍ਖੁਂ ਏਤਦਵੋਚ – ‘‘ਨ ਸੋ, ਭਿਕ੍ਖੁ, ਬਲੀਬਦ੍ਦੋ. ਮਾਰੋ ਏਸੋ ਪਾਪਿਮਾ ਤੁਮ੍ਹਾਕਂ ਵਿਚਕ੍ਖੁਕਮ੍ਮਾਯ ਆਗਤੋ’’ਤਿ. ਅਥ ਖੋ ਭਗਵਾ ‘‘ਮਾਰੋ ਅਯਂ ਪਾਪਿਮਾ’’ ਇਤਿ ਵਿਦਿਤ੍ਵਾ ਮਾਰਂ ਪਾਪਿਮਨ੍ਤਂ ਗਾਥਾਯ ਅਜ੍ਝਭਾਸਿ –

‘‘ਰੂਪਂ ਵੇਦਯਿਤਂ ਸਞ੍ਞਾ, ਵਿਞ੍ਞਾਣਂ ਯਞ੍ਚ ਸਙ੍ਖਤਂ;

ਨੇਸੋਹਮਸ੍ਮਿ ਨੇਤਂ ਮੇ, ਏਵਂ ਤਤ੍ਥ ਵਿਰਜ੍ਜਤਿ.

‘‘ਏਵਂ ਵਿਰਤ੍ਤਂ ਖੇਮਤ੍ਤਂ, ਸਬ੍ਬਸਂਯੋਜਨਾਤਿਗਂ;

ਅਨ੍ਵੇਸਂ ਸਬ੍ਬਟ੍ਠਾਨੇਸੁ, ਮਾਰਸੇਨਾਪਿ ਨਾਜ੍ਝਗਾ’’ਤਿ.

ਅਥ ਖੋ ਮਾਰੋ ਪਾਪਿਮਾ…ਪੇ… ਤਤ੍ਥੇਵਨ੍ਤਰਧਾਯੀਤਿ.

੭. ਛਫਸ੍ਸਾਯਤਨਸੁਤ੍ਤਂ

੧੫੩. ਏਕਂ ਸਮਯਂ ਭਗਵਾ ਵੇਸਾਲਿਯਂ ਵਿਹਰਤਿ ਮਹਾਵਨੇ ਕੂਟਾਗਾਰਸਾਲਾਯਂ. ਤੇਨ ਖੋ ਪਨ ਸਮਯੇਨ ਭਗਵਾ ਛਨ੍ਨਂ ਫਸ੍ਸਾਯਤਨਾਨਂ ਉਪਾਦਾਯ ਭਿਕ੍ਖੂਨਂ ਧਮ੍ਮਿਯਾ ਕਥਾਯ ਸਨ੍ਦਸ੍ਸੇਤਿ ਸਮਾਦਪੇਤਿ ਸਮੁਤ੍ਤੇਜੇਤਿ ਸਮ੍ਪਹਂਸੇਤਿ. ਤੇ ਚ ਭਿਕ੍ਖੂ ਅਟ੍ਠਿਂ ਕਤ੍ਵਾ ਮਨਸਿ ਕਤ੍ਵਾ ਸਬ੍ਬਚੇਤਸਾ ਸਮਨ੍ਨਾਹਰਿਤ੍ਵਾ ਓਹਿਤਸੋਤਾ ਧਮ੍ਮਂ ਸੁਣਨ੍ਤਿ.

ਅਥ ਖੋ ਮਾਰਸ੍ਸ ਪਾਪਿਮਤੋ ਏਤਦਹੋਸਿ – ‘‘ਅਯਂ ਖੋ ਸਮਣੋ ਗੋਤਮੋ ਛਨ੍ਨਂ ਫਸ੍ਸਾਯਤਨਾਨਂ ਉਪਾਦਾਯ ਭਿਕ੍ਖੂਨਂ ਧਮ੍ਮਿਯਾ ਕਥਾਯ ਸਨ੍ਦਸ੍ਸੇਤਿ ਸਮਾਦਪੇਤਿ ਸਮੁਤ੍ਤੇਜੇਤਿ ਸਪ੍ਪਹਂਸੇਤਿ. ਤੇ ਚ ਭਿਕ੍ਖੂ ਅਟ੍ਠਿਂ ਕਤ੍ਵਾ ਮਨਸਿ ਕਤ੍ਵਾ ਸਬ੍ਬਚੇਤਸਾ ਸਮਨ੍ਨਾਹਰਿਤ੍ਵਾ ਓਹਿਤਸੋਤਾ ਧਮ੍ਮਂ ਸੁਣਨ੍ਤਿ. ਯਂਨੂਨਾਹਂ ਯੇਨ ਸਮਣੋ ਗੋਤਮੋ ਤੇਨੁਪਸਙ੍ਕਮੇਯ੍ਯਂ ਵਿਚਕ੍ਖੁਕਮ੍ਮਾਯਾ’’ਤਿ. ਅਥ ਖੋ ਮਾਰੋ ਪਾਪਿਮਾ ਯੇਨ ਭਗਵਾ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਭਗਵਤੋ ਅਵਿਦੂਰੇ ਮਹਨ੍ਤਂ ਭਯਭੇਰਵਂ ਸਦ੍ਦਮਕਾਸਿ, ਅਪਿਸ੍ਸੁਦਂ ਪਥਵੀ ਮਞ੍ਞੇ ਉਨ੍ਦ੍ਰੀਯਤਿ [ਉਦ੍ਰੀਯਤਿ (ਸੀ. ਸ੍ਯਾ. ਕਂ. ਪੀ) ਉ + ਦਰ + ਯ + ਤਿ = ਉਦ੍ਰੀਯਤਿ]. ਅਥ ਖੋ ਅਞ੍ਞਤਰੋ ਭਿਕ੍ਖੁ ਅਞ੍ਞਤਰਂ ਭਿਕ੍ਖੁਂ ਏਤਦਵੋਚ – ‘‘ਭਿਕ੍ਖੁ, ਭਿਕ੍ਖੁ, ਏਸਾ ਪਥਵੀ ਮਞ੍ਞੇ ਉਨ੍ਦ੍ਰੀਯਤੀ’’ਤਿ. ਏਵਂ ਵੁਤ੍ਤੇ, ਭਗਵਾ ਤਂ ਭਿਕ੍ਖੁਂ ਏਤਦਵੋਚ – ‘‘ਨੇਸਾ ਭਿਕ੍ਖੁ ਪਥਵੀ ਉਨ੍ਦ੍ਰੀਯਤਿ. ਮਾਰੋ ਏਸੋ ਪਾਪਿਮਾ ਤੁਮ੍ਹਾਕਂ ਵਿਚਕ੍ਖੁਕਮ੍ਮਾਯ ਆਗਤੋ’’ਤਿ. ਅਥ ਖੋ ਭਗਵਾ ‘‘ਮਾਰੋ ਅਯਂ ਪਾਪਿਮਾ’’ ਇਤਿ ਵਿਦਿਤ੍ਵਾ ਮਾਰਂ ਪਾਪਿਮਨ੍ਤਂ ਗਾਥਾਯ ਅਜ੍ਝਭਾਸਿ –

‘‘ਰੂਪਾ ਸਦ੍ਦਾ ਰਸਾ ਗਨ੍ਧਾ, ਫਸ੍ਸਾ ਧਮ੍ਮਾ ਚ ਕੇਵਲਾ;

ਏਤਂ ਲੋਕਾਮਿਸਂ ਘੋਰਂ, ਏਤ੍ਥ ਲੋਕੋ ਵਿਮੁਚ੍ਛਿਤੋ.

‘‘ਏਤਞ੍ਚ ਸਮਤਿਕ੍ਕਮ੍ਮ, ਸਤੋ ਬੁਦ੍ਧਸ੍ਸ ਸਾਵਕੋ;

ਮਾਰਧੇਯ੍ਯਂ ਅਤਿਕ੍ਕਮ੍ਮ, ਆਦਿਚ੍ਚੋਵ ਵਿਰੋਚਤੀ’’ਤਿ.

ਅਥ ਖੋ ਮਾਰੋ ਪਾਪਿਮਾ…ਪੇ… ਤਤ੍ਥੇਵਨ੍ਤਰਧਾਯੀਤਿ.

੮. ਪਿਣ੍ਡਸੁਤ੍ਤਂ

੧੫੪. ਏਕਂ ਸਮਯਂ ਭਗਵਾ ਮਗਧੇਸੁ ਵਿਹਰਤਿ ਪਞ੍ਚਸਾਲਾਯਂ ਬ੍ਰਾਹ੍ਮਣਗਾਮੇ. ਤੇਨ ਖੋ ਪਨ ਸਮਯੇਨ ਪਞ੍ਚਸਾਲਾਯਂ ਬ੍ਰਾਹ੍ਮਣਗਾਮੇ ਕੁਮਾਰਿਕਾਨਂ ਪਾਹੁਨਕਾਨਿ ਭਵਨ੍ਤਿ. ਅਥ ਖੋ ਭਗਵਾ ਪੁਬ੍ਬਣ੍ਹਸਮਯਂ ਨਿਵਾਸੇਤ੍ਵਾ ਪਤ੍ਤਚੀਵਰਮਾਦਾਯ ਪਞ੍ਚਸਾਲਂ ਬ੍ਰਾਹ੍ਮਣਗਾਮਂ ਪਿਣ੍ਡਾਯ ਪਾਵਿਸਿ. ਤੇਨ ਖੋ ਪਨ ਸਮਯੇਨ ਪਞ੍ਚਸਾਲੇਯ੍ਯਕਾ ਬ੍ਰਾਹ੍ਮਣਗਹਪਤਿਕਾ ਮਾਰੇਨ ਪਾਪਿਮਤਾ ਅਨ੍ਵਾਵਿਟ੍ਠਾ ਭਵਨ੍ਤਿ – ਮਾ ਸਮਣੋ ਗੋਤਮੋ ਪਿਣ੍ਡਮਲਤ੍ਥਾਤਿ.

ਅਥ ਖੋ ਭਗਵਾ ਯਥਾਧੋਤੇਨ ਪਤ੍ਤੇਨ ਪਞ੍ਚਸਾਲਂ ਬ੍ਰਾਹ੍ਮਣਗਾਮਂ ਪਿਣ੍ਡਾਯ ਪਾਵਿਸਿ ਤਥਾਧੋਤੇਨ [ਯਥਾਧੋਤੇਨ (?)] ਪਤ੍ਤੇਨ ਪਟਿਕ੍ਕਮਿ. ਅਥ ਖੋ ਮਾਰੋ ਪਾਪਿਮਾ ਯੇਨ ਭਗਵਾ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਏਤਦਵੋਚ – ‘‘ਅਪਿ ਤ੍ਵਂ, ਸਮਣ, ਪਿਣ੍ਡਮਲਤ੍ਥਾ’’ਤਿ? ‘‘ਤਥਾ ਨੁ ਤ੍ਵਂ, ਪਾਪਿਮ, ਅਕਾਸਿ ਯਥਾਹਂ ਪਿਣ੍ਡਂ ਨ ਲਭੇਯ੍ਯ’’ਨ੍ਤਿ. ‘‘ਤੇਨ ਹਿ, ਭਨ੍ਤੇ, ਭਗਵਾ ਦੁਤਿਯਮ੍ਪਿ ਪਞ੍ਚਸਾਲਂ ਬ੍ਰਾਹ੍ਮਣਗਾਮਂ ਪਿਣ੍ਡਾਯ ਪਵਿਸਤੁ. ਤਥਾਹਂ ਕਰਿਸ੍ਸਾਮਿ ਯਥਾ ਭਗਵਾ ਪਿਣ੍ਡਂ ਲਚ੍ਛਤੀ’’ਤਿ.

‘‘ਅਪੁਞ੍ਞਂ ਪਸਵਿ ਮਾਰੋ, ਆਸਜ੍ਜ ਨਂ ਤਥਾਗਤਂ;

ਕਿਂ ਨੁ ਮਞ੍ਞਸਿ ਪਾਪਿਮ, ਨ ਮੇ ਪਾਪਂ ਵਿਪਚ੍ਚਤਿ.

‘‘ਸੁਸੁਖਂ ਵਤ ਜੀਵਾਮ, ਯੇਸਂ ਨੋ ਨਤ੍ਥਿ ਕਿਞ੍ਚਨਂ;

ਪੀਤਿਭਕ੍ਖਾ ਭਵਿਸ੍ਸਾਮ, ਦੇਵਾ ਆਭਸ੍ਸਰਾ ਯਥਾ’’ਤਿ.

ਅਥ ਖੋ ਮਾਰੋ ਪਾਪਿਮਾ ‘‘ਜਾਨਾਤਿ ਮਂ ਭਗਵਾ, ਜਾਨਾਤਿ ਮਂ ਸੁਗਤੋ’’ਤਿ ਦੁਕ੍ਖੀ ਦੁਮ੍ਮਨੋ ਤਤ੍ਥੇਵਨ੍ਤਰਧਾਯੀਤਿ.

੯. ਕਸ੍ਸਕਸੁਤ੍ਤਂ

੧੫੫. ਸਾਵਤ੍ਥਿਨਿਦਾਨਂ. ਤੇਨ ਖੋ ਪਨ ਸਮਯੇਨ ਭਗਵਾ ਭਿਕ੍ਖੂਨਂ ਨਿਬ੍ਬਾਨਪਟਿਸਂਯੁਤ੍ਤਾਯ ਧਮ੍ਮਿਯਾ ਕਥਾਯ ਸਨ੍ਦਸ੍ਸੇਤਿ ਸਮਾਦਪੇਤਿ ਸਮੁਤ੍ਤੇਜੇਤਿ ਸਮ੍ਪਹਂਸੇਤਿ. ਤੇ ਚ ਭਿਕ੍ਖੂ ਅਟ੍ਠਿਂ ਕਤ੍ਵਾ ਮਨਸਿ ਕਤ੍ਵਾ ਸਬ੍ਬਚੇਤਸਾ ਸਮਨ੍ਨਾਹਰਿਤ੍ਵਾ ਓਹਿਤਸੋਤਾ ਧਮ੍ਮਂ ਸੁਣਨ੍ਤਿ.

ਅਥ ਖੋ ਮਾਰਸ੍ਸ ਪਾਪਿਮਤੋ ਏਤਦਹੋਸਿ – ‘‘ਅਯਂ ਖੋ ਸਮਣੋ ਗੋਤਮੋ ਭਿਕ੍ਖੂਨਂ ਨਿਬ੍ਬਾਨਪਟਿਸਂਯੁਤ੍ਤਾਯ ਧਮ੍ਮਿਯਾ ਕਥਾਯ…ਪੇ… ਯਂਨੂਨਾਹਂ ਯੇਨ ਸਮਣੋ ਗੋਤਮੋ ਤੇਨੁਪਸਙ੍ਕਮੇਯ੍ਯਂ ਵਿਚਕ੍ਖੁਕਮ੍ਮਾਯਾ’’ਤਿ. ਅਥ ਖੋ ਮਾਰੋ ਪਾਪਿਮਾ ਕਸ੍ਸਕਵਣ੍ਣਂ ਅਭਿਨਿਮ੍ਮਿਨਿਤ੍ਵਾ ਮਹਨ੍ਤਂ ਨਙ੍ਗਲਂ ਖਨ੍ਧੇ ਕਰਿਤ੍ਵਾ ਦੀਘਪਾਚਨਯਟ੍ਠਿਂ ਗਹੇਤ੍ਵਾ ਹਟਹਟਕੇਸੋ ਸਾਣਸਾਟਿਨਿਵਤ੍ਥੋ ਕਦ੍ਦਮਮਕ੍ਖਿਤੇਹਿ ਪਾਦੇਹਿ ਯੇਨ ਭਗਵਾ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਏਤਦਵੋਚ – ‘‘ਅਪਿ, ਸਮਣ, ਬਲੀਬਦ੍ਦੇ ਅਦ੍ਦਸਾ’’ਤਿ? ‘‘ਕਿਂ ਪਨ, ਪਾਪਿਮ, ਤੇ ਬਲੀਬਦ੍ਦੇਹੀ’’ਤਿ? ‘‘ਮਮੇਵ, ਸਮਣ, ਚਕ੍ਖੁ, ਮਮ ਰੂਪਾ, ਮਮ ਚਕ੍ਖੁਸਮ੍ਫਸ੍ਸਵਿਞ੍ਞਾਣਾਯਤਨਂ. ਕੁਹਿਂ ਮੇ, ਸਮਣ, ਗਨ੍ਤ੍ਵਾ ਮੋਕ੍ਖਸਿ? ਮਮੇਵ, ਸਮਣ, ਸੋਤਂ, ਮਮ ਸਦ੍ਦਾ…ਪੇ… ਮਮੇਵ, ਸਮਣ, ਘਾਨਂ, ਮਮ ਗਨ੍ਧਾ; ਮਮੇਵ, ਸਮਣ, ਜਿਵ੍ਹਾ, ਮਮ ਰਸਾ; ਮਮੇਵ, ਸਮਣ, ਕਾਯੋ, ਮਮ ਫੋਟ੍ਠਬ੍ਬਾ; ਮਮੇਵ, ਸਮਣ, ਮਨੋ, ਮਮ ਧਮ੍ਮਾ, ਮਮ ਮਨੋਸਮ੍ਫਸ੍ਸਵਿਞ੍ਞਾਣਾਯਤਨਂ. ਕੁਹਿਂ ਮੇ, ਸਮਣ, ਗਨ੍ਤ੍ਵਾ ਮੋਕ੍ਖਸੀ’’ਤਿ?

‘‘ਤਵੇਵ, ਪਾਪਿਮ, ਚਕ੍ਖੁ, ਤਵ ਰੂਪਾ, ਤਵ ਚਕ੍ਖੁਸਮ੍ਫਸ੍ਸਵਿਞ੍ਞਾਣਾਯਤਨਂ. ਯਤ੍ਥ ਚ ਖੋ, ਪਾਪਿਮ, ਨਤ੍ਥਿ ਚਕ੍ਖੁ, ਨਤ੍ਥਿ ਰੂਪਾ, ਨਤ੍ਥਿ ਚਕ੍ਖੁਸਮ੍ਫਸ੍ਸਵਿਞ੍ਞਾਣਾਯਤਨਂ, ਅਗਤਿ ਤਵ ਤਤ੍ਥ, ਪਾਪਿਮ. ਤਵੇਵ, ਪਾਪਿਮ, ਸੋਤਂ, ਤਵ ਸਦ੍ਦਾ, ਤਵ ਸੋਤਸਮ੍ਫਸ੍ਸਵਿਞ੍ਞਾਣਾਯਤਨਂ. ਯਤ੍ਥ ਚ ਖੋ, ਪਾਪਿਮ, ਨਤ੍ਥਿ ਸੋਤਂ, ਨਤ੍ਥਿ ਸਦ੍ਦਾ, ਨਤ੍ਥਿ ਸੋਤਸਮ੍ਫਸ੍ਸਵਿਞ੍ਞਾਣਾਯਤਨਂ, ਅਗਤਿ ਤਵ ਤਤ੍ਥ, ਪਾਪਿਮ. ਤਵੇਵ, ਪਾਪਿਮ, ਘਾਨਂ, ਤਵ ਗਨ੍ਧਾ, ਤਵ ਘਾਨਸਮ੍ਫਸ੍ਸਵਿਞ੍ਞਾਣਾਯਤਨਂ. ਯਤ੍ਥ ਚ ਖੋ, ਪਾਪਿਮ, ਨਤ੍ਥਿ ਘਾਨਂ, ਨਤ੍ਥਿ ਗਨ੍ਧਾ, ਨਤ੍ਥਿ ਘਾਨਸਮ੍ਫਸ੍ਸਵਿਞ੍ਞਾਣਾਯਤਨਂ, ਅਗਤਿ ਤਵ ਤਤ੍ਥ, ਪਾਪਿਮ. ਤਵੇਵ, ਪਾਪਿਮ, ਜਿਵ੍ਹਾ, ਤਵ ਰਸਾ, ਤਵ ਜਿਵ੍ਹਾਸਮ੍ਫਸ੍ਸਵਿਞ੍ਞਾਣਾਯਤਨਂ…ਪੇ… ਤਵੇਵ, ਪਾਪਿਮ, ਕਾਯੋ, ਤਵ ਫੋਟ੍ਠਬ੍ਬਾ, ਤਵ ਕਾਯਸਮ੍ਫਸ੍ਸਵਿਞ੍ਞਾਣਾਯਤਨਂ…ਪੇ… ਤਵੇਵ, ਪਾਪਿਮ, ਮਨੋ, ਤਵ ਧਮ੍ਮਾ, ਤਵ ਮਨੋਸਮ੍ਫਸ੍ਸਵਿਞ੍ਞਾਣਾਯਤਨਂ. ਯਤ੍ਥ ਚ ਖੋ, ਪਾਪਿਮ, ਨਤ੍ਥਿ ਮਨੋ, ਨਤ੍ਥਿ ਧਮ੍ਮਾ, ਨਤ੍ਥਿ ਮਨੋਸਮ੍ਫਸ੍ਸਵਿਞ੍ਞਾਣਾਯਤਨਂ, ਅਗਤਿ ਤਵ ਤਤ੍ਥ, ਪਾਪਿਮਾ’’ਤਿ.

‘‘ਯਂ ਵਦਨ੍ਤਿ ਮਮ ਯਿਦਨ੍ਤਿ, ਯੇ ਵਦਨ੍ਤਿ ਮਮਨ੍ਤਿ ਚ;

ਏਤ੍ਥ ਚੇ ਤੇ ਮਨੋ ਅਤ੍ਥਿ, ਨ ਮੇ ਸਮਣ ਮੋਕ੍ਖਸੀ’’ਤਿ.

‘‘ਯਂ ਵਦਨ੍ਤਿ ਨ ਤਂ ਮਯ੍ਹਂ, ਯੇ ਵਦਨ੍ਤਿ ਨ ਤੇ ਅਹਂ;

ਏਵਂ ਪਾਪਿਮ ਜਾਨਾਹਿ, ਨ ਮੇ ਮਗ੍ਗਮ੍ਪਿ ਦਕ੍ਖਸੀ’’ਤਿ.

ਅਥ ਖੋ ਮਾਰੋ ਪਾਪਿਮਾ…ਪੇ… ਤਤ੍ਥੇਵਨ੍ਤਰਧਾਯੀਤਿ.

੧੦. ਰਜ੍ਜਸੁਤ੍ਤਂ

੧੫੬. ਏਕਂ ਸਮਯਂ ਭਗਵਾ ਕੋਸਲੇਸੁ ਵਿਹਰਤਿ ਹਿਮਵਨ੍ਤਪਦੇਸੇ [ਹਿਮਵਨ੍ਤਪਸ੍ਸੇ (ਸੀ.)] ਅਰਞ੍ਞਕੁਟਿਕਾਯਂ. ਅਥ ਖੋ ਭਗਵਤੋ ਰਹੋਗਤਸ੍ਸ ਪਟਿਸਲ੍ਲੀਨਸ੍ਸ ਏਵਂ ਚੇਤਸੋ ਪਰਿਵਿਤਕ੍ਕੋ ਉਦਪਾਦਿ – ‘‘ਸਕ੍ਕਾ ਨੁ ਖੋ ਰਜ੍ਜਂ ਕਾਰੇਤੁਂ ਅਹਨਂ ਅਘਾਤਯਂ ਅਜਿਨਂ ਅਜਾਪਯਂ ਅਸੋਚਂ ਅਸੋਚਾਪਯਂ ਧਮ੍ਮੇਨਾ’’ਤਿ?

ਅਥ ਖੋ ਮਾਰੋ ਪਾਪਿਮਾ ਭਗਵਤੋ ਚੇਤਸਾ ਚੇਤੋਪਰਿਵਿਤਕ੍ਕਮਞ੍ਞਾਯ ਯੇਨ ਭਗਵਾ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਏਤਦਵੋਚ – ‘‘ਕਾਰੇਤੁ, ਭਨ੍ਤੇ, ਭਗਵਾ ਰਜ੍ਜਂ, ਕਾਰੇਤੁ, ਸੁਗਤੋ, ਰਜ੍ਜਂ ਅਹਨਂ ਅਘਾਤਯਂ ਅਜਿਨਂ ਅਜਾਪਯਂ ਅਸੋਚਂ ਅਸੋਚਾਪਯਂ ਧਮ੍ਮੇਨਾ’’ਤਿ. ‘‘ਕਿਂ ਪਨ ਮੇ ਤ੍ਵਂ, ਪਾਪਿਮ, ਪਸ੍ਸਸਿ ਯਂ ਮਂ ਤ੍ਵਂ ਏਵਂ ਵਦੇਸਿ – ‘ਕਾਰੇਤੁ, ਭਨ੍ਤੇ, ਭਗਵਾ ਰਜ੍ਜਂ, ਕਾਰੇਤੁ ਸੁਗਤੋ, ਰਜ੍ਜਂ ਅਹਨਂ ਅਘਾਤਯਂ ਅਜਿਨਂ ਅਜਾਪਯਂ ਅਸੋਚਂ ਅਸੋਚਾਪਯਂ ਧਮ੍ਮੇਨਾ’’’ਤਿ? ‘‘ਭਗਵਤਾ ਖੋ, ਭਨ੍ਤੇ, ਚਤ੍ਤਾਰੋ ਇਦ੍ਧਿਪਾਦਾ ਭਾਵਿਤਾ ਬਹੁਲੀਕਤਾ ਯਾਨੀਕਤਾ ਵਤ੍ਥੁਕਤਾ ਅਨੁਟ੍ਠਿਤਾ ਪਰਿਚਿਤਾ ਸੁਸਮਾਰਦ੍ਧਾ. ਆਕਙ੍ਖਮਾਨੋ ਚ, ਭਨ੍ਤੇ, ਭਗਵਾ ਹਿਮਵਨ੍ਤਂ ਪਬ੍ਬਤਰਾਜਂ ਸੁਵਣ੍ਣਂ ਤ੍ਵੇਵ ਅਧਿਮੁਚ੍ਚੇਯ੍ਯ ਸੁਵਣ੍ਣਞ੍ਚ ਪਨਸ੍ਸਾ’’ਤਿ [ਸੁਵਣ੍ਣਪਬ੍ਬਤਸ੍ਸਾਤਿ (ਸੀ. ਸ੍ਯਾ. ਕਂ.), ਸੁਵਣ੍ਣਞ੍ਚ ਪਬ੍ਬਤਸ੍ਸਾਤਿ (ਪੀ.)].

‘‘ਪਬ੍ਬਤਸ੍ਸ ਸੁਵਣ੍ਣਸ੍ਸ, ਜਾਤਰੂਪਸ੍ਸ ਕੇਵਲੋ;

ਦ੍ਵਿਤ੍ਤਾਵ ਨਾਲਮੇਕਸ੍ਸ, ਇਤਿ ਵਿਦ੍ਵਾ ਸਮਞ੍ਚਰੇ.

‘‘ਯੋ ਦੁਕ੍ਖਮਦ੍ਦਕ੍ਖਿ ਯਤੋਨਿਦਾਨਂ,

ਕਾਮੇਸੁ ਸੋ ਜਨ੍ਤੁ ਕਥਂ ਨਮੇਯ੍ਯ;

ਉਪਧਿਂ ਵਿਦਿਤ੍ਵਾ ਸਙ੍ਗੋਤਿ ਲੋਕੇ,

ਤਸ੍ਸੇਵ ਜਨ੍ਤੁ ਵਿਨਯਾਯ ਸਿਕ੍ਖੇ’’ਤਿ.

ਅਥ ਖੋ ਮਾਰੋ ਪਾਪਿਮਾ ‘‘ਜਾਨਾਤਿ ਮਂ ਭਗਵਾ, ਜਾਨਾਤਿ ਮਂ ਸੁਗਤੋ’’ਤਿ ਦੁਕ੍ਖੀ ਦੁਮ੍ਮਨੋ ਤਤ੍ਥੇਵਨ੍ਤਰਧਾਯੀਤਿ.

ਦੁਤਿਯੋ ਵਗ੍ਗੋ.

ਤਸ੍ਸੁਦ੍ਦਾਨਂ –

ਪਾਸਾਣੋ ਸੀਹੋ ਸਕਲਿਕਂ [ਸਕ੍ਖਲਿਕਂ (ਕ.)], ਪਤਿਰੂਪਞ੍ਚ ਮਾਨਸਂ;

ਪਤ੍ਤਂ ਆਯਤਨਂ ਪਿਣ੍ਡਂ, ਕਸ੍ਸਕਂ ਰਜ੍ਜੇਨ ਤੇ ਦਸਾਤਿ.