੬. ਨਜੀਰਤਿਸੁਤ੍ਤਂ

੭੬. ‘‘ਕਿਂ ਜੀਰਤਿ ਕਿਂ ਨ ਜੀਰਤਿ, ਕਿਂਸੁ ਉਪ੍ਪਥੋਤਿ ਵੁਚ੍ਚਤਿ;

ਕਿਂਸੁ ਧਮ੍ਮਾਨਂ ਪਰਿਪਨ੍ਥੋ, ਕਿਂਸੁ ਰਤ੍ਤਿਨ੍ਦਿਵਕ੍ਖਯੋ;

ਕਿਂ ਮਲਂ ਬ੍ਰਹ੍ਮਚਰਿਯਸ੍ਸ, ਕਿਂ ਸਿਨਾਨਮਨੋਦਕਂ.

‘‘ਕਤਿ ਲੋਕਸ੍ਮਿਂ ਛਿਦ੍ਦਾਨਿ, ਯਤ੍ਥ ਵਿਤ੍ਤਂ [ਚਿਤ੍ਤਂ (ਸੀ. ਸ੍ਯਾ. ਕਂ. ਪੀ.)] ਨ ਤਿਟ੍ਠਤਿ;

ਭਗਵਨ੍ਤਂ ਪੁਟ੍ਠੁਮਾਗਮ੍ਮ, ਕਥਂ ਜਾਨੇਮੁ ਤਂ ਮਯ’’ਨ੍ਤਿ.

‘‘ਰੂਪਂ ਜੀਰਤਿ ਮਚ੍ਚਾਨਂ, ਨਾਮਗੋਤ੍ਤਂ ਨ ਜੀਰਤਿ;

ਰਾਗੋ ਉਪ੍ਪਥੋਤਿ ਵੁਚ੍ਚਤਿ.

‘‘ਲੋਭੋ ਧਮ੍ਮਾਨਂ ਪਰਿਪਨ੍ਥੋ, ਵਯੋ ਰਤ੍ਤਿਨ੍ਦਿਵਕ੍ਖਯੋ;

ਇਤ੍ਥੀ ਮਲਂ ਬ੍ਰਹ੍ਮਚਰਿਯਸ੍ਸ, ਏਤ੍ਥਾਯਂ ਸਜ੍ਜਤੇ ਪਜਾ;

ਤਪੋ ਚ ਬ੍ਰਹ੍ਮਚਰਿਯਞ੍ਚ, ਤਂ ਸਿਨਾਨਮਨੋਦਕਂ.

‘‘ਛ ਲੋਕਸ੍ਮਿਂ ਛਿਦ੍ਦਾਨਿ, ਯਤ੍ਥ ਵਿਤ੍ਤਂ ਨ ਤਿਟ੍ਠਤਿ;

ਆਲਸ੍ਯਞ੍ਚ [ਆਲਸ੍ਸਞ੍ਚ (ਸੀ. ਪੀ.)] ਪਮਾਦੋ ਚ, ਅਨੁਟ੍ਠਾਨਂ ਅਸਂਯਮੋ;

ਨਿਦ੍ਦਾ ਤਨ੍ਦੀ [ਤਨ੍ਦਿ (ਸੀ.)] ਚ ਤੇ ਛਿਦ੍ਦੇ, ਸਬ੍ਬਸੋ ਤਂ ਵਿਵਜ੍ਜਯੇ’’ਤਿ.