੧. ਦੇਵਤਾਸਂਯੁਤ੍ਤਂ

੧. ਨਲ਼ਵਗ੍ਗੋ

੧. ਓਘਤਰਣਸੁਤ੍ਤਂ

੧. ਏਵਂ ਮੇ ਸੁਤਂ – ਏਕਂ ਸਮਯਂ ਭਗਵਾ ਸਾਵਤ੍ਥਿਯਂ ਵਿਹਰਤਿ ਜੇਤਵਨੇ ਅਨਾਥਪਿਣ੍ਡਿਕਸ੍ਸ ਆਰਾਮੇ. ਅਥ ਖੋ ਅਞ੍ਞਤਰਾ ਦੇਵਤਾ ਅਭਿਕ੍ਕਨ੍ਤਾਯ ਰਤ੍ਤਿਯਾ ਅਭਿਕ੍ਕਨ੍ਤਵਣ੍ਣਾ ਕੇਵਲਕਪ੍ਪਂ ਜੇਤਵਨਂ ਓਭਾਸੇਤ੍ਵਾ ਯੇਨ ਭਗਵਾ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਅਟ੍ਠਾਸਿ. ਏਕਮਨ੍ਤਂ ਠਿਤਾ ਖੋ ਸਾ ਦੇਵਤਾ ਭਗਵਨ੍ਤਂ ਏਤਦਵੋਚ – ‘‘‘ਕਥਂ ਨੁ ਤ੍ਵਂ, ਮਾਰਿਸ, ਓਘਮਤਰੀ’ਤਿ? ‘ਅਪ੍ਪਤਿਟ੍ਠਂ ਖ੍ਵਾਹਂ, ਆਵੁਸੋ, ਅਨਾਯੂਹਂ ਓਘਮਤਰਿ’ਨ੍ਤਿ. ‘ਯਥਾ ਕਥਂ ਪਨ ਤ੍ਵਂ, ਮਾਰਿਸ, ਅਪ੍ਪਤਿਟ੍ਠਂ ਅਨਾਯੂਹਂ ਓਘਮਤਰੀ’ਤਿ? ‘ਯਦਾਖ੍ਵਾਹਂ, ਆਵੁਸੋ, ਸਨ੍ਤਿਟ੍ਠਾਮਿ ਤਦਾਸ੍ਸੁ ਸਂਸੀਦਾਮਿ; ਯਦਾਖ੍ਵਾਹਂ, ਆਵੁਸੋ, ਆਯੂਹਾਮਿ ਤਦਾਸ੍ਸੁ ਨਿਬ੍ਬੁਯ੍ਹਾਮਿ [ਨਿਵੁਯ੍ਹਾਮਿ (ਸ੍ਯਾ. ਕਂ. ਕ.)]. ਏਵਂ ਖ੍ਵਾਹਂ, ਆਵੁਸੋ, ਅਪ੍ਪਤਿਟ੍ਠਂ ਅਨਾਯੂਹਂ ਓਘਮਤਰਿ’’’ਨ੍ਤਿ.

‘‘ਚਿਰਸ੍ਸਂ ਵਤ ਪਸ੍ਸਾਮਿ, ਬ੍ਰਾਹ੍ਮਣਂ ਪਰਿਨਿਬ੍ਬੁਤਂ;

ਅਪ੍ਪਤਿਟ੍ਠਂ ਅਨਾਯੂਹਂ, ਤਿਣ੍ਣਂ ਲੋਕੇ ਵਿਸਤ੍ਤਿਕ’’ਨ੍ਤਿ. –

ਇਦਮਵੋਚ ਸਾ ਦੇਵਤਾ. ਸਮਨੁਞ੍ਞੋ ਸਤ੍ਥਾ ਅਹੋਸਿ. ਅਥ ਖੋ ਸਾ ਦੇਵਤਾ – ‘‘ਸਮਨੁਞ੍ਞੋ ਮੇ ਸਤ੍ਥਾ’’ਤਿ ਭਗਵਨ੍ਤਂ ਅਭਿਵਾਦੇਤ੍ਵਾ ਪਦਕ੍ਖਿਣਂ ਕਤ੍ਵਾ ਤਤ੍ਥੇਵਨ੍ਤਰਧਾਯੀਤਿ.

੨. ਨਿਮੋਕ੍ਖਸੁਤ੍ਤਂ

੨. ਸਾਵਤ੍ਥਿਨਿਦਾਨਂ. ਅਥ ਖੋ ਅਞ੍ਞਤਰਾ ਦੇਵਤਾ ਅਭਿਕ੍ਕਨ੍ਤਾਯ ਰਤ੍ਤਿਯਾ ਅਭਿਕ੍ਕਨ੍ਤਵਣ੍ਣਾ ਕੇਵਲਕਪ੍ਪਂ ਜੇਤਵਨਂ ਓਭਾਸੇਤ੍ਵਾ ਯੇਨ ਭਗਵਾ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਅਟ੍ਠਾਸਿ. ਏਕਮਨ੍ਤਂ ਠਿਤਾ ਖੋ ਸਾ ਦੇਵਤਾ ਭਗਵਨ੍ਤਂ ਏਤਦਵੋਚ –

‘‘ਜਾਨਾਸਿ ਨੋ ਤ੍ਵਂ, ਮਾਰਿਸ, ਸਤ੍ਤਾਨਂ ਨਿਮੋਕ੍ਖਂ ਪਮੋਕ੍ਖਂ ਵਿਵੇਕ’’ਨ੍ਤਿ?

‘‘ਜਾਨਾਮਿ ਖ੍ਵਾਹਂ, ਆਵੁਸੋ, ਸਤ੍ਤਾਨਂ ਨਿਮੋਕ੍ਖਂ ਪਮੋਕ੍ਖਂ ਵਿਵੇਕ’’ਨ੍ਤਿ.

‘‘ਯਥਾ ਕਥਂ ਪਨ ਤ੍ਵਂ, ਮਾਰਿਸ, ਜਾਨਾਸਿ ਸਤ੍ਤਾਨਂ ਨਿਮੋਕ੍ਖਂ ਪਮੋਕ੍ਖਂ ਵਿਵੇਕ’’ਨ੍ਤਿ?

‘‘ਨਨ੍ਦੀਭਵਪਰਿਕ੍ਖਯਾ [ਨਨ੍ਦਿਭਵਪਰਿਕ੍ਖਯਾ (ਸ੍ਯਾ. ਕਂ.)], ਸਞ੍ਞਾਵਿਞ੍ਞਾਣਸਙ੍ਖਯਾ, ਵੇਦਨਾਨਂ ਨਿਰੋਧਾ ਉਪਸਮਾ – ਏਵਂ ਖ੍ਵਾਹਂ, ਆਵੁਸੋ, ਜਾਨਾਮਿ ਸਤ੍ਤਾਨਂ ਨਿਮੋਕ੍ਖਂ ਪਮੋਕ੍ਖਂ ਵਿਵੇਕ’’ਨ੍ਤਿ.

੩. ਉਪਨੀਯਸੁਤ੍ਤਂ

੩. ਸਾਵਤ੍ਥਿਨਿਦਾਨਂ. ਏਕਮਨ੍ਤਂ ਠਿਤਾ ਖੋ ਸਾ ਦੇਵਤਾ ਭਗਵਤੋ ਸਨ੍ਤਿਕੇ ਇਮਂ ਗਾਥਂ ਅਭਾਸਿ –

‘‘ਉਪਨੀਯਤਿ ਜੀਵਿਤਮਪ੍ਪਮਾਯੁ,

ਜਰੂਪਨੀਤਸ੍ਸ ਨ ਸਨ੍ਤਿ ਤਾਣਾ;

ਏਤਂ ਭਯਂ ਮਰਣੇ ਪੇਕ੍ਖਮਾਨੋ,

ਪੁਞ੍ਞਾਨਿ ਕਯਿਰਾਥ ਸੁਖਾਵਹਾਨੀ’’ਤਿ.

‘‘ਉਪਨੀਯਤਿ ਜੀਵਿਤਮਪ੍ਪਮਾਯੁ,

ਜਰੂਪਨੀਤਸ੍ਸ ਨ ਸਨ੍ਤਿ ਤਾਣਾ;

ਏਤਂ ਭਯਂ ਮਰਣੇ ਪੇਕ੍ਖਮਾਨੋ,

ਲੋਕਾਮਿਸਂ ਪਜਹੇ ਸਨ੍ਤਿਪੇਕ੍ਖੋ’’ਤਿ.

੪. ਅਚ੍ਚੇਨ੍ਤਿਸੁਤ੍ਤਂ

੪. ਸਾਵਤ੍ਥਿਨਿਦਾਨਂ. ਏਕਮਨ੍ਤਂ ਠਿਤਾ ਖੋ ਸਾ ਦੇਵਤਾ ਭਗਵਤੋ ਸਨ੍ਤਿਕੇ ਇਮਂ ਗਾਥਂ ਅਭਾਸਿ –

‘‘ਅਚ੍ਚੇਨ੍ਤਿ ਕਾਲਾ ਤਰਯਨ੍ਤਿ ਰਤ੍ਤਿਯੋ,

ਵਯੋਗੁਣਾ ਅਨੁਪੁਬ੍ਬਂ ਜਹਨ੍ਤਿ;

ਏਤਂ ਭਯਂ ਮਰਣੇ ਪੇਕ੍ਖਮਾਨੋ,

ਪੁਞ੍ਞਾਨਿ ਕਯਿਰਾਥ ਸੁਖਾਵਹਾਨੀ’’ਤਿ.

‘‘ਅਚ੍ਚੇਨ੍ਤਿ ਕਾਲਾ ਤਰਯਨ੍ਤਿ ਰਤ੍ਤਿਯੋ,

ਵਯੋਗੁਣਾ ਅਨੁਪੁਬ੍ਬਂ ਜਹਨ੍ਤਿ;

ਏਤਂ ਭਯਂ ਮਰਣੇ ਪੇਕ੍ਖਮਾਨੋ,

ਲੋਕਾਮਿਸਂ ਪਜਹੇ ਸਨ੍ਤਿਪੇਕ੍ਖੋ’’ਤਿ.

੫. ਕਤਿਛਿਨ੍ਦਸੁਤ੍ਤਂ

੫. ਸਾਵਤ੍ਥਿਨਿਦਾਨਂ. ਏਕਮਨ੍ਤਂ ਠਿਤਾ ਖੋ ਸਾ ਦੇਵਤਾ ਭਗਵਤੋ ਸਨ੍ਤਿਕੇ ਇਮਂ ਗਾਥਂ ਅਭਾਸਿ –

‘‘ਕਤਿ ਛਿਨ੍ਦੇ ਕਤਿ ਜਹੇ, ਕਤਿ ਚੁਤ੍ਤਰਿ ਭਾਵਯੇ;

ਕਤਿ ਸਙ੍ਗਾਤਿਗੋ ਭਿਕ੍ਖੁ, ਓਘਤਿਣ੍ਣੋਤਿ ਵੁਚ੍ਚਤੀ’’ਤਿ.

‘‘ਪਞ੍ਚ ਛਿਨ੍ਦੇ ਪਞ੍ਚ ਜਹੇ, ਪਞ੍ਚ ਚੁਤ੍ਤਰਿ ਭਾਵਯੇ;

ਪਞ੍ਚ ਸਙ੍ਗਾਤਿਗੋ ਭਿਕ੍ਖੁ, ਓਘਤਿਣ੍ਣੋਤਿ ਵੁਚ੍ਚਤੀ’’ਤਿ.

੬. ਜਾਗਰਸੁਤ੍ਤਂ

੬. ਸਾਵਤ੍ਥਿਨਿਦਾਨਂ. ਏਕਮਨ੍ਤਂ ਠਿਤਾ ਖੋ ਸਾ ਦੇਵਤਾ ਭਗਵਤੋ ਸਨ੍ਤਿਕੇ ਇਮਂ ਗਾਥਂ ਅਭਾਸਿ –

‘‘ਕਤਿ ਜਾਗਰਤਂ ਸੁਤ੍ਤਾ, ਕਤਿ ਸੁਤ੍ਤੇਸੁ ਜਾਗਰਾ;

ਕਤਿਭਿ [ਕਤੀਹਿ (ਸੀ.)] ਰਜਮਾਦੇਤਿ, ਕਤਿਭਿ [ਕਤੀਹਿ (ਸੀ.)] ਪਰਿਸੁਜ੍ਝਤੀ’’ਤਿ.

‘‘ਪਞ੍ਚ ਜਾਗਰਤਂ ਸੁਤ੍ਤਾ, ਪਞ੍ਚ ਸੁਤ੍ਤੇਸੁ ਜਾਗਰਾ;

ਪਞ੍ਚਭਿ [ਪਞ੍ਚਹਿ (ਸੀ.)] ਰਜਮਾਦੇਤਿ, ਪਞ੍ਚਭਿ [ਪਞ੍ਚਹਿ (ਸੀ.)] ਪਰਿਸੁਜ੍ਝਤੀ’’ਤਿ.

੭. ਅਪ੍ਪਟਿਵਿਦਿਤਸੁਤ੍ਤਂ

੭. ਸਾਵਤ੍ਥਿਨਿਦਾਨਂ. ਏਕਮਨ੍ਤਂ ਠਿਤਾ ਖੋ ਸਾ ਦੇਵਤਾ ਭਗਵਤੋ ਸਨ੍ਤਿਕੇ ਇਮਂ ਗਾਥਂ ਅਭਾਸਿ –

‘‘ਯੇਸਂ ਧਮ੍ਮਾ ਅਪ੍ਪਟਿਵਿਦਿਤਾ, ਪਰਵਾਦੇਸੁ ਨੀਯਰੇ [ਨਿਯ੍ਯਰੇ (ਕ.)];

ਸੁਤ੍ਤਾ ਤੇ ਨਪ੍ਪਬੁਜ੍ਝਨ੍ਤਿ, ਕਾਲੋ ਤੇਸਂ ਪਬੁਜ੍ਝਿਤੁ’’ਨ੍ਤਿ.

‘‘ਯੇਸਂ ਧਮ੍ਮਾ ਸੁਪ੍ਪਟਿਵਿਦਿਤਾ, ਪਰਵਾਦੇਸੁ ਨ ਨੀਯਰੇ;

ਤੇ ਸਮ੍ਬੁਦ੍ਧਾ ਸਮ੍ਮਦਞ੍ਞਾ, ਚਰਨ੍ਤਿ ਵਿਸਮੇ ਸਮ’’ਨ੍ਤਿ.

੮. ਸੁਸਮ੍ਮੁਟ੍ਠਸੁਤ੍ਤਂ

੮. ਸਾਵਤ੍ਥਿਨਿਦਾਨਂ. ਏਕਮਨ੍ਤਂ ਠਿਤਾ ਖੋ ਸਾ ਦੇਵਤਾ ਭਗਵਤੋ ਸਨ੍ਤਿਕੇ ਇਮਂ ਗਾਥਂ ਅਭਾਸਿ –

‘‘ਯੇਸਂ ਧਮ੍ਮਾ ਸੁਸਮ੍ਮੁਟ੍ਠਾ, ਪਰਵਾਦੇਸੁ ਨੀਯਰੇ;

ਸੁਤ੍ਤਾ ਤੇ ਨਪ੍ਪਬੁਜ੍ਝਨ੍ਤਿ, ਕਾਲੋ ਤੇਸਂ ਪਬੁਜ੍ਝਿਤੁ’’ਨ੍ਤਿ.

‘‘ਯੇਸਂ ਧਮ੍ਮਾ ਅਸਮ੍ਮੁਟ੍ਠਾ, ਪਰਵਾਦੇਸੁ ਨ ਨੀਯਰੇ;

ਤੇ ਸਮ੍ਬੁਦ੍ਧਾ ਸਮ੍ਮਦਞ੍ਞਾ, ਚਰਨ੍ਤਿ ਵਿਸਮੇ ਸਮ’’ਨ੍ਤਿ.

੯. ਮਾਨਕਾਮਸੁਤ੍ਤਂ

੯. ਸਾਵਤ੍ਥਿਨਿਦਾਨਂ. ਏਕਮਨ੍ਤਂ ਠਿਤਾ ਖੋ ਸਾ ਦੇਵਤਾ ਭਗਵਤੋ ਸਨ੍ਤਿਕੇ ਇਮਂ ਗਾਥਂ ਅਭਾਸਿ –

‘‘ਨ ਮਾਨਕਾਮਸ੍ਸ ਦਮੋ ਇਧਤ੍ਥਿ,

ਨ ਮੋਨਮਤ੍ਥਿ ਅਸਮਾਹਿਤਸ੍ਸ;

ਏਕੋ ਅਰਞ੍ਞੇ ਵਿਹਰਂ ਪਮਤ੍ਤੋ,

ਨ ਮਚ੍ਚੁਧੇਯ੍ਯਸ੍ਸ ਤਰੇਯ੍ਯ ਪਾਰ’’ਨ੍ਤਿ.

‘‘ਮਾਨਂ ਪਹਾਯ ਸੁਸਮਾਹਿਤਤ੍ਤੋ,

ਸੁਚੇਤਸੋ ਸਬ੍ਬਧਿ ਵਿਪ੍ਪਮੁਤ੍ਤੋ;

ਏਕੋ ਅਰਞ੍ਞੇ ਵਿਹਰਂ ਅਪ੍ਪਮਤ੍ਤੋ,

ਸ ਮਚ੍ਚੁਧੇਯ੍ਯਸ੍ਸ ਤਰੇਯ੍ਯ ਪਾਰ’’ਨ੍ਤਿ.

੧੦. ਅਰਞ੍ਞਸੁਤ੍ਤਂ

੧੦. ਸਾਵਤ੍ਥਿਨਿਦਾਨਂ. ਏਕਮਨ੍ਤਂ ਠਿਤਾ ਖੋ ਸਾ ਦੇਵਤਾ ਭਗਵਨ੍ਤਂ ਗਾਥਾਯ ਅਜ੍ਝਭਾਸਿ –

‘‘ਅਰਞ੍ਞੇ ਵਿਹਰਨ੍ਤਾਨਂ, ਸਨ੍ਤਾਨਂ ਬ੍ਰਹ੍ਮਚਾਰਿਨਂ;

ਏਕਭਤ੍ਤਂ ਭੁਞ੍ਜਮਾਨਾਨਂ, ਕੇਨ ਵਣ੍ਣੋ ਪਸੀਦਤੀ’’ਤਿ.

‘‘ਅਤੀਤਂ ਨਾਨੁਸੋਚਨ੍ਤਿ, ਨਪ੍ਪਜਪ੍ਪਨ੍ਤਿ ਨਾਗਤਂ;

ਪਚ੍ਚੁਪ੍ਪਨ੍ਨੇਨ ਯਾਪੇਨ੍ਤਿ, ਤੇਨ ਵਣ੍ਣੋ ਪਸੀਦਤਿ’’.

‘‘ਅਨਾਗਤਪ੍ਪਜਪ੍ਪਾਯ, ਅਤੀਤਸ੍ਸਾਨੁਸੋਚਨਾ;

ਏਤੇਨ ਬਾਲਾ ਸੁਸ੍ਸਨ੍ਤਿ, ਨਲ਼ੋਵ ਹਰਿਤੋ ਲੁਤੋ’’ਤਿ.

ਨਲ਼ਵਗ੍ਗੋ ਪਠਮੋ.

ਤਸ੍ਸੁਦ੍ਦਾਨਂ –

ਓਘਂ ਨਿਮੋਕ੍ਖਂ ਉਪਨੇਯ੍ਯਂ, ਅਚ੍ਚੇਨ੍ਤਿ ਕਤਿਛਿਨ੍ਦਿ ਚ;

ਜਾਗਰਂ ਅਪ੍ਪਟਿਵਿਦਿਤਾ, ਸੁਸਮ੍ਮੁਟ੍ਠਾ ਮਾਨਕਾਮਿਨਾ;

ਅਰਞ੍ਞੇ ਦਸਮੋ ਵੁਤ੍ਤੋ, ਵਗ੍ਗੋ ਤੇਨ ਪਵੁਚ੍ਚਤਿ.

੨. ਨਨ੍ਦਨਵਗ੍ਗੋ

੧. ਨਨ੍ਦਨਸੁਤ੍ਤਂ

੧੧. ਏਵਂ ਮੇ ਸੁਤਂ – ਏਕਂ ਸਮਯਂ ਭਗਵਾ ਸਾਵਤ੍ਥਿਯਂ ਵਿਹਰਤਿ ਜੇਤਵਨੇ ਅਨਾਥਪਿਣ੍ਡਿਕਸ੍ਸ ਆਰਾਮੇ. ਤਤ੍ਰ ਖੋ ਭਗਵਾ ਭਿਕ੍ਖੂ ਆਮਨ੍ਤੇਸਿ – ‘‘ਭਿਕ੍ਖਵੋ’’ਤਿ. ‘‘ਭਦਨ੍ਤੇ’’ਤਿ ਤੇ ਭਿਕ੍ਖੂ ਭਗਵਤੋ ਪਚ੍ਚਸ੍ਸੋਸੁਂ. ਭਗਵਾ ਏਤਦਵੋਚ –

‘‘ਭੂਤਪੁਬ੍ਬਂ, ਭਿਕ੍ਖਵੇ, ਅਞ੍ਞਤਰਾ ਤਾਵਤਿਂਸਕਾਯਿਕਾ ਦੇਵਤਾ ਨਨ੍ਦਨੇ ਵਨੇ ਅਚ੍ਛਰਾਸਙ੍ਘਪਰਿਵੁਤਾ ਦਿਬ੍ਬੇਹਿ ਪਞ੍ਚਹਿ ਕਾਮਗੁਣੇਹਿ ਸਮਪ੍ਪਿਤਾ ਸਮਙ੍ਗੀਭੂਤਾ ਪਰਿਚਾਰਿਯਮਾਨਾ [ਪਰਿਚਾਰਿਯਮਾਨਾ (ਸ੍ਯਾ. ਕਂ. ਕ.)] ਤਾਯਂ ਵੇਲਾਯਂ ਇਮਂ ਗਾਥਂ ਅਭਾਸਿ –

‘‘ਨ ਤੇ ਸੁਖਂ ਪਜਾਨਨ੍ਤਿ, ਯੇ ਨ ਪਸ੍ਸਨ੍ਤਿ ਨਨ੍ਦਨਂ;

ਆਵਾਸਂ ਨਰਦੇਵਾਨਂ, ਤਿਦਸਾਨਂ ਯਸਸ੍ਸਿਨ’’ਨ੍ਤਿ.

‘‘ਏਵਂ ਵੁਤ੍ਤੇ, ਭਿਕ੍ਖਵੇ, ਅਞ੍ਞਤਰਾ ਦੇਵਤਾ ਤਂ ਦੇਵਤਂ ਗਾਥਾਯ ਪਚ੍ਚਭਾਸਿ –

‘‘ਨ ਤ੍ਵਂ ਬਾਲੇ ਪਜਾਨਾਸਿ, ਯਥਾ ਅਰਹਤਂ ਵਚੋ;

ਅਨਿਚ੍ਚਾ ਸਬ੍ਬਸਙ੍ਖਾਰਾ [ਸਬ੍ਬੇ ਸਙ੍ਖਾਰਾ (ਸੀ. ਸ੍ਯਾ. ਕਂ.)], ਉਪ੍ਪਾਦਵਯਧਮ੍ਮਿਨੋ;

ਉਪ੍ਪਜ੍ਜਿਤ੍ਵਾ ਨਿਰੁਜ੍ਝਨ੍ਤਿ, ਤੇਸਂ ਵੂਪਸਮੋ ਸੁਖੋ’’ਤਿ.

੨. ਨਨ੍ਦਤਿਸੁਤ੍ਤਂ

੧੨. ਸਾਵਤ੍ਥਿਨਿਦਾਨਂ. ਏਕਮਨ੍ਤਂ ਠਿਤਾ ਖੋ ਸਾ ਦੇਵਤਾ ਭਗਵਤੋ ਸਨ੍ਤਿਕੇ ਇਮਂ ਗਾਥਂ ਅਭਾਸਿ –

‘‘ਨਨ੍ਦਤਿ ਪੁਤ੍ਤੇਹਿ ਪੁਤ੍ਤਿਮਾ,

ਗੋਮਾ [ਗੋਮਿਕੋ (ਸੀ. ਸ੍ਯਾ. ਕਂ. ਪੀ.)] ਗੋਹਿ ਤਥੇਵ ਨਨ੍ਦਤਿ;

ਉਪਧੀਹਿ ਨਰਸ੍ਸ ਨਨ੍ਦਨਾ,

ਨ ਹਿ ਸੋ ਨਨ੍ਦਤਿ ਯੋ ਨਿਰੂਪਧੀ’’ਤਿ.

‘‘ਸੋਚਤਿ ਪੁਤ੍ਤੇਹਿ ਪੁਤ੍ਤਿਮਾ,

ਗੋਮਾ ਗੋਹਿ ਤਥੇਵ ਸੋਚਤਿ;

ਉਪਧੀਹਿ ਨਰਸ੍ਸ ਸੋਚਨਾ,

ਨ ਹਿ ਸੋ ਸੋਚਤਿ ਯੋ ਨਿਰੂਪਧੀ’’ਤਿ.

੩. ਨਤ੍ਥਿਪੁਤ੍ਤਸਮਸੁਤ੍ਤਂ

੧੩. ਸਾਵਤ੍ਥਿਨਿਦਾਨਂ. ਏਕਮਨ੍ਤਂ ਠਿਤਾ ਖੋ ਸਾ ਦੇਵਤਾ ਭਗਵਤੋ ਸਨ੍ਤਿਕੇ ਇਮਂ ਗਾਥਂ ਅਭਾਸਿ –

‘‘ਨਤ੍ਥਿ ਪੁਤ੍ਤਸਮਂ ਪੇਮਂ, ਨਤ੍ਥਿ ਗੋਸਮਿਤਂ ਧਨਂ;

ਨਤ੍ਥਿ ਸੂਰਿਯਸਮਾ [ਸੁਰਿਯਸਮਾ (ਸੀ. ਸ੍ਯਾ. ਕਂ. ਪੀ.)] ਆਭਾ, ਸਮੁਦ੍ਦਪਰਮਾ ਸਰਾ’’ਤਿ.

‘‘ਨਤ੍ਥਿ ਅਤ੍ਤਸਮਂ ਪੇਮਂ, ਨਤ੍ਥਿ ਧਞ੍ਞਸਮਂ ਧਨਂ;

ਨਤ੍ਥਿ ਪਞ੍ਞਾਸਮਾ ਆਭਾ, ਵੁਟ੍ਠਿ ਵੇ ਪਰਮਾ ਸਰਾ’’ਤਿ.

੪. ਖਤ੍ਤਿਯਸੁਤ੍ਤਂ

੧੪. ‘‘ਖਤ੍ਤਿਯੋ ਦ੍ਵਿਪਦਂ ਸੇਟ੍ਠੋ, ਬਲੀਬਦ੍ਦੋ [ਬਲਿਵਦ੍ਦੋ (ਸੀ. ਪੀ.), ਬਲਿਬਦ੍ਦੋ (ਸ੍ਯਾ. ਕਂ. ਕ.)] ਚਤੁਪ੍ਪਦਂ.

ਕੋਮਾਰੀ ਸੇਟ੍ਠਾ ਭਰਿਯਾਨਂ, ਯੋ ਚ ਪੁਤ੍ਤਾਨ ਪੁਬ੍ਬਜੋ’’ਤਿ.

‘‘ਸਮ੍ਬੁਦ੍ਧੋ ਦ੍ਵਿਪਦਂ ਸੇਟ੍ਠੋ, ਆਜਾਨੀਯੋ ਚਤੁਪ੍ਪਦਂ;

ਸੁਸ੍ਸੂਸਾ ਸੇਟ੍ਠਾ ਭਰਿਯਾਨਂ, ਯੋ ਚ ਪੁਤ੍ਤਾਨਮਸ੍ਸਵੋ’’ਤਿ.

੫. ਸਣਮਾਨਸੁਤ੍ਤਂ

੧੫. ‘‘ਠਿਤੇ ਮਜ੍ਝਨ੍ਹਿਕੇ [ਮਜ੍ਝਨ੍ਤਿਕੇ (ਸਬ੍ਬਤ੍ਥ)] ਕਾਲੇ, ਸਨ੍ਨਿਸੀਵੇਸੁ ਪਕ੍ਖਿਸੁ.

ਸਣਤੇਵ ਬ੍ਰਹਾਰਞ੍ਞਂ [ਮਹਾਰਞ੍ਞਂ (ਕ. ਸੀ. ਸ੍ਯਾ. ਕਂ. ਕ.)], ਤਂ ਭਯਂ ਪਟਿਭਾਤਿ ਮ’’ਨ੍ਤਿ.

‘‘ਠਿਤੇ ਮਜ੍ਝਨ੍ਹਿਕੇ ਕਾਲੇ, ਸਨ੍ਨਿਸੀਵੇਸੁ ਪਕ੍ਖਿਸੁ;

ਸਣਤੇਵ ਬ੍ਰਹਾਰਞ੍ਞਂ, ਸਾ ਰਤਿ ਪਟਿਭਾਤਿ ਮ’’ਨ੍ਤਿ.

੬. ਨਿਦ੍ਦਾਤਨ੍ਦੀਸੁਤ੍ਤਂ

੧੬. ‘‘ਨਿਦ੍ਦਾ ਤਨ੍ਦੀ ਵਿਜਮ੍ਭਿਤਾ [ਤਨ੍ਦਿ ਵਿਜਮ੍ਭਿਕਾ (ਸੀ. ਪੀ.)], ਅਰਤੀ ਭਤ੍ਤਸਮ੍ਮਦੋ.

ਏਤੇਨ ਨਪ੍ਪਕਾਸਤਿ, ਅਰਿਯਮਗ੍ਗੋ ਇਧ ਪਾਣਿਨ’’ਨ੍ਤਿ.

‘‘ਨਿਦ੍ਦਂ ਤਨ੍ਦਿਂ ਵਿਜਮ੍ਭਿਤਂ, ਅਰਤਿਂ ਭਤ੍ਤਸਮ੍ਮਦਂ;

ਵੀਰਿਯੇਨ [ਵਿਰਿਯੇਨ (ਸੀ. ਸ੍ਯਾ. ਕਂ. ਪੀ.)] ਨਂ ਪਣਾਮੇਤ੍ਵਾ, ਅਰਿਯਮਗ੍ਗੋ ਵਿਸੁਜ੍ਝਤੀ’’ਤਿ.

੭. ਦੁਕ੍ਕਰਸੁਤ੍ਤਂ

੧੭. ‘‘ਦੁਕ੍ਕਰਂ ਦੁਤ੍ਤਿਤਿਕ੍ਖਞ੍ਚ, ਅਬ੍ਯਤ੍ਤੇਨ ਚ ਸਾਮਞ੍ਞਂ.

ਬਹੂਹਿ ਤਤ੍ਥ ਸਮ੍ਬਾਧਾ, ਯਤ੍ਥ ਬਾਲੋ ਵਿਸੀਦਤੀ’’ਤਿ.

‘‘ਕਤਿਹਂ ਚਰੇਯ੍ਯ ਸਾਮਞ੍ਞਂ, ਚਿਤ੍ਤਂ ਚੇ ਨ ਨਿਵਾਰਯੇ;

ਪਦੇ ਪਦੇ ਵਿਸੀਦੇਯ੍ਯ, ਸਙ੍ਕਪ੍ਪਾਨਂ ਵਸਾਨੁਗੋ’’ਤਿ.

‘‘ਕੁਮ੍ਮੋਵ ਅਙ੍ਗਾਨਿ ਸਕੇ ਕਪਾਲੇ,

ਸਮੋਦਹਂ ਭਿਕ੍ਖੁ ਮਨੋਵਿਤਕ੍ਕੇ;

ਅਨਿਸ੍ਸਿਤੋ ਅਞ੍ਞਮਹੇਠਯਾਨੋ,

ਪਰਿਨਿਬ੍ਬੁਤੋ ਨੂਪਵਦੇਯ੍ਯ ਕਞ੍ਚੀ’’ਤਿ.

੮. ਹਿਰੀਸੁਤ੍ਤਂ

੧੮. ‘‘ਹਿਰੀਨਿਸੇਧੋ ਪੁਰਿਸੋ, ਕੋਚਿ ਲੋਕਸ੍ਮਿਂ ਵਿਜ੍ਜਤਿ.

ਯੋ ਨਿਨ੍ਦਂ ਅਪਬੋਧਤਿ [ਅਪਬੋਧੇਤਿ (ਸ੍ਯਾ. ਕਂ. ਕ.)], ਅਸ੍ਸੋ ਭਦ੍ਰੋ ਕਸਾਮਿਵਾ’’ਤਿ.

‘‘ਹਿਰੀਨਿਸੇਧਾ ਤਨੁਯਾ, ਯੇ ਚਰਨ੍ਤਿ ਸਦਾ ਸਤਾ;

ਅਨ੍ਤਂ ਦੁਕ੍ਖਸ੍ਸ ਪਪ੍ਪੁਯ੍ਯ, ਚਰਨ੍ਤਿ ਵਿਸਮੇ ਸਮ’’ਨ੍ਤਿ.

੯. ਕੁਟਿਕਾਸੁਤ੍ਤਂ

੧੯. ‘‘ਕਚ੍ਚਿ ਤੇ ਕੁਟਿਕਾ ਨਤ੍ਥਿ, ਕਚ੍ਚਿ ਨਤ੍ਥਿ ਕੁਲਾਵਕਾ;

ਕਚ੍ਚਿ ਸਨ੍ਤਾਨਕਾ ਨਤ੍ਥਿ, ਕਚ੍ਚਿ ਮੁਤ੍ਤੋਸਿ ਬਨ੍ਧਨਾ’’ਤਿ.

‘‘ਤਗ੍ਘ ਮੇ ਕੁਟਿਕਾ ਨਤ੍ਥਿ, ਤਗ੍ਘ ਨਤ੍ਥਿ ਕੁਲਾਵਕਾ;

ਤਗ੍ਘ ਸਨ੍ਤਾਨਕਾ ਨਤ੍ਥਿ, ਤਗ੍ਘ ਮੁਤ੍ਤੋਮ੍ਹਿ ਬਨ੍ਧਨਾ’’ਤਿ.

‘‘ਕਿਨ੍ਤਾਹਂ ਕੁਟਿਕਂ ਬ੍ਰੂਮਿ, ਕਿਂ ਤੇ ਬ੍ਰੂਮਿ ਕੁਲਾਵਕਂ;

ਕਿਂ ਤੇ ਸਨ੍ਤਾਨਕਂ ਬ੍ਰੂਮਿ, ਕਿਨ੍ਤਾਹਂ ਬ੍ਰੂਮਿ ਬਨ੍ਧਨ’’ਨ੍ਤਿ.

‘‘ਮਾਤਰਂ ਕੁਟਿਕਂ ਬ੍ਰੂਸਿ, ਭਰਿਯਂ ਬ੍ਰੂਸਿ ਕੁਲਾਵਕਂ;

ਪੁਤ੍ਤੇ ਸਨ੍ਤਾਨਕੇ ਬ੍ਰੂਸਿ, ਤਣ੍ਹਂ ਮੇ ਬ੍ਰੂਸਿ ਬਨ੍ਧਨ’’ਨ੍ਤਿ.

‘‘ਸਾਹੁ ਤੇ ਕੁਟਿਕਾ ਨਤ੍ਥਿ, ਸਾਹੁ ਨਤ੍ਥਿ ਕੁਲਾਵਕਾ;

ਸਾਹੁ ਸਨ੍ਤਾਨਕਾ ਨਤ੍ਥਿ, ਸਾਹੁ ਮੁਤ੍ਤੋਸਿ ਬਨ੍ਧਨਾ’’ਤਿ.

੧੦. ਸਮਿਦ੍ਧਿਸੁਤ੍ਤਂ

੨੦. ਏਵਂ ਮੇ ਸੁਤਂ – ਏਕਂ ਸਮਯਂ ਭਗਵਾ ਰਾਜਗਹੇ ਵਿਹਰਤਿ ਤਪੋਦਾਰਾਮੇ. ਅਥ ਖੋ ਆਯਸ੍ਮਾ ਸਮਿਦ੍ਧਿ ਰਤ੍ਤਿਯਾ ਪਚ੍ਚੂਸਸਮਯਂ ਪਚ੍ਚੁਟ੍ਠਾਯ ਯੇਨ ਤਪੋਦਾ ਤੇਨੁਪਸਙ੍ਕਮਿ ਗਤ੍ਤਾਨਿ ਪਰਿਸਿਞ੍ਚਿਤੁਂ. ਤਪੋਦੇ ਗਤ੍ਤਾਨਿ ਪਰਿਸਿਞ੍ਚਿਤ੍ਵਾ ਪਚ੍ਚੁਤ੍ਤਰਿਤ੍ਵਾ ਏਕਚੀਵਰੋ ਅਟ੍ਠਾਸਿ ਗਤ੍ਤਾਨਿ ਪੁਬ੍ਬਾਪਯਮਾਨੋ. ਅਥ ਖੋ ਅਞ੍ਞਤਰਾ ਦੇਵਤਾ ਅਭਿਕ੍ਕਨ੍ਤਾਯ ਰਤ੍ਤਿਯਾ ਅਭਿਕ੍ਕਨ੍ਤਵਣ੍ਣਾ ਕੇਵਲਕਪ੍ਪਂ ਤਪੋਦਂ ਓਭਾਸੇਤ੍ਵਾ ਯੇਨ ਆਯਸ੍ਮਾ ਸਮਿਦ੍ਧਿ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਵੇਹਾਸਂ ਠਿਤਾ ਆਯਸ੍ਮਨ੍ਤਂ ਸਮਿਦ੍ਧਿਂ ਗਾਥਾਯ ਅਜ੍ਝਭਾਸਿ –

‘‘ਅਭੁਤ੍ਵਾ ਭਿਕ੍ਖਸਿ ਭਿਕ੍ਖੁ, ਨ ਹਿ ਭੁਤ੍ਵਾਨ ਭਿਕ੍ਖਸਿ;

ਭੁਤ੍ਵਾਨ ਭਿਕ੍ਖੁ ਭਿਕ੍ਖਸ੍ਸੁ, ਮਾ ਤਂ ਕਾਲੋ ਉਪਚ੍ਚਗਾ’’ਤਿ.