੫. ਆਦਿਤ੍ਤਵਗ੍ਗੋ

੧. ਆਦਿਤ੍ਤਸੁਤ੍ਤਂ

੪੧. ਏਵਂ ਮੇ ਸੁਤਂ – ਏਕਂ ਸਮਯਂ ਭਗਵਾ ਸਾਵਤ੍ਥਿਯਂ ਵਿਹਰਤਿ ਜੇਤਵਨੇ ਅਨਾਥਪਿਣ੍ਡਿਕਸ੍ਸ ਆਰਾਮੇ. ਅਥ ਖੋ ਅਞ੍ਞਤਰਾ ਦੇਵਤਾ ਅਭਿਕ੍ਕਨ੍ਤਾਯ ਰਤ੍ਤਿਯਾ ਅਭਿਕ੍ਕਨ੍ਤਵਣ੍ਣਾ ਕੇਵਲਕਪ੍ਪਂ ਜੇਤਵਨਂ ਓਭਾਸੇਤ੍ਵਾ ਯੇਨ ਭਗਵਾ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਅਟ੍ਠਾਸਿ. ਏਕਮਨ੍ਤਂ ਠਿਤਾ ਖੋ ਸਾ ਦੇਵਤਾ ਭਗਵਤੋ ਸਨ੍ਤਿਕੇ ਇਮਾ ਗਾਥਾਯੋ ਅਭਾਸਿ –

‘‘ਆਦਿਤ੍ਤਸ੍ਮਿਂ ਅਗਾਰਸ੍ਮਿਂ, ਯਂ ਨੀਹਰਤਿ ਭਾਜਨਂ;

ਤਂ ਤਸ੍ਸ ਹੋਤਿ ਅਤ੍ਥਾਯ, ਨੋ ਚ ਯਂ ਤਤ੍ਥ ਡਯ੍ਹਤਿ.

‘‘ਏਵਂ ਆਦਿਤ੍ਤਕੋ ਲੋਕੋ, ਜਰਾਯ ਮਰਣੇਨ ਚ;

ਨੀਹਰੇਥੇਵ ਦਾਨੇਨ, ਦਿਨ੍ਨਂ ਹੋਤਿ ਸੁਨੀਹਤਂ.

‘‘ਦਿਨ੍ਨਂ ਸੁਖਫਲਂ ਹੋਤਿ, ਨਾਦਿਨ੍ਨਂ ਹੋਤਿ ਤਂ ਤਥਾ;

ਚੋਰਾ ਹਰਨ੍ਤਿ ਰਾਜਾਨੋ, ਅਗ੍ਗਿ ਡਹਤਿ ਨਸ੍ਸਤਿ.

‘‘ਅਥ ਅਨ੍ਤੇਨ ਜਹਤਿ, ਸਰੀਰਂ ਸਪਰਿਗ੍ਗਹਂ;

ਏਤਦਞ੍ਞਾਯ ਮੇਧਾਵੀ, ਭੁਞ੍ਜੇਥ ਚ ਦਦੇਥ ਚ;

ਦਤ੍ਵਾ ਚ ਭੁਤ੍ਵਾ ਚ ਯਥਾਨੁਭਾਵਂ;

ਅਨਿਨ੍ਦਿਤੋ ਸਗ੍ਗਮੁਪੇਤਿ ਠਾਨ’’ਨ੍ਤਿ.

੨. ਕਿਂਦਦਸੁਤ੍ਤਂ

੪੨. ‘‘ਕਿਂਦਦੋ ਬਲਦੋ ਹੋਤਿ, ਕਿਂਦਦੋ ਹੋਤਿ ਵਣ੍ਣਦੋ;

ਕਿਂਦਦੋ ਸੁਖਦੋ ਹੋਤਿ, ਕਿਂਦਦੋ ਹੋਤਿ ਚਕ੍ਖੁਦੋ;

ਕੋ ਚ ਸਬ੍ਬਦਦੋ ਹੋਤਿ, ਤਂ ਮੇ ਅਕ੍ਖਾਹਿ ਪੁਚ੍ਛਿਤੋ’’ਤਿ.

‘‘ਅਨ੍ਨਦੋ ਬਲਦੋ ਹੋਤਿ, ਵਤ੍ਥਦੋ ਹੋਤਿ ਵਣ੍ਣਦੋ;

ਯਾਨਦੋ ਸੁਖਦੋ ਹੋਤਿ, ਦੀਪਦੋ ਹੋਤਿ ਚਕ੍ਖੁਦੋ.

‘‘ਸੋ ਚ ਸਬ੍ਬਦਦੋ ਹੋਤਿ, ਯੋ ਦਦਾਤਿ ਉਪਸ੍ਸਯਂ;

ਅਮਤਂ ਦਦੋ ਚ ਸੋ ਹੋਤਿ, ਯੋ ਧਮ੍ਮਮਨੁਸਾਸਤੀ’’ਤਿ.

੩. ਅਨ੍ਨਸੁਤ੍ਤਂ

੪੩. ‘‘ਅਨ੍ਨਮੇਵਾਭਿਨਨ੍ਦਨ੍ਤਿ, ਉਭਯੇ ਦੇਵਮਾਨੁਸਾ;

ਅਥ ਕੋ ਨਾਮ ਸੋ ਯਕ੍ਖੋ, ਯਂ ਅਨ੍ਨਂ ਨਾਭਿਨਨ੍ਦਤੀ’’ਤਿ.

‘‘ਯੇ ਨਂ ਦਦਨ੍ਤਿ ਸਦ੍ਧਾਯ, ਵਿਪ੍ਪਸਨ੍ਨੇਨ ਚੇਤਸਾ;

ਤਮੇਵ ਅਨ੍ਨਂ ਭਜਤਿ, ਅਸ੍ਮਿਂ ਲੋਕੇ ਪਰਮ੍ਹਿ ਚ.

‘‘ਤਸ੍ਮਾ ਵਿਨੇਯ੍ਯ ਮਚ੍ਛੇਰਂ, ਦਜ੍ਜਾ ਦਾਨਂ ਮਲਾਭਿਭੂ;

ਪੁਞ੍ਞਾਨਿ ਪਰਲੋਕਸ੍ਮਿਂ, ਪਤਿਟ੍ਠਾ ਹੋਨ੍ਤਿ ਪਾਣਿਨ’’ਨ੍ਤਿ.

੪. ਏਕਮੂਲਸੁਤ੍ਤਂ

੪੪. ‘‘ਏਕਮੂਲਂ ਦ੍ਵਿਰਾਵਟ੍ਟਂ, ਤਿਮਲਂ ਪਞ੍ਚਪਤ੍ਥਰਂ;

ਸਮੁਦ੍ਦਂ ਦ੍ਵਾਦਸਾਵਟ੍ਟਂ, ਪਾਤਾਲਂ ਅਤਰੀ ਇਸੀ’’ਤਿ.

੫. ਅਨੋਮਸੁਤ੍ਤਂ

੪੫. ‘‘ਅਨੋਮਨਾਮਂ ਨਿਪੁਣਤ੍ਥਦਸ੍ਸਿਂ, ਪਞ੍ਞਾਦਦਂ ਕਾਮਾਲਯੇ ਅਸਤ੍ਤਂ;

ਤਂ ਪਸ੍ਸਥ ਸਬ੍ਬਵਿਦੁਂ ਸੁਮੇਧਂ, ਅਰਿਯੇ ਪਥੇ ਕਮਮਾਨਂ ਮਹੇਸਿ’’ਨ੍ਤਿ.

੬. ਅਚ੍ਛਰਾਸੁਤ੍ਤਂ

੪੬. ‘‘ਅਚ੍ਛਰਾਗਣਸਙ੍ਘੁਟ੍ਠਂ, ਪਿਸਾਚਗਣਸੇਵਿਤਂ;

ਵਨਨ੍ਤਂ ਮੋਹਨਂ ਨਾਮ, ਕਥਂ ਯਾਤ੍ਰਾ ਭਵਿਸ੍ਸਤੀ’’ਤਿ.

‘‘ਉਜੁਕੋ ਨਾਮ ਸੋ ਮਗ੍ਗੋ, ਅਭਯਾ ਨਾਮ ਸਾ ਦਿਸਾ;

ਰਥੋ ਅਕੂਜਨੋ ਨਾਮ, ਧਮ੍ਮਚਕ੍ਕੇਹਿ ਸਂਯੁਤੋ.

‘‘ਹਿਰੀ ਤਸ੍ਸ ਅਪਾਲਮ੍ਬੋ, ਸਤ੍ਯਸ੍ਸ ਪਰਿਵਾਰਣਂ;

ਧਮ੍ਮਾਹਂ ਸਾਰਥਿਂ ਬ੍ਰੂਮਿ, ਸਮ੍ਮਾਦਿਟ੍ਠਿਪੁਰੇਜਵਂ.

‘‘ਯਸ੍ਸ ਏਤਾਦਿਸਂ ਯਾਨਂ, ਇਤ੍ਥਿਯਾ ਪੁਰਿਸਸ੍ਸ ਵਾ;

ਸ ਵੇ ਏਤੇਨ ਯਾਨੇਨ, ਨਿਬ੍ਬਾਨਸ੍ਸੇਵ ਸਨ੍ਤਿਕੇ’’ਤਿ.

੭. ਵਨਰੋਪਸੁਤ੍ਤਂ

੪੭. ‘‘ਕੇਸਂ ਦਿਵਾ ਚ ਰਤ੍ਤੋ ਚ, ਸਦਾ ਪੁਞ੍ਞਂ ਪਵਡ੍ਢਤਿ;

ਧਮ੍ਮਟ੍ਠਾ ਸੀਲਸਮ੍ਪਨ੍ਨਾ, ਕੇ ਜਨਾ ਸਗ੍ਗਗਾਮਿਨੋ’’ਤਿ.

‘‘ਆਰਾਮਰੋਪਾ ਵਨਰੋਪਾ, ਯੇ ਜਨਾ ਸੇਤੁਕਾਰਕਾ;

ਪਪਞ੍ਚ ਉਦਪਾਨਞ੍ਚ, ਯੇ ਦਦਨ੍ਤਿ ਉਪਸ੍ਸਯਂ.

‘‘ਤੇਸਂ ਦਿਵਾ ਚ ਰਤ੍ਤੋ ਚ, ਸਦਾ ਪੁਞ੍ਞਂ ਪਵਡ੍ਢਤਿ;

ਧਮ੍ਮਟ੍ਠਾ ਸੀਲਸਮ੍ਪਨ੍ਨਾ, ਤੇ ਜਨਾ ਸਗ੍ਗਗਾਮਿਨੋ’’ਤਿ.

੮. ਜੇਤਵਨਸੁਤ੍ਤਂ

੪੮. ‘‘ਇਦਞ੍ਹਿ ਤਂ ਜੇਤਵਨਂ, ਇਸਿਸਙ੍ਘਨਿਸੇਵਿਤਂ;

ਆਵੁਤ੍ਥਂ [ਆਵੁਟ੍ਠਂ (ਕ.)] ਧਮ੍ਮਰਾਜੇਨ, ਪੀਤਿਸਞ੍ਜਨਨਂ ਮਮ.

‘‘ਕਮ੍ਮਂ ਵਿਜ੍ਜਾ ਚ ਧਮ੍ਮੋ ਚ, ਸੀਲਂ ਜੀਵਿਤਮੁਤ੍ਤਮਂ;

ਏਤੇਨ ਮਚ੍ਚਾ ਸੁਜ੍ਝਨ੍ਤਿ, ਨ ਗੋਤ੍ਤੇਨ ਧਨੇਨ ਵਾ.

‘‘ਤਸ੍ਮਾ ਹਿ ਪਣ੍ਡਿਤੋ ਪੋਸੋ, ਸਮ੍ਪਸ੍ਸਂ ਅਤ੍ਥਮਤ੍ਤਨੋ;

ਯੋਨਿਸੋ ਵਿਚਿਨੇ ਧਮ੍ਮਂ, ਏਵਂ ਤਤ੍ਥ ਵਿਸੁਜ੍ਝਤਿ.

‘‘ਸਾਰਿਪੁਤ੍ਤੋਵ ਪਞ੍ਞਾਯ, ਸੀਲੇਨ ਉਪਸਮੇਨ ਚ;

ਯੋਪਿ ਪਾਰਙ੍ਗਤੋ ਭਿਕ੍ਖੁ, ਏਤਾਵਪਰਮੋ ਸਿਯਾ’’ਤਿ.

੯. ਮਚ੍ਛਰਿਸੁਤ੍ਤਂ

੪੯. ‘‘ਯੇਧ ਮਚ੍ਛਰਿਨੋ ਲੋਕੇ, ਕਦਰਿਯਾ ਪਰਿਭਾਸਕਾ;

ਅਞ੍ਞੇਸਂ ਦਦਮਾਨਾਨਂ, ਅਨ੍ਤਰਾਯਕਰਾ ਨਰਾ.

‘‘ਕੀਦਿਸੋ ਤੇਸਂ ਵਿਪਾਕੋ, ਸਮ੍ਪਰਾਯੋ ਚ ਕੀਦਿਸੋ;

ਭਗਵਨ੍ਤਂ ਪੁਟ੍ਠੁਮਾਗਮ੍ਮ, ਕਥਂ ਜਾਨੇਮੁ ਤਂ ਮਯ’’ਨ੍ਤਿ.

‘‘ਯੇਧ ਮਚ੍ਛਰਿਨੋ ਲੋਕੇ, ਕਦਰਿਯਾ ਪਰਿਭਾਸਕਾ;

ਅਞ੍ਞੇਸਂ ਦਦਮਾਨਾਨਂ, ਅਨ੍ਤਰਾਯਕਰਾ ਨਰਾ.

‘‘ਨਿਰਯਂ ਤਿਰਚ੍ਛਾਨਯੋਨਿਂ, ਯਮਲੋਕਂ ਉਪਪਜ੍ਜਰੇ;

ਸਚੇ ਏਨ੍ਤਿ ਮਨੁਸ੍ਸਤ੍ਤਂ, ਦਲਿਦ੍ਦੇ ਜਾਯਰੇ ਕੁਲੇ.

‘‘ਚੋਲ਼ਂ ਪਿਣ੍ਡੋ ਰਤੀ ਖਿਡ੍ਡਾ, ਯਤ੍ਥ ਕਿਚ੍ਛੇਨ ਲਬ੍ਭਤਿ;

ਪਰਤੋ ਆਸੀਸਰੇ [ਆਸਿਂਸਰੇ (ਸੀ. ਸ੍ਯਾ. ਕਂ. ਪੀ.)] ਬਾਲਾ, ਤਮ੍ਪਿ ਤੇਸਂ ਨ ਲਬ੍ਭਤਿ;

ਦਿਟ੍ਠੇ ਧਮ੍ਮੇਸ ਵਿਪਾਕੋ, ਸਮ੍ਪਰਾਯੇ [ਸਮ੍ਪਰਾਯੋ (ਸ੍ਯਾ. ਕਂ. ਪੀ.)] ਚ ਦੁਗ੍ਗਤੀ’’ਤਿ.

‘‘ਇਤਿਹੇਤਂ ਵਿਜਾਨਾਮ, ਅਞ੍ਞਂ ਪੁਚ੍ਛਾਮ ਗੋਤਮ;

ਯੇਧ ਲਦ੍ਧਾ ਮਨੁਸ੍ਸਤ੍ਤਂ, ਵਦਞ੍ਞੂ ਵੀਤਮਚ੍ਛਰਾ.

‘‘ਬੁਦ੍ਧੇ ਪਸਨ੍ਨਾ ਧਮ੍ਮੇ ਚ, ਸਙ੍ਘੇ ਚ ਤਿਬ੍ਬਗਾਰਵਾ;

ਕੀਦਿਸੋ ਤੇਸਂ ਵਿਪਾਕੋ, ਸਮ੍ਪਰਾਯੋ ਚ ਕੀਦਿਸੋ;

ਭਗਵਨ੍ਤਂ ਪੁਟ੍ਠੁਮਾਗਮ੍ਮ, ਕਥਂ ਜਾਨੇਮੁ ਤਂ ਮਯ’’ਨ੍ਤਿ.

‘‘ਯੇਧ ਲਦ੍ਧਾ ਮਨੁਸ੍ਸਤ੍ਤਂ, ਵਦਞ੍ਞੂ ਵੀਤਮਚ੍ਛਰਾ;

ਬੁਦ੍ਧੇ ਪਸਨ੍ਨਾ ਧਮ੍ਮੇ ਚ, ਸਙ੍ਘੇ ਚ ਤਿਬ੍ਬਗਾਰਵਾ;

ਏਤੇ ਸਗ੍ਗਾ [ਸਗ੍ਗੇ (ਸੀ. ਸ੍ਯਾ. ਕਂ.)] ਪਕਾਸਨ੍ਤਿ, ਯਤ੍ਥ ਤੇ ਉਪਪਜ੍ਜਰੇ.

‘‘ਸਚੇ ਏਨ੍ਤਿ ਮਨੁਸ੍ਸਤ੍ਤਂ, ਅਡ੍ਢੇ ਆਜਾਯਰੇ ਕੁਲੇ;

ਚੋਲ਼ਂ ਪਿਣ੍ਡੋ ਰਤੀ ਖਿਡ੍ਡਾ, ਯਤ੍ਥਾਕਿਚ੍ਛੇਨ ਲਬ੍ਭਤਿ.

‘‘ਪਰਸਮ੍ਭਤੇਸੁ ਭੋਗੇਸੁ, ਵਸਵਤ੍ਤੀਵ ਮੋਦਰੇ;

ਦਿਟ੍ਠੇ ਧਮ੍ਮੇਸ ਵਿਪਾਕੋ, ਸਮ੍ਪਰਾਯੇ ਚ ਸੁਗ੍ਗਤੀ’’ਤਿ.

੧੦. ਘਟੀਕਾਰਸੁਤ੍ਤਂ

੫੦. ‘‘ਅਵਿਹਂ ਉਪਪਨ੍ਨਾਸੇ, ਵਿਮੁਤ੍ਤਾ ਸਤ੍ਤ ਭਿਕ੍ਖਵੋ;

ਰਾਗਦੋਸਪਰਿਕ੍ਖੀਣਾ, ਤਿਣ੍ਣਾ ਲੋਕੇ ਵਿਸਤ੍ਤਿਕ’’ਨ੍ਤਿ.

‘‘ਕੇ ਚ ਤੇ ਅਤਰੁਂ ਪਙ੍ਕਂ [ਸਙ੍ਗਂ (ਸੀ. ਸ੍ਯਾ.)], ਮਚ੍ਚੁਧੇਯ੍ਯਂ ਸੁਦੁਤ੍ਤਰਂ;

ਕੇ ਹਿਤ੍ਵਾ ਮਾਨੁਸਂ ਦੇਹਂ, ਦਿਬ੍ਬਯੋਗਂ ਉਪਚ੍ਚਗੁ’’ਨ੍ਤਿ.

‘‘ਉਪਕੋ ਪਲਗਣ੍ਡੋ ਚ, ਪੁਕ੍ਕੁਸਾਤਿ ਚ ਤੇ ਤਯੋ;

ਭਦ੍ਦਿਯੋ ਖਣ੍ਡਦੇਵੋ ਚ, ਬਾਹੁਰਗ੍ਗਿ ਚ ਸਿਙ੍ਗਿਯੋ [ਬਹੁਦਨ੍ਤੀ ਚ ਪਿਙ੍ਗਯੋ (ਸੀ.)];

ਤੇ ਹਿਤ੍ਵਾ ਮਾਨੁਸਂ ਦੇਹਂ, ਦਿਬ੍ਬਯੋਗਂ ਉਪਚ੍ਚਗੁ’’ਨ੍ਤਿ.

‘‘ਕੁਸਲੀ ਭਾਸਸੀ ਤੇਸਂ, ਮਾਰਪਾਸਪ੍ਪਹਾਯਿਨਂ;

ਕਸ੍ਸ ਤੇ ਧਮ੍ਮਮਞ੍ਞਾਯ, ਅਚ੍ਛਿਦੁਂ ਭਵਬਨ੍ਧਨ’’ਨ੍ਤਿ.

‘‘ਨ ਅਞ੍ਞਤ੍ਰ ਭਗਵਤਾ, ਨਾਞ੍ਞਤ੍ਰ ਤਵ ਸਾਸਨਾ;

ਯਸ੍ਸ ਤੇ ਧਮ੍ਮਮਞ੍ਞਾਯ, ਅਚ੍ਛਿਦੁਂ ਭਵਬਨ੍ਧਨਂ.

‘‘ਯਤ੍ਥ ਨਾਮਞ੍ਚ ਰੂਪਞ੍ਚ, ਅਸੇਸਂ ਉਪਰੁਜ੍ਝਤਿ;

ਤਂ ਤੇ ਧਮ੍ਮਂ ਇਧਞ੍ਞਾਯ, ਅਚ੍ਛਿਦੁਂ ਭਵਬਨ੍ਧਨ’’ਨ੍ਤਿ.

‘‘ਗਮ੍ਭੀਰਂ ਭਾਸਸੀ ਵਾਚਂ, ਦੁਬ੍ਬਿਜਾਨਂ ਸੁਦੁਬ੍ਬੁਧਂ;

ਕਸ੍ਸ ਤ੍ਵਂ ਧਮ੍ਮਮਞ੍ਞਾਯ, ਵਾਚਂ ਭਾਸਸਿ ਈਦਿਸ’’ਨ੍ਤਿ.

‘‘ਕੁਮ੍ਭਕਾਰੋ ਪੁਰੇ ਆਸਿਂ, ਵੇਕਲ਼ਿਙ੍ਗੇ [ਵੇਹਲ਼ਿਙ੍ਗੇ (ਸੀ.), ਵੇਭਲ਼ਿਙ੍ਗੇ (ਸ੍ਯਾ. ਕਂ.)] ਘਟੀਕਰੋ;

ਮਾਤਾਪੇਤ੍ਤਿਭਰੋ ਆਸਿਂ, ਕਸ੍ਸਪਸ੍ਸ ਉਪਾਸਕੋ.

‘‘ਵਿਰਤੋ ਮੇਥੁਨਾ ਧਮ੍ਮਾ, ਬ੍ਰਹ੍ਮਚਾਰੀ ਨਿਰਾਮਿਸੋ;

ਅਹੁਵਾ ਤੇ ਸਗਾਮੇਯ੍ਯੋ, ਅਹੁਵਾ ਤੇ ਪੁਰੇ ਸਖਾ.

‘‘ਸੋਹਮੇਤੇ ਪਜਾਨਾਮਿ, ਵਿਮੁਤ੍ਤੇ ਸਤ੍ਤ ਭਿਕ੍ਖਵੋ;

ਰਾਗਦੋਸਪਰਿਕ੍ਖੀਣੇ, ਤਿਣ੍ਣੇ ਲੋਕੇ ਵਿਸਤ੍ਤਿਕ’’ਨ੍ਤਿ.

‘‘ਏਵਮੇਤਂ ਤਦਾ ਆਸਿ, ਯਥਾ ਭਾਸਸਿ ਭਗ੍ਗਵ;

ਕੁਮ੍ਭਕਾਰੋ ਪੁਰੇ ਆਸਿ, ਵੇਕਲ਼ਿਙ੍ਗੇ ਘਟੀਕਰੋ;

ਮਾਤਾਪੇਤ੍ਤਿਭਰੋ ਆਸਿ, ਕਸ੍ਸਪਸ੍ਸ ਉਪਾਸਕੋ.

‘‘ਵਿਰਤੋ ਮੇਥੁਨਾ ਧਮ੍ਮਾ, ਬ੍ਰਹ੍ਮਚਾਰੀ ਨਿਰਾਮਿਸੋ;

ਅਹੁਵਾ ਮੇ ਸਗਾਮੇਯ੍ਯੋ, ਅਹੁਵਾ ਮੇ ਪੁਰੇ ਸਖਾ’’ਤਿ.

‘‘ਏਵਮੇਤਂ ਪੁਰਾਣਾਨਂ, ਸਹਾਯਾਨਂ ਅਹੁ ਸਙ੍ਗਮੋ;

ਉਭਿਨ੍ਨਂ ਭਾਵਿਤਤ੍ਤਾਨਂ, ਸਰੀਰਨ੍ਤਿਮਧਾਰਿਨ’’ਨ੍ਤਿ.

ਆਦਿਤ੍ਤਵਗ੍ਗੋ ਪਞ੍ਚਮੋ.

ਤਸ੍ਸੁਦ੍ਦਾਨਂ –

ਆਦਿਤ੍ਤਂ ਕਿਂਦਦਂ ਅਨ੍ਨਂ, ਏਕਮੂਲਅਨੋਮਿਯਂ;

ਅਚ੍ਛਰਾਵਨਰੋਪਜੇਤਂ, ਮਚ੍ਛਰੇਨ ਘਟੀਕਰੋਤਿ.