੬. ਜਰਾਵਗ੍ਗੋ

੧. ਜਰਾਸੁਤ੍ਤਂ

੫੧. ‘‘ਕਿਂਸੁ ਯਾਵ ਜਰਾ ਸਾਧੁ, ਕਿਂਸੁ ਸਾਧੁ ਪਤਿਟ੍ਠਿਤਂ;

ਕਿਂਸੁ ਨਰਾਨਂ ਰਤਨਂ, ਕਿਂਸੁ ਚੋਰੇਹਿ ਦੂਹਰ’’ਨ੍ਤਿ.

‘‘ਸੀਲਂ ਯਾਵ ਜਰਾ ਸਾਧੁ, ਸਦ੍ਧਾ ਸਾਧੁ ਪਤਿਟ੍ਠਿਤਾ;

ਪਞ੍ਞਾ ਨਰਾਨਂ ਰਤਨਂ, ਪੁਞ੍ਞਂ ਚੋਰੇਹਿ ਦੂਹਰ’’ਨ੍ਤਿ.

੨. ਅਜਰਸਾਸੁਤ੍ਤਂ

੫੨. ‘‘ਕਿਂਸੁ ਅਜਰਸਾ ਸਾਧੁ, ਕਿਂਸੁ ਸਾਧੁ ਅਧਿਟ੍ਠਿਤਂ;

ਕਿਂਸੁ ਨਰਾਨਂ ਰਤਨਂ, ਕਿਂਸੁ ਚੋਰੇਹ੍ਯਹਾਰਿਯ’’ਨ੍ਤਿ.

‘‘ਸੀਲਂ ਅਜਰਸਾ ਸਾਧੁ, ਸਦ੍ਧਾ ਸਾਧੁ ਅਧਿਟ੍ਠਿਤਾ;

ਪਞ੍ਞਾ ਨਰਾਨਂ ਰਤਨਂ, ਪੁਞ੍ਞਂ ਚੋਰੇਹ੍ਯਹਾਰਿਯ’’ਨ੍ਤਿ.

੩. ਮਿਤ੍ਤਸੁਤ੍ਤਂ

੫੩. ‘‘ਕਿਂਸੁ ਪਵਸਤੋ [ਪਥਵਤੋ (ਪੀ. ਕ.)] ਮਿਤ੍ਤਂ, ਕਿਂਸੁ ਮਿਤ੍ਤਂ ਸਕੇ ਘਰੇ;

ਕਿਂ ਮਿਤ੍ਤਂ ਅਤ੍ਥਜਾਤਸ੍ਸ, ਕਿਂ ਮਿਤ੍ਤਂ ਸਮ੍ਪਰਾਯਿਕ’’ਨ੍ਤਿ.

‘‘ਸਤ੍ਥੋ ਪਵਸਤੋ ਮਿਤ੍ਤਂ, ਮਾਤਾ ਮਿਤ੍ਤਂ ਸਕੇ ਘਰੇ;

ਸਹਾਯੋ ਅਤ੍ਥਜਾਤਸ੍ਸ, ਹੋਤਿ ਮਿਤ੍ਤਂ ਪੁਨਪ੍ਪੁਨਂ;

ਸਯਂਕਤਾਨਿ ਪੁਞ੍ਞਾਨਿ, ਤਂ ਮਿਤ੍ਤਂ ਸਮ੍ਪਰਾਯਿਕ’’ਨ੍ਤਿ.

੪. ਵਤ੍ਥੁਸੁਤ੍ਤਂ

੫੪. ‘‘ਕਿਂਸੁ ਵਤ੍ਥੁ ਮਨੁਸ੍ਸਾਨਂ, ਕਿਂਸੂਧ ਪਰਮੋ ਸਖਾ;

ਕਿਂਸੁ ਭੂਤਾ ਉਪਜੀਵਨ੍ਤਿ, ਯੇ ਪਾਣਾ ਪਥਵਿਸ੍ਸਿਤਾ’’ਤਿ [ਪਥਵਿਂ ਸਿਤਾਤਿ (ਸੀ. ਸ੍ਯਾ. ਕਂ. ਪੀ.)].

‘‘ਪੁਤ੍ਤਾ ਵਤ੍ਥੁ ਮਨੁਸ੍ਸਾਨਂ, ਭਰਿਯਾ ਚ [ਭਰਿਯਾਵ (ਸੀ.), ਭਰਿਯਾ (ਸ੍ਯਾ. ਕਂ.)] ਪਰਮੋ ਸਖਾ;

ਵੁਟ੍ਠਿਂ ਭੂਤਾ ਉਪਜੀਵਨ੍ਤਿ, ਯੇ ਪਾਣਾ ਪਥਵਿਸ੍ਸਿਤਾ’’ਤਿ.

੫. ਪਠਮਜਨਸੁਤ੍ਤਂ

੫੫. ‘‘ਕਿਂਸੁ ਜਨੇਤਿ ਪੁਰਿਸਂ, ਕਿਂਸੁ ਤਸ੍ਸ ਵਿਧਾਵਤਿ;

ਕਿਂਸੁ ਸਂਸਾਰਮਾਪਾਦਿ, ਕਿਂਸੁ ਤਸ੍ਸ ਮਹਬ੍ਭਯ’’ਨ੍ਤਿ.

‘‘ਤਣ੍ਹਾ ਜਨੇਤਿ ਪੁਰਿਸਂ, ਚਿਤ੍ਤਮਸ੍ਸ ਵਿਧਾਵਤਿ;

ਸਤ੍ਤੋ ਸਂਸਾਰਮਾਪਾਦਿ, ਦੁਕ੍ਖਮਸ੍ਸ ਮਹਬ੍ਭਯ’’ਨ੍ਤਿ.

੬. ਦੁਤਿਯਜਨਸੁਤ੍ਤਂ

੫੬. ‘‘ਕਿਂਸੁ ਜਨੇਤਿ ਪੁਰਿਸਂ, ਕਿਂਸੁ ਤਸ੍ਸ ਵਿਧਾਵਤਿ;

ਕਿਂਸੁ ਸਂਸਾਰਮਾਪਾਦਿ, ਕਿਸ੍ਮਾ ਨ ਪਰਿਮੁਚ੍ਚਤੀ’’ਤਿ.

‘‘ਤਣ੍ਹਾ ਜਨੇਤਿ ਪੁਰਿਸਂ, ਚਿਤ੍ਤਮਸ੍ਸ ਵਿਧਾਵਤਿ;

ਸਤ੍ਤੋ ਸਂਸਾਰਮਾਪਾਦਿ, ਦੁਕ੍ਖਾ ਨ ਪਰਿਮੁਚ੍ਚਤੀ’’ਤਿ.

੭. ਤਤਿਯਜਨਸੁਤ੍ਤਂ

੫੭. ‘‘ਕਿਂਸੁ ਜਨੇਤਿ ਪੁਰਿਸਂ, ਕਿਂਸੁ ਤਸ੍ਸ ਵਿਧਾਵਤਿ;

ਕਿਂਸੁ ਸਂਸਾਰਮਾਪਾਦਿ, ਕਿਂਸੁ ਤਸ੍ਸ ਪਰਾਯਨ’’ਨ੍ਤਿ.

‘‘ਤਣ੍ਹਾ ਜਨੇਤਿ ਪੁਰਿਸਂ, ਚਿਤ੍ਤਮਸ੍ਸ ਵਿਧਾਵਤਿ;

ਸਤ੍ਤੋ ਸਂਸਾਰਮਾਪਾਦਿ, ਕਮ੍ਮਂ ਤਸ੍ਸ ਪਰਾਯਨ’’ਨ੍ਤਿ.

੮. ਉਪ੍ਪਥਸੁਤ੍ਤਂ

੫੮. ‘‘ਕਿਂਸੁ ਉਪ੍ਪਥੋ ਅਕ੍ਖਾਤੋ, ਕਿਂਸੁ ਰਤ੍ਤਿਨ੍ਦਿਵਕ੍ਖਯੋ;

ਕਿਂ ਮਲਂ ਬ੍ਰਹ੍ਮਚਰਿਯਸ੍ਸ, ਕਿਂ ਸਿਨਾਨਮਨੋਦਕ’’ਨ੍ਤਿ.

‘‘ਰਾਗੋ ਉਪ੍ਪਥੋ ਅਕ੍ਖਾਤੋ, ਵਯੋ ਰਤ੍ਤਿਨ੍ਦਿਵਕ੍ਖਯੋ;

ਇਤ੍ਥੀ ਮਲਂ ਬ੍ਰਹ੍ਮਚਰਿਯਸ੍ਸ, ਏਤ੍ਥਾਯਂ ਸਜ੍ਜਤੇ ਪਜਾ;

ਤਪੋ ਚ ਬ੍ਰਹ੍ਮਚਰਿਯਞ੍ਚ, ਤਂ ਸਿਨਾਨਮਨੋਦਕ’’ਨ੍ਤਿ.

੯. ਦੁਤਿਯਸੁਤ੍ਤਂ

੫੯. ‘‘ਕਿਂਸੁ ਦੁਤਿਯਾ [ਦੁਤਿਯਂ (ਸ੍ਯਾ. ਕਂ. ਪੀ.)] ਪੁਰਿਸਸ੍ਸ ਹੋਤਿ, ਕਿਂਸੁ ਚੇਨਂ ਪਸਾਸਤਿ;

ਕਿਸ੍ਸ ਚਾਭਿਰਤੋ ਮਚ੍ਚੋ, ਸਬ੍ਬਦੁਕ੍ਖਾ ਪਮੁਚ੍ਚਤੀ’’ਤਿ.

‘‘ਸਦ੍ਧਾ ਦੁਤਿਯਾ ਪੁਰਿਸਸ੍ਸ ਹੋਤਿ, ਪਞ੍ਞਾ ਚੇਨਂ ਪਸਾਸਤਿ;

ਨਿਬ੍ਬਾਨਾਭਿਰਤੋ ਮਚ੍ਚੋ, ਸਬ੍ਬਦੁਕ੍ਖਾ ਪਮੁਚ੍ਚਤੀ’’ਤਿ.

੧੦. ਕਵਿਸੁਤ੍ਤਂ

੬੦. ‘‘ਕਿਂਸੁ ਨਿਦਾਨਂ ਗਾਥਾਨਂ, ਕਿਂਸੁ ਤਾਸਂ ਵਿਯਞ੍ਜਨਂ;

ਕਿਂਸੁ ਸਨ੍ਨਿਸ੍ਸਿਤਾ ਗਾਥਾ, ਕਿਂਸੁ ਗਾਥਾਨਮਾਸਯੋ’’ਤਿ.

‘‘ਛਨ੍ਦੋ ਨਿਦਾਨਂ ਗਾਥਾਨਂ, ਅਕ੍ਖਰਾ ਤਾਸਂ ਵਿਯਞ੍ਜਨਂ;

ਨਾਮਸਨ੍ਨਿਸ੍ਸਿਤਾ ਗਾਥਾ, ਕਵਿ ਗਾਥਾਨਮਾਸਯੋ’’ਤਿ.

ਜਰਾਵਗ੍ਗੋ ਛਟ੍ਠੋ.

ਤਸ੍ਸੁਦ੍ਦਾਨਂ –

ਜਰਾ ਅਜਰਸਾ ਮਿਤ੍ਤਂ, ਵਤ੍ਥੁ ਤੀਣਿ ਜਨਾਨਿ ਚ;

ਉਪ੍ਪਥੋ ਚ ਦੁਤਿਯੋ ਚ, ਕਵਿਨਾ ਪੂਰਿਤੋ ਵਗ੍ਗੋਤਿ.