੩. ਸਾਧੁਸੁਤ੍ਤਂ

੩੩. ਸਾਵਤ੍ਥਿਨਿਦਾਨਂ. ਅਥ ਖੋ ਸਮ੍ਬਹੁਲਾ ਸਤੁਲ੍ਲਪਕਾਯਿਕਾ ਦੇਵਤਾਯੋ ਅਭਿਕ੍ਕਨ੍ਤਾਯ ਰਤ੍ਤਿਯਾ ਅਭਿਕ੍ਕਨ੍ਤਵਣ੍ਣਾ ਕੇਵਲਕਪ੍ਪਂ ਜੇਤਵਨਂ ਓਭਾਸੇਤ੍ਵਾ ਯੇਨ ਭਗਵਾ ਤੇਨੁਪਸਙ੍ਕਮਿਂਸੁ; ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਅਟ੍ਠਂਸੁ. ਏਕਮਨ੍ਤਂ ਠਿਤਾ ਖੋ ਏਕਾ ਦੇਵਤਾ ਭਗਵਤੋ ਸਨ੍ਤਿਕੇ ਇਮਂ ਉਦਾਨਂ ਉਦਾਨੇਸਿ –

‘‘ਸਾਧੁ ਖੋ, ਮਾਰਿਸ, ਦਾਨਂ;

ਮਚ੍ਛੇਰਾ ਚ ਪਮਾਦਾ ਚ, ਏਵਂ ਦਾਨਂ ਨ ਦੀਯਤਿ;

ਪੁਞ੍ਞਂ ਆਕਙ੍ਖਮਾਨੇਨ, ਦੇਯ੍ਯਂ ਹੋਤਿ ਵਿਜਾਨਤਾ’’ਤਿ.

ਅਥ ਖੋ ਅਪਰਾ ਦੇਵਤਾ ਭਗਵਤੋ ਸਨ੍ਤਿਕੇ ਇਮਂ ਉਦਾਨਂ ਉਦਾਨੇਸਿ –

‘‘ਸਾਧੁ ਖੋ, ਮਾਰਿਸ, ਦਾਨਂ;

ਅਪਿ ਚ ਅਪ੍ਪਕਸ੍ਮਿਮ੍ਪਿ ਸਾਹੁ ਦਾਨਂ’’.

‘‘ਅਪ੍ਪਸ੍ਮੇਕੇ ਪਵੇਚ੍ਛਨ੍ਤਿ, ਬਹੁਨੇਕੇ ਨ ਦਿਚ੍ਛਰੇ;

ਅਪ੍ਪਸ੍ਮਾ ਦਕ੍ਖਿਣਾ ਦਿਨ੍ਨਾ, ਸਹਸ੍ਸੇਨ ਸਮਂ ਮਿਤਾ’’ਤਿ.

ਅਥ ਖੋ ਅਪਰਾ ਦੇਵਤਾ ਭਗਵਤੋ ਸਨ੍ਤਿਕੇ ਇਮਂ ਉਦਾਨਂ ਉਦਾਨੇਸਿ –

‘‘ਸਾਧੁ ਖੋ, ਮਾਰਿਸ, ਦਾਨਂ; ਅਪ੍ਪਕਸ੍ਮਿਮ੍ਪਿ ਸਾਹੁ ਦਾਨਂ;

ਅਪਿ ਚ ਸਦ੍ਧਾਯਪਿ ਸਾਹੁ ਦਾਨਂ’’.

‘‘ਦਾਨਞ੍ਚ ਯੁਦ੍ਧਞ੍ਚ ਸਮਾਨਮਾਹੁ,

ਅਪ੍ਪਾਪਿ ਸਨ੍ਤਾ ਬਹੁਕੇ ਜਿਨਨ੍ਤਿ;

ਅਪ੍ਪਮ੍ਪਿ ਚੇ ਸਦ੍ਦਹਾਨੋ ਦਦਾਤਿ,

ਤੇਨੇਵ ਸੋ ਹੋਤਿ ਸੁਖੀ ਪਰਤ੍ਥਾ’’ਤਿ.

ਅਥ ਖੋ ਅਪਰਾ ਦੇਵਤਾ ਭਗਵਤੋ ਸਨ੍ਤਿਕੇ ਇਮਂ ਉਦਾਨਂ ਉਦਾਨੇਸਿ –

‘‘ਸਾਧੁ ਖੋ, ਮਾਰਿਸ, ਦਾਨਂ; ਅਪ੍ਪਕਸ੍ਮਿਮ੍ਪਿ ਸਾਹੁ ਦਾਨਂ;

ਸਦ੍ਧਾਯਪਿ ਸਾਹੁ ਦਾਨਂ; ਅਪਿ ਚ ਧਮ੍ਮਲਦ੍ਧਸ੍ਸਾਪਿ ਸਾਹੁ ਦਾਨਂ’’.

‘‘ਯੋ ਧਮ੍ਮਲਦ੍ਧਸ੍ਸ ਦਦਾਤਿ ਦਾਨਂ,

ਉਟ੍ਠਾਨਵੀਰਿਯਾਧਿਗਤਸ੍ਸ ਜਨ੍ਤੁ;

ਅਤਿਕ੍ਕਮ੍ਮ ਸੋ ਵੇਤਰਣਿਂ ਯਮਸ੍ਸ,

ਦਿਬ੍ਬਾਨਿ ਠਾਨਾਨਿ ਉਪੇਤਿ ਮਚ੍ਚੋ’’ਤਿ.

ਅਥ ਖੋ ਅਪਰਾ ਦੇਵਤਾ ਭਗਵਤੋ ਸਨ੍ਤਿਕੇ ਇਮਂ ਉਦਾਨਂ ਉਦਾਨੇਸਿ –

‘‘ਸਾਧੁ ਖੋ, ਮਾਰਿਸ, ਦਾਨਂ; ਅਪ੍ਪਕਸ੍ਮਿਮ੍ਪਿ ਸਾਹੁ ਦਾਨਂ;

ਸਦ੍ਧਾਯਪਿ ਸਾਹੁ ਦਾਨਂ; ਧਮ੍ਮਲਦ੍ਧਸ੍ਸਾਪਿ ਸਾਹੁ ਦਾਨਂ;

ਅਪਿ ਚ ਵਿਚੇਯ੍ਯ ਦਾਨਮ੍ਪਿ ਸਾਹੁ ਦਾਨਂ’’.

‘‘ਵਿਚੇਯ੍ਯ ਦਾਨਂ ਸੁਗਤਪ੍ਪਸਤ੍ਥਂ,

ਯੇ ਦਕ੍ਖਿਣੇਯ੍ਯਾ ਇਧ ਜੀਵਲੋਕੇ;

ਏਤੇਸੁ ਦਿਨ੍ਨਾਨਿ ਮਹਪ੍ਫਲਾਨਿ,

ਬੀਜਾਨਿ ਵੁਤ੍ਤਾਨਿ ਯਥਾ ਸੁਖੇਤ੍ਤੇ’’ਤਿ.

ਅਥ ਖੋ ਅਪਰਾ ਦੇਵਤਾ ਭਗਵਤੋ ਸਨ੍ਤਿਕੇ ਇਮਂ ਉਦਾਨਂ ਉਦਾਨੇਸਿ –

‘‘ਸਾਧੁ ਖੋ, ਮਾਰਿਸ, ਦਾਨਂ; ਅਪ੍ਪਕਸ੍ਮਿਮ੍ਪਿ ਸਾਹੁ ਦਾਨਂ;

ਸਦ੍ਧਾਯਪਿ ਸਾਹੁ ਦਾਨਂ; ਧਮ੍ਮਲਦ੍ਧਸ੍ਸਾਪਿ ਸਾਹੁ ਦਾਨਂ;

ਵਿਚੇਯ੍ਯ ਦਾਨਮ੍ਪਿ ਸਾਹੁ ਦਾਨਂ; ਅਪਿ ਚ ਪਾਣੇਸੁਪਿ ਸਾਧੁ ਸਂਯਮੋ’’.

‘‘ਯੋ ਪਾਣਭੂਤਾਨਿ [ਪਾਣਭੂਤੇਸੁ (ਸੀ. ਪੀ.)] ਅਹੇਠਯਂ ਚਰਂ,

ਪਰੂਪਵਾਦਾ ਨ ਕਰੋਨ੍ਤਿ ਪਾਪਂ;

ਭੀਰੁਂ ਪਸਂਸਨ੍ਤਿ ਨ ਹਿ ਤਤ੍ਥ ਸੂਰਂ,

ਭਯਾ ਹਿ ਸਨ੍ਤੋ ਨ ਕਰੋਨ੍ਤਿ ਪਾਪ’’ਨ੍ਤਿ.

ਅਥ ਖੋ ਅਪਰਾ ਦੇਵਤਾ ਭਗਵਨ੍ਤਂ ਏਤਦਵੋਚ – ‘‘ਕਸ੍ਸ ਨੁ ਖੋ, ਭਗਵਾ, ਸੁਭਾਸਿਤ’’ਨ੍ਤਿ?

‘‘ਸਬ੍ਬਾਸਂ ਵੋ ਸੁਭਾਸਿਤਂ ਪਰਿਯਾਯੇਨ, ਅਪਿ ਚ ਮਮਪਿ ਸੁਣਾਥ –

‘‘ਸਦ੍ਧਾ ਹਿ ਦਾਨਂ ਬਹੁਧਾ ਪਸਤ੍ਥਂ,

ਦਾਨਾ ਚ ਖੋ ਧਮ੍ਮਪਦਂਵ ਸੇਯ੍ਯੋ;

ਪੁਬ੍ਬੇ ਚ ਹਿ ਪੁਬ੍ਬਤਰੇ ਚ ਸਨ੍ਤੋ,

ਨਿਬ੍ਬਾਨਮੇਵਜ੍ਝਗਮੁਂ ਸਪਞ੍ਞਾ’’ਤਿ.