੧. ਨਨ੍ਦਨਸੁਤ੍ਤਂ

੧੧. ਏਵਂ ਮੇ ਸੁਤਂ – ਏਕਂ ਸਮਯਂ ਭਗਵਾ ਸਾਵਤ੍ਥਿਯਂ ਵਿਹਰਤਿ ਜੇਤਵਨੇ ਅਨਾਥਪਿਣ੍ਡਿਕਸ੍ਸ ਆਰਾਮੇ. ਤਤ੍ਰ ਖੋ ਭਗਵਾ ਭਿਕ੍ਖੂ ਆਮਨ੍ਤੇਸਿ – ‘‘ਭਿਕ੍ਖਵੋ’’ਤਿ. ‘‘ਭਦਨ੍ਤੇ’’ਤਿ ਤੇ ਭਿਕ੍ਖੂ ਭਗਵਤੋ ਪਚ੍ਚਸ੍ਸੋਸੁਂ. ਭਗਵਾ ਏਤਦਵੋਚ –

‘‘ਭੂਤਪੁਬ੍ਬਂ, ਭਿਕ੍ਖਵੇ, ਅਞ੍ਞਤਰਾ ਤਾਵਤਿਂਸਕਾਯਿਕਾ ਦੇਵਤਾ ਨਨ੍ਦਨੇ ਵਨੇ ਅਚ੍ਛਰਾਸਙ੍ਘਪਰਿਵੁਤਾ ਦਿਬ੍ਬੇਹਿ ਪਞ੍ਚਹਿ ਕਾਮਗੁਣੇਹਿ ਸਮਪ੍ਪਿਤਾ ਸਮਙ੍ਗੀਭੂਤਾ ਪਰਿਚਾਰਿਯਮਾਨਾ [ਪਰਿਚਾਰਿਯਮਾਨਾ (ਸ੍ਯਾ. ਕਂ. ਕ.)] ਤਾਯਂ ਵੇਲਾਯਂ ਇਮਂ ਗਾਥਂ ਅਭਾਸਿ –

‘‘ਨ ਤੇ ਸੁਖਂ ਪਜਾਨਨ੍ਤਿ, ਯੇ ਨ ਪਸ੍ਸਨ੍ਤਿ ਨਨ੍ਦਨਂ;

ਆਵਾਸਂ ਨਰਦੇਵਾਨਂ, ਤਿਦਸਾਨਂ ਯਸਸ੍ਸਿਨ’’ਨ੍ਤਿ.

‘‘ਏਵਂ ਵੁਤ੍ਤੇ, ਭਿਕ੍ਖਵੇ, ਅਞ੍ਞਤਰਾ ਦੇਵਤਾ ਤਂ ਦੇਵਤਂ ਗਾਥਾਯ ਪਚ੍ਚਭਾਸਿ –

‘‘ਨ ਤ੍ਵਂ ਬਾਲੇ ਪਜਾਨਾਸਿ, ਯਥਾ ਅਰਹਤਂ ਵਚੋ;

ਅਨਿਚ੍ਚਾ ਸਬ੍ਬਸਙ੍ਖਾਰਾ [ਸਬ੍ਬੇ ਸਙ੍ਖਾਰਾ (ਸੀ. ਸ੍ਯਾ. ਕਂ.)], ਉਪ੍ਪਾਦਵਯਧਮ੍ਮਿਨੋ;

ਉਪ੍ਪਜ੍ਜਿਤ੍ਵਾ ਨਿਰੁਜ੍ਝਨ੍ਤਿ, ਤੇਸਂ ਵੂਪਸਮੋ ਸੁਖੋ’’ਤਿ.