੨. ਪਞ੍ਚਤ੍ਤਯਸੁਤ੍ਤਂ [ਪਞ੍ਚਾਯਤਨਸੁਤ੍ਤ (ਕ.)]

੨੧. ਏਵਂ ਮੇ ਸੁਤਂ – ਏਕਂ ਸਮਯਂ ਭਗਵਾ ਸਾਵਤ੍ਥਿਯਂ ਵਿਹਰਤਿ ਜੇਤਵਨੇ ਅਨਾਥਪਿਣ੍ਡਿਕਸ੍ਸ ਆਰਾਮੇ. ਤਤ੍ਰ ਖੋ ਭਗਵਾ ਭਿਕ੍ਖੂ ਆਮਨ੍ਤੇਸਿ – ‘‘ਭਿਕ੍ਖਵੋ’’ਤਿ. ‘‘ਭਦਨ੍ਤੇ’’ਤਿ ਤੇ ਭਿਕ੍ਖੂ ਭਗਵਤੋ ਪਚ੍ਚਸ੍ਸੋਸੁਂ. ਭਗਵਾ ਏਤਦਵੋਚ – ‘‘ਸਨ੍ਤਿ, ਭਿਕ੍ਖਵੇ, ਏਕੇ ਸਮਣਬ੍ਰਾਹ੍ਮਣਾ ਅਪਰਨ੍ਤਕਪ੍ਪਿਕਾ ਅਪਰਨ੍ਤਾਨੁਦਿਟ੍ਠਿਨੋ ਅਪਰਨ੍ਤਂ ਆਰਬ੍ਭ ਅਨੇਕਵਿਹਿਤਾਨਿ ਅਧਿਵੁਤ੍ਤਿਪਦਾਨਿ [ਅਧਿਮੁਤ੍ਤਿਪਦਾਨਿ (ਸ੍ਯਾ. ਕਂ. ਕ.)] ਅਭਿਵਦਨ੍ਤਿ. ‘ਸਞ੍ਞੀ ਅਤ੍ਤਾ ਹੋਤਿ ਅਰੋਗੋ ਪਰਂ ਮਰਣਾ’ਤਿ – ਇਤ੍ਥੇਕੇ ਅਭਿਵਦਨ੍ਤਿ; ‘ਅਸਞ੍ਞੀ ਅਤ੍ਤਾ ਹੋਤਿ ਅਰੋਗੋ ਪਰਂ ਮਰਣਾ’ਤਿ – ਇਤ੍ਥੇਕੇ ਅਭਿਵਦਨ੍ਤਿ; ‘ਨੇਵਸਞ੍ਞੀਨਾਸਞ੍ਞੀ ਅਤ੍ਤਾ ਹੋਤਿ ਅਰੋਗੋ ਪਰਂ ਮਰਣਾ’ਤਿ – ਇਤ੍ਥੇਕੇ ਅਭਿਵਦਨ੍ਤਿ; ਸਤੋ ਵਾ ਪਨ ਸਤ੍ਤਸ੍ਸ ਉਚ੍ਛੇਦਂ ਵਿਨਾਸਂ ਵਿਭਵਂ ਪਞ੍ਞਪੇਨ੍ਤਿ [ਪਞ੍ਞਾਪੇਨ੍ਤਿ (ਸੀ. ਸ੍ਯਾ. ਕਂ. ਪੀ.)], ਦਿਟ੍ਠਧਮ੍ਮਨਿਬ੍ਬਾਨਂ ਵਾ ਪਨੇਕੇ ਅਭਿਵਦਨ੍ਤਿ. ਇਤਿ ਸਨ੍ਤਂ ਵਾ ਅਤ੍ਤਾਨਂ ਪਞ੍ਞਪੇਨ੍ਤਿ ਅਰੋਗਂ [ਪਰਂ ਮਰਣਾ. ਇਤਿ ਇਮਾਨਿ (ਕ.)] ਪਰਂ ਮਰਣਾ, ਸਤੋ ਵਾ ਪਨ ਸਤ੍ਤਸ੍ਸ ਉਚ੍ਛੇਦਂ ਵਿਨਾਸਂ ਵਿਭਵਂ ਪਞ੍ਞਪੇਨ੍ਤਿ, ਦਿਟ੍ਠਧਮ੍ਮਨਿਬ੍ਬਾਨਂ ਵਾ ਪਨੇਕੇ ਅਭਿਵਦਨ੍ਤਿ. ਇਤਿ ਇਮਾਨਿ ਪਞ੍ਚ [ਪਰਂ ਮਰਣਾ. ਇਤਿ ਇਮਾਨਿ (ਕ.)] ਹੁਤ੍ਵਾ ਤੀਣਿ ਹੋਨ੍ਤਿ, ਤੀਣਿ ਹੁਤ੍ਵਾ ਪਞ੍ਚ ਹੋਨ੍ਤਿ – ਅਯਮੁਦ੍ਦੇਸੋ ਪਞ੍ਚਤ੍ਤਯਸ੍ਸ.

੨੨. ‘‘ਤਤ੍ਰ, ਭਿਕ੍ਖਵੇ, ਯੇ ਤੇ ਸਮਣਬ੍ਰਾਹ੍ਮਣਾ ਸਞ੍ਞਿਂ ਅਤ੍ਤਾਨਂ ਪਞ੍ਞਪੇਨ੍ਤਿ ਅਰੋਗਂ ਪਰਂ ਮਰਣਾ, ਰੂਪਿਂ ਵਾ ਤੇ ਭੋਨ੍ਤੋ ਸਮਣਬ੍ਰਾਹ੍ਮਣਾ ਸਞ੍ਞਿਂ ਅਤ੍ਤਾਨਂ ਪਞ੍ਞਪੇਨ੍ਤਿ ਅਰੋਗਂ ਪਰਂ ਮਰਣਾ, ਅਰੂਪਿਂ ਵਾ ਤੇ ਭੋਨ੍ਤੋ ਸਮਣਬ੍ਰਾਹ੍ਮਣਾ ਸਞ੍ਞਿਂ ਅਤ੍ਤਾਨਂ ਪਞ੍ਞਪੇਨ੍ਤਿ ਅਰੋਗਂ ਪਰਂ ਮਰਣਾ, ਰੂਪਿਞ੍ਚ ਅਰੂਪਿਞ੍ਚ ਵਾ ਤੇ ਭੋਨ੍ਤੋ ਸਮਣਬ੍ਰਾਹ੍ਮਣਾ ਸਞ੍ਞਿਂ ਅਤ੍ਤਾਨਂ ਪਞ੍ਞਪੇਨ੍ਤਿ ਅਰੋਗਂ ਪਰਂ ਮਰਣਾ, ਨੇਵਰੂਪਿਂ ਨਾਰੂਪਿਂ ਵਾ ਤੇ ਭੋਨ੍ਤੋ ਸਮਣਬ੍ਰਾਹ੍ਮਣਾ ਸਞ੍ਞਿਂ ਅਤ੍ਤਾਨਂ ਪਞ੍ਞਪੇਨ੍ਤਿ ਅਰੋਗਂ ਪਰਂ ਮਰਣਾ, ਏਕਤ੍ਤਸਞ੍ਞਿਂ ਵਾ ਤੇ ਭੋਨ੍ਤੋ ਸਮਣਬ੍ਰਾਹ੍ਮਣਾ ਸਞ੍ਞਿਂ ਅਤ੍ਤਾਨਂ ਪਞ੍ਞਪੇਨ੍ਤਿ ਅਰੋਗਂ ਪਰਂ ਮਰਣਾ, ਨਾਨਤ੍ਤਸਞ੍ਞਿਂ ਵਾ ਤੇ ਭੋਨ੍ਤੋ ਸਮਣਬ੍ਰਾਹ੍ਮਣਾ ਸਞ੍ਞਿਂ ਅਤ੍ਤਾਨਂ ਪਞ੍ਞਪੇਨ੍ਤਿ ਅਰੋਗਂ ਪਰਂ ਮਰਣਾ, ਪਰਿਤ੍ਤਸਞ੍ਞਿਂ ਵਾ ਤੇ ਭੋਨ੍ਤੋ ਸਮਣਬ੍ਰਾਹ੍ਮਣਾ ਸਞ੍ਞਿਂ ਅਤ੍ਤਾਨਂ ਪਞ੍ਞਪੇਨ੍ਤਿ ਅਰੋਗਂ ਪਰਂ ਮਰਣਾ, ਅਪ੍ਪਮਾਣਸਞ੍ਞਿਂ ਵਾ ਤੇ ਭੋਨ੍ਤੋ ਸਮਣਬ੍ਰਾਹ੍ਮਣਾ ਸਞ੍ਞਿਂ ਅਤ੍ਤਾਨਂ ਪਞ੍ਞਪੇਨ੍ਤਿ ਅਰੋਗਂ ਪਰਂ ਮਰਣਾ, ਏਤਂ [ਏਵਂ (ਕ.)] ਵਾ ਪਨੇਕੇਸਂ [ਪਨੇਤੇਸਂ (ਸ੍ਯਾ. ਕਂ.)] ਉਪਾਤਿਵਤ੍ਤਤਂ ਵਿਞ੍ਞਾਣਕਸਿਣਮੇਕੇ ਅਭਿਵਦਨ੍ਤਿ ਅਪ੍ਪਮਾਣਂ ਆਨੇਞ੍ਜਂ. ਤਯਿਦਂ, ਭਿਕ੍ਖਵੇ, ਤਥਾਗਤੋ ਅਭਿਜਾਨਾਤਿ [ਪਜਾਨਾਤਿ (ਸੀ. ਸ੍ਯਾ. ਕਂ. ਪੀ.) ਅਟ੍ਠਕਥਾ ਓਲੋਕੇਤਬ੍ਬਾ]. ਯੇ ਖੋ ਤੇ ਭੋਨ੍ਤੋ ਸਮਣਬ੍ਰਾਹ੍ਮਣਾ ਸਞ੍ਞਿਂ ਅਤ੍ਤਾਨਂ ਪਞ੍ਞਪੇਨ੍ਤਿ ਅਰੋਗਂ ਪਰਂ ਮਰਣਾ, ਰੂਪਿਂ ਵਾ ਤੇ ਭੋਨ੍ਤੋ ਸਮਣਬ੍ਰਾਹ੍ਮਣਾ ਸਞ੍ਞਿਂ ਅਤ੍ਤਾਨਂ ਪਞ੍ਞਪੇਨ੍ਤਿ ਅਰੋਗਂ ਪਰਂ ਮਰਣਾ, ਅਰੂਪਿਂ ਵਾ ਤੇ ਭੋਨ੍ਤੋ ਸਮਣਬ੍ਰਾਹ੍ਮਣਾ ਸਞ੍ਞਿਂ ਅਤ੍ਤਾਨਂ ਪਞ੍ਞਪੇਨ੍ਤਿ ਅਰੋਗਂ ਪਰਂ ਮਰਣਾ, ਰੂਪਿਞ੍ਚ ਅਰੂਪਿਞ੍ਚ ਵਾ ਤੇ ਭੋਨ੍ਤੋ ਸਮਣਬ੍ਰਾਹ੍ਮਣਾ ਸਞ੍ਞਿਂ ਅਤ੍ਤਾਨਂ ਪਞ੍ਞਪੇਨ੍ਤਿ ਅਰੋਗਂ ਪਰਂ ਮਰਣਾ, ਨੇਵਰੂਪਿਂ ਨਾਰੂਪਿਂ ਵਾ ਤੇ ਭੋਨ੍ਤੋ ਸਮਣਬ੍ਰਾਹ੍ਮਣਾ ਸਞ੍ਞਿਂ ਅਤ੍ਤਾਨਂ ਪਞ੍ਞਪੇਨ੍ਤਿ ਅਰੋਗਂ ਪਰਂ ਮਰਣਾ, ਏਕਤ੍ਤਸਞ੍ਞਿਂ ਵਾ ਤੇ ਭੋਨ੍ਤੋ ਸਮਣਬ੍ਰਾਹ੍ਮਣਾ ਸਞ੍ਞਿਂ ਅਤ੍ਤਾਨਂ ਪਞ੍ਞਪੇਨ੍ਤਿ ਅਰੋਗਂ ਪਰਂ ਮਰਣਾ, ਨਾਨਤ੍ਤਸਞ੍ਞਿਂ ਵਾ ਤੇ ਭੋਨ੍ਤੋ ਸਮਣਬ੍ਰਾਹ੍ਮਣਾ ਸਞ੍ਞਿਂ ਅਤ੍ਤਾਨਂ ਪਞ੍ਞਪੇਨ੍ਤਿ ਅਰੋਗਂ ਪਰਂ ਮਰਣਾ, ਪਰਿਤ੍ਤਸਞ੍ਞਿਂ ਵਾ ਤੇ ਭੋਨ੍ਤੋ ਸਮਣਬ੍ਰਾਹ੍ਮਣਾ ਸਞ੍ਞਿਂ ਅਤ੍ਤਾਨਂ ਪਞ੍ਞਪੇਨ੍ਤਿ ਅਰੋਗਂ ਪਰਂ ਮਰਣਾ, ਅਪ੍ਪਮਾਣਸਞ੍ਞਿਂ ਵਾ ਤੇ ਭੋਨ੍ਤੋ ਸਮਣਬ੍ਰਾਹ੍ਮਣਾ ਸਞ੍ਞਿਂ ਅਤ੍ਤਾਨਂ ਪਞ੍ਞਪੇਨ੍ਤਿ ਅਰੋਗਂ ਪਰਂ ਮਰਣਾ [ਮਰਣਾਤਿ (ਕ.)], ਯਾ ਵਾ ਪਨੇਤਾਸਂ ਸਞ੍ਞਾਨਂ ਪਰਿਸੁਦ੍ਧਾ ਪਰਮਾ ਅਗ੍ਗਾ ਅਨੁਤ੍ਤਰਿਯਾ ਅਕ੍ਖਾਯਤਿ – ਯਦਿ ਰੂਪਸਞ੍ਞਾਨਂ ਯਦਿ ਅਰੂਪਸਞ੍ਞਾਨਂ ਯਦਿ ਏਕਤ੍ਤਸਞ੍ਞਾਨਂ ਯਦਿ ਨਾਨਤ੍ਤਸਞ੍ਞਾਨਂ. ‘ਨਤ੍ਥਿ ਕਿਞ੍ਚੀ’ਤਿ ਆਕਿਞ੍ਚਞ੍ਞਾਯਤਨਮੇਕੇ ਅਭਿਵਦਨ੍ਤਿ ਅਪ੍ਪਮਾਣਂ ਆਨੇਞ੍ਜਂ. ‘ਤਯਿਦਂ ਸਙ੍ਖਤਂ ਓਲ਼ਾਰਿਕਂ ਅਤ੍ਥਿ ਖੋ ਪਨ ਸਙ੍ਖਾਰਾਨਂ ਨਿਰੋਧੋ ਅਤ੍ਥੇਤ’ਨ੍ਤਿ – ਇਤਿ ਵਿਦਿਤ੍ਵਾ ਤਸ੍ਸ ਨਿਸ੍ਸਰਣਦਸ੍ਸਾਵੀ ਤਥਾਗਤੋ ਤਦੁਪਾਤਿਵਤ੍ਤੋ.

੨੩. ‘‘ਤਤ੍ਰ, ਭਿਕ੍ਖਵੇ, ਯੇ ਤੇ ਸਮਣਬ੍ਰਾਹ੍ਮਣਾ ਅਸਞ੍ਞਿਂ ਅਤ੍ਤਾਨਂ ਪਞ੍ਞਪੇਨ੍ਤਿ ਅਰੋਗਂ ਪਰਂ ਮਰਣਾ, ਰੂਪਿਂ ਵਾ ਤੇ ਭੋਨ੍ਤੋ ਸਮਣਬ੍ਰਾਹ੍ਮਣਾ ਅਸਞ੍ਞਿਂ ਅਤ੍ਤਾਨਂ ਪਞ੍ਞਪੇਨ੍ਤਿ ਅਰੋਗਂ ਪਰਂ ਮਰਣਾ, ਅਰੂਪਿਂ ਵਾ ਤੇ ਭੋਨ੍ਤੋ ਸਮਣਬ੍ਰਾਹ੍ਮਣਾ ਅਸਞ੍ਞਿਂ ਅਤ੍ਤਾਨਂ ਪਞ੍ਞਪੇਨ੍ਤਿ ਅਰੋਗਂ ਪਰਂ ਮਰਣਾ, ਰੂਪਿਞ੍ਚ ਅਰੂਪਿਞ੍ਚ ਵਾ ਤੇ ਭੋਨ੍ਤੋ ਸਮਣਬ੍ਰਾਹ੍ਮਣਾ ਅਸਞ੍ਞਿਂ ਅਤ੍ਤਾਨਂ ਪਞ੍ਞਪੇਨ੍ਤਿ ਅਰੋਗਂ ਪਰਂ ਮਰਣਾ, ਨੇਵਰੂਪਿਂ ਨਾਰੂਪਿਂ ਵਾ ਤੇ ਭੋਨ੍ਤੋ ਸਮਣਬ੍ਰਾਹ੍ਮਣਾ ਅਸਞ੍ਞਿਂ ਅਤ੍ਤਾਨਂ ਪਞ੍ਞਪੇਨ੍ਤਿ ਅਰੋਗਂ ਪਰਂ ਮਰਣਾ. ਤਤ੍ਰ, ਭਿਕ੍ਖਵੇ, ਯੇ ਤੇ ਸਮਣਬ੍ਰਾਹ੍ਮਣਾ ਸਞ੍ਞਿਂ ਅਤ੍ਤਾਨਂ ਪਞ੍ਞਪੇਨ੍ਤਿ ਅਰੋਗਂ ਪਰਂ ਮਰਣਾ ਤੇਸਮੇਤੇ ਪਟਿਕ੍ਕੋਸਨ੍ਤਿ. ਤਂ ਕਿਸ੍ਸ ਹੇਤੁ? ਸਞ੍ਞਾ ਰੋਗੋ ਸਞ੍ਞਾ ਗਣ੍ਡੋ ਸਞ੍ਞਾ ਸਲ੍ਲਂ, ਏਤਂ ਸਨ੍ਤਂ ਏਤਂ ਪਣੀਤਂ ਯਦਿਦਂ – ‘ਅਸਞ੍ਞ’ਨ੍ਤਿ. ਤਯਿਦਂ, ਭਿਕ੍ਖਵੇ, ਤਥਾਗਤੋ ਅਭਿਜਾਨਾਤਿ ਯੇ ਖੋ ਤੇ ਭੋਨ੍ਤੋ ਸਮਣਬ੍ਰਾਹ੍ਮਣਾ ਅਸਞ੍ਞਿਂ ਅਤ੍ਤਾਨਂ ਪਞ੍ਞਪੇਨ੍ਤਿ ਅਰੋਗਂ ਪਰਂ ਮਰਣਾ, ਰੂਪਿਂ ਵਾ ਤੇ ਭੋਨ੍ਤੋ ਸਮਣਬ੍ਰਾਹ੍ਮਣਾ ਅਸਞ੍ਞਿਂ ਅਤ੍ਤਾਨਂ ਪਞ੍ਞਪੇਨ੍ਤਿ ਅਰੋਗਂ ਪਰਂ ਮਰਣਾ, ਅਰੂਪਿਂ ਵਾ ਤੇ ਭੋਨ੍ਤੋ ਸਮਣਬ੍ਰਾਹ੍ਮਣਾ ਅਸਞ੍ਞਿਂ ਅਤ੍ਤਾਨਂ ਪਞ੍ਞਪੇਨ੍ਤਿ ਅਰੋਗਂ ਪਰਂ ਮਰਣਾ, ਰੂਪਿਞ੍ਚ ਅਰੂਪਿਞ੍ਚ ਵਾ ਤੇ ਭੋਨ੍ਤੋ ਸਮਣਬ੍ਰਾਹ੍ਮਣਾ ਅਸਞ੍ਞਿਂ ਅਤ੍ਤਾਨਂ ਪਞ੍ਞਪੇਨ੍ਤਿ ਅਰੋਗਂ ਪਰਂ ਮਰਣਾ, ਨੇਵਰੂਪਿਂ ਨਾਰੂਪਿਂ ਵਾ ਤੇ ਭੋਨ੍ਤੋ ਸਮਣਬ੍ਰਾਹ੍ਮਣਾ ਅਸਞ੍ਞਿਂ ਅਤ੍ਤਾਨਂ ਪਞ੍ਞਪੇਨ੍ਤਿ ਅਰੋਗਂ ਪਰਂ ਮਰਣਾ. ਯੋ ਹਿ ਕੋਚਿ, ਭਿਕ੍ਖਵੇ, ਸਮਣੋ ਵਾ ਬ੍ਰਾਹ੍ਮਣੋ ਵਾ ਏਵਂ ਵਦੇਯ੍ਯ – ‘ਅਹਮਞ੍ਞਤ੍ਰ ਰੂਪਾ, ਅਞ੍ਞਤ੍ਰ ਵੇਦਨਾਯ, ਅਞ੍ਞਤ੍ਰ ਸਞ੍ਞਾਯ, ਅਞ੍ਞਤ੍ਰ ਸਙ੍ਖਾਰੇਹਿ, ਵਿਞ੍ਞਾਣਸ੍ਸ [ਅਞ੍ਞਤ੍ਰ ਵਿਞ੍ਞਾਣਾ (ਸ੍ਯਾ. ਕਂ.), ਅਞ੍ਞਤ੍ਰ ਵਿਞ੍ਞਾਣੇਨ (ਕ.)] ਆਗਤਿਂ ਵਾ ਗਤਿਂ ਵਾ ਚੁਤਿਂ ਵਾ ਉਪਪਤ੍ਤਿਂ ਵਾ ਵੁਦ੍ਧਿਂ ਵਾ ਵਿਰੂਲ਼੍ਹਿਂ ਵਾ ਵੇਪੁਲ੍ਲਂ ਵਾ ਪਞ੍ਞਪੇਸ੍ਸਾਮੀ’ਤਿ – ਨੇਤਂ ਠਾਨਂ ਵਿਜ੍ਜਤਿ. ‘ਤਯਿਦਂ ਸਙ੍ਖਤਂ ਓਲ਼ਾਰਿਕਂ ਅਤ੍ਥਿ ਖੋ ਪਨ ਸਙ੍ਖਾਰਾਨਂ ਨਿਰੋਧੋ ਅਤ੍ਥੇਤ’ਨ੍ਤਿ – ਇਤਿ ਵਿਦਿਤ੍ਵਾ ਤਸ੍ਸ ਨਿਸ੍ਸਰਣਦਸ੍ਸਾਵੀ ਤਥਾਗਤੋ ਤਦੁਪਾਤਿਵਤ੍ਤੋ.

੨੪. ‘‘ਤਤ੍ਰ, ਭਿਕ੍ਖਵੇ, ਯੇ ਤੇ ਸਮਣਬ੍ਰਾਹ੍ਮਣਾ ਨੇਵਸਞ੍ਞੀਨਾਸਞ੍ਞਿਂ ਅਤ੍ਤਾਨਂ ਪਞ੍ਞਪੇਨ੍ਤਿ ਅਰੋਗਂ ਪਰਂ ਮਰਣਾ, ਰੂਪਿਂ ਵਾ ਤੇ ਭੋਨ੍ਤੋ ਸਮਣਬ੍ਰਾਹ੍ਮਣਾ ਨੇਵਸਞ੍ਞੀਨਾਸਞ੍ਞਿਂ ਅਤ੍ਤਾਨਂ ਪਞ੍ਞਪੇਨ੍ਤਿ ਅਰੋਗਂ ਪਰਂ ਮਰਣਾ, ਅਰੂਪਿਂ ਵਾ ਤੇ ਭੋਨ੍ਤੋ ਸਮਣਬ੍ਰਾਹ੍ਮਣਾ ਨੇਵਸਞ੍ਞੀਨਾਸਞ੍ਞਿਂ ਅਤ੍ਤਾਨਂ ਪਞ੍ਞਪੇਨ੍ਤਿ ਅਰੋਗਂ ਪਰਂ ਮਰਣਾ, ਰੂਪਿਞ੍ਚ ਅਰੂਪਿਞ੍ਚ ਵਾ ਤੇ ਭੋਨ੍ਤੋ ਸਮਣਬ੍ਰਾਹ੍ਮਣਾ ਨੇਵਸਞ੍ਞੀਨਾਸਞ੍ਞਿਂ ਅਤ੍ਤਾਨਂ ਪਞ੍ਞਪੇਨ੍ਤਿ ਅਰੋਗਂ ਪਰਂ ਮਰਣਾ, ਨੇਵਰੂਪਿਂ ਨਾਰੂਪਿਂ ਵਾ ਤੇ ਭੋਨ੍ਤੋ ਸਮਣਬ੍ਰਾਹ੍ਮਣਾ ਨੇਵਸਞ੍ਞੀਨਾਸਞ੍ਞਿਂ ਅਤ੍ਤਾਨਂ ਪਞ੍ਞਪੇਨ੍ਤਿ ਅਰੋਗਂ ਪਰਂ ਮਰਣਾ. ਤਤ੍ਰ, ਭਿਕ੍ਖਵੇ, ਯੇ ਤੇ ਸਮਣਬ੍ਰਾਹ੍ਮਣਾ ਸਞ੍ਞਿਂ ਅਤ੍ਤਾਨਂ ਪਞ੍ਞਪੇਨ੍ਤਿ ਅਰੋਗਂ ਪਰਂ ਮਰਣਾ ਤੇਸਮੇਤੇ ਪਟਿਕ੍ਕੋਸਨ੍ਤਿ, ਯੇਪਿ ਤੇ ਭੋਨ੍ਤੋ ਸਮਣਬ੍ਰਾਹ੍ਮਣਾ ਅਸਞ੍ਞਿਂ ਅਤ੍ਤਾਨਂ ਪਞ੍ਞਪੇਨ੍ਤਿ ਅਰੋਗਂ ਪਰਂ ਮਰਣਾ ਤੇਸਮੇਤੇ ਪਟਿਕ੍ਕੋਸਨ੍ਤਿ. ਤਂ ਕਿਸ੍ਸ ਹੇਤੁ? ਸਞ੍ਞਾ ਰੋਗੋ ਸਞ੍ਞਾ ਗਣ੍ਡੋ ਸਞ੍ਞਾ ਸਲ੍ਲਂ, ਅਸਞ੍ਞਾ ਸਮ੍ਮੋਹੋ, ਏਤਂ ਸਨ੍ਤਂ ਏਤਂ ਪਣੀਤਂ ਯਦਿਦਂ – ‘ਨੇਵਸਞ੍ਞਾਨਾਸਞ੍ਞ’ਨ੍ਤਿ. [ਨੇਵਸਞ੍ਞਾਨਾਸਞ੍ਞਾਤਿ (ਸ੍ਯਾ. ਕਂ. ਪੀ. ਕ.) ਏਤਨ੍ਤਿਪਦਂ ਮਨਸਿਕਾਤਬ੍ਬਂ] ਤਯਿਦਂ, ਭਿਕ੍ਖਵੇ, ਤਥਾਗਤੋ ਅਭਿਜਾਨਾਤਿ. ਯੇ ਖੋ ਤੇ ਭੋਨ੍ਤੋ ਸਮਣਬ੍ਰਾਹ੍ਮਣਾ ਨੇਵਸਞ੍ਞੀਨਾਸਞ੍ਞਿਂ ਅਤ੍ਤਾਨਂ ਪਞ੍ਞਪੇਨ੍ਤਿ ਅਰੋਗਂ ਪਰਂ ਮਰਣਾ, ਰੂਪਿਂ ਵਾ ਤੇ ਭੋਨ੍ਤੋ ਸਮਣਬ੍ਰਾਹ੍ਮਣਾ ਨੇਵਸਞ੍ਞੀਨਾਸਞ੍ਞਿਂ ਅਤ੍ਤਾਨਂ ਪਞ੍ਞਪੇਨ੍ਤਿ ਅਰੋਗਂ ਪਰਂ ਮਰਣਾ, ਅਰੂਪਿਂ ਵਾ ਤੇ ਭੋਨ੍ਤੋ ਸਮਣਬ੍ਰਾਹ੍ਮਣਾ ਨੇਵਸਞ੍ਞੀਨਾਸਞ੍ਞਿਂ ਅਤ੍ਤਾਨਂ ਪਞ੍ਞਪੇਨ੍ਤਿ ਅਰੋਗਂ ਪਰਂ ਮਰਣਾ, ਰੂਪਿਞ੍ਚ ਅਰੂਪਿਞ੍ਚ ਵਾ ਤੇ ਭੋਨ੍ਤੋ ਸਮਣਬ੍ਰਾਹ੍ਮਣਾ ਨੇਵਸਞ੍ਞੀਨਾਸਞ੍ਞਿਂ ਅਤ੍ਤਾਨਂ ਪਞ੍ਞਪੇਨ੍ਤਿ ਅਰੋਗਂ ਪਰਂ ਮਰਣਾ, ਨੇਵਰੂਪਿਂ ਨਾਰੂਪਿਂ ਵਾ ਤੇ ਭੋਨ੍ਤੋ ਸਮਣਬ੍ਰਾਹ੍ਮਣਾ ਨੇਵਸਞ੍ਞੀਨਾਸਞ੍ਞਿਂ ਅਤ੍ਤਾਨਂ ਪਞ੍ਞਪੇਨ੍ਤਿ ਅਰੋਗਂ ਪਰਂ ਮਰਣਾ. ਯੇ ਹਿ ਕੇਚਿ, ਭਿਕ੍ਖਵੇ, ਸਮਣਾ ਵਾ ਬ੍ਰਾਹ੍ਮਣਾ ਵਾ [ਸਮਣਬ੍ਰਾਹ੍ਮਣਾ (ਸੀ. ਪੀ.)] ਦਿਟ੍ਠਸੁਤਮੁਤਵਿਞ੍ਞਾਤਬ੍ਬਸਙ੍ਖਾਰਮਤ੍ਤੇਨ ਏਤਸ੍ਸ ਆਯਤਨਸ੍ਸ ਉਪਸਮ੍ਪਦਂ ਪਞ੍ਞਪੇਨ੍ਤਿ, ਬ੍ਯਸਨਞ੍ਹੇਤਂ, ਭਿਕ੍ਖਵੇ, ਅਕ੍ਖਾਯਤਿ [ਆਯਤਨਮਕ੍ਖਾਯਤਿ (ਕ.)] ਏਤਸ੍ਸ ਆਯਤਨਸ੍ਸ ਉਪਸਮ੍ਪਦਾਯ. ਨ ਹੇਤਂ, ਭਿਕ੍ਖਵੇ, ਆਯਤਨਂ ਸਙ੍ਖਾਰਸਮਾਪਤ੍ਤਿਪਤ੍ਤਬ੍ਬਮਕ੍ਖਾਯਤਿ; ਸਙ੍ਖਾਰਾਵਸੇਸਸਮਾਪਤ੍ਤਿਪਤ੍ਤਬ੍ਬਮੇਤਂ, ਭਿਕ੍ਖਵੇ, ਆਯਤਨਮਕ੍ਖਾਯਤਿ. ‘ਤਯਿਦਂ ਸਙ੍ਖਤਂ ਓਲ਼ਾਰਿਕਂ ਅਤ੍ਥਿ ਖੋ ਪਨ ਸਙ੍ਖਾਰਾਨਂ ਨਿਰੋਧੋ ਅਤ੍ਥੇਤ’ਨ੍ਤਿ – ਇਤਿ ਵਿਦਿਤ੍ਵਾ ਤਸ੍ਸ ਨਿਸ੍ਸਰਣਦਸ੍ਸਾਵੀ ਤਥਾਗਤੋ ਤਦੁਪਾਤਿਵਤ੍ਤੋ.

੨੫. ‘‘ਤਤ੍ਰ, ਭਿਕ੍ਖਵੇ, ਯੇ ਤੇ ਸਮਣਬ੍ਰਾਹ੍ਮਣਾ ਸਤੋ ਸਤ੍ਤਸ੍ਸ ਉਚ੍ਛੇਦਂ ਵਿਨਾਸਂ ਵਿਭਵਂ ਪਞ੍ਞਪੇਨ੍ਤਿ, ਤਤ੍ਰ, ਭਿਕ੍ਖਵੇ, ਯੇ ਤੇ ਸਮਣਬ੍ਰਾਹ੍ਮਣਾ ਸਞ੍ਞਿਂ ਅਤ੍ਤਾਨਂ ਪਞ੍ਞਪੇਨ੍ਤਿ ਅਰੋਗਂ ਪਰਂ ਮਰਣਾ ਤੇਸਮੇਤੇ ਪਟਿਕ੍ਕੋਸਨ੍ਤਿ, ਯੇਪਿ ਤੇ ਭੋਨ੍ਤੋ ਸਮਣਬ੍ਰਾਹ੍ਮਣਾ ਅਸਞ੍ਞਿਂ ਅਤ੍ਤਾਨਂ ਪਞ੍ਞਪੇਨ੍ਤਿ ਅਰੋਗਂ ਪਰਂ ਮਰਣਾ ਤੇਸਮੇਤੇ ਪਟਿਕ੍ਕੋਸਨ੍ਤਿ, ਯੇਪਿ ਤੇ ਭੋਨ੍ਤੋ ਸਮਣਬ੍ਰਾਹ੍ਮਣਾ ਨੇਵਸਞ੍ਞੀਨਾਸਞ੍ਞਿਂ ਅਤ੍ਤਾਨਂ ਪਞ੍ਞਪੇਨ੍ਤਿ ਅਰੋਗਂ ਪਰਂ ਮਰਣਾ ਤੇਸਮੇਤੇ ਪਟਿਕ੍ਕੋਸਨ੍ਤਿ. ਤਂ ਕਿਸ੍ਸ ਹੇਤੁ? ਸਬ੍ਬੇਪਿਮੇ ਭੋਨ੍ਤੋ ਸਮਣਬ੍ਰਾਹ੍ਮਣਾ ਉਦ੍ਧਂ ਸਰਂ [ਉਦ੍ਧਂਸਰਾ (ਸੀ. ਪੀ.), ਉਦ੍ਧਂ ਪਰਾਮਸਨ੍ਤਿ (ਸ੍ਯਾ. ਕਂ.)] ਆਸਤ੍ਤਿਂਯੇਵ ਅਭਿਵਦਨ੍ਤਿ – ‘ਇਤਿ ਪੇਚ੍ਚ ਭਵਿਸ੍ਸਾਮ, ਇਤਿ ਪੇਚ੍ਚ ਭਵਿਸ੍ਸਾਮਾ’ਤਿ. ਸੇਯ੍ਯਥਾਪਿ ਨਾਮ ਵਾਣਿਜਸ੍ਸ ਵਾਣਿਜ੍ਜਾਯ ਗਚ੍ਛਤੋ ਏਵਂ ਹੋਤਿ – ‘ਇਤੋ ਮੇ ਇਦਂ ਭਵਿਸ੍ਸਤਿ, ਇਮਿਨਾ ਇਦਂ ਲਚ੍ਛਾਮੀ’ਤਿ, ਏਵਮੇਵਿਮੇ ਭੋਨ੍ਤੋ ਸਮਣਬ੍ਰਾਹ੍ਮਣਾ ਵਾਣਿਜੂਪਮਾ ਮਞ੍ਞੇ ਪਟਿਭਨ੍ਤਿ – ‘ਇਤਿ ਪੇਚ੍ਚ ਭਵਿਸ੍ਸਾਮ, ਇਤਿ ਪੇਚ੍ਚ ਭਵਿਸ੍ਸਾਮਾ’ਤਿ. ਤਯਿਦਂ, ਭਿਕ੍ਖਵੇ, ਤਥਾਗਤੋ ਅਭਿਜਾਨਾਤਿ. ਯੇ ਖੋ ਤੇ ਭੋਨ੍ਤੋ ਸਮਣਬ੍ਰਾਹ੍ਮਣਾ ਸਤੋ ਸਤ੍ਤਸ੍ਸ ਉਚ੍ਛੇਦਂ ਵਿਨਾਸਂ ਵਿਭਵਂ ਪਞ੍ਞਪੇਨ੍ਤਿ ਤੇ ਸਕ੍ਕਾਯਭਯਾ ਸਕ੍ਕਾਯਪਰਿਜੇਗੁਚ੍ਛਾ ਸਕ੍ਕਾਯਞ੍ਞੇਵ ਅਨੁਪਰਿਧਾਵਨ੍ਤਿ ਅਨੁਪਰਿਵਤ੍ਤਨ੍ਤਿ. ਸੇਯ੍ਯਥਾਪਿ ਨਾਮ ਸਾ ਗਦ੍ਦੁਲਬਦ੍ਧੋ ਦਲ਼੍ਹੇ ਥਮ੍ਭੇ ਵਾ ਖਿਲੇ [ਖੀਲੇ (ਸੀ. ਸ੍ਯਾ. ਕਂ. ਪੀ.)] ਵਾ ਉਪਨਿਬਦ੍ਧੋ, ਤਮੇਵ ਥਮ੍ਭਂ ਵਾ ਖਿਲਂ ਵਾ ਅਨੁਪਰਿਧਾਵਤਿ ਅਨੁਪਰਿਵਤ੍ਤਤਿ; ਏਵਮੇਵਿਮੇ ਭੋਨ੍ਤੋ ਸਮਣਬ੍ਰਾਹ੍ਮਣਾ ਸਕ੍ਕਾਯਭਯਾ ਸਕ੍ਕਾਯਪਰਿਜੇਗੁਚ੍ਛਾ ਸਕ੍ਕਾਯਞ੍ਞੇਵ ਅਨੁਪਰਿਧਾਵਨ੍ਤਿ ਅਨੁਪਰਿਵਤ੍ਤਨ੍ਤਿ. ‘ਤਯਿਦਂ ਸਙ੍ਖਤਂ ਓਲ਼ਾਰਿਕਂ ਅਤ੍ਥਿ ਖੋ ਪਨ ਸਙ੍ਖਾਰਾਨਂ ਨਿਰੋਧੋ ਅਤ੍ਥੇਤ’ਨ੍ਤਿ – ਇਤਿ ਵਿਦਿਤ੍ਵਾ ਤਸ੍ਸ ਨਿਸ੍ਸਰਣਦਸ੍ਸਾਵੀ ਤਥਾਗਤੋ ਤਦੁਪਾਤਿਵਤ੍ਤੋ.

੨੬. ‘‘ਯੇ ਹਿ ਕੇਚਿ, ਭਿਕ੍ਖਵੇ, ਸਮਣਾ ਵਾ ਬ੍ਰਾਹ੍ਮਣਾ ਵਾ ਅਪਰਨ੍ਤਕਪ੍ਪਿਕਾ ਅਪਰਨ੍ਤਾਨੁਦਿਟ੍ਠਿਨੋ ਅਪਰਨ੍ਤਂ ਆਰਬ੍ਭ ਅਨੇਕਵਿਹਿਤਾਨਿ ਅਧਿਵੁਤ੍ਤਿਪਦਾਨਿ ਅਭਿਵਦਨ੍ਤਿ, ਸਬ੍ਬੇ ਤੇ ਇਮਾਨੇਵ ਪਞ੍ਚਾਯਤਨਾਨਿ ਅਭਿਵਦਨ੍ਤਿ ਏਤੇਸਂ ਵਾ ਅਞ੍ਞਤਰਂ.

੨੭. ‘‘ਸਨ੍ਤਿ, ਭਿਕ੍ਖਵੇ, ਏਕੇ ਸਮਣਬ੍ਰਾਹ੍ਮਣਾ ਪੁਬ੍ਬਨ੍ਤਕਪ੍ਪਿਕਾ ਪੁਬ੍ਬਨ੍ਤਾਨੁਦਿਟ੍ਠਿਨੋ ਪੁਬ੍ਬਨ੍ਤਂ ਆਰਬ੍ਭ ਅਨੇਕਵਿਹਿਤਾਨਿ ਅਧਿਵੁਤ੍ਤਿਪਦਾਨਿ ਅਭਿਵਦਨ੍ਤਿ. ‘ਸਸ੍ਸਤੋ ਅਤ੍ਤਾ ਚ ਲੋਕੋ ਚ, ਇਦਮੇਵ ਸਚ੍ਚਂ ਮੋਘਮਞ੍ਞ’ਨ੍ਤਿ – ਇਤ੍ਥੇਕੇ ਅਭਿਵਦਨ੍ਤਿ, ‘ਅਸਸ੍ਸਤੋ ਅਤ੍ਤਾ ਚ ਲੋਕੋ ਚ, ਇਦਮੇਵ ਸਚ੍ਚਂ ਮੋਘਮਞ੍ਞ’ਨ੍ਤਿ – ਇਤ੍ਥੇਕੇ ਅਭਿਵਦਨ੍ਤਿ, ‘ਸਸ੍ਸਤੋ ਚ ਅਸਸ੍ਸਤੋ ਚ ਅਤ੍ਤਾ ਚ ਲੋਕੋ ਚ, ਇਦਮੇਵ ਸਚ੍ਚਂ ਮੋਘਮਞ੍ਞ’ਨ੍ਤਿ – ਇਤ੍ਥੇਕੇ ਅਭਿਵਦਨ੍ਤਿ, ‘ਨੇਵਸਸ੍ਸਤੋ ਨਾਸਸ੍ਸਤੋ ਅਤ੍ਤਾ ਚ ਲੋਕੋ ਚ, ਇਦਮੇਵ ਸਚ੍ਚਂ ਮੋਘਮਞ੍ਞ’ਨ੍ਤਿ – ਇਤ੍ਥੇਕੇ ਅਭਿਵਦਨ੍ਤਿ, ‘ਅਨ੍ਤਵਾ ਅਤ੍ਤਾ ਚ ਲੋਕੋ ਚ, ਇਦਮੇਵ ਸਚ੍ਚਂ ਮੋਘਮਞ੍ਞ’ਨ੍ਤਿ – ਇਤ੍ਥੇਕੇ ਅਭਿਵਦਨ੍ਤਿ, ‘ਅਨਨ੍ਤਵਾ ਅਤ੍ਤਾ ਚ ਲੋਕੋ ਚ, ਇਦਮੇਵ ਸਚ੍ਚਂ ਮੋਘਮਞ੍ਞ’ਨ੍ਤਿ – ਇਤ੍ਥੇਕੇ ਅਭਿਵਦਨ੍ਤਿ, ‘ਅਨ੍ਤਵਾ ਚ ਅਨਨ੍ਤਵਾ ਚ ਅਤ੍ਤਾ ਚ ਲੋਕੋ ਚ, ਇਦਮੇਵ ਸਚ੍ਚਂ ਮੋਘਮਞ੍ਞ’ਨ੍ਤਿ – ਇਤ੍ਥੇਕੇ ਅਭਿਵਦਨ੍ਤਿ, ‘ਨੇਵਨ੍ਤਵਾ ਨਾਨਨ੍ਤਵਾ ਅਤ੍ਤਾ ਚ ਲੋਕੋ ਚ, ਇਦਮੇਵ ਸਚ੍ਚਂ ਮੋਘਮਞ੍ਞ’ਨ੍ਤਿ – ਇਤ੍ਥੇਕੇ ਅਭਿਵਦਨ੍ਤਿ, ‘ਏਕਤ੍ਤਸਞ੍ਞੀ ਅਤ੍ਤਾ ਚ ਲੋਕੋ ਚ, ਇਦਮੇਵ ਸਚ੍ਚਂ ਮੋਘਮਞ੍ਞ’ਨ੍ਤਿ – ਇਤ੍ਥੇਕੇ ਅਭਿਵਦਨ੍ਤਿ, ‘ਨਾਨਤ੍ਤਸਞ੍ਞੀ ਅਤ੍ਤਾ ਚ ਲੋਕੋ ਚ, ਇਦਮੇਵ ਸਚ੍ਚਂ ਮੋਘਮਞ੍ਞ’ਨ੍ਤਿ – ਇਤ੍ਥੇਕੇ ਅਭਿਵਦਨ੍ਤਿ, ‘ਪਰਿਤ੍ਤਸਞ੍ਞੀ ਅਤ੍ਤਾ ਚ ਲੋਕੋ ਚ, ਇਦਮੇਵ ਸਚ੍ਚਂ ਮੋਘਮਞ੍ਞ’ਨ੍ਤਿ – ਇਤ੍ਥੇਕੇ ਅਭਿਵਦਨ੍ਤਿ, ‘ਅਪ੍ਪਮਾਣਸਞ੍ਞੀ ਅਤ੍ਤਾ ਚ ਲੋਕੋ ਚ, ਇਦਮੇਵ ਸਚ੍ਚਂ ਮੋਘਮਞ੍ਞ’ਨ੍ਤਿ – ਇਤ੍ਥੇਕੇ ਅਭਿਵਦਨ੍ਤਿ, ‘ਏਕਨ੍ਤਸੁਖੀ ਅਤ੍ਤਾ ਚ ਲੋਕੋ ਚ, ਇਦਮੇਵ ਸਚ੍ਚਂ ਮੋਘਮਞ੍ਞ’ਨ੍ਤਿ – ਇਤ੍ਥੇਕੇ ਅਭਿਵਦਨ੍ਤਿ, ‘ਏਕਨ੍ਤਦੁਕ੍ਖੀ ਅਤ੍ਤਾ ਚ ਲੋਕੋ ਚ, ਇਦਮੇਵ ਸਚ੍ਚਂ ਮੋਘਮਞ੍ਞ’ਨ੍ਤਿ – ਇਤ੍ਥੇਕੇ ਅਭਿਵਦਨ੍ਤਿ, ‘ਸੁਖਦੁਕ੍ਖੀ ਅਤ੍ਤਾ ਚ ਲੋਕੋ ਚ, ਇਦਮੇਵ ਸਚ੍ਚਂ ਮੋਘਮਞ੍ਞ’ਨ੍ਤਿ – ਇਤ੍ਥੇਕੇ ਅਭਿਵਦਨ੍ਤਿ, ‘ਅਦੁਕ੍ਖਮਸੁਖੀ ਅਤ੍ਤਾ ਚ ਲੋਕੋ ਚ, ਇਦਮੇਵ ਸਚ੍ਚਂ ਮੋਘਮਞ੍ਞ’ਨ੍ਤਿ – ਇਤ੍ਥੇਕੇ ਅਭਿਵਦਨ੍ਤਿ.

੨੮. ‘‘ਤਤ੍ਰ, ਭਿਕ੍ਖਵੇ, ਯੇ ਤੇ ਸਮਣਬ੍ਰਾਹ੍ਮਣਾ ਏਵਂਵਾਦਿਨੋ ਏਵਂਦਿਟ੍ਠਿਨੋ – ‘ਸਸ੍ਸਤੋ ਅਤ੍ਤਾ ਚ ਲੋਕੋ ਚ, ਇਦਮੇਵ ਸਚ੍ਚਂ ਮੋਘਮਞ੍ਞ’ਨ੍ਤਿ, ਤੇਸਂ ਵਤ ਅਞ੍ਞਤ੍ਰੇਵ ਸਦ੍ਧਾਯ ਅਞ੍ਞਤ੍ਰ ਰੁਚਿਯਾ ਅਞ੍ਞਤ੍ਰ ਅਨੁਸ੍ਸਵਾ ਅਞ੍ਞਤ੍ਰ ਆਕਾਰਪਰਿਵਿਤਕ੍ਕਾ ਅਞ੍ਞਤ੍ਰ ਦਿਟ੍ਠਿਨਿਜ੍ਝਾਨਕ੍ਖਨ੍ਤਿਯਾ ਪਚ੍ਚਤ੍ਤਂਯੇਵ ਞਾਣਂ ਭਵਿਸ੍ਸਤਿ ਪਰਿਸੁਦ੍ਧਂ ਪਰਿਯੋਦਾਤਨ੍ਤਿ – ਨੇਤਂ ਠਾਨਂ ਵਿਜ੍ਜਤਿ. ਪਚ੍ਚਤ੍ਤਂ ਖੋ ਪਨ, ਭਿਕ੍ਖਵੇ, ਞਾਣੇ ਅਸਤਿ ਪਰਿਸੁਦ੍ਧੇ ਪਰਿਯੋਦਾਤੇ ਯਦਪਿ [ਯਦਿਪਿ (ਕ.)] ਤੇ ਭੋਨ੍ਤੋ ਸਮਣਬ੍ਰਾਹ੍ਮਣਾ ਤਤ੍ਥ ਞਾਣਭਾਗਮਤ੍ਤਮੇਵ ਪਰਿਯੋਦਪੇਨ੍ਤਿ ਤਦਪਿ ਤੇਸਂ ਭਵਤਂ ਸਮਣਬ੍ਰਾਹ੍ਮਣਾਨਂ ਉਪਾਦਾਨਮਕ੍ਖਾਯਤਿ. ‘ਤਯਿਦਂ ਸਙ੍ਖਤਂ ਓਲ਼ਾਰਿਕਂ ਅਤ੍ਥਿ ਖੋ ਪਨ ਸਙ੍ਖਾਰਾਨਂ ਨਿਰੋਧੋ ਅਤ੍ਥੇਤ’ਨ੍ਤਿ – ਇਤਿ ਵਿਦਿਤ੍ਵਾ ਤਸ੍ਸ ਨਿਸ੍ਸਰਣਦਸ੍ਸਾਵੀ ਤਥਾਗਤੋ ਤਦੁਪਾਤਿਵਤ੍ਤੋ.

੨੯. ‘‘ਤਤ੍ਰ, ਭਿਕ੍ਖਵੇ, ਯੇ ਤੇ ਸਮਣਬ੍ਰਾਹ੍ਮਣਾ ਏਵਂਵਾਦਿਨੋ ਏਵਂਦਿਟ੍ਠਿਨੋ – ‘ਅਸਸ੍ਸਤੋ ਅਤ੍ਤਾ ਚ ਲੋਕੋ ਚ, ਇਦਮੇਵ ਸਚ੍ਚਂ ਮੋਘਮਞ੍ਞ’ਨ੍ਤਿ…ਪੇ… [ਯਥਾ ਸਸ੍ਸਤਵਾਰੇ, ਤਥਾ ਵਿਤ੍ਥਾਰੇਤਬ੍ਬਂ] ਸਸ੍ਸਤੋ ਚ ਅਸਸ੍ਸਤੋ ਚ ਅਤ੍ਤਾ ਚ ਲੋਕੋ ਚ… ਨੇਵਸਸ੍ਸਤੋ ਨਾਸਸ੍ਸਤੋ ਅਤ੍ਤਾ ਚ ਲੋਕੋ ਚ… ਅਨ੍ਤਵਾ ਅਤ੍ਤਾ ਚ ਲੋਕੋ ਚ… ਅਨਨ੍ਤਵਾ ਅਤ੍ਤਾ ਚ ਲੋਕੋ ਚ… ਅਨ੍ਤਵਾ ਚ ਅਨਨ੍ਤਵਾ ਚ ਅਤ੍ਤਾ ਚ ਲੋਕੋ ਚ… ਨੇਵਨ੍ਤਵਾ ਨਾਨਨ੍ਤਵਾ ਅਤ੍ਤਾ ਚ ਲੋਕੋ ਚ… ਏਕਤ੍ਤਸਞ੍ਞੀ ਅਤ੍ਤਾ ਚ ਲੋਕੋ ਚ… ਨਾਨਤ੍ਤਸਞ੍ਞੀ ਅਤ੍ਤਾ ਚ ਲੋਕੋ ਚ… ਪਰਿਤ੍ਤਸਞ੍ਞੀ ਅਤ੍ਤਾ ਚ ਲੋਕੋ ਚ… ਅਪ੍ਪਮਾਣਸਞ੍ਞੀ ਅਤ੍ਤਾ ਚ ਲੋਕੋ ਚ… ਏਕਨ੍ਤਸੁਖੀ ਅਤ੍ਤਾ ਚ ਲੋਕੋ ਚ… ਏਕਨ੍ਤਦੁਕ੍ਖੀ ਅਤ੍ਤਾ ਚ ਲੋਕੋ ਚ… ਸੁਖਦੁਕ੍ਖੀ ਅਤ੍ਤਾ ਚ ਲੋਕੋ ਚ… ਅਦੁਕ੍ਖਮਸੁਖੀ ਅਤ੍ਤਾ ਚ ਲੋਕੋ ਚ, ਇਦਮੇਵ ਸਚ੍ਚਂ ਮੋਘਮਞ੍ਞਨ੍ਤਿ, ਤੇਸਂ ਵਤ ਅਞ੍ਞਤ੍ਰੇਵ ਸਦ੍ਧਾਯ ਅਞ੍ਞਤ੍ਰ ਰੁਚਿਯਾ ਅਞ੍ਞਤ੍ਰ ਅਨੁਸ੍ਸਵਾ ਅਞ੍ਞਤ੍ਰ ਆਕਾਰਪਰਿਵਿਤਕ੍ਕਾ ਅਞ੍ਞਤ੍ਰ ਦਿਟ੍ਠਿਨਿਜ੍ਝਾਨਕ੍ਖਨ੍ਤਿਯਾ ਪਚ੍ਚਤ੍ਤਂਯੇਵ ਞਾਣਂ ਭਵਿਸ੍ਸਤਿ ਪਰਿਸੁਦ੍ਧਂ ਪਰਿਯੋਦਾਤਨ੍ਤਿ – ਨੇਤਂ ਠਾਨਂ ਵਿਜ੍ਜਤਿ. ਪਚ੍ਚਤ੍ਤਂ ਖੋ ਪਨ, ਭਿਕ੍ਖਵੇ, ਞਾਣੇ ਅਸਤਿ ਪਰਿਸੁਦ੍ਧੇ ਪਰਿਯੋਦਾਤੇ ਯਦਪਿ ਤੇ ਭੋਨ੍ਤੋ ਸਮਣਬ੍ਰਾਹ੍ਮਣਾ ਤਤ੍ਥ ਞਾਣਭਾਗਮਤ੍ਤਮੇਵ ਪਰਿਯੋਦਪੇਨ੍ਤਿ ਤਦਪਿ ਤੇਸਂ ਭਵਤਂ ਸਮਣਬ੍ਰਾਹ੍ਮਣਾਨਂ ਉਪਾਦਾਨਮਕ੍ਖਾਯਤਿ. ‘ਤਯਿਦਂ ਸਙ੍ਖਤਂ ਓਲ਼ਾਰਿਕਂ ਅਤ੍ਥਿ ਖੋ ਪਨ ਸਙ੍ਖਾਰਾਨਂ ਨਿਰੋਧੋ ਅਤ੍ਥੇਤ’ਨ੍ਤਿ – ਇਤਿ ਵਿਦਿਤ੍ਵਾ ਤਸ੍ਸ ਨਿਸ੍ਸਰਣਦਸ੍ਸਾਵੀ ਤਥਾਗਤੋ ਤਦੁਪਾਤਿਵਤ੍ਤੋ.

੩੦. ‘‘ਇਧ, ਭਿਕ੍ਖਵੇ, ਏਕਚ੍ਚੋ ਸਮਣੋ ਵਾ ਬ੍ਰਾਹ੍ਮਣੋ ਵਾ ਪੁਬ੍ਬਨ੍ਤਾਨੁਦਿਟ੍ਠੀਨਞ੍ਚ ਪਟਿਨਿਸ੍ਸਗ੍ਗਾ, ਅਪਰਨ੍ਤਾਨੁਦਿਟ੍ਠੀਨਞ੍ਚ ਪਟਿਨਿਸ੍ਸਗ੍ਗਾ, ਸਬ੍ਬਸੋ ਕਾਮਸਂਯੋਜਨਾਨਂ ਅਨਧਿਟ੍ਠਾਨਾ, ਪਵਿਵੇਕਂ ਪੀਤਿਂ ਉਪਸਮ੍ਪਜ੍ਜ ਵਿਹਰਤਿ – ‘ਏਤਂ ਸਨ੍ਤਂ ਏਤਂ ਪਣੀਤਂ ਯਦਿਦਂ ਪਵਿਵੇਕਂ ਪੀਤਿਂ ਉਪਸਮ੍ਪਜ੍ਜ ਵਿਹਰਾਮੀ’ਤਿ. ਤਸ੍ਸ ਸਾ ਪਵਿਵੇਕਾ ਪੀਤਿ ਨਿਰੁਜ੍ਝਤਿ. ਪਵਿਵੇਕਾਯ ਪੀਤਿਯਾ ਨਿਰੋਧਾ ਉਪ੍ਪਜ੍ਜਤਿ ਦੋਮਨਸ੍ਸਂ, ਦੋਮਨਸ੍ਸਸ੍ਸ ਨਿਰੋਧਾ ਉਪ੍ਪਜ੍ਜਤਿ ਪਵਿਵੇਕਾ ਪੀਤਿ. ਸੇਯ੍ਯਥਾਪਿ, ਭਿਕ੍ਖਵੇ, ਯਂ ਛਾਯਾ ਜਹਤਿ ਤਂ ਆਤਪੋ ਫਰਤਿ, ਯਂ ਆਤਪੋ ਜਹਤਿ ਤਂ ਛਾਯਾ ਫਰਤਿ; ਏਵਮੇਵ ਖੋ, ਭਿਕ੍ਖਵੇ, ਪਵਿਵੇਕਾਯ ਪੀਤਿਯਾ ਨਿਰੋਧਾ ਉਪ੍ਪਜ੍ਜਤਿ ਦੋਮਨਸ੍ਸਂ, ਦੋਮਨਸ੍ਸਸ੍ਸ ਨਿਰੋਧਾ ਉਪ੍ਪਜ੍ਜਤਿ ਪਵਿਵੇਕਾ ਪੀਤਿ. ਤਯਿਦਂ, ਭਿਕ੍ਖਵੇ, ਤਥਾਗਤੋ ਅਭਿਜਾਨਾਤਿ. ਅਯਂ ਖੋ ਭਵਂ ਸਮਣੋ ਵਾ ਬ੍ਰਾਹ੍ਮਣੋ ਵਾ ਪੁਬ੍ਬਨ੍ਤਾਨੁਦਿਟ੍ਠੀਨਞ੍ਚ ਪਟਿਨਿਸ੍ਸਗ੍ਗਾ, ਅਪਰਨ੍ਤਾਨੁਦਿਟ੍ਠੀਨਞ੍ਚ ਪਟਿਨਿਸ੍ਸਗ੍ਗਾ, ਸਬ੍ਬਸੋ ਕਾਮਸਂਯੋਜਨਾਨਂ ਅਨਧਿਟ੍ਠਾਨਾ, ਪਵਿਵੇਕਂ ਪੀਤਿਂ ਉਪਸਮ੍ਪਜ੍ਜ ਵਿਹਰਤਿ – ‘ਏਤਂ ਸਨ੍ਤਂ ਏਤਂ ਪਣੀਤਂ ਯਦਿਦਂ ਪਵਿਵੇਕਂ ਪੀਤਿਂ ਉਪਸਮ੍ਪਜ੍ਜ ਵਿਹਰਾਮੀ’ਤਿ. ਤਸ੍ਸ ਸਾ ਪਵਿਵੇਕਾ ਪੀਤਿ ਨਿਰੁਜ੍ਝਤਿ. ਪਵਿਵੇਕਾਯ ਪੀਤਿਯਾ ਨਿਰੋਧਾ ਉਪ੍ਪਜ੍ਜਤਿ ਦੋਮਨਸ੍ਸਂ, ਦੋਮਨਸ੍ਸਸ੍ਸ ਨਿਰੋਧਾ ਉਪ੍ਪਜ੍ਜਤਿ ਪਵਿਵੇਕਾ ਪੀਤਿ. ‘ਤਯਿਦਂ ਸਙ੍ਖਤਂ ਓਲ਼ਾਰਿਕਂ ਅਤ੍ਥਿ ਖੋ ਪਨ ਸਙ੍ਖਾਰਾਨਂ ਨਿਰੋਧੋ ਅਤ੍ਥੇਤ’ਨ੍ਤਿ – ਇਤਿ ਵਿਦਿਤ੍ਵਾ ਤਸ੍ਸ ਨਿਸ੍ਸਰਣਦਸ੍ਸਾਵੀ ਤਥਾਗਤੋ ਤਦੁਪਾਤਿਵਤ੍ਤੋ.

੩੧. ‘‘ਇਧ ਪਨ, ਭਿਕ੍ਖਵੇ, ਏਕਚ੍ਚੋ ਸਮਣੋ ਵਾ ਬ੍ਰਾਹ੍ਮਣੋ ਵਾ ਪੁਬ੍ਬਨ੍ਤਾਨੁਦਿਟ੍ਠੀਨਞ੍ਚ ਪਟਿਨਿਸ੍ਸਗ੍ਗਾ, ਅਪਰਨ੍ਤਾਨੁਦਿਟ੍ਠੀਨਞ੍ਚ ਪਟਿਨਿਸ੍ਸਗ੍ਗਾ, ਸਬ੍ਬਸੋ ਕਾਮਸਂਯੋਜਨਾਨਂ ਅਨਧਿਟ੍ਠਾਨਾ, ਪਵਿਵੇਕਾਯ ਪੀਤਿਯਾ ਸਮਤਿਕ੍ਕਮਾ ਨਿਰਾਮਿਸਂ ਸੁਖਂ ਉਪਸਮ੍ਪਜ੍ਜ ਵਿਹਰਤਿ – ‘ਏਤਂ ਸਨ੍ਤਂ ਏਤਂ ਪਣੀਤਂ ਯਦਿਦਂ ਨਿਰਾਮਿਸਂ ਸੁਖਂ ਉਪਸਮ੍ਪਜ੍ਜ ਵਿਹਰਾਮੀ’ਤਿ. ਤਸ੍ਸ ਤਂ ਨਿਰਾਮਿਸਂ ਸੁਖਂ ਨਿਰੁਜ੍ਝਤਿ. ਨਿਰਾਮਿਸਸ੍ਸ ਸੁਖਸ੍ਸ ਨਿਰੋਧਾ ਉਪ੍ਪਜ੍ਜਤਿ ਪਵਿਵੇਕਾ ਪੀਤਿ, ਪਵਿਵੇਕਾਯ ਪੀਤਿਯਾ ਨਿਰੋਧਾ ਉਪ੍ਪਜ੍ਜਤਿ ਨਿਰਾਮਿਸਂ ਸੁਖਂ. ਸੇਯ੍ਯਥਾਪਿ, ਭਿਕ੍ਖਵੇ, ਯਂ ਛਾਯਾ ਜਹਤਿ ਤਂ ਆਤਪੋ ਫਰਤਿ, ਯਂ ਆਤਪੋ ਜਹਤਿ ਤਂ ਛਾਯਾ ਫਰਤਿ; ਏਵਮੇਵ ਖੋ, ਭਿਕ੍ਖਵੇ, ਨਿਰਾਮਿਸਸ੍ਸ ਸੁਖਸ੍ਸ ਨਿਰੋਧਾ ਉਪ੍ਪਜ੍ਜਤਿ ਪਵਿਵੇਕਾ ਪੀਤਿ, ਪਵਿਵੇਕਾਯ ਪੀਤਿਯਾ ਨਿਰੋਧਾ ਉਪ੍ਪਜ੍ਜਤਿ ਨਿਰਾਮਿਸਂ ਸੁਖਂ. ਤਯਿਦਂ, ਭਿਕ੍ਖਵੇ, ਤਥਾਗਤੋ ਅਭਿਜਾਨਾਤਿ. ਅਯਂ ਖੋ ਭਵਂ ਸਮਣੋ ਵਾ ਬ੍ਰਾਹ੍ਮਣੋ ਵਾ ਪੁਬ੍ਬਨ੍ਤਾਨੁਦਿਟ੍ਠੀਨਞ੍ਚ ਪਟਿਨਿਸ੍ਸਗ੍ਗਾ, ਅਪਰਨ੍ਤਾਨੁਦਿਟ੍ਠੀਨਞ੍ਚ ਪਟਿਨਿਸ੍ਸਗ੍ਗਾ, ਸਬ੍ਬਸੋ ਕਾਮਸਂਯੋਜਨਾਨਂ ਅਨਧਿਟ੍ਠਾਨਾ, ਪਵਿਵੇਕਾਯ ਪੀਤਿਯਾ ਸਮਤਿਕ੍ਕਮਾ, ਨਿਰਾਮਿਸਂ ਸੁਖਂ ਉਪਸਮ੍ਪਜ੍ਜ ਵਿਹਰਤਿ – ‘ਏਤਂ ਸਨ੍ਤਂ ਏਤਂ ਪਣੀਤਂ ਯਦਿਦਂ ਨਿਰਾਮਿਸਂ ਸੁਖਂ ਉਪਸਮ੍ਪਜ੍ਜ ਵਿਹਰਾਮੀ’ਤਿ. ਤਸ੍ਸ ਤਂ ਨਿਰਾਮਿਸਂ ਸੁਖਂ ਨਿਰੁਜ੍ਝਤਿ. ਨਿਰਾਮਿਸਸ੍ਸ ਸੁਖਸ੍ਸ ਨਿਰੋਧਾ ਉਪ੍ਪਜ੍ਜਤਿ ਪਵਿਵੇਕਾ ਪੀਤਿ, ਪਵਿਵੇਕਾਯ ਪੀਤਿਯਾ ਨਿਰੋਧਾ ਉਪ੍ਪਜ੍ਜਤਿ ਨਿਰਾਮਿਸਂ ਸੁਖਂ. ‘ਤਯਿਦਂ ਸਙ੍ਖਤਂ ਓਲ਼ਾਰਿਕਂ ਅਤ੍ਥਿ ਖੋ ਪਨ ਸਙ੍ਖਾਰਾਨਂ ਨਿਰੋਧੋ ਅਤ੍ਥੇਤ’ਨ੍ਤਿ – ਇਤਿ ਵਿਦਿਤ੍ਵਾ ਤਸ੍ਸ ਨਿਸ੍ਸਰਣਦਸ੍ਸਾਵੀ ਤਥਾਗਤੋ ਤਦੁਪਾਤਿਵਤ੍ਤੋ.

੩੨. ‘‘ਇਧ ਪਨ, ਭਿਕ੍ਖਵੇ, ਏਕਚ੍ਚੋ ਸਮਣੋ ਵਾ ਬ੍ਰਾਹ੍ਮਣੋ ਵਾ ਪੁਬ੍ਬਨ੍ਤਾਨੁਦਿਟ੍ਠੀਨਞ੍ਚ ਪਟਿਨਿਸ੍ਸਗ੍ਗਾ, ਅਪਰਨ੍ਤਾਨੁਦਿਟ੍ਠੀਨਞ੍ਚ ਪਟਿਨਿਸ੍ਸਗ੍ਗਾ, ਸਬ੍ਬਸੋ ਕਾਮਸਂਯੋਜਨਾਨਂ ਅਨਧਿਟ੍ਠਾਨਾ, ਪਵਿਵੇਕਾਯ ਪੀਤਿਯਾ ਸਮਤਿਕ੍ਕਮਾ, ਨਿਰਾਮਿਸਸ੍ਸ ਸੁਖਸ੍ਸ ਸਮਤਿਕ੍ਕਮਾ, ਅਦੁਕ੍ਖਮਸੁਖਂ ਵੇਦਨਂ ਉਪਸਮ੍ਪਜ੍ਜ ਵਿਹਰਤਿ – ‘ਏਤਂ ਸਨ੍ਤਂ ਏਤਂ ਪਣੀਤਂ ਯਦਿਦਂ ਅਦੁਕ੍ਖਮਸੁਖਂ ਵੇਦਨਂ ਉਪਸਮ੍ਪਜ੍ਜ ਵਿਹਰਾਮੀ’ਤਿ. ਤਸ੍ਸ ਸਾ ਅਦੁਕ੍ਖਮਸੁਖਾ ਵੇਦਨਾ ਨਿਰੁਜ੍ਝਤਿ. ਅਦੁਕ੍ਖਮਸੁਖਾਯ ਵੇਦਨਾਯ ਨਿਰੋਧਾ ਉਪ੍ਪਜ੍ਜਤਿ ਨਿਰਾਮਿਸਂ ਸੁਖਂ, ਨਿਰਾਮਿਸਸ੍ਸ ਸੁਖਸ੍ਸ ਨਿਰੋਧਾ ਉਪ੍ਪਜ੍ਜਤਿ ਅਦੁਕ੍ਖਮਸੁਖਾ ਵੇਦਨਾ. ਸੇਯ੍ਯਥਾਪਿ, ਭਿਕ੍ਖਵੇ, ਯਂ ਛਾਯਾ ਜਹਤਿ ਤਂ ਆਤਪੋ ਫਰਤਿ, ਯਂ ਆਤਪੋ ਜਹਤਿ ਤਂ ਛਾਯਾ ਫਰਤਿ; ਏਵਮੇਵ ਖੋ, ਭਿਕ੍ਖਵੇ, ਅਦੁਕ੍ਖਮਸੁਖਾਯ ਵੇਦਨਾਯ ਨਿਰੋਧਾ ਉਪ੍ਪਜ੍ਜਤਿ ਨਿਰਾਮਿਸਂ ਸੁਖਂ, ਨਿਰਾਮਿਸਸ੍ਸ ਸੁਖਸ੍ਸ ਨਿਰੋਧਾ ਉਪ੍ਪਜ੍ਜਤਿ ਅਦੁਕ੍ਖਮਸੁਖਾ ਵੇਦਨਾ. ਤਯਿਦਂ, ਭਿਕ੍ਖਵੇ, ਤਥਾਗਤੋ ਅਭਿਜਾਨਾਤਿ. ਅਯਂ ਖੋ ਭਵਂ ਸਮਣੋ ਵਾ ਬ੍ਰਾਹ੍ਮਣੋ ਵਾ ਪੁਬ੍ਬਨ੍ਤਾਨੁਦਿਟ੍ਠੀਨਞ੍ਚ ਪਟਿਨਿਸ੍ਸਗ੍ਗਾ, ਅਪਰਨ੍ਤਾਨੁਦਿਟ੍ਠੀਨਞ੍ਚ ਪਟਿਨਿਸ੍ਸਗ੍ਗਾ, ਸਬ੍ਬਸੋ ਕਾਮਸਂਯੋਜਨਾਨਂ ਅਨਧਿਟ੍ਠਾਨਾ, ਪਵਿਵੇਕਾਯ ਪੀਤਿਯਾ ਸਮਤਿਕ੍ਕਮਾ, ਨਿਰਾਮਿਸਸ੍ਸ ਸੁਖਸ੍ਸ ਸਮਤਿਕ੍ਕਮਾ, ਅਦੁਕ੍ਖਮਸੁਖਂ ਵੇਦਨਂ ਉਪਸਮ੍ਪਜ੍ਜ ਵਿਹਰਤਿ – ‘ਏਤਂ ਸਨ੍ਤਂ ਏਤਂ ਪਣੀਤਂ ਯਦਿਦਂ ਅਦੁਕ੍ਖਮਸੁਖਂ ਵੇਦਨਂ ਉਪਸਮ੍ਪਜ੍ਜ ਵਿਹਰਾਮੀ’ਤਿ. ਤਸ੍ਸ ਸਾ ਅਦੁਕ੍ਖਮਸੁਖਾ ਵੇਦਨਾ ਨਿਰੁਜ੍ਝਤਿ. ਅਦੁਕ੍ਖਮਸੁਖਾਯ ਵੇਦਨਾਯ ਨਿਰੋਧਾ ਉਪ੍ਪਜ੍ਜਤਿ ਨਿਰਾਮਿਸਂ ਸੁਖਂ, ਨਿਰਾਮਿਸਸ੍ਸ ਸੁਖਸ੍ਸ ਨਿਰੋਧਾ ਉਪ੍ਪਜ੍ਜਤਿ ਅਦੁਕ੍ਖਮਸੁਖਾ ਵੇਦਨਾ. ‘ਤਯਿਦਂ ਸਙ੍ਖਤਂ ਓਲ਼ਾਰਿਕਂ ਅਤ੍ਥਿ ਖੋ ਪਨ ਸਙ੍ਖਾਰਾਨਂ ਨਿਰੋਧੋ ਅਤ੍ਥੇਤ’ਨ੍ਤਿ – ਇਤਿ ਵਿਦਿਤ੍ਵਾ ਤਸ੍ਸ ਨਿਸ੍ਸਰਣਦਸ੍ਸਾਵੀ ਤਥਾਗਤੋ ਤਦੁਪਾਤਿਵਤ੍ਤੋ.

੩੩. ‘‘ਇਧ ਪਨ, ਭਿਕ੍ਖਵੇ, ਏਕਚ੍ਚੋ ਸਮਣੋ ਵਾ ਬ੍ਰਾਹ੍ਮਣੋ ਵਾ ਪੁਬ੍ਬਨ੍ਤਾਨੁਦਿਟ੍ਠੀਨਞ੍ਚ ਪਟਿਨਿਸ੍ਸਗ੍ਗਾ, ਅਪਰਨ੍ਤਾਨੁਦਿਟ੍ਠੀਨਞ੍ਚ ਪਟਿਨਿਸ੍ਸਗ੍ਗਾ, ਸਬ੍ਬਸੋ ਕਾਮਸਂਯੋਜਨਾਨਂ ਅਨਧਿਟ੍ਠਾਨਾ, ਪਵਿਵੇਕਾਯ ਪੀਤਿਯਾ ਸਮਤਿਕ੍ਕਮਾ, ਨਿਰਾਮਿਸਸ੍ਸ ਸੁਖਸ੍ਸ ਸਮਤਿਕ੍ਕਮਾ, ਅਦੁਕ੍ਖਮਸੁਖਾਯ ਵੇਦਨਾਯ ਸਮਤਿਕ੍ਕਮਾ – ‘ਸਨ੍ਤੋਹਮਸ੍ਮਿ, ਨਿਬ੍ਬੁਤੋਹਮਸ੍ਮਿ, ਅਨੁਪਾਦਾਨੋਹਮਸ੍ਮੀ’ਤਿ ਸਮਨੁਪਸ੍ਸਤਿ. ਤਯਿਦਂ, ਭਿਕ੍ਖਵੇ, ਤਥਾਗਤੋ ਅਭਿਜਾਨਾਤਿ. ਅਯਂ ਖੋ ਭਵਂ ਸਮਣੋ ਵਾ ਬ੍ਰਾਹ੍ਮਣੋ ਵਾ ਪੁਬ੍ਬਨ੍ਤਾਨੁਦਿਟ੍ਠੀਨਞ੍ਚ ਪਟਿਨਿਸ੍ਸਗ੍ਗਾ, ਅਪਰਨ੍ਤਾਨੁਦਿਟ੍ਠੀਨਞ੍ਚ ਪਟਿਨਿਸ੍ਸਗ੍ਗਾ, ਸਬ੍ਬਸੋ ਕਾਮਸਂਯੋਜਨਾਨਂ ਅਨਧਿਟ੍ਠਾਨਾ, ਪਵਿਵੇਕਾਯ ਪੀਤਿਯਾ ਸਮਤਿਕ੍ਕਮਾ, ਨਿਰਾਮਿਸਸ੍ਸ ਸੁਖਸ੍ਸ ਸਮਤਿਕ੍ਕਮਾ, ਅਦੁਕ੍ਖਮਸੁਖਾਯ ਵੇਦਨਾਯ ਸਮਤਿਕ੍ਕਮਾ – ‘ਸਨ੍ਤੋਹਮਸ੍ਮਿ, ਨਿਬ੍ਬੁਤੋਹਮਸ੍ਮਿ, ਅਨੁਪਾਦਾਨੋਹਮਸ੍ਮੀ’ਤਿ ਸਮਨੁਪਸ੍ਸਤਿ; ਅਦ੍ਧਾ ਅਯਮਾਯਸ੍ਮਾ ਨਿਬ੍ਬਾਨਸਪ੍ਪਾਯਂਯੇਵ ਪਟਿਪਦਂ ਅਭਿਵਦਤਿ. ਅਥ ਚ ਪਨਾਯਂ ਭਵਂ ਸਮਣੋ ਵਾ ਬ੍ਰਾਹ੍ਮਣੋ ਵਾ ਪੁਬ੍ਬਨ੍ਤਾਨੁਦਿਟ੍ਠਿਂ ਵਾ ਉਪਾਦਿਯਮਾਨੋ ਉਪਾਦਿਯਤਿ, ਅਪਰਨ੍ਤਾਨੁਦਿਟ੍ਠਿਂ ਵਾ ਉਪਾਦਿਯਮਾਨੋ ਉਪਾਦਿਯਤਿ, ਕਾਮਸਂਯੋਜਨਂ ਵਾ ਉਪਾਦਿਯਮਾਨੋ ਉਪਾਦਿਯਤਿ, ਪਵਿਵੇਕਂ ਵਾ ਪੀਤਿਂ ਉਪਾਦਿਯਮਾਨੋ ਉਪਾਦਿਯਤਿ, ਨਿਰਾਮਿਸਂ ਵਾ ਸੁਖਂ ਉਪਾਦਿਯਮਾਨੋ ਉਪਾਦਿਯਤਿ, ਅਦੁਕ੍ਖਮਸੁਖਂ ਵਾ ਵੇਦਨਂ ਉਪਾਦਿਯਮਾਨੋ ਉਪਾਦਿਯਤਿ. ਯਞ੍ਚ ਖੋ ਅਯਮਾਯਸ੍ਮਾ – ‘ਸਨ੍ਤੋਹਮਸ੍ਮਿ, ਨਿਬ੍ਬੁਤੋਹਮਸ੍ਮਿ, ਅਨੁਪਾਦਾਨੋਹਮਸ੍ਮੀ’ਤਿ ਸਮਨੁਪਸ੍ਸਤਿ ਤਦਪਿ ਇਮਸ੍ਸ ਭੋਤੋ ਸਮਣਸ੍ਸ ਬ੍ਰਾਹ੍ਮਣਸ੍ਸ ਉਪਾਦਾਨਮਕ੍ਖਾਯਤਿ. ‘ਤਯਿਦਂ ਸਙ੍ਖਤਂ ਓਲ਼ਾਰਿਕਂ ਅਤ੍ਥਿ ਖੋ ਪਨ ਸਙ੍ਖਾਰਾਨਂ ਨਿਰੋਧੋ ਅਤ੍ਥੇਤ’ਨ੍ਤਿ – ਇਤਿ ਵਿਦਿਤ੍ਵਾ ਤਸ੍ਸ ਨਿਸ੍ਸਰਣਦਸ੍ਸਾਵੀ ਤਥਾਗਤੋ ਤਦੁਪਾਤਿਵਤ੍ਤੋ.

‘‘ਇਦਂ ਖੋ ਪਨ, ਭਿਕ੍ਖਵੇ, ਤਥਾਗਤੇਨ ਅਨੁਤ੍ਤਰਂ ਸਨ੍ਤਿਵਰਪਦਂ ਅਭਿਸਮ੍ਬੁਦ੍ਧਂ ਯਦਿਦਂ – ਛਨ੍ਨਂ ਫਸ੍ਸਾਯਤਨਾਨਂ ਸਮੁਦਯਞ੍ਚ ਅਤ੍ਥਙ੍ਗਮਞ੍ਚ ਅਸ੍ਸਾਦਞ੍ਚ ਆਦੀਨਵਞ੍ਚ ਨਿਸ੍ਸਰਣਞ੍ਚ ਯਥਾਭੂਤਂ ਵਿਦਿਤ੍ਵਾ [ਅਨੁਪਾਦਾਵਿਮੋਕ੍ਖੋ. ਤਯਿਦਂ ਭਿਕ੍ਖਵੇ ਤਥਾਗਤੇਨ ਅਨੁਤ੍ਤਰਂ ਸਨ੍ਤਿਵਰਪਦਂ ਅਭਿਸਮ੍ਬੁਦ੍ਧਂ, ਯਦਿਦਂ ਛਨ੍ਨਂ ਫਸ੍ਸਾਯਤਨਾਨਂ ਸਮੁਦਯਞ੍ਚ ਅਤ੍ਥਙ੍ਗਮਞ੍ਚ ਅਸ੍ਸਾਦਞ੍ਚ ਆਦੀਨਵਞ੍ਚ ਨਿਸ੍ਸਰਣਞ੍ਚ ਯਥਾਭੂਤਂ ਵਿਦਿਤ੍ਵਾ ਅਨੁਪਾਦਾਵਿਮੋਕ੍ਖੋਤਿ (ਸੀ. ਸ੍ਯਾ. ਕਂ. ਪੀ.)] ਅਨੁਪਾਦਾਵਿਮੋਕ੍ਖੋ’’ਤਿ [ਅਨੁਪਾਦਾਵਿਮੋਕ੍ਖੋ. ਤਯਿਦਂ ਭਿਕ੍ਖਵੇ ਤਥਾਗਤੇਨ ਅਨੁਤ੍ਤਰਂ ਸਨ੍ਤਿਵਰਪਦਂ ਅਭਿਸਮ੍ਬੁਦ੍ਧਂ, ਯਦਿਦਂ ਛਨ੍ਨਂ ਫਸ੍ਸਾਯਤਨਂ ਸਮੁਦਯਞ੍ਚ ਅਤ੍ਥਙ੍ਗਮਞ੍ਚ ਅਸ੍ਸਾਦਞ੍ਚ ਅਦੀਨਵਞ੍ਚ ਨਿਸ੍ਸਰਣਞ੍ਚ ਯਥਾਭੂਤਂ ਵਿਦਿਤ੍ਵਾ ਅਨੁਪਾਦਾਵਿਮੋਕ੍ਖੋਤਿ (ਸੀ. ਸ੍ਯਾ. ਕਂ. ਪੀ.)].

ਇਦਮਵੋਚ ਭਗਵਾ. ਅਤ੍ਤਮਨਾ ਤੇ ਭਿਕ੍ਖੂ ਭਗਵਤੋ ਭਾਸਿਤਂ ਅਭਿਨਨ੍ਦੁਨ੍ਤਿ.

ਪਞ੍ਚਤ੍ਤਯਸੁਤ੍ਤਂ ਨਿਟ੍ਠਿਤਂ ਦੁਤਿਯਂ.