੯. ਧਮ੍ਮਚੇਤਿਯਸੁਤ੍ਤਂ

੩੬੪. ਏਵਂ ਮੇ ਸੁਤਂ – ਏਕਂ ਸਮਯਂ ਭਗਵਾ ਸਕ੍ਕੇਸੁ ਵਿਹਰਤਿ ਮੇਦਾਲ਼ੁਪਂ [ਮੇਤਲ਼ੂਪਂ (ਸੀ.), ਮੇਦਲ਼ੁਮ੍ਪਂ (ਪੀ.)] ਨਾਮ ਸਕ੍ਯਾਨਂ ਨਿਗਮੋ. ਤੇਨ ਖੋ ਪਨ ਸਮਯੇਨ ਰਾਜਾ ਪਸੇਨਦਿ ਕੋਸਲੋ ਨਗਰਕਂ ਅਨੁਪ੍ਪਤ੍ਤੋ ਹੋਤਿ ਕੇਨਚਿਦੇਵ ਕਰਣੀਯੇਨ. ਅਥ ਖੋ ਰਾਜਾ ਪਸੇਨਦਿ ਕੋਸਲੋ ਦੀਘਂ ਕਾਰਾਯਨਂ ਆਮਨ੍ਤੇਸਿ – ‘‘ਯੋਜੇਹਿ, ਸਮ੍ਮ ਕਾਰਾਯਨ, ਭਦ੍ਰਾਨਿ ਭਦ੍ਰਾਨਿ ਯਾਨਾਨਿ, ਉਯ੍ਯਾਨਭੂਮਿਂ ਗਚ੍ਛਾਮ ਸੁਭੂਮਿਂ ਦਸ੍ਸਨਾਯਾ’’ਤਿ [ਸੁਭੂਮਿਦਸ੍ਸਨਾਯਾਤਿ (ਦੀ. ਨਿ. ੨.੪੩)]. ‘‘ਏਵਂ, ਦੇਵਾ’’ਤਿ ਖੋ ਦੀਘੋ ਕਾਰਾਯਨੋ ਰਞ੍ਞੋ ਪਸੇਨਦਿਸ੍ਸ ਕੋਸਲਸ੍ਸ ਪਟਿਸ੍ਸੁਤ੍ਵਾ ਭਦ੍ਰਾਨਿ ਭਦ੍ਰਾਨਿ ਯਾਨਾਨਿ ਯੋਜਾਪੇਤ੍ਵਾ ਰਞ੍ਞੋ ਪਸੇਨਦਿਸ੍ਸ ਕੋਸਲਸ੍ਸ ਪਟਿਵੇਦੇਸਿ – ‘‘ਯੁਤ੍ਤਾਨਿ ਖੋ ਤੇ, ਦੇਵ, ਭਦ੍ਰਾਨਿ ਭਦ੍ਰਾਨਿ ਯਾਨਾਨਿ. ਯਸ੍ਸਦਾਨਿ ਕਾਲਂ ਮਞ੍ਞਸੀ’’ਤਿ. ਅਥ ਖੋ ਰਾਜਾ ਪਸੇਨਦਿ ਕੋਸਲੋ ਭਦ੍ਰਂ ਯਾਨਂ ਅਭਿਰੁਹਿਤ੍ਵਾ ਭਦ੍ਰੇਹਿ ਭਦ੍ਰੇਹਿ ਯਾਨੇਹਿ ਨਗਰਕਮ੍ਹਾ ਨਿਯ੍ਯਾਸਿ ਮਹਚ੍ਚਾ ਰਾਜਾਨੁਭਾਵੇਨ. ਯੇਨ ਆਰਾਮੋ ਤੇਨ ਪਾਯਾਸਿ. ਯਾਵਤਿਕਾ ਯਾਨਸ੍ਸ ਭੂਮਿ ਯਾਨੇਨ ਗਨ੍ਤ੍ਵਾ ਯਾਨਾ ਪਚ੍ਚੋਰੋਹਿਤ੍ਵਾ ਪਤ੍ਤਿਕੋਵ ਆਰਾਮਂ ਪਾਵਿਸਿ. ਅਦ੍ਦਸਾ ਖੋ ਰਾਜਾ ਪਸੇਨਦਿ ਕੋਸਲੋ ਆਰਾਮੇ ਜਙ੍ਘਾਵਿਹਾਰਂ ਅਨੁਚਙ੍ਕਮਮਾਨੋ ਅਨੁਵਿਚਰਮਾਨੋ ਰੁਕ੍ਖਮੂਲਾਨਿ ਪਾਸਾਦਿਕਾਨਿ ਪਸਾਦਨੀਯਾਨਿ ਅਪ੍ਪਸਦ੍ਦਾਨਿ ਅਪ੍ਪਨਿਗ੍ਘੋਸਾਨਿ ਵਿਜਨਵਾਤਾਨਿ ਮਨੁਸ੍ਸਰਾਹਸ੍ਸੇਯ੍ਯਕਾਨਿ [ਮਨੁਸ੍ਸਰਾਹਸੇਯ੍ਯਕਾਨਿ (ਸੀ. ਪੀ.)] ਪਟਿਸਲ੍ਲਾਨਸਾਰੁਪ੍ਪਾਨਿ. ਦਿਸ੍ਵਾਨ ਭਗਵਨ੍ਤਂਯੇਵ ਆਰਬ੍ਭ ਸਤਿ ਉਦਪਾਦਿ – ‘‘ਇਮਾਨਿ ਖੋ ਤਾਨਿ ਰੁਕ੍ਖਮੂਲਾਨਿ ਪਾਸਾਦਿਕਾਨਿ ਪਸਾਦਨੀਯਾਨਿ ਅਪ੍ਪਸਦ੍ਦਾਨਿ ਅਪ੍ਪਨਿਗ੍ਘੋਸਾਨਿ ਵਿਜਨਵਾਤਾਨਿ ਮਨੁਸ੍ਸਰਾਹਸ੍ਸੇਯ੍ਯਕਾਨਿ ਪਟਿਸਲ੍ਲਾਨਸਾਰੁਪ੍ਪਾਨਿ, ਯਤ੍ਥ ਸੁਦਂ ਮਯਂ ਤਂ ਭਗਵਨ੍ਤਂ ਪਯਿਰੁਪਾਸਾਮ ਅਰਹਨ੍ਤਂ ਸਮ੍ਮਾਸਮ੍ਬੁਦ੍ਧ’’ਨ੍ਤਿ.

੩੬੫. ਅਥ ਖੋ ਰਾਜਾ ਪਸੇਨਦਿ ਕੋਸਲੋ ਦੀਘਂ ਕਾਰਾਯਨਂ ਆਮਨ੍ਤੇਸਿ – ‘‘ਇਮਾਨਿ ਖੋ, ਸਮ੍ਮ ਕਾਰਾਯਨ, ਤਾਨਿ ਰੁਕ੍ਖਮੂਲਾਨਿ ਪਾਸਾਦਿਕਾਨਿ ਪਸਾਦਨੀਯਾਨਿ ਅਪ੍ਪਸਦ੍ਦਾਨਿ ਅਪ੍ਪਨਿਗ੍ਘੋਸਾਨਿ ਵਿਜਨਵਾਤਾਨਿ ਮਨੁਸ੍ਸਰਾਹਸ੍ਸੇਯ੍ਯਕਾਨਿ ਪਟਿਸਲ੍ਲਾਨਸਾਰੁਪ੍ਪਾਨਿ, ਯਤ੍ਥ ਸੁਦਂ ਮਯਂ ਤਂ ਭਗਵਨ੍ਤਂ ਪਯਿਰੁਪਾਸਾਮ ਅਰਹਨ੍ਤਂ ਸਮ੍ਮਾਸਮ੍ਬੁਦ੍ਧਂ. ਕਹਂ ਨੁ ਖੋ, ਸਮ੍ਮ ਕਾਰਾਯਨ, ਏਤਰਹਿ ਸੋ ਭਗਵਾ ਵਿਹਰਤਿ ਅਰਹਂ ਸਮ੍ਮਾਸਮ੍ਬੁਦ੍ਧੋ’’ਤਿ? ‘‘ਅਤ੍ਥਿ, ਮਹਾਰਾਜ, ਮੇਦਾਲ਼ੁਪਂ ਨਾਮ ਸਕ੍ਯਾਨਂ ਨਿਗਮੋ. ਤਤ੍ਥ ਸੋ ਭਗਵਾ ਏਤਰਹਿ ਵਿਹਰਤਿ ਅਰਹਂ ਸਮ੍ਮਾਸਮ੍ਬੁਦ੍ਧੋ’’ਤਿ. ‘‘ਕੀਵਦੂਰੇ [ਕੀਵਦੂਰੋ (ਸੀ. ਸ੍ਯਾ. ਕਂ. ਪੀ.)] ਪਨ, ਸਮ੍ਮ ਕਾਰਾਯਨ, ਨਗਰਕਮ੍ਹਾ ਮੇਦਾਲ਼ੁਪਂ ਨਾਮ ਸਕ੍ਯਾਨਂ ਨਿਗਮੋ ਹੋਤੀ’’ਤਿ? ‘‘ਨ ਦੂਰੇ, ਮਹਾਰਾਜ; ਤੀਣਿ ਯੋਜਨਾਨਿ; ਸਕ੍ਕਾ ਦਿਵਸਾਵਸੇਸੇਨ ਗਨ੍ਤੁ’’ਨ੍ਤਿ. ‘‘ਤੇਨ ਹਿ, ਸਮ੍ਮ ਕਾਰਾਯਨ, ਯੋਜੇਹਿ ਭਦ੍ਰਾਨਿ ਭਦ੍ਰਾਨਿ ਯਾਨਾਨਿ, ਗਮਿਸ੍ਸਾਮ ਮਯਂ ਤਂ ਭਗਵਨ੍ਤਂ ਦਸ੍ਸਨਾਯ ਅਰਹਨ੍ਤਂ ਸਮ੍ਮਾਸਮ੍ਬੁਦ੍ਧ’’ਨ੍ਤਿ. ‘‘ਏਵਂ, ਦੇਵਾ’’ਤਿ ਖੋ ਦੀਘੋ ਕਾਰਾਯਨੋ ਰਞ੍ਞੋ ਪਸੇਨਦਿਸ੍ਸ ਕੋਸਲਸ੍ਸ ਪਟਿਸ੍ਸੁਤ੍ਵਾ ਭਦ੍ਰਾਨਿ ਭਦ੍ਰਾਨਿ ਯਾਨਾਨਿ ਯੋਜਾਪੇਤ੍ਵਾ ਰਞ੍ਞੋ ਪਸੇਨਦਿਸ੍ਸ ਕੋਸਲਸ੍ਸ ਪਟਿਵੇਦੇਸਿ – ‘‘ਯੁਤ੍ਤਾਨਿ ਖੋ ਤੇ, ਦੇਵ, ਭਦ੍ਰਾਨਿ ਭਦ੍ਰਾਨਿ ਯਾਨਾਨਿ. ਯਸ੍ਸਦਾਨਿ ਕਾਲਂ ਮਞ੍ਞਸੀ’’ਤਿ. ਅਥ ਖੋ ਰਾਜਾ ਪਸੇਨਦਿ ਕੋਸਲੋ ਭਦ੍ਰਂ ਯਾਨਂ ਅਭਿਰੁਹਿਤ੍ਵਾ ਭਦ੍ਰੇਹਿ ਭਦ੍ਰੇਹਿ ਯਾਨੇਹਿ ਨਗਰਕਮ੍ਹਾ ਯੇਨ ਮੇਦਾਲ਼ੁਪਂ ਨਾਮ ਸਕ੍ਯਾਨਂ ਨਿਗਮੋ ਤੇਨ ਪਾਯਾਸਿ. ਤੇਨੇਵ ਦਿਵਸਾਵਸੇਸੇਨ ਮੇਦਾਲ਼ੁਪਂ ਨਾਮ ਸਕ੍ਯਾਨਂ ਨਿਗਮਂ ਸਮ੍ਪਾਪੁਣਿ. ਯੇਨ ਆਰਾਮੋ ਤੇਨ ਪਾਯਾਸਿ. ਯਾਵਤਿਕਾ ਯਾਨਸ੍ਸ ਭੂਮਿ ਯਾਨੇਨ ਗਨ੍ਤ੍ਵਾ ਯਾਨਾ ਪਚ੍ਚੋਰੋਹਿਤ੍ਵਾ ਪਤ੍ਤਿਕੋਵ ਆਰਾਮਂ ਪਾਵਿਸਿ.

੩੬੬. ਤੇਨ ਖੋ ਪਨ ਸਮਯੇਨ ਸਮ੍ਬਹੁਲਾ ਭਿਕ੍ਖੂ ਅਬ੍ਭੋਕਾਸੇ ਚਙ੍ਕਮਨ੍ਤਿ. ਅਥ ਖੋ ਰਾਜਾ ਪਸੇਨਦਿ ਕੋਸਲੋ ਯੇਨ ਤੇ ਭਿਕ੍ਖੂ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਤੇ ਭਿਕ੍ਖੂ ਏਤਦਵੋਚ – ‘‘ਕਹਂ ਨੁ ਖੋ, ਭਨ੍ਤੇ, ਏਤਰਹਿ ਸੋ ਭਗਵਾ ਵਿਹਰਤਿ ਅਰਹਂ ਸਮ੍ਮਾਸਮ੍ਬੁਦ੍ਧੋ? ਦਸ੍ਸਨਕਾਮਾ ਹਿ ਮਯਂ ਤਂ ਭਗਵਨ੍ਤਂ ਅਰਹਨ੍ਤਂ ਸਮ੍ਮਾਸਮ੍ਬੁਦ੍ਧ’’ਨ੍ਤਿ. ‘‘ਏਸੋ, ਮਹਾਰਾਜ, ਵਿਹਾਰੋ ਸਂਵੁਤਦ੍ਵਾਰੋ. ਤੇਨ ਅਪ੍ਪਸਦ੍ਦੋ ਉਪਸਙ੍ਕਮਿਤ੍ਵਾ ਅਤਰਮਾਨੋ ਆਲ਼ਿਨ੍ਦਂ ਪਵਿਸਿਤ੍ਵਾ ਉਕ੍ਕਾਸਿਤ੍ਵਾ ਅਗ੍ਗਲ਼ਂ ਆਕੋਟੇਹਿ. ਵਿਵਰਿਸ੍ਸਤਿ ਭਗਵਾ ਤੇ ਦ੍ਵਾਰ’’ਨ੍ਤਿ. ਅਥ ਖੋ ਰਾਜਾ ਪਸੇਨਦਿ ਕੋਸਲੋ ਤਤ੍ਥੇਵ ਖਗ੍ਗਞ੍ਚ ਉਣ੍ਹੀਸਞ੍ਚ ਦੀਘਸ੍ਸ ਕਾਰਾਯਨਸ੍ਸ ਪਾਦਾਸਿ. ਅਥ ਖੋ ਦੀਘਸ੍ਸ ਕਾਰਾਯਨਸ੍ਸ ਏਤਦਹੋਸਿ – ‘‘ਰਹਾਯਤਿ ਖੋ ਦਾਨਿ ਰਾਜਾ [ਮਹਾਰਾਜਾ (ਸੀ. ਸ੍ਯਾ. ਕਂ. ਪੀ.)], ਇਧੇਵ [ਤੇਨਿਧੇਵ (ਸੀ.)] ਦਾਨਿ ਮਯਾ ਠਾਤਬ੍ਬ’’ਨ੍ਤਿ. ਅਥ ਖੋ ਰਾਜਾ ਪਸੇਨਦਿ ਕੋਸਲੋ ਯੇਨ ਸੋ ਵਿਹਾਰੋ ਸਂਵੁਤਦ੍ਵਾਰੋ ਤੇਨ ਅਪ੍ਪਸਦ੍ਦੋ ਉਪਸਙ੍ਕਮਿਤ੍ਵਾ ਅਤਰਮਾਨੋ ਆਲ਼ਿਨ੍ਦਂ ਪਵਿਸਿਤ੍ਵਾ ਉਕ੍ਕਾਸਿਤ੍ਵਾ ਅਗ੍ਗਲ਼ਂ ਆਕੋਟੇਸਿ. ਵਿਵਰਿ ਭਗਵਾ ਦ੍ਵਾਰਂ. ਅਥ ਖੋ ਰਾਜਾ ਪਸੇਨਦਿ ਕੋਸਲੋ ਵਿਹਾਰਂ ਪਵਿਸਿਤ੍ਵਾ ਭਗਵਤੋ ਪਾਦੇਸੁ ਸਿਰਸਾ ਨਿਪਤਿਤ੍ਵਾ ਭਗਵਤੋ ਪਾਦਾਨਿ ਮੁਖੇਨ ਚ ਪਰਿਚੁਮ੍ਬਤਿ, ਪਾਣੀਹਿ ਚ ਪਰਿਸਮ੍ਬਾਹਤਿ, ਨਾਮਞ੍ਚ ਸਾਵੇਤਿ – ‘‘ਰਾਜਾਹਂ, ਭਨ੍ਤੇ, ਪਸੇਨਦਿ ਕੋਸਲੋ; ਰਾਜਾਹਂ, ਭਨ੍ਤੇ, ਪਸੇਨਦਿ ਕੋਸਲੋ’’ਤਿ.

੩੬੭. ‘‘ਕਿਂ ਪਨ ਤ੍ਵਂ, ਮਹਾਰਾਜ, ਅਤ੍ਥਵਸਂ ਸਮ੍ਪਸ੍ਸਮਾਨੋ ਇਮਸ੍ਮਿਂ ਸਰੀਰੇ ਏਵਰੂਪਂ ਪਰਮਨਿਪਚ੍ਚਕਾਰਂ ਕਰੋਸਿ, ਮਿਤ੍ਤੂਪਹਾਰਂ [ਚਿਤ੍ਤੂਪਹਾਰਂ (ਸੀ.)] ਉਪਦਂਸੇਸੀ’’ਤਿ? ‘‘ਅਤ੍ਥਿ ਖੋ ਮੇ, ਭਨ੍ਤੇ, ਭਗਵਤਿ ਧਮ੍ਮਨ੍ਵਯੋ – ‘ਹੋਤਿ ਸਮ੍ਮਾਸਮ੍ਬੁਦ੍ਧੋ ਭਗਵਾ, ਸ੍ਵਾਕ੍ਖਾਤੋ ਭਗਵਤਾ ਧਮ੍ਮੋ, ਸੁਪ੍ਪਟਿਪਨ੍ਨੋ ਭਗਵਤੋ ਸਾਵਕਸਙ੍ਘੋ’ਤਿ. ਇਧਾਹਂ, ਭਨ੍ਤੇ, ਪਸ੍ਸਾਮਿ ਏਕੇ ਸਮਣਬ੍ਰਾਹ੍ਮਣੇ ਪਰਿਯਨ੍ਤਕਤਂ ਬ੍ਰਹ੍ਮਚਰਿਯਂ ਚਰਨ੍ਤੇ ਦਸਪਿ ਵਸ੍ਸਾਨਿ, ਵੀਸਮ੍ਪਿ ਵਸ੍ਸਾਨਿ, ਤਿਂਸਮ੍ਪਿ ਵਸ੍ਸਾਨਿ, ਚਤ੍ਤਾਰੀਸਮ੍ਪਿ ਵਸ੍ਸਾਨਿ. ਤੇ ਅਪਰੇਨ ਸਮਯੇਨ ਸੁਨ੍ਹਾਤਾ ਸੁਵਿਲਿਤ੍ਤਾ ਕਪ੍ਪਿਤਕੇਸਮਸ੍ਸੂ ਪਞ੍ਚਹਿ ਕਾਮਗੁਣੇਹਿ ਸਮਪ੍ਪਿਤਾ ਸਮਙ੍ਗੀਭੂਤਾ ਪਰਿਚਾਰੇਨ੍ਤਿ. ਇਧ ਪਨਾਹਂ, ਭਨ੍ਤੇ, ਭਿਕ੍ਖੂ ਪਸ੍ਸਾਮਿ ਯਾਵਜੀਵਂ ਆਪਾਣਕੋਟਿਕਂ ਪਰਿਪੁਣ੍ਣਂ ਪਰਿਸੁਦ੍ਧਂ ਬ੍ਰਹ੍ਮਚਰਿਯਂ ਚਰਨ੍ਤੇ. ਨ ਖੋ ਪਨਾਹਂ, ਭਨ੍ਤੇ, ਇਤੋ ਬਹਿਦ੍ਧਾ ਅਞ੍ਞਂ ਏਵਂ ਪਰਿਪੁਣ੍ਣਂ ਪਰਿਸੁਦ੍ਧਂ ਬ੍ਰਹ੍ਮਚਰਿਯਂ ਸਮਨੁਪਸ੍ਸਾਮਿ. ਅਯਮ੍ਪਿ ਖੋ ਮੇ, ਭਨ੍ਤੇ, ਭਗਵਤਿ ਧਮ੍ਮਨ੍ਵਯੋ ਹੋਤਿ – ‘ਸਮ੍ਮਾਸਮ੍ਬੁਦ੍ਧੋ ਭਗਵਾ, ਸ੍ਵਾਕ੍ਖਾਤੋ ਭਗਵਤਾ ਧਮ੍ਮੋ, ਸੁਪ੍ਪਟਿਪਨ੍ਨੋ ਭਗਵਤੋ ਸਾਵਕਸਙ੍ਘੋ’’ਤਿ.

੩੬੮. ‘‘ਪੁਨ ਚਪਰਂ, ਭਨ੍ਤੇ, ਰਾਜਾਨੋਪਿ ਰਾਜੂਹਿ ਵਿਵਦਨ੍ਤਿ, ਖਤ੍ਤਿਯਾਪਿ ਖਤ੍ਤਿਯੇਹਿ ਵਿਵਦਨ੍ਤਿ, ਬ੍ਰਾਹ੍ਮਣਾਪਿ ਬ੍ਰਾਹ੍ਮਣੇਹਿ ਵਿਵਦਨ੍ਤਿ, ਗਹਪਤਯੋਪਿ ਗਹਪਤੀਹਿ ਵਿਵਦਨ੍ਤਿ, ਮਾਤਾਪਿ ਪੁਤ੍ਤੇਨ ਵਿਵਦਤਿ, ਪੁਤ੍ਤੋਪਿ ਮਾਤਰਾ ਵਿਵਦਤਿ, ਪਿਤਾਪਿ ਪੁਤ੍ਤੇਨ ਵਿਵਦਤਿ, ਪੁਤ੍ਤੋਪਿ ਪਿਤਰਾ ਵਿਵਦਤਿ, ਭਾਤਾਪਿ ਭਗਿਨਿਯਾ ਵਿਵਦਤਿ, ਭਗਿਨੀਪਿ ਭਾਤਰਾ ਵਿਵਦਤਿ, ਸਹਾਯੋਪਿ ਸਹਾਯੇਨ ਵਿਵਦਤਿ. ਇਧ ਪਨਾਹਂ, ਭਨ੍ਤੇ, ਭਿਕ੍ਖੂ ਪਸ੍ਸਾਮਿ ਸਮਗ੍ਗੇ ਸਮ੍ਮੋਦਮਾਨੇ ਅਵਿਵਦਮਾਨੇ ਖੀਰੋਦਕੀਭੂਤੇ ਅਞ੍ਞਮਞ੍ਞਂ ਪਿਯਚਕ੍ਖੂਹਿ ਸਮ੍ਪਸ੍ਸਨ੍ਤੇ ਵਿਹਰਨ੍ਤੇ. ਨ ਖੋ ਪਨਾਹਂ, ਭਨ੍ਤੇ, ਇਤੋ ਬਹਿਦ੍ਧਾ ਅਞ੍ਞਂ ਏਵਂ ਸਮਗ੍ਗਂ ਪਰਿਸਂ ਸਮਨੁਪਸ੍ਸਾਮਿ. ਅਯਮ੍ਪਿ ਖੋ ਮੇ, ਭਨ੍ਤੇ, ਭਗਵਤਿ ਧਮ੍ਮਨ੍ਵਯੋ ਹੋਤਿ – ‘ਸਮ੍ਮਾਸਮ੍ਬੁਦ੍ਧੋ ਭਗਵਾ, ਸ੍ਵਾਕ੍ਖਾਤੋ ਭਗਵਤਾ ਧਮ੍ਮੋ, ਸੁਪ੍ਪਟਿਪਨ੍ਨੋ ਭਗਵਤੋ ਸਾਵਕਸਙ੍ਘੋ’ਤਿ.

੩੬੯. ‘‘ਪੁਨ ਚਪਰਾਹਂ, ਭਨ੍ਤੇ, ਆਰਾਮੇਨ ਆਰਾਮਂ, ਉਯ੍ਯਾਨੇਨ ਉਯ੍ਯਾਨਂ ਅਨੁਚਙ੍ਕਮਾਮਿ ਅਨੁਵਿਚਰਾਮਿ. ਸੋਹਂ ਤਤ੍ਥ ਪਸ੍ਸਾਮਿ ਏਕੇ ਸਮਣਬ੍ਰਾਹ੍ਮਣੇ ਕਿਸੇ ਲੂਖੇ ਦੁਬ੍ਬਣ੍ਣੇ ਉਪ੍ਪਣ੍ਡੁਪ੍ਪਣ੍ਡੁਕਜਾਤੇ ਧਮਨਿਸਨ੍ਥਤਗਤ੍ਤੇ, ਨ ਵਿਯ ਮਞ੍ਞੇ ਚਕ੍ਖੁਂ ਬਨ੍ਧਨ੍ਤੇ ਜਨਸ੍ਸ ਦਸ੍ਸਨਾਯ. ਤਸ੍ਸ ਮਯ੍ਹਂ, ਭਨ੍ਤੇ, ਏਤਦਹੋਸਿ – ‘ਅਦ੍ਧਾ ਇਮੇ ਆਯਸ੍ਮਨ੍ਤੋ ਅਨਭਿਰਤਾ ਵਾ ਬ੍ਰਹ੍ਮਚਰਿਯਂ ਚਰਨ੍ਤਿ, ਅਤ੍ਥਿ ਵਾ ਤੇਸਂ ਕਿਞ੍ਚਿ ਪਾਪਂ ਕਮ੍ਮਂ ਕਤਂ ਪਟਿਚ੍ਛਨ੍ਨਂ; ਤਥਾ ਹਿ ਇਮੇ ਆਯਸ੍ਮਨ੍ਤੋ ਕਿਸਾ ਲੂਖਾ ਦੁਬ੍ਬਣ੍ਣਾ ਉਪ੍ਪਣ੍ਡੁਪ੍ਪਣ੍ਡੁਕਜਾਤਾ ਧਮਨਿਸਨ੍ਥਤਗਤ੍ਤਾ, ਨ ਵਿਯ ਮਞ੍ਞੇ ਚਕ੍ਖੁਂ ਬਨ੍ਧਨ੍ਤਿ ਜਨਸ੍ਸ ਦਸ੍ਸਨਾਯਾ’ਤਿ. ਤ੍ਯਾਹਂ ਉਪਸਙ੍ਕਮਿਤ੍ਵਾ ਏਵਂ ਵਦਾਮਿ – ‘ਕਿਂ ਨੁ ਖੋ ਤੁਮ੍ਹੇ ਆਯਸ੍ਮਨ੍ਤੋ ਕਿਸਾ ਲੂਖਾ ਦੁਬ੍ਬਣ੍ਣਾ ਉਪ੍ਪਣ੍ਡੁਪ੍ਪਣ੍ਡੁਕਜਾਤਾ ਧਮਨਿਸਨ੍ਥਤਗਤ੍ਤਾ, ਨ ਵਿਯ ਮਞ੍ਞੇ ਚਕ੍ਖੁਂ ਬਨ੍ਧਥ ਜਨਸ੍ਸ ਦਸ੍ਸਨਾਯਾ’ਤਿ? ਤੇ ਏਵਮਾਹਂਸੁ – ‘ਬਨ੍ਧੁਕਰੋਗੋ ਨੋ [ਪਣ੍ਡੁਕਰੋਗਿਨੋ (ਕ.)], ਮਹਾਰਾਜਾ’ਤਿ. ਇਧ ਪਨਾਹਂ, ਭਨ੍ਤੇ, ਭਿਕ੍ਖੂ ਪਸ੍ਸਾਮਿ ਹਟ੍ਠਪਹਟ੍ਠੇ ਉਦਗ੍ਗੁਦਗ੍ਗੇ ਅਭਿਰਤਰੂਪੇ ਪੀਣਿਨ੍ਦ੍ਰਿਯੇ [ਪੀਣਿਤਿਨ੍ਦ੍ਰਿਯੇ (ਸੀ. ਪੀ.)] ਅਪ੍ਪੋਸ੍ਸੁਕ੍ਕੇ ਪਨ੍ਨਲੋਮੇ ਪਰਦਤ੍ਤਵੁਤ੍ਤੇ ਮਿਗਭੂਤੇਨ ਚੇਤਸਾ ਵਿਹਰਨ੍ਤੇ. ਤਸ੍ਸ ਮਯ੍ਹਂ, ਭਨ੍ਤੇ, ਏਤਦਹੋਸਿ – ‘ਅਦ੍ਧਾ ਇਮੇ ਆਯਸ੍ਮਨ੍ਤੋ ਤਸ੍ਸ ਭਗਵਤੋ ਸਾਸਨੇ ਉਲ਼ਾਰਂ ਪੁਬ੍ਬੇਨਾਪਰਂ ਵਿਸੇਸਂ ਜਾਨਨ੍ਤਿ; ਤਥਾ ਹਿ ਇਮੇ ਆਯਸ੍ਮਨ੍ਤੋ ਹਟ੍ਠਪਹਟ੍ਠਾ ਉਦਗ੍ਗੁਦਗ੍ਗਾ ਅਭਿਰਤਰੂਪਾ ਪੀਣਿਨ੍ਦ੍ਰਿਯਾ ਅਪ੍ਪੋਸ੍ਸੁਕ੍ਕਾ ਪਨ੍ਨਲੋਮਾ ਪਰਦਤ੍ਤਵੁਤ੍ਤਾ ਮਿਗਭੂਤੇਨ ਚੇਤਸਾ ਵਿਹਰਨ੍ਤੀ’ਤਿ. ਅਯਮ੍ਪਿ ਖੋ ਮੇ, ਭਨ੍ਤੇ, ਭਗਵਤਿ ਧਮ੍ਮਨ੍ਵਯੋ ਹੋਤਿ – ‘ਸਮ੍ਮਾਸਮ੍ਬੁਦ੍ਧੋ ਭਗਵਾ, ਸ੍ਵਾਕ੍ਖਾਤੋ ਭਗਵਤਾ ਧਮ੍ਮੋ, ਸੁਪ੍ਪਟਿਪਨ੍ਨੋ ਭਗਵਤੋ ਸਾਵਕਸਙ੍ਘੋ’ਤਿ.

੩੭੦. ‘‘ਪੁਨ ਚਪਰਾਹਂ, ਭਨ੍ਤੇ, ਰਾਜਾ ਖਤ੍ਤਿਯੋ ਮੁਦ੍ਧਾਵਸਿਤ੍ਤੋ; ਪਹੋਮਿ ਘਾਤੇਤਾਯਂ ਵਾ ਘਾਤੇਤੁਂ, ਜਾਪੇਤਾਯਂ ਵਾ ਜਾਪੇਤੁਂ, ਪਬ੍ਬਾਜੇਤਾਯਂ ਵਾ ਪਬ੍ਬਾਜੇਤੁਂ. ਤਸ੍ਸ ਮਯ੍ਹਂ, ਭਨ੍ਤੇ, ਅਡ੍ਡਕਰਣੇ ਨਿਸਿਨ੍ਨਸ੍ਸ ਅਨ੍ਤਰਨ੍ਤਰਾ ਕਥਂ ਓਪਾਤੇਨ੍ਤਿ. ਸੋਹਂ ਨ ਲਭਾਮਿ – ‘ਮਾ ਮੇ ਭੋਨ੍ਤੋ ਅਡ੍ਡਕਰਣੇ ਨਿਸਿਨ੍ਨਸ੍ਸ ਅਨ੍ਤਰਨ੍ਤਰਾ ਕਥਂ ਓਪਾਤੇਥ [ਓਪਾਤੇਨ੍ਤੁ (ਸੀ.) ਉਪਰਿਸੇਲਸੁਤ੍ਤੇ ਪਨ ‘‘ਓਪਾਤੇਥਾ’’ਤਿਯੇਵ ਦਿਸ੍ਸਤਿ], ਕਥਾਪਰਿਯੋਸਾਨਂ ਮੇ ਭੋਨ੍ਤੋ ਆਗਮੇਨ੍ਤੂ’ਤਿ. ਤਸ੍ਸ ਮਯ੍ਹਂ, ਭਨ੍ਤੇ, ਅਨ੍ਤਰਨ੍ਤਰਾ ਕਥਂ ਓਪਾਤੇਨ੍ਤਿ. ਇਧ ਪਨਾਹਂ, ਭਨ੍ਤੇ, ਭਿਕ੍ਖੂ ਪਸ੍ਸਾਮਿ; ਯਸ੍ਮਿਂ ਸਮਯੇ ਭਗਵਾ ਅਨੇਕਸਤਾਯ ਪਰਿਸਾਯ ਧਮ੍ਮਂ ਦੇਸੇਤਿ, ਨੇਵ ਤਸ੍ਮਿਂ ਸਮਯੇ ਭਗਵਤੋ ਸਾਵਕਾਨਂ ਖਿਪਿਤਸਦ੍ਦੋ ਵਾ ਹੋਤਿ ਉਕ੍ਕਾਸਿਤਸਦ੍ਦੋ ਵਾ. ਭੂਤਪੁਬ੍ਬਂ, ਭਨ੍ਤੇ, ਭਗਵਾ ਅਨੇਕਸਤਾਯ ਪਰਿਸਾਯ ਧਮ੍ਮਂ ਦੇਸੇਤਿ. ਤਤ੍ਰਞ੍ਞਤਰੋ ਭਗਵਤੋ ਸਾਵਕੋ ਉਕ੍ਕਾਸਿ. ਤਮੇਨਂ ਅਞ੍ਞਤਰੋ ਸਬ੍ਰਹ੍ਮਚਾਰੀ ਜਣ੍ਣੁਕੇਨ ਘਟ੍ਟੇਸਿ – ‘ਅਪ੍ਪਸਦ੍ਦੋ ਆਯਸ੍ਮਾ ਹੋਤੁ, ਮਾਯਸ੍ਮਾ ਸਦ੍ਦਮਕਾਸਿ; ਸਤ੍ਥਾ ਨੋ ਭਗਵਾ ਧਮ੍ਮਂ ਦੇਸੇਤੀ’ਤਿ. ਤਸ੍ਸ ਮਯ੍ਹਂ, ਭਨ੍ਤੇ, ਏਤਦਹੋਸਿ – ‘ਅਚ੍ਛਰਿਯਂ ਵਤ, ਭੋ, ਅਬ੍ਭੁਤਂ ਵਤ, ਭੋ! ਅਦਣ੍ਡੇਨ ਵਤ ਕਿਰ, ਭੋ, ਅਸਤ੍ਥੇਨ ਏਵਂ ਸੁਵਿਨੀਤਾ ਪਰਿਸਾ ਭਵਿਸ੍ਸਤੀ’ਤਿ! ਨ ਖੋ ਪਨਾਹਂ, ਭਨ੍ਤੇ, ਇਤੋ ਬਹਿਦ੍ਧਾ ਅਞ੍ਞਂ ਏਵਂ ਸੁਵਿਨੀਤਂ ਪਰਿਸਂ ਸਮਨੁਪਸ੍ਸਾਮਿ. ਅਯਮ੍ਪਿ ਖੋ ਮੇ, ਭਨ੍ਤੇ, ਭਗਵਤਿ ਧਮ੍ਮਨ੍ਵਯੋ ਹੋਤਿ – ‘ਸਮ੍ਮਾਸਮ੍ਬੁਦ੍ਧੋ ਭਗਵਾ, ਸ੍ਵਾਕ੍ਖਾਤੋ ਭਗਵਤਾ ਧਮ੍ਮੋ, ਸੁਪ੍ਪਟਿਪਨ੍ਨੋ ਭਗਵਤੋ ਸਾਵਕਸਙ੍ਘੋ’ਤਿ.

੩੭੧. ‘‘ਪੁਨ ਚਪਰਾਹਂ, ਭਨ੍ਤੇ, ਪਸ੍ਸਾਮਿ ਇਧੇਕਚ੍ਚੇ ਖਤ੍ਤਿਯਪਣ੍ਡਿਤੇ ਨਿਪੁਣੇ ਕਤਪਰਪ੍ਪਵਾਦੇ ਵਾਲਵੇਧਿਰੂਪੇ. ਤੇ ਭਿਨ੍ਦਨ੍ਤਾ [ਵੋਭਿਨ੍ਦਨ੍ਤਾ (ਸੀ.)] ਮਞ੍ਞੇ ਚਰਨ੍ਤਿ ਪਞ੍ਞਾਗਤੇਨ ਦਿਟ੍ਠਿਗਤਾਨਿ. ਤੇ ਸੁਣਨ੍ਤਿ – ‘ਸਮਣੋ ਖਲੁ, ਭੋ, ਗੋਤਮੋ ਅਮੁਕਂ ਨਾਮ ਗਾਮਂ ਵਾ ਨਿਗਮਂ ਵਾ ਓਸਰਿਸ੍ਸਤੀ’ਤਿ. ਤੇ ਪਞ੍ਹਂ ਅਭਿਸਙ੍ਖਰੋਨ੍ਤਿ – ‘ਇਮਂ ਮਯਂ ਪਞ੍ਹਂ ਸਮਣਂ ਗੋਤਮਂ ਉਪਸਙ੍ਕਮਿਤ੍ਵਾ ਪੁਚ੍ਛਿਸ੍ਸਾਮ. ਏਵਂ ਚੇ ਨੋ ਪੁਟ੍ਠੋ ਏਵਂ ਬ੍ਯਾਕਰਿਸ੍ਸਤਿ, ਏਵਮਸ੍ਸ ਮਯਂ ਵਾਦਂ ਆਰੋਪੇਸ੍ਸਾਮ; ਏਵਂ ਚੇਪਿ ਨੋ ਪੁਟ੍ਠੋ ਏਵਂ ਬ੍ਯਾਕਰਿਸ੍ਸਤਿ, ਏਵਮ੍ਪਿਸ੍ਸ ਮਯਂ ਵਾਦਂ ਆਰੋਪੇਸ੍ਸਾਮਾ’ਤਿ. ਤੇ ਸੁਣਨ੍ਤਿ – ‘ਸਮਣੋ ਖਲੁ, ਭੋ, ਗੋਤਮੋ ਅਮੁਕਂ ਨਾਮ ਗਾਮਂ ਵਾ ਨਿਗਮਂ ਵਾ ਓਸਟੋ’ਤਿ. ਤੇ ਯੇਨ ਭਗਵਾ ਤੇਨੁਪਸਙ੍ਕਮਨ੍ਤਿ. ਤੇ ਭਗਵਾ ਧਮ੍ਮਿਯਾ ਕਥਾਯ ਸਨ੍ਦਸ੍ਸੇਤਿ ਸਮਾਦਪੇਤਿ ਸਮੁਤ੍ਤੇਜੇਤਿ ਸਮ੍ਪਹਂਸੇਤਿ. ਤੇ ਭਗਵਤਾ ਧਮ੍ਮਿਯਾ ਕਥਾਯ ਸਨ੍ਦਸ੍ਸਿਤਾ ਸਮਾਦਪਿਤਾ ਸਮੁਤ੍ਤੇਜਿਤਾ ਸਮ੍ਪਹਂਸਿਤਾ ਨ ਚੇਵ ਭਗਵਨ੍ਤਂ ਪਞ੍ਹਂ ਪੁਚ੍ਛਨ੍ਤਿ, ਕੁਤੋ ਵਾਦਂ ਆਰੋਪੇਸ੍ਸਨ੍ਤਿ? ਅਞ੍ਞਦਤ੍ਥੁ ਭਗਵਤੋ ਸਾਵਕਾ ਸਮ੍ਪਜ੍ਜਨ੍ਤਿ. ਅਯਮ੍ਪਿ ਖੋ ਮੇ, ਭਨ੍ਤੇ, ਭਗਵਤਿ ਧਮ੍ਮਨ੍ਵਯੋ ਹੋਤਿ – ‘ਸਮ੍ਮਾਸਮ੍ਬੁਦ੍ਧੋ ਭਗਵਾ, ਸ੍ਵਾਕ੍ਖਾਤੋ ਭਗਵਤਾ ਧਮ੍ਮੋ, ਸੁਪ੍ਪਟਿਪਨ੍ਨੋ ਭਗਵਤੋ ਸਾਵਕਸਙ੍ਘੋ’ਤਿ.

੩੭੨. ‘‘ਪੁਨ ਚਪਰਾਹਂ, ਭਨ੍ਤੇ, ਪਸ੍ਸਾਮਿ ਇਧੇਕਚ੍ਚੇ ਬ੍ਰਾਹ੍ਮਣਪਣ੍ਡਿਤੇ…ਪੇ… ਗਹਪਤਿਪਣ੍ਡਿਤੇ…ਪੇ… ਸਮਣਪਣ੍ਡਿਤੇ ਨਿਪੁਣੇ ਕਤਪਰਪ੍ਪਵਾਦੇ ਵਾਲਵੇਧਿਰੂਪੇ. ਤੇ ਭਿਨ੍ਦਨ੍ਤਾ ਮਞ੍ਞੇ ਚਰਨ੍ਤਿ ਪਞ੍ਞਾਗਤੇਨ ਦਿਟ੍ਠਿਗਤਾਨਿ. ਤੇ ਸੁਣਨ੍ਤਿ – ‘ਸਮਣੋ ਖਲੁ, ਭੋ, ਗੋਤਮੋ ਅਮੁਕਂ ਨਾਮ ਗਾਮਂ ਵਾ ਨਿਗਮਂ ਵਾ ਓਸਰਿਸ੍ਸਤੀ’ਤਿ. ਤੇ ਪਞ੍ਹਂ ਅਭਿਸਙ੍ਖਰੋਨ੍ਤਿ – ‘ਇਮਂ ਮਯਂ ਪਞ੍ਹਂ ਸਮਣਂ ਗੋਤਮਂ ਉਪਸਙ੍ਕਮਿਤ੍ਵਾ ਪੁਚ੍ਛਿਸ੍ਸਾਮ. ਏਵਂ ਚੇ ਨੋ ਪੁਟ੍ਠੋ ਏਵਂ ਬ੍ਯਾਕਰਿਸ੍ਸਤਿ, ਏਵਮਸ੍ਸ ਮਯਂ ਵਾਦਂ ਆਰੋਪੇਸ੍ਸਾਮ; ਏਵਂ ਚੇਪਿ ਨੋ ਪੁਟ੍ਠੋ ਏਵਂ ਬ੍ਯਾਕਰਿਸ੍ਸਤਿ, ਏਵਮ੍ਪਿਸ੍ਸ ਮਯਂ ਵਾਦਂ ਆਰੋਪੇਸ੍ਸਾਮਾ’ਤਿ. ਤੇ ਸੁਣਨ੍ਤਿ – ‘ਸਮਣੋ ਖਲੁ, ਭੋ, ਗੋਤਮੋ ਅਮੁਕਂ ਨਾਮ ਗਾਮਂ ਵਾ ਨਿਗਮਂ ਵਾ ਓਸਟੋ’ਤਿ. ਤੇ ਯੇਨ ਭਗਵਾ ਤੇਨੁਪਸਙ੍ਕਮਨ੍ਤਿ. ਤੇ ਭਗਵਾ ਧਮ੍ਮਿਯਾ ਕਥਾਯ ਸਨ੍ਦਸ੍ਸੇਤਿ ਸਮਾਦਪੇਤਿ ਸਮੁਤ੍ਤੇਜੇਤਿ ਸਮ੍ਪਹਂਸੇਤਿ. ਤੇ ਭਗਵਤਾ ਧਮ੍ਮਿਯਾ ਕਥਾਯ ਸਨ੍ਦਸ੍ਸਿਤਾ ਸਮਾਦਪਿਤਾ ਸਮੁਤ੍ਤੇਜਿਤਾ ਸਮ੍ਪਹਂਸਿਤਾ ਨ ਚੇਵ ਭਗਵਨ੍ਤਂ ਪਞ੍ਹਂ ਪੁਚ੍ਛਨ੍ਤਿ, ਕੁਤੋ ਵਾਦਂ ਆਰੋਪੇਸ੍ਸਨ੍ਤਿ? ਅਞ੍ਞਦਤ੍ਥੁ ਭਗਵਨ੍ਤਂਯੇਵ ਓਕਾਸਂ ਯਾਚਨ੍ਤਿ ਅਗਾਰਸ੍ਮਾ ਅਨਗਾਰਿਯਂ ਪਬ੍ਬਜ੍ਜਾਯ. ਤੇ ਭਗਵਾ ਪਬ੍ਬਾਜੇਤਿ. ਤੇ ਤਥਾਪਬ੍ਬਜਿਤਾ ਸਮਾਨਾ ਏਕਾ ਵੂਪਕਟ੍ਠਾ ਅਪ੍ਪਮਤ੍ਤਾ ਆਤਾਪਿਨੋ ਪਹਿਤਤ੍ਤਾ ਵਿਹਰਨ੍ਤਾ ਨਚਿਰਸ੍ਸੇਵ – ਯਸ੍ਸਤ੍ਥਾਯ ਕੁਲਪੁਤ੍ਤਾ ਸਮ੍ਮਦੇਵ ਅਗਾਰਸ੍ਮਾ ਅਨਗਾਰਿਯਂ ਪਬ੍ਬਜਨ੍ਤਿ ਤਦਨੁਤ੍ਤਰਂ – ਬ੍ਰਹ੍ਮਚਰਿਯਪਰਿਯੋਸਾਨਂ ਦਿਟ੍ਠੇਵ ਧਮ੍ਮੇ ਸਯਂ ਅਭਿਞ੍ਞਾ ਸਚ੍ਛਿਕਤ੍ਵਾ ਉਪਸਮ੍ਪਜ੍ਜ ਵਿਹਰਨ੍ਤਿ. ਤੇ ਏਵਮਾਹਂਸੁ – ‘ਮਨਂ ਵਤ, ਭੋ, ਅਨਸ੍ਸਾਮ; ਮਨਂ ਵਤ, ਭੋ, ਪਨਸ੍ਸਾਮ’. ਮਯਞ੍ਹਿ ਪੁਬ੍ਬੇ ਅਸ੍ਸਮਣਾਵ ਸਮਾਨਾ ਸਮਣਾਮ੍ਹਾਤਿ ਪਟਿਜਾਨਿਮ੍ਹਾ, ਅਬ੍ਰਾਹ੍ਮਣਾਵ ਸਮਾਨਾ ਬ੍ਰਾਹ੍ਮਣਾਮ੍ਹਾਤਿ ਪਟਿਜਾਨਿਮ੍ਹਾ, ਅਨਰਹਨ੍ਤੋਵ ਸਮਾਨਾ ਅਰਹਨ੍ਤਾਮ੍ਹਾਤਿ ਪਟਿਜਾਨਿਮ੍ਹਾ. ‘ਇਦਾਨਿ ਖੋਮ੍ਹ ਸਮਣਾ, ਇਦਾਨਿ ਖੋਮ੍ਹ ਬ੍ਰਾਹ੍ਮਣਾ, ਇਦਾਨਿ ਖੋਮ੍ਹ ਅਰਹਨ੍ਤੋ’ਤਿ. ਅਯਮ੍ਪਿ ਖੋ ਮੇ, ਭਨ੍ਤੇ, ਭਗਵਤਿ ਧਮ੍ਮਨ੍ਵਯੋ ਹੋਤਿ – ‘ਸਮ੍ਮਾਸਮ੍ਬੁਦ੍ਧੋ ਭਗਵਾ, ਸ੍ਵਾਕ੍ਖਾਤੋ ਭਗਵਤਾ ਧਮ੍ਮੋ, ਸੁਪ੍ਪਟਿਪਨ੍ਨੋ ਭਗਵਤੋ ਸਾਵਕਸਙ੍ਘੋ’ਤਿ.

੩੭੩. ‘‘ਪੁਨ ਚਪਰਾਹਂ, ਭਨ੍ਤੇ, ਇਮੇ ਇਸਿਦਤ੍ਤਪੁਰਾਣਾ ਥਪਤਯੋ ਮਮਭਤ੍ਤਾ ਮਮਯਾਨਾ, ਅਹਂ ਨੇਸਂ ਜੀਵਿਕਾਯ [ਜੀਵਿਤਸ੍ਸ (ਸੀ.), ਜੀਵਿਕਂ (ਸੀ. ਅਟ੍ਠ.), ਜੀਵਿਤਂ (ਸ੍ਯਾ. ਕਂ. ਪੀ. ਕ.)] ਦਾਤਾ, ਯਸਸ੍ਸ ਆਹਤ੍ਤਾ; ਅਥ ਚ ਪਨ ਨੋ ਤਥਾ ਮਯਿ ਨਿਪਚ੍ਚਕਾਰਂ ਕਰੋਨ੍ਤਿ ਯਥਾ ਭਗਵਤਿ. ਭੂਤਪੁਬ੍ਬਾਹਂ, ਭਨ੍ਤੇ, ਸੇਨਂ ਅਬ੍ਭੁਯ੍ਯਾਤੋ ਸਮਾਨੋ ਇਮੇ ਚ ਇਸਿਦਤ੍ਤਪੁਰਾਣਾ ਥਪਤਯੋ ਵੀਮਂਸਮਾਨੋ ਅਞ੍ਞਤਰਸ੍ਮਿਂ ਸਮ੍ਬਾਧੇ ਆਵਸਥੇ ਵਾਸਂ ਉਪਗਚ੍ਛਿਂ. ਅਥ ਖੋ, ਭਨ੍ਤੇ, ਇਮੇ ਇਸਿਦਤ੍ਤਪੁਰਾਣਾ ਥਪਤਯੋ ਬਹੁਦੇਵ ਰਤ੍ਤਿਂ ਧਮ੍ਮਿਯਾ ਕਥਾਯ ਵੀਤਿਨਾਮੇਤ੍ਵਾ, ਯਤੋ ਅਹੋਸਿ ਭਗਵਾ [ਅਸ੍ਸੋਸੁਂ ਖੋ ਭਗਵਨ੍ਤਂ (ਸੀ. ਸ੍ਯਾ. ਕਂ. ਪੀ.)] ਤਤੋ ਸੀਸਂ ਕਤ੍ਵਾ ਮਂ ਪਾਦਤੋ ਕਰਿਤ੍ਵਾ ਨਿਪਜ੍ਜਿਂਸੁ. ਤਸ੍ਸ ਮਯ੍ਹਂ, ਭਨ੍ਤੇ, ਏਤਦਹੋਸਿ – ‘ਅਚ੍ਛਰਿਯਂ ਵਤ, ਭੋ, ਅਬ੍ਭੁਤਂ ਵਤ, ਭੋ! ਇਮੇ ਇਸਿਦਤ੍ਤਪੁਰਾਣਾ ਥਪਤਯੋ ਮਮਭਤ੍ਤਾ ਮਮਯਾਨਾ, ਅਹਂ ਨੇਸਂ ਜੀਵਿਕਾਯ ਦਾਤਾ, ਯਸਸ੍ਸ ਆਹਤ੍ਤਾ; ਅਥ ਚ ਪਨ ਨੋ ਤਥਾ ਮਯਿ ਨਿਪਚ੍ਚਕਾਰਂ ਕਰੋਨ੍ਤਿ ਯਥਾ ਭਗਵਤਿ. ਅਦ੍ਧਾ ਇਮੇ ਆਯਸ੍ਮਨ੍ਤੋ ਤਸ੍ਸ ਭਗਵਤੋ ਸਾਸਨੇ ਉਲ਼ਾਰਂ ਪੁਬ੍ਬੇਨਾਪਰਂ ਵਿਸੇਸਂ ਜਾਨਨ੍ਤੀ’ਤਿ. ਅਯਮ੍ਪਿ ਖੋ ਮੇ, ਭਨ੍ਤੇ, ਭਗਵਤਿ ਧਮ੍ਮਨ੍ਵਯੋ ਹੋਤਿ – ‘ਸਮ੍ਮਾਸਮ੍ਬੁਦ੍ਧੋ ਭਗਵਾ, ਸ੍ਵਾਕ੍ਖਾਤੋ ਭਗਵਤਾ ਧਮ੍ਮੋ, ਸੁਪ੍ਪਟਿਪਨ੍ਨੋ ਭਗਵਤੋ ਸਾਵਕਸਙ੍ਘੋ’ਤਿ.

੩੭੪. ‘‘ਪੁਨ ਚਪਰਂ, ਭਨ੍ਤੇ, ਭਗਵਾਪਿ ਖਤ੍ਤਿਯੋ, ਅਹਮ੍ਪਿ ਖਤ੍ਤਿਯੋ; ਭਗਵਾਪਿ ਕੋਸਲੋ, ਅਹਮ੍ਪਿ ਕੋਸਲੋ; ਭਗਵਾਪਿ ਆਸੀਤਿਕੋ, ਅਹਮ੍ਪਿ ਆਸੀਤਿਕੋ. ਯਮ੍ਪਿ, ਭਨ੍ਤੇ, ਭਗਵਾਪਿ ਖਤ੍ਤਿਯੋ ਅਹਮ੍ਪਿ ਖਤ੍ਤਿਯੋ, ਭਗਵਾਪਿ ਕੋਸਲੋ ਅਹਮ੍ਪਿ ਕੋਸਲੋ, ਭਗਵਾਪਿ ਆਸੀਤਿਕੋ ਅਹਮ੍ਪਿ ਆਸੀਤਿਕੋ; ਇਮਿਨਾਵਾਰਹਾਮੇਵਾਹਂ [ਇਮਿਨਾਪਾਹਂ (ਕ.)], ਭਨ੍ਤੇ, ਭਗਵਤਿ ਪਰਮਨਿਪਚ੍ਚਕਾਰਂ ਕਾਤੁਂ, ਮਿਤ੍ਤੂਪਹਾਰਂ ਉਪਦਂਸੇਤੁਂ. ਹਨ੍ਦ, ਚ ਦਾਨਿ ਮਯਂ, ਭਨ੍ਤੇ, ਗਚ੍ਛਾਮ; ਬਹੁਕਿਚ੍ਚਾ ਮਯਂ ਬਹੁਕਰਣੀਯਾ’’ਤਿ. ‘‘ਯਸ੍ਸਦਾਨਿ ਤ੍ਵਂ, ਮਹਾਰਾਜ, ਕਾਲਂ ਮਞ੍ਞਸੀ’’ਤਿ. ਅਥ ਖੋ ਰਾਜਾ ਪਸੇਨਦਿ ਕੋਸਲੋ ਉਟ੍ਠਾਯਾਸਨਾ ਭਗਵਨ੍ਤਂ ਅਭਿਵਾਦੇਤ੍ਵਾ ਪਦਕ੍ਖਿਣਂ ਕਤ੍ਵਾ ਪਕ੍ਕਾਮਿ. ਅਥ ਖੋ ਭਗਵਾ ਅਚਿਰਪਕ੍ਕਨ੍ਤਸ੍ਸ ਰਞ੍ਞੋ ਪਸੇਨਦਿਸ੍ਸ ਕੋਸਲਸ੍ਸ ਭਿਕ੍ਖੂ ਆਮਨ੍ਤੇਸਿ – ‘‘ਏਸੋ, ਭਿਕ੍ਖਵੇ, ਰਾਜਾ ਪਸੇਨਦਿ ਕੋਸਲੋ ਧਮ੍ਮਚੇਤਿਯਾਨਿ ਭਾਸਿਤ੍ਵਾ ਉਟ੍ਠਾਯਾਸਨਾ ਪਕ੍ਕਨ੍ਤੋ. ਉਗ੍ਗਣ੍ਹਥ, ਭਿਕ੍ਖਵੇ, ਧਮ੍ਮਚੇਤਿਯਾਨਿ; ਪਰਿਯਾਪੁਣਾਥ, ਭਿਕ੍ਖਵੇ, ਧਮ੍ਮਚੇਤਿਯਾਨਿ; ਧਾਰੇਥ, ਭਿਕ੍ਖਵੇ, ਧਮ੍ਮਚੇਤਿਯਾਨਿ. ਅਤ੍ਥਸਂਹਿਤਾਨਿ, ਭਿਕ੍ਖਵੇ, ਧਮ੍ਮਚੇਤਿਯਾਨਿ ਆਦਿਬ੍ਰਹ੍ਮਚਰਿਯਕਾਨੀ’’ਤਿ.

ਇਦਮਵੋਚ ਭਗਵਾ. ਅਤ੍ਤਮਨਾ ਤੇ ਭਿਕ੍ਖੂ ਭਗਵਤੋ ਭਾਸਿਤਂ ਅਭਿਨਨ੍ਦੁਨ੍ਤਿ.

ਧਮ੍ਮਚੇਤਿਯਸੁਤ੍ਤਂ ਨਿਟ੍ਠਿਤਂ ਨਵਮਂ.