੯. ਬ੍ਰਹ੍ਮਨਿਮਨ੍ਤਨਿਕਸੁਤ੍ਤਂ

੫੦੧. ਏਵਂ ਮੇ ਸੁਤਂ – ਏਕਂ ਸਮਯਂ ਭਗਵਾ ਸਾਵਤ੍ਥਿਯਂ ਵਿਹਰਤਿ ਜੇਤਵਨੇ ਅਨਾਥਪਿਣ੍ਡਿਕਸ੍ਸ ਆਰਾਮੇ. ਤਤ੍ਰ ਖੋ ਭਗਵਾ ਭਿਕ੍ਖੂ ਆਮਨ੍ਤੇਸਿ – ‘‘ਭਿਕ੍ਖਵੋ’’ਤਿ. ‘‘ਭਦਨ੍ਤੇ’’ਤਿ ਤੇ ਭਿਕ੍ਖੂ ਭਗਵਤੋ ਪਚ੍ਚਸ੍ਸੋਸੁਂ. ਭਗਵਾ ਏਤਦਵੋਚ –

‘‘ਏਕਮਿਦਾਹਂ, ਭਿਕ੍ਖਵੇ, ਸਮਯਂ ਉਕ੍ਕਟ੍ਠਾਯਂ ਵਿਹਰਾਮਿ ਸੁਭਗਵਨੇ ਸਾਲਰਾਜਮੂਲੇ. ਤੇਨ ਖੋ ਪਨ, ਭਿਕ੍ਖਵੇ, ਸਮਯੇਨ ਬਕਸ੍ਸ ਬ੍ਰਹ੍ਮੁਨੋ ਏਵਰੂਪਂ ਪਾਪਕਂ ਦਿਟ੍ਠਿਗਤਂ ਉਪ੍ਪਨ੍ਨਂ ਹੋਤਿ – ‘ਇਦਂ ਨਿਚ੍ਚਂ, ਇਦਂ ਧੁਵਂ, ਇਦਂ ਸਸ੍ਸਤਂ, ਇਦਂ ਕੇਵਲਂ, ਇਦਂ ਅਚਵਨਧਮ੍ਮਂ, ਇਦਞ੍ਹਿ ਨ ਜਾਯਤਿ ਨ ਜੀਯਤਿ ਨ ਮੀਯਤਿ ਨ ਚਵਤਿ ਨ ਉਪਪਜ੍ਜਤਿ, ਇਤੋ ਚ ਪਨਞ੍ਞਂ ਉਤ੍ਤਰਿ ਨਿਸ੍ਸਰਣਂ ਨਤ੍ਥੀ’ਤਿ. ਅਥ ਖ੍ਵਾਹਂ, ਭਿਕ੍ਖਵੇ, ਬਕਸ੍ਸ ਬ੍ਰਹ੍ਮੁਨੋ ਚੇਤਸਾ ਚੇਤੋਪਰਿਵਿਤਕ੍ਕਮਞ੍ਞਾਯ – ਸੇਯ੍ਯਥਾਪਿ ਨਾਮ ਬਲਵਾ ਪੁਰਿਸੋ ਸਮਿਞ੍ਜਿਤਂ ਵਾ ਬਾਹਂ ਪਸਾਰੇਯ੍ਯ, ਪਸਾਰਿਤਂ ਵਾ ਬਾਹਂ ਸਮਿਞ੍ਜੇਯ੍ਯ, ਏਵਮੇਵ – ਉਕ੍ਕਟ੍ਠਾਯਂ ਸੁਭਗਵਨੇ ਸਾਲਰਾਜਮੂਲੇ ਅਨ੍ਤਰਹਿਤੋ ਤਸ੍ਮਿਂ ਬ੍ਰਹ੍ਮਲੋਕੇ ਪਾਤੁਰਹੋਸਿਂ. ਅਦ੍ਦਸਾ ਖੋ ਮਂ, ਭਿਕ੍ਖਵੇ, ਬਕੋ ਬ੍ਰਹ੍ਮਾ ਦੂਰਤੋਵ ਆਗਚ੍ਛਨ੍ਤਂ; ਦਿਸ੍ਵਾਨ ਮਂ ਏਤਦਵੋਚ – ‘ਏਹਿ ਖੋ, ਮਾਰਿਸ, ਸ੍ਵਾਗਤਂ, ਮਾਰਿਸ! ਚਿਰਸ੍ਸਂ ਖੋ, ਮਾਰਿਸ, ਇਮਂ ਪਰਿਯਾਯਮਕਾਸਿ ਯਦਿਦਂ ਇਧਾਗਮਨਾਯ. ਇਦਞ੍ਹਿ, ਮਾਰਿਸ, ਨਿਚ੍ਚਂ, ਇਦਂ ਧੁਵਂ, ਇਦਂ ਸਸ੍ਸਤਂ, ਇਦਂ ਕੇਵਲਂ, ਇਦਂ ਅਚਵਨਧਮ੍ਮਂ, ਇਦਞ੍ਹਿ ਨ ਜਾਯਤਿ ਨ ਜੀਯਤਿ ਨ ਮੀਯਤਿ ਨ ਚਵਤਿ ਨ ਉਪਪਜ੍ਜਤਿ. ਇਤੋ ਚ ਪਨਞ੍ਞਂ ਉਤ੍ਤਰਿ ਨਿਸ੍ਸਰਣਂ ਨਤ੍ਥੀ’’’ਤਿ.

ਏਵਂ ਵੁਤ੍ਤੇ, ਅਹਂ, ਭਿਕ੍ਖਵੇ, ਬਕਂ ਬ੍ਰਹ੍ਮਾਨਂ ਏਤਦਵੋਚਂ – ‘‘ਅਵਿਜ੍ਜਾਗਤੋ ਵਤ, ਭੋ, ਬਕੋ ਬ੍ਰਹ੍ਮਾ; ਅਵਿਜ੍ਜਾਗਤੋ ਵਤ, ਭੋ, ਬਕੋ ਬ੍ਰਹ੍ਮਾ; ਯਤ੍ਰ ਹਿ ਨਾਮ ਅਨਿਚ੍ਚਂਯੇਵ ਸਮਾਨਂ ਨਿਚ੍ਚਨ੍ਤਿ ਵਕ੍ਖਤਿ, ਅਦ੍ਧੁਵਂਯੇਵ ਸਮਾਨਂ ਧੁਵਨ੍ਤਿ ਵਕ੍ਖਤਿ, ਅਸਸ੍ਸਤਂਯੇਵ ਸਮਾਨਂ ਸਸ੍ਸਤਨ੍ਤਿ ਵਕ੍ਖਤਿ, ਅਕੇਵਲਂਯੇਵ ਸਮਾਨਂ ਕੇਵਲਨ੍ਤਿ ਵਕ੍ਖਤਿ, ਚਵਨਧਮ੍ਮਂਯੇਵ ਸਮਾਨਂ ਅਚਵਨਧਮ੍ਮਨ੍ਤਿ ਵਕ੍ਖਤਿ; ਯਤ੍ਥ ਚ ਪਨ ਜਾਯਤਿ ਜੀਯਤਿ ਮੀਯਤਿ ਚਵਤਿ ਉਪਪਜ੍ਜਤਿ ਤਞ੍ਚ ਵਕ੍ਖਤਿ – ‘ਇਦਞ੍ਹਿ ਨ ਜਾਯਤਿ ਨ ਜੀਯਤਿ ਨ ਮੀਯਤਿ ਨ ਚਵਤਿ ਨ ਉਪਪਜ੍ਜਤੀ’ਤਿ; ਸਨ੍ਤਞ੍ਚ ਪਨਞ੍ਞਂ ਉਤ੍ਤਰਿ ਨਿਸ੍ਸਰਣਂ ‘ਨਤ੍ਥਞ੍ਞਂ ਉਤ੍ਤਰਿ ਨਿਸ੍ਸਰਣ’ਨ੍ਤਿ ਵਕ੍ਖਤੀ’’ਤਿ.

੫੦੨. ‘‘ਅਥ ਖੋ, ਭਿਕ੍ਖਵੇ, ਮਾਰੋ ਪਾਪਿਮਾ ਅਞ੍ਞਤਰਂ ਬ੍ਰਹ੍ਮਪਾਰਿਸਜ੍ਜਂ ਅਨ੍ਵਾਵਿਸਿਤ੍ਵਾ ਮਂ ਏਤਦਵੋਚ – ‘ਭਿਕ੍ਖੁ, ਭਿਕ੍ਖੁ, ਮੇਤਮਾਸਦੋ ਮੇਤਮਾਸਦੋ, ਏਸੋ ਹਿ, ਭਿਕ੍ਖੁ, ਬ੍ਰਹ੍ਮਾ ਮਹਾਬ੍ਰਹ੍ਮਾ ਅਭਿਭੂ ਅਨਭਿਭੂਤੋ ਅਞ੍ਞਦਤ੍ਥੁਦਸੋ ਵਸਵਤ੍ਤੀ ਇਸ੍ਸਰੋ ਕਤ੍ਤਾ ਨਿਮ੍ਮਾਤਾ ਸੇਟ੍ਠੋ ਸਜਿਤਾ [ਸਜ੍ਜਿਤਾ (ਸ੍ਯਾ. ਕਂ. ਕ.), ਸਞ੍ਜਿਤਾ (ਸੀ. ਪੀ.)] ਵਸੀ ਪਿਤਾ ਭੂਤਭਬ੍ਯਾਨਂ. ਅਹੇਸੁਂ ਖੋ ਯੇ, ਭਿਕ੍ਖੁ, ਤਯਾ ਪੁਬ੍ਬੇ ਸਮਣਬ੍ਰਾਹ੍ਮਣਾ ਲੋਕਸ੍ਮਿਂ ਪਥਵੀਗਰਹਕਾ ਪਥਵੀਜਿਗੁਚ੍ਛਕਾ, ਆਪਗਰਹਕਾ ਆਪਜਿਗੁਚ੍ਛਕਾ, ਤੇਜਗਰਹਕਾ ਤੇਜਜਿਗੁਚ੍ਛਕਾ, ਵਾਯਗਰਹਕਾ ਵਾਯਜਿਗੁਚ੍ਛਕਾ, ਭੂਤਗਰਹਕਾ ਭੂਤਜਿਗੁਚ੍ਛਕਾ, ਦੇਵਗਰਹਕਾ ਦੇਵਜਿਗੁਚ੍ਛਕਾ, ਪਜਾਪਤਿਗਰਹਕਾ ਪਜਾਪਤਿਜਿਗੁਚ੍ਛਕਾ, ਬ੍ਰਹ੍ਮਗਰਹਕਾ ਬ੍ਰਹ੍ਮਜਿਗੁਚ੍ਛਕਾ – ਤੇ ਕਾਯਸ੍ਸ ਭੇਦਾ ਪਾਣੁਪਚ੍ਛੇਦਾ ਹੀਨੇ ਕਾਯੇ ਪਤਿਟ੍ਠਿਤਾ ਅਹੇਸੁਂ. ਯੇ ਪਨ, ਭਿਕ੍ਖੁ, ਤਯਾ ਪੁਬ੍ਬੇ ਸਮਣਬ੍ਰਾਹ੍ਮਣਾ ਲੋਕਸ੍ਮਿਂ ਪਥਵੀਪਸਂਸਕਾ ਪਥਵਾਭਿਨਨ੍ਦਿਨੋ, ਆਪਪਸਂਸਕਾ ਆਪਾਭਿਨਨ੍ਦਿਨੋ, ਤੇਜਪਸਂਸਕਾ ਤੇਜਾਭਿਨਨ੍ਦਿਨੋ, ਵਾਯਪਸਂਸਕਾ ਵਾਯਾਭਿਨਨ੍ਦਿਨੋ, ਭੂਤਪਸਂਸਕਾ ਭੂਤਾਭਿਨਨ੍ਦਿਨੋ, ਦੇਵਪਸਂਸਕਾ ਦੇਵਾਭਿਨਨ੍ਦਿਨੋ, ਪਜਾਪਤਿਪਸਂਸਕਾ ਪਜਾਪਤਾਭਿਨਨ੍ਦਿਨੋ, ਬ੍ਰਹ੍ਮਪਸਂਸਕਾ ਬ੍ਰਹ੍ਮਾਭਿਨਨ੍ਦਿਨੋ – ਤੇ ਕਾਯਸ੍ਸ ਭੇਦਾ ਪਾਣੁਪਚ੍ਛੇਦਾ ਪਣੀਤੇ ਕਾਯੇ ਪਤਿਟ੍ਠਿਤਾ. ਤਂ ਤਾਹਂ, ਭਿਕ੍ਖੁ, ਏਵਂ ਵਦਾਮਿ – ‘ਇਙ੍ਘ ਤ੍ਵਂ, ਮਾਰਿਸ, ਯਦੇਵ ਤੇ ਬ੍ਰਹ੍ਮਾ ਆਹ ਤਦੇਵ ਤ੍ਵਂ ਕਰੋਹਿ, ਮਾ ਤ੍ਵਂ ਬ੍ਰਹ੍ਮੁਨੋ ਵਚਨਂ ਉਪਾਤਿਵਤ੍ਤਿਤ੍ਥੋ’. ਸਚੇ ਖੋ ਤ੍ਵਂ, ਭਿਕ੍ਖੁ, ਬ੍ਰਹ੍ਮੁਨੋ ਵਚਨਂ ਉਪਾਤਿਵਤ੍ਤਿਸ੍ਸਸਿ, ਸੇਯ੍ਯਥਾਪਿ ਨਾਮ ਪੁਰਿਸੋ ਸਿਰਿਂ ਆਗਚ੍ਛਨ੍ਤਿਂ ਦਣ੍ਡੇਨ ਪਟਿਪ੍ਪਣਾਮੇਯ੍ਯ, ਸੇਯ੍ਯਥਾਪਿ ਵਾ ਪਨ, ਭਿਕ੍ਖੁ, ਪੁਰਿਸੋ ਨਰਕਪ੍ਪਪਾਤੇ ਪਪਤਨ੍ਤੋ ਹਤ੍ਥੇਹਿ ਚ ਪਾਦੇਹਿ ਚ ਪਥਵਿਂ ਵਿਰਾਧੇਯ੍ਯ, ਏਵਂ ਸਮ੍ਪਦਮਿਦਂ, ਭਿਕ੍ਖੁ, ਤੁਯ੍ਹਂ ਭਵਿਸ੍ਸਤਿ. ‘ਇਙ੍ਘਂ ਤ੍ਵਂ, ਮਾਰਿਸ, ਯਦੇਵ ਤੇ ਬ੍ਰਹ੍ਮਾ ਆਹ ਤਦੇਵ ਤ੍ਵਂ ਕਰੋਹਿ, ਮਾ ਤ੍ਵਂ ਬ੍ਰਹ੍ਮੁਨੋ ਵਚਨਂ ਉਪਾਤਿਵਤ੍ਤਿਤ੍ਥੋ. ਨਨੁ ਤ੍ਵਂ, ਭਿਕ੍ਖੁ, ਪਸ੍ਸਸਿ ਬ੍ਰਹ੍ਮਪਰਿਸਂ ਸਨ੍ਨਿਪਤਿਤ’ਨ੍ਤਿ? ਇਤਿ ਖੋ ਮਂ, ਭਿਕ੍ਖਵੇ, ਮਾਰੋ ਪਾਪਿਮਾ ਬ੍ਰਹ੍ਮਪਰਿਸਂ ਉਪਨੇਸਿ.

‘‘ਏਵਂ ਵੁਤ੍ਤੇ, ਅਹਂ, ਭਿਕ੍ਖਵੇ, ਮਾਰਂ ਪਾਪਿਮਨ੍ਤਂ ਏਤਦਵੋਚਂ – ‘ਜਾਨਾਮਿ ਖੋ ਤਾਹਂ, ਪਾਪਿਮ; ਮਾ ਤ੍ਵਂ ਮਞ੍ਞਿਤ੍ਥੋ – ਨ ਮਂ ਜਾਨਾਤੀ’ਤਿ. ਮਾਰੋ ਤ੍ਵਮਸਿ, ਪਾਪਿਮ. ਯੋ ਚੇਵ, ਪਾਪਿਮ, ਬ੍ਰਹ੍ਮਾ, ਯਾ ਚ ਬ੍ਰਹ੍ਮਪਰਿਸਾ, ਯੇ ਚ ਬ੍ਰਹ੍ਮਪਾਰਿਸਜ੍ਜਾ, ਸਬ੍ਬੇਵ ਤਵ ਹਤ੍ਥਗਤਾ ਸਬ੍ਬੇਵ ਤਵ ਵਸਂਗਤਾ. ਤੁਯ੍ਹਞ੍ਹਿ, ਪਾਪਿਮ, ਏਵਂ ਹੋਤਿ – ‘ਏਸੋਪਿ ਮੇ ਅਸ੍ਸ ਹਤ੍ਥਗਤੋ, ਏਸੋਪਿ ਮੇ ਅਸ੍ਸ ਵਸਂਗਤੋ’ਤਿ. ਅਹਂ ਖੋ ਪਨ, ਪਾਪਿਮ, ਨੇਵ ਤਵ ਹਤ੍ਥਗਤੋ ਨੇਵ ਤਵ ਵਸਂਗਤੋ’’ਤਿ.

੫੦੩. ‘‘ਏਵਂ ਵੁਤ੍ਤੇ, ਭਿਕ੍ਖਵੇ, ਬਕੋ ਬ੍ਰਹ੍ਮਾ ਮਂ ਏਤਦਵੋਚ – ‘ਅਹਞ੍ਹਿ, ਮਾਰਿਸ, ਨਿਚ੍ਚਂਯੇਵ ਸਮਾਨਂ ਨਿਚ੍ਚਨ੍ਤਿ ਵਦਾਮਿ, ਧੁਵਂਯੇਵ ਸਮਾਨਂ ਧੁਵਨ੍ਤਿ ਵਦਾਮਿ, ਸਸ੍ਸਤਂਯੇਵ ਸਮਾਨਂ ਸਸ੍ਸਤਨ੍ਤਿ ਵਦਾਮਿ, ਕੇਵਲਂਯੇਵ ਸਮਾਨਂ ਕੇਵਲਨ੍ਤਿ ਵਦਾਮਿ, ਅਚਵਨਧਮ੍ਮਂਯੇਵ ਸਮਾਨਂ ਅਚਵਨਧਮ੍ਮ’ਨ੍ਤਿ ਵਦਾਮਿ, ਯਤ੍ਥ ਚ ਪਨ ਨ ਜਾਯਤਿ ਨ ਜੀਯਤਿ ਨ ਮੀਯਤਿ ਨ ਚਵਤਿ ਨ ਉਪਪਜ੍ਜਤਿ ਤਦੇਵਾਹਂ ਵਦਾਮਿ – ‘ਇਦਞ੍ਹਿ ਨ ਜਾਯਤਿ ਨ ਜੀਯਤਿ ਨ ਮੀਯਤਿ ਨ ਚਵਤਿ ਨ ਉਪਪਜ੍ਜਤੀ’ਤਿ. ਅਸਨ੍ਤਞ੍ਚ ਪਨਞ੍ਞਂ ਉਤ੍ਤਰਿ ਨਿਸ੍ਸਰਣਂ ‘ਨਤ੍ਥਞ੍ਞਂ ਉਤ੍ਤਰਿ ਨਿਸ੍ਸਰਣ’ਨ੍ਤਿ ਵਦਾਮਿ. ਅਹੇਸੁਂ ਖੋ, ਭਿਕ੍ਖੁ, ਤਯਾ ਪੁਬ੍ਬੇ ਸਮਣਬ੍ਰਾਹ੍ਮਣਾ ਲੋਕਸ੍ਮਿਂ ਯਾਵਤਕਂ ਤੁਯ੍ਹਂ ਕਸਿਣਂ ਆਯੁ ਤਾਵਤਕਂ ਤੇਸਂ ਤਪੋਕਮ੍ਮਮੇਵ ਅਹੋਸਿ. ਤੇ ਖੋ ਏਵਂ ਜਾਨੇਯ੍ਯੁਂ – ‘ਸਨ੍ਤਞ੍ਚ ਪਨਞ੍ਞਂ ਉਤ੍ਤਰਿ ਨਿਸ੍ਸਰਣਂ ਅਤ੍ਥਞ੍ਞਂ ਉਤ੍ਤਰਿ ਨਿਸ੍ਸਰਣਨ੍ਤਿ, ਅਸਨ੍ਤਂ ਵਾ ਅਞ੍ਞਂ ਉਤ੍ਤਰਿ ਨਿਸ੍ਸਰਣਂ ਨਤ੍ਥਞ੍ਞਂ ਉਤ੍ਤਰਿ ਨਿਸ੍ਸਰਣ’ਨ੍ਤਿ. ਤਂ ਤਾਹਂ, ਭਿਕ੍ਖੁ, ਏਵਂ ਵਦਾਮਿ – ‘ਨ ਚੇਵਞ੍ਞਂ ਉਤ੍ਤਰਿ ਨਿਸ੍ਸਰਣਂ ਦਕ੍ਖਿਸ੍ਸਸਿ, ਯਾਵਦੇਵ ਚ ਪਨ ਕਿਲਮਥਸ੍ਸ ਵਿਘਾਤਸ੍ਸ ਭਾਗੀ ਭਵਿਸ੍ਸਸਿ. ਸਚੇ ਖੋ ਤ੍ਵਂ, ਭਿਕ੍ਖੁ, ਪਥਵਿਂ ਅਜ੍ਝੋਸਿਸ੍ਸਸਿ, ਓਪਸਾਯਿਕੋ ਮੇ ਭਵਿਸ੍ਸਸਿ ਵਤ੍ਥੁਸਾਯਿਕੋ, ਯਥਾਕਾਮਕਰਣੀਯੋ ਬਾਹਿਤੇਯ੍ਯੋ. ਸਚੇ ਆਪਂ… ਤੇਜਂ… ਵਾਯਂ… ਭੂਤੇ… ਦੇਵੇ… ਪਜਾਪਤਿਂ… ਬ੍ਰਹ੍ਮਂ ਅਜ੍ਝੋਸਿਸ੍ਸਸਿ, ਓਪਸਾਯਿਕੋ ਮੇ ਭਵਿਸ੍ਸਸਿ ਵਤ੍ਥੁਸਾਯਿਕੋ, ਯਥਾਕਾਮਕਰਣੀਯੋ ਬਾਹਿਤੇਯ੍ਯੋ’ਤਿ.

‘‘ਅਹਮ੍ਪਿ ਖੋ ਏਵਂ, ਬ੍ਰਹ੍ਮੇ, ਜਾਨਾਮਿ – ਸਚੇ ਪਥਵਿਂ ਅਜ੍ਝੋਸਿਸ੍ਸਾਮਿ, ਓਪਸਾਯਿਕੋ ਤੇ ਭਵਿਸ੍ਸਾਮਿ ਵਤ੍ਥੁਸਾਯਿਕੋ, ਯਥਾਕਾਮਕਰਣੀਯੋ ਬਾਹਿਤੇਯ੍ਯੋ. ‘ਸਚੇ ਆਪਂ… ਤੇਜਂ… ਵਾਯਂ… ਭੂਤੇ… ਦੇਵੇ… ਪਜਾਪਤਿਂ… ਬ੍ਰਹ੍ਮਂ ਅਜ੍ਝੋਸਿਸ੍ਸਾਮਿ, ਓਪਸਾਯਿਕੋ ਤੇ ਭਵਿਸ੍ਸਾਮਿ ਵਤ੍ਥੁਸਾਯਿਕੋ, ਯਥਾਕਾਮਕਰਣੀਯੋ ਬਾਹਿਤੇਯ੍ਯੋ’ਤਿ ਅਪਿ ਚ ਤੇ ਅਹਂ, ਬ੍ਰਹ੍ਮੇ, ਗਤਿਞ੍ਚ ਪਜਾਨਾਮਿ, ਜੁਤਿਞ੍ਚ ਪਜਾਨਾਮਿ – ਏਵਂ ਮਹਿਦ੍ਧਿਕੋ ਬਕੋ ਬ੍ਰਹ੍ਮਾ, ਏਵਂ ਮਹਾਨੁਭਾਵੋ ਬਕੋ ਬ੍ਰਹ੍ਮਾ, ਏਵਂ ਮਹੇਸਕ੍ਖੋ ਬਕੋ ਬ੍ਰਹ੍ਮਾ’’ਤਿ.

‘‘ਯਥਾਕਥਂ ਪਨ ਮੇ ਤ੍ਵਂ, ਮਾਰਿਸ, ਗਤਿਞ੍ਚ ਪਜਾਨਾਸਿ, ਜੁਤਿਞ੍ਚ ਪਜਾਨਾਸਿ – ‘ਏਵਂ ਮਹਿਦ੍ਧਿਕੋ ਬਕੋ ਬ੍ਰਹ੍ਮਾ, ਏਵਂ ਮਹਾਨੁਭਾਵੋ ਬਕੋ ਬ੍ਰਹ੍ਮਾ, ਏਵਂ ਮਹੇਸਕ੍ਖੋ ਬਕੋ ਬ੍ਰਹ੍ਮਾ’ਤਿ?

‘‘ਯਾਵਤਾ ਚਨ੍ਦਿਮਸੂਰਿਯਾ, ਪਰਿਹਰਨ੍ਤਿ ਦਿਸਾ ਭਨ੍ਤਿ ਵਿਰੋਚਨਾ;

ਤਾਵ ਸਹਸ੍ਸਧਾ ਲੋਕੋ, ਏਤ੍ਥ ਤੇ ਵਤ੍ਤਤੇ [ਵਤ੍ਤਤੀ (ਸੀ. ਸ੍ਯਾ. ਕਂ. ਪੀ.)] ਵਸੋ.

‘‘ਪਰੋਪਰਞ੍ਚ [ਪਰੋਵਰਞ੍ਚ (ਸੀ. ਪੀ.)] ਜਾਨਾਸਿ, ਅਥੋ ਰਾਗਵਿਰਾਗਿਨਂ;

ਇਤ੍ਥਭਾਵਞ੍ਞਥਾਭਾਵਂ, ਸਤ੍ਤਾਨਂ ਆਗਤਿਂ ਗਤਿ’’ਨ੍ਤਿ.

‘‘ਏਵਂ ਖੋ ਤੇ ਅਹਂ, ਬ੍ਰਹ੍ਮੇ, ਗਤਿਞ੍ਚ ਪਜਾਨਾਮਿ ਜੁਤਿਞ੍ਚ ਪਜਾਨਾਮਿ – ‘ਏਵਂ ਮਹਿਦ੍ਧਿਕੋ ਬਕੋ ਬ੍ਰਹ੍ਮਾ, ਏਵਂ ਮਹਾਨੁਭਾਵੋ ਬਕੋ ਬ੍ਰਹ੍ਮਾ, ਏਵਂ ਮਹੇਸਕ੍ਖੋ ਬਕੋ ਬ੍ਰਹ੍ਮਾ’ਤਿ.

੫੦੪. ‘‘ਅਤ੍ਥਿ ਖੋ, ਬ੍ਰਹ੍ਮੇ, ਅਞ੍ਞੋ ਕਾਯੋ, ਤਂ ਤ੍ਵਂ ਨ ਜਾਨਾਸਿ ਨ ਪਸ੍ਸਸਿ; ਤਮਹਂ ਜਾਨਾਮਿ ਪਸ੍ਸਾਮਿ. ਅਤ੍ਥਿ ਖੋ, ਬ੍ਰਹ੍ਮੇ, ਆਭਸ੍ਸਰਾ ਨਾਮ ਕਾਯੋ ਯਤੋ ਤ੍ਵਂ ਚੁਤੋ ਇਧੂਪਪਨ੍ਨੋ. ਤਸ੍ਸ ਤੇ ਅਤਿਚਿਰਨਿਵਾਸੇਨ ਸਾ ਸਤਿ ਪਮੁਟ੍ਠਾ, ਤੇਨ ਤਂ ਤ੍ਵਂ ਨ ਜਾਨਾਸਿ ਨ ਪਸ੍ਸਸਿ; ਤਮਹਂ ਜਾਨਾਮਿ ਪਸ੍ਸਾਮਿ. ਏਵਮ੍ਪਿ ਖੋ ਅਹਂ, ਬ੍ਰਹ੍ਮੇ, ਨੇਵ ਤੇ ਸਮਸਮੋ ਅਭਿਞ੍ਞਾਯ, ਕੁਤੋ ਨੀਚੇਯ੍ਯਂ? ਅਥ ਖੋ ਅਹਮੇਵ ਤਯਾ ਭਿਯ੍ਯੋ. ਅਤ੍ਥਿ ਖੋ, ਬ੍ਰਹ੍ਮੇ, ਸੁਭਕਿਣ੍ਹੋ ਨਾਮ ਕਾਯੋ, ਵੇਹਪ੍ਫਲੋ ਨਾਮ ਕਾਯੋ, ਅਭਿਭੂ ਨਾਮ ਕਾਯੋ, ਤਂ ਤ੍ਵਂ ਨ ਜਾਨਾਸਿ ਨ ਪਸ੍ਸਸਿ; ਤਮਹਂ ਜਾਨਾਮਿ ਪਸ੍ਸਾਮਿ. ਏਵਮ੍ਪਿ ਖੋ ਅਹਂ, ਬ੍ਰਹ੍ਮੇ, ਨੇਵ ਤੇ ਸਮਸਮੋ ਅਭਿਞ੍ਞਾਯ, ਕੁਤੋ ਨੀਚੇਯ੍ਯਂ? ਅਥ ਖੋ ਅਹਮੇਵ ਤਯਾ ਭਿਯ੍ਯੋ. ਪਥਵਿਂ ਖੋ ਅਹਂ, ਬ੍ਰਹ੍ਮੇ, ਪਥਵਿਤੋ ਅਭਿਞ੍ਞਾਯ ਯਾਵਤਾ ਪਥਵਿਯਾ ਪਥਵਤ੍ਤੇਨ ਅਨਨੁਭੂਤਂ ਤਦਭਿਞ੍ਞਾਯ ਪਥਵਿਂ ਨਾਪਹੋਸਿਂ, ਪਥਵਿਯਾ ਨਾਪਹੋਸਿਂ, ਪਥਵਿਤੋ ਨਾਪਹੋਸਿਂ, ਪਥਵਿਂ ਮੇਤਿ ਨਾਪਹੋਸਿਂ, ਪਥਵਿਂ ਨਾਭਿਵਦਿਂ. ਏਵਮ੍ਪਿ ਖੋ ਅਹਂ, ਬ੍ਰਹ੍ਮੇ, ਨੇਵ ਤੇ ਸਮਸਮੋ ਅਭਿਞ੍ਞਾਯ, ਕੁਤੋ ਨੀਚੇਯ੍ਯਂ? ਅਥ ਖੋ ਅਹਮੇਵ ਤਯਾ ਭਿਯ੍ਯੋ. ਆਪਂ ਖੋ ਅਹਂ, ਬ੍ਰਹ੍ਮੇ…ਪੇ… ਤੇਜਂ ਖੋ ਅਹਂ, ਬ੍ਰਹ੍ਮੇ…ਪੇ… ਵਾਯਂ ਖੋ ਅਹਂ, ਬ੍ਰਹ੍ਮੇ…ਪੇ… ਭੂਤੇ ਖੋ ਅਹਂ, ਬ੍ਰਹ੍ਮੇ…ਪੇ… ਦੇਵੇ ਖੋ ਅਹਂ, ਬ੍ਰਹ੍ਮੇ…ਪੇ… ਪਜਾਪਤਿਂ ਖੋ ਅਹਂ, ਬ੍ਰਹ੍ਮੇ…ਪੇ… ਬ੍ਰਹ੍ਮਂ ਖੋ ਅਹਂ, ਬ੍ਰਹ੍ਮੇ…ਪੇ… ਆਭਸ੍ਸਰੇ ਖੋ ਅਹਂ, ਬ੍ਰਹ੍ਮੇ…ਪੇ… ਸੁਭਕਿਣ੍ਹੇ ਖੋ ਅਹਂ, ਬ੍ਰਹ੍ਮੇ… …ਪੇ… ਵੇਹਪ੍ਫਲੇ ਖੋ ਅਹਂ, ਬ੍ਰਹ੍ਮੇ…ਪੇ… ਅਭਿਭੁਂ ਖੋ ਅਹਂ, ਬ੍ਰਹ੍ਮੇ…ਪੇ… ਸਬ੍ਬਂ ਖੋ ਅਹਂ, ਬ੍ਰਹ੍ਮੇ, ਸਬ੍ਬਤੋ ਅਭਿਞ੍ਞਾਯ ਯਾਵਤਾ ਸਬ੍ਬਸ੍ਸ ਸਬ੍ਬਤ੍ਤੇਨ ਅਨਨੁਭੂਤਂ ਤਦਭਿਞ੍ਞਾਯ ਸਬ੍ਬਂ ਨਾਪਹੋਸਿਂ ਸਬ੍ਬਸ੍ਮਿਂ ਨਾਪਹੋਸਿਂ ਸਬ੍ਬਤੋ ਨਾਪਹੋਸਿਂ ਸਬ੍ਬਂ ਮੇਤਿ ਨਾਪਹੋਸਿਂ, ਸਬ੍ਬਂ ਨਾਭਿਵਦਿਂ. ਏਵਮ੍ਪਿ ਖੋ ਅਹਂ, ਬ੍ਰਹ੍ਮੇ, ਨੇਵ ਤੇ ਸਮਸਮੋ ਅਭਿਞ੍ਞਾਯ, ਕੁਤੋ ਨੀਚੇਯ੍ਯਂ? ਅਥ ਖੋ ਅਹਮੇਵ ਤਯਾ ਭਿਯ੍ਯੋ’’ਤਿ.

‘‘ਸਚੇ ਖੋ, ਮਾਰਿਸ, ਸਬ੍ਬਸ੍ਸ ਸਬ੍ਬਤ੍ਤੇਨ ਅਨਨੁਭੂਤਂ, ਤਦਭਿਞ੍ਞਾਯ ਮਾ ਹੇਵ ਤੇ ਰਿਤ੍ਤਕਮੇਵ ਅਹੋਸਿ, ਤੁਚ੍ਛਕਮੇਵ ਅਹੋਸੀ’’ਤਿ.

‘‘‘ਵਿਞ੍ਞਾਣਂ ਅਨਿਦਸ੍ਸਨਂ ਅਨਨ੍ਤਂ ਸਬ੍ਬਤੋ ਪਭਂ’, ਤਂ ਪਥਵਿਯਾ ਪਥਵਤ੍ਤੇਨ ਅਨਨੁਭੂਤਂ, ਆਪਸ੍ਸ ਆਪਤ੍ਤੇਨ ਅਨਨੁਭੂਤਂ, ਤੇਜਸ੍ਸ ਤੇਜਤ੍ਤੇਨ ਅਨਨੁਭੂਤਂ, ਵਾਯਸ੍ਸ ਵਾਯਤ੍ਤੇਨ ਅਨਨੁਭੂਤਂ, ਭੂਤਾਨਂ ਭੂਤਤ੍ਤੇਨ ਅਨਨੁਭੂਤਂ, ਦੇਵਾਨਂ ਦੇਵਤ੍ਤੇਨ ਅਨਨੁਭੂਤਂ, ਪਜਾਪਤਿਸ੍ਸ ਪਜਾਪਤਿਤ੍ਤੇਨ ਅਨਨੁਭੂਤਂ, ਬ੍ਰਹ੍ਮਾਨਂ ਬ੍ਰਹ੍ਮਤ੍ਤੇਨ ਅਨਨੁਭੂਤਂ, ਆਭਸ੍ਸਰਾਨਂ ਆਭਸ੍ਸਰਤ੍ਤੇਨ ਅਨਨੁਭੂਤਂ, ਸੁਭਕਿਣ੍ਹਾਨਂ ਸੁਭਕਿਣ੍ਹਤ੍ਤੇਨ ਅਨਨੁਭੂਤਂ, ਵੇਹਪ੍ਫਲਾਨਂ ਵੇਹਪ੍ਫਲਤ੍ਤੇ ਅਨਨੁਭੂਤਂ, ਅਭਿਭੁਸ੍ਸ ਅਭਿਭੁਤ੍ਤੇਨ ਅਨਨੁਭੂਤਂ, ਸਬ੍ਬਸ੍ਸ ਸਬ੍ਬਤ੍ਤੇਨ ਅਨਨੁਭੂਤਂ’’.

‘‘ਹਨ੍ਦ ਚਰਹਿ [ਹਨ੍ਦ ਚ ਹਿ (ਸੀ. ਪੀ.)] ਤੇ, ਮਾਰਿਸ, ਪਸ੍ਸ ਅਨ੍ਤਰਧਾਯਾਮੀ’’ਤਿ. ‘ਹਨ੍ਦ ਚਰਹਿ ਮੇ ਤ੍ਵਂ, ਬ੍ਰਹ੍ਮੇ, ਅਨ੍ਤਰਧਾਯਸ੍ਸੁ, ਸਚੇ ਵਿਸਹਸੀ’ਤਿ. ਅਥ ਖੋ, ਭਿਕ੍ਖਵੇ, ਬਕੋ ਬ੍ਰਹ੍ਮਾ ‘ਅਨ੍ਤਰਧਾਯਿਸ੍ਸਾਮਿ ਸਮਣਸ੍ਸ ਗੋਤਮਸ੍ਸ, ਅਨ੍ਤਰਧਾਯਿਸ੍ਸਾਮਿ ਸਮਣਸ੍ਸ ਗੋਤਮਸ੍ਸਾ’ਤਿ ਨੇਵਸ੍ਸੁ ਮੇ ਸਕ੍ਕੋਤਿ ਅਨ੍ਤਰਧਾਯਿਤੁਂ.

‘‘ਏਵਂ ਵੁਤ੍ਤੇ, ਅਹਂ, ਭਿਕ੍ਖਵੇ, ਬਕਂ ਬ੍ਰਹ੍ਮਾਨਂ ਏਤਦਵੋਚਂ – ‘ਹਨ੍ਦ ਚਰਹਿ ਤੇ ਬ੍ਰਹ੍ਮੇ ਅਨ੍ਤਰਧਾਯਾਮੀ’ਤਿ. ‘ਹਨ੍ਦ ਚਰਹਿ ਮੇ ਤ੍ਵਂ, ਮਾਰਿਸ, ਅਨ੍ਤਰਧਾਯਸ੍ਸੁ ਸਚੇ ਵਿਸਹਸੀ’ਤਿ. ਅਥ ਖੋ ਅਹਂ, ਭਿਕ੍ਖਵੇ, ਤਥਾਰੂਪਂ ਇਦ੍ਧਾਭਿਸਙ੍ਖਾਰਂ ਅਭਿਸਙ੍ਖਾਸਿਂ – ‘ਏਤ੍ਤਾਵਤਾ ਬ੍ਰਹ੍ਮਾ ਚ ਬ੍ਰਹ੍ਮਪਰਿਸਾ ਚ ਬ੍ਰਹ੍ਮਪਾਰਿਸਜ੍ਜਾ ਚ ਸਦ੍ਦਞ੍ਚ ਮੇ ਸੋਸ੍ਸਨ੍ਤਿ [ਸਦ੍ਦਮੇਵ ਸੁਯ੍ਯਨ੍ਤਿ (ਕ.)], ਨ ਚ ਮਂ ਦਕ੍ਖਨ੍ਤੀ’ਤਿ. ਅਨ੍ਤਰਹਿਤੋ ਇਮਂ ਗਾਥਂ ਅਭਾਸਿਂ –

‘‘ਭਵੇਵਾਹਂ ਭਯਂ ਦਿਸ੍ਵਾ, ਭਵਞ੍ਚ ਵਿਭਵੇਸਿਨਂ;

ਭਵਂ ਨਾਭਿਵਦਿਂ ਕਿਞ੍ਚਿ, ਨਨ੍ਦਿਞ੍ਚ ਨ ਉਪਾਦਿਯਿ’’ਨ੍ਤਿ.

‘‘ਅਥ ਖੋ, ਭਿਕ੍ਖਵੇ, ਬ੍ਰਹ੍ਮਾ ਚ ਬ੍ਰਹ੍ਮਪਰਿਸਾ ਚ ਬ੍ਰਹ੍ਮਪਾਰਿਸਜ੍ਜਾ ਚ ਅਚ੍ਛਰਿਯਬ੍ਭੁਤਚਿਤ੍ਤਜਾਤਾ ਅਹੇਸੁਂ – ‘ਅਚ੍ਛਰਿਯਂ ਵਤ ਭੋ, ਅਬ੍ਭੁਤਂ ਵਤ ਭੋ! ਸਮਣਸ੍ਸ ਗੋਤਮਸ੍ਸ ਮਹਿਦ੍ਧਿਕਤਾ ਮਹਾਨੁਭਾਵਤਾ, ਨ ਚ ਵਤ ਨੋ ਇਤੋ ਪੁਬ੍ਬੇ ਦਿਟ੍ਠੋ ਵਾ, ਸੁਤੋ ਵਾ, ਅਞ੍ਞੋ ਸਮਣੋ ਵਾ ਬ੍ਰਾਹ੍ਮਣੋ ਵਾ ਏਵਂ ਮਹਿਦ੍ਧਿਕੋ ਏਵਂ ਮਹਾਨੁਭਾਵੋ ਯਥਾਯਂ ਸਮਣੋ ਗੋਤਮੋ ਸਕ੍ਯਪੁਤ੍ਤੋ ਸਕ੍ਯਕੁਲਾ ਪਬ੍ਬਜਿਤੋ. ਭਵਰਾਮਾਯ ਵਤ, ਭੋ, ਪਜਾਯ ਭਵਰਤਾਯ ਭਵਸਮ੍ਮੁਦਿਤਾਯ ਸਮੂਲਂ ਭਵਂ ਉਦਬ੍ਬਹੀ’ਤਿ.

੫੦੫. ‘‘ਅਥ ਖੋ, ਭਿਕ੍ਖਵੇ, ਮਾਰੋ ਪਾਪਿਮਾ ਅਞ੍ਞਤਰਂ ਬ੍ਰਹ੍ਮਪਾਰਿਸਜ੍ਜਂ ਅਨ੍ਵਾਵਿਸਿਤ੍ਵਾ ਮਂ ਏਤਦਵੋਚ – ‘ਸਚੇ ਖੋ ਤ੍ਵਂ, ਮਾਰਿਸ, ਏਵਂ ਪਜਾਨਾਸਿ, ਸਚੇ ਤ੍ਵਂ ਏਵਂ ਅਨੁਬੁਦ੍ਧੋ, ਮਾ ਸਾਵਕੇ ਉਪਨੇਸਿ, ਮਾ ਪਬ੍ਬਜਿਤੇ; ਮਾ ਸਾਵਕਾਨਂ ਧਮ੍ਮਂ ਦੇਸੇਸਿ, ਮਾ ਪਬ੍ਬਜਿਤਾਨਂ; ਮਾ ਸਾਵਕੇਸੁ ਗੇਧਿਮਕਾਸਿ, ਮਾ ਪਬ੍ਬਜਿਤੇਸੁ. ਅਹੇਸੁਂ ਖੋ, ਭਿਕ੍ਖੁ, ਤਯਾ ਪੁਬ੍ਬੇ ਸਮਣਬ੍ਰਾਹ੍ਮਣਾ ਲੋਕਸ੍ਮਿਂ ਅਰਹਨ੍ਤੋ ਸਮ੍ਮਾਸਮ੍ਬੁਦ੍ਧਾ ਪਟਿਜਾਨਮਾਨਾ. ਤੇ ਸਾਵਕੇ ਉਪਨੇਸੁਂ ਪਬ੍ਬਜਿਤੇ, ਸਾਵਕਾਨਂ ਧਮ੍ਮਂ ਦੇਸੇਸੁਂ ਪਬ੍ਬਜਿਤਾਨਂ, ਸਾਵਕੇਸੁ ਗੇਧਿਮਕਂਸੁ ਪਬ੍ਬਜਿਤੇਸੁ, ਤੇ ਸਾਵਕੇ ਉਪਨੇਤ੍ਵਾ ਪਬ੍ਬਜਿਤੇ, ਸਾਵਕਾਨਂ ਧਮ੍ਮਂ ਦੇਸੇਤ੍ਵਾ ਪਬ੍ਬਜਿਤਾਨਂ, ਸਾਵਕੇਸੁ ਗੇਧਿਤਚਿਤ੍ਤਾ ਪਬ੍ਬਜਿਤੇਸੁ, ਕਾਯਸ੍ਸ ਭੇਦਾ ਪਾਣੁਪਚ੍ਛੇਦਾ ਹੀਨੇ ਕਾਯੇ ਪਤਿਟ੍ਠਿਤਾ. ਅਹੇਸੁਂ ਯੇ ਪਨ, ਭਿਕ੍ਖੁ, ਤਯਾ ਪੁਬ੍ਬੇ ਸਮਣਬ੍ਰਾਹ੍ਮਣਾ ਲੋਕਸ੍ਮਿਂ ਅਰਹਨ੍ਤੋ ਸਮ੍ਮਾਸਮ੍ਬੁਦ੍ਧਾ ਪਟਿਜਾਨਮਾਨਾ. ਤੇ ਨ ਸਾਵਕੇ ਉਪਨੇਸੁਂ ਨ ਪਬ੍ਬਜਿਤੇ, ਨ ਸਾਵਕਾਨਂ ਧਮ੍ਮਂ ਦੇਸੇਸੁਂ ਨ ਪਬ੍ਬਜਿਤਾਨਂ, ਨ ਸਾਵਕੇਸੁ ਗੇਧਿਮਕਂਸੁ ਨ ਪਬ੍ਬਜਿਤੇਸੁ, ਤੇ ਨ ਸਾਵਕੇ ਉਪਨੇਤ੍ਵਾ ਨ ਪਬ੍ਬਜਿਤੇ, ਨ ਸਾਵਕਾਨਂ ਧਮ੍ਮਂ ਦੇਸੇਤ੍ਵਾ ਨ ਪਬ੍ਬਜਿਤਾਨਂ, ਨ ਸਾਵਕੇਸੁ ਗੇਧਿਤਚਿਤ੍ਤਾ ਨ ਪਬ੍ਬਜਿਤੇਸੁ, ਕਾਯਸ੍ਸ ਭੇਦਾ ਪਾਣੁਪਚ੍ਛੇਦਾ ਪਣੀਤੇ ਕਾਯੇ ਪਤਿਟ੍ਠਿਤਾ. ਤਂ ਤਾਹਂ, ਭਿਕ੍ਖੁ, ਏਵਂ ਵਦਾਮਿ – ਇਙ੍ਘ ਤ੍ਵਂ, ਮਾਰਿਸ, ਅਪ੍ਪੋਸ੍ਸੁਕ੍ਕੋ ਦਿਟ੍ਠਧਮ੍ਮਸੁਖਵਿਹਾਰਮਨੁਯੁਤ੍ਤੋ ਵਿਹਰਸ੍ਸੁ, ਅਨਕ੍ਖਾਤਂ ਕੁਸਲਞ੍ਹਿ, ਮਾਰਿਸ, ਮਾ ਪਰਂ ਓਵਦਾਹੀ’ਤਿ.

‘‘ਏਵਂ ਵੁਤ੍ਤੇ, ਅਹਂ, ਭਿਕ੍ਖਵੇ, ਮਾਰਂ ਪਾਪਿਮਨ੍ਤਂ ਏਤਦਵੋਚਂ – ‘ਜਾਨਾਮਿ ਖੋ ਤਾਹਂ, ਪਾਪਿਮ, ਮਾ ਤ੍ਵਂ ਮਞ੍ਞਿਤ੍ਥੋ – ਨ ਮਂ ਜਾਨਾਤੀ’ਤਿ. ਮਾਰੋ ਤ੍ਵਮਸਿ, ਪਾਪਿਮ. ਨ ਮਂ ਤ੍ਵਂ, ਪਾਪਿਮ, ਹਿਤਾਨੁਕਮ੍ਪੀ ਏਵਂ ਵਦੇਸਿ; ਅਹਿਤਾਨੁਕਮ੍ਪੀ ਮਂ ਤ੍ਵਂ, ਪਾਪਿਮ, ਏਵਂ ਵਦੇਸਿ. ਤੁਯ੍ਹਞ੍ਹਿ, ਪਾਪਿਮ, ਏਵਂ ਹੋਤਿ – ‘ਯੇਸਂ ਸਮਣੋ ਗੋਤਮੋ ਧਮ੍ਮਂ ਦੇਸੇਸ੍ਸਤਿ, ਤੇ ਮੇ ਵਿਸਯਂ ਉਪਾਤਿਵਤ੍ਤਿਸ੍ਸਨ੍ਤੀ’ਤਿ. ਅਸਮ੍ਮਾਸਮ੍ਬੁਦ੍ਧਾਵ ਪਨ ਤੇ, ਪਾਪਿਮ, ਸਮਾਨਾ ਸਮ੍ਮਾਸਮ੍ਬੁਦ੍ਧਾਮ੍ਹਾਤਿ ਪਟਿਜਾਨਿਂਸੁ. ਅਹਂ ਖੋ ਪਨ, ਪਾਪਿਮ, ਸਮ੍ਮਾਸਮ੍ਬੁਦ੍ਧੋਵ ਸਮਾਨੋ ਸਮ੍ਮਾਸਮ੍ਬੁਦ੍ਧੋਮ੍ਹੀਤਿ ਪਟਿਜਾਨਾਮਿ. ਦੇਸੇਨ੍ਤੋਪਿ ਹਿ, ਪਾਪਿਮ, ਤਥਾਗਤੋ ਸਾਵਕਾਨਂ ਧਮ੍ਮਂ ਤਾਦਿਸੋਵ ਅਦੇਸੇਨ੍ਤੋਪਿ ਹਿ, ਪਾਪਿਮ, ਤਥਾਗਤੋ ਸਾਵਕਾਨਂ ਧਮ੍ਮਂ ਤਾਦਿਸੋਵ. ਉਪਨੇਨ੍ਤੋਪਿ ਹਿ, ਪਾਪਿਮ, ਤਥਾਗਤੋ ਸਾਵਕੇ ਤਾਦਿਸੋਵ, ਅਨੁਪਨੇਨ੍ਤੋਪਿ ਹਿ, ਪਾਪਿਮ, ਤਥਾਗਤੋ ਸਾਵਕੇ ਤਾਦਿਸੋਵ. ਤਂ ਕਿਸ੍ਸ ਹੇਤੁ? ਤਥਾਗਤਸ੍ਸ, ਪਾਪਿਮ, ਯੇ ਆਸਵਾ ਸਂਕਿਲੇਸਿਕਾ ਪੋਨੋਬ੍ਭਵਿਕਾ ਸਦਰਾ ਦੁਕ੍ਖਵਿਪਾਕਾ ਆਯਤਿਂ ਜਾਤਿਜਰਾਮਰਣਿਯਾ – ਤੇ ਪਹੀਨਾ ਉਚ੍ਛਿਨ੍ਨਮੂਲਾ ਤਾਲਾਵਤ੍ਥੁਕਤਾ ਅਨਭਾਵਂਕਤਾ ਆਯਤਿਂ ਅਨੁਪ੍ਪਾਦਧਮ੍ਮਾ. ਸੇਯ੍ਯਥਾਪਿ, ਪਾਪਿਮ, ਤਾਲੋ ਮਤ੍ਥਕਚ੍ਛਿਨ੍ਨੋ ਅਭਬ੍ਬੋ ਪੁਨ ਵਿਰੂਲ਼੍ਹਿਯਾ; ਏਵਮੇਵ ਖੋ, ਪਾਪਿਮ, ਤਥਾਗਤਸ੍ਸ ਯੇ ਆਸਵਾ ਸਂਕਿਲੇਸਿਕਾ ਪੋਨੋਬ੍ਭਵਿਕਾ ਸਦਰਾ ਦੁਕ੍ਖਵਿਪਾਕਾ ਆਯਤਿਂ ਜਾਤਿਜਰਾਮਰਣਿਯਾ – ਤੇ ਪਹੀਨਾ ਉਚ੍ਛਿਨ੍ਨਮੂਲਾ ਤਾਲਾਵਤ੍ਥੁਕਤਾ ਅਨਭਾਵਂਕਤਾ ਆਯਤਿਂ ਅਨੁਪ੍ਪਾਦਧਮ੍ਮਾਤਿ.

‘‘ਇਤਿ ਹਿਦਂ ਮਾਰਸ੍ਸ ਚ ਅਨਾਲਪਨਤਾਯ ਬ੍ਰਹ੍ਮੁਨੋ ਚ ਅਭਿਨਿਮਨ੍ਤਨਤਾਯ, ਤਸ੍ਮਾ ਇਮਸ੍ਸ ਵੇਯ੍ਯਾਕਰਣਸ੍ਸ ਬ੍ਰਹ੍ਮਨਿਮਨ੍ਤਨਿਕਂਤੇਵ ਅਧਿਵਚਨ’’ਨ੍ਤਿ.

ਬ੍ਰਹ੍ਮਨਿਮਨ੍ਤਨਿਕਸੁਤ੍ਤਂ ਨਿਟ੍ਠਿਤਂ ਨਵਮਂ.