੧੦. ਮਾਰਤਜ੍ਜਨੀਯਸੁਤ੍ਤਂ
੫੦੬. ਏਵਂ ਮੇ ਸੁਤਂ – ਏਕਂ ਸਮਯਂ ਆਯਸ੍ਮਾ ਮਹਾਮੋਗ੍ਗਲ੍ਲਾਨੋ ਭਗ੍ਗੇਸੁ ਵਿਹਰਤਿ ਸੁਸੁਮਾਰਗਿਰੇ ਭੇਸਕਲ਼ਾਵਨੇ ਮਿਗਦਾਯੇ. ਤੇਨ ਖੋ ਪਨ ਸਮਯੇਨ ਆਯਸ੍ਮਾ ਮਹਾਮੋਗ੍ਗਲ੍ਲਾਨੋ ਅਬ੍ਭੋਕਾਸੇ ਚਙ੍ਕਮਤਿ. ਤੇਨ ਖੋ ਪਨ ਸਮਯੇਨ ਮਾਰੋ ਪਾਪਿਮਾ ਆਯਸ੍ਮਤੋ ਮਹਾਮੋਗ੍ਗਲ੍ਲਾਨਸ੍ਸ ਕੁਚ੍ਛਿਗਤੋ ਹੋਤਿ ਕੋਟ੍ਠਮਨੁਪਵਿਟ੍ਠੋ. ਅਥ ਖੋ ਆਯਸ੍ਮਤੋ ਮਹਾਮੋਗ੍ਗਲ੍ਲਾਨਸ੍ਸ ਏਤਦਹੋਸਿ – ‘‘ਕਿਂ ਨੁ ਖੋ ਮੇ ਕੁਚ੍ਛਿ ਗਰੁਗਰੋ ਵਿਯ [ਗਰੁ ਗਰੁ ਵਿਯ (ਸੀ. ਪੀ. ਟੀਕਾਯਂ ਪਾਠਨ੍ਤਰਂ)]? ਮਾਸਾਚਿਤਂ ਮਞ੍ਞੇ’’ਤਿ. ਅਥ ਖੋ ਆਯਸ੍ਮਾ ਮਹਾਮੋਗ੍ਗਲ੍ਲਾਨੋ ਚਙ੍ਕਮਾ ਓਰੋਹਿਤ੍ਵਾ ਵਿਹਾਰਂ ਪਵਿਸਿਤ੍ਵਾ ਪਞ੍ਞਤ੍ਤੇ ਆਸਨੇ ਨਿਸੀਦਿ. ਨਿਸਜ੍ਜ ਖੋ ਆਯਸ੍ਮਾ ਮਹਾਮੋਗ੍ਗਲ੍ਲਾਨੋ ਪਚ੍ਚਤ੍ਤਂ ਯੋਨਿਸੋ ਮਨਸਾਕਾਸਿ. ਅਦ੍ਦਸਾ ਖੋ ਆਯਸ੍ਮਾ ਮਹਾਮੋਗ੍ਗਲ੍ਲਾਨੋ ਮਾਰਂ ਪਾਪਿਮਨ੍ਤਂ ਕੁਚ੍ਛਿਗਤਂ ਕੋਟ੍ਠਮਨੁਪਵਿਟ੍ਠਂ. ਦਿਸ੍ਵਾਨ ਮਾਰਂ ਪਾਪਿਮਨ੍ਤਂ ਏਤਦਵੋਚ – ‘‘ਨਿਕ੍ਖਮ, ਪਾਪਿਮ; ਨਿਕ੍ਖਮ, ਪਾਪਿਮ! ਮਾ ਤਥਾਗਤਂ ਵਿਹੇਸੇਸਿ, ਮਾ ਤਥਾਗਤਸਾਵਕਂ. ਮਾ ਤੇ ਅਹੋਸਿ ਦੀਘਰਤ੍ਤਂ ਅਹਿਤਾਯ ਦੁਕ੍ਖਾਯਾ’’ਤਿ. ਅਥ ਖੋ ਮਾਰਸ੍ਸ ਪਾਪਿਮਤੋ ਏਤਦਹੋਸਿ – ‘‘ਅਜਾਨਮੇਵ ਖੋ ਮਂ ਅਯਂ ਸਮਣੋ ਅਪਸ੍ਸਂ ਏਵਮਾਹ – ‘ਨਿਕ੍ਖਮ, ਪਾਪਿਮ; ਨਿਕ੍ਖਮ, ਪਾਪਿਮ! ਮਾ ਤਥਾਗਤਂ ਵਿਹੇਸੇਸਿ, ਮਾ ਤਥਾਗਤਸਾਵਕਂ. ਮਾ ਤੇ ਅਹੋਸਿ ਦੀਘਰਤ੍ਤਂ ਅਹਿਤਾਯ ਦੁਕ੍ਖਾਯਾ’ਤਿ. ਯੋਪਿਸ੍ਸ ਸੋ ਸਤ੍ਥਾ ਸੋਪਿ ਮਂ ਨੇਵ ਖਿਪ੍ਪਂ ਜਾਨੇਯ੍ਯ, ਕੁਤੋ ਪਨ [ਕੁਤੋ ਚ ਪਨ (ਸ੍ਯਾ.)] ਮਂ ਅਯਂ ਸਾਵਕੋ ਜਾਨਿਸ੍ਸਤੀ’’ਤਿ? ਅਥ ਖੋ ਆਯਸ੍ਮਾ ਮਹਾਮੋਗ੍ਗਲ੍ਲਾਨੋ ਮਾਰਂ ਪਾਪਿਮਨ੍ਤਂ ਏਤਦਵੋਚ – ‘‘ਏਵਮ੍ਪਿ ਖੋ ਤਾਹਂ, ਪਾਪਿਮ, ਜਾਨਾਮਿ, ਮਾ ਤ੍ਵਂ ਮਞ੍ਞਿਤ੍ਥੋ – ‘ਨ ਮਂ ਜਾਨਾਤੀ’ਤਿ. ਮਾਰੋ ਤ੍ਵਮਸਿ, ਪਾਪਿਮ; ਤੁਯ੍ਹਞ੍ਹਿ, ਪਾਪਿਮ, ਏਵਂ ਹੋਤਿ – ‘ਅਜਾਨਮੇਵ ਖੋ ਮਂ ਅਯਂ ਸਮਣੋ ਅਪਸ੍ਸਂ ਏਵਮਾਹ – ਨਿਕ੍ਖਮ, ਪਾਪਿਮ; ਨਿਕ੍ਖਮ, ਪਾਪਿਮ! ਮਾ ਤਥਾਗਤਂ ਵਿਹੇਸੇਸਿ, ਮਾ ਤਥਾਗਤਸਾਵਕਂ. ਮਾ ਤੇ ਅਹੋਸਿ ਦੀਘਰਤ੍ਤਂ ਅਹਿਤਾਯ ਦੁਕ੍ਖਾਯਾਤਿ. ਯੋਪਿਸ੍ਸ ਸੋ ਸਤ੍ਥਾ ਸੋਪਿ ਮਂ ਨੇਵ ਖਿਪ੍ਪਂ ਜਾਨੇਯ੍ਯ, ਕੁਤੋ ਪਨ ਮਂ ਅਯਂ ਸਾਵਕੋ ਜਾਨਿਸ੍ਸਤੀ’’’ਤਿ?
ਅਥ ਖੋ ਮਾਰਸ੍ਸ ਪਾਪਿਮਤੋ ਏਤਦਹੋਸਿ – ‘‘ਜਾਨਮੇ ਖੋ ਮਂ ਅਯਂ ਸਮਣੋ ਪਸ੍ਸਂ ਏਵਮਾਹ – ‘ਨਿਕ੍ਖਮ, ਪਾਪਿਮ; ਨਿਕ੍ਖਮ, ਪਾਪਿਮ! ਮਾ ਤਥਾਗਤਂ ਵਿਹੇਸੇਸਿ, ਮਾ ਤਥਾਗਤਸਾਵਕਂ. ਮਾ ਤੇ ਅਹੋਸਿ ਦੀਘਰਤ੍ਤਂ ਅਹਿਤਾਯ ਦੁਕ੍ਖਾਯਾ’’’ਤਿ. ਅਥ ਖੋ ਮਾਰੋ ਪਾਪਿਮਾ ਆਯਸ੍ਮਤੋ ਮਹਾਮੋਗ੍ਗਲ੍ਲਾਨਸ੍ਸ ਮੁਖਤੋ ਉਗ੍ਗਨ੍ਤ੍ਵਾ ਪਚ੍ਚਗ੍ਗਲ਼ੇ ਅਟ੍ਠਾਸਿ.
੫੦੭. ਅਦ੍ਦਸਾ ਖੋ ਆਯਸ੍ਮਾ ਮਹਾਮੋਗ੍ਗਲ੍ਲਾਨੋ ਮਾਰਂ ਪਾਪਿਮਨ੍ਤਂ ਪਚ੍ਚਗ੍ਗਲ਼ੇ ਠਿਤਂ; ਦਿਸ੍ਵਾਨ ਮਾਰਂ ਪਾਪਿਮਨ੍ਤਂ ਏਤਦਵੋਚ – ‘ਏਤ੍ਥਾਪਿ ਖੋ ਤਾਹਂ, ਪਾਪਿਮ, ਪਸ੍ਸਾਮਿ; ਮਾ ਤ੍ਵਂ ਮਞ੍ਞਿਤ੍ਥੋ ‘‘ਨ ਮਂ ਪਸ੍ਸਤੀ’’ਤਿ. ਏਸੋ ਤ੍ਵਂ, ਪਾਪਿਮ, ਪਚ੍ਚਗ੍ਗਲ਼ੇ ਠਿਤੋ. ਭੂਤਪੁਬ੍ਬਾਹਂ, ਪਾਪਿਮ, ਦੂਸੀ ਨਾਮ ਮਾਰੋ ਅਹੋਸਿਂ, ਤਸ੍ਸ ਮੇ ਕਾਲ਼ੀ ਨਾਮ ਭਗਿਨੀ. ਤਸ੍ਸਾ ਤ੍ਵਂ ਪੁਤ੍ਤੋ. ਸੋ ਮੇ ਤ੍ਵਂ ਭਾਗਿਨੇਯ੍ਯੋ ਅਹੋਸਿ. ਤੇਨ ਖੋ ਪਨ, ਪਾਪਿਮ, ਸਮਯੇਨ ਕਕੁਸਨ੍ਧੋ ਭਗਵਾ ਅਰਹਂ ਸਮ੍ਮਾਸਮ੍ਬੁਦ੍ਧੋ ਲੋਕੇ ਉਪ੍ਪਨ੍ਨੋ ਹੋਤਿ. ਕਕੁਸਨ੍ਧਸ੍ਸ ਖੋ ਪਨ, ਪਾਪਿਮ, ਭਗਵਤੋ ਅਰਹਤੋ ਸਮ੍ਮਾਸਮ੍ਬੁਦ੍ਧਸ੍ਸ ਵਿਧੁਰਸਞ੍ਜੀਵਂ ਨਾਮ ਸਾਵਕਯੁਗਂ ਅਹੋਸਿ ਅਗ੍ਗਂ ਭਦ੍ਦਯੁਗਂ. ਯਾਵਤਾ ਖੋ ਪਨ, ਪਾਪਿਮ, ਕਕੁਸਨ੍ਧਸ੍ਸ ਭਗਵਤੋ ਅਰਹਤੋ ਸਮ੍ਮਾਸਮ੍ਬੁਦ੍ਧਸ੍ਸ ਸਾਵਕਾ. ਤੇਸੁ ਨ ਚ ਕੋਚਿ ਆਯਸ੍ਮਤਾ ਵਿਧੁਰੇਨ ਸਮਸਮੋ ਹੋਤਿ ਯਦਿਦਂ ਧਮ੍ਮਦੇਸਨਾਯ. ਇਮਿਨਾ ਖੋ ਏਵਂ [ਏਤਂ (ਸੀ. ਸ੍ਯਾ. ਪੀ.)], ਪਾਪਿਮ, ਪਰਿਯਾਯੇਨ ਆਯਸ੍ਮਤੋ ਵਿਧੁਰਸ੍ਸ ਵਿਧੁਰੋਤੇਵ [ਵਿਧੁਰਸ੍ਸ ਵਿਧੁਰੋ ਵਿਧੁਰੋਤ੍ਵੇਵ (ਸੀ. ਸ੍ਯਾ. ਕਂ. ਪੀ.)] ਸਮਞ੍ਞਾ ਉਦਪਾਦਿ.
‘‘ਆਯਸ੍ਮਾ ਪਨ, ਪਾਪਿਮ, ਸਞ੍ਜੀਵੋ ਅਰਞ੍ਞਗਤੋਪਿ ਰੁਕ੍ਖਮੂਲਗਤੋਪਿ ਸੁਞ੍ਞਾਗਾਰਗਤੋਪਿ ਅਪ੍ਪਕਸਿਰੇਨੇਵ ਸਞ੍ਞਾਵੇਦਯਿਤਨਿਰੋਧਂ ਸਮਾਪਜ੍ਜਤਿ. ਭੂਤਪੁਬ੍ਬਂ, ਪਾਪਿਮ, ਆਯਸ੍ਮਾ ਸਞ੍ਜੀਵੋ ਅਞ੍ਞਤਰਸ੍ਮਿਂ ਰੁਕ੍ਖਮੂਲੇ ਸਞ੍ਞਾਵੇਦਯਿਤਨਿਰੋਧਂ ਸਮਾਪਨ੍ਨੋ ਨਿਸਿਨ੍ਨੋ ਹੋਤਿ. ਅਦ੍ਦਸਂਸੁ ਖੋ, ਪਾਪਿਮ, ਗੋਪਾਲਕਾ ਪਸੁਪਾਲਕਾ ਕਸ੍ਸਕਾ ਪਥਾਵਿਨੋ ਆਯਸ੍ਮਨ੍ਤਂ ਸਞ੍ਜੀਵਂ ਅਞ੍ਞਤਰਸ੍ਮਿਂ ਰੁਕ੍ਖਮੂਲੇ ਸਞ੍ਞਾਵੇਦਯਿਤਨਿਰੋਧਂ ਸਮਾਪਨ੍ਨਂ ਨਿਸਿਨ੍ਨਂ; ਦਿਸ੍ਵਾਨ ਤੇਸਂ ਏਤਦਹੋਸਿ – ‘ਅਚ੍ਛਰਿਯਂ ਵਤ, ਭੋ, ਅਬ੍ਭੁਤਂ ਵਤ, ਭੋ! ਅਯਂ ਸਮਣੋ ਨਿਸਿਨ੍ਨਕੋਵ ਕਾਲਙ੍ਕਤੋ! ਹਨ੍ਦ ਨਂ ਦਹਾਮਾ’ਤਿ. ਅਥ ਖੋ ਤੇ, ਪਾਪਿਮ, ਗੋਪਾਲਕਾ ਪਸੁਪਾਲਕਾ ਕਸ੍ਸਕਾ ਪਥਾਵਿਨੋ ਤਿਣਞ੍ਚ ਕਟ੍ਠਞ੍ਚ ਗੋਮਯਞ੍ਚ ਸਂਕਡ੍ਢਿਤ੍ਵਾ ਆਯਸ੍ਮਤੋ ਸਞ੍ਜੀਵਸ੍ਸ ਕਾਯੇ ਉਪਚਿਨਿਤ੍ਵਾ ਅਗ੍ਗਿਂ ਦਤ੍ਵਾ ਪਕ੍ਕਮਿਂਸੁ. ਅਥ ਖੋ, ਪਾਪਿਮ, ਆਯਸ੍ਮਾ ਸਞ੍ਜੀਵੋ ਤਸ੍ਸਾ ਰਤ੍ਤਿਯਾ ਅਚ੍ਚਯੇਨ ਤਾਯ ਸਮਾਪਤ੍ਤਿਯਾ ਵੁਟ੍ਠਹਿਤ੍ਵਾ ਚੀਵਰਾਨਿ ਪਪ੍ਫੋਟੇਤ੍ਵਾ ਪੁਬ੍ਬਣ੍ਹਸਮਯਂ ਨਿਵਾਸੇਤ੍ਵਾ ਪਤ੍ਤਚੀਵਰਮਾਦਾਯ ਗਾਮਂ ਪਿਣ੍ਡਾਯ ਪਾਵਿਸਿ. ਅਦ੍ਦਸਂਸੁ ਖੋ ਤੇ, ਪਾਪਿਮ, ਗੋਪਾਲਕਾ ਪਸੁਪਾਲਕਾ ਕਸ੍ਸਕਾ ਪਥਾਵਿਨੋ ਆਯਸ੍ਮਨ੍ਤਂ ਸਞ੍ਜੀਵਂ ਪਿਣ੍ਡਾਯ ਚਰਨ੍ਤਂ; ਦਿਸ੍ਵਾਨ ਨੇਸਂ ਏਤਦਹੋਸਿ – ‘ਅਚ੍ਛਰਿਯਂ ਵਤ, ਭੋ, ਅਬ੍ਭੁਤਂ ਵਤ, ਭੋ! ਅਯਂ ਸਮਣੋ ਨਿਸਿਨ੍ਨਕੋਵ ਕਾਲਙ੍ਕਤੋ, ਸ੍ਵਾਯਂ ਪਟਿਸਞ੍ਜੀਵਿਤੋ’ਤਿ. ਇਮਿਨਾ ਖੋ ਏਵਂ, ਪਾਪਿਮ, ਪਰਿਯਾਯੇਨ ਆਯਸ੍ਮਤੋ ਸਞ੍ਜੀਵਸ੍ਸ ਸਞ੍ਜੀਵੋਤੇਵ [ਸਞ੍ਜੀਵੋ ਸਞ੍ਜੀਵੋਤ੍ਵੇਵ (ਸੀ. ਸ੍ਯਾ. ਕਂ. ਪੀ.)] ਸਮਞ੍ਞਾ ਉਦਪਾਦਿ.
੫੦੮. ‘‘ਅਥ ਖੋ, ਪਾਪਿਮ, ਦੂਸਿਸ੍ਸ ਮਾਰਸ੍ਸ ਏਤਦਹੋਸਿ – ‘ਇਮੇਸਂ ਖੋ ਅਹਂ ਭਿਕ੍ਖੂਨਂ ਸੀਲਵਨ੍ਤਾਨਂ ਕਲ੍ਯਾਣਧਮ੍ਮਾਨਂ ਨੇਵ ਜਾਨਾਮਿ ਆਗਤਿਂ ਵਾ ਗਤਿਂ ਵਾ. ਯਂਨੂਨਾਹਂ ਬ੍ਰਾਹ੍ਮਣਗਹਪਤਿਕੇ ਅਨ੍ਵਾਵਿਸੇਯ੍ਯਂ – ਏਥ, ਤੁਮ੍ਹੇ ਭਿਕ੍ਖੂ ਸੀਲਵਨ੍ਤੇ ਕਲ੍ਯਾਣਧਮ੍ਮੇ ਅਕ੍ਕੋਸਥ ਪਰਿਭਾਸਥ ਰੋਸੇਥ ਵਿਹੇਸੇਥ. ਅਪ੍ਪੇਵ ਨਾਮ ਤੁਮ੍ਹੇਹਿ ਅਕ੍ਕੋਸਿਯਮਾਨਾਨਂ ਪਰਿਭਾਸਿਯਮਾਨਾਨਂ ਰੋਸਿਯਮਾਨਾਨਂ ਵਿਹੇਸਿਯਮਾਨਾਨਂ ਸਿਯਾ ਚਿਤ੍ਤਸ੍ਸ ਅਞ੍ਞਥਤ੍ਤਂ, ਯਥਾ ਤਂ ਦੂਸੀ ਮਾਰੋ ਲਭੇਥ ਓਤਾਰ’ਨ੍ਤਿ. ਅਥ ਖੋ ਤੇ, ਪਾਪਿਮ, ਦੂਸੀ ਮਾਰੋ ਬ੍ਰਾਹ੍ਮਣਗਹਪਤਿਕੇ ਅਨ੍ਵਾਵਿਸਿ – ‘ਏਥ, ਤੁਮ੍ਹੇ ਭਿਕ੍ਖੂ ਸੀਲਵਨ੍ਤੇ ਕਲ੍ਯਾਣਧਮ੍ਮੇ ਅਕ੍ਕੋਸਥ ਪਰਿਭਾਸਥ ਰੋਸੇਥ ਵਿਹੇਸੇਥ. ਅਪ੍ਪੇਵ ਨਾਮ ਤੁਮ੍ਹੇਹਿ ਅਕ੍ਕੋਸਿਯਮਾਨਾਨਂ ਪਰਿਭਾਸਿਯਮਾਨਾਨਂ ਰੋਸਿਯਮਾਨਾਨਂ ਵਿਹੇਸਿਯਮਾਨਾਨਂ ਸਿਯਾ ਚਿਤ੍ਤਸ੍ਸ ਅਞ੍ਞਥਤ੍ਤਂ, ਯਥਾ ਤਂ ਦੂਸੀ ਮਾਰੋ ਲਭੇਥ ਓਤਾਰ’ਨ੍ਤਿ.
‘‘ਅਥ ਖੋ ਤੇ, ਪਾਪਿਮ, ਬ੍ਰਾਹ੍ਮਣਗਹਪਤਿਕਾ ਅਨ੍ਵਾਵਿਸਿਟ੍ਠਾ ਦੂਸਿਨਾ ਮਾਰੇਨ ਭਿਕ੍ਖੂ ਸੀਲਵਨ੍ਤੇ ਕਲ੍ਯਾਣਧਮ੍ਮੇ ਅਕ੍ਕੋਸਨ੍ਤਿ ਪਰਿਭਾਸਨ੍ਤਿ ਰੋਸੇਨ੍ਤਿ ਵਿਹੇਸੇਨ੍ਤਿ – ‘ਇਮੇ ਪਨ ਮੁਣ੍ਡਕਾ ਸਮਣਕਾ ਇਬ੍ਭਾ ਕਿਣ੍ਹਾ [ਕਣ੍ਹਾ (ਸ੍ਯਾ. ਕਂ. ਕ.)] ਬਨ੍ਧੁਪਾਦਾਪਚ੍ਚਾ ‘‘ਝਾਯਿਨੋਸ੍ਮਾ ਝਾਯਿਨੋਸ੍ਮਾ’’ਤਿ ਪਤ੍ਤਕ੍ਖਨ੍ਧਾ ਅਧੋਮੁਖਾ ਮਧੁਰਕਜਾਤਾ ਝਾਯਨ੍ਤਿ ਪਜ੍ਝਾਯਨ੍ਤਿ ਨਿਜ੍ਝਾਯਨ੍ਤਿ ਅਪਜ੍ਝਾਯਨ੍ਤਿ. ਸੇਯ੍ਯਥਾਪਿ ਨਾਮ ਉਲੂਕੋ ਰੁਕ੍ਖਸਾਖਾਯਂ ਮੂਸਿਕਂ ਮਗ੍ਗਯਮਾਨੋ ਝਾਯਤਿ ਪਜ੍ਝਾਯਤਿ ਨਿਜ੍ਝਾਯਤਿ ਅਪਜ੍ਝਾਯਤਿ; ਏਵਮੇਵਿਮੇ ਮੁਣ੍ਡਕਾ ਸਮਣਕਾ ਇਬ੍ਭਾ ਕਿਣ੍ਹਾ ਬਨ੍ਧੁਪਾਦਾਪਚ੍ਚਾ ‘‘ਝਾਯਿਨੋਸ੍ਮਾ ਝਾਯਿਨੋਸ੍ਮਾ’’ਤਿ ਪਤ੍ਤਕ੍ਖਨ੍ਧਾ ਅਧੋਮੁਖਾ ਮਧੁਰਕਜਾਤਾ ਝਾਯਨ੍ਤਿ ਪਜ੍ਝਾਯਨ੍ਤਿ ਨਿਜ੍ਝਾਯਨ੍ਤਿ ਅਪਜ੍ਝਾਯਨ੍ਤਿ. ਸੇਯ੍ਯਥਾਪਿ ਨਾਮ ਕੋਤ੍ਥੁ ਨਦੀਤੀਰੇ ਮਚ੍ਛੇ ਮਗ੍ਗਯਮਾਨੋ ਝਾਯਤਿ ਪਜ੍ਝਾਯਤਿ ਨਿਜ੍ਝਾਯਤਿ ਅਪਜ੍ਝਾਯਤਿ; ਏਵਮੇਵਿਮੇ ਮੁਣ੍ਡਕਾ ਸਮਣਕਾ ਇਬ੍ਭਾ ਕਿਣ੍ਹਾ ਬਨ੍ਧੁਪਾਦਾਪਚ੍ਚਾ ‘‘ਝਾਯਿਨੋਸ੍ਮਾ ਝਾਯਿਨੋਸ੍ਮਾ’’ਤਿ ਪਤ੍ਤਕ੍ਖਨ੍ਧਾ ਅਧੋਮੁਖਾ ਮਧੁਰਕਜਾਤਾ ਝਾਯਨ੍ਤਿ ਪਜ੍ਝਾਯਨ੍ਤਿ ਨਿਜ੍ਝਾਯਨ੍ਤਿ ਅਪਜ੍ਝਾਯਨ੍ਤਿ. ਸੇਯ੍ਯਥਾਪਿ ਨਾਮ ਬਿਲ਼ਾਰੋ ਸਨ੍ਧਿਸਮਲਸਙ੍ਕਟੀਰੇ ਮੂਸਿਕਂ ਮਗ੍ਗਯਮਾਨੋ ਝਾਯਤਿ ਪਜ੍ਝਾਯਤਿ ਨਿਜ੍ਝਾਯਤਿ ਅਪਜ੍ਝਾਯਤਿ; ਏਵਮੇਵਿਮੇ ਮੁਣ੍ਡਕਾ ਸਮਣਕਾ ਇਬ੍ਭਾ ਕਿਣ੍ਹਾ ਬਨ੍ਧੁਪਾਦਾਪਚ੍ਚਾ ‘‘ਝਾਯਿਨੋਸ੍ਮਾ ਝਾਯਿਨੋਸ੍ਮਾ’’ਤਿ ਪਤ੍ਤਕ੍ਖਨ੍ਧਾ ਅਧੋਮੁਖਾ ਮਧੁਰਕਜਾਤਾ ਝਾਯਨ੍ਤਿ ਪਜ੍ਝਾਯਨ੍ਤਿ ਨਿਜ੍ਝਾਯਨ੍ਤਿ ਅਪਜ੍ਝਾਯਨ੍ਤਿ. ਸੇਯ੍ਯਥਾਪਿ ਨਾਮ ਗਦ੍ਰਭੋ ਵਹਚ੍ਛਿਨ੍ਨੋ ਸਨ੍ਧਿਸਮਲਸਙ੍ਕਟੀਰੇ ਝਾਯਤਿ ਪਜ੍ਝਾਯਤਿ ਨਿਜ੍ਝਾਯਤਿ ਅਪਜ੍ਝਾਯਤਿ, ਏਵਮੇਵਿਮੇ ਮੁਣ੍ਡਕਾ ਸਮਣਕਾ ਇਬ੍ਭਾ ਕਿਣ੍ਹਾ ਬਨ੍ਧੁਪਾਦਾਪਚ੍ਚਾ ‘‘ਝਾਯਿਨੋਸ੍ਮਾ ਝਾਯਿਨੋਸ੍ਮਾ’’ਤਿ ਪਤ੍ਤਕ੍ਖਨ੍ਧਾ ਅਧੋਮੁਖਾ ਮਧੁਰਕਜਾਤਾ ਝਾਯਨ੍ਤਿ ਪਜ੍ਝਾਯਨ੍ਤਿ ਨਿਜ੍ਝਾਯਨ੍ਤਿ ਅਪਜ੍ਝਾਯਨ੍ਤੀ’’ਤਿ.
‘‘ਯੇ ਖੋ ਪਨ, ਪਾਪਿਮ, ਤੇਨ ਸਮਯੇਨ ਮਨੁਸ੍ਸਾ ਕਾਲਙ੍ਕਰੋਨ੍ਤਿ ਯੇਭੁਯ੍ਯੇਨ ਕਾਯਸ੍ਸ ਭੇਦਾ ਪਰਂ ਮਰਣਾ ਅਪਾਯਂ ਦੁਗ੍ਗਤਿਂ ਵਿਨਿਪਾਤਂ ਨਿਰਯਂ ਉਪਪਜ੍ਜਨ੍ਤਿ.
੫੦੯. ‘‘ਅਥ ਖੋ, ਪਾਪਿਮ, ਕਕੁਸਨ੍ਧੋ ਭਗਵਾ ਅਰਹਂ ਸਮ੍ਮਾਸਮ੍ਬੁਦ੍ਧੋ ਭਿਕ੍ਖੂ ਆਮਨ੍ਤੇਸਿ – ‘ਅਨ੍ਵਾਵਿਟ੍ਠਾ ਖੋ, ਭਿਕ੍ਖਵੇ, ਬ੍ਰਾਹ੍ਮਣਗਹਪਤਿਕਾ ਦੂਸਿਨਾ ਮਾਰੇਨ – ਏਥ, ਤੁਮ੍ਹੇ ਭਿਕ੍ਖੂ ਸੀਲਵਨ੍ਤੇ ਕਲ੍ਯਾਣਧਮ੍ਮੇ ਅਕ੍ਕੋਸਥ ਪਰਿਭਾਸਥ ਰੋਸੇਥ ਵਿਹੇਸੇਥ, ਅਪ੍ਪੇਵ ਨਾਮ ਤੁਮ੍ਹੇਹਿ ਅਕ੍ਕੋਸਿਯਮਾਨਾਨਂ ਪਰਿਭਾਸਿਯਮਾਨਾਨਂ ਰੋਸਿਯਮਾਨਾਨਂ ਵਿਹੇਸਿਯਮਾਨਾਨਂ ਸਿਯਾ ਚਿਤ੍ਤਸ੍ਸ ਅਞ੍ਞਥਤ੍ਤਂ, ਯਥਾ ਤਂ ਦੂਸੀ ਮਾਰੋ ਲਭੇਥ ਓਤਾਰ’ਨ੍ਤਿ. ਏਥ, ਤੁਮ੍ਹੇ, ਭਿਕ੍ਖਵੇ, ਮੇਤ੍ਤਾਸਹਗਤੇਨ ਚੇਤਸਾ ਏਕਂ ਦਿਸਂ ਫਰਿਤ੍ਵਾ ਵਿਹਰਥ, ਤਥਾ ਦੁਤਿਯਂ, ਤਥਾ ਤਤਿਯਂ, ਤਥਾ ਚਤੁਤ੍ਥਂ. ਇਤਿ ਉਦ੍ਧਮਧੋ ਤਿਰਿਯਂ ਸਬ੍ਬਧਿ ਸਬ੍ਬਤ੍ਤਤਾਯ ਸਬ੍ਬਾਵਨ੍ਤਂ ਲੋਕਂ ਮੇਤ੍ਤਾਸਹਗਤੇਨ ਚੇਤਸਾ ਵਿਪੁਲੇਨ ਮਹਗ੍ਗਤੇਨ ਅਪ੍ਪਮਾਣੇਨ ਅਵੇਰੇਨ ਅਬ੍ਯਾਬਜ੍ਝੇਨ ਫਰਿਤ੍ਵਾ ਵਿਹਰਥ. ਕਰੁਣਾਸਹਗਤੇਨ ਚੇਤਸਾ…ਪੇ… ਮੁਦਿਤਾਸਹਗਤੇਨ ਚੇਤਸਾ…ਪੇ… ਉਪੇਕ੍ਖਾਸਹਗਤੇਨ ਚੇਤਸਾ ਏਕਂ ਦਿਸਂ ਫਰਿਤ੍ਵਾ ਵਿਹਰਥ, ਤਥਾ ਦੁਤਿਯਂ, ਤਥਾ ਤਤਿਯਂ, ਤਥਾ ਚਤੁਤ੍ਥਂ. ਇਤਿ ਉਦ੍ਧਮਧੋ ਤਿਰਿਯਂ ਸਬ੍ਬਧਿ ਸਬ੍ਬਤ੍ਤਤਾਯ ਸਬ੍ਬਾਵਨ੍ਤਂ ਲੋਕਂ ਉਪੇਕ੍ਖਾਸਹਗਤੇਨ ਚੇਤਸਾ ਵਿਪੁਲੇਨ ਮਹਗ੍ਗਤੇਨ ਅਪ੍ਪਮਾਣੇਨ ਅਵੇਰੇਨ ਅਬ੍ਯਾਬਜ੍ਝੇਨ ਫਰਿਤ੍ਵਾ ਵਿਹਰਥਾ’ਤਿ.
‘‘ਅਥ ਖੋ ਤੇ, ਪਾਪਿਮ, ਭਿਕ੍ਖੂ ਕਕੁਸਨ੍ਧੇਨ ਭਗਵਤਾ ਅਰਹਤਾ ਸਮ੍ਮਾਸਮ੍ਬੁਦ੍ਧੇਨ ਏਵਂ ਓਵਦਿਯਮਾਨਾ ਏਵਂ ਅਨੁਸਾਸਿਯਮਾਨਾ ਅਰਞ੍ਞਗਤਾਪਿ ਰੁਕ੍ਖਮੂਲਗਤਾਪਿ ਸੁਞ੍ਞਾਗਾਰਗਤਾਪਿ ਮੇਤ੍ਤਾਸਹਗਤੇਨ ਚੇਤਸਾ ਏਕਂ ਦਿਸਂ ਫਰਿਤ੍ਵਾ ਵਿਹਰਿਂਸੁ, ਤਥਾ ਦੁਤਿਯਂ, ਤਥਾ ਤਤਿਯਂ, ਤਥਾ ਚਤੁਤ੍ਥਂ. ਇਤਿ ਉਦ੍ਧਮਧੋ ਤਿਰਿਯਂ ਸਬ੍ਬਧਿ ਸਬ੍ਬਤ੍ਤਤਾਯ ਸਬ੍ਬਾਵਨ੍ਤਂ ਲੋਕਂ ਮੇਤ੍ਤਾਸਹਗਤੇਨ ਚੇਤਸਾ ਵਿਪੁਲੇਨ ਮਹਗ੍ਗਤੇਨ ਅਪ੍ਪਮਾਣੇਨ ਅਵੇਰੇਨ ਅਬ੍ਯਾਬਜ੍ਝੇਨ ਫਰਿਤ੍ਵਾ ਵਿਹਰਿਂਸੁ. ਕਰੁਣਾਸਹਗਤੇਨ ਚੇਤਸਾ…ਪੇ… ਮੁਦਿਤਾਸਹਗਤੇਨ ਚੇਤਸਾ…ਪੇ… ਉਪੇਕ੍ਖਾਸਹਗਤੇਨ ਚੇਤਸਾ ਏਕਂ ਦਿਸਂ ਫਰਿਤ੍ਵਾ ਵਿਹਰਿਂਸੁ, ਤਥਾ ਦੁਤਿਯਂ, ਤਥਾ ਤਤਿਯਂ, ਤਥਾ ਚਤੁਤ੍ਥਂ. ਇਤਿ ਉਦ੍ਧਮਧੋ ਤਿਰਿਯਂ ਸਬ੍ਬਧਿ ਸਬ੍ਬਤ੍ਤਤਾਯ ਸਬ੍ਬਾਵਨ੍ਤਂ ਲੋਕਂ ਉਪੇਕ੍ਖਾਸਹਗਤੇਨ ਚੇਤਸਾ ਵਿਪੁਲੇਨ ਮਹਗ੍ਗਤੇਨ ਅਪ੍ਪਮਾਣੇਨ ਅਵੇਰੇਨ ਅਬ੍ਯਾਬਜ੍ਝੇਨ ਫਰਿਤ੍ਵਾ ਵਿਹਰਿਂਸੁ.
੫੧੦. ‘‘ਅਥ ਖੋ, ਪਾਪਿਮ, ਦੂਸਿਸ੍ਸ ਮਾਰਸ੍ਸ ਏਤਦਹੋਸਿ – ‘ਏਵਮ੍ਪਿ ਖੋ ਅਹਂ ਕਰੋਨ੍ਤੋ ਇਮੇਸਂ ਭਿਕ੍ਖੂਨਂ ਸੀਲਵਨ੍ਤਾਨਂ ਕਲ੍ਯਾਣਧਮ੍ਮਾਨਂ ਨੇਵ ਜਾਨਾਮਿ ਆਗਤਿਂ ਵਾ ਗਤਿਂ ਵਾ, ਯਂਨੂਨਾਹਂ ਬ੍ਰਾਹ੍ਮਣਗਹਪਤਿਕੇ ਅਨ੍ਵਾਵਿਸੇਯ੍ਯਂ – ਏਥ, ਤੁਮ੍ਹੇ ਭਿਕ੍ਖੂ ਸੀਲਵਨ੍ਤੇ ਕਲ੍ਯਾਣਧਮ੍ਮੇ ਸਕ੍ਕਰੋਥ ਗਰੁਂ ਕਰੋਥ ਮਾਨੇਥ ਪੂਜੇਥ, ਅਪ੍ਪੇਵ ਨਾਮ ਤੁਮ੍ਹੇਹਿ ਸਕ੍ਕਰਿਯਮਾਨਾਨਂ ਗਰੁਕਰਿਯਮਾਨਾਨਂ ਮਾਨਿਯਮਾਨਾਨਂ ਪੂਜਿਯਮਾਨਾਨਂ ਸਿਯਾ ਚਿਤ੍ਤਸ੍ਸ ਅਞ੍ਞਥਤ੍ਤਂ, ਯਥਾ ਤਂ ਦੂਸੀ ਮਾਰੋ ਲਭੇਥ ਓਤਾਰ’ਨ੍ਤਿ. ਅਥ ਖੋ ਤੇ, ਪਾਪਿਮ, ਦੂਸੀ ਮਾਰੋ ਬ੍ਰਾਹ੍ਮਣਗਹਪਤਿਕੇ ਅਨ੍ਵਾਵਿਸਿ – ‘ਏਥ, ਤੁਮ੍ਹੇ ਭਿਕ੍ਖੂ ਸੀਲਵਨ੍ਤੇ ਕਲ੍ਯਾਣਧਮ੍ਮੇ ਸਕ੍ਕਰੋਥ ਗਰੁਂ ਕਰੋਥ ਮਾਨੇਥ ਪੂਜੇਥ, ਅਪ੍ਪੇਵ ਨਾਮ ਤੁਮ੍ਹੇਹਿ ਸਕ੍ਕਰਿਯਮਾਨਾਨਂ ਗਰੁਕਰਿਯਮਾਨਾਨਂ ਮਾਨਿਯਮਾਨਾਨਂ ਪੂਜਿਯਮਾਨਾਨਂ ਸਿਯਾ ਚਿਤ੍ਤਸ੍ਸ ਅਞ੍ਞਥਤ੍ਤਂ, ਯਥਾ ਤਂ ਦੂਸੀ ਮਾਰੋ ਲਭੇਥ ਓਤਾਰ’ਨ੍ਤਿ. ਅਥ ਖੋ ਤੇ, ਪਾਪਿਮ, ਬ੍ਰਾਹ੍ਮਣਗਹਪਤਿਕਾ ਅਨ੍ਵਾਵਿਟ੍ਠਾ ਦੂਸਿਨਾ ਮਾਰੇਨ ਭਿਕ੍ਖੂ ਸੀਲਵਨ੍ਤੇ ਕਲ੍ਯਾਣਧਮ੍ਮੇ ਸਕ੍ਕਰੋਨ੍ਤਿ ਗਰੁਂ ਕਰੋਨ੍ਤਿ ਮਾਨੇਨ੍ਤਿ ਪੂਜੇਨ੍ਤਿ.
‘‘ਯੇ ਖੋ ਪਨ, ਪਾਪਿਮ, ਤੇਨ ਸਮਯੇਨ ਮਨੁਸ੍ਸਾ ਕਾਲਙ੍ਕਰੋਨ੍ਤਿ ਯੇਭੁਯ੍ਯੇਨ ਕਾਯਸ੍ਸ ਭੇਦਾ ਪਰਂ ਮਰਣਾ ਸੁਗਤਿਂ ਸਗ੍ਗਂ ਲੋਕਂ ਉਪਪਜ੍ਜਨ੍ਤਿ.
੫੧੧. ‘‘ਅਥ ਖੋ, ਪਾਪਿਮ, ਕਕੁਸਨ੍ਧੋ ਭਗਵਾ ਅਰਹਂ ਸਮ੍ਮਾਸਮ੍ਬੁਦ੍ਧੋ ਭਿਕ੍ਖੂ ਆਮਨ੍ਤੇਸਿ – ‘ਅਨ੍ਵਾਵਿਟ੍ਠਾ ਖੋ, ਭਿਕ੍ਖਵੇ, ਬ੍ਰਾਹ੍ਮਣਗਹਪਤਿਕਾ ਦੂਸਿਨਾ ਮਾਰੇਨ – ਏਥ, ਤੁਮ੍ਹੇ ਭਿਕ੍ਖੂ ਸੀਲਵਨ੍ਤੇ ਕਲ੍ਯਾਣਧਮ੍ਮੇ ਸਕ੍ਕਰੋਥ ਗਰੁਂ ਕਰੋਥ ਮਾਨੇਥ ਪੂਜੇਥ, ਅਪ੍ਪੇਵ ਨਾਮ ਤੁਮ੍ਹੇਹਿ ਸਕ੍ਕਰਿਯਮਾਨਾਨਂ ਗਰੁਕਰਿਯਮਾਨਾਨਂ ਮਾਨਿਯਮਾਨਾਨਂ ਪੂਜਿਯਮਾਨਾਨਂ ਸਿਯਾ ਚਿਤ੍ਤਸ੍ਸ ਅਞ੍ਞਥਤ੍ਤਂ, ਯਥਾ ਤਂ ਦੂਸੀ ਮਾਰੋ ਲਭੇਥ ਓਤਾਰਨ੍ਤਿ. ਏਥ, ਤੁਮ੍ਹੇ, ਭਿਕ੍ਖਵੇ, ਅਸੁਭਾਨੁਪਸ੍ਸਿਨੋ ਕਾਯੇ ਵਿਹਰਥ, ਆਹਾਰੇ ਪਟਿਕੂਲਸਞ੍ਞਿਨੋ, ਸਬ੍ਬਲੋਕੇ ਅਨਭਿਰਤਿਸਞ੍ਞਿਨੋ [ਅਨਭਿਰਤਸਞ੍ਞੀਨੋ (ਸੀ. ਸ੍ਯਾ. ਕਂ. ਪੀ.)], ਸਬ੍ਬਸਙ੍ਖਾਰੇਸੁ ਅਨਿਚ੍ਚਾਨੁਪਸ੍ਸਿਨੋ’ਤਿ.
‘‘ਅਥ ਖੋ ਤੇ, ਪਾਪਿਮ, ਭਿਕ੍ਖੂ ਕਕੁਸਨ੍ਧੇਨ ਭਗਵਤਾ ਅਰਹਤਾ ਸਮ੍ਮਾਸਮ੍ਬੁਦ੍ਧੇਨ ਏਵਂ ਓਵਦਿਯਮਾਨਾ ਏਵਂ ਅਨੁਸਾਸਿਯਮਾਨਾ ਅਰਞ੍ਞਗਤਾਪਿ ਰੁਕ੍ਖਮੂਲਗਤਾਪਿ ਸੁਞ੍ਞਾਗਾਰਗਤਾਪਿ ਅਸੁਭਾਨੁਪਸ੍ਸਿਨੋ ਕਾਯੇ ਵਿਹਰਿਂਸੁ, ਆਹਾਰੇ ਪਟਿਕੂਲਸਞ੍ਞਿਨੋ, ਸਬ੍ਬਲੋਕੇ ਅਨਭਿਰਤਿਸਞ੍ਞਿਨੋ, ਸਬ੍ਬਸਙ੍ਖਾਰੇਸੁ ਅਨਿਚ੍ਚਾਨੁਪਸ੍ਸਿਨੋ.
੫੧੨. ‘‘ਅਥ ਖੋ, ਪਾਪਿਮ, ਕਕੁਸਨ੍ਧੋ ਭਗਵਾ ਅਰਹਂ ਸਮ੍ਮਾਸਮ੍ਬੁਦ੍ਧੋ ਪੁਬ੍ਬਣ੍ਹਸਮਯਂ ਨਿਵਾਸੇਤ੍ਵਾ ਪਤ੍ਤਚੀਵਰਮਾਦਾਯ ਆਯਸ੍ਮਤਾ ਵਿਧੁਰੇਨ ਪਚ੍ਛਾਸਮਣੇਨ ਗਾਮਂ ਪਿਣ੍ਡਾਯ ਪਾਵਿਸਿ. ਅਥ ਖੋ, ਪਾਪਿਮ, ਦੂਸੀ ਮਾਰੋ ਅਞ੍ਞਤਰਂ ਕੁਮਾਰਕਂ [ਕੁਮਾਰਂ (ਸੀ. ਪੀ.)] ਅਨ੍ਵਾਵਿਸਿਤ੍ਵਾ ਸਕ੍ਖਰਂ ਗਹੇਤ੍ਵਾ ਆਯਸ੍ਮਤੋ ਵਿਧੁਰਸ੍ਸ ਸੀਸੇ ਪਹਾਰਮਦਾਸਿ; ਸੀਸਂ ਵੋਭਿਨ੍ਦਿ [ਸੀਸਂ ਤੇ ਭਿਨ੍ਦਿਸ੍ਸਾਮੀਤਿ (ਕ.)]. ਅਥ ਖੋ, ਪਾਪਿਮ, ਆਯਸ੍ਮਾ ਵਿਧੁਰੋ ਭਿਨ੍ਨੇਨ ਸੀਸੇਨ ਲੋਹਿਤੇਨ ਗਲ਼ਨ੍ਤੇਨ ਕਕੁਸਨ੍ਧਂਯੇਵ ਭਗਵਨ੍ਤਂ ਅਰਹਨ੍ਤਂ ਸਮ੍ਮਾਸਮ੍ਬੁਦ੍ਧਂ ਪਿਟ੍ਠਿਤੋ ਪਿਟ੍ਠਿਤੋ ਅਨੁਬਨ੍ਧਿ. ਅਥ ਖੋ, ਪਾਪਿਮ, ਕਕੁਸਨ੍ਧੋ ਭਗਵਾ ਅਰਹਂ ਸਮ੍ਮਾਸਮ੍ਬੁਦ੍ਧੋ ਨਾਗਾਪਲੋਕਿਤਂ ਅਪਲੋਕੇਸਿ – ‘ਨ ਵਾਯਂ ਦੂਸੀ ਮਾਰੋ ਮਤ੍ਤਮਞ੍ਞਾਸੀ’ਤਿ. ਸਹਾਪਲੋਕਨਾਯ ਚ ਪਨ, ਪਾਪਿਮ, ਦੂਸੀ ਮਾਰੋ ਤਮ੍ਹਾ ਚ ਠਾਨਾ ਚਵਿ ਮਹਾਨਿਰਯਞ੍ਚ ਉਪਪਜ੍ਜਿ.
‘‘ਤਸ੍ਸ ਖੋ ਪਨ, ਪਾਪਿਮ, ਮਹਾਨਿਰਯਸ੍ਸ ਤਯੋ ਨਾਮਧੇਯ੍ਯਾ ਹੋਨ੍ਤਿ – ਛਫਸ੍ਸਾਯਤਨਿਕੋ ਇਤਿਪਿ, ਸਙ੍ਕੁਸਮਾਹਤੋ ਇਤਿਪਿ, ਪਚ੍ਚਤ੍ਤਵੇਦਨਿਯੋ ਇਤਿਪਿ. ਅਥ ਖੋ ਮਂ, ਪਾਪਿਮ, ਨਿਰਯਪਾਲਾ ਉਪਸਙ੍ਕਮਿਤ੍ਵਾ ਏਤਦਵੋਚੁਂ – ਯਦਾ ਖੋ ਤੇ [ਯਤੋ ਤੇ (ਕ.)], ਮਾਰਿਸ, ਸਙ੍ਕੁਨਾ ਸਙ੍ਕੁ ਹਦਯੇ ਸਮਾਗਚ੍ਛੇਯ੍ਯ. ਅਥ ਨਂ ਤ੍ਵਂ ਜਾਨੇਯ੍ਯਾਸਿ – ‘ਵਸ੍ਸਸਹਸ੍ਸਂ ਮੇ ਨਿਰਯੇ ਪਚ੍ਚਮਾਨਸ੍ਸਾ’ਤਿ. ਸੋ ਖੋ ਅਹਂ, ਪਾਪਿਮ, ਬਹੂਨਿ ਵਸ੍ਸਾਨਿ ਬਹੂਨਿ ਵਸ੍ਸਸਤਾਨਿ ਬਹੂਨਿ ਵਸ੍ਸਸਹਸ੍ਸਾਨਿ ਤਸ੍ਮਿਂ ਮਹਾਨਿਰਯੇ ਅਪਚ੍ਚਿਂ. ਦਸਵਸ੍ਸਸਹਸ੍ਸਾਨਿ ਤਸ੍ਸੇਵ ਮਹਾਨਿਰਯਸ੍ਸ ਉਸ੍ਸਦੇ ਅਪਚ੍ਚਿਂ ਵੁਟ੍ਠਾਨਿਮਂ ਨਾਮ ਵੇਦਨਂ ਵੇਦਿਯਮਾਨੋ. ਤਸ੍ਸ ਮਯ੍ਹਂ, ਪਾਪਿਮ, ਏਵਰੂਪੋ ਕਾਯੋ ਹੋਤਿ, ਸੇਯ੍ਯਥਾਪਿ ਮਨੁਸ੍ਸਸ੍ਸ. ਏਵਰੂਪਂ ਸੀਸਂ ਹੋਤਿ, ਸੇਯ੍ਯਥਾਪਿ ਮਚ੍ਛਸ੍ਸ.
੫੧੩. ‘‘ਕੀਦਿਸੋ ਨਿਰਯੋ ਆਸਿ, ਯਤ੍ਥ ਦੂਸੀ ਅਪਚ੍ਚਥ;
ਵਿਧੁਰਂ ਸਾਵਕਮਾਸਜ੍ਜ, ਕਕੁਸਨ੍ਧਞ੍ਚ ਬ੍ਰਾਹ੍ਮਣਂ.
‘‘ਸਤਂ ਆਸਿ ਅਯੋਸਙ੍ਕੂ, ਸਬ੍ਬੇ ਪਚ੍ਚਤ੍ਤਵੇਦਨਾ;
ਈਦਿਸੋ ਨਿਰਯੋ ਆਸਿ, ਯਤ੍ਥ ਦੂਸੀ ਅਪਚ੍ਚਥ;
ਵਿਧੁਰਂ ਸਾਵਕਮਾਸਜ੍ਜ, ਕਕੁਸਨ੍ਧਞ੍ਚ ਬ੍ਰਾਹ੍ਮਣਂ.
‘‘ਯੋ ਏਤਮਭਿਜਾਨਾਤਿ, ਭਿਕ੍ਖੁ ਬੁਦ੍ਧਸ੍ਸ ਸਾਵਕੋ;
ਤਾਦਿਸਂ ਭਿਕ੍ਖੁਮਾਸਜ੍ਜ, ਕਣ੍ਹ ਦੁਕ੍ਖਂ ਨਿਗਚ੍ਛਸਿ.
‘‘ਮਜ੍ਝੇ ਸਰਸ੍ਸ ਤਿਟ੍ਠਨ੍ਤਿ, ਵਿਮਾਨਾ ਕਪ੍ਪਟ੍ਠਾਯਿਨੋ;
ਵੇਲ਼ੁਰਿਯਵਣ੍ਣਾ ਰੁਚਿਰਾ, ਅਚ੍ਚਿਮਨ੍ਤੋ ਪਭਸ੍ਸਰਾ;
ਅਚ੍ਛਰਾ ਤਤ੍ਥ ਨਚ੍ਚਨ੍ਤਿ, ਪੁਥੁ ਨਾਨਤ੍ਤਵਣ੍ਣਿਯੋ.
‘‘ਯੋ ਏਤਮਭਿਜਾਨਾਤਿ, ਭਿਕ੍ਖੁ ਬੁਦ੍ਧਸ੍ਸ ਸਾਵਕੋ;
ਤਾਦਿਸਂ ਭਿਕ੍ਖੁਮਾਸਜ੍ਜ, ਕਣ੍ਹ ਦੁਕ੍ਖਂ ਨਿਗਚ੍ਛਸਿ.
‘‘ਯੋ ਵੇ ਬੁਦ੍ਧੇਨ ਚੋਦਿਤੋ, ਭਿਕ੍ਖੁ ਸਙ੍ਘਸ੍ਸ ਪੇਕ੍ਖਤੋ;
ਮਿਗਾਰਮਾਤੁਪਾਸਾਦਂ, ਪਾਦਙ੍ਗੁਟ੍ਠੇਨ ਕਮ੍ਪਯਿ.
‘‘ਯੋ ਏਤਮਭਿਜਾਨਾਤਿ, ਭਿਕ੍ਖੁ ਬੁਦ੍ਧਸ੍ਸ ਸਾਵਕੋ;
ਤਾਦਿਸਂ ਭਿਕ੍ਖੁਮਾਸਜ੍ਜ, ਕਣ੍ਹ ਦੁਕ੍ਖਂ ਨਿਗਚ੍ਛਸਿ.
‘‘ਯੋ ਵੇਜਯਨ੍ਤਂ ਪਾਸਾਦਂ, ਪਾਦਙ੍ਗੁਟ੍ਠੇਨ ਕਮ੍ਪਯਿ;
ਇਦ੍ਧਿਬਲੇਨੁਪਤ੍ਥਦ੍ਧੋ, ਸਂਵੇਜੇਸਿ ਚ ਦੇਵਤਾ.
‘‘ਯੋ ਏਤਮਭਿਜਾਨਾਤਿ, ਭਿਕ੍ਖੁ ਬੁਦ੍ਧਸ੍ਸ ਸਾਵਕੋ;
ਤਾਦਿਸਂ ਭਿਕ੍ਖੁਮਾਸਜ੍ਜ, ਕਣ੍ਹ ਦੁਕ੍ਖਂ ਨਿਗਚ੍ਛਸਿ.
‘‘ਯੋ ਵੇਜਯਨ੍ਤਪਾਸਾਦੇ, ਸਕ੍ਕਂ ਸੋ ਪਰਿਪੁਚ੍ਛਤਿ;
ਅਪਿ ਵਾਸਵ ਜਾਨਾਸਿ, ਤਣ੍ਹਾਕ੍ਖਯਵਿਮੁਤ੍ਤਿਯੋ;
ਤਸ੍ਸ ਸਕ੍ਕੋ ਵਿਯਾਕਾਸਿ, ਪਞ੍ਹਂ ਪੁਟ੍ਠੋ ਯਥਾਤਥਂ.
‘‘ਯੋ ਏਤਮਭਿਜਾਨਾਤਿ, ਭਿਕ੍ਖੁ ਬੁਦ੍ਧਸ੍ਸ ਸਾਵਕੋ;
ਤਾਦਿਸਂ ਭਿਕ੍ਖੁਮਾਸਜ੍ਜ, ਕਣ੍ਹ ਦੁਕ੍ਖਂ ਨਿਗਚ੍ਛਸਿ.
‘‘ਯੋ ਬ੍ਰਹ੍ਮਂ ਪਰਿਪੁਚ੍ਛਤਿ, ਸੁਧਮ੍ਮਾਯਾਭਿਤੋ ਸਭਂ;
ਅਜ੍ਜਾਪਿ ਤ੍ਯਾਵੁਸੋ ਦਿਟ੍ਠਿ, ਯਾ ਤੇ ਦਿਟ੍ਠਿ ਪੁਰੇ ਅਹੁ;
ਪਸ੍ਸਸਿ ਵੀਤਿਵਤ੍ਤਨ੍ਤਂ, ਬ੍ਰਹ੍ਮਲੋਕੇ ਪਭਸ੍ਸਰਂ.
‘‘ਤਸ੍ਸ ਬ੍ਰਹ੍ਮਾ ਵਿਯਾਕਾਸਿ, ਅਨੁਪੁਬ੍ਬਂ ਯਥਾਤਥਂ;
ਨ ਮੇ ਮਾਰਿਸ ਸਾ ਦਿਟ੍ਠਿ, ਯਾ ਮੇ ਦਿਟ੍ਠਿ ਪੁਰੇ ਅਹੁ.
‘‘ਪਸ੍ਸਾਮਿ ਵੀਤਿਵਤ੍ਤਨ੍ਤਂ, ਬ੍ਰਹ੍ਮਲੋਕੇ ਪਭਸ੍ਸਰਂ;
ਸੋਹਂ ਅਜ੍ਜ ਕਥਂ ਵਜ੍ਜਂ, ਅਹਂ ਨਿਚ੍ਚੋਮ੍ਹਿ ਸਸ੍ਸਤੋ.
‘‘ਯੋ ਏਤਮਭਿਜਾਨਾਤਿ, ਭਿਕ੍ਖੁ ਬੁਦ੍ਧਸ੍ਸ ਸਾਵਕੋ;
ਤਾਦਿਸਂ ਭਿਕ੍ਖੁਮਾਸਜ੍ਜ, ਕਣ੍ਹ ਦੁਕ੍ਖਂ ਨਿਗਚ੍ਛਸਿ.
‘‘ਯੋ ਮਹਾਮੇਰੁਨੋ ਕੂਟਂ, ਵਿਮੋਕ੍ਖੇਨ ਅਫਸ੍ਸਯਿ;
ਵਨਂ ਪੁਬ੍ਬਵਿਦੇਹਾਨਂ, ਯੇ ਚ ਭੂਮਿਸਯਾ ਨਰਾ.
‘‘ਯੋ ਏਤਮਭਿਜਾਨਾਤਿ, ਭਿਕ੍ਖੁ ਬੁਦ੍ਧਸ੍ਸ ਸਾਵਕੋ;
ਤਾਦਿਸਂ ਭਿਕ੍ਖੁਮਾਸਜ੍ਜ, ਕਣ੍ਹ ਦੁਕ੍ਖਂ ਨਿਗਚ੍ਛਸਿ.
‘‘ਨ ਵੇ ਅਗ੍ਗਿ ਚੇਤਯਤਿ [ਵੇਠਯਤਿ (ਸੀ.)], ‘ਅਹਂ ਬਾਲਂ ਡਹਾਮੀ’ਤਿ;
ਬਾਲੋ ਚ ਜਲਿਤਂ ਅਗ੍ਗਿਂ, ਆਸਜ੍ਜ ਨਂ ਸ ਡਯ੍ਹਤਿ.
‘‘ਏਵਮੇਵ ਤੁਵਂ ਮਾਰ, ਆਸਜ੍ਜ ਨਂ ਤਥਾਗਤਂ;
ਸਯਂ ਡਹਿਸ੍ਸਸਿ ਅਤ੍ਤਾਨਂ, ਬਾਲੋ ਅਗ੍ਗਿਂਵ ਸਂਫੁਸਂ.
‘‘ਅਪੁਞ੍ਞਂ ਪਸਵੀ ਮਾਰੋ, ਆਸਜ੍ਜ ਨਂ ਤਥਾਗਤਂ;
ਕਿਨ੍ਨੁ ਮਞ੍ਞਸਿ ਪਾਪਿਮ, ਨ ਮੇ ਪਾਪਂ ਵਿਪਚ੍ਚਤਿ.
‘‘ਕਰੋਤੋ ਚੀਯਤਿ ਪਾਪਂ, ਚਿਰਰਤ੍ਤਾਯ ਅਨ੍ਤਕ;
ਮਾਰ ਨਿਬ੍ਬਿਨ੍ਦ ਬੁਦ੍ਧਮ੍ਹਾ, ਆਸਂ ਮਾਕਾਸਿ ਭਿਕ੍ਖੁਸੁ.
‘‘ਇਤਿ ਮਾਰਂ ਅਤਜ੍ਜੇਸਿ, ਭਿਕ੍ਖੁ ਭੇਸਕਲ਼ਾਵਨੇ;
ਤਤੋ ਸੋ ਦੁਮ੍ਮਨੋ ਯਕ੍ਖੋ, ਨਤਤ੍ਥੇਵਨ੍ਤਰਧਾਯਥਾ’’ਤਿ.
ਮਾਰਤਜ੍ਜਨੀਯਸੁਤ੍ਤਂ ਨਿਟ੍ਠਿਤਂ ਦਸਮਂ.
ਚੂਲ਼ਯਮਕਵਗ੍ਗੋ ਨਿਟ੍ਠਿਤੋ ਪਞ੍ਚਮੋ.
ਤਸ੍ਸੁਦ੍ਦਾਨਂ –
ਸਾਲੇਯ੍ਯ ਵੇਰਞ੍ਜਦੁਵੇ ਚ ਤੁਟ੍ਠਿ, ਚੂਲ਼ਮਹਾਧਮ੍ਮਸਮਾਦਾਨਞ੍ਚ;
ਵੀਮਂਸਕਾ ਕੋਸਮ੍ਬਿ ਚ ਬ੍ਰਾਹ੍ਮਣੋ, ਦੂਸੀ ਚ ਮਾਰੋ ਦਸਮੋ ਚ ਵਗ੍ਗੋ.
ਸਾਲੇਯ੍ਯਵਗ੍ਗੋ ਨਿਟ੍ਠਿਤੋ ਪਞ੍ਚਮੋ.