੮. ਸਲ੍ਲੇਖਸੁਤ੍ਤਂ

੮੧. ਏਵਂ ਮੇ ਸੁਤਂ – ਏਕਂ ਸਮਯਂ ਭਗਵਾ ਸਾਵਤ੍ਥਿਯਂ ਵਿਹਰਤਿ ਜੇਤਵਨੇ ਅਨਾਥਪਿਣ੍ਡਿਕਸ੍ਸ ਆਰਾਮੇ. ਅਥ ਖੋ ਆਯਸ੍ਮਾ ਮਹਾਚੁਨ੍ਦੋ ਸਾਯਨ੍ਹਸਮਯਂ ਪਟਿਸਲ੍ਲਾਨਾ ਵੁਟ੍ਠਿਤੋ ਯੇਨ ਭਗਵਾ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨੋ ਖੋ ਆਯਸ੍ਮਾ ਮਹਾਚੁਨ੍ਦੋ ਭਗਵਨ੍ਤਂ ਏਤਦਵੋਚ – ‘‘ਯਾ ਇਮਾ, ਭਨ੍ਤੇ, ਅਨੇਕਵਿਹਿਤਾ ਦਿਟ੍ਠਿਯੋ ਲੋਕੇ ਉਪ੍ਪਜ੍ਜਨ੍ਤਿ – ਅਤ੍ਤਵਾਦਪਟਿਸਂਯੁਤ੍ਤਾ ਵਾ ਲੋਕਵਾਦਪਟਿਸਂਯੁਤ੍ਤਾ ਵਾ – ਆਦਿਮੇਵ ਨੁ ਖੋ, ਭਨ੍ਤੇ, ਭਿਕ੍ਖੁਨੋ ਮਨਸਿਕਰੋਤੋ ਏਵਮੇਤਾਸਂ ਦਿਟ੍ਠੀਨਂ ਪਹਾਨਂ ਹੋਤਿ, ਏਵਮੇਤਾਸਂ ਦਿਟ੍ਠੀਨਂ ਪਟਿਨਿਸ੍ਸਗ੍ਗੋ ਹੋਤੀ’’ਤਿ?

੮੨. ‘‘ਯਾ ਇਮਾ, ਚੁਨ੍ਦ, ਅਨੇਕਵਿਹਿਤਾ ਦਿਟ੍ਠਿਯੋ ਲੋਕੇ ਉਪ੍ਪਜ੍ਜਨ੍ਤਿ – ਅਤ੍ਤਵਾਦਪਟਿਸਂਯੁਤ੍ਤਾ ਵਾ ਲੋਕਵਾਦਪਟਿਸਂਯੁਤ੍ਤਾ ਵਾ – ਯਤ੍ਥ ਚੇਤਾ ਦਿਟ੍ਠਿਯੋ ਉਪ੍ਪਜ੍ਜਨ੍ਤਿ ਯਤ੍ਥ ਚ ਅਨੁਸੇਨ੍ਤਿ ਯਤ੍ਥ ਚ ਸਮੁਦਾਚਰਨ੍ਤਿ ਤਂ ‘ਨੇਤਂ ਮਮ, ਨੇਸੋਹਮਸ੍ਮਿ, ਨ ਮੇ ਸੋ ਅਤ੍ਤਾ’ਤਿ – ਏਵਮੇਤਂ ਯਥਾਭੂਤਂ ਸਮ੍ਮਪ੍ਪਞ੍ਞਾ ਪਸ੍ਸਤੋ ਏਵਮੇਤਾਸਂ ਦਿਟ੍ਠੀਨਂ ਪਹਾਨਂ ਹੋਤਿ, ਏਵਮੇਤਾਸਂ ਦਿਟ੍ਠੀਨਂ ਪਟਿਨਿਸ੍ਸਗ੍ਗੋ ਹੋਤਿ.

‘‘ਠਾਨਂ ਖੋ ਪਨੇਤਂ, ਚੁਨ੍ਦ, ਵਿਜ੍ਜਤਿ ਯਂ ਇਧੇਕਚ੍ਚੋ ਭਿਕ੍ਖੁ ਵਿਵਿਚ੍ਚੇਵ ਕਾਮੇਹਿ ਵਿਵਿਚ੍ਚ ਅਕੁਸਲੇਹਿ ਧਮ੍ਮੇਹਿ ਸਵਿਤਕ੍ਕਂ ਸਵਿਚਾਰਂ ਵਿਵੇਕਜਂ ਪੀਤਿਸੁਖਂ ਪਠਮਂ ਝਾਨਂ ਉਪਸਮ੍ਪਜ੍ਜ ਵਿਹਰੇਯ੍ਯ. ਤਸ੍ਸ ਏਵਮਸ੍ਸ – ‘ਸਲ੍ਲੇਖੇਨ ਵਿਹਰਾਮੀ’ਤਿ. ਨ ਖੋ ਪਨੇਤੇ, ਚੁਨ੍ਦ, ਅਰਿਯਸ੍ਸ ਵਿਨਯੇ ਸਲ੍ਲੇਖਾ ਵੁਚ੍ਚਨ੍ਤਿ. ਦਿਟ੍ਠਧਮ੍ਮਸੁਖਵਿਹਾਰਾ ਏਤੇ ਅਰਿਯਸ੍ਸ ਵਿਨਯੇ ਵੁਚ੍ਚਨ੍ਤਿ.

‘‘ਠਾਨਂ ਖੋ ਪਨੇਤਂ, ਚੁਨ੍ਦ, ਵਿਜ੍ਜਤਿ ਯਂ ਇਧੇਕਚ੍ਚੋ ਭਿਕ੍ਖੁ ਵਿਤਕ੍ਕਵਿਚਾਰਾਨਂ ਵੂਪਸਮਾ ਅਜ੍ਝਤ੍ਤਂ ਸਮ੍ਪਸਾਦਨਂ ਚੇਤਸੋ ਏਕੋਦਿਭਾਵਂ ਅਵਿਤਕ੍ਕਂ ਅਵਿਚਾਰਂ ਸਮਾਧਿਜਂ ਪੀਤਿਸੁਖਂ ਦੁਤਿਯਂ ਝਾਨਂ ਉਪਸਮ੍ਪਜ੍ਜ ਵਿਹਰੇਯ੍ਯ. ਤਸ੍ਸ ਏਵਮਸ੍ਸ – ‘ਸਲ੍ਲੇਖੇਨ ਵਿਹਰਾਮੀ’ਤਿ. ਨ ਖੋ ਪਨੇਤੇ, ਚੁਨ੍ਦ, ਅਰਿਯਸ੍ਸ ਵਿਨਯੇ ਸਲ੍ਲੇਖਾ ਵੁਚ੍ਚਨ੍ਤਿ. ਦਿਟ੍ਠਧਮ੍ਮਸੁਖਵਿਹਾਰਾ ਏਤੇ ਅਰਿਯਸ੍ਸ ਵਿਨਯੇ ਵੁਚ੍ਚਨ੍ਤਿ.

‘‘ਠਾਨਂ ਖੋ ਪਨੇਤਂ, ਚੁਨ੍ਦ, ਵਿਜ੍ਜਤਿ ਯਂ ਇਧੇਕਚ੍ਚੋ ਭਿਕ੍ਖੁ ਪੀਤਿਯਾ ਚ ਵਿਰਾਗਾ ਉਪੇਕ੍ਖਕੋ ਚ ਵਿਹਰੇਯ੍ਯ, ਸਤੋ ਚ ਸਮ੍ਪਜਾਨੋ ਸੁਖਞ੍ਚ ਕਾਯੇਨ ਪਟਿਸਂਵੇਦੇਯ੍ਯ, ਯਂ ਤਂ ਅਰਿਯਾ ਆਚਿਕ੍ਖਨ੍ਤਿ – ‘ਉਪੇਕ੍ਖਕੋ ਸਤਿਮਾ ਸੁਖਵਿਹਾਰੀ’ਤਿ ਤਤਿਯਂ ਝਾਨਂ ਉਪਸਮ੍ਪਜ੍ਜ ਵਿਹਰੇਯ੍ਯ. ਤਸ੍ਸ ਏਵਮਸ੍ਸ – ‘ਸਲ੍ਲੇਖੇਨ ਵਿਹਰਾਮੀ’ਤਿ. ਨ ਖੋ ਪਨੇਤੇ, ਚੁਨ੍ਦ, ਅਰਿਯਸ੍ਸ ਵਿਨਯੇ ਸਲ੍ਲੇਖਾ ਵੁਚ੍ਚਨ੍ਤਿ. ਦਿਟ੍ਠਧਮ੍ਮਸੁਖਵਿਹਾਰਾ ਏਤੇ ਅਰਿਯਸ੍ਸ ਵਿਨਯੇ ਵੁਚ੍ਚਨ੍ਤਿ.

‘‘ਠਾਨਂ ਖੋ ਪਨੇਤਂ, ਚੁਨ੍ਦ, ਵਿਜ੍ਜਤਿ ਯਂ ਇਧੇਕਚ੍ਚੋ ਭਿਕ੍ਖੁ ਸੁਖਸ੍ਸ ਚ ਪਹਾਨਾ ਦੁਕ੍ਖਸ੍ਸ ਚ ਪਹਾਨਾ ਪੁਬ੍ਬੇਵ ਸੋਮਨਸ੍ਸਦੋਮਨਸ੍ਸਾਨਂ ਅਤ੍ਥਙ੍ਗਮਾ ਅਦੁਕ੍ਖਮਸੁਂ ਉਪੇਕ੍ਖਾਸਤਿਪਾਰਿਸੁਦ੍ਧਿਂ ਚਤੁਤ੍ਥਂ ਝਾਨਂ ਉਪਸਮ੍ਪਜ੍ਜ ਵਿਹਰੇਯ੍ਯ. ਤਸ੍ਸ ਏਵਮਸ੍ਸ – ‘ਸਲ੍ਲੇਖੇਨ ਵਿਹਰਾਮੀ’ਤਿ. ਨ ਖੋ ਪਨੇਤੇ, ਚੁਨ੍ਦ, ਅਰਿਯਸ੍ਸ ਵਿਨਯੇ ਸਲ੍ਲੇਖਾ ਵੁਚ੍ਚਨ੍ਤਿ. ਦਿਟ੍ਠਧਮ੍ਮਸੁਖਵਿਹਾਰਾ ਏਤੇ ਅਰਿਯਸ੍ਸ ਵਿਨਯੇ ਵੁਚ੍ਚਨ੍ਤਿ.

‘‘ਠਾਨਂ ਖੋ ਪਨੇਤਂ, ਚੁਨ੍ਦ, ਵਿਜ੍ਜਤਿ ਯਂ ਇਧੇਕਚ੍ਚੋ ਭਿਕ੍ਖੁ ਸਬ੍ਬਸੋ ਰੂਪਸਞ੍ਞਾਨਂ ਸਮਤਿਕ੍ਕਮਾ, ਪਟਿਘਸਞ੍ਞਾਨਂ ਅਤ੍ਥਙ੍ਗਮਾ, ਨਾਨਤ੍ਤਸਞ੍ਞਾਨਂ ਅਮਨਸਿਕਾਰਾ, ‘ਅਨਨ੍ਤੋ ਆਕਾਸੋ’ਤਿ ਆਕਾਸਾਨਞ੍ਚਾਯਤਨਂ ਉਪਸਮ੍ਪਜ੍ਜ ਵਿਹਰੇਯ੍ਯ. ਤਸ੍ਸ ਏਵਮਸ੍ਸ – ‘ਸਲ੍ਲੇਖੇਨ ਵਿਹਰਾਮੀ’ਤਿ. ਨ ਖੋ ਪਨੇਤੇ, ਚੁਨ੍ਦ, ਅਰਿਯਸ੍ਸ ਵਿਨਯੇ ਸਲ੍ਲੇਖਾ ਵੁਚ੍ਚਨ੍ਤਿ. ਸਨ੍ਤਾ ਏਤੇ ਵਿਹਾਰਾ ਅਰਿਯਸ੍ਸ ਵਿਨਯੇ ਵੁਚ੍ਚਨ੍ਤਿ.

‘‘ਠਾਨਂ ਖੋ ਪਨੇਤਂ, ਚੁਨ੍ਦ, ਵਿਜ੍ਜਤਿ ਯਂ ਇਧੇਕਚ੍ਚੋ ਭਿਕ੍ਖੁ ਸਬ੍ਬਸੋ ਆਕਾਸਾਨਞ੍ਚਾਯਤਨਂ ਸਮਤਿਕ੍ਕਮ੍ਮ ‘ਅਨਨ੍ਤਂ ਵਿਞ੍ਞਾਣ’ਨ੍ਤਿ ਵਿਞ੍ਞਾਣਞ੍ਚਾਯਤਨਂ ਉਪਸਮ੍ਪਜ੍ਜ ਵਿਹਰੇਯ੍ਯ. ਤਸ੍ਸ ਏਵਮਸ੍ਸ – ‘ਸਲ੍ਲੇਖੇਨ ਵਿਹਰਾਮੀ’ਤਿ. ਨ ਖੋ ਪਨੇਤੇ, ਚੁਨ੍ਦ, ਅਰਿਯਸ੍ਸ ਵਿਨਯੇ ਸਲ੍ਲੇਖਾ ਵੁਚ੍ਚਨ੍ਤਿ. ਸਨ੍ਤਾ ਏਤੇ ਵਿਹਾਰਾ ਅਰਿਯਸ੍ਸ ਵਿਨਯੇ ਵੁਚ੍ਚਨ੍ਤਿ.

‘‘ਠਾਨਂ ਖੋ ਪਨੇਤਂ, ਚੁਨ੍ਦ, ਵਿਜ੍ਜਤਿ ਯਂ ਇਧੇਕਚ੍ਚੋ ਭਿਕ੍ਖੁ ਸਬ੍ਬਸੋ ਵਿਞ੍ਞਾਣਞ੍ਚਾਯਤਨਂ ਸਮਤਿਕ੍ਕਮ੍ਮ ‘ਨਤ੍ਥਿ ਕਿਞ੍ਚੀ’ਤਿ ਆਕਿਞ੍ਚਞ੍ਞਾਯਤਨਂ ਉਪਸਮ੍ਪਜ੍ਜ ਵਿਹਰੇਯ੍ਯ. ਤਸ੍ਸ ਏਵਮਸ੍ਸ – ‘ਸਲ੍ਲੇਖੇਨ ਵਿਹਰਾਮੀ’ਤਿ. ਨ ਖੋ ਪਨੇਤੇ, ਚੁਨ੍ਦ, ਅਰਿਯਸ੍ਸ ਵਿਨਯੇ ਸਲ੍ਲੇਖਾ ਵੁਚ੍ਚਨ੍ਤਿ. ਸਨ੍ਤਾ ਏਤੇ ਵਿਹਾਰਾ ਅਰਿਯਸ੍ਸ ਵਿਨਯੇ ਵੁਚ੍ਚਨ੍ਤਿ.

‘‘ਠਾਨਂ ਖੋ ਪਨੇਤਂ, ਚੁਨ੍ਦ, ਵਿਜ੍ਜਤਿ ਯਂ ਇਧੇਕਚ੍ਚੋ ਭਿਕ੍ਖੁ ਸਬ੍ਬਸੋ ਆਕਿਞ੍ਚਞ੍ਞਾਯਤਨਂ ਸਮਤਿਕ੍ਕਮ੍ਮ ਨੇਵਸਞ੍ਞਾਨਾਸਞ੍ਞਾਯਤਨਂ ਉਪਸਮ੍ਪਜ੍ਜ ਵਿਹਰੇਯ੍ਯ. ਤਸ੍ਸ ਏਵਮਸ੍ਸ – ‘ਸਲ੍ਲੇਖੇਨ ਵਿਹਰਾਮੀ’ਤਿ. ਨ ਖੋ ਪਨੇਤੇ, ਚੁਨ੍ਦ, ਅਰਿਯਸ੍ਸ ਵਿਨਯੇ ਸਲ੍ਲੇਖਾ ਵੁਚ੍ਚਨ੍ਤਿ. ਸਨ੍ਤਾ ਏਤੇ ਵਿਹਾਰਾ ਅਰਿਯਸ੍ਸ ਵਿਨਯੇ ਵੁਚ੍ਚਨ੍ਤਿ.

੮੩. ‘‘ਇਧ ਖੋ ਪਨ ਵੋ, ਚੁਨ੍ਦ, ਸਲ੍ਲੇਖੋ ਕਰਣੀਯੋ. ‘ਪਰੇ ਵਿਹਿਂਸਕਾ ਭਵਿਸ੍ਸਨ੍ਤਿ, ਮਯਮੇਤ੍ਥ ਅਵਿਹਿਂਸਕਾ ਭਵਿਸ੍ਸਾਮਾ’ਤਿ ਸਲ੍ਲੇਖੋ ਕਰਣੀਯੋ. ‘ਪਰੇ ਪਾਣਾਤਿਪਾਤੀ ਭਵਿਸ੍ਸਨ੍ਤਿ, ਮਯਮੇਤ੍ਥ ਪਾਣਾਤਿਪਾਤਾ ਪਟਿਵਿਰਤਾ ਭਵਿਸ੍ਸਾਮਾ’ਤਿ ਸਲ੍ਲੇਖੋ ਕਰਣੀਯੋ. ‘ਪਰੇ ਅਦਿਨ੍ਨਾਦਾਯੀ ਭਵਿਸ੍ਸਨ੍ਤਿ, ਮਯਮੇਤ੍ਥ ਅਦਿਨ੍ਨਾਦਾਨਾ ਪਟਿਵਿਰਤਾ ਭਵਿਸ੍ਸਾਮਾ’ਤਿ ਸਲ੍ਲੇਖੋ ਕਰਣੀਯੋ. ‘ਪਰੇ ਅਬ੍ਰਹ੍ਮਚਾਰੀ ਭਵਿਸ੍ਸਨ੍ਤਿ, ਮਯਮੇਤ੍ਥ ਬ੍ਰਹ੍ਮਚਾਰੀ ਭਵਿਸ੍ਸਾਮਾ’ਤਿ ਸਲ੍ਲੇਖੋ ਕਰਣੀਯੋ. ‘ਪਰੇ ਮੁਸਾਵਾਦੀ ਭਵਿਸ੍ਸਨ੍ਤਿ, ਮਯਮੇਤ੍ਥ ਮੁਸਾਵਾਦਾ ਪਟਿਵਿਰਤਾ ਭਵਿਸ੍ਸਾਮਾ’ਤਿ ਸਲ੍ਲੇਖੋ ਕਰਣੀਯੋ. ‘ਪਰੇ ਪਿਸੁਣਵਾਚਾ [ਪਿਸੁਣਾ ਵਾਚਾ (ਸੀ. ਪੀ.)] ਭਵਿਸ੍ਸਨ੍ਤਿ, ਮਯਮੇਤ੍ਥ ਪਿਸੁਣਾਯ ਵਾਚਾਯ ਪਟਿਵਿਰਤਾ ਭਵਿਸ੍ਸਾਮਾ’ਤਿ ਸਲ੍ਲੇਖੋ ਕਰਣੀਯੋ. ‘ਪਰੇ ਫਰੁਸਵਾਚਾ [ਫਰੁਸਾ ਵਾਚਾ (ਸੀ. ਪੀ.)] ਭਵਿਸ੍ਸਨ੍ਤਿ, ਮਯਮੇਤ੍ਥ ਫਰੁਸਾਯ ਵਾਚਾਯ ਪਟਿਵਿਰਤਾ ਭਵਿਸ੍ਸਾਮਾ’ਤਿ ਸਲ੍ਲੇਖੋ ਕਰਣੀਯੋ. ‘ਪਰੇ ਸਮ੍ਫਪ੍ਪਲਾਪੀ ਭਵਿਸ੍ਸਨ੍ਤਿ, ਮਯਮੇਤ੍ਥ ਸਮ੍ਫਪ੍ਪਲਾਪਾ ਪਟਿਵਿਰਤਾ ਭਵਿਸ੍ਸਾਮਾ’ਤਿ ਸਲ੍ਲੇਖੋ ਕਰਣੀਯੋ. ‘ਪਰੇ ਅਭਿਜ੍ਝਾਲੂ ਭਵਿਸ੍ਸਨ੍ਤਿ, ਮਯਮੇਤ੍ਥ ਅਨਭਿਜ੍ਝਾਲੂ ਭਵਿਸ੍ਸਾਮਾ’ਤਿ ਸਲ੍ਲੇਖੋ ਕਰਣੀਯੋ. ‘ਪਰੇ ਬ੍ਯਾਪਨ੍ਨਚਿਤ੍ਤਾ ਭਵਿਸ੍ਸਨ੍ਤਿ, ਮਯਮੇਤ੍ਥ ਅਬ੍ਯਾਪਨ੍ਨਚਿਤ੍ਤਾ ਭਵਿਸ੍ਸਾਮਾ’ਤਿ ਸਲ੍ਲੇਖੋ ਕਰਣੀਯੋ. ‘ਪਰੇ ਮਿਚ੍ਛਾਦਿਟ੍ਠੀ ਭਵਿਸ੍ਸਨ੍ਤਿ, ਮਯਮੇਤ੍ਥ ਸਮ੍ਮਾਦਿਟ੍ਠੀ ਭਵਿਸ੍ਸਾਮਾ’ਤਿ ਸਲ੍ਲੇਖੋ ਕਰਣੀਯੋ. ‘ਪਰੇ ਮਿਚ੍ਛਾਸਙ੍ਕਪ੍ਪਾ ਭਵਿਸ੍ਸਨ੍ਤਿ, ਮਯਮੇਤ੍ਥ ਸਮ੍ਮਾਸਙ੍ਕਪ੍ਪਾ ਭਵਿਸ੍ਸਾਮਾ’ਤਿ ਸਲ੍ਲੇਖੋ ਕਰਣੀਯੋ. ‘ਪਰੇ ਮਿਚ੍ਛਾਵਾਚਾ ਭਵਿਸ੍ਸਨ੍ਤਿ, ਮਯਮੇਤ੍ਥ ਸਮ੍ਮਾਵਾਚਾ ਭਵਿਸ੍ਸਾਮਾ’ਤਿ ਸਲ੍ਲੇਖੋ ਕਰਣੀਯੋ. ‘ਪਰੇ ਮਿਚ੍ਛਾਕਮ੍ਮਨ੍ਤਾ ਭਵਿਸ੍ਸਨ੍ਤਿ, ਮਯਮੇਤ੍ਥ ਸਮ੍ਮਾਕਮ੍ਮਨ੍ਤਾ ਭਵਿਸ੍ਸਾਮਾ’ਤਿ ਸਲ੍ਲੇਖੋ ਕਰਣੀਯੋ. ‘ਪਰੇ ਮਿਚ੍ਛਾਆਜੀਵਾ ਭਵਿਸ੍ਸਨ੍ਤਿ, ਮਯਮੇਤ੍ਥ ਸਮ੍ਮਾਆਜੀਵਾ ਭਵਿਸ੍ਸਾਮਾ’ਤਿ ਸਲ੍ਲੇਖੋ ਕਰਣੀਯੋ. ‘ਪਰੇ ਮਿਚ੍ਛਾਵਾਯਾਮਾ ਭਵਿਸ੍ਸਨ੍ਤਿ, ਮਯਮੇਤ੍ਥ ਸਮ੍ਮਾਵਾਯਾਮਾ ਭਵਿਸ੍ਸਾਮਾ’ਤਿ ਸਲ੍ਲੇਖੋ ਕਰਣੀਯੋ. ‘ਪਰੇ ਮਿਚ੍ਛਾਸਤੀ ਭਵਿਸ੍ਸਨ੍ਤਿ, ਮਯਮੇਤ੍ਥ ਸਮ੍ਮਾਸਤੀ ਭਵਿਸ੍ਸਾਮਾ’ਤਿ ਸਲ੍ਲੇਖੋ ਕਰਣੀਯੋ. ‘ਪਰੇ ਮਿਚ੍ਛਾਸਮਾਧਿ ਭਵਿਸ੍ਸਨ੍ਤਿ, ਮਯਮੇਤ੍ਥ ਸਮ੍ਮਾਸਮਾਧੀ ਭਵਿਸ੍ਸਾਮਾ’ਤਿ ਸਲ੍ਲੇਖੋ ਕਰਣੀਯੋ. ‘ਪਰੇ ਮਿਚ੍ਛਾਞਾਣੀ ਭਵਿਸ੍ਸਨ੍ਤਿ, ਮਯਮੇਤ੍ਥ ਸਮ੍ਮਾਞਾਣੀ ਭਵਿਸ੍ਸਾਮਾ’ਤਿ ਸਲ੍ਲੇਖੋ ਕਰਣੀਯੋ. ‘ਪਰੇ ਮਿਚ੍ਛਾਵਿਮੁਤ੍ਤੀ ਭਵਿਸ੍ਸਨ੍ਤਿ, ਮਯਮੇਤ੍ਥ ਸਮ੍ਮਾਵਿਮੁਤ੍ਤੀ ਭਵਿਸ੍ਸਾਮਾ’ਤਿ ਸਲ੍ਲੇਖੋ ਕਰਣੀਯੋ.

‘‘‘ਪਰੇ ਥੀਨਮਿਦ੍ਧਪਰਿਯੁਟ੍ਠਿਤਾ ਭਵਿਸ੍ਸਨ੍ਤਿ, ਮਯਮੇਤ੍ਥ ਵਿਗਤਥੀਨਮਿਦ੍ਧਾ ਭਵਿਸ੍ਸਾਮਾ’ਤਿ ਸਲ੍ਲੇਖੋ ਕਰਣੀਯੋ. ‘ਪਰੇ ਉਦ੍ਧਤਾ ਭਵਿਸ੍ਸਨ੍ਤਿ, ਮਯਮੇਤ੍ਥ ਅਨੁਦ੍ਧਤਾ ਭਵਿਸ੍ਸਾਮਾ’ਤਿ ਸਲ੍ਲੇਖੋ ਕਰਣੀਯੋ. ‘ਪਰੇ ਵਿਚਿਕਿਚ੍ਛੀ [ਵੇਚਿਕਿਚ੍ਛੀ (ਸੀ. ਪੀ. ਕ.)] ਭਵਿਸ੍ਸਨ੍ਤਿ, ਮਯਮੇਤ੍ਥ ਤਿਣ੍ਣਵਿਚਿਕਿਚ੍ਛਾ ਭਵਿਸ੍ਸਾਮਾ’ਤਿ ਸਲ੍ਲੇਖੋ ਕਰਣੀਯੋ. ‘ਪਰੇ ਕੋਧਨਾ ਭਵਿਸ੍ਸਨ੍ਤਿ, ਮਯਮੇਤ੍ਥ ਅਕ੍ਕੋਧਨਾ ਭਵਿਸ੍ਸਾਮਾ’ਤਿ ਸਲ੍ਲੇਖੋ ਕਰਣੀਯੋ. ‘ਪਰੇ ਉਪਨਾਹੀ ਭਵਿਸ੍ਸਨ੍ਤਿ, ਮਯਮੇਤ੍ਥ ਅਨੁਪਨਾਹੀ ਭਵਿਸ੍ਸਾਮਾ’ਤਿ ਸਲ੍ਲੇਖੋ ਕਰਣੀਯੋ. ‘ਪਰੇ ਮਕ੍ਖੀ ਭਵਿਸ੍ਸਨ੍ਤਿ, ਮਯਮੇਤ੍ਥ ਅਮਕ੍ਖੀ ਭਵਿਸ੍ਸਾਮਾ’ਤਿ ਸਲ੍ਲੇਖੋ ਕਰਣੀਯੋ. ‘ਪਰੇ ਪਲ਼ਾਸੀ ਭਵਿਸ੍ਸਨ੍ਤਿ, ਮਯਮੇਤ੍ਥ ਅਪਲ਼ਾਸੀ ਭਵਿਸ੍ਸਾਮਾ’ਤਿ ਸਲ੍ਲੇਖੋ ਕਰਣੀਯੋ. ‘ਪਰੇ ਇਸ੍ਸੁਕੀ ਭਵਿਸ੍ਸਨ੍ਤਿ, ਮਯਮੇਤ੍ਥ ਅਨਿਸ੍ਸੁਕੀ ਭਵਿਸ੍ਸਾਮਾ’ਤਿ ਸਲ੍ਲੇਖੋ ਕਰਣੀਯੋ. ‘ਪਰੇ ਮਚ੍ਛਰੀ ਭਵਿਸ੍ਸਨ੍ਤਿ, ਮਯਮੇਤ੍ਥ ਅਮਚ੍ਛਰੀ ਭਵਿਸ੍ਸਾਮਾ’ਤਿ ਸਲ੍ਲੇਖੋ ਕਰਣੀਯੋ. ‘ਪਰੇ ਸਠਾ ਭਵਿਸ੍ਸਨ੍ਤਿ, ਮਯਮੇਤ੍ਥ ਅਸਠਾ ਭਵਿਸ੍ਸਾਮਾ’ਤਿ ਸਲ੍ਲੇਖੋ ਕਰਣੀਯੋ. ‘ਪਰੇ ਮਾਯਾਵੀ ਭਵਿਸ੍ਸਨ੍ਤਿ, ਮਯਮੇਤ੍ਥ ਅਮਾਯਾਵੀ ਭਵਿਸ੍ਸਾਮਾ’ਤਿ ਸਲ੍ਲੇਖੋ ਕਰਣੀਯੋ. ‘ਪਰੇ ਥਦ੍ਧਾ ਭਵਿਸ੍ਸਨ੍ਤਿ, ਮਯਮੇਤ੍ਥ ਅਤ੍ਥਦ੍ਧਾ ਭਵਿਸ੍ਸਾਮਾ’ਤਿ ਸਲ੍ਲੇਖੋ ਕਰਣੀਯੋ. ‘ਪਰੇ ਅਤਿਮਾਨੀ ਭਵਿਸ੍ਸਨ੍ਤਿ, ਮਯਮੇਤ੍ਥ ਅਨਤਿਮਾਨੀ ਭਵਿਸ੍ਸਾਮਾ’ਤਿ ਸਲ੍ਲੇਖੋ ਕਰਣੀਯੋ. ‘ਪਰੇ ਦੁਬ੍ਬਚਾ ਭਵਿਸ੍ਸਨ੍ਤਿ, ਮਯਮੇਤ੍ਥ ਸੁਵਚਾ ਭਵਿਸ੍ਸਾਮਾ’ਤਿ ਸਲ੍ਲੇਖੋ ਕਰਣੀਯੋ. ‘ਪਰੇ ਪਾਪਮਿਤ੍ਤਾ ਭਵਿਸ੍ਸਨ੍ਤਿ, ਮਯਮੇਤ੍ਥ ਕਲ੍ਯਾਣਮਿਤ੍ਤਾ ਭਵਿਸ੍ਸਾਮਾ’ਤਿ ਸਲ੍ਲੇਖੋ ਕਰਣੀਯੋ. ‘ਪਰੇ ਪਮਤ੍ਤਾ ਭਵਿਸ੍ਸਨ੍ਤਿ, ਮਯਮੇਤ੍ਥ ਅਪ੍ਪਮਤ੍ਤਾ ਭਵਿਸ੍ਸਾਮਾ’ਤਿ ਸਲ੍ਲੇਖੋ ਕਰਣੀਯੋ. ‘ਪਰੇ ਅਸ੍ਸਦ੍ਧਾ ਭਵਿਸ੍ਸਨ੍ਤਿ, ਮਯਮੇਤ੍ਥ ਸਦ੍ਧਾ ਭਵਿਸ੍ਸਾਮਾ’ਤਿ ਸਲ੍ਲੇਖੋ ਕਰਣੀਯੋ. ‘ਪਰੇ ਅਹਿਰਿਕਾ ਭਵਿਸ੍ਸਨ੍ਤਿ, ਮਯਮੇਤ੍ਥ ਹਿਰਿਮਨਾ ਭਵਿਸ੍ਸਾਮਾ’ਤਿ ਸਲ੍ਲੇਖੋ ਕਰਣੀਯੋ. ‘ਪਰੇ ਅਨੋਤ੍ਤਾਪੀ [ਅਨੋਤ੍ਤਪ੍ਪੀ (ਕ.)] ਭਵਿਸ੍ਸਨ੍ਤਿ, ਮਯਮੇਤ੍ਥ ਓਤ੍ਤਾਪੀ ਭਵਿਸ੍ਸਾਮਾ’ਤਿ ਸਲ੍ਲੇਖੋ ਕਰਣੀਯੋ. ‘ਪਰੇ ਅਪ੍ਪਸ੍ਸੁਤਾ ਭਵਿਸ੍ਸਨ੍ਤਿ, ਮਯਮੇਤ੍ਥ ਬਹੁਸ੍ਸੁਤਾ ਭਵਿਸ੍ਸਾਮਾ’ਤਿ ਸਲ੍ਲੇਖੋ ਕਰਣੀਯੋ. ‘ਪਰੇ ਕੁਸੀਤਾ ਭਵਿਸ੍ਸਨ੍ਤਿ, ਮਯਮੇਤ੍ਥ ਆਰਦ੍ਧਵੀਰਿਯਾ ਭਵਿਸ੍ਸਾਮਾ’ਤਿ ਸਲ੍ਲੇਖੋ ਕਰਣੀਯੋ. ‘ਪਰੇ ਮੁਟ੍ਠਸ੍ਸਤੀ ਭਵਿਸ੍ਸਨ੍ਤਿ, ਮਯਮੇਤ੍ਥ ਉਪਟ੍ਠਿਤਸ੍ਸਤੀ ਭਵਿਸ੍ਸਾਮਾ’ਤਿ ਸਲ੍ਲੇਖੋ ਕਰਣੀਯੋ. ‘ਪਰੇ ਦੁਪ੍ਪਞ੍ਞਾ ਭਵਿਸ੍ਸਨ੍ਤਿ, ਮਯਮੇਤ੍ਥ ਪਞ੍ਞਾਸਮ੍ਪਨ੍ਨਾ ਭਵਿਸ੍ਸਾਮਾ’ਤਿ ਸਲ੍ਲੇਖੋ ਕਰਣੀਯੋ. ‘ਪਰੇ ਸਨ੍ਦਿਟ੍ਠਿਪਰਾਮਾਸੀ ਆਧਾਨਗ੍ਗਾਹੀ ਦੁਪ੍ਪਟਿਨਿਸ੍ਸਗ੍ਗੀ ਭਵਿਸ੍ਸਨ੍ਤਿ, ਮਯਮੇਤ੍ਥ ਅਸਨ੍ਦਿਟ੍ਠਿਪਰਾਮਾਸੀ ਅਨਾਧਾਨਗ੍ਗਾਹੀ ਸੁਪ੍ਪਟਿਨਿਸ੍ਸਗ੍ਗੀ ਭਵਿਸ੍ਸਾਮਾ’ਤਿ ਸਲ੍ਲੇਖੋ ਕਰਣੀਯੋ.

੮੪. ‘‘ਚਿਤ੍ਤੁਪ੍ਪਾਦਮ੍ਪਿ ਖੋ ਅਹਂ, ਚੁਨ੍ਦ, ਕੁਸਲੇਸੁ ਧਮ੍ਮੇਸੁ ਬਹੁਕਾਰਂ [ਬਹੂਪਕਾਰਂ (ਕ.)] ਵਦਾਮਿ, ਕੋ ਪਨ ਵਾਦੋ ਕਾਯੇਨ ਵਾਚਾਯ ਅਨੁਵਿਧੀਯਨਾਸੁ! ਤਸ੍ਮਾਤਿਹ, ਚੁਨ੍ਦ, ‘ਪਰੇ ਵਿਹਿਂਸਕਾ ਭਵਿਸ੍ਸਨ੍ਤਿ, ਮਯਮੇਤ੍ਥ ਅਵਿਹਿਂਸਕਾ ਭਵਿਸ੍ਸਾਮਾ’ਤਿ ਚਿਤ੍ਤਂ ਉਪ੍ਪਾਦੇਤਬ੍ਬਂ. ‘ਪਰੇ ਪਾਣਾਤਿਪਾਤੀ ਭਵਿਸ੍ਸਨ੍ਤਿ, ਮਯਮੇਤ੍ਥ ਪਾਣਾਤਿਪਾਤਾ ਪਟਿਵਿਰਤਾ ਭਵਿਸ੍ਸਾਮਾ’ਤਿ ਚਿਤ੍ਤਂ ਉਪ੍ਪਾਦੇਤਬ੍ਬਂ…‘ਪਰੇ ਸਨ੍ਦਿਟ੍ਠਿਪਰਾਮਾਸੀ ਆਧਾਨਗ੍ਗਾਹੀ ਦੁਪ੍ਪਟਿਨਿਸ੍ਸਗ੍ਗੀ ਭਵਿਸ੍ਸਨ੍ਤਿ, ਮਯਮੇਤ੍ਥ ਅਸਨ੍ਦਿਟ੍ਠਿਪਰਾਮਾਸੀ ਅਨਾਧਾਨਗ੍ਗਾਹੀ ਸੁਪ੍ਪਟਿਨਿਸ੍ਸਗ੍ਗੀ ਭਵਿਸ੍ਸਾਮਾ’ਤਿ ਚਿਤ੍ਤਂ ਉਪ੍ਪਾਦੇਤਬ੍ਬਂ.

੮੫. ‘‘ਸੇਯ੍ਯਥਾਪਿ, ਚੁਨ੍ਦ, ਵਿਸਮੋ ਮਗ੍ਗੋ ਅਸ੍ਸ, ਤਸ੍ਸ [ਮਗ੍ਗੋ ਤਸ੍ਸਾਸ੍ਸ (ਸੀ. ਸ੍ਯਾ. ਪੀ.)] ਅਞ੍ਞੋ ਸਮੋ ਮਗ੍ਗੋ ਪਰਿਕ੍ਕਮਨਾਯ; ਸੇਯ੍ਯਥਾ ਵਾ ਪਨ, ਚੁਨ੍ਦ, ਵਿਸਮਂ ਤਿਤ੍ਥਂ ਅਸ੍ਸ, ਤਸ੍ਸ ਅਞ੍ਞਂ ਸਮਂ ਤਿਤ੍ਥਂ ਪਰਿਕ੍ਕਮਨਾਯ; ਏਵਮੇਵ ਖੋ, ਚੁਨ੍ਦ, ਵਿਹਿਂਸਕਸ੍ਸ ਪੁਰਿਸਪੁਗ੍ਗਲਸ੍ਸ ਅਵਿਹਿਂਸਾ ਹੋਤਿ ਪਰਿਕ੍ਕਮਨਾਯ, ਪਾਣਾਤਿਪਾਤਿਸ੍ਸ ਪੁਰਿਸਪੁਗ੍ਗਲਸ੍ਸ ਪਾਣਾਤਿਪਾਤਾ ਵੇਰਮਣੀ ਹੋਤਿ ਪਰਿਕ੍ਕਮਨਾਯ, ਅਦਿਨ੍ਨਾਦਾਯਿਸ੍ਸ ਪੁਰਿਸਪੁਗ੍ਗਲਸ੍ਸ ਅਦਿਨ੍ਨਾਦਾਨਾ ਵੇਰਮਣੀ ਹੋਤਿ ਪਰਿਕ੍ਕਮਨਾਯ, ਅਬ੍ਰਹ੍ਮਚਾਰਿਸ੍ਸ ਪੁਰਿਸਪੁਗ੍ਗਲਸ੍ਸ ਅਬ੍ਰਹ੍ਮਚਰਿਯਾ ਵੇਰਮਣੀ ਹੋਤਿ ਪਰਿਕ੍ਕਮਨਾਯ, ਮੁਸਾਵਾਦਿਸ੍ਸ ਪੁਰਿਸਪੁਗ੍ਗਲਸ੍ਸ ਮੁਸਾਵਾਦਾ ਵੇਰਮਣੀ ਹੋਤਿ ਪਰਿਕ੍ਕਮਨਾਯ, ਪਿਸੁਣਵਾਚਸ੍ਸ ਪੁਰਿਸਪੁਗ੍ਗਲਸ੍ਸ ਪਿਸੁਣਾਯ ਵਾਚਾਯ ਵੇਰਮਣੀ ਹੋਤਿ ਪਰਿਕ੍ਕਮਨਾਯ, ਫਰੁਸਵਾਚਸ੍ਸ ਪੁਰਿਸਪੁਗ੍ਗਲਸ੍ਸ ਫਰੁਸਾਯ ਵਾਚਾਯ ਵੇਰਮਣੀ ਹੋਤਿ ਪਰਿਕ੍ਕਮਨਾਯ, ਸਮ੍ਫਪ੍ਪਲਾਪਿਸ੍ਸ ਪੁਰਿਸਪੁਗ੍ਗਲਸ੍ਸ ਸਮ੍ਫਪ੍ਪਲਾਪਾ ਵੇਰਮਣੀ ਹੋਤਿ ਪਰਿਕ੍ਕਮਨਾਯ, ਅਭਿਜ੍ਝਾਲੁਸ੍ਸ ਪੁਰਿਸਪੁਗ੍ਗਲਸ੍ਸ ਅਨਭਿਜ੍ਝਾ ਹੋਤਿ ਪਰਿਕ੍ਕਮਨਾਯ, ਬ੍ਯਾਪਨ੍ਨਚਿਤ੍ਤਸ੍ਸ ਪੁਰਿਸਪੁਗ੍ਗਲਸ੍ਸ ਅਬ੍ਯਾਪਾਦੋ ਹੋਤਿ ਪਰਿਕ੍ਕਮਨਾਯ, ਮਿਚ੍ਛਾਦਿਟ੍ਠਿਸ੍ਸ ਪੁਰਿਸਪੁਗ੍ਗਲਸ੍ਸ ਸਮ੍ਮਾਦਿਟ੍ਠਿ ਹੋਤਿ ਪਰਿਕ੍ਕਮਨਾਯ, ਮਿਚ੍ਛਾਸਙ੍ਕਪ੍ਪਸ੍ਸ ਪੁਰਿਸਪੁਗ੍ਗਲਸ੍ਸ ਸਮ੍ਮਾਸਙ੍ਕਪ੍ਪੋ ਹੋਤਿ ਪਰਿਕ੍ਕਮਨਾਯ, ਮਿਚ੍ਛਾਵਾਚਸ੍ਸ ਪੁਰਿਸਪੁਗ੍ਗਲਸ੍ਸ ਸਮ੍ਮਾਵਾਚਾ ਹੋਤਿ ਪਰਿਕ੍ਕਮਨਾਯ, ਮਿਚ੍ਛਾਕਮ੍ਮਨ੍ਤਸ੍ਸ ਪੁਰਿਸਪੁਗ੍ਗਲਸ੍ਸ ਸਮ੍ਮਾਕਮ੍ਮਨ੍ਤੋ ਹੋਤਿ ਪਰਿਕ੍ਕਮਨਾਯ, ਮਿਚ੍ਛਾਆਜੀਵਸ੍ਸ ਪੁਰਿਸਪੁਗ੍ਗਲਸ੍ਸ ਸਮ੍ਮਾਆਜੀਵੋ ਹੋਤਿ ਪਰਿਕ੍ਕਮਨਾਯ, ਮਿਚ੍ਛਾਵਾਯਾਮਸ੍ਸ ਪੁਰਿਸਪੁਗ੍ਗਲਸ੍ਸ ਸਮ੍ਮਾਵਾਯਾਮੋ ਹੋਤਿ ਪਰਿਕ੍ਕਮਨਾਯ, ਮਿਚ੍ਛਾਸਤਿਸ੍ਸ ਪੁਰਿਸਪੁਗ੍ਗਲਸ੍ਸ ਸਮ੍ਮਾਸਤਿ ਹੋਤਿ ਪਰਿਕ੍ਕਮਨਾਯ, ਮਿਚ੍ਛਾਸਮਾਧਿਸ੍ਸ ਪੁਰਿਸਪੁਗ੍ਗਲਸ੍ਸ ਸਮ੍ਮਾਸਮਾਧਿ ਹੋਤਿ ਪਰਿਕ੍ਕਮਨਾਯ, ਮਿਚ੍ਛਾਞਾਣਿਸ੍ਸ ਪੁਰਿਸਪੁਗ੍ਗਲਸ੍ਸ ਸਮ੍ਮਾਞਾਣਂ ਹੋਤਿ ਪਰਿਕ੍ਕਮਨਾਯ, ਮਿਚ੍ਛਾਵਿਮੁਤ੍ਤਿਸ੍ਸ ਪੁਰਿਸਪੁਗ੍ਗਲਸ੍ਸ ਸਮ੍ਮਾਵਿਮੁਤ੍ਤਿ ਹੋਤਿ ਪਰਿਕ੍ਕਮਨਾਯ.

‘‘ਥੀਨਮਿਦ੍ਧਪਰਿਯੁਟ੍ਠਿਤਸ੍ਸ ਪੁਰਿਸਪੁਗ੍ਗਲਸ੍ਸ ਵਿਗਤਥਿਨਮਿਦ੍ਧਤਾ ਹੋਤਿ ਪਰਿਕ੍ਕਮਨਾਯ, ਉਦ੍ਧਤਸ੍ਸ ਪੁਰਿਸਪੁਗ੍ਗਲਸ੍ਸ ਅਨੁਦ੍ਧਚ੍ਚਂ ਹੋਤਿ ਪਰਿਕ੍ਕਮਨਾਯ, ਵਿਚਿਕਿਚ੍ਛਿਸ੍ਸ ਪੁਰਿਸਪੁਗ੍ਗਲਸ੍ਸ ਤਿਣ੍ਣਵਿਚਿਕਿਚ੍ਛਤਾ ਹੋਤਿ ਪਰਿਕ੍ਕਮਨਾਯ, ਕੋਧਨਸ੍ਸ ਪੁਰਿਸਪੁਗ੍ਗਲਸ੍ਸ ਅਕ੍ਕੋਧੋ ਹੋਤਿ ਪਰਿਕ੍ਕਮਨਾਯ, ਉਪਨਾਹਿਸ੍ਸ ਪੁਰਿਸਪੁਗ੍ਗਲਸ੍ਸ ਅਨੁਪਨਾਹੋ ਹੋਤਿ ਪਰਿਕ੍ਕਮਨਾਯ, ਮਕ੍ਖਿਸ੍ਸ ਪੁਰਿਸਪੁਗ੍ਗਲਸ੍ਸ ਅਮਕ੍ਖੋ ਹੋਤਿ ਪਰਿਕ੍ਕਮਨਾਯ, ਪਲ਼ਾਸਿਸ੍ਸ ਪੁਰਿਸਪੁਗ੍ਗਲਸ੍ਸ ਅਪਲ਼ਾਸੋ ਹੋਤਿ ਪਰਿਕ੍ਕਮਨਾਯ, ਇਸ੍ਸੁਕਿਸ੍ਸ ਪੁਰਿਸਪੁਗ੍ਗਲਸ੍ਸ ਅਨਿਸ੍ਸੁਕਿਤਾ ਹੋਤਿ ਪਰਿਕ੍ਕਮਨਾਯ, ਮਚ੍ਛਰਿਸ੍ਸ ਪੁਰਿਸਪੁਗ੍ਗਲਸ੍ਸ ਅਮਚ੍ਛਰਿਯਂ ਹੋਤਿ ਪਰਿਕ੍ਕਮਨਾਯ, ਸਠਸ੍ਸ ਪੁਰਿਸਪੁਗ੍ਗਲਸ੍ਸ ਅਸਾਠੇਯ੍ਯਂ ਹੋਤਿ ਪਰਿਕ੍ਕਮਨਾਯ, ਮਾਯਾਵਿਸ੍ਸ ਪੁਰਿਸਪੁਗ੍ਗਲਸ੍ਸ ਅਮਾਯਾ [ਅਮਾਯਾਵਿਤਾ (ਕ.)] ਹੋਤਿ ਪਰਿਕ੍ਕਮਨਾਯ, ਥਦ੍ਧਸ੍ਸ ਪੁਰਿਸਪੁਗ੍ਗਲਸ੍ਸ ਅਤ੍ਥਦ੍ਧਿਯਂ ਹੋਤਿ ਪਰਿਕ੍ਕਮਨਾਯ, ਅਤਿਮਾਨਿਸ੍ਸ ਪੁਰਿਸਪੁਗ੍ਗਲਸ੍ਸ ਅਨਤਿਮਾਨੋ ਹੋਤਿ ਪਰਿਕ੍ਕਮਨਾਯ, ਦੁਬ੍ਬਚਸ੍ਸ ਪੁਰਿਸਪੁਗ੍ਗਲਸ੍ਸ ਸੋਵਚਸ੍ਸਤਾ ਹੋਤਿ ਪਰਿਕ੍ਕਮਨਾਯ, ਪਾਪਮਿਤ੍ਤਸ੍ਸ ਪੁਰਿਸਪੁਗ੍ਗਲਸ੍ਸ ਕਲ੍ਯਾਣਮਿਤ੍ਤਤਾ ਹੋਤਿ ਪਰਿਕ੍ਕਮਨਾਯ, ਪਮਤ੍ਤਸ੍ਸ ਪੁਰਿਸਪੁਗ੍ਗਲਸ੍ਸ ਅਪ੍ਪਮਾਦੋ ਹੋਤਿ ਪਰਿਕ੍ਕਮਨਾਯ, ਅਸ੍ਸਦ੍ਧਸ੍ਸ ਪੁਰਿਸਪੁਗ੍ਗਲਸ੍ਸ ਸਦ੍ਧਾ ਹੋਤਿ ਪਰਿਕ੍ਕਮਨਾਯ, ਅਹਿਰਿਕਸ੍ਸ ਪੁਰਿਸਪੁਗ੍ਗਲਸ੍ਸ ਹਿਰੀ ਹੋਤਿ ਪਰਿਕ੍ਕਮਨਾਯ, ਅਨੋਤ੍ਤਾਪਿਸ੍ਸ ਪੁਰਿਸਪੁਗ੍ਗਲਸ੍ਸ ਓਤ੍ਤਪ੍ਪਂ ਹੋਤਿ ਪਰਿਕ੍ਕਮਨਾਯ, ਅਪ੍ਪਸ੍ਸੁਤਸ੍ਸ ਪੁਰਿਸਪੁਗ੍ਗਲਸ੍ਸ ਬਾਹੁਸਚ੍ਚਂ ਹੋਤਿ ਪਰਿਕ੍ਕਮਨਾਯ, ਕੁਸੀਤਸ੍ਸ ਪੁਰਿਸਪੁਗ੍ਗਲਸ੍ਸ ਵੀਰਿਯਾਰਮ੍ਭੋ ਹੋਤਿ ਪਰਿਕ੍ਕਮਨਾਯ, ਮੁਟ੍ਠਸ੍ਸਤਿਸ੍ਸ ਪੁਰਿਸਪੁਗ੍ਗਲਸ੍ਸ ਉਪਟ੍ਠਿਤਸ੍ਸਤਿਤਾ ਹੋਤਿ ਪਰਿਕ੍ਕਮਨਾਯ, ਦੁਪ੍ਪਞ੍ਞਸ੍ਸ ਪੁਰਿਸਪੁਗ੍ਗਲਸ੍ਸ ਪਞ੍ਞਾਸਮ੍ਪਦਾ ਹੋਤਿ ਪਰਿਕ੍ਕਮਨਾਯ, ਸਨ੍ਦਿਟ੍ਠਿਪਰਾਮਾਸਿ-ਆਧਾਨਗ੍ਗਾਹਿ-ਦੁਪ੍ਪਟਿਨਿਸ੍ਸਗ੍ਗਿਸ੍ਸ ਪੁਰਿਸਪੁਗ੍ਗਲਸ੍ਸ ਅਸਨ੍ਦਿਟ੍ਠਿਪਰਾਮਾਸਿਅਨਾਧਾਨਗ੍ਗਾਹਿ-ਸੁਪ੍ਪਟਿਨਿਸ੍ਸਗ੍ਗਿਤਾ ਹੋਤਿ ਪਰਿਕ੍ਕਮਨਾਯ.

੮੬. ‘‘ਸੇਯ੍ਯਥਾਪਿ, ਚੁਨ੍ਦ, ਯੇ ਕੇਚਿ ਅਕੁਸਲਾ ਧਮ੍ਮਾ ਸਬ੍ਬੇ ਤੇ ਅਧੋਭਾਗਙ੍ਗਮਨੀਯਾ [ਅਧੋਭਾਵਙ੍ਗਮਨੀਯਾ (ਸੀ. ਸ੍ਯਾ. ਪੀ.)], ਯੇ ਕੇਚਿ ਕੁਸਲਾ ਧਮ੍ਮਾ ਸਬ੍ਬੇ ਤੇ ਉਪਰਿਭਾਗਙ੍ਗਮਨੀਯਾ [ਉਪਰਿਭਾਵਙ੍ਗਮਨੀਯਾ (ਸੀ. ਸ੍ਯਾ. ਪੀ.)], ਏਵਮੇਵ ਖੋ, ਚੁਨ੍ਦ, ਵਿਹਿਂਸਕਸ੍ਸ ਪੁਰਿਸਪੁਗ੍ਗਲਸ੍ਸ ਅਵਿਹਿਂਸਾ ਹੋਤਿ ਉਪਰਿਭਾਗਾਯ [ਉਪਰਿਭਾਵਾਯ (ਸੀ. ਸ੍ਯਾ. ਕ.)], ਪਾਣਾਤਿਪਾਤਿਸ੍ਸ ਪੁਰਿਸਪੁਗ੍ਗਲਸ੍ਸ ਪਾਣਾਤਿਪਾਤਾ ਵੇਰਮਣੀ ਹੋਤਿ ਉਪਰਿਭਾਗਾਯ…ਪੇ… ਸਨ੍ਦਿਟ੍ਠਿਪਰਾਮਾਸਿ-ਆਧਾਨਗ੍ਗਾਹਿ-ਦੁਪ੍ਪਟਿਨਿਸ੍ਸਗ੍ਗਿਸ੍ਸ ਪੁਰਿਸਪੁਗ੍ਗਲਸ੍ਸ ਅਸਨ੍ਦਿਟ੍ਠਿਪਰਾਮਾਸਿ-ਅਨਾਧਾਨਗ੍ਗਾਹਿ-ਸੁਪ੍ਪਟਿਨਿਸ੍ਸਗ੍ਗਿਤਾ ਹੋਤਿ ਉਪਰਿਭਾਗਾਯ.

੮੭. ‘‘ਸੋ ਵਤ, ਚੁਨ੍ਦ, ਅਤ੍ਤਨਾ ਪਲਿਪਪਲਿਪਨ੍ਨੋ ਪਰਂ ਪਲਿਪਪਲਿਪਨ੍ਨਂ ਉਦ੍ਧਰਿਸ੍ਸਤੀਤਿ ਨੇਤਂ ਠਾਨਂ ਵਿਜ੍ਜਤਿ. ਸੋ ਵਤ, ਚੁਨ੍ਦ, ਅਤ੍ਤਨਾ ਅਪਲਿਪਪਲਿਪਨ੍ਨੋ ਪਰਂ ਪਲਿਪਪਲਿਪਨ੍ਨਂ ਉਦ੍ਧਰਿਸ੍ਸਤੀਤਿ ਠਾਨਮੇਤਂ ਵਿਜ੍ਜਤਿ. ਸੋ ਵਤ, ਚੁਨ੍ਦ, ਅਤ੍ਤਨਾ ਅਦਨ੍ਤੋ ਅਵਿਨੀਤੋ ਅਪਰਿਨਿਬ੍ਬੁਤੋ ਪਰਂ ਦਮੇਸ੍ਸਤਿ ਵਿਨੇਸ੍ਸਤਿ ਪਰਿਨਿਬ੍ਬਾਪੇਸ੍ਸਤੀਤਿ ਨੇਤਂ ਠਾਨਂ ਵਿਜ੍ਜਤਿ. ਸੋ ਵਤ, ਚੁਨ੍ਦ, ਅਤ੍ਤਨਾ ਦਨ੍ਤੋ ਵਿਨੀਤੋ ਪਰਿਨਿਬ੍ਬੁਤੋ ਪਰਂ ਦਮੇਸ੍ਸਤਿ ਵਿਨੇਸ੍ਸਤਿ ਪਰਿਨਿਬ੍ਬਾਪੇਸ੍ਸਤੀਤਿ ਠਾਨਮੇਤਂ ਵਿਜ੍ਜਤਿ. ਏਵਮੇਵ ਖੋ, ਚੁਨ੍ਦ, ਵਿਹਿਂਸਕਸ੍ਸ ਪੁਰਿਸਪੁਗ੍ਗਲਸ੍ਸ ਅਵਿਹਿਂਸਾ ਹੋਤਿ ਪਰਿਨਿਬ੍ਬਾਨਾਯ, ਪਾਣਾਤਿਪਾਤਿਸ੍ਸ ਪੁਰਿਸਪੁਗ੍ਗਲਸ੍ਸ ਪਾਣਾਤਿਪਾਤਾ ਵੇਰਮਣੀ ਹੋਤਿ ਪਰਿਨਿਬ੍ਬਾਨਾਯ. ਅਦਿਨ੍ਨਾਦਾਯਿਸ੍ਸ ਪੁਰਿਸਪੁਗ੍ਗਲਸ੍ਸ ਅਦਿਨ੍ਨਾਦਾਨਾ ਵੇਰਮਣੀ ਹੋਤਿ ਪਰਿਨਿਬ੍ਬਾਨਾਯ. ਅਬ੍ਰਹ੍ਮਚਾਰਿਸ੍ਸ ਪੁਰਿਸਪੁਗ੍ਗਲਸ੍ਸ ਅਬ੍ਰਹ੍ਮਚਰਿਯਾ ਵੇਰਮਣੀ ਹੋਤਿ ਪਰਿਨਿਬ੍ਬਾਨਾਯ. ਮੁਸਾਵਾਦਿਸ੍ਸ ਪੁਰਿਸਪੁਗ੍ਗਲਸ੍ਸ ਮੁਸਾਵਾਦਾ ਵੇਰਮਣੀ ਹੋਤਿ ਪਰਿਨਿਬ੍ਬਾਨਾਯ. ਪਿਸੁਣਵਾਚਸ੍ਸ ਪੁਰਿਸਪੁਗ੍ਗਲਸ੍ਸ ਪਿਸੁਣਾਯ ਵਾਚਾਯ ਵੇਰਮਣੀ ਹੋਤਿ ਪਰਿਨਿਬ੍ਬਾਨਾਯ. ਫਰੁਸਵਾਚਸ੍ਸ ਪੁਰਿਸਪੁਗ੍ਗਲਸ੍ਸ ਫਰੁਸਾਯ ਵਾਚਾਯ ਵੇਰਮਣੀ ਹੋਤਿ ਪਰਿਨਿਬ੍ਬਾਨਾਯ. ਸਮ੍ਫਪ੍ਪਲਾਪਿਸ੍ਸ ਪੁਰਿਸਪੁਗ੍ਗਲਸ੍ਸ ਸਮ੍ਫਪ੍ਪਲਾਪਾ ਵੇਰਮਣੀ ਹੋਤਿ ਪਰਿਨਿਬ੍ਬਾਨਾਯ. ਅਭਿਜ੍ਝਾਲੁਸ੍ਸ ਪੁਰਿਸਪੁਗ੍ਗਲਸ੍ਸ ਅਨਭਿਜ੍ਝਾ ਹੋਤਿ ਪਰਿਨਿਬ੍ਬਾਨਾਯ. ਬ੍ਯਾਪਨ੍ਨਚਿਤ੍ਤਸ੍ਸ ਪੁਰਿਸਪੁਗ੍ਗਲਸ੍ਸ ਅਬ੍ਯਾਪਾਦੋ ਹੋਤਿ ਪਰਿਨਿਬ੍ਬਾਨਾਯ. ਮਿਚ੍ਛਾਦਿਟ੍ਠਿਸ੍ਸ ਪੁਰਿਸਪੁਗ੍ਗਲਸ੍ਸ ਸਮ੍ਮਾਦਿਟ੍ਠਿ ਹੋਤਿ ਪਰਿਨਿਬ੍ਬਾਨਾਯ. ਮਿਚ੍ਛਾਸਙ੍ਕਪ੍ਪਸ੍ਸ ਪੁਰਿਸਪੁਗ੍ਗਲਸ੍ਸ ਸਮ੍ਮਾਸਙ੍ਕਪ੍ਪੋ ਹੋਤਿ ਪਰਿਨਿਬ੍ਬਾਨਾਯ. ਮਿਚ੍ਛਾਵਾਚਸ੍ਸ ਪੁਰਿਸਪੁਗ੍ਗਲਸ੍ਸ ਸਮ੍ਮਾਵਾਚਾ ਹੋਤਿ ਪਰਿਨਿਬ੍ਬਾਨਾਯ. ਮਿਚ੍ਛਾਕਮ੍ਮਨ੍ਤਸ੍ਸ ਪੁਰਿਸਪੁਗ੍ਗਲਸ੍ਸ ਸਮ੍ਮਾਕਮ੍ਮਨ੍ਤੋ ਹੋਤਿ ਪਰਿਨਿਬ੍ਬਾਨਾਯ. ਮਿਚ੍ਛਾਆਜੀਵਸ੍ਸ ਪੁਰਿਸਪੁਗ੍ਗਲਸ੍ਸ ਸਮ੍ਮਾਆਜੀਵੋ ਹੋਤਿ ਪਰਿਨਿਬ੍ਬਾਨਾਯ. ਮਿਚ੍ਛਾਵਾਯਾਮਸ੍ਸ ਪੁਰਿਸਪੁਗ੍ਗਲਸ੍ਸ ਸਮ੍ਮਾਵਾਯਾਮੋ ਹੋਤਿ ਪਰਿਨਿਬ੍ਬਾਨਾਯ. ਮਿਚ੍ਛਾਸਤਿਸ੍ਸ ਪੁਰਿਸਪੁਗ੍ਗਲਸ੍ਸ ਸਮ੍ਮਾਸਤਿ ਹੋਤਿ ਪਰਿਨਿਬ੍ਬਾਨਾਯ. ਮਿਚ੍ਛਾਸਮਾਧਿਸ੍ਸ ਪੁਰਿਸਪੁਗ੍ਗਲਸ੍ਸ ਸਮ੍ਮਾਸਮਾਧਿ ਹੋਤਿ ਪਰਿਨਿਬ੍ਬਾਨਾਯ. ਮਿਚ੍ਛਾਞਾਣਿਸ੍ਸ ਪੁਰਿਸਪੁਗ੍ਗਲਸ੍ਸ ਸਮ੍ਮਾਞਾਣਂ ਹੋਤਿ ਪਰਿਨਿਬ੍ਬਾਨਾਯ. ਮਿਚ੍ਛਾਵਿਮੁਤ੍ਤਿਸ੍ਸ ਪੁਰਿਸਪੁਗ੍ਗਲਸ੍ਸ ਸਮ੍ਮਾਵਿਮੁਤ੍ਤਿ ਹੋਤਿ ਪਰਿਨਿਬ੍ਬਾਨਾਯ.

‘‘ਥੀਨਮਿਦ੍ਧਪਰਿਯੁਟ੍ਠਿਤਸ੍ਸ ਪੁਰਿਸਪੁਗ੍ਗਲਸ੍ਸ ਵਿਗਤਥਿਨਮਿਦ੍ਧਤਾ ਹੋਤਿ ਪਰਿਨਿਬ੍ਬਾਨਾਯ. ਉਦ੍ਧਤਸ੍ਸ ਪੁਰਿਸਪੁਗ੍ਗਲਸ੍ਸ ਅਨੁਦ੍ਧਚ੍ਚਂ ਹੋਤਿ ਪਰਿਨਿਬ੍ਬਾਨਾਯ. ਵਿਚਿਕਿਚ੍ਛਿਸ੍ਸ ਪੁਰਿਸਪੁਗ੍ਗਲਸ੍ਸ ਤਿਣ੍ਣਵਿਚਿਕਿਚ੍ਛਤਾ ਹੋਤਿ ਪਰਿਨਿਬ੍ਬਾਨਾਯ. ਕੋਧਨਸ੍ਸ ਪੁਰਿਸਪੁਗ੍ਗਲਸ੍ਸ ਅਕ੍ਕੋਧੋ ਹੋਤਿ ਪਰਿਨਿਬ੍ਬਾਨਾਯ. ਉਪਨਾਹਿਸ੍ਸ ਪੁਰਿਸਪੁਗ੍ਗਲਸ੍ਸ ਅਨੁਪਨਾਹੋ ਹੋਤਿ ਪਰਿਨਿਬ੍ਬਾਨਾਯ. ਮਕ੍ਖਿਸ੍ਸ ਪੁਰਿਸਪੁਗ੍ਗਲਸ੍ਸ ਅਮਕ੍ਖੋ ਹੋਤਿ ਪਰਿਨਿਬ੍ਬਾਨਾਯ. ਪਲ਼ਾਸਿਸ੍ਸ ਪੁਰਿਸਪੁਗ੍ਗਲਸ੍ਸ ਅਪਲ਼ਾਸੋ ਹੋਤਿ ਪਰਿਨਿਬ੍ਬਾਨਾਯ. ਇਸ੍ਸੁਕਿਸ੍ਸ ਪੁਰਿਸਪੁਗ੍ਗਲਸ੍ਸ ਅਨਿਸ੍ਸੁਕਿਤਾ ਹੋਤਿ ਪਰਿਨਿਬ੍ਬਾਨਾਯ. ਮਚ੍ਛਰਿਸ੍ਸ ਪੁਰਿਸਪੁਗ੍ਗਲਸ੍ਸ ਅਮਚ੍ਛਰਿਯਂ ਹੋਤਿ ਪਰਿਨਿਬ੍ਬਾਨਾਯ. ਸਠਸ੍ਸ ਪੁਰਿਸਪੁਗ੍ਗਲਸ੍ਸ ਅਸਾਠੇਯ੍ਯਂ ਹੋਤਿ ਪਰਿਨਿਬ੍ਬਾਨਾਯ. ਮਾਯਾਵਿਸ੍ਸ ਪੁਰਿਸਪੁਗ੍ਗਲਸ੍ਸ ਅਮਾਯਾ ਹੋਤਿ ਪਰਿਨਿਬ੍ਬਾਨਾਯ. ਥਦ੍ਧਸ੍ਸ ਪੁਰਿਸਪੁਗ੍ਗਲਸ੍ਸ ਅਤ੍ਥਦ੍ਧਿਯਂ ਹੋਤਿ ਪਰਿਨਿਬ੍ਬਾਨਾਯ. ਅਤਿਮਾਨਿਸ੍ਸ ਪੁਰਿਸਪੁਗ੍ਗਲਸ੍ਸ ਅਨਤਿਮਾਨੋ ਹੋਤਿ ਪਰਿਨਿਬ੍ਬਾਨਾਯ. ਦੁਬ੍ਬਚਸ੍ਸ ਪੁਰਿਸਪੁਗ੍ਗਲਸ੍ਸ ਸੋਵਚਸ੍ਸਤਾ ਹੋਤਿ ਪਰਿਨਿਬ੍ਬਾਨਾਯ. ਪਾਪਮਿਤ੍ਤਸ੍ਸ ਪੁਰਿਸਪੁਗ੍ਗਲਸ੍ਸ ਕਲ੍ਯਾਣਮਿਤ੍ਤਤਾ ਹੋਤਿ ਪਰਿਨਿਬ੍ਬਾਨਾਯ. ਪਮਤ੍ਤਸ੍ਸ ਪੁਰਿਸਪੁਗ੍ਗਲਸ੍ਸ ਅਪ੍ਪਮਾਦੋ ਹੋਤਿ ਪਰਿਨਿਬ੍ਬਾਨਾਯ. ਅਸ੍ਸਦ੍ਧਸ੍ਸ ਪੁਰਿਸਪੁਗ੍ਗਲਸ੍ਸ ਸਦ੍ਧਾ ਹੋਤਿ ਪਰਿਨਿਬ੍ਬਾਨਾਯ. ਅਹਿਰਿਕਸ੍ਸ ਪੁਰਿਸਪੁਗ੍ਗਲਸ੍ਸ ਹਿਰੀ ਹੋਤਿ ਪਰਿਨਿਬ੍ਬਾਨਾਯ. ਅਨੋਤ੍ਤਾਪਿਸ੍ਸ ਪੁਰਿਸਪੁਗ੍ਗਲਸ੍ਸ ਓਤ੍ਤਪ੍ਪਂ ਹੋਤਿ ਪਰਿਨਿਬ੍ਬਾਨਾਯ. ਅਪ੍ਪਸ੍ਸੁਤਸ੍ਸ ਪੁਰਿਸਪੁਗ੍ਗਲਸ੍ਸ ਬਾਹੁਸਚ੍ਚਂ ਹੋਤਿ ਪਰਿਨਿਬ੍ਬਾਨਾਯ. ਕੁਸੀਤਸ੍ਸ ਪੁਰਿਸਪੁਗ੍ਗਲਸ੍ਸ ਵੀਰਿਯਾਰਮ੍ਭੋ ਹੋਤਿ ਪਰਿਨਿਬ੍ਬਾਨਾਯ. ਮੁਟ੍ਠਸ੍ਸਤਿਸ੍ਸ ਪੁਰਿਸਪੁਗ੍ਗਲਸ੍ਸ ਉਪਟ੍ਠਿਤਸ੍ਸਤਿਤਾ ਹੋਤਿ ਪਰਿਨਿਬ੍ਬਾਨਾਯ. ਦੁਪ੍ਪਞ੍ਞਸ੍ਸ ਪੁਰਿਸਪੁਗ੍ਗਲਸ੍ਸ ਪਞ੍ਞਾਸਮ੍ਪਦਾ ਹੋਤਿ ਪਰਿਨਿਬ੍ਬਾਨਾਯ. ਸਨ੍ਦਿਟ੍ਠਿਪਰਾਮਾਸਿ-ਆਧਾਨਗ੍ਗਾਹਿ-ਦੁਪ੍ਪਟਿਨਿਸ੍ਸਗ੍ਗਿਸ੍ਸ ਪੁਰਿਸਪੁਗ੍ਗਲਸ੍ਸ ਅਸਨ੍ਦਿਟ੍ਠਿਪਰਾਮਾਸਿ-ਅਨਾਧਾਨਗ੍ਗਾਹਿ-ਸੁਪ੍ਪਟਿਨਿਸ੍ਸਗ੍ਗਿਤਾ ਹੋਤਿ ਪਰਿਨਿਬ੍ਬਾਨਾਯ.

੮੮. ‘‘ਇਤਿ ਖੋ, ਚੁਨ੍ਦ, ਦੇਸਿਤੋ ਮਯਾ ਸਲ੍ਲੇਖਪਰਿਯਾਯੋ, ਦੇਸਿਤੋ ਚਿਤ੍ਤੁਪ੍ਪਾਦਪਰਿਯਾਯੋ, ਦੇਸਿਤੋ ਪਰਿਕ੍ਕਮਨਪਰਿਯਾਯੋ, ਦੇਸਿਤੋ ਉਪਰਿਭਾਗਪਰਿਯਾਯੋ, ਦੇਸਿਤੋ ਪਰਿਨਿਬ੍ਬਾਨਪਰਿਯਾਯੋ. ਯਂ ਖੋ, ਚੁਨ੍ਦ, ਸਤ੍ਥਾਰਾ ਕਰਣੀਯਂ ਸਾਵਕਾਨਂ ਹਿਤੇਸਿਨਾ ਅਨੁਕਮ੍ਪਕੇਨ ਅਨੁਕਮ੍ਪਂ ਉਪਾਦਾਯ, ਕਤਂ ਵੋ ਤਂ ਮਯਾ. ‘ਏਤਾਨਿ, ਚੁਨ੍ਦ, ਰੁਕ੍ਖਮੂਲਾਨਿ, ਏਤਾਨਿ ਸੁਞ੍ਞਾਗਾਰਾਨਿ, ਝਾਯਥ, ਚੁਨ੍ਦ, ਮਾ ਪਮਾਦਤ੍ਥ, ਮਾ ਪਚ੍ਛਾਵਿਪ੍ਪਟਿਸਾਰਿਨੋ ਅਹੁਵਤ੍ਥ’ – ਅਯਂ ਖੋ ਅਮ੍ਹਾਕਂ ਅਨੁਸਾਸਨੀ’’ਤਿ.

ਇਦਮਵੋਚ ਭਗਵਾ. ਅਤ੍ਤਮਨੋ ਆਯਸ੍ਮਾ ਮਹਾਚੁਨ੍ਦੋ ਭਗਵਤੋ ਭਾਸਿਤਂ ਅਭਿਨਨ੍ਦੀਤਿ.

ਚਤੁਤ੍ਤਾਲੀਸਪਦਾ ਵੁਤ੍ਤਾ, ਸਨ੍ਧਯੋ ਪਞ੍ਚ ਦੇਸਿਤਾ;

ਸਲ੍ਲੇਖੋ ਨਾਮ ਸੁਤ੍ਤਨ੍ਤੋ, ਗਮ੍ਭੀਰੋ ਸਾਗਰੂਪਮੋਤਿ.

ਸਲ੍ਲੇਖਸੁਤ੍ਤਂ ਨਿਟ੍ਠਿਤਂ ਅਟ੍ਠਮਂ.