੭. ਕਣ੍ਡਕਵਿਮਾਨਵਤ੍ਥੁ

੧੧੭੧. ‘‘ਪੁਣ੍ਣਮਾਸੇ ਯਥਾ ਚਨ੍ਦੋ, ਨਕ੍ਖਤ੍ਤਪਰਿਵਾਰਿਤੋ;

ਸਮਨ੍ਤਾ ਅਨੁਪਰਿਯਾਤਿ, ਤਾਰਕਾਧਿਪਤੀ ਸਸੀ.

੧੧੭੨. ‘‘ਤਥੂਪਮਂ ਇਦਂ ਬ੍ਯਮ੍ਹਂ, ਦਿਬ੍ਬਂ ਦੇਵਪੁਰਮ੍ਹਿ ਚ;

ਅਤਿਰੋਚਤਿ ਵਣ੍ਣੇਨ, ਉਦਯਨ੍ਤੋਵ ਰਂਸਿਮਾ.

੧੧੭੩. ‘‘ਵੇਲ਼ੁਰਿਯਸੁਵਣ੍ਣਸ੍ਸ, ਫਲਿਕਾ ਰੂਪਿਯਸ੍ਸ ਚ;

ਮਸਾਰਗਲ੍ਲਮੁਤ੍ਤਾਹਿ, ਲੋਹਿਤਙ੍ਗਮਣੀਹਿ ਚ.

੧੧੭੪. ‘‘ਚਿਤ੍ਰਾ ਮਨੋਰਮਾ ਭੂਮਿ, ਵੇਲ਼ੂਰਿਯਸ੍ਸ ਸਨ੍ਥਤਾ;

ਕੂਟਾਗਾਰਾ ਸੁਭਾ ਰਮ੍ਮਾ, ਪਾਸਾਦੋ ਤੇ ਸੁਮਾਪਿਤੋ.

੧੧੭੫. ‘‘ਰਮ੍ਮਾ ਚ ਤੇ ਪੋਕ੍ਖਰਣੀ, ਪੁਥੁਲੋਮਨਿਸੇਵਿਤਾ;

ਅਚ੍ਛੋਦਕਾ ਵਿਪ੍ਪਸਨ੍ਨਾ, ਸੋਵਣ੍ਣਵਾਲੁਕਸਨ੍ਥਤਾ.

੧੧੭੬. ‘‘ਨਾਨਾਪਦੁਮਸਞ੍ਛਨ੍ਨਾ, ਪੁਣ੍ਡਰੀਕਸਮੋਤਤਾ [ਸਮੋਤ੍ਥਤਾ (ਕ.), ਸਮੋਗਤਾ (ਸ੍ਯਾ.)];

ਸੁਰਭਿਂ ਸਮ੍ਪਵਾਯਨ੍ਤਿ, ਮਨੁਞ੍ਞਾ ਮਾਲੁਤੇਰਿਤਾ.

੧੧੭੭. ‘‘ਤਸ੍ਸਾ ਤੇ ਉਭਤੋ ਪਸ੍ਸੇ, ਵਨਗੁਮ੍ਬਾ ਸੁਮਾਪਿਤਾ;

ਉਪੇਤਾ ਪੁਪ੍ਫਰੁਕ੍ਖੇਹਿ, ਫਲਰੁਕ੍ਖੇਹਿ ਚੂਭਯਂ.

੧੧੭੮. ‘‘ਸੋਵਣ੍ਣਪਾਦੇ ਪਲ੍ਲਙ੍ਕੇ, ਮੁਦੁਕੇ ਗੋਣਕਤ੍ਥਤੇ [ਚੋਲਸਨ੍ਥਤੇ (ਸੀ.)];

ਨਿਸਿਨ੍ਨਂ ਦੇਵਰਾਜਂਵ, ਉਪਤਿਟ੍ਠਨ੍ਤਿ ਅਚ੍ਛਰਾ.

੧੧੭੯. ‘‘ਸਬ੍ਬਾਭਰਣਸਞ੍ਛਨ੍ਨਾ, ਨਾਨਾਮਾਲਾਵਿਭੂਸਿਤਾ;

ਰਮੇਨ੍ਤਿ ਤਂ ਮਹਿਦ੍ਧਿਕਂ, ਵਸਵਤ੍ਤੀਵ ਮੋਦਸਿ.

੧੧੮੦. ‘‘ਭੇਰਿਸਙ੍ਖਮੁਦਿਙ੍ਗਾਹਿ, ਵੀਣਾਹਿ ਪਣਵੇਹਿ ਚ;

ਰਮਸਿ ਰਤਿਸਮ੍ਪਨ੍ਨੋ, ਨਚ੍ਚਗੀਤੇ ਸੁਵਾਦਿਤੇ.

੧੧੮੧. ‘‘ਦਿਬ੍ਬਾ ਤੇ ਵਿਵਿਧਾ ਰੂਪਾ, ਦਿਬ੍ਬਾ ਸਦ੍ਦਾ ਅਥੋ ਰਸਾ;

ਗਨ੍ਧਾ ਚ ਤੇ ਅਧਿਪ੍ਪੇਤਾ, ਫੋਟ੍ਠਬ੍ਬਾ ਚ ਮਨੋਰਮਾ.

੧੧੮੨. ‘‘ਤਸ੍ਮਿਂ ਵਿਮਾਨੇ ਪਵਰੇ, ਦੇਵਪੁਤ੍ਤ ਮਹਪ੍ਪਭੋ;

ਅਤਿਰੋਚਸਿ ਵਣ੍ਣੇਨ, ਉਦਯਨ੍ਤੋਵ ਭਾਣੁਮਾ.

੧੧੮੩. ‘‘ਦਾਨਸ੍ਸ ਤੇ ਇਦਂ ਫਲਂ, ਅਥੋ ਸੀਲਸ੍ਸ ਵਾ ਪਨ;

ਅਥੋ ਅਞ੍ਜਲਿਕਮ੍ਮਸ੍ਸ, ਤਂ ਮੇ ਅਕ੍ਖਾਹਿ ਪੁਚ੍ਛਿਤੋ’’.

੧੧੮੪. ਸੋ ਦੇਵਪੁਤ੍ਤੋ ਅਤ੍ਤਮਨੋ…ਪੇ… ਯਸ੍ਸ ਕਮ੍ਮਸ੍ਸਿਦਂ ਫਲਂ.

੧੧੮੫. ‘‘ਅਹਂ ਕਪਿਲਵਤ੍ਥੁਸ੍ਮਿਂ, ਸਾਕਿਯਾਨਂ ਪੁਰੁਤ੍ਤਮੇ;

ਸੁਦ੍ਧੋਦਨਸ੍ਸ ਪੁਤ੍ਤਸ੍ਸ, ਕਣ੍ਡਕੋ ਸਹਜੋ ਅਹਂ.

੧੧੮੬. ‘‘ਯਦਾ ਸੋ ਅਡ੍ਢਰਤ੍ਤਾਯਂ, ਬੋਧਾਯ ਮਭਿਨਿਕ੍ਖਮਿ;

ਸੋ ਮਂ ਮੁਦੂਹਿ ਪਾਣੀਹਿ, ਜਾਲਿ [ਜਾਲ (ਸੀ.)] ਤਮ੍ਬਨਖੇਹਿ ਚ.

੧੧੮੭. ‘‘ਸਤ੍ਥਿਂ ਆਕੋਟਯਿਤ੍ਵਾਨ, ਵਹ ਸਮ੍ਮਾਤਿ ਚਬ੍ਰਵਿ;

ਅਹਂ ਲੋਕਂ ਤਾਰਯਿਸ੍ਸਂ, ਪਤ੍ਤੋ ਸਮ੍ਬੋਧਿਮੁਤ੍ਤਮਂ.

੧੧੮੮. ‘‘ਤਂ ਮੇ ਗਿਰਂ ਸੁਣਨ੍ਤਸ੍ਸ, ਹਾਸੋ ਮੇ ਵਿਪੁਲੋ ਅਹੁ;

ਉਦਗ੍ਗਚਿਤ੍ਤੋ ਸੁਮਨੋ, ਅਭਿਸੀਸਿਂ [ਅਭਿਸਿਂਸਿਂ (ਸੀ.), ਅਭਿਸੀਸਿ (ਪੀ.)] ਤਦਾ ਅਹਂ.

੧੧੮੯. ‘‘ਅਭਿਰੂਲ਼੍ਹਞ੍ਚ ਮਂ ਞਤ੍ਵਾ, ਸਕ੍ਯਪੁਤ੍ਤਂ ਮਹਾਯਸਂ;

ਉਦਗ੍ਗਚਿਤ੍ਤੋ ਮੁਦਿਤੋ, ਵਹਿਸ੍ਸਂ ਪੁਰਿਸੁਤ੍ਤਮਂ.

੧੧੯੦. ‘‘ਪਰੇਸਂ ਵਿਜਿਤਂ ਗਨ੍ਤ੍ਵਾ, ਉਗ੍ਗਤਸ੍ਮਿਂ ਦਿਵਾਕਰੇ [ਦਿਵਙ੍ਕਰੇ (ਸ੍ਯਾ. ਕ.)];

ਮਮਂ ਛਨ੍ਨਞ੍ਚ ਓਹਾਯ, ਅਨਪੇਕ੍ਖੋ ਸੋ ਅਪਕ੍ਕਮਿ.

੧੧੯੧. ‘‘ਤਸ੍ਸ ਤਮ੍ਬਨਖੇ ਪਾਦੇ, ਜਿਵ੍ਹਾਯ ਪਰਿਲੇਹਿਸਂ;

ਗਚ੍ਛਨ੍ਤਞ੍ਚ ਮਹਾਵੀਰਂ, ਰੁਦਮਾਨੋ ਉਦਿਕ੍ਖਿਸਂ.

੧੧੯੨. ‘‘ਅਦਸ੍ਸਨੇਨਹਂ ਤਸ੍ਸ, ਸਕ੍ਯਪੁਤ੍ਤਸ੍ਸ ਸਿਰੀਮਤੋ;

ਅਲਤ੍ਥਂ ਗਰੁਕਾਬਾਧਂ, ਖਿਪ੍ਪਂ ਮੇ ਮਰਣਂ ਅਹੁ.

੧੧੯੩. ‘‘ਤਸ੍ਸੇਵ ਆਨੁਭਾਵੇਨ, ਵਿਮਾਨਂ ਆਵਸਾਮਿਦਂ;

ਸਬ੍ਬਕਾਮਗੁਣੋਪੇਤਂ, ਦਿਬ੍ਬਂ ਦੇਵਪੁਰਮ੍ਹਿ ਚ.

੧੧੯੪. ‘‘ਯਞ੍ਚ ਮੇ ਅਹੁਵਾ ਹਾਸੋ, ਸਦ੍ਦਂ ਸੁਤ੍ਵਾਨ ਬੋਧਿਯਾ;

ਤੇਨੇਵ ਕੁਸਲਮੂਲੇਨ, ਫੁਸਿਸ੍ਸਂ ਆਸਵਕ੍ਖਯਂ.

੧੧੯੫. ‘‘ਸਚੇ ਹਿ ਭਨ੍ਤੇ ਗਚ੍ਛੇਯ੍ਯਾਸਿ, ਸਤ੍ਥੁ ਬੁਦ੍ਧਸ੍ਸ ਸਨ੍ਤਿਕੇ;

ਮਮਾਪਿ ਨਂ ਵਚਨੇਨ, ਸਿਰਸਾ ਵਜ੍ਜਾਸਿ ਵਨ੍ਦਨਂ.

੧੧੯੬. ‘‘ਅਹਮ੍ਪਿ ਦਟ੍ਠੁਂ ਗਚ੍ਛਿਸ੍ਸਂ, ਜਿਨਂ ਅਪ੍ਪਟਿਪੁਗ੍ਗਲਂ;

ਦੁਲ੍ਲਭਂ ਦਸ੍ਸਨਂ ਹੋਤਿ, ਲੋਕਨਾਥਾਨ ਤਾਦਿਨ’’ਨ੍ਤਿ.

੧੧੯੭. ਸੋ ਕਤਞ੍ਞੂ ਕਤਵੇਦੀ, ਸਤ੍ਥਾਰਂ ਉਪਸਙ੍ਕਮਿ;

ਸੁਤ੍ਵਾ ਗਿਰਂ ਚਕ੍ਖੁਮਤੋ, ਧਮ੍ਮਚਕ੍ਖੁਂ ਵਿਸੋਧਯਿ.

੧੧੯੮. ਵਿਸੋਧੇਤ੍ਵਾ ਦਿਟ੍ਠਿਗਤਂ, ਵਿਚਿਕਿਚ੍ਛਂ ਵਤਾਨਿ ਚ;

ਵਨ੍ਦਿਤ੍ਵਾ ਸਤ੍ਥੁਨੋ ਪਾਦੇ, ਤਤ੍ਥੇਵਨ੍ਤਰਧਾਯਥਾਤਿ [ਤਤ੍ਥੇਵਨ੍ਤਰਧਾਯਤੀਤਿ (ਕ.)].

ਕਣ੍ਡਕਵਿਮਾਨਂ ਸਤ੍ਤਮਂ.