੭. ਸੁਨਿਕ੍ਖਿਤ੍ਤਵਗ੍ਗੋ

੧. ਚਿਤ੍ਤਲਤਾਵਿਮਾਨਵਤ੍ਥੁ

੧੧੧੪. ‘‘ਯਥਾ ਵਨਂ ਚਿਤ੍ਤਲਤਂ ਪਭਾਸਤਿ, ਉਯ੍ਯਾਨਸੇਟ੍ਠਂ ਤਿਦਸਾਨਮੁਤ੍ਤਮਂ;

ਤਥੂਪਮਂ ਤੁਯ੍ਹਮਿਦਂ ਵਿਮਾਨਂ, ਓਭਾਸਯਂ ਤਿਟ੍ਠਤਿ ਅਨ੍ਤਲਿਕ੍ਖੇ.

੧੧੧੫. ‘‘ਦੇਵਿਦ੍ਧਿਪਤ੍ਤੋਸਿ ਮਹਾਨੁਭਾਵੋ, ਮਨੁਸ੍ਸਭੂਤੋ ਕਿਮਕਾਸਿ ਪੁਞ੍ਞਂ;

ਕੇਨਾਸਿ ਏਵਂ ਜਲਿਤਾਨੁਭਾਵੋ, ਵਣ੍ਣੋ ਚ ਤੇ ਸਬ੍ਬਦਿਸਾ ਪਭਾਸਤੀ’’ਤਿ.

੧੧੧੬. ਸੋ ਦੇਵਪੁਤ੍ਤੋ ਅਤ੍ਤਮਨੋ…ਪੇ… ਯਸ੍ਸ ਕਮ੍ਮਸ੍ਸਿਦਂ ਫਲਂ.

੧੧੧੭. ‘‘ਅਹਂ ਮਨੁਸ੍ਸੇਸੁ ਮਨੁਸ੍ਸਭੂਤੋ, ਦਲਿਦ੍ਦੋ ਅਤਾਣੋ ਕਪਣੋ ਕਮ੍ਮਕਰੋ ਅਹੋਸਿਂ;

ਜਿਣ੍ਣੇ ਚ ਮਾਤਾਪਿਤਰੋ ਅਭਾਰਿਂ [ਅਭਰਿਂ (ਸੀ. ਸ੍ਯਾ.)], ਪਿਯਾ ਚ ਮੇ ਸੀਲਵਨ੍ਤੋ ਅਹੇਸੁਂ;

ਅਨ੍ਨਞ੍ਚ ਪਾਨਞ੍ਚ ਪਸਨ੍ਨਚਿਤ੍ਤੋ, ਸਕ੍ਕਚ੍ਚ ਦਾਨਂ ਵਿਪੁਲਂ ਅਦਾਸਿ.

੧੧੧੮. ‘‘ਤੇਨ ਮੇਤਾਦਿਸੋ ਵਣ੍ਣੋ…ਪੇ… ਵਣ੍ਣੋ ਚ ਮੇ ਸਬ੍ਬਦਿਸਾ ਪਭਾਸਤੀ’’ਤਿ.

ਚਿਤ੍ਤਲਤਾਵਿਮਾਨਂ ਪਠਮਂ.

੨. ਨਨ੍ਦਨਵਿਮਾਨਵਤ੍ਥੁ

੧੧੨੦. ‘‘ਯਥਾ ਵਨਂ ਨਨ੍ਦਨਂ [ਨਨ੍ਦਨਂ ਚਿਤ੍ਤਲਤਂ (ਸੀ. ਸ੍ਯਾ. ਕ.), ਨਨ੍ਦਵਨਂ (ਕ.)] ਪਭਾਸਤਿ, ਉਯ੍ਯਾਨਸੇਟ੍ਠਂ ਤਿਦਸਾਨਮੁਤ੍ਤਮਂ;

ਤਥੂਪਮਂ ਤੁਯ੍ਹਮਿਦਂ ਵਿਮਾਨਂ, ਓਭਾਸਯਂ ਤਿਟ੍ਠਤਿ ਅਨ੍ਤਲਿਕ੍ਖੇ.

੧੧੨੧. ‘‘ਦੇਵਿਦ੍ਧਿਪਤ੍ਤੋਸਿ ਮਹਾਨੁਭਾਵੋ, ਮਨੁਸ੍ਸਭੂਤੋ ਕਿਮਕਾਸਿ ਪੁਞ੍ਞਂ;

ਕੇਨਾਸਿ ਏਵਂ ਜਲਿਤਾਨੁਭਾਵੋ, ਵਣ੍ਣੋ ਚ ਤੇ ਸਬ੍ਬਦਿਸਾ ਪਭਾਸਤੀ’’ਤਿ.

੧੧੨੨. ਸੋ ਦੇਵਪੁਤ੍ਤੋ ਅਤ੍ਤਮਨੋ…ਪੇ… ਯਸ੍ਸ ਕਮ੍ਮਸ੍ਸਿਦਂ ਫਲਂ.

੧੧੨੩. ‘‘ਅਹਂ ਮਨੁਸ੍ਸੇਸੁ ਮਨੁਸ੍ਸਭੂਤੋ, ਦਲਿਦ੍ਦੋ ਅਤਾਣੋ ਕਪਣੋ ਕਮ੍ਮਕਰੋ ਅਹੋਸਿਂ;

ਜਿਣ੍ਣੇ ਚ ਮਾਤਾਪਿਤਰੋ ਅਭਾਰਿਂ, ਪਿਯਾ ਚ ਮੇ ਸੀਲਵਨ੍ਤੋ ਅਹੇਸੁਂ;

ਅਨ੍ਨਞ੍ਚ ਪਾਨਞ੍ਚ ਪਸਨ੍ਨਚਿਤ੍ਤੋ, ਸਕ੍ਕਚ੍ਚ ਦਾਨਂ ਵਿਪੁਲਂ ਅਦਾਸਿਂ.

੧੧੨੪. ‘‘ਤੇਨ ਮੇਤਾਦਿਸੋ ਵਣ੍ਣੋ…ਪੇ… ਵਣ੍ਣੋ ਚ ਮੇ ਸਬ੍ਬਦਿਸਾ ਪਭਾਸਤੀ’’ਤਿ.

ਨਨ੍ਦਨਵਿਮਾਨਂ ਦੁਤਿਯਂ.

੩. ਮਣਿਥੂਣਵਿਮਾਨਵਤ੍ਥੁ

੧੧੨੬. ‘‘ਉਚ੍ਚਮਿਦਂ ਮਣਿਥੂਣਂ ਵਿਮਾਨਂ, ਸਮਨ੍ਤਤੋ ਦ੍ਵਾਦਸ ਯੋਜਨਾਨਿ;

ਕੂਟਾਗਾਰਾ ਸਤ੍ਤਸਤਾ ਉਲ਼ਾਰਾ, ਵੇਲ਼ੁਰਿਯਥਮ੍ਭਾ ਰੁਚਕਤ੍ਥਤਾ ਸੁਭਾ.

੧੧੨੭. ‘‘ਤਤ੍ਥਚ੍ਛਸਿ ਪਿਵਸਿ ਖਾਦਸਿ ਚ, ਦਿਬ੍ਬਾ ਚ ਵੀਣਾ ਪਵਦਨ੍ਤਿ ਵਗ੍ਗੁਂ;

ਦਿਬ੍ਬਾ ਰਸਾ ਕਾਮਗੁਣੇਤ੍ਥ ਪਞ੍ਚ, ਨਾਰਿਯੋ ਚ ਨਚ੍ਚਨ੍ਤਿ ਸੁਵਣ੍ਣਛਨ੍ਨਾ.

੧੧੨੮. ‘‘ਕੇਨ ਤੇਤਾਦਿਸੋ ਵਣ੍ਣੋ…ਪੇ…ਵਣ੍ਣੋ ਚ ਤੇ ਸਬ੍ਬਦਿਸਾ ਪਭਾਸਤੀ’’ਤਿ.

੧੧੩੦. ਸੋ ਦੇਵਪੁਤ੍ਤੋ ਅਤ੍ਤਮਨੋ…ਪੇ…ਯਸ੍ਸ ਕਮ੍ਮਸ੍ਸਿਦਂ ਫਲਂ.

੧੧੩੧. ‘‘ਅਹਂ ਮਨੁਸ੍ਸੇਸੁ ਮਨੁਸ੍ਸਭੂਤੋ, ਵਿਵਨੇ ਪਥੇ ਸਙ੍ਕਮਨਂ [ਚਙ੍ਕਮਨਂ (ਸੀ.), ਚਙ੍ਕਮਂ (ਸ੍ਯਾ.), ਸਮਕਂ (ਕ. ਸੀ.)] ਅਕਾਸਿਂ;

ਆਰਾਮਰੁਕ੍ਖਾਨਿ ਚ ਰੋਪਯਿਸ੍ਸਂ, ਪਿਯਾ ਚ ਮੇ ਸੀਲਵਨ੍ਤੋ ਅਹੇਸੁਂ;

ਅਨ੍ਨਞ੍ਚ ਪਾਨਞ੍ਚ ਪਸਨ੍ਨਚਿਤ੍ਤੋ, ਸਕ੍ਕਚ੍ਚ ਦਾਨਂ ਵਿਪੁਲਂ ਅਦਾਸਿਂ.

੧੧੩੨. ‘‘ਤੇਨ ਮੇਤਾਦਿਸੋ ਵਣ੍ਣੋ…ਪੇ… ਵਣ੍ਣੋ ਚ ਮੇ ਸਬ੍ਬਦਿਸਾ ਪਭਾਸਤੀ’’ਤਿ.

ਮਣਿਥੂਣਵਿਮਾਨਂ ਤਤਿਯਂ.

੪. ਸੁਵਣ੍ਣਵਿਮਾਨਵਤ੍ਥੁ

੧੧੩੪. ‘‘ਸੋਵਣ੍ਣਮਯੇ ਪਬ੍ਬਤਸ੍ਮਿਂ, ਵਿਮਾਨਂ ਸਬ੍ਬਤੋਪਭਂ;

ਹੇਮਜਾਲਪਟਿਚ੍ਛਨ੍ਨਂ [ਹੇਮਜਾਲਕਪਚ੍ਛਨ੍ਨਂ (ਸੀ.)], ਕਿਙ੍ਕਿਣਿ [ਕਿਙ੍ਕਣਿਕ (ਸ੍ਯਾ. ਕ.), ਕਿਙ੍ਕਿਣਿਕ (ਪੀ.)] ਜਾਲਕਪ੍ਪਿਤਂ.

੧੧੩੫. ‘‘ਅਟ੍ਠਂਸਾ ਸੁਕਤਾ ਥਮ੍ਭਾ, ਸਬ੍ਬੇ ਵੇਲ਼ੁਰਿਯਾਮਯਾ;

ਏਕਮੇਕਾਯ ਅਂਸਿਯਾ, ਰਤਨਾ ਸਤ੍ਤ ਨਿਮ੍ਮਿਤਾ.

੧੧੩੬. ‘‘ਵੇਲ਼ੁਰਿਯਸੁਵਣ੍ਣਸ੍ਸ, ਫਲਿਕਾ ਰੂਪਿਯਸ੍ਸ ਚ;

ਮਸਾਰਗਲ੍ਲਮੁਤ੍ਤਾਹਿ, ਲੋਹਿਤਙ੍ਗਮਣੀਹਿ ਚ.

੧੧੩੭. ‘‘ਚਿਤ੍ਰਾ ਮਨੋਰਮਾ ਭੂਮਿ, ਨ ਤਤ੍ਥੁਦ੍ਧਂਸਤੀ ਰਜੋ;

ਗੋਪਾਣਸੀਗਣਾ ਪੀਤਾ, ਕੂਟਂ ਧਾਰੇਨ੍ਤਿ ਨਿਮ੍ਮਿਤਾ.

੧੧੩੮. ‘‘ਸੋਪਾਣਾਨਿ ਚ ਚਤ੍ਤਾਰਿ, ਨਿਮ੍ਮਿਤਾ ਚਤੁਰੋ ਦਿਸਾ;

ਨਾਨਾਰਤਨਗਬ੍ਭੇਹਿ, ਆਦਿਚ੍ਚੋਵ ਵਿਰੋਚਤਿ.

੧੧੩੯. ‘‘ਵੇਦਿਯਾ ਚਤਸ੍ਸੋ ਤਤ੍ਥ, ਵਿਭਤ੍ਤਾ ਭਾਗਸੋ ਮਿਤਾ;

ਦਦ੍ਦਲ੍ਲਮਾਨਾ ਆਭਨ੍ਤਿ, ਸਮਨ੍ਤਾ ਚਤੁਰੋ ਦਿਸਾ.

੧੧੪੦. ‘‘ਤਸ੍ਮਿਂ ਵਿਮਾਨੇ ਪਵਰੇ, ਦੇਵਪੁਤ੍ਤੋ ਮਹਪ੍ਪਭੋ;

ਅਤਿਰੋਚਸਿ ਵਣ੍ਣੇਨ, ਉਦਯਨ੍ਤੋਵ ਭਾਣੁਮਾ.

੧੧੪੧. ‘‘ਦਾਨਸ੍ਸ ਤੇ ਇਦਂ ਫਲਂ, ਅਥੋ ਸੀਲਸ੍ਸ ਵਾ ਪਨ;

ਅਥੋ ਅਞ੍ਜਲਿਕਮ੍ਮਸ੍ਸ, ਤਂ ਮੇ ਅਕ੍ਖਾਹਿ ਪੁਚ੍ਛਿਤੋ’’.

੧੧੪੨. ਸੋ ਦੇਵਪੁਤ੍ਤੋ ਅਤ੍ਤਮਨੋ…ਪੇ… ਯਸ੍ਸ ਕਮ੍ਮਸ੍ਸਿਦਂ ਫਲਂ.

੧੧੪੩. ‘‘ਅਹਂ ਅਨ੍ਧਕਵਿਨ੍ਦਸ੍ਮਿਂ, ਬੁਦ੍ਧਸ੍ਸਾਦਿਚ੍ਚਬਨ੍ਧੁਨੋ;

ਵਿਹਾਰਂ ਸਤ੍ਥੁ ਕਾਰੇਸਿਂ, ਪਸਨ੍ਨੋ ਸੇਹਿ ਪਾਣਿਭਿ.

੧੧੪੪. ‘‘ਤਤ੍ਥ ਗਨ੍ਧਞ੍ਚ ਮਾਲਞ੍ਚ, ਪਚ੍ਚਯਞ੍ਚ [ਪਚ੍ਚਗ੍ਗਞ੍ਚ (ਸੀ.), ਪਚ੍ਚਗ੍ਘਞ੍ਚ (?)] ਵਿਲੇਪਨਂ;

ਵਿਹਾਰਂ ਸਤ੍ਥੁ ਅਦਾਸਿਂ, ਵਿਪ੍ਪਸਨ੍ਨੇਨ ਚੇਤਸਾ;

ਤੇਨ ਮਯ੍ਹਂ ਇਦਂ ਲਦ੍ਧਂ, ਵਸਂ ਵਤ੍ਤੇਮਿ ਨਨ੍ਦਨੇ.

੧੧੪੫. ‘‘ਨਨ੍ਦਨੇ ਚ ਵਨੇ [ਨਨ੍ਦਨੇ ਪਵਨੇ (ਸੀ. ਸ੍ਯਾ.)] ਰਮ੍ਮੇ, ਨਾਨਾਦਿਜਗਣਾਯੁਤੇ;

ਰਮਾਮਿ ਨਚ੍ਚਗੀਤੇਹਿ, ਅਚ੍ਛਰਾਹਿ ਪੁਰਕ੍ਖਤੋ’’ਤਿ.

ਸੁਵਣ੍ਣਵਿਮਾਨਂ ਚਤੁਤ੍ਥਂ.

੫. ਅਮ੍ਬਵਿਮਾਨਵਤ੍ਥੁ

੧੧੪੬. ‘‘ਉਚ੍ਚਮਿਦਂ ਮਣਿਥੂਣਂ ਵਿਮਾਨਂ, ਸਮਨ੍ਤਤੋ ਦ੍ਵਾਦਸ ਯੋਜਨਾਨਿ;

ਕੂਟਾਗਾਰਾ ਸਤ੍ਤਸਤਾ ਉਲ਼ਾਰਾ, ਵੇਲ਼ੁਰਿਯਥਮ੍ਭਾ ਰੁਚਕਤ੍ਥਤਾ ਸੁਭਾ.

੧੧੪੭. ‘‘ਤਤ੍ਥਚ੍ਛਸਿ ਪਿਵਸਿ ਖਾਦਸਿ ਚ, ਦਿਬ੍ਬਾ ਚ ਵੀਣਾ ਪਵਦਨ੍ਤਿ ਵਗ੍ਗੁਂ;

ਦਿਬ੍ਬਾ ਰਸਾ ਕਾਮਗੁਣੇਤ੍ਥ ਪਞ੍ਚ, ਨਾਰਿਯੋ ਚ ਨਚ੍ਚਨ੍ਤਿ ਸੁਵਣ੍ਣਛਨ੍ਨਾ.

੧੧੪੮. ‘‘ਕੇਨ ਤੇਤਾਦਿਸੋ ਵਣ੍ਣੋ…ਪੇ… ਵਣ੍ਣੋ ਚ ਤੇ ਸਬ੍ਬਦਿਸਾ ਪਭਾਸਤੀ’’ਤਿ.

੧੧੫੦. ਸੋ ਦੇਵਪੁਤ੍ਤੋ ਅਤ੍ਤਮਨੋ…ਪੇ… ਯਸ੍ਸ ਕਮ੍ਮਸ੍ਸਿਦਂ ਫਲਂ.

੧੧੫੧. ‘‘ਗਿਮ੍ਹਾਨਂ ਪਚ੍ਛਿਮੇ ਮਾਸੇ, ਪਤਪਨ੍ਤੇ [ਪਤਾਪਨ੍ਤੇ (ਸ੍ਯਾ.), ਪਤਾਪੇਨ੍ਤੇ (ਕ.)] ਦਿਵਙ੍ਕਰੇ;

ਪਰੇਸਂ ਭਤਕੋ ਪੋਸੋ, ਅਮ੍ਬਾਰਾਮਮਸਿਞ੍ਚਤਿ.

੧੧੫੨. ‘‘ਅਥ ਤੇਨਾਗਮਾ ਭਿਕ੍ਖੁ, ਸਾਰਿਪੁਤ੍ਤੋਤਿ ਵਿਸ੍ਸੁਤੋ;

ਕਿਲਨ੍ਤਰੂਪੋ ਕਾਯੇਨ, ਅਕਿਲਨ੍ਤੋਵ ਚੇਤਸਾ.

੧੧੫੩. ‘‘ਤਞ੍ਚ ਦਿਸ੍ਵਾਨ ਆਯਨ੍ਤਂ, ਅਵੋਚਂ ਅਮ੍ਬਸਿਞ੍ਚਕੋ;

ਸਾਧੁ ਤਂ [ਸਾਧੁਕਂ (ਕ.)] ਭਨ੍ਤੇ ਨ੍ਹਾਪੇਯ੍ਯਂ, ਯਂ ਮਮਸ੍ਸ ਸੁਖਾਵਹਂ.

੧੧੫੪. ‘‘ਤਸ੍ਸ ਮੇ ਅਨੁਕਮ੍ਪਾਯ, ਨਿਕ੍ਖਿਪਿ ਪਤ੍ਤਚੀਵਰਂ;

ਨਿਸੀਦਿ ਰੁਕ੍ਖਮੂਲਸ੍ਮਿਂ, ਛਾਯਾਯ ਏਕਚੀਵਰੋ.

੧੧੫੫. ‘‘ਤਞ੍ਚ ਅਚ੍ਛੇਨ ਵਾਰਿਨਾ, ਪਸਨ੍ਨਮਾਨਸੋ ਨਰੋ;

ਨ੍ਹਾਪਯੀ ਰੁਕ੍ਖਮੂਲਸ੍ਮਿਂ, ਛਾਯਾਯ ਏਕਚੀਵਰਂ.

੧੧੫੬. ‘‘ਅਮ੍ਬੋ ਚ ਸਿਤ੍ਤੋ ਸਮਣੋ ਚ ਨ੍ਹਾਪਿਤੋ, ਮਯਾ ਚ ਪੁਞ੍ਞਂ ਪਸੁਤਂ ਅਨਪ੍ਪਕਂ;

ਇਤਿ ਸੋ ਪੀਤਿਯਾ ਕਾਯਂ, ਸਬ੍ਬਂ ਫਰਤਿ ਅਤ੍ਤਨੋ.

੧੧੫੭. ‘‘ਤਦੇਵ ਏਤ੍ਤਕਂ ਕਮ੍ਮਂ, ਅਕਾਸਿਂ ਤਾਯ ਜਾਤਿਯਾ;

ਪਹਾਯ ਮਾਨੁਸਂ ਦੇਹਂ, ਉਪਪਨ੍ਨੋਮ੍ਹਿ ਨਨ੍ਦਨਂ.

੧੧੫੮. ‘‘ਨਨ੍ਦਨੇ ਚ ਵਨੇ ਰਮ੍ਮੇ, ਨਾਨਾਦਿਜਗਣਾਯੁਤੇ;

ਰਮਾਮਿ ਨਚ੍ਚਗੀਤੇਹਿ, ਅਚ੍ਛਰਾਹਿ ਪੁਰਕ੍ਖਤੋ’’ਤਿ.

ਅਮ੍ਬਵਿਮਾਨਂ ਪਞ੍ਚਮਂ.

੬. ਗੋਪਾਲਵਿਮਾਨਵਤ੍ਥੁ

੧੧੫੯. ‘‘ਦਿਸ੍ਵਾਨ ਦੇਵਂ ਪਟਿਪੁਚ੍ਛਿ ਭਿਕ੍ਖੁ, ਉਚ੍ਚੇ ਵਿਮਾਨਮ੍ਹਿ ਚਿਰਟ੍ਠਿਤਿਕੇ;

ਆਮੁਤ੍ਤਹਤ੍ਥਾਭਰਣਂ ਯਸਸ੍ਸਿਂ [ਆਮੁਤ੍ਤਹਤ੍ਥਾਭਰਣੋ ਯਸਸ੍ਸੀ (ਸ੍ਯਾ. ਪੀ. ਕ.)], ਦਿਬ੍ਬੇ ਵਿਮਾਨਮ੍ਹਿ ਯਥਾਪਿ ਚਨ੍ਦਿਮਾ.

੧੧੬੦. ‘‘ਅਲਙ੍ਕਤੋ ਮਲ੍ਯਧਰੋ [ਮਾਲਭਾਰੀ (ਸੀ.), ਮਾਲਧਰੀ (ਕ.)] ਸੁਵਤ੍ਥੋ, ਸੁਕੁਣ੍ਡਲੀ ਕਪ੍ਪਿਤਕੇਸਮਸ੍ਸੁ;

ਆਮੁਤ੍ਤਹਤ੍ਥਾਭਰਣੋ ਯਸਸ੍ਸੀ, ਦਿਬ੍ਬੇ ਵਿਮਾਨਮ੍ਹਿ ਯਥਾਪਿ ਚਨ੍ਦਿਮਾ.

੧੧੬੧. ‘‘ਦਿਬ੍ਬਾ ਚ ਵੀਣਾ ਪਵਦਨ੍ਤਿ ਵਗ੍ਗੁਂ, ਅਟ੍ਠਟ੍ਠਕਾ ਸਿਕ੍ਖਿਤਾ ਸਾਧੁਰੂਪਾ;

ਦਿਬ੍ਬਾ ਚ ਕਞ੍ਞਾ ਤਿਦਸਚਰਾ ਉਲ਼ਾਰਾ, ਨਚ੍ਚਨ੍ਤਿ ਗਾਯਨ੍ਤਿ ਪਮੋਦਯਨ੍ਤਿ.

੧੧੬੨. ‘‘ਦੇਵਿਦ੍ਧਿਪਤ੍ਤੋਸਿ ਮਹਾਨੁਭਾਵੋ, ਮਨੁਸ੍ਸਭੂਤੋ ਕਿਮਕਾਸਿ ਪੁਞ੍ਞਂ;

ਕੇਨਾਸਿ ਏਵਂ ਜਲਿਤਾਨੁਭਾਵੋ, ਵਣ੍ਣੋ ਚ ਤੇ ਸਬ੍ਬਦਿਸਾ ਪਭਾਸਤੀ’’ਤਿ.

੧੧੬੩. ਸੋ ਦੇਵਪੁਤ੍ਤੋ ਅਤ੍ਤਮਨੋ…ਪੇ… ਯਸ੍ਸ ਕਮ੍ਮਸ੍ਸਿਦਂ ਫਲਂ.

੧੧੬੪. ‘‘ਅਹਂ ਮਨੁਸ੍ਸੇਸੁ ਮਨੁਸ੍ਸਭੂਤੋ, ਸਙ੍ਗਮ੍ਮ ਰਕ੍ਖਿਸ੍ਸਂ ਪਰੇਸਂ ਧੇਨੁਯੋ;

ਤਤੋ ਚ ਆਗਾ ਸਮਣੋ ਮਮਨ੍ਤਿਕੇ ਗਾਵੋ ਚ ਮਾਸੇ ਅਗਮਂਸੁ ਖਾਦਿਤੁਂ.

੧੧੬੫. ‘‘ਦ੍ਵਯਜ੍ਜ ਕਿਚ੍ਚਂ ਉਭਯਞ੍ਚ ਕਾਰਿਯਂ, ਇਚ੍ਚੇਵਹਂ [ਇਚ੍ਚੇਵਂ (ਕ.)] ਭਨ੍ਤੇ ਤਦਾ ਵਿਚਿਨ੍ਤਯਿਂ;

ਤਤੋ ਚ ਸਞ੍ਞਂ ਪਟਿਲਦ੍ਧਯੋਨਿਸੋ, ਦਦਾਮਿ ਭਨ੍ਤੇਤਿ ਖਿਪਿਂ ਅਨਨ੍ਤਕਂ.

੧੧੬੬. ‘‘ਸੋ ਮਾਸਖੇਤ੍ਤਂ ਤੁਰਿਤੋ ਅਵਾਸਰਿਂ, ਪੁਰਾ ਅਯਂ ਭਞ੍ਜਤਿ ਯਸ੍ਸਿਦਂ ਧਨਂ;

ਤਤੋ ਚ ਕਣ੍ਹੋ ਉਰਗੋ ਮਹਾਵਿਸੋ, ਅਡਂਸਿ ਪਾਦੇ ਤੁਰਿਤਸ੍ਸ ਮੇ ਸਤੋ.

੧੧੬੭. ‘‘ਸ੍ਵਾਹਂ ਅਟ੍ਟੋਮ੍ਹਿ ਦੁਕ੍ਖੇਨ ਪੀਲ਼ਿਤੋ, ਭਿਕ੍ਖੁ ਚ ਤਂ ਸਾਮਂ ਮੁਞ੍ਚਿਤ੍ਵਾਨਨ੍ਤਕਂ [ਮੁਞ੍ਚਿਤ੍ਵ ਨਨ੍ਤਕਂ (ਸੀ.), ਮੁਞ੍ਚਿਤ੍ਵਾ ਅਨਨ੍ਤਕਂ (ਸ੍ਯਾ.)];

ਅਹਾਸਿ ਕੁਮ੍ਮਾਸਂ ਮਮਾਨੁਕਮ੍ਪਯਾ [ਮਮਾਨੁਕਮ੍ਪਿਯਾ (ਪੀ. ਕ.), ਮਮਾਨੁਕਮ੍ਪਾਯ (ਸ੍ਯਾ.)], ਤਤੋ ਚੁਤੋ ਕਾਲਕਤੋਮ੍ਹਿ ਦੇਵਤਾ.

੧੧੬੮. ‘‘ਤਦੇਵ ਕਮ੍ਮਂ ਕੁਸਲਂ ਕਤਂ ਮਯਾ, ਸੁਖਞ੍ਚ ਕਮ੍ਮਂ ਅਨੁਭੋਮਿ ਅਤ੍ਤਨਾ;

ਤਯਾ ਹਿ ਭਨ੍ਤੇ ਅਨੁਕਮ੍ਪਿਤੋ ਭੁਸਂ, ਕਤਞ੍ਞੁਤਾਯ ਅਭਿਪਾਦਯਾਮਿ ਤਂ.

੧੧੬੯. ‘‘ਸਦੇਵਕੇ ਲੋਕੇ ਸਮਾਰਕੇ ਚ, ਅਞ੍ਞੋ ਮੁਨਿ ਨਤ੍ਥਿ ਤਯਾਨੁਕਮ੍ਪਕੋ;

ਤਯਾ ਹਿ ਭਨ੍ਤੇ ਅਨੁਕਮ੍ਪਿਤੋ ਭੁਸਂ, ਕਤਞ੍ਞੁਤਾਯ ਅਭਿਵਾਦਯਾਮਿ ਤਂ.

੧੧੭੦. ‘‘ਇਮਸ੍ਮਿਂ ਲੋਕੇ ਪਰਸ੍ਮਿਂ ਵਾ ਪਨ, ਅਞ੍ਞੋ ਮੁਨੀ ਨਤ੍ਥਿ ਤਯਾਨੁਕਮ੍ਪਕੋ;

ਤਯਾ ਹਿ ਭਨ੍ਤੇ ਅਨੁਕਮ੍ਪਿਤੋ ਭੁਸਂ, ਕਤਞ੍ਞੁਤਾਯ ਅਭਿਵਾਦਯਾਮਿ ਤ’’ਨ੍ਤਿ.

ਗੋਪਾਲਵਿਮਾਨਂ ਛਟ੍ਠਂ.

੭. ਕਣ੍ਡਕਵਿਮਾਨਵਤ੍ਥੁ

੧੧੭੧. ‘‘ਪੁਣ੍ਣਮਾਸੇ ਯਥਾ ਚਨ੍ਦੋ, ਨਕ੍ਖਤ੍ਤਪਰਿਵਾਰਿਤੋ;

ਸਮਨ੍ਤਾ ਅਨੁਪਰਿਯਾਤਿ, ਤਾਰਕਾਧਿਪਤੀ ਸਸੀ.

੧੧੭੨. ‘‘ਤਥੂਪਮਂ ਇਦਂ ਬ੍ਯਮ੍ਹਂ, ਦਿਬ੍ਬਂ ਦੇਵਪੁਰਮ੍ਹਿ ਚ;

ਅਤਿਰੋਚਤਿ ਵਣ੍ਣੇਨ, ਉਦਯਨ੍ਤੋਵ ਰਂਸਿਮਾ.

੧੧੭੩. ‘‘ਵੇਲ਼ੁਰਿਯਸੁਵਣ੍ਣਸ੍ਸ, ਫਲਿਕਾ ਰੂਪਿਯਸ੍ਸ ਚ;

ਮਸਾਰਗਲ੍ਲਮੁਤ੍ਤਾਹਿ, ਲੋਹਿਤਙ੍ਗਮਣੀਹਿ ਚ.

੧੧੭੪. ‘‘ਚਿਤ੍ਰਾ ਮਨੋਰਮਾ ਭੂਮਿ, ਵੇਲ਼ੂਰਿਯਸ੍ਸ ਸਨ੍ਥਤਾ;

ਕੂਟਾਗਾਰਾ ਸੁਭਾ ਰਮ੍ਮਾ, ਪਾਸਾਦੋ ਤੇ ਸੁਮਾਪਿਤੋ.

੧੧੭੫. ‘‘ਰਮ੍ਮਾ ਚ ਤੇ ਪੋਕ੍ਖਰਣੀ, ਪੁਥੁਲੋਮਨਿਸੇਵਿਤਾ;

ਅਚ੍ਛੋਦਕਾ ਵਿਪ੍ਪਸਨ੍ਨਾ, ਸੋਵਣ੍ਣਵਾਲੁਕਸਨ੍ਥਤਾ.

੧੧੭੬. ‘‘ਨਾਨਾਪਦੁਮਸਞ੍ਛਨ੍ਨਾ, ਪੁਣ੍ਡਰੀਕਸਮੋਤਤਾ [ਸਮੋਤ੍ਥਤਾ (ਕ.), ਸਮੋਗਤਾ (ਸ੍ਯਾ.)];

ਸੁਰਭਿਂ ਸਮ੍ਪਵਾਯਨ੍ਤਿ, ਮਨੁਞ੍ਞਾ ਮਾਲੁਤੇਰਿਤਾ.

੧੧੭੭. ‘‘ਤਸ੍ਸਾ ਤੇ ਉਭਤੋ ਪਸ੍ਸੇ, ਵਨਗੁਮ੍ਬਾ ਸੁਮਾਪਿਤਾ;

ਉਪੇਤਾ ਪੁਪ੍ਫਰੁਕ੍ਖੇਹਿ, ਫਲਰੁਕ੍ਖੇਹਿ ਚੂਭਯਂ.

੧੧੭੮. ‘‘ਸੋਵਣ੍ਣਪਾਦੇ ਪਲ੍ਲਙ੍ਕੇ, ਮੁਦੁਕੇ ਗੋਣਕਤ੍ਥਤੇ [ਚੋਲਸਨ੍ਥਤੇ (ਸੀ.)];

ਨਿਸਿਨ੍ਨਂ ਦੇਵਰਾਜਂਵ, ਉਪਤਿਟ੍ਠਨ੍ਤਿ ਅਚ੍ਛਰਾ.

੧੧੭੯. ‘‘ਸਬ੍ਬਾਭਰਣਸਞ੍ਛਨ੍ਨਾ, ਨਾਨਾਮਾਲਾਵਿਭੂਸਿਤਾ;

ਰਮੇਨ੍ਤਿ ਤਂ ਮਹਿਦ੍ਧਿਕਂ, ਵਸਵਤ੍ਤੀਵ ਮੋਦਸਿ.

੧੧੮੦. ‘‘ਭੇਰਿਸਙ੍ਖਮੁਦਿਙ੍ਗਾਹਿ, ਵੀਣਾਹਿ ਪਣਵੇਹਿ ਚ;

ਰਮਸਿ ਰਤਿਸਮ੍ਪਨ੍ਨੋ, ਨਚ੍ਚਗੀਤੇ ਸੁਵਾਦਿਤੇ.

੧੧੮੧. ‘‘ਦਿਬ੍ਬਾ ਤੇ ਵਿਵਿਧਾ ਰੂਪਾ, ਦਿਬ੍ਬਾ ਸਦ੍ਦਾ ਅਥੋ ਰਸਾ;

ਗਨ੍ਧਾ ਚ ਤੇ ਅਧਿਪ੍ਪੇਤਾ, ਫੋਟ੍ਠਬ੍ਬਾ ਚ ਮਨੋਰਮਾ.

੧੧੮੨. ‘‘ਤਸ੍ਮਿਂ ਵਿਮਾਨੇ ਪਵਰੇ, ਦੇਵਪੁਤ੍ਤ ਮਹਪ੍ਪਭੋ;

ਅਤਿਰੋਚਸਿ ਵਣ੍ਣੇਨ, ਉਦਯਨ੍ਤੋਵ ਭਾਣੁਮਾ.

੧੧੮੩. ‘‘ਦਾਨਸ੍ਸ ਤੇ ਇਦਂ ਫਲਂ, ਅਥੋ ਸੀਲਸ੍ਸ ਵਾ ਪਨ;

ਅਥੋ ਅਞ੍ਜਲਿਕਮ੍ਮਸ੍ਸ, ਤਂ ਮੇ ਅਕ੍ਖਾਹਿ ਪੁਚ੍ਛਿਤੋ’’.

੧੧੮੪. ਸੋ ਦੇਵਪੁਤ੍ਤੋ ਅਤ੍ਤਮਨੋ…ਪੇ… ਯਸ੍ਸ ਕਮ੍ਮਸ੍ਸਿਦਂ ਫਲਂ.

੧੧੮੫. ‘‘ਅਹਂ ਕਪਿਲਵਤ੍ਥੁਸ੍ਮਿਂ, ਸਾਕਿਯਾਨਂ ਪੁਰੁਤ੍ਤਮੇ;

ਸੁਦ੍ਧੋਦਨਸ੍ਸ ਪੁਤ੍ਤਸ੍ਸ, ਕਣ੍ਡਕੋ ਸਹਜੋ ਅਹਂ.

੧੧੮੬. ‘‘ਯਦਾ ਸੋ ਅਡ੍ਢਰਤ੍ਤਾਯਂ, ਬੋਧਾਯ ਮਭਿਨਿਕ੍ਖਮਿ;

ਸੋ ਮਂ ਮੁਦੂਹਿ ਪਾਣੀਹਿ, ਜਾਲਿ [ਜਾਲ (ਸੀ.)] ਤਮ੍ਬਨਖੇਹਿ ਚ.

੧੧੮੭. ‘‘ਸਤ੍ਥਿਂ ਆਕੋਟਯਿਤ੍ਵਾਨ, ਵਹ ਸਮ੍ਮਾਤਿ ਚਬ੍ਰਵਿ;

ਅਹਂ ਲੋਕਂ ਤਾਰਯਿਸ੍ਸਂ, ਪਤ੍ਤੋ ਸਮ੍ਬੋਧਿਮੁਤ੍ਤਮਂ.

੧੧੮੮. ‘‘ਤਂ ਮੇ ਗਿਰਂ ਸੁਣਨ੍ਤਸ੍ਸ, ਹਾਸੋ ਮੇ ਵਿਪੁਲੋ ਅਹੁ;

ਉਦਗ੍ਗਚਿਤ੍ਤੋ ਸੁਮਨੋ, ਅਭਿਸੀਸਿਂ [ਅਭਿਸਿਂਸਿਂ (ਸੀ.), ਅਭਿਸੀਸਿ (ਪੀ.)] ਤਦਾ ਅਹਂ.

੧੧੮੯. ‘‘ਅਭਿਰੂਲ਼੍ਹਞ੍ਚ ਮਂ ਞਤ੍ਵਾ, ਸਕ੍ਯਪੁਤ੍ਤਂ ਮਹਾਯਸਂ;

ਉਦਗ੍ਗਚਿਤ੍ਤੋ ਮੁਦਿਤੋ, ਵਹਿਸ੍ਸਂ ਪੁਰਿਸੁਤ੍ਤਮਂ.

੧੧੯੦. ‘‘ਪਰੇਸਂ ਵਿਜਿਤਂ ਗਨ੍ਤ੍ਵਾ, ਉਗ੍ਗਤਸ੍ਮਿਂ ਦਿਵਾਕਰੇ [ਦਿਵਙ੍ਕਰੇ (ਸ੍ਯਾ. ਕ.)];

ਮਮਂ ਛਨ੍ਨਞ੍ਚ ਓਹਾਯ, ਅਨਪੇਕ੍ਖੋ ਸੋ ਅਪਕ੍ਕਮਿ.