੮. ਅਨੇਕਵਣ੍ਣਵਿਮਾਨਵਤ੍ਥੁ

੧੧੯੯. ‘‘ਅਨੇਕਵਣ੍ਣਂ ਦਰਸੋਕਨਾਸਨਂ, ਵਿਮਾਨਮਾਰੁਯ੍ਹ ਅਨੇਕਚਿਤ੍ਤਂ;

ਪਰਿਵਾਰਿਤੋ ਅਚ੍ਛਰਾਸਙ੍ਗਣੇਨ, ਸੁਨਿਮ੍ਮਿਤੋ ਭੂਤਪਤੀਵ ਮੋਦਸਿ.

੧੨੦੦. ‘‘ਸਮਸ੍ਸਮੋ ਨਤ੍ਥਿ ਕੁਤੋ ਪਨੁਤ੍ਤਰੋ [ਉਤ੍ਤਰਿ (ਕ.)], ਯਸੇਨ ਪੁਞ੍ਞੇਨ ਚ ਇਦ੍ਧਿਯਾ ਚ;

ਸਬ੍ਬੇ ਚ ਦੇਵਾ ਤਿਦਸਗਣਾ ਸਮੇਚ੍ਚ, ਤਂ ਤਂ ਨਮਸ੍ਸਨ੍ਤਿ ਸਸਿਂਵ ਦੇਵਾ;

ਇਮਾ ਚ ਤੇ ਅਚ੍ਛਰਾਯੋ ਸਮਨ੍ਤਤੋ, ਨਚ੍ਚਨ੍ਤਿ ਗਾਯਨ੍ਤਿ ਪਮੋਦਯਨ੍ਤਿ.

੧੨੦੧. ‘‘ਦੇਵਿਦ੍ਧਿਪਤ੍ਤੋਸਿ ਮਹਾਨੁਭਾਵੋ, ਮਨੁਸ੍ਸਭੂਤੋ ਕਿਮਕਾਸਿ ਪੁਞ੍ਞਂ;

ਕੇਨਾਸਿ ਏਵਂ ਜਲਿਤਾਨੁਭਾਵੋ, ਵਣ੍ਣੋ ਚ ਤੇ ਸਬ੍ਬਦਿਸਾ ਪਭਾਸਤੀ’’ਤਿ.

੧੨੦੨. ਸੋ ਦੇਵਪੁਤ੍ਤੋ ਅਤ੍ਤਮਨੋ…ਪੇ… ਯਸ੍ਸ ਕਮ੍ਮਸ੍ਸਿਦਂ ਫਲਂ.

੧੨੦੩. ‘‘ਅਹਂ ਭਦਨ੍ਤੇ ਅਹੁਵਾਸਿ ਪੁਬ੍ਬੇ, ਸੁਮੇਧਨਾਮਸ੍ਸ ਜਿਨਸ੍ਸ ਸਾਵਕੋ;

ਪੁਥੁਜ੍ਜਨੋ ਅਨਨੁਬੋਧੋਹਮਸ੍ਮਿ [ਅਨਵਬੋਧੋਹਮਸ੍ਮਿਂ (ਸੀ.), ਅਨਨੁਬੋਧੋਹਮਾਸਿਂ (?)], ਸੋ ਸਤ੍ਤ ਵਸ੍ਸਾਨਿ ਪਰਿਬ੍ਬਜਿਸ੍ਸਹਂ [ਪਬ੍ਬਜਿਸ੍ਸਹਂ (ਸ੍ਯਾ. ਕ.), ਪਬ੍ਬਜਿਸਾਹਂ (ਪੀ.)].

੧੨੦੪. ‘‘ਸੋਹਂ ਸੁਮੇਧਸ੍ਸ ਜਿਨਸ੍ਸ ਸਤ੍ਥੁਨੋ, ਪਰਿਨਿਬ੍ਬੁਤਸ੍ਸੋਘਤਿਣ੍ਣਸ੍ਸ ਤਾਦਿਨੋ;

ਰਤਨੁਚ੍ਚਯਂ ਹੇਮਜਾਲੇਨ ਛਨ੍ਨਂ, ਵਨ੍ਦਿਤ੍ਵਾ ਥੂਪਸ੍ਮਿਂ ਮਨਂ ਪਸਾਦਯਿਂ.

੧੨੦੫. ‘‘ਨ ਮਾਸਿ ਦਾਨਂ ਨ ਚ ਮਤ੍ਥਿ ਦਾਤੁਂ, ਪਰੇ ਚ ਖੋ ਤਤ੍ਥ ਸਮਾਦਪੇਸਿਂ;

ਪੂਜੇਥ ਨਂ ਪੂਜਨੀਯਸ੍ਸ [ਪੂਜਨੇਯ੍ਯਸ੍ਸ (ਸ੍ਯਾ. ਕ.)] ਧਾਤੁਂ, ਏਵਂ ਕਿਰ ਸਗ੍ਗਮਿਤੋ ਗਮਿਸ੍ਸਥ.

੧੨੦੬. ‘‘ਤਦੇਵ ਕਮ੍ਮਂ ਕੁਸਲਂ ਕਤਂ ਮਯਾ, ਸੁਖਞ੍ਚ ਦਿਬ੍ਬਂ ਅਨੁਭੋਮਿ ਅਤ੍ਤਨਾ;

ਮੋਦਾਮਹਂ ਤਿਦਸਗਣਸ੍ਸ ਮਜ੍ਝੇ, ਨ ਤਸ੍ਸ ਪੁਞ੍ਞਸ੍ਸ ਖਯਮ੍ਪਿ ਅਜ੍ਝਗ’’ਨ੍ਤਿ.

ਅਨੇਕਵਣ੍ਣਵਿਮਾਨਂ ਅਟ੍ਠਮਂ.