੧੦. ਸੇਰੀਸਕਵਿਮਾਨਵਤ੍ਥੁ

੧੨੨੮. [ਪੇ. ਵ. ੬੦੪] ਸੁਣੋਥ ਯਕ੍ਖਸ੍ਸ ਚ ਵਾਣਿਜਾਨ ਚ, ਸਮਾਗਮੋ ਯਤ੍ਥ ਤਦਾ ਅਹੋਸਿ;

ਯਥਾ ਕਥਂ ਇਤਰਿਤਰੇਨ ਚਾਪਿ, ਸੁਭਾਸਿਤਂ ਤਞ੍ਚ ਸੁਣਾਥ ਸਬ੍ਬੇ.

੧੨੨੯. ‘‘ਯੋ ਸੋ ਅਹੁ ਰਾਜਾ ਪਾਯਾਸਿ ਨਾਮ [ਨਾਮੋ (ਸੀ.)], ਭੁਮ੍ਮਾਨਂ ਸਹਬ੍ਯਗਤੋ ਯਸਸ੍ਸੀ;

ਸੋ ਮੋਦਮਾਨੋਵ ਸਕੇ ਵਿਮਾਨੇ, ਅਮਾਨੁਸੋ ਮਾਨੁਸੇ ਅਜ੍ਝਭਾਸੀਤਿ.

੧੨੩੦. ‘‘ਵਙ੍ਕੇ ਅਰਞ੍ਞੇ ਅਮਨੁਸ੍ਸਟ੍ਠਾਨੇ, ਕਨ੍ਤਾਰੇ ਅਪ੍ਪੋਦਕੇ ਅਪ੍ਪਭਕ੍ਖੇ;

ਸੁਦੁਗ੍ਗਮੇ ਵਣ੍ਣੁਪਥਸ੍ਸ ਮਜ੍ਝੇ, ਵਙ੍ਕਂ ਭਯਾ [ਧਙ੍ਕਂਭਯਾ (ਕ.)] ਨਟ੍ਠਮਨਾ ਮਨੁਸ੍ਸਾ.

੧੨੩੧. ‘‘ਨਯਿਧ ਫਲਾ ਮੂਲਮਯਾ ਚ ਸਨ੍ਤਿ, ਉਪਾਦਾਨਂ ਨਤ੍ਥਿ ਕੁਤੋਧ ਭਕ੍ਖੋ;

ਅਞ੍ਞਤ੍ਰ ਪਂਸੂਹਿ ਚ ਵਾਲੁਕਾਹਿ ਚ, ਤਤਾਹਿ ਉਣ੍ਹਾਹਿ ਚ ਦਾਰੁਣਾਹਿ ਚ.

੧੨੩੨. ‘‘ਉਜ੍ਜਙ੍ਗਲਂ ਤਤ੍ਤਮਿਵਂ ਕਪਾਲਂ, ਅਨਾਯਸਂ ਪਰਲੋਕੇਨ ਤੁਲ੍ਯਂ;

ਲੁਦ੍ਦਾਨਮਾਵਾਸਮਿਦਂ ਪੁਰਾਣਂ, ਭੂਮਿਪ੍ਪਦੇਸੋ ਅਭਿਸਤ੍ਤਰੂਪੋ.

੧੨੩੩. ‘‘ਅਥ ਤੁਮ੍ਹੇ ਕੇਨ [ਕੇਨ ਨੁ (ਸ੍ਯਾ. ਕ.)] ਵਣ੍ਣੇਨ, ਕਿਮਾਸਮਾਨਾ ਇਮਂ ਪਦੇਸਂ ਹਿ;

ਅਨੁਪਵਿਟ੍ਠਾ ਸਹਸਾ ਸਮੇਚ੍ਚ, ਲੋਭਾ ਭਯਾ ਅਥ ਵਾ ਸਮ੍ਪਮੂਲ਼੍ਹਾ’’ਤਿ.

੧੨੩੪. ‘‘ਮਗਧੇਸੁ ਅਙ੍ਗੇਸੁ ਚ ਸਤ੍ਥਵਾਹਾ, ਆਰੋਪਯਿਤ੍ਵਾ ਪਣਿਯਂ ਪੁਥੁਤ੍ਤਂ;

ਤੇ ਯਾਮਸੇ ਸਿਨ੍ਧੁਸੋਵੀਰਭੂਮਿਂ, ਧਨਤ੍ਥਿਕਾ ਉਦ੍ਦਯਂ ਪਤ੍ਥਯਾਨਾ.

੧੨੩੫. ‘‘ਦਿਵਾ ਪਿਪਾਸਂ ਨਧਿਵਾਸਯਨ੍ਤਾ, ਯੋਗ੍ਗਾਨੁਕਮ੍ਪਞ੍ਚ ਸਮੇਕ੍ਖਮਾਨਾ,

ਏਤੇਨ ਵੇਗੇਨ ਆਯਾਮ ਸਬ੍ਬੇ [ਸਬ੍ਬੇ ਤੇ (ਕ.)], ਰਤ੍ਤਿਂ ਮਗ੍ਗਂ ਪਟਿਪਨ੍ਨਾ ਵਿਕਾਲੇ.

੧੨੩੬. ‘‘ਤੇ ਦੁਪ੍ਪਯਾਤਾ ਅਪਰਦ੍ਧਮਗ੍ਗਾ, ਅਨ੍ਧਾਕੁਲਾ ਵਿਪ੍ਪਨਟ੍ਠਾ ਅਰਞ੍ਞੇ;

ਸੁਦੁਗ੍ਗਮੇ ਵਣ੍ਣੁਪਥਸ੍ਸ ਮਜ੍ਝੇ, ਦਿਸਂ ਨ ਜਾਨਾਮ ਪਮੂਲ਼੍ਹਚਿਤ੍ਤਾ.

੧੨੩੭. ‘‘ਇਦਞ੍ਚ ਦਿਸ੍ਵਾਨ ਅਦਿਟ੍ਠਪੁਬ੍ਬਂ, ਵਿਮਾਨਸੇਟ੍ਠਞ੍ਚ ਤਵਞ੍ਚ ਯਕ੍ਖ;

ਤਤੁਤ੍ਤਰਿਂ ਜੀਵਿਤਮਾਸਮਾਨਾ, ਦਿਸ੍ਵਾ ਪਤੀਤਾ ਸੁਮਨਾ ਉਦਗ੍ਗਾ’’ਤਿ.

੧੨੩੮. ‘‘ਪਾਰਂ ਸਮੁਦ੍ਦਸ੍ਸ ਇਮਞ੍ਚ ਵਣ੍ਣੁਂ [ਵਨਂ (ਸ੍ਯਾ.), ਵਣ੍ਣਂ (ਕ.)], ਵੇਤ੍ਤਾਚਰਂ [ਵੇਤ੍ਤਂ ਪਰਂ (ਸ੍ਯਾ.), ਵੇਤ੍ਤਾਚਾਰਂ (ਕ.)] ਸਙ੍ਕੁਪਥਞ੍ਚ ਮਗ੍ਗਂ;

ਨਦਿਯੋ ਪਨ ਪਬ੍ਬਤਾਨਞ੍ਚ ਦੁਗ੍ਗਾ, ਪੁਥੁਦ੍ਦਿਸਾ ਗਚ੍ਛਥ ਭੋਗਹੇਤੁ.

੧੨੩੯. ‘‘ਪਕ੍ਖਨ੍ਦਿਯਾਨ ਵਿਜਿਤਂ ਪਰੇਸਂ, ਵੇਰਜ੍ਜਕੇ ਮਾਨੁਸੇ ਪੇਕ੍ਖਮਾਨਾ;

ਯਂ ਵੋ ਸੁਤਂ ਵਾ ਅਥ ਵਾਪਿ ਦਿਟ੍ਠਂ, ਅਚ੍ਛੇਰਕਂ ਤਂ ਵੋ ਸੁਣੋਮ ਤਾਤਾ’’ਤਿ.

੧੨੪੦. ‘‘ਇਤੋਪਿ ਅਚ੍ਛੇਰਤਰਂ ਕੁਮਾਰ, ਨ ਤੋ ਸੁਤਂ ਵਾ ਅਥ ਵਾਪਿ ਦਿਟ੍ਠਂ;

ਅਤੀਤਮਾਨੁਸ੍ਸਕਮੇਵ ਸਬ੍ਬਂ, ਦਿਸ੍ਵਾਨ ਤਪ੍ਪਾਮ ਅਨੋਮਵਣ੍ਣਂ.

੧੨੪੧. ‘‘ਵੇਹਾਯਸਂ ਪੋਕ੍ਖਰਞ੍ਞੋ ਸਵਨ੍ਤਿ, ਪਹੂਤਮਲ੍ਯਾ [ਪਹੂਤਮਾਲ੍ਯਾ (ਸ੍ਯਾ.)] ਬਹੁਪੁਣ੍ਡਰੀਕਾ;

ਦੁਮਾ ਚਿਮੇ [ਦੁਮਾ ਚ ਤੇ (ਸ੍ਯਾ. ਕ.)] ਨਿਚ੍ਚਫਲੂਪਪਨ੍ਨਾ, ਅਤੀਵ ਗਨ੍ਧਾ ਸੁਰਭਿਂ ਪਵਾਯਨ੍ਤਿ.

੧੨੪੨. ‘‘ਵੇਲ਼ੂਰਿਯਥਮ੍ਭਾ ਸਤਮੁਸ੍ਸਿਤਾਸੇ, ਸਿਲਾਪਵਾਲ਼ਸ੍ਸ ਚ ਆਯਤਂਸਾ;

ਮਸਾਰਗਲ੍ਲਾ ਸਹਲੋਹਿਤਙ੍ਗਾ, ਥਮ੍ਭਾ ਇਮੇ ਜੋਤਿਰਸਾਮਯਾਸੇ.

੧੨੪੩. ‘‘ਸਹਸ੍ਸਥਮ੍ਭਂ ਅਤੁਲਾਨੁਭਾਵਂ, ਤੇਸੂਪਰਿ ਸਾਧੁਮਿਦਂ ਵਿਮਾਨਂ;

ਰਤਨਨ੍ਤਰਂ ਕਞ੍ਚਨਵੇਦਿਮਿਸ੍ਸਂ, ਤਪਨੀਯਪਟ੍ਟੇਹਿ ਚ ਸਾਧੁਛਨ੍ਨਂ.

੧੨੪੪. ‘‘ਜਮ੍ਬੋਨਦੁਤ੍ਤਤ੍ਤਮਿਦਂ ਸੁਮਟ੍ਠੋ, ਪਾਸਾਦਸੋਪਾਣਫਲੂਪਪਨ੍ਨੋ;

ਦਲ਼੍ਹੋ ਚ ਵਗ੍ਗੁ ਚ ਸੁਸਙ੍ਗਤੋ ਚ [ਵਗ੍ਗੁ ਸੁਮੁਖੋ ਸੁਸਙ੍ਗਤੋ (ਸੀ.)], ਅਤੀਵ ਨਿਜ੍ਝਾਨਖਮੋ ਮਨੁਞ੍ਞੋ.

੧੨੪੫. ‘‘ਰਤਨਨ੍ਤਰਸ੍ਮਿਂ ਬਹੁਅਨ੍ਨਪਾਨਂ, ਪਰਿਵਾਰਿਤੋ ਅਚ੍ਛਰਾਸਙ੍ਗਣੇਨ;

ਮੁਰਜਆਲਮ੍ਬਰਤੂਰਿਯਘੁਟ੍ਠੋ, ਅਭਿਵਨ੍ਦਿਤੋਸਿ ਥੁਤਿਵਨ੍ਦਨਾਯ.

੧੨੪੬. ‘‘ਸੋ ਮੋਦਸਿ ਨਾਰਿਗਣਪ੍ਪਬੋਧਨੋ, ਵਿਮਾਨਪਾਸਾਦਵਰੇ ਮਨੋਰਮੇ;

ਅਚਿਨ੍ਤਿਯੋ ਸਬ੍ਬਗੁਣੂਪਪਨ੍ਨੋ, ਰਾਜਾ ਯਥਾ ਵੇਸ੍ਸਵਣੋ ਨਲ਼ਿਨ੍ਯਾ [ਨਲ਼ਿਞ੍ਞਂ (ਕ.)].

੧੨੪੭. ‘‘ਦੇਵੋ ਨੁ ਆਸਿ ਉਦਵਾਸਿ ਯਕ੍ਖੋ, ਉਦਾਹੁ ਦੇਵਿਨ੍ਦੋ ਮਨੁਸ੍ਸਭੂਤੋ;

ਪੁਚ੍ਛਨ੍ਤਿ ਤਂ ਵਾਣਿਜਾ ਸਤ੍ਥਵਾਹਾ, ਆਚਿਕ੍ਖ ਕੋ ਨਾਮ ਤੁਵਂਸਿ ਯਕ੍ਖੋ’’ਤਿ.

੧੨੪੮. ‘‘ਸੇਰੀਸਕੋ [ਸੇਰਿਸ੍ਸਕੋ (ਸੀ. ਸ੍ਯਾ.)] ਨਾਮ ਅਹਮ੍ਹਿ ਯਕ੍ਖੋ, ਕਨ੍ਤਾਰਿਯੋ ਵਣ੍ਣੁਪਥਮ੍ਹਿ ਗੁਤ੍ਤੋ;

ਇਮਂ ਪਦੇਸਂ ਅਭਿਪਾਲਯਾਮਿ, ਵਚਨਕਰੋ ਵੇਸ੍ਸਵਣਸ੍ਸ ਰਞ੍ਞੋ’’ਤਿ.

੧੨੪੯. ‘‘ਅਧਿਚ੍ਚਲਦ੍ਧਂ ਪਰਿਣਾਮਜਂ ਤੇ, ਸਯਂ ਕਤਂ ਉਦਾਹੁ ਦੇਵੇਹਿ ਦਿਨ੍ਨਂ;

ਪੁਚ੍ਛਨ੍ਤਿ ਤਂ ਵਾਣਿਜਾ ਸਤ੍ਥਵਾਹਾ, ਕਥਂ ਤਯਾ ਲਦ੍ਧਮਿਦਂ ਮਨੁਞ੍ਞ’’ਨ੍ਤਿ.

੧੨੫੦. ‘‘ਨਾਧਿਚ੍ਚਲਦ੍ਧਂ ਨ ਪਰਿਣਾਮਜਂ ਮੇ, ਨ ਸਯਂ ਕਤਂ ਨ ਹਿ ਦੇਵੇਹਿ ਦਿਨ੍ਨਂ;

ਸਕੇਹਿ ਕਮ੍ਮੇਹਿ ਅਪਾਪਕੇਹਿ, ਪੁਞ੍ਞੇਹਿ ਮੇ ਲਦ੍ਧਮਿਦਂ ਮਨੁਞ੍ਞ’’ਨ੍ਤਿ.

੧੨੫੧. ‘‘ਕਿਂ ਤੇ ਵਤਂ ਕਿਂ ਪਨ ਬ੍ਰਹ੍ਮਚਰਿਯਂ, ਕਿਸ੍ਸ ਸੁਚਿਣ੍ਣਸ੍ਸ ਅਯਂ ਵਿਪਾਕੋ;

ਪੁਚ੍ਛਨ੍ਤਿ ਤਂ ਵਾਣਿਜਾ ਸਤ੍ਥਵਾਹਾ, ਕਥਂ ਤਯਾ ਲਦ੍ਧਮਿਦਂ ਵਿਮਾਨ’’ਨ੍ਤਿ.

੧੨੫੨. ‘‘ਮਮਂ ਪਾਯਾਸੀਤਿ ਅਹੁ ਸਮਞ੍ਞਾ, ਰਜ੍ਜਂ ਯਦਾ ਕਾਰਯਿਂ ਕੋਸਲਾਨਂ;

ਨਤ੍ਥਿਕਦਿਟ੍ਠਿ ਕਦਰਿਯੋ ਪਾਪਧਮ੍ਮੋ, ਉਚ੍ਛੇਦਵਾਦੀ ਚ ਤਦਾ ਅਹੋਸਿਂ.

੧੨੫੩. ‘‘ਸਮਣੋ ਚ ਖੋ ਆਸਿ ਕੁਮਾਰਕਸ੍ਸਪੋ, ਬਹੁਸ੍ਸੁਤੋ ਚਿਤ੍ਤਕਥੀ ਉਲ਼ਾਰੋ;

ਸੋ ਮੇ ਤਦਾ ਧਮ੍ਮਕਥਂ ਅਭਾਸਿ [ਅਕਾਸਿ (ਸੀ.)], ਦਿਟ੍ਠਿਵਿਸੂਕਾਨਿ ਵਿਨੋਦਯੀ ਮੇ.

੧੨੫੪. ‘‘ਤਾਹਂ ਤਸ੍ਸ [ਤਾਹਂ (ਕ.)] ਧਮ੍ਮਕਥਂ ਸੁਣਿਤ੍ਵਾ, ਉਪਾਸਕਤ੍ਤਂ ਪਟਿਵੇਦਯਿਸ੍ਸਂ;

ਪਾਣਾਤਿਪਾਤਾ ਵਿਰਤੋ ਅਹੋਸਿਂ, ਲੋਕੇ ਅਦਿਨ੍ਨਂ ਪਰਿਵਜ੍ਜਯਿਸ੍ਸਂ;

ਅਮਜ੍ਜਪੋ ਨੋ ਚ ਮੁਸਾ ਅਭਾਣਿਂ, ਸਕੇਨ ਦਾਰੇਨ ਚ ਅਹੋਸਿ ਤੁਟ੍ਠੋ.

੧੨੫੫. ‘‘ਤਂ ਮੇ ਵਤਂ ਤਂ ਪਨ ਬ੍ਰਹ੍ਮਚਰਿਯਂ, ਤਸ੍ਸ ਸੁਚਿਣ੍ਣਸ੍ਸ ਅਯਂ ਵਿਪਾਕੋ;

ਤੇਹੇਵ ਕਮ੍ਮੇਹਿ ਅਪਾਪਕੇਹਿ, ਪੁਞ੍ਞੇਹਿ ਮੇ ਲਦ੍ਧਮਿਦਂ ਵਿਮਾਨ’’ਨ੍ਤਿ.

੧੨੫੬. ‘‘ਸਚ੍ਚਂ ਕਿਰਾਹਂਸੁ ਨਰਾ ਸਪਞ੍ਞਾ, ਅਨਞ੍ਞਥਾ ਵਚਨਂ ਪਣ੍ਡਿਤਾਨਂ;

ਯਹਿਂ ਯਹਿਂ ਗਚ੍ਛਤਿ ਪੁਞ੍ਞਕਮ੍ਮੋ, ਤਹਿਂ ਤਹਿਂ ਮੋਦਤਿ ਕਾਮਕਾਮੀ.

੧੨੫੭. ‘‘ਯਹਿਂ ਯਹਿਂ ਸੋਕਪਰਿਦ੍ਦਵੋ ਚ, ਵਧੋ ਚ ਬਨ੍ਧੋ ਚ ਪਰਿਕ੍ਕਿਲੇਸੋ;

ਤਹਿਂ ਤਹਿਂ ਗਚ੍ਛਤਿ ਪਾਪਕਮ੍ਮੋ, ਨ ਮੁਚ੍ਚਤਿ ਦੁਗ੍ਗਤਿਯਾ ਕਦਾਚੀ’’ਤਿ.

੧੨੫੮. ‘‘ਸਮ੍ਮੂਲ਼੍ਹਰੂਪੋਵ ਜਨੋ ਅਹੋਸਿ, ਅਸ੍ਮਿਂ ਮੁਹੁਤ੍ਤੇ ਕਲਲੀਕਤੋਵ;

ਜਨਸ੍ਸਿਮਸ੍ਸ ਤੁਯ੍ਹਞ੍ਚ ਕੁਮਾਰ, ਅਪ੍ਪਚ੍ਚਯੋ ਕੇਨ ਨੁ ਖੋ ਅਹੋਸੀ’’ਤਿ.

੧੨੫੯. ‘‘ਇਮੇ ਚ ਸਿਰੀਸਵਨਾ [ਇਮੇ ਸਿਰੀਸੂਪਵਨਾ ਚ (ਸੀ.), ਇਮੇਪਿ ਸਿਰੀਸਵਨਾ ਚ (ਪੀ. ਕ.)] ਤਾਤਾ, ਦਿਬ੍ਬਾ [ਦਿਬ੍ਬਾ ਚ (ਪੀ. ਕ.)] ਗਨ੍ਧਾ ਸੁਰਭੀ [ਸੁਰਭਿਂ (ਸੀ. ਕ.)] ਸਮ੍ਪਵਨ੍ਤਿ [ਸਮ੍ਪਵਾਯਨ੍ਤਿ (ਕ.)];

ਤੇ ਸਮ੍ਪਵਾਯਨ੍ਤਿ ਇਮਂ ਵਿਮਾਨਂ, ਦਿਵਾ ਚ ਰਤ੍ਤੋ ਚ ਤਮਂ ਨਿਹਨ੍ਤ੍ਵਾ.

੧੨੬੦. ‘‘ਇਮੇਸਞ੍ਚ ਖੋ ਵਸ੍ਸਸਤਚ੍ਚਯੇਨ, ਸਿਪਾਟਿਕਾ ਫਲਤਿ ਏਕਮੇਕਾ;

ਮਾਨੁਸ੍ਸਕਂ ਵਸ੍ਸਸਤਂ ਅਤੀਤਂ, ਯਦਗ੍ਗੇ ਕਾਯਮ੍ਹਿ ਇਧੂਪਪਨ੍ਨੋ.

੧੨੬੧. ‘‘ਦਿਸ੍ਵਾਨਹਂ ਵਸ੍ਸਸਤਾਨਿ ਪਞ੍ਚ, ਅਸ੍ਮਿਂ ਵਿਮਾਨੇ ਠਤ੍ਵਾਨ ਤਾਤਾ;

ਆਯੁਕ੍ਖਯਾ ਪੁਞ੍ਞਕ੍ਖਯਾ ਚਵਿਸ੍ਸਂ, ਤੇਨੇਵ ਸੋਕੇਨ ਪਮੁਚ੍ਛਿਤੋਸ੍ਮੀ’’ਤਿ [ਸਮੁਚ੍ਛਿਤੋਸ੍ਮੀਤਿ (ਪੀ. ਕ.)].

੧੨੬੨. ‘‘ਕਥਂ ਨੁ ਸੋਚੇਯ੍ਯ ਤਥਾਵਿਧੋ ਸੋ, ਲਦ੍ਧਾ ਵਿਮਾਨਂ ਅਤੁਲਂ ਚਿਰਾਯ;

ਯੇ ਚਾਪਿ ਖੋ ਇਤ੍ਤਰਮੁਪਪਨ੍ਨਾ, ਤੇ ਨੂਨ ਸੋਚੇਯ੍ਯੁਂ ਪਰਿਤ੍ਤਪੁਞ੍ਞਾ’’ਤਿ.

੧੨੬੩. ‘‘ਅਨੁਚ੍ਛਵਿਂ ਓਵਦਿਯਞ੍ਚ ਮੇ ਤਂ, ਯਂ ਮਂ ਤੁਮ੍ਹੇ ਪੇਯ੍ਯਵਾਚਂ ਵਦੇਥ;

ਤੁਮ੍ਹੇ ਚ ਖੋ ਤਾਤਾ ਮਯਾਨੁਗੁਤ੍ਤਾ, ਯੇਨਿਚ੍ਛਕਂ ਤੇਨ ਪਲੇਥ ਸੋਤ੍ਥਿ’’ਨ੍ਤਿ.

੧੨੬੪. ‘‘ਗਨ੍ਤ੍ਵਾ ਮਯਂ ਸਿਨ੍ਧੁਸੋਵੀਰਭੂਮਿਂ, ਧਨਤ੍ਥਿਕਾ ਉਦ੍ਦਯਂ ਪਤ੍ਥਯਾਨਾ;

ਯਥਾਪਯੋਗਾ ਪਰਿਪੁਣ੍ਣਚਾਗਾ, ਕਾਹਾਮ ਸੇਰੀਸਮਹਂ ਉਲ਼ਾਰ’’ਨ੍ਤਿ.

੧੨੬੫. ‘‘ਮਾ ਚੇਵ ਸੇਰੀਸਮਹਂ ਅਕਤ੍ਥ, ਸਬ੍ਬਞ੍ਚ ਵੋ ਭਵਿਸ੍ਸਤਿ ਯਂ ਵਦੇਥ;

ਪਾਪਾਨਿ ਕਮ੍ਮਾਨਿ ਵਿਵਜ੍ਜਯਾਥ, ਧਮ੍ਮਾਨੁਯੋਗਞ੍ਚ ਅਧਿਟ੍ਠਹਾਥ.

੧੨੬੬. ‘‘ਉਪਾਸਕੋ ਅਤ੍ਥਿ ਇਮਮ੍ਹਿ ਸਙ੍ਘੇ, ਬਹੁਸ੍ਸੁਤੋ ਸੀਲਵਤੂਪਪਨ੍ਨੋ;

ਸਦ੍ਧੋ ਚ ਚਾਗੀ ਚ ਸੁਪੇਸਲੋ ਚ, ਵਿਚਕ੍ਖਣੋ ਸਨ੍ਤੁਸਿਤੋ ਮੁਤੀਮਾ.

੧੨੬੭. ‘‘ਸਞ੍ਜਾਨਮਾਨੋ ਨ ਮੁਸਾ ਭਣੇਯ੍ਯ, ਪਰੂਪਘਾਤਾਯ ਨ ਚੇਤਯੇਯ੍ਯ;

ਵੇਭੂਤਿਕਂ ਪੇਸੁਣਂ ਨੋ ਕਰੇਯ੍ਯ, ਸਣ੍ਹਞ੍ਚ ਵਾਚਂ ਸਖਿਲਂ ਭਣੇਯ੍ਯ.

੧੨੬੮. ‘‘ਸਗਾਰਵੋ ਸਪ੍ਪਟਿਸ੍ਸੋ ਵਿਨੀਤੋ, ਅਪਾਪਕੋ ਅਧਿਸੀਲੇ ਵਿਸੁਦ੍ਧੋ;

ਸੋ ਮਾਤਰਂ ਪਿਤਰਞ੍ਚਾਪਿ ਜਨ੍ਤੁ, ਧਮ੍ਮੇਨ ਪੋਸੇਤਿ ਅਰਿਯਵੁਤ੍ਤਿ.

੧੨੬੯. ‘‘ਮਞ੍ਞੇ ਸੋ ਮਾਤਾਪਿਤੂਨਂ ਕਾਰਣਾ, ਭੋਗਾਨਿ ਪਰਿਯੇਸਤਿ ਨ ਅਤ੍ਤਹੇਤੁ;

ਮਾਤਾਪਿਤੂਨਞ੍ਚ ਯੋ [ਸੋ (?)] ਅਚ੍ਚਯੇਨ, ਨੇਕ੍ਖਮ੍ਮਪੋਣੋ ਚਰਿਸ੍ਸਤਿ ਬ੍ਰਹ੍ਮਚਰਿਯਂ.

੧੨੭੦. ‘‘ਉਜੂ ਅਵਙ੍ਕੋ ਅਸਠੋ ਅਮਾਯੋ, ਨ ਲੇਸਕਪ੍ਪੇਨ ਚ ਵੋਹਰੇਯ੍ਯ;

ਸੋ ਤਾਦਿਸੋ ਸੁਕਤਕਮ੍ਮਕਾਰੀ, ਧਮ੍ਮੇ ਠਿਤੋ ਕਿਨ੍ਤਿ ਲਭੇਥ ਦੁਕ੍ਖਂ.

੧੨੭੧. ‘‘ਤਂ ਕਾਰਣਾ ਪਾਤੁਕਤੋਮ੍ਹਿ ਅਤ੍ਤਨਾ, ਤਸ੍ਮਾ ਧਮ੍ਮਂ ਪਸ੍ਸਥ ਵਾਣਿਜਾਸੇ;

ਅਞ੍ਞਤ੍ਰ ਤੇਨਿਹ ਭਸ੍ਮੀ [ਭਸ੍ਮਿ (ਸ੍ਯਾ.), ਭਸ੍ਮ (ਕ.)] ਭਵੇਥ, ਅਨ੍ਧਾਕੁਲਾ ਵਿਪ੍ਪਨਟ੍ਠਾ ਅਰਞ੍ਞੇ;

ਤਂ ਖਿਪ੍ਪਮਾਨੇਨ ਲਹੁਂ ਪਰੇਨ, ਸੁਖੋ ਹਵੇ ਸਪ੍ਪੁਰਿਸੇਨ ਸਙ੍ਗਮੋ’’ਤਿ.

੧੨੭੨. ‘‘ਕਿਂ ਨਾਮ ਸੋ ਕਿਞ੍ਚ ਕਰੋਤਿ ਕਮ੍ਮਂ,

ਕਿਂ ਨਾਮਧੇਯ੍ਯਂ ਕਿਂ ਪਨ ਤਸ੍ਸ ਗੋਤ੍ਤਂ;

ਮਯਮ੍ਪਿ ਨਂ ਦਟ੍ਠੁਕਾਮਮ੍ਹ ਯਕ੍ਖ, ਯਸ੍ਸਾਨੁਕਮ੍ਪਾਯ ਇਧਾਗਤੋਸਿ;

ਲਾਭਾ ਹਿ ਤਸ੍ਸ, ਯਸ੍ਸ ਤੁਵਂ ਪਿਹੇਸੀ’’ਤਿ.

੧੨੭੩. ‘‘ਯੋ ਕਪ੍ਪਕੋ ਸਮ੍ਭਵਨਾਮਧੇਯ੍ਯੋ,

ਉਪਾਸਕੋ ਕੋਚ੍ਛਫਲੂਪਜੀਵੀ;

ਜਾਨਾਥ ਨਂ ਤੁਮ੍ਹਾਕਂ ਪੇਸਿਯੋ ਸੋ,

ਮਾ ਖੋ ਨਂ ਹੀਲ਼ਿਤ੍ਥ ਸੁਪੇਸਲੋ ਸੋ’’ਤਿ.

੧੨੭੪. ‘‘ਜਾਨਾਮਸੇ ਯਂ ਤ੍ਵਂ ਪਵਦੇਸਿ [ਵਦੇਸਿ (ਸੀ.)] ਯਕ੍ਖ,

ਨ ਖੋ ਨਂ ਜਾਨਾਮ ਸ ਏਦਿਸੋਤਿ;

ਮਯਮ੍ਪਿ ਨਂ ਪੂਜਯਿਸ੍ਸਾਮ ਯਕ੍ਖ,

ਸੁਤ੍ਵਾਨ ਤੁਯ੍ਹਂ ਵਚਨਂ ਉਲ਼ਾਰ’’ਨ੍ਤਿ.

੧੨੭੫. ‘‘ਯੇ ਕੇਚਿ ਇਮਸ੍ਮਿਂ ਸਤ੍ਥੇ ਮਨੁਸ੍ਸਾ,

ਦਹਰਾ ਮਹਨ੍ਤਾ ਅਥਵਾਪਿ ਮਜ੍ਝਿਮਾ;

ਸਬ੍ਬੇਵ ਤੇ ਆਲਮ੍ਬਨ੍ਤੁ ਵਿਮਾਨਂ,

ਪਸ੍ਸਨ੍ਤੁ ਪੁਞ੍ਞਾਨਂ ਫਲਂ ਕਦਰਿਯਾ’’ਤਿ.

੧੨੭੬. ਤੇ ਤਤ੍ਥ ਸਬ੍ਬੇਵ ‘ਅਹਂ ਪੁਰੇ’ਤਿ,

ਤਂ ਕਪ੍ਪਕਂ ਤਤ੍ਥ ਪੁਰਕ੍ਖਤ੍ਵਾ [ਪੁਰਕ੍ਖਿਪਿਤ੍ਵਾ (ਸੀ.)];

ਸਬ੍ਬੇਵ ਤੇ ਆਲਮ੍ਬਿਂਸੁ ਵਿਮਾਨਂ,

ਮਸਕ੍ਕਸਾਰਂ ਵਿਯ ਵਾਸਵਸ੍ਸ.

੧੨੭੭. ਤੇ ਤਤ੍ਥ ਸਬ੍ਬੇਵ ‘ਅਹਂ ਪੁਰੇ’ਤਿ, ਉਪਾਸਕਤ੍ਤਂ ਪਟਿਵੇਦਯਿਂਸੁ;

ਪਾਣਾਤਿਪਾਤਾ ਵਿਰਤਾ ਅਹੇਸੁਂ, ਲੋਕੇ ਅਦਿਨ੍ਨਂ ਪਰਿਵਜ੍ਜਯਿਂਸੁ;

ਅਮਜ੍ਜਪਾ ਨੋ ਚ ਮੁਸਾ ਭਣਿਂਸੁ, ਸਕੇਨ ਦਾਰੇਨ ਚ ਅਹੇਸੁਂ ਤੁਟ੍ਠਾ.

੧੨੭੮. ਤੇ ਤਤ੍ਥ ਸਬ੍ਬੇਵ ‘ਅਹਂ ਪੁਰੇ’ਤਿ, ਉਪਾਸਕਤ੍ਤਂ ਪਟਿਵੇਦਯਿਤ੍ਵਾ;

ਪਕ੍ਕਾਮਿ ਸਤ੍ਥੋ ਅਨੁਮੋਦਮਾਨੋ, ਯਕ੍ਖਿਦ੍ਧਿਯਾ ਅਨੁਮਤੋ ਪੁਨਪ੍ਪੁਨਂ.

੧੨੭੯. ‘‘ਗਨ੍ਤ੍ਵਾਨ ਤੇ ਸਿਨ੍ਧੁਸੋਵੀਰਭੂਮਿਂ, ਧਨਤ੍ਥਿਕਾ ਉਦ੍ਦਯਂ [ਉਦਯ (ਪੀ. ਕ.)] ਪਤ੍ਥਯਾਨਾ;

ਯਥਾਪਯੋਗਾ ਪਰਿਪੁਣ੍ਣਲਾਭਾ, ਪਚ੍ਚਾਗਮੁਂ ਪਾਟਲਿਪੁਤ੍ਤਮਕ੍ਖਤਂ.

੧੨੮੦. ‘‘ਗਨ੍ਤ੍ਵਾਨ ਤੇ ਸਙ੍ਘਰਂ ਸੋਤ੍ਥਿਵਨ੍ਤੋ,

ਪੁਤ੍ਤੇਹਿ ਦਾਰੇਹਿ ਸਮਙ੍ਗਿਭੂਤਾ;

ਆਨਨ੍ਦੀ ਵਿਤ੍ਤਾ [ਆਨਨ੍ਦਚਿਤ੍ਤਾ (ਸ੍ਯਾ.), ਆਨਨ੍ਦੀਚਿਤ੍ਤਾ (ਕ.)] ਸੁਮਨਾ ਪਤੀਤਾ,

ਅਕਂਸੁ ਸੇਰੀਸਮਹਂ ਉਲ਼ਾਰਂ;

ਸੇਰੀਸਕਂ ਤੇ ਪਰਿਵੇਣਂ ਮਾਪਯਿਂਸੁ.

੧੨੮੧. ਏਤਾਦਿਸਾ ਸਪ੍ਪੁਰਿਸਾਨ ਸੇਵਨਾ,

ਮਹਤ੍ਥਿਕਾ ਧਮ੍ਮਗੁਣਾਨ ਸੇਵਨਾ;

ਏਕਸ੍ਸ ਅਤ੍ਥਾਯ ਉਪਾਸਕਸ੍ਸ,

ਸਬ੍ਬੇਵ ਸਤ੍ਤਾ ਸੁਖਿਤਾ [ਸੁਖਿਨੋ (ਪੀ. ਕ.)] ਅਹੇਸੁਨ੍ਤਿ.

ਸੇਰੀਸਕਵਿਮਾਨਂ ਦਸਮਂ.