੧੧. ਸੁਨਿਕ੍ਖਿਤ੍ਤਵਿਮਾਨਵਤ੍ਥੁ

੧੨੮੨. ‘‘ਉਚ੍ਚਮਿਦਂ ਮਣਿਥੂਣਂ ਵਿਮਾਨਂ, ਸਮਨ੍ਤਤੋ ਦ੍ਵਾਦਸ ਯੋਜਨਾਨਿ;

ਕੂਟਾਗਾਰਾ ਸਤ੍ਤਸਤਾ ਉਲ਼ਾਰਾ, ਵੇਲ਼ੁਰਿਯਥਮ੍ਭਾ ਰੁਚਕਤ੍ਥਤਾ ਸੁਭਾ.

੧੨੮੩. ‘‘ਤਤ੍ਥਚ੍ਛਸਿ ਪਿਵਸਿ ਖਾਦਸਿ ਚ, ਦਿਬ੍ਬਾ ਚ ਵੀਣਾ ਪਵਦਨ੍ਤਿ ਵਗ੍ਗੁਂ;

ਦਿਬ੍ਬਾ ਰਸਾ ਕਾਮਗੁਣੇਤ੍ਥ ਪਞ੍ਚ, ਨਾਰਿਯੋ ਚ ਨਚ੍ਚਨ੍ਤਿ ਸੁਵਣ੍ਣਛਨ੍ਨਾ.

੧੨੮੪. ‘‘ਕੇਨ ਤੇਤਾਦਿਸੋ ਵਣ੍ਣੋ, ਕੇਨ ਤੇ ਇਧ ਮਿਜ੍ਝਤਿ;

ਉਪ੍ਪਜ੍ਜਨ੍ਤਿ ਚ ਤੇ ਭੋਗਾ, ਯੇ ਕੇਚਿ ਮਨਸੋ ਪਿਯਾ.

੧੨੮੫. ‘‘ਪੁਚ੍ਛਾਮਿ ‘ਤਂ ਦੇਵ ਮਹਾਨੁਭਾਵ, ਮਨੁਸ੍ਸਭੂਤੋ ਕਿਮਕਾਸਿ ਪੁਞ੍ਞਂ;

ਕੇਨਾਸਿ ਏਵਂ ਜਲਿਤਾਨੁਭਾਵੋ, ਵਣ੍ਣੋ ਚ ਤੇ ਸਬ੍ਬਦਿਸਾ ਪਭਾਸਤੀ’’ਤਿ.

੧੨੮੬. ਸੋ ਦੇਵਪੁਤ੍ਤੋ ਅਤ੍ਤਮਨੋ, ਮੋਗ੍ਗਲ੍ਲਾਨੇਨ ਪੁਚ੍ਛਿਤੋ;

ਪਞ੍ਹਂ ਪੁਟ੍ਠੋ ਵਿਯਾਕਾਸਿ, ਯਸ੍ਸ ਕਮ੍ਮਸ੍ਸਿਦਂ ਫਲਂ.

੧੨੮੭. ‘‘ਦੁਨ੍ਨਿਕ੍ਖਿਤ੍ਤਂ ਮਾਲਂ ਸੁਨਿਕ੍ਖਿਪਿਤ੍ਵਾ, ਪਤਿਟ੍ਠਪੇਤ੍ਵਾ ਸੁਗਤਸ੍ਸ ਥੂਪੇ;

ਮਹਿਦ੍ਧਿਕੋ ਚਮ੍ਹਿ ਮਹਾਨੁਭਾਵੋ, ਦਿਬ੍ਬੇਹਿ ਕਾਮੇਹਿ ਸਮਙ੍ਗਿਭੂਤੋ.

੧੨੮੮. ‘‘ਤੇਨ ਮੇਤਾਦਿਸੋ ਵਣ੍ਣੋ,

ਤੇਨ ਮੇ ਇਧ ਮਿਜ੍ਝਤਿ;

ਉਪ੍ਪਜ੍ਜਨ੍ਤਿ ਚ ਮੇ ਭੋਗਾ,

ਯੇ ਕੇਚਿ ਮਨਸੋ ਪਿਯਾ.

੧੨੮੯. ‘‘ਅਕ੍ਖਾਮਿ ਤੇ ਭਿਕ੍ਖੁ ਮਹਾਨੁਭਾਵ,

ਮਨੁਸ੍ਸਭੂਤੋ ਯਮਹਂ ਅਕਾਸਿਂ;

ਤੇਨਮ੍ਹਿ ਏਵਂ ਜਲਿਤਾਨੁਭਾਵੋ,

ਵਣ੍ਣੋ ਚ ਮੇ ਸਬ੍ਬਦਿਸਾ ਪਭਾਸਤੀ’’ਤਿ.

ਸੁਨਿਕ੍ਖਿਤ੍ਤਵਿਮਾਨਂ ਏਕਾਦਸਮਂ.

ਸੁਨਿਕ੍ਖਿਤ੍ਤਵਗ੍ਗੋ ਸਤ੍ਤਮੋ ਨਿਟ੍ਠਿਤੋ.

ਤਸ੍ਸੁਦ੍ਦਾਨਂ –

ਦ੍ਵੇ ਦਲਿਦ੍ਦਾ ਵਨਵਿਹਾਰਾ, ਭਤਕੋ ਗੋਪਾਲਕਣ੍ਡਕਾ;

ਅਨੇਕਵਣ੍ਣਮਟ੍ਠਕੁਣ੍ਡਲੀ, ਸੇਰੀਸਕੋ ਸੁਨਿਕ੍ਖਿਤ੍ਤਂ;

ਪੁਰਿਸਾਨਂ ਤਤਿਯੋ ਵਗ੍ਗੋ ਪਵੁਚ੍ਚਤੀਤਿ.

ਭਾਣਵਾਰਂ ਚਤੁਤ੍ਥਂ ਨਿਟ੍ਠਿਤਂ.