੧੩. ਚੂਲ਼ਰਥਵਿਮਾਨਵਤ੍ਥੁ

੯੮੧. ‘‘ਦਲ਼੍ਹਧਮ੍ਮਾ ਨਿਸਾਰਸ੍ਸ, ਧਨੁਂ ਓਲੁਬ੍ਭ ਤਿਟ੍ਠਸਿ;

ਖਤ੍ਤਿਯੋ ਨੁਸਿ ਰਾਜਞ੍ਞੋ, ਅਦੁ ਲੁਦ੍ਦੋ ਵਨੇਚਰੋ’’ਤਿ [ਵਨਾਚਰੋਤਿ (ਸ੍ਯਾ. ਕ.)].

੯੮੨. ‘‘ਅਸ੍ਸਕਾਧਿਪਤਿਸ੍ਸਾਹਂ, ਭਨ੍ਤੇ ਪੁਤ੍ਤੋ ਵਨੇਚਰੋ;

ਨਾਮਂ ਮੇ ਭਿਕ੍ਖੁ ਤੇ ਬ੍ਰੂਮਿ, ਸੁਜਾਤੋ ਇਤਿ ਮਂ ਵਿਦੂ [ਵਿਦੁਂ (ਸੀ.)].

੯੮੩. ‘‘ਮਿਗੇ ਗਵੇਸਮਾਨੋਹਂ, ਓਗਾਹਨ੍ਤੋ ਬ੍ਰਹਾਵਨਂ;

ਮਿਗਂ ਤਞ੍ਚੇਵ [ਮਿਗਂ ਗਨ੍ਤ੍ਵੇਵ (ਸ੍ਯਾ.), ਮਿਗਵਧਞ੍ਚ (ਕ.)] ਨਾਦ੍ਦਕ੍ਖਿਂ, ਤਞ੍ਚ ਦਿਸ੍ਵਾ ਠਿਤੋ ਅਹ’’ਨ੍ਤਿ.

੯੮੪. ‘‘ਸ੍ਵਾਗਤਂ ਤੇ ਮਹਾਪੁਞ੍ਞ, ਅਥੋ ਤੇ ਅਦੁਰਾਗਤਂ;

ਏਤ੍ਤੋ ਉਦਕਮਾਦਾਯ, ਪਾਦੇ ਪਕ੍ਖਾਲਯਸ੍ਸੁ ਤੇ.

੯੮੫. ‘‘ਇਦਮ੍ਪਿ ਪਾਨੀਯਂ ਸੀਤਂ, ਆਭਤਂ ਗਿਰਿਗਬ੍ਭਰਾ;

ਰਾਜਪੁਤ੍ਤ ਤਤੋ ਪਿਤ੍ਵਾ [ਪੀਤ੍ਵਾ (ਸੀ. ਸ੍ਯਾ.)], ਸਨ੍ਥਤਸ੍ਮਿਂ ਉਪਾਵਿਸਾ’’ਤਿ.

੯੮੬. ‘‘ਕਲ੍ਯਾਣੀ ਵਤ ਤੇ ਵਾਚਾ, ਸਵਨੀਯਾ ਮਹਾਮੁਨਿ;

ਨੇਲਾ ਅਤ੍ਥਵਤੀ [ਚਤ੍ਥਵਤੀ (ਸੀ.)] ਵਗ੍ਗੁ, ਮਨ੍ਤ੍ਵਾ [ਮਨ੍ਤਾ (ਸ੍ਯਾ. ਪੀ. ਕ.)] ਅਤ੍ਥਞ੍ਚ ਭਾਸਸਿ [ਭਾਸਸੇ (ਸੀ.)].

੯੮੭. ‘‘ਕਾ ਤੇ ਰਤਿ ਵਨੇ ਵਿਹਰਤੋ, ਇਸਿਨਿਸਭ ਵਦੇਹਿ ਪੁਟ੍ਠੋ;

ਤਵ ਵਚਨਪਥਂ ਨਿਸਾਮਯਿਤ੍ਵਾ, ਅਤ੍ਥਧਮ੍ਮਪਦਂ ਸਮਾਚਰੇਮਸੇ’’ਤਿ.

੯੮੮. ‘‘ਅਹਿਂਸਾ ਸਬ੍ਬਪਾਣੀਨਂ, ਕੁਮਾਰਮ੍ਹਾਕ ਰੁਚ੍ਚਤਿ;

ਥੇਯ੍ਯਾ ਚ ਅਤਿਚਾਰਾ ਚ, ਮਜ੍ਜਪਾਨਾ ਚ ਆਰਤਿ.

੯੮੯. ‘‘ਆਰਤਿ ਸਮਚਰਿਯਾ ਚ, ਬਾਹੁਸਚ੍ਚਂ ਕਤਞ੍ਞੁਤਾ;

ਦਿਟ੍ਠੇਵ ਧਮ੍ਮੇ ਪਾਸਂਸਾ, ਧਮ੍ਮਾ ਏਤੇ ਪਸਂਸਿਯਾਤਿ.

੯੯੦. ‘‘ਸਨ੍ਤਿਕੇ ਮਰਣਂ ਤੁਯ੍ਹਂ, ਓਰਂ ਮਾਸੇਹਿ ਪਞ੍ਚਹਿ;

ਰਾਜਪੁਤ੍ਤ ਵਿਜਾਨਾਹਿ, ਅਤ੍ਤਾਨਂ ਪਰਿਮੋਚਯਾ’’ਤਿ.

੯੯੧. ‘‘ਕਤਮਂ ਸ੍ਵਾਹਂ ਜਨਪਦਂ ਗਨ੍ਤ੍ਵਾ, ਕਿਂ ਕਮ੍ਮਂ ਕਿਞ੍ਚ ਪੋਰਿਸਂ;

ਕਾਯ ਵਾ ਪਨ ਵਿਜ੍ਜਾਯ, ਭਵੇਯ੍ਯਂ ਅਜਰਾਮਰੋ’’ਤਿ.

੯੯੨. ‘‘ਨ ਵਿਜ੍ਜਤੇ ਸੋ ਪਦੇਸੋ, ਕਮ੍ਮਂ ਵਿਜ੍ਜਾ ਚ ਪੋਰਿਸਂ;

ਯਤ੍ਥ ਗਨ੍ਤ੍ਵਾ ਭਵੇ ਮਚ੍ਚੋ, ਰਾਜਪੁਤ੍ਤਾਜਰਾਮਰੋ.

੯੯੩. ‘‘ਮਹਦ੍ਧਨਾ ਮਹਾਭੋਗਾ, ਰਟ੍ਠਵਨ੍ਤੋਪਿ ਖਤ੍ਤਿਯਾ;

ਪਹੂਤਧਨਧਞ੍ਞਾਸੇ, ਤੇਪਿ ਨੋ [ਤੇਪਿ ਨ (ਬਹੂਸੁ)] ਅਜਰਾਮਰਾ.

੯੯੪. ‘‘ਯਦਿ ਤੇ ਸੁਤਾ ਅਨ੍ਧਕਵੇਣ੍ਡੁਪੁਤ੍ਤਾ [ਅਨ੍ਧਕਵੇਣ੍ਹੁਪੁਤ੍ਤਾ (ਸੀ.), ਅਣ੍ਡਕਵੇਣ੍ਡਪੁਤ੍ਤਾ (ਸ੍ਯਾ. ਕ.)], ਸੂਰਾ ਵੀਰਾ ਵਿਕ੍ਕਨ੍ਤਪ੍ਪਹਾਰਿਨੋ;

ਤੇਪਿ ਆਯੁਕ੍ਖਯਂ ਪਤ੍ਤਾ, ਵਿਦ੍ਧਸ੍ਤਾ ਸਸ੍ਸਤੀਸਮਾ.

੯੯੫. ‘‘ਖਤ੍ਤਿਯਾ ਬ੍ਰਾਹ੍ਮਣਾ ਵੇਸ੍ਸਾ, ਸੁਦ੍ਦਾ ਚਣ੍ਡਾਲਪੁਕ੍ਕੁਸਾ;

ਏਤੇ ਚਞ੍ਞੇ ਚ ਜਾਤਿਯਾ, ਤੇਪਿ ਨੋ ਅਜਰਾਮਰਾ.

੯੯੬. ‘‘ਯੇ ਮਨ੍ਤਂ ਪਰਿਵਤ੍ਤੇਨ੍ਤਿ, ਛਲ਼ਙ੍ਗਂ ਬ੍ਰਹ੍ਮਚਿਨ੍ਤਿਤਂ;

ਏਤੇ ਚਞ੍ਞੇ ਚ ਵਿਜ੍ਜਾਯ, ਤੇਪਿ ਨੋ ਅਜਰਾਮਰਾ.

੯੯੭. ‘‘ਇਸਯੋ ਚਾਪਿ ਯੇ ਸਨ੍ਤਾ, ਸਞ੍ਞਤਤ੍ਤਾ ਤਪਸ੍ਸਿਨੋ;

ਸਰੀਰਂ ਤੇਪਿ ਕਾਲੇਨ, ਵਿਜਹਨ੍ਤਿ ਤਪਸ੍ਸਿਨੋ.

੯੯੮. ‘‘ਭਾਵਿਤਤ੍ਤਾਪਿ ਅਰਹਨ੍ਤੋ, ਕਤਕਿਚ੍ਚਾ ਅਨਾਸਵਾ;

ਨਿਕ੍ਖਿਪਨ੍ਤਿ ਇਮਂ ਦੇਹਂ, ਪੁਞ੍ਞਪਾਪਪਰਿਕ੍ਖਯਾ’’ਤਿ.

੯੯੯. ‘‘ਸੁਭਾਸਿਤਾ ਅਤ੍ਥਵਤੀ, ਗਾਥਾਯੋ ਤੇ ਮਹਾਮੁਨਿ;

ਨਿਜ੍ਝਤ੍ਤੋਮ੍ਹਿ ਸੁਭਟ੍ਠੇਨ, ਤ੍ਵਞ੍ਚ ਮੇ ਸਰਣਂ ਭਵਾ’’ਤਿ.

੧੦੦੦. ‘‘ਮਾ ਮਂ ਤ੍ਵਂ ਸਰਣਂ ਗਚ੍ਛ, ਤਮੇਵ ਸਰਣਂ ਵਜ [ਭਜ (ਕ.)];

ਸਕ੍ਯਪੁਤ੍ਤਂ ਮਹਾਵੀਰਂ, ਯਮਹਂ ਸਰਣਂ ਗਤੋ’’ਤਿ.

੧੦੦੧. ‘‘ਕਤਰਸ੍ਮਿਂ ਸੋ ਜਨਪਦੇ, ਸਤ੍ਥਾ ਤੁਮ੍ਹਾਕ ਮਾਰਿਸ;

ਅਹਮ੍ਪਿ ਦਟ੍ਠੁਂ ਗਚ੍ਛਿਸ੍ਸਂ, ਜਿਨਂ ਅਪ੍ਪਟਿਪੁਗ੍ਗਲ’’ਨ੍ਤਿ.

੧੦੦੨. ‘‘ਪੁਰਤ੍ਥਿਮਸ੍ਮਿਂ ਜਨਪਦੇ, ਓਕ੍ਕਾਕਕੁਲਸਮ੍ਭਵੋ;

ਤਤ੍ਥਾਸਿ ਪੁਰਿਸਾਜਞ੍ਞੋ, ਸੋ ਚ ਖੋ ਪਰਿਨਿਬ੍ਬੁਤੋ’’ਤਿ.

੧੦੦੩. ‘‘ਸਚੇ ਹਿ ਬੁਦ੍ਧੋ ਤਿਟ੍ਠੇਯ੍ਯ, ਸਤ੍ਥਾ ਤੁਮ੍ਹਾਕ ਮਾਰਿਸ;

ਯੋਜਨਾਨਿ ਸਹਸ੍ਸਾਨਿ, ਗਚ੍ਛੇਯ੍ਯਂ [ਗਚ੍ਛੇ (ਸ੍ਯਾ. ਪੀ. ਕ.)] ਪਯਿਰੁਪਾਸਿਤੁਂ.

੧੦੦੪. ‘‘ਯਤੋ ਚ ਖੋ [ਯਤਾ ਖੋ (ਪੀ. ਕ.)] ਪਰਿਨਿਬ੍ਬੁਤੋ, ਸਤ੍ਥਾ ਤੁਮ੍ਹਾਕ ਮਾਰਿਸ;

ਨਿਬ੍ਬੁਤਮ੍ਪਿ [ਪਰਿਨਿਬ੍ਬੁਤਂ (ਸ੍ਯਾ. ਕ.)] ਮਹਾਵੀਰਂ, ਗਚ੍ਛਾਮਿ ਸਰਣਂ ਅਹਂ.

੧੦੦੫. ‘‘ਉਪੇਮਿ ਸਰਣਂ ਬੁਦ੍ਧਂ, ਧਮ੍ਮਞ੍ਚਾਪਿ ਅਨੁਤ੍ਤਰਂ;

ਸਙ੍ਘਞ੍ਚ ਨਰਦੇਵਸ੍ਸ, ਗਚ੍ਛਾਮਿ ਸਰਣਂ ਅਹਂ.

੧੦੦੬. ‘‘ਪਾਣਾਤਿਪਾਤਾ ਵਿਰਮਾਮਿ ਖਿਪ੍ਪਂ, ਲੋਕੇ ਅਦਿਨ੍ਨਂ ਪਰਿਵਜ੍ਜਯਾਮਿ;

ਅਮਜ੍ਜਪੋ ਨੋ ਚ ਮੁਸਾ ਭਣਾਮਿ, ਸਕੇਨ ਦਾਰੇਨ ਚ ਹੋਮਿ ਤੁਟ੍ਠੋ’’ਤਿ.

੧੦੦੭. ‘‘ਸਹਸ੍ਸਰਂਸੀਵ ਯਥਾ ਮਹਪ੍ਪਭੋ, ਦਿਸਂ ਯਥਾ ਭਾਤਿ ਨਭੇ ਅਨੁਕ੍ਕਮਂ;

ਤਥਾਪਕਾਰੋ [ਤਥਪ੍ਪਕਾਰੋ (ਸੀ. ਸ੍ਯਾ.)] ਤਵਾਯਂ [ਤਵਯਂ (ਸੀ. ਪੀ.)] ਮਹਾਰਥੋ, ਸਮਨ੍ਤਤੋ ਯੋਜਨਸਤ੍ਤਮਾਯਤੋ.

੧੦੦੮. ‘‘ਸੁਵਣ੍ਣਪਟ੍ਟੇਹਿ ਸਮਨ੍ਤਮੋਤ੍ਥਟੋ, ਉਰਸ੍ਸ ਮੁਤ੍ਤਾਹਿ ਮਣੀਹਿ ਚਿਤ੍ਤਿਤੋ;

ਲੇਖਾ ਸੁਵਣ੍ਣਸ੍ਸ ਚ ਰੂਪਿਯਸ੍ਸ ਚ, ਸੋਭੇਨ੍ਤਿ ਵੇਲ਼ੁਰਿਯਮਯਾ ਸੁਨਿਮ੍ਮਿਤਾ.

੧੦੦੯. ‘‘ਸੀਸਞ੍ਚਿਦਂ ਵੇਲ਼ੁਰਿਯਸ੍ਸ ਨਿਮ੍ਮਿਤਂ, ਯੁਗਞ੍ਚਿਦਂ ਲੋਹਿਤਕਾਯ ਚਿਤ੍ਤਿਤਂ;

ਯੁਤ੍ਤਾ ਸੁਵਣ੍ਣਸ੍ਸ ਚ ਰੂਪਿਯਸ੍ਸ ਚ, ਸੋਭਨ੍ਤਿ ਅਸ੍ਸਾ ਚ ਇਮੇ ਮਨੋਜਵਾ.

੧੦੧੦. ‘‘ਸੋ ਤਿਟ੍ਠਸਿ ਹੇਮਰਥੇ ਅਧਿਟ੍ਠਿਤੋ, ਦੇਵਾਨਮਿਨ੍ਦੋਵ ਸਹਸ੍ਸਵਾਹਨੋ;

ਪੁਚ੍ਛਾਮਿ ਤਾਹਂ ਯਸਵਨ੍ਤ ਕੋਵਿਦਂ [ਕੋਵਿਦ (ਕ.)], ਕਥਂ ਤਯਾ ਲਦ੍ਧੋ ਅਯਂ ਉਲ਼ਾਰੋ’’ਤਿ.

੧੦੧੧. ‘‘ਸੁਜਾਤੋ ਨਾਮਹਂ ਭਨ੍ਤੇ, ਰਾਜਪੁਤ੍ਤੋ ਪੁਰੇ ਅਹੁਂ;

ਤ੍ਵਞ੍ਚ ਮਂ ਅਨੁਕਮ੍ਪਾਯ, ਸਞ੍ਞਮਸ੍ਮਿਂ ਨਿਵੇਸਯਿ.

੧੦੧੨. ‘‘ਖੀਣਾਯੁਕਞ੍ਚ ਮਂ ਞਤ੍ਵਾ, ਸਰੀਰਂ ਪਾਦਾਸਿ ਸਤ੍ਥੁਨੋ;

ਇਮਂ ਸੁਜਾਤ ਪੂਜੇਹਿ, ਤਂ ਤੇ ਅਤ੍ਥਾਯ ਹੇਹਿਤਿ.

੧੦੧੩. ‘‘ਤਾਹਂ ਗਨ੍ਧੇਹਿ ਮਾਲੇਹਿ, ਪੂਜਯਿਤ੍ਵਾ ਸਮੁਯ੍ਯੁਤੋ;

ਪਹਾਯ ਮਾਨੁਸਂ ਦੇਹਂ, ਉਪਪਨ੍ਨੋਮ੍ਹਿ ਨਨ੍ਦਨਂ.

੧੦੧੪. ‘‘ਨਨ੍ਦਨੇ ਚ ਵਨੇ [ਨਨ੍ਦਨੋਪਵਨੇ (ਸੀ.), ਨਨ੍ਦਨੇ ਪਵਨੇ (ਸ੍ਯਾ. ਕ.)] ਰਮ੍ਮੇ, ਨਾਨਾਦਿਜਗਣਾਯੁਤੇ;

ਰਮਾਮਿ ਨਚ੍ਚਗੀਤੇਹਿ, ਅਚ੍ਛਰਾਹਿ ਪੁਰਕ੍ਖਤੋ’’ਤਿ.

ਚੂਲ਼ਰਥਵਿਮਾਨਂ ਤੇਰਸਮਂ.