੫. ਮਹਾਰਥਵਗ੍ਗੋ

੧. ਮਣ੍ਡੂਕਦੇਵਪੁਤ੍ਤਵਿਮਾਨਵਤ੍ਥੁ

੮੫੭. ‘‘ਕੋ ਮੇ ਵਨ੍ਦਤਿ ਪਾਦਾਨਿ, ਇਦ੍ਧਿਯਾ ਯਸਸਾ ਜਲਂ;

ਅਭਿਕ੍ਕਨ੍ਤੇਨ ਵਣ੍ਣੇਨ, ਸਬ੍ਬਾ ਓਭਾਸਯਂ ਦਿਸਾ’’ਤਿ.

੮੫੮. ‘‘ਮਣ੍ਡੂਕੋਹਂ ਪੁਰੇ ਆਸਿਂ, ਉਦਕੇ ਵਾਰਿਗੋਚਰੋ;

ਤਵ ਧਮ੍ਮਂ ਸੁਣਨ੍ਤਸ੍ਸ, ਅਵਧੀ ਵਚ੍ਛਪਾਲਕੋ.

੮੫੯. ‘‘ਮੁਹੁਤ੍ਤਂ ਚਿਤ੍ਤਪਸਾਦਸ੍ਸ, ਇਦ੍ਧਿਂ ਪਸ੍ਸ ਯਸਞ੍ਚ ਮੇ;

ਆਨੁਭਾਵਞ੍ਚ ਮੇ ਪਸ੍ਸ, ਵਣ੍ਣਂ ਪਸ੍ਸ ਜੁਤਿਞ੍ਚ ਮੇ.

੮੬੦. ‘‘ਯੇ ਚ ਤੇ ਦੀਘਮਦ੍ਧਾਨਂ, ਧਮ੍ਮਂ ਅਸ੍ਸੋਸੁਂ ਗੋਤਮ;

ਪਤ੍ਤਾ ਤੇ ਅਚਲਟ੍ਠਾਨਂ, ਯਤ੍ਥ ਗਨ੍ਤ੍ਵਾ ਨ ਸੋਚਰੇ’’ਤਿ.

ਮਣ੍ਡੂਕਦੇਵਪੁਤ੍ਤਵਿਮਾਨਂ ਪਠਮਂ.

੨. ਰੇਵਤੀਵਿਮਾਨਵਤ੍ਥੁ

੮੬੧. [ਧ. ਪ. ੨੧੯ ਧਮ੍ਮਪਦੇ] ‘‘ਚਿਰਪ੍ਪਵਾਸਿਂ ਪੁਰਿਸਂ, ਦੂਰਤੋ ਸੋਤ੍ਥਿਮਾਗਤਂ;

ਞਾਤਿਮਿਤ੍ਤਾ ਸੁਹਜ੍ਜਾ ਚ, ਅਭਿਨਨ੍ਦਨ੍ਤਿ ਆਗਤਂ;

੮੬੨. [ਧ. ਪ. ੨੨੦ ਧਮ੍ਮਪਦੇ] ‘‘ਤਥੇਵ ਕਤਪੁਞ੍ਞਮ੍ਪਿ, ਅਸ੍ਮਾ ਲੋਕਾ ਪਰਂ ਗਤਂ;

ਪੁਞ੍ਞਾਨਿ ਪਟਿਗਣ੍ਹਨ੍ਤਿ, ਪਿਯਂ ਞਾਤੀਵ ਆਗਤਂ.

੮੬੩. [ਪੇ. ਵ. ੭੧੪]‘‘ਉਟ੍ਠੇਹਿ ਰੇਵਤੇ ਸੁਪਾਪਧਮ੍ਮੇ, ਅਪਾਰੁਤਦ੍ਵਾਰੇ [ਅਪਾਰੁਭਂ ਦ੍ਵਾਰਂ (ਸੀ. ਸ੍ਯਾ.), ਅਪਾਰੁਤਦ੍ਵਾਰਂ (ਪੀ. ਕ.)] ਅਦਾਨਸੀਲੇ;

ਨੇਸ੍ਸਾਮ ਤਂ ਯਤ੍ਥ ਥੁਨਨ੍ਤਿ ਦੁਗ੍ਗਤਾ, ਸਮਪ੍ਪਿਤਾ ਨੇਰਯਿਕਾ ਦੁਕ੍ਖੇਨਾ’’ਤਿ.

੮੬੪. ਇਚ੍ਚੇਵ [ਇਚ੍ਚੇਵਂ (ਸ੍ਯਾ. ਕ.)] ਵਤ੍ਵਾਨ ਯਮਸ੍ਸ ਦੂਤਾ, ਤੇ ਦ੍ਵੇ ਯਕ੍ਖਾ ਲੋਹਿਤਕ੍ਖਾ ਬ੍ਰਹਨ੍ਤਾ;

ਪਚ੍ਚੇਕਬਾਹਾਸੁ ਗਹੇਤ੍ਵਾ ਰੇਵਤਂ, ਪਕ੍ਕਾਮਯੁਂ ਦੇਵਗਣਸ੍ਸ ਸਨ੍ਤਿਕੇ.

੮੬੫. ‘‘ਆਦਿਚ੍ਚਵਣ੍ਣਂ ਰੁਚਿਰਂ ਪਭਸ੍ਸਰਂ, ਬ੍ਯਮ੍ਹਂ ਸੁਭਂ ਕਞ੍ਚਨਜਾਲਛਨ੍ਨਂ;

ਕਸ੍ਸੇਤਮਾਕਿਣ੍ਣਜਨਂ ਵਿਮਾਨਂ, ਸੂਰਿਯਸ੍ਸ ਰਂਸੀਰਿਵ ਜੋਤਮਾਨਂ.

੮੬੬. ‘‘ਨਾਰੀਗਣਾ ਚਨ੍ਦਨਸਾਰਲਿਤ੍ਤਾ [ਚਨ੍ਦਨਸਾਰਾਨੁਲਿਤ੍ਤਾ (ਸ੍ਯਾ.)], ਉਭਤੋ ਵਿਮਾਨਂ ਉਪਸੋਭਯਨ੍ਤਿ;

ਤਂ ਦਿਸ੍ਸਤਿ ਸੂਰਿਯਸਮਾਨਵਣ੍ਣਂ, ਕੋ ਮੋਦਤਿ ਸਗ੍ਗਪਤ੍ਤੋ ਵਿਮਾਨੇ’’ਤਿ.

੮੬੭. ‘‘ਬਾਰਾਣਸਿਯਂ ਨਨ੍ਦਿਯੋ ਨਾਮਾਸਿ, ਉਪਾਸਕੋ ਅਮਚ੍ਛਰੀ ਦਾਨਪਤਿ ਵਦਞ੍ਞੂ;

ਤਸ੍ਸੇਤਮਾਕਿਣ੍ਣਜਨਂ ਵਿਮਾਨਂ, ਸੂਰਿਯਸ੍ਸ ਰਂਸੀਰਿਵ ਜੋਤਮਾਨਂ.

੮੬੮. ‘‘ਨਾਰੀਗਣਾ ਚਨ੍ਦਨਸਾਰਲਿਤ੍ਤਾ, ਉਭਤੋ ਵਿਮਾਨਂ ਉਪਸੋਭਯਨ੍ਤਿ;

ਤਂ ਦਿਸ੍ਸਤਿ ਸੂਰਿਯਸਮਾਨਵਣ੍ਣਂ, ਸੋ ਮੋਦਤਿ ਸਗ੍ਗਪਤ੍ਤੋ ਵਿਮਾਨੇ’’ਤਿ.

੮੬੯. ‘‘ਨਨ੍ਦਿਯਸ੍ਸਾਹਂ ਭਰਿਯਾ, ਅਗਾਰਿਨੀ ਸਬ੍ਬਕੁਲਸ੍ਸ ਇਸ੍ਸਰਾ;

ਭਤ੍ਤੁ ਵਿਮਾਨੇ ਰਮਿਸ੍ਸਾਮਿ ਦਾਨਹਂ, ਨ ਪਤ੍ਥਯੇ ਨਿਰਯਂ ਦਸ੍ਸਨਾਯਾ’’ਤਿ.

੮੭੦. ‘‘ਏਸੋ ਤੇ ਨਿਰਯੋ ਸੁਪਾਪਧਮ੍ਮੇ, ਪੁਞ੍ਞਂ ਤਯਾ ਅਕਤਂ ਜੀਵਲੋਕੇ;

ਨ ਹਿ ਮਚ੍ਛਰੀ ਰੋਸਕੋ ਪਾਪਧਮ੍ਮੋ, ਸਗ੍ਗੂਪਗਾਨਂ ਲਭਤਿ ਸਹਬ੍ਯਤ’’ਨ੍ਤਿ.

੮੭੧. ‘‘ਕਿਂ ਨੁ ਗੂਥਞ੍ਚ ਮੁਤ੍ਤਞ੍ਚ, ਅਸੁਚੀ ਪਟਿਦਿਸ੍ਸਤਿ;

ਦੁਗ੍ਗਨ੍ਧਂ ਕਿਮਿਦਂ ਮੀਲ਼੍ਹਂ, ਕਿਮੇਤਂ ਉਪਵਾਯਤੀ’’ਤਿ.

੮੭੨. ‘‘ਏਸ ਸਂਸਵਕੋ ਨਾਮ, ਗਮ੍ਭੀਰੋ ਸਤਪੋਰਿਸੋ;

ਯਤ੍ਥ ਵਸ੍ਸਸਹਸ੍ਸਾਨਿ, ਤੁਵਂ ਪਚ੍ਚਸਿ ਰੇਵਤੇ’’ਤਿ.

੮੭੩. ‘‘ਕਿਂ ਨੁ ਕਾਯੇਨ ਵਾਚਾਯ, ਮਨਸਾ ਦੁਕ੍ਕਟਂ ਕਤਂ;

ਕੇਨ ਸਂਸਵਕੋ ਲਦ੍ਧੋ, ਗਮ੍ਭੀਰੋ ਸਤਪੋਰਿਸੋ’’ਤਿ.

੮੭੪. ‘‘ਸਮਣੇ ਬ੍ਰਾਹ੍ਮਣੇ ਚਾਪਿ, ਅਞ੍ਞੇ ਵਾਪਿ ਵਨਿਬ੍ਬਕੇ [ਵਣਿਬ੍ਬਕੇ (ਸ੍ਯਾ. ਕ.)];

ਮੁਸਾਵਾਦੇਨ ਵਞ੍ਚੇਸਿ, ਤਂ ਪਾਪਂ ਪਕਤਂ ਤਯਾ.

੮੭੫. ‘‘ਤੇਨ ਸਂਸਵਕੋ ਲਦ੍ਧੋ, ਗਮ੍ਭੀਰੋ ਸਤਪੋਰਿਸੋ;

ਤਤ੍ਥ ਵਸ੍ਸਸਹਸ੍ਸਾਨਿ, ਤੁਵਂ ਪਚ੍ਚਸਿ ਰੇਵਤੇ.

੮੭੬. ‘‘ਹਤ੍ਥੇਪਿ ਛਿਨ੍ਦਨ੍ਤਿ ਅਥੋਪਿ ਪਾਦੇ, ਕਣ੍ਣੇਪਿ ਛਿਨ੍ਦਨ੍ਤਿ ਅਥੋਪਿ ਨਾਸਂ;

ਅਥੋਪਿ ਕਾਕੋਲ਼ਗਣਾ ਸਮੇਚ੍ਚ, ਸਙ੍ਗਮ੍ਮ ਖਾਦਨ੍ਤਿ ਵਿਫਨ੍ਦਮਾਨ’’ਨ੍ਤਿ.

੮੭੭. ‘‘ਸਾਧੁ ਖੋ ਮਂ ਪਟਿਨੇਥ, ਕਾਹਾਮਿ ਕੁਸਲਂ ਬਹੁਂ;

ਦਾਨੇਨ ਸਮਚਰਿਯਾਯ, ਸਂਯਮੇਨ ਦਮੇਨ ਚ;

ਯਂ ਕਤ੍ਵਾ ਸੁਖਿਤਾ ਹੋਨ੍ਤਿ, ਨ ਚ ਪਚ੍ਛਾਨੁਤਪ੍ਪਰੇ’’ਤਿ.

੮੭੮. ‘‘ਪੁਰੇ ਤੁਵਂ ਪਮਜ੍ਜਿਤ੍ਵਾ, ਇਦਾਨਿ ਪਰਿਦੇਵਸਿ;

ਸਯਂ ਕਤਾਨਂ ਕਮ੍ਮਾਨਂ, ਵਿਪਾਕਂ ਅਨੁਭੋਸ੍ਸਸੀ’’ਤਿ.

੮੭੯. ‘‘ਕੋ ਦੇਵਲੋਕਤੋ ਮਨੁਸ੍ਸਲੋਕਂ, ਗਨ੍ਤ੍ਵਾਨ ਪੁਟ੍ਠੋ ਮੇ ਏਵਂ ਵਦੇਯ੍ਯ;

‘ਨਿਕ੍ਖਿਤ੍ਤਦਣ੍ਡੇਸੁ ਦਦਾਥ ਦਾਨਂ, ਅਚ੍ਛਾਦਨਂ ਸੇਯ੍ਯ [ਸਯਨ (ਸੀ.)] ਮਥਨ੍ਨਪਾਨਂ;

ਨਹਿ ਮਚ੍ਛਰੀ ਰੋਸਕੋ ਪਾਪਧਮ੍ਮੋ, ਸਗ੍ਗੂਪਗਾਨਂ ਲਭਤਿ ਸਹਬ੍ਯਤਂ’.

੮੮੦. ‘‘ਸਾਹਂ ਨੂਨ ਇਤੋ ਗਨ੍ਤ੍ਵਾ, ਯੋਨਿਂ ਲਦ੍ਧਾਨ ਮਾਨੁਸਿਂ;

ਵਦਞ੍ਞੂ ਸੀਲਸਮ੍ਪਨ੍ਨਾ, ਕਾਹਾਮਿ ਕੁਸਲਂ ਬਹੁਂ;

ਦਾਨੇਨ ਸਮਚਰਿਯਾਯ, ਸਂਯਮੇਨ ਦਮੇਨ ਚ.

੮੮੧. ‘‘ਆਰਾਮਾਨਿ ਚ ਰੋਪਿਸ੍ਸਂ, ਦੁਗ੍ਗੇ ਸਙ੍ਕਮਨਾਨਿ ਚ;

ਪਪਞ੍ਚ ਉਦਪਾਨਞ੍ਚ, ਵਿਪ੍ਪਸਨ੍ਨੇਨ ਚੇਤਸਾ.

੮੮੨. ‘‘ਚਾਤੁਦ੍ਦਸਿਂ ਪਞ੍ਚਦਸਿਂ, ਯਾ ਚ ਪਕ੍ਖਸ੍ਸ ਅਟ੍ਠਮੀ;

ਪਾਟਿਹਾਰਿਯਪਕ੍ਖਞ੍ਚ, ਅਟ੍ਠਙ੍ਗਸੁਸਮਾਗਤਂ.

੮੮੩. ‘‘ਉਪੋਸਥਂ ਉਪਵਸਿਸ੍ਸਂ, ਸਦਾ ਸੀਲੇਸੁ ਸਂਵੁਤਾ;

ਨ ਚ ਦਾਨੇ ਪਮਜ੍ਜਿਸ੍ਸਂ, ਸਾਮਂ ਦਿਟ੍ਠਮਿਦਂ ਮਯਾ’’ਤਿ;

੮੮੪. ਇਚ੍ਚੇਵਂ ਵਿਪ੍ਪਲਪਨ੍ਤਿਂ, ਫਨ੍ਦਮਾਨਂ ਤਤੋ ਤਤੋ;

ਖਿਪਿਂਸੁ ਨਿਰਯੇ ਘੋਰੇ, ਉਦ੍ਧਪਾਦਂ ਅਵਂਸਿਰਂ.

੮੮੫. ‘‘ਅਹਂ ਪੁਰੇ ਮਚ੍ਛਰਿਨੀ ਅਹੋਸਿਂ, ਪਰਿਭਾਸਿਕਾ ਸਮਣਬ੍ਰਾਹ੍ਮਣਾਨਂ;

ਵਿਤਥੇਨ ਚ ਸਾਮਿਕਂ ਵਞ੍ਚਯਿਤ੍ਵਾ, ਪਚ੍ਚਾਮਹਂ ਨਿਰਯੇ ਘੋਰਰੂਪੇ’’ਤਿ.

ਰੇਵਤੀਵਿਮਾਨਂ ਦੁਤਿਯਂ.

੩. ਛਤ੍ਤਮਾਣਵਕਵਿਮਾਨਵਤ੍ਥੁ

੮੮੬. ‘‘ਯੇ ਵਦਤਂ ਪਵਰੋ ਮਨੁਜੇਸੁ, ਸਕ੍ਯਮੁਨੀ ਭਗਵਾ ਕਤਕਿਚ੍ਚੋ;

ਪਾਰਗਤੋ ਬਲਵੀਰਿਯਸਮਙ੍ਗੀ [ਬਲਵੀਰਸਮਙ੍ਗੀ (ਕ.)], ਤਂ ਸੁਗਤਂ ਸਰਣਤ੍ਥਮੁਪੇਹਿ.

੮੮੭. ‘‘ਰਾਗਵਿਰਾਗਮਨੇਜਮਸੋਕਂ, ਧਮ੍ਮਮਸਙ੍ਖਤਮਪ੍ਪਟਿਕੂਲਂ;

ਮਧੁਰਮਿਮਂ ਪਗੁਣਂ ਸੁਵਿਭਤ੍ਤਂ, ਧਮ੍ਮਮਿਮਂ ਸਰਣਤ੍ਥਮੁਪੇਹਿ.

੮੮੮. ‘‘ਯਤ੍ਥ ਚ ਦਿਨ੍ਨ ਮਹਪ੍ਫਲਮਾਹੁ, ਚਤੂਸੁ ਸੁਚੀਸੁ ਪੁਰਿਸਯੁਗੇਸੁ;

ਅਟ੍ਠ ਚ ਪੁਗ੍ਗਲਧਮ੍ਮਦਸਾ ਤੇ, ਸਙ੍ਘਮਿਮਂ ਸਰਣਤ੍ਥਮੁਪੇਹਿ.

੮੮੯. ‘‘ਨ ਤਥਾ ਤਪਤਿ ਨਭੇ ਸੂਰਿਯੋ, ਚਨ੍ਦੋ ਚ ਨ ਭਾਸਤਿ ਨ ਫੁਸ੍ਸੋ;

ਯਥਾ ਅਤੁਲਮਿਦਂ ਮਹਪ੍ਪਭਾਸਂ, ਕੋ ਨੁ ਤ੍ਵਂ ਤਿਦਿਵਾ ਮਹਿਂ ਉਪਾਗਾ.

੮੯੦. ‘‘ਛਿਨ੍ਦਤਿ ਰਂਸੀ ਪਭਙ੍ਕਰਸ੍ਸ, ਸਾਧਿਕਵੀਸਤਿਯੋਜਨਾਨਿ ਆਭਾ;

ਰਤ੍ਤਿਮਪਿ ਯਥਾ ਦਿਵਂ ਕਰੋਤਿ, ਪਰਿਸੁਦ੍ਧਂ ਵਿਮਲਂ ਸੁਭਂ ਵਿਮਾਨਂ.

੮੯੧. ‘‘ਬਹੁਪਦੁਮਵਿਚਿਤ੍ਰਪੁਣ੍ਡਰੀਕਂ, ਵੋਕਿਣ੍ਣਂ ਕੁਸੁਮੇਹਿ ਨੇਕਚਿਤ੍ਤਂ;

ਅਰਜਵਿਰਜਹੇਮਜਾਲਛਨ੍ਨਂ, ਆਕਾਸੇ ਤਪਤਿ ਯਥਾਪਿ ਸੂਰਿਯੋ.

੮੯੨. ‘‘ਰਤ੍ਤਮ੍ਬਰਪੀਤਵਸਸਾਹਿ, ਅਗਰੁਪਿਯਙ੍ਗੁਚਨ੍ਦਨੁਸ੍ਸਦਾਹਿ;

ਕਞ੍ਚਨਤਨੁਸਨ੍ਨਿਭਤ੍ਤਚਾਹਿ, ਪਰਿਪੂਰਂ ਗਗਨਂਵ ਤਾਰਕਾਹਿ.

੮੯੩. ‘‘ਨਰਨਾਰਿਯੋ [ਨਰਨਾਰੀ (ਕ.), ਨਾਰਿਯੋ (?)] ਬਹੁਕੇਤ੍ਥਨੇਕਵਣ੍ਣਾ, ਕੁਸੁਮਵਿਭੂਸਿਤਾਭਰਣੇਤ੍ਥ ਸੁਮਨਾ;

ਅਨਿਲਪਮੁਞ੍ਚਿਤਾ ਪਵਨ੍ਤਿ [ਪਵਾਯਨ੍ਤਿ (ਕ.)] ਸੁਰਭਿਂ, ਤਪਨਿਯਵਿਤਤਾ ਸੁਵਣ੍ਣਛਨ੍ਨਾ [ਸੁਵਣ੍ਣਚ੍ਛਾਦਨਾ (ਸੀ.)].

੮੯੪. ‘‘ਕਿਸ੍ਸ ਸਂਯਮਸ੍ਸ [ਸਮਦਮਸ੍ਸ (ਸੀ.)] ਅਯਂ ਵਿਪਾਕੋ, ਕੇਨਾਸਿ ਕਮ੍ਮਫਲੇਨਿਧੂਪਪਨ੍ਨੋ;

ਯਥਾ ਚ ਤੇ ਅਧਿਗਤਮਿਦਂ ਵਿਮਾਨਂ, ਤਦਨੁਪਦਂ ਅਵਚਾਸਿ ਇਙ੍ਘ ਪੁਟ੍ਠੋ’’ਤਿ.

੮੯੫. ‘‘ਸਯਮਿਧ [ਯਮਿਧ (ਸੀ. ਸ੍ਯਾ. ਪੀ.)] ਪਥੇ ਸਮੇਚ੍ਚ ਮਾਣਵੇਨ, ਸਤ੍ਥਾਨੁਸਾਸਿ ਅਨੁਕਮ੍ਪਮਾਨੋ;

ਤਵ ਰਤਨਵਰਸ੍ਸ ਧਮ੍ਮਂ ਸੁਤ੍ਵਾ, ਕਰਿਸ੍ਸਾਮੀਤਿ ਚ ਬ੍ਰਵਿਤ੍ਥ ਛਤ੍ਤੋ.

੮੯੬. ‘‘ਜਿਨਵਰਪਵਰਂ [ਜਿਨਪਵਰਂ (ਸ੍ਯਾ. ਕ.)] ਉਪੇਹਿ [ਉਪੇਮਿ (ਬਹੂਸੁ)] ਸਰਣਂ, ਧਮ੍ਮਞ੍ਚਾਪਿ ਤਥੇਵ ਭਿਕ੍ਖੁਸਙ੍ਘਂ;

ਨੋਤਿ ਪਠਮਂ ਅਵੋਚਹਂ [ਅਵੋਚਾਹਂ (ਸੀ. ਸ੍ਯਾ. ਕ.)] ਭਨ੍ਤੇ, ਪਚ੍ਛਾ ਤੇ ਵਚਨਂ ਤਥੇਵਕਾਸਿਂ.

੮੯੭. ‘‘ਮਾ ਚ ਪਾਣਵਧਂ ਵਿਵਿਧਂ ਚਰਸ੍ਸੁ ਅਸੁਚਿਂ,

ਨ ਹਿ ਪਾਣੇਸੁ ਅਸਞ੍ਞਤਂ ਅਵਣ੍ਣਯਿਂਸੁ ਸਪ੍ਪਞ੍ਞਾ;

ਨੋਤਿ ਪਠਮਂ ਅਵੋਚਹਂ ਭਨ੍ਤੇ,

ਪਚ੍ਛਾ ਤੇ ਵਚਨਂ ਤਥੇਵਕਾਸਿਂ.

੮੯੮. ‘‘ਮਾ ਚ ਪਰਜਨਸ੍ਸ ਰਕ੍ਖਿਤਮ੍ਪਿ, ਆਦਾਤਬ੍ਬਮਮਞ੍ਞਿਥੋ [ਮਮਞ੍ਞਿਤ੍ਥ (ਸੀ. ਪੀ.)] ਅਦਿਨ੍ਨਂ;

ਨੋਤਿ ਪਠਮਂ ਅਵੋਚਹਂ ਭਨ੍ਤੇ, ਪਚ੍ਛਾ ਵਚਨਂ ਤਥੇਵਕਾਸਿਂ.

੮੯੯. ‘‘ਮਾ ਚ ਪਰਜਨਸ੍ਸ ਰਕ੍ਖਿਤਾਯੋ, ਪਰਭਰਿਯਾ ਅਗਮਾ ਅਨਰਿਯਮੇਤਂ;

ਨੋਤਿ ਪਠਮਂ ਅਵੋਚਹਂ ਭਨ੍ਤੇ, ਪਚ੍ਛਾ ਤੇ ਵਚਨਂ ਤਥੇਵਕਾਸਿਂ;

੯੦੦. ‘‘ਮਾ ਚ ਵਿਤਥਂ ਅਞ੍ਞਥਾ ਅਭਾਣਿ,

ਨ ਹਿ ਮੁਸਾਵਾਦਂ ਅਵਣ੍ਣਯਿਂਸੁ ਸਪ੍ਪਞ੍ਞਾ;

ਨੋਤਿ ਪਠਮਂ ਅਵੋਚਹਂ ਭਨ੍ਤੇ, ਪਚ੍ਛਾ ਤੇ ਵਚਨਂ ਤਥੇਵਕਾਸਿਂ.

੯੦੧. ‘‘ਯੇਨ ਚ ਪੁਰਿਸਸ੍ਸ ਅਪੇਤਿ ਸਞ੍ਞਾ, ਤਂ ਮਜ੍ਜਂ ਪਰਿਵਜ੍ਜਯਸ੍ਸੁ ਸਬ੍ਬਂ;

ਨੋਤਿ ਪਠਮਂ ਅਵੋਚਹਂ ਭਨ੍ਤੇ, ਪਚ੍ਛਾ ਤੇ ਵਚਨਂ ਤਥੇਵਕਾਸਿਂ.

੯੦੨. ‘‘ਸ੍ਵਾਹਂ ਇਧ ਪਞ੍ਚ ਸਿਕ੍ਖਾ ਕਰਿਤ੍ਵਾ, ਪਟਿਪਜ੍ਜਿਤ੍ਵਾ ਤਥਾਗਤਸ੍ਸ ਧਮ੍ਮੇ;

ਦ੍ਵੇਪਥਮਗਮਾਸਿਂ ਚੋਰਮਜ੍ਝੇ, ਤੇ ਮਂ ਤਤ੍ਥ ਵਧਿਂਸੁ ਭੋਗਹੇਤੁ.

੯੦੩. ‘‘ਏਤ੍ਤਕਮਿਦਂ ਅਨੁਸ੍ਸਰਾਮਿ ਕੁਸਲਂ, ਤਤੋ ਪਰਂ ਨ ਮੇ ਵਿਜ੍ਜਤਿ ਅਞ੍ਞਂ;

ਤੇਨ ਸੁਚਰਿਤੇਨ ਕਮ੍ਮੁਨਾਹਂ [ਕਮ੍ਮਨਾਹਂ (ਸੀ.)], ਉਪ੍ਪਨ੍ਨੋ [ਉਪਪਨ੍ਨੋ (ਬਹੂਸੁ)] ਤਿਦਿਵੇਸੁ ਕਾਮਕਾਮੀ.

੯੦੪. ‘‘ਪਸ੍ਸ ਖਣਮੁਹੁਤ੍ਤਸਞ੍ਞਮਸ੍ਸ, ਅਨੁਧਮ੍ਮਪ੍ਪਟਿਪਤ੍ਤਿਯਾ ਵਿਪਾਕਂ;

ਜਲਮਿਵ ਯਸਸਾ ਸਮੇਕ੍ਖਮਾਨਾ, ਬਹੁਕਾ ਮਂ ਪਿਹਯਨ੍ਤਿ ਹੀਨਕਮ੍ਮਾ.

੯੦੫. ‘‘ਪਸ੍ਸ ਕਤਿਪਯਾਯ ਦੇਸਨਾਯ, ਸੁਗਤਿਞ੍ਚਮ੍ਹਿ ਗਤੋ ਸੁਖਞ੍ਚ ਪਤ੍ਤੋ;

ਯੇ ਚ ਤੇ ਸਤਤਂ ਸੁਣਨ੍ਤਿ ਧਮ੍ਮਂ, ਮਞ੍ਞੇ ਤੇ ਅਮਤਂ ਫੁਸਨ੍ਤਿ ਖੇਮਂ.

੯੦੬. ‘‘ਅਪ੍ਪਮ੍ਪਿ ਕਤਂ ਮਹਾਵਿਪਾਕਂ, ਵਿਪੁਲਂ ਹੋਤਿ [ਵਿਪੁਲਫਲਂ (ਕ.)] ਤਥਾਗਤਸ੍ਸ ਧਮ੍ਮੇ;

ਪਸ੍ਸ ਕਤਪੁਞ੍ਞਤਾਯ ਛਤ੍ਤੋ, ਓਭਾਸੇਤਿ ਪਥਵਿਂ ਯਥਾਪਿ ਸੂਰਿਯੋ.

੯੦੭. ‘‘ਕਿਮਿਦਂ ਕੁਸਲਂ ਕਿਮਾਚਰੇਮ, ਇਚ੍ਚੇਕੇ ਹਿ ਸਮੇਚ੍ਚ ਮਨ੍ਤਯਨ੍ਤਿ;

ਤੇ ਮਯਂ ਪੁਨਰੇਵ [ਪੁਨਪਿ (?)] ਲਦ੍ਧ ਮਾਨੁਸਤ੍ਤਂ, ਪਟਿਪਨ੍ਨਾ ਵਿਹਰੇਮੁ ਸੀਲਵਨ੍ਤੋ.

੯੦੮. ‘‘ਬਹੁਕਾਰੋ ਅਨੁਕਮ੍ਪਕੋ ਚ ਸਤ੍ਥਾ, ਇਤਿ ਮੇ ਸਤਿ ਅਗਮਾ ਦਿਵਾ ਦਿਵਸ੍ਸ;

ਸ੍ਵਾਹਂ ਉਪਗਤੋਮ੍ਹਿ ਸਚ੍ਚਨਾਮਂ, ਅਨੁਕਮ੍ਪਸ੍ਸੁ ਪੁਨਪਿ ਸੁਣੇਮੁ [ਸੁਣੋਮ (ਸੀ.), ਸੁਣੋਮਿ (ਸ੍ਯਾ.)] ਧਮ੍ਮਂ.

੯੦੯. ‘‘ਯੇ ਚਿਧ [ਯੇਧ (ਸੀ. ਸ੍ਯਾ. ਪੀ.), ਯੇ ਇਧ (ਕ.)] ਪਜਹਨ੍ਤਿ ਕਾਮਰਾਗਂ, ਭਵਰਾਗਾਨੁਸਯਞ੍ਚ ਪਹਾਯ ਮੋਹਂ;

ਨ ਚ ਤੇ ਪੁਨਮੁਪੇਨ੍ਤਿ ਗਬ੍ਭਸੇਯ੍ਯਂ, ਪਰਿਨਿਬ੍ਬਾਨਗਤਾ ਹਿ ਸੀਤਿਭੂਤਾ’’ਤਿ.

ਛਤ੍ਤਮਾਣਵਕਵਿਮਾਨਂ ਤਤਿਯਂ.

੪. ਕਕ੍ਕਟਕਰਸਦਾਯਕਵਿਮਾਨਵਤ੍ਥੁ

੯੧੦. ‘‘ਉਚ੍ਚਮਿਦਂ ਮਣਿਥੂਣਂ ਵਿਮਾਨਂ, ਸਮਨ੍ਤਤੋ ਦ੍ਵਾਦਸ ਯੋਜਨਾਨਿ;

ਕੂਟਾਗਾਰਾ ਸਤ੍ਤਸਤਾ ਉਲ਼ਾਰਾ, ਵੇਲ਼ੁਰਿਯਥਮ੍ਭਾ ਰੁਚਕਤ੍ਥਤਾ [ਰੁਚਿਰਤ੍ਥਤਾ (ਸ੍ਯਾ. ਕ.) ੬੪੬ ਗਾਥਾਯਂ ‘‘ਰੁਚਕੁਪਕਿਣ੍ਣਂ’’ਤਿ ਪਦਸ੍ਸ ਸਂਵਣ੍ਣਨਾ ਪਸ੍ਸਿਤਬ੍ਬਾ] ਸੁਭਾ.

੯੧੧. ‘‘ਤਤ੍ਥਚ੍ਛਸਿ ਪਿਵਸਿ ਖਾਦਸਿ ਚ, ਦਿਬ੍ਬਾ ਚ ਵੀਣਾ ਪਵਦਨ੍ਤਿ ਵਗ੍ਗੁਂ [ਵਗ੍ਗੁ (ਸੀ. ਕ.), ਵਗ੍ਗੂ (ਸ੍ਯਾ.)];

ਦਿਬ੍ਬਾ ਰਸਾ ਕਾਮਗੁਣੇਤ੍ਥ ਪਞ੍ਚ, ਨਾਰਿਯੋ ਚ ਨਚ੍ਚਨ੍ਤਿ ਸੁਵਣ੍ਣਛਨ੍ਨਾ.

੯੧੨. ‘‘ਕੇਨ ਤੇਤਾਦਿਸੋ ਵਣ੍ਣੋ, ਕੇਨ ਤੇ ਇਧ ਮਿਜ੍ਝਤਿ;

ਉਪ੍ਪਜ੍ਜਨ੍ਤਿ ਚ ਤੇ ਭੋਗਾ, ਯੇ ਕੇਚਿ ਮਨਸੋ ਪਿਯਾ.

੯੧੩. ‘‘ਪੁਚ੍ਛਾਮਿ ਤਂ ਦੇਵ ਮਹਾਨੁਭਾਵ, ਮਨੁਸ੍ਸਭੂਤੋ ਕਿਮਕਾਸਿ ਪੁਞ੍ਞਂ;

ਕੇਨਾਸਿ ਏਵਂ ਜਲਿਤਾਨੁਭਾਵੋ, ਵਣ੍ਣੋ ਚ ਤੇ ਸਬ੍ਬਦਿਸਾ ਪਭਾਸਤੀ’’ਤਿ.

੯੧੪. ਸੋ ਦੇਵਪੁਤ੍ਤੋ ਅਤ੍ਤਮਨੋ, ਮੋਗ੍ਗਲ੍ਲਾਨੇਨ ਪੁਚ੍ਛਿਤੋ;

ਪਞ੍ਹਂ ਪੁਟ੍ਠੋ ਵਿਯਾਕਾਸਿ, ਯਸ੍ਸ ਕਮ੍ਮਸ੍ਸਿਦਂ ਫਲਂ.

੯੧੫. ‘‘ਸਤਿਸਮੁਪ੍ਪਾਦਕਰੋ, ਦ੍ਵਾਰੇ ਕਕ੍ਕਟਕੋ ਠਿਤੋ;

ਨਿਟ੍ਠਿਤੋ ਜਾਤਰੂਪਸ੍ਸ, ਸੋਭਤਿ ਦਸਪਾਦਕੋ.

੯੧੬. ‘‘ਤੇਨ ਮੇਤਾਦਿਸੋ ਵਣ੍ਣੋ, ਤੇਨ ਮੇ ਇਧ ਮਿਜ੍ਝਤਿ;

ਉਪ੍ਪਜ੍ਜਨ੍ਤਿ ਚ ਮੇ ਭੋਗਾ, ਯੇ ਕੇਚਿ ਮਨਸੋ ਪਿਯਾ.

੯੧੭. ‘‘ਅਕ੍ਖਾਮਿ ਤੇ ਭਿਕ੍ਖੁ ਮਹਾਨੁਭਾਵ, ਮਨੁਸ੍ਸਭੂਤੋ ਯਮਕਾਸਿ ਪੁਞ੍ਞਂ;

ਤੇਨਮ੍ਹਿ ਏਵਂ ਜਲਿਤਾਨੁਭਾਵੋ, ਵਣ੍ਣੋ ਚ ਮੇ ਸਬ੍ਬਦਿਸਾ ਪਭਾਸਤੀ’’ਤਿ.

ਕਕ੍ਕਟਕਰਸਦਾਯਕਵਿਮਾਨਂ ਚਤੁਤ੍ਥਂ.

(ਅਨਨ੍ਤਰਂ ਪਞ੍ਚਵਿਮਾਨਂ ਯਥਾ ਕਕ੍ਕਟਕਰਸਦਾਯਕਵਿਮਾਨਂ ਤਥਾ ਵਿਤ੍ਥਾਰੇਤਬ੍ਬਂ)

੫. ਦ੍ਵਾਰਪਾਲਵਿਮਾਨਵਤ੍ਥੁ

੯੧੮. ‘‘ਉਚ੍ਚਮਿਦਂ ਮਣਿਥੂਣਂ ਵਿਮਾਨਂ, ਸਮਨ੍ਤਤੋ ਦ੍ਵਾਦਸ ਯੋਜਨਾਨਿ;

ਕੂਟਾਗਾਰਾ ਸਤ੍ਤਸਤਾ ਉਲ਼ਾਰਾ, ਵੇਲ਼ੁਰਿਯਥਮ੍ਭਾ ਰੁਚਕਤ੍ਥਤਾ ਸੁਭਾ.

੯੧੯. ‘‘ਤਤ੍ਥਚ੍ਛਸਿ ਪਿਵਸਿ ਖਾਦਸਿ ਚ, ਦਿਬ੍ਬਾ ਚ ਵੀਣਾ ਪਵਦਨ੍ਤਿ ਵਗ੍ਗੁਂ;

ਦਿਬ੍ਬਾ ਰਸਾ ਕਾਮਗੁਣੇਤ੍ਥ ਪਞ੍ਚ, ਨਾਰਿਯੋ ਚ ਨਚ੍ਚਨ੍ਤਿ ਸੁਵਣ੍ਣਛਨ੍ਨਾ.

੯੨੦. ‘‘ਕੇਨ ਤੇਤਾਦਿਸੋ ਵਣ੍ਣੋ…ਪੇ… ਵਣ੍ਣੋ ਚ ਤੇ ਸਬ੍ਬਦਿਸਾ ਪਭਾਸਤੀ’’ਤਿ.

੯੨੨. ਸੋ ਦੇਵਪੁਤ੍ਤੋ ਅਤ੍ਤਮਨੋ, ਮੋਗ੍ਗਲ੍ਲਾਨੇਨ ਪੁਚ੍ਛਿਤੋ;

ਪਞ੍ਹਂ ਪੁਟ੍ਠੋ ਵਿਯਾਕਾਸਿ, ਯਸ੍ਸ ਕਮ੍ਮਸ੍ਸਿਦਂ ਫਲਂ.

੯੨੩. ‘‘ਦਿਬ੍ਬਂ ਮਮਂ ਵਸ੍ਸਸਹਸ੍ਸਮਾਯੁ, ਵਾਚਾਭਿਗੀਤਂ ਮਨਸਾ ਪਵਤ੍ਤਿਤਂ;

ਏਤ੍ਤਾਵਤਾ ਠਸ੍ਸਤਿ ਪੁਞ੍ਞਕਮ੍ਮੋ, ਦਿਬ੍ਬੇਹਿ ਕਾਮੇਹਿ ਸਮਙ੍ਗਿਭੂਤੋ.

੯੨੪. ‘‘ਤੇਨ ਮੇਤਾਦਿਸੋ ਵਣ੍ਣੋ…ਪੇ…ਵਣ੍ਣੋ ਚ ਮੇ ਸਬ੍ਬਦਿਸਾ ਪਭਾਸਤੀ’’ਤਿ.

ਦ੍ਵਾਰਪਾਲਵਿਮਾਨਂ ਪਞ੍ਚਮਂ.