੧੪. ਮਹਾਰਥਵਿਮਾਨਵਤ੍ਥੁ

੧੦੧੫. ‘‘ਸਹਸ੍ਸਯੁਤ੍ਤਂ ਹਯਵਾਹਨਂ ਸੁਭਂ, ਆਰੁਯ੍ਹਿਮਂ ਸਨ੍ਦਨਂ ਨੇਕਚਿਤ੍ਤਂ;

ਉਯ੍ਯਾਨਭੂਮਿਂ ਅਭਿਤੋ ਅਨੁਕ੍ਕਮਂ, ਪੁਰਿਨ੍ਦਦੋ ਭੂਤਪਤੀਵ ਵਾਸਵੋ.

੧੦੧੬. ‘‘ਸੋਵਣ੍ਣਮਯਾ ਤੇ ਰਥਕੁਬ੍ਬਰਾ ਉਭੋ, ਫਲੇਹਿ [ਥਲੇਹਿ (ਸੀ.)] ਅਂਸੇਹਿ ਅਤੀਵ ਸਙ੍ਗਤਾ;

ਸੁਜਾਤਗੁਮ੍ਬਾ ਨਰਵੀਰਨਿਟ੍ਠਿਤਾ, ਵਿਰੋਚਤੀ ਪਨ੍ਨਰਸੇਵ ਚਨ੍ਦੋ.

੧੦੧੭. ‘‘ਸੁਵਣ੍ਣਜਾਲਾਵਤਤੋ ਰਥੋ ਅਯਂ, ਬਹੂਹਿ ਨਾਨਾਰਤਨੇਹਿ ਚਿਤ੍ਤਿਤੋ;

ਸੁਨਨ੍ਦਿਘੋਸੋ ਚ ਸੁਭਸ੍ਸਰੋ ਚ, ਵਿਰੋਚਤੀ ਚਾਮਰਹਤ੍ਥਬਾਹੁਭਿ.

੧੦੧੮. ‘‘ਇਮਾ ਚ ਨਾਭ੍ਯੋ ਮਨਸਾਭਿਨਿਮ੍ਮਿਤਾ, ਰਥਸ੍ਸ ਪਾਦਨ੍ਤਰਮਜ੍ਝਭੂਸਿਤਾ;

ਇਮਾ ਚ ਨਾਭ੍ਯੋ ਸਤਰਾਜਿਚਿਤ੍ਤਿਤਾ, ਸਤੇਰਤਾ ਵਿਜ੍ਜੁਰਿਵਪ੍ਪਭਾਸਰੇ.

੧੦੧੯. ‘‘ਅਨੇਕਚਿਤ੍ਤਾਵਤਤੋ ਰਥੋ ਅਯਂ, ਪੁਥੂ ਚ ਨੇਮੀ ਚ ਸਹਸ੍ਸਰਂਸਿਕੋ;

ਤੇਸਂ ਸਰੋ ਸੁਯ੍ਯਤਿ [ਸੂਯਤਿ (ਸੀ.)] ਵਗ੍ਗੁਰੂਪੋ, ਪਞ੍ਚਙ੍ਗਿਕਂ ਤੁਰਿਯਮਿਵਪ੍ਪਵਾਦਿਤਂ.

੧੦੨੦. ‘‘ਸਿਰਸ੍ਮਿਂ ਚਿਤ੍ਤਂ ਮਣਿਚਨ੍ਦਕਪ੍ਪਿਤਂ, ਸਦਾ ਵਿਸੁਦ੍ਧਂ ਰੁਚਿਰਂ ਪਭਸ੍ਸਰਂ;

ਸੁਵਣ੍ਣਰਾਜੀਹਿ ਅਤੀਵ ਸਙ੍ਗਤਂ, ਵੇਲ਼ੁਰਿਯਰਾਜੀਵ ਅਤੀਵ ਸੋਭਤਿ.

੧੦੨੧. ‘‘ਇਮੇ ਚ ਵਾਲ਼ੀ ਮਣਿਚਨ੍ਦਕਪ੍ਪਿਤਾ, ਆਰੋਹਕਮ੍ਬੂ ਸੁਜਵਾ ਬ੍ਰਹੂਪਮਾ.

ਬ੍ਰਹਾ ਮਹਨ੍ਤਾ ਬਲਿਨੋ ਮਹਾਜਵਾ, ਮਨੋ ਤਵਞ੍ਞਾਯ ਤਥੇਵ ਸਿਂਸਰੇ [ਸਬ੍ਬਰੇ (ਕ.), ਸਪ੍ਪਰੇ (?)].

੧੦੨੨. ‘‘ਇਮੇ ਚ ਸਬ੍ਬੇ ਸਹਿਤਾ ਚਤੁਕ੍ਕਮਾ, ਮਨੋ ਤਵਞ੍ਞਾਯ ਤਥੇਵ ਸਿਂਸਰੇ;

ਸਮਂ ਵਹਨ੍ਤਾ ਮੁਦੁਕਾ ਅਨੁਦ੍ਧਤਾ, ਆਮੋਦਮਾਨਾ ਤੁਰਗਾਨ [ਤੁਰਙ੍ਗਾਨ (ਕ.)] ਮੁਤ੍ਤਮਾ.

੧੦੨੩. ‘‘ਧੁਨਨ੍ਤਿ ਵਗ੍ਗਨ੍ਤਿ ਪਤਨ੍ਤਿ [ਪਵਤ੍ਤਨ੍ਤਿ (ਪੀ. ਕ.)] ਚਮ੍ਬਰੇ, ਅਬ੍ਭੁਦ੍ਧੁਨਨ੍ਤਾ ਸੁਕਤੇ ਪਿਲ਼ਨ੍ਧਨੇ;

ਤੇਸਂ ਸਰੋ ਸੁਯ੍ਯਤਿ ਵਗ੍ਗੁਰੂਪੋ, ਪਞ੍ਚਙ੍ਗਿਕਂ ਤੁਰਿਯਮਿਵਪ੍ਪਵਾਦਿਤਂ.

੧੦੨੪. ‘‘ਰਥਸ੍ਸ ਘੋਸੋ ਅਪਿਲ਼ਨ੍ਧਨਾਨ ਚ, ਖੁਰਸ੍ਸ ਨਾਦੋ [ਨਾਦੀ (ਸ੍ਯਾ.), ਨਾਦਿ (ਪੀ. ਕ.)] ਅਭਿਹਿਂਸਨਾਯ ਚ;

ਘੋਸੋ ਸੁਵਗ੍ਗੂ ਸਮਿਤਸ੍ਸ ਸੁਯ੍ਯਤਿ, ਗਨ੍ਧਬ੍ਬਤੂਰਿਯਾਨਿ ਵਿਚਿਤ੍ਰਸਂਵਨੇ.

੧੦੨੫. ‘‘ਰਥੇ ਠਿਤਾ ਤਾ ਮਿਗਮਨ੍ਦਲੋਚਨਾ, ਆਲ਼ਾਰਪਮ੍ਹਾ ਹਸਿਤਾ ਪਿਯਂਵਦਾ;

ਵੇਲ਼ੁਰਿਯਜਾਲਾਵਤਤਾ ਤਨੁਚ੍ਛਵਾ, ਸਦੇਵ ਗਨ੍ਧਬ੍ਬਸੂਰਗ੍ਗਪੂਜਿਤਾ.

੧੦੨੬. ‘‘ਤਾ ਰਤ੍ਤਰਤ੍ਤਮ੍ਬਰਪੀਤਵਾਸਸਾ, ਵਿਸਾਲਨੇਤ੍ਤਾ ਅਭਿਰਤ੍ਤਲੋਚਨਾ;

ਕੁਲੇ ਸੁਜਾਤਾ ਸੁਤਨੂ ਸੁਚਿਮ੍ਹਿਤਾ, ਰਥੇ ਠਿਤਾ ਪਞ੍ਜਲਿਕਾ ਉਪਟ੍ਠਿਤਾ.

੧੦੨੭. ‘‘ਤਾ ਕਮ੍ਬੁਕੇਯੂਰਧਰਾ ਸੁਵਾਸਸਾ, ਸੁਮਜ੍ਝਿਮਾ ਊਰੁਥਨੂਪਪਨ੍ਨਾ;

ਵਟ੍ਟਙ੍ਗੁਲਿਯੋ ਸੁਮੁਖਾ ਸੁਦਸ੍ਸਨਾ, ਰਥੇ ਠਿਤਾ ਪਞ੍ਜਲਿਕਾ ਉਪਟ੍ਠਿਤਾ.

੧੦੨੮. ‘‘ਅਞ੍ਞਾ ਸੁਵੇਣੀ ਸੁਸੁ ਮਿਸ੍ਸਕੇਸਿਯੋ, ਸਮਂ ਵਿਭਤ੍ਤਾਹਿ ਪਭਸ੍ਸਰਾਹਿ ਚ;

ਅਨੁਬ੍ਬਤਾ ਤਾ ਤਵ ਮਾਨਸੇ ਰਤਾ, ਰਥੇ ਠਿਤਾ ਪਞ੍ਜਲਿਕਾ ਉਪਟ੍ਠਿਤਾ.

੧੦੨੯. ‘‘ਆਵੇਲ਼ਿਨਿਯੋ ਪਦੁਮੁਪ੍ਪਲਚ੍ਛਦਾ, ਅਲਙ੍ਕਤਾ ਚਨ੍ਦਨਸਾਰਵਾਸਿਤਾ [ਵੋਸਿਤਾ (ਸ੍ਯਾ.), ਭੂਸਿਤਾ (ਕ.)];

ਅਨੁਬ੍ਬਤਾ ਤਾ ਤਵ ਮਾਨਸੇ ਰਤਾ, ਰਥੇ ਠਿਤਾ ਪਞ੍ਜਲਿਕਾ ਉਪਟ੍ਠਿਤਾ.

੧੦੩੦. ‘‘ਤਾ ਮਾਲਿਨਿਯੋ ਪਦੁਮੁਪ੍ਪਲਚ੍ਛਦਾ, ਅਲਙ੍ਕਤਾ ਚਨ੍ਦਨਸਾਰਵਾਸਿਤਾ;

ਅਨੁਬ੍ਬਤਾ ਤਾ ਤਵ ਮਾਨਸੇ ਰਤਾ, ਰਥੇ ਠਿਤਾ ਪਞ੍ਜਲਿਕਾ ਉਪਟ੍ਠਿਤਾ.

੧੦੩੧. ‘‘ਕਣ੍ਠੇਸੁ ਤੇ ਯਾਨਿ ਪਿਲ਼ਨ੍ਧਨਾਨਿ, ਹਤ੍ਥੇਸੁ ਪਾਦੇਸੁ ਤਥੇਵ ਸੀਸੇ;

ਓਭਾਸਯਨ੍ਤੀ ਦਸ ਸਬ੍ਬਸੋ ਦਿਸਾ, ਅਬ੍ਭੁਦ੍ਦਯਂ ਸਾਰਦਿਕੋਵ ਭਾਣੁਮਾ.

੧੦੩੨. ‘‘ਵਾਤਸ੍ਸ ਵੇਗੇਨ ਚ ਸਮ੍ਪਕਮ੍ਪਿਤਾ, ਭੁਜੇਸੁ ਮਾਲਾ ਅਪਿਲ਼ਨ੍ਧਨਾਨਿ ਚ;

ਮੁਞ੍ਚਨ੍ਤਿ ਘੋਸਂ ਰੂਚਿਰਂ ਸੁਚਿਂ ਸੁਭਂ, ਸਬ੍ਬੇਹਿ ਵਿਞ੍ਞੂਹਿ ਸੁਤਬ੍ਬਰੂਪਂ.

੧੦੩੩. ‘‘ਉਯ੍ਯਾਨਭੂਮ੍ਯਾ ਚ ਦੁਵਦ੍ਧਤੋ ਠਿਤਾ, ਰਥਾ ਚ ਨਾਗਾ ਤੂਰਿਯਾਨਿ ਚ ਸਰੋ;

ਤਮੇਵ ਦੇਵਿਨ੍ਦ ਪਮੋਦਯਨ੍ਤਿ, ਵੀਣਾ ਯਥਾ ਪੋਕ੍ਖਰਪਤ੍ਤਬਾਹੁਭਿ.

੧੦੩੪. ‘‘ਇਮਾਸੁ ਵੀਣਾਸੁ ਬਹੂਸੁ ਵਗ੍ਗੂਸੁ, ਮਨੁਞ੍ਞਰੂਪਾਸੁ ਹਦਯੇਰਿਤਂ ਪੀਤਿਂ [ਹਦਯੇਰਿਤਂ ਪਤਿ (ਸੀ.), ਹਦਯੇਰਿਤਮ੍ਪਿ ਤਂ (ਸ੍ਯਾ.)];

ਪਵਜ੍ਜਮਾਨਾਸੁ ਅਤੀਵ ਅਚ੍ਛਰਾ, ਭਮਨ੍ਤਿ ਕਞ੍ਞਾ ਪਦੁਮੇਸੁ ਸਿਕ੍ਖਿਤਾ.

੧੦੩੫. ‘‘ਯਦਾ ਚ ਗੀਤਾਨਿ ਚ ਵਾਦਿਤਾਨਿ ਚ, ਨਚ੍ਚਾਨਿ ਚਿਮਾਨਿ [ਚੇਮਾਨਿ (ਸੀ.)] ਸਮੇਨ੍ਤਿ ਏਕਤੋ;

ਅਥੇਤ੍ਥ ਨਚ੍ਚਨ੍ਤਿ ਅਥੇਤ੍ਥ ਅਚ੍ਛਰਾ, ਓਭਾਸਯਨ੍ਤੀ ਉਭਤੋ ਵਰਿਤ੍ਥਿਯੋ.

੧੦੩੬. ‘‘ਸੋ ਮੋਦਸਿ ਤੁਰਿਯਗਣਪ੍ਪਬੋਧਨੋ, ਮਹੀਯਮਾਨੋ ਵਜਿਰਾਵੁਧੋਰਿਵ;

ਇਮਾਸੁ ਵੀਣਾਸੁ ਬਹੂਸੁ ਵਗ੍ਗੂਸੁ, ਮਨੁਞ੍ਞਰੂਪਾਸੁ ਹਦਯੇਰਿਤਂ ਪੀਤਿਂ.

੧੦੩੭. ‘‘ਕਿਂ ਤ੍ਵਂ ਪੁਰੇ ਕਮ੍ਮਮਕਾਸਿ ਅਤ੍ਤਨਾ, ਮਨੁਸ੍ਸਭੂਤੋ ਪੁਰਿਮਾਯ ਜਾਤਿਯਾ;

ਉਪੋਸਥਂ ਕਂ ਵਾ [ਉਪੋਸਥਂ ਕਿਂ ਵ (ਸ੍ਯਾ.)] ਤੁਵਂ ਉਪਾਵਸਿ, ਕਂ [ਕਿਂ (ਸ੍ਯਾ.)] ਧਮ੍ਮਚਰਿਯਂ ਵਤਮਾਭਿਰੋਚਯਿ.

੧੦੩੮. ‘‘ਨਯੀਦਮਪ੍ਪਸ੍ਸ ਕਤਸ੍ਸ [ਨਯਿਦਂ ਅਪ੍ਪਸ੍ਸ ਕਤਸ੍ਸ (ਸੀ. ਸ੍ਯਾ.), ਸਾਸੇਦਂ ਅਪ੍ਪਕਤਸ੍ਸ (ਕ.)] ਕਮ੍ਮੁਨੋ, ਪੁਬ੍ਬੇ ਸੁਚਿਣ੍ਣਸ੍ਸ ਉਪੋਸਥਸ੍ਸ ਵਾ;

ਇਦ੍ਧਾਨੁਭਾਵੋ ਵਿਪੁਲੋ ਅਯਂ ਤਵ, ਯਂ ਦੇਵਸਙ੍ਘਂ ਅਭਿਰੋਚਸੇ ਭੁਸਂ.

੧੦੩੯. ‘‘ਦਾਨਸ੍ਸ ਤੇ ਇਦਂ ਫਲਂ, ਅਥੋ ਸੀਲਸ੍ਸ ਵਾ ਪਨ;

ਅਥੋ ਅਞ੍ਜਲਿਕਮ੍ਮਸ੍ਸ, ਤਂ ਮੇ ਅਕ੍ਖਾਹਿ ਪੁਚ੍ਛਿਤੋ’’ਤਿ.

੧੦੪੦. ਸੋ ਦੇਵਪੁਤ੍ਤੋ ਅਤ੍ਤਮਨੋ, ਮੋਗ੍ਗਲ੍ਲਾਨੇਨ ਪੁਚ੍ਛਿਤੋ;

ਪਞ੍ਹਂ ਪੁਟ੍ਠੋ ਵਿਯਾਕਾਸਿ, ਯਸ੍ਸ ਕਮ੍ਮਸ੍ਸਿਦਂ ਫਲਨ੍ਤਿ.

੧੦੪੧. ‘‘ਜਿਤਿਨ੍ਦ੍ਰਿਯਂ ਬੁਦ੍ਧਮਨੋਮਨਿਕ੍ਕਮਂ, ਨਰੁਤ੍ਤਮਂ ਕਸ੍ਸਪਮਗ੍ਗਪੁਗ੍ਗਲਂ;

ਅਵਾਪੁਰਨ੍ਤਂ ਅਮਤਸ੍ਸ ਦ੍ਵਾਰਂ, ਦੇਵਾਤਿਦੇਵਂ ਸਤਪੁਞ੍ਞਲਕ੍ਖਣਂ.

੧੦੪੨. ‘‘ਤਮਦ੍ਦਸਂ ਕੁਞ੍ਜਰਮੋਘਤਿਣ੍ਣਂ, ਸੁਵਣ੍ਣਸਿਙ੍ਗੀਨਦਬਿਮ੍ਬਸਾਦਿਸਂ;

ਦਿਸ੍ਵਾਨ ਤਂ ਖਿਪ੍ਪਮਹੁਂ ਸੁਚੀਮਨੋ, ਤਮੇਵ ਦਿਸ੍ਵਾਨ ਸੁਭਾਸਿਤਦ੍ਧਜਂ.

੧੦੪੩. ‘‘ਤਮਨ੍ਨਪਾਨਂ ਅਥਵਾਪਿ ਚੀਵਰਂ, ਸੁਚਿਂ ਪਣੀਤਂ ਰਸਸਾ ਉਪੇਤਂ;

ਪੁਪ੍ਫਾਭਿਕ੍ਕਿਣਮ੍ਹਿ ਸਕੇ ਨਿਵੇਸਨੇ, ਪਤਿਟ੍ਠਪੇਸਿਂ ਸ ਅਸਙ੍ਗਮਾਨਸੋ.

੧੦੪੪. ‘‘ਤਮਨ੍ਨਪਾਨੇਨ ਚ ਚੀਵਰੇਨ ਚ, ਖਜ੍ਜੇਨ ਭੋਜ੍ਜੇਨ ਚ ਸਾਯਨੇਨ ਚ;

ਸਨ੍ਤਪ੍ਪਯਿਤ੍ਵਾ ਦ੍ਵਿਪਦਾਨਮੁਤ੍ਤਮਂ, ਸੋ ਸਗ੍ਗਸੋ ਦੇਵਪੁਰੇ ਰਮਾਮਹਂ.

੧੦੪੫.

‘‘ਏਤੇਨੁਪਾਯੇਨ ਇਮਂ ਨਿਰਗ੍ਗਲ਼ਂ, ਯਞ੍ਞਂ ਯਜਿਤ੍ਵਾ ਤਿਵਿਧਂ ਵਿਸੁਦ੍ਧਂ.

ਪਹਾਯਹਂ ਮਾਨੁਸਕਂ ਸਮੁਸ੍ਸਯਂ, ਇਨ੍ਦੂਪਮੋ [ਇਨ੍ਦਸ੍ਸਮੋ (ਸ੍ਯਾ. ਕ.)] ਦੇਵਪੁਰੇ ਰਮਾਮਹਂ.

੧੦੪੬. ‘‘ਆਯੁਞ੍ਚ ਵਣ੍ਣਞ੍ਚ ਸੁਖਂ ਬਲਞ੍ਚ, ਪਣੀਤਰੂਪਂ ਅਭਿਕਙ੍ਖਤਾ ਮੁਨਿ;

ਅਨ੍ਨਞ੍ਚ ਪਾਨਞ੍ਚ ਬਹੁਂ ਸੁਸਙ੍ਖਤਂ, ਪਤਿਟ੍ਠਪੇਤਬ੍ਬਮਸਙ੍ਗਮਾਨਸੇ.

੧੦੪੭. [ਕਥਾ. ੭੯੯]‘‘ਨਯਿਮਸ੍ਮਿਂ ਲੋਕੇ ਪਰਸ੍ਮਿਂ [ਨਯਿਮਸ੍ਮਿਂ ਵਾ ਲੋਕੇ ਪਰਸ੍ਮਿਂ (ਕਥਾਵਤ੍ਥੁ ੭੯੯), ਨਯਿਮਸ੍ਮਿ ਲੋਕੇ ਵ ਪਰਸ੍ਮਿ (?)] ਵਾ ਪਨ, ਬੁਦ੍ਧੇਨ ਸੇਟ੍ਠੋ ਵ ਸਮੋ ਵ ਵਿਜ੍ਜਤਿ;

ਆਹੁਨੇਯ੍ਯਾਨਂ [ਯਮਾਹੁਨੇਯ੍ਯਾਨਂ (ਕ.)] ਪਰਮਾਹੁਤਿਂ ਗਤੋ, ਪੁਞ੍ਞਤ੍ਥਿਕਾਨਂ ਵਿਪੁਲਪ੍ਫਲੇਸਿਨ’’ਨ੍ਤਿ.

ਮਹਾਰਥਵਿਮਾਨਂ ਚੁਦ੍ਦਸਮਂ.

ਮਹਾਰਥਵਗ੍ਗੋ ਪਞ੍ਚਮੋ ਨਿਟ੍ਠਿਤੋ.

ਤਸ੍ਸੁਦ੍ਦਾਨਂ –

ਮਣ੍ਡੂਕੋ ਰੇਵਤੀ ਛਤ੍ਤੋ, ਕਕ੍ਕਟੋ ਦ੍ਵਾਰਪਾਲਕੋ;

ਦ੍ਵੇ ਕਰਣੀਯਾ ਦ੍ਵੇ ਸੂਚਿ, ਤਯੋ ਨਾਗਾ ਚ ਦ੍ਵੇ ਰਥਾ;

ਪੁਰਿਸਾਨਂ ਪਠਮੋ ਵਗ੍ਗੋ ਪਵੁਚ੍ਚਤੀਤਿ.

ਭਾਣਵਾਰਂ ਤਤਿਯਂ ਨਿਟ੍ਠਿਤਂ.