੧੦. ਪਠਮਨਾਗਵਿਮਾਨਵਤ੍ਥੁ

੯੬੧. ‘‘ਸੁਸੁਕ੍ਕਖਨ੍ਧਂ ਅਭਿਰੁਯ੍ਹ ਨਾਗਂ, ਅਕਾਚਿਨਂ ਦਨ੍ਤਿਂ ਬਲਿਂ ਮਹਾਜਵਂ;

ਅਭਿਰੁਯ੍ਹ ਗਜਵਰਂ [ਗਜਂ ਵਰਂ (ਸ੍ਯਾ.)] ਸੁਕਪ੍ਪਿਤਂ, ਇਧਾਗਮਾ ਵੇਹਾਯਸਂ ਅਨ੍ਤਲਿਕ੍ਖੇ.

੯੬੨. ‘‘ਨਾਗਸ੍ਸ ਦਨ੍ਤੇਸੁ ਦੁਵੇਸੁ ਨਿਮ੍ਮਿਤਾ, ਅਚ੍ਛੋਦਕਾ ਪਦੁਮਿਨਿਯੋ ਸੁਫੁਲ੍ਲਾ;

ਪਦੁਮੇਸੁ ਚ ਤੁਰਿਯਗਣਾ ਪਵਜ੍ਜਰੇ, ਇਮਾ ਚ ਨਚ੍ਚਨ੍ਤਿ ਮਨੋਹਰਾਯੋ.

੯੬੩. ‘‘ਦੇਵਿਦ੍ਧਿਪਤ੍ਤੋਸਿ ਮਹਾਨੁਭਾਵੋ, ਮਨੁਸ੍ਸਭੂਤੋ ਕਿਮਕਾਸਿ ਪੁਞ੍ਞਂ;

ਕੇਨਾਸਿ ਏਵਂ ਜਲਿਤਾਨੁਭਾਵੋ, ਵਣ੍ਣੋ ਚ ਤੇ ਸਬ੍ਬਦਿਸਾ ਪਭਾਸਤੀ’’ਤਿ.

੯੬੪. ਸੋ ਦੇਵਪੁਤ੍ਤੋ ਅਤ੍ਤਮਨੋ, ਮੋਗ੍ਗਲ੍ਲਾਨੇਨ ਪੁਚ੍ਛਿਤੋ;

ਪਞ੍ਹਂ ਪੁਟ੍ਠੋ ਵਿਯਾਕਾਸਿ, ਯਸ੍ਸ ਕਮ੍ਮਸ੍ਸਿਦਂ ਫਲਂ.

੯੬੫. ‘‘ਅਟ੍ਠੇਵ ਮੁਤ੍ਤਪੁਪ੍ਫਾਨਿ, ਕਸ੍ਸਪਸ੍ਸ ਮਹੇਸਿਨੋ [ਭਗਵਤੋ (ਸ੍ਯਾ. ਕ.)];

ਥੂਪਸ੍ਮਿਂ ਅਭਿਰੋਪੇਸਿਂ, ਪਸਨ੍ਨੋ ਸੇਹਿ ਪਾਣਿਭਿ.

੯੬੬. ‘‘ਤੇਨ ਮੇਤਾਦਿਸੋ ਵਣ੍ਣੋ…ਪੇ…ਵਣ੍ਣੋ ਚ ਮੇ ਸਬ੍ਬਦਿਸਾ ਪਭਾਸਤੀ’’ਤਿ.

ਪਠਮਨਾਗਵਿਮਾਨਂ ਦਸਮਂ.