੮. ਅਮ੍ਬਵਿਮਾਨਵਤ੍ਥੁ

੭੮੩. ‘‘ਦਿਬ੍ਬਂ ਤੇ ਅਮ੍ਬਵਨਂ ਰਮ੍ਮਂ, ਪਾਸਾਦੇਤ੍ਥ ਮਹਲ੍ਲਕੋ;

ਨਾਨਾਤੁਰਿਯਸਙ੍ਘੁਟ੍ਠੋ, ਅਚ੍ਛਰਾਗਣਘੋਸਿਤੋ.

੭੮੪. ‘‘ਪਦੀਪੋ ਚੇਤ੍ਥ ਜਲਤਿ, ਨਿਚ੍ਚਂ ਸੋਵਣ੍ਣਯੋ ਮਹਾ;

ਦੁਸ੍ਸਫਲੇਹਿ ਰੁਕ੍ਖੇਹਿ, ਸਮਨ੍ਤਾ ਪਰਿਵਾਰਿਤੋ.

੭੮੫. ‘‘ਕੇਨ ਤੇਤਾਦਿਸੋ ਵਣ੍ਣੋ…ਪੇ…ਵਣ੍ਣੋ ਚ ਤੇ ਸਬ੍ਬਦਿਸਾ ਪਭਾਸਤੀ’’ਤਿ;

੭੮੭. ਸਾ ਦੇਵਤਾ ਅਤ੍ਤਮਨਾ…ਪੇ… ਯਸ੍ਸ ਕਮ੍ਮਸ੍ਸਿਦਂ ਫਲਂ.

੭੮੮. ‘‘ਅਹਂ ਮਨੁਸ੍ਸੇਸੁ ਮਨੁਸ੍ਸਭੂਤਾ, ਪੁਰਿਮਾਯ ਜਾਤਿਯਾ ਮਨੁਸ੍ਸਲੋਕੇ;

ਵਿਹਾਰਂ ਸਙ੍ਘਸ੍ਸ ਕਾਰੇਸਿਂ, ਅਮ੍ਬੇਹਿ ਪਰਿਵਾਰਿਤਂ.

੭੮੯. ‘‘ਪਰਿਯੋਸਿਤੇ ਵਿਹਾਰੇ, ਕਾਰੇਨ੍ਤੇ ਨਿਟ੍ਠਿਤੇ ਮਹੇ;

ਅਮ੍ਬੇਹਿ ਛਾਦਯਿਤ੍ਵਾਨ [ਅਮ੍ਬੇ ਅਚ੍ਛਾਦਯਿਤ੍ਵਾਨ (ਸੀ. ਸ੍ਯਾ.), ਅਮ੍ਬੇਹਚ੍ਛਾਦਯਿਤ੍ਵਾਨ (ਪੀ. ਕ.)], ਕਤ੍ਵਾ ਦੁਸ੍ਸਮਯੇ ਫਲੇ.

੭੯੦. ‘‘ਪਦੀਪਂ ਤਤ੍ਥ ਜਾਲੇਤ੍ਵਾ, ਭੋਜਯਿਤ੍ਵਾ ਗਣੁਤ੍ਤਮਂ;

ਨਿਯ੍ਯਾਦੇਸਿਂ ਤਂ ਸਙ੍ਘਸ੍ਸ, ਪਸਨ੍ਨਾ ਸੇਹਿ ਪਾਣਿਭਿ.

੭੯੧. ‘‘ਤੇਨ ਮੇ ਅਮ੍ਬਵਨਂ ਰਮ੍ਮਂ, ਪਾਸਾਦੇਤ੍ਥ ਮਹਲ੍ਲਕੋ;

ਨਾਨਾਤੁਰਿਯਸਙ੍ਘੁਟ੍ਠੋ, ਅਚ੍ਛਰਾਗਣਘੋਸਿਤੋ.

੭੯੨. ‘‘ਪਦੀਪੋ ਚੇਤ੍ਥ ਜਲਤਿ, ਨਿਚ੍ਚਂ ਸੋਵਣ੍ਣਯੋ ਮਹਾ;

ਦੁਸ੍ਸਫਲੇਹਿ ਰੁਕ੍ਖੇਹਿ, ਸਮਨ੍ਤਾ ਪਰਿਵਾਰਿਤੋ.

੭੯੩. ‘‘ਤੇਨ ਮੇਤਾਦਿਸੋ ਵਣ੍ਣੋ…ਪੇ…ਵਣ੍ਣੋ ਚ ਮੇ ਸਬ੍ਬਦਿਸਾ ਪਭਾਸਤੀ’’ਤਿ.

ਅਮ੍ਬਵਿਮਾਨਂ ਅਟ੍ਠਮਂ.