੪. ਮਞ੍ਜਿਟ੍ਠਕਵਗ੍ਗੋ

੧. ਮਞ੍ਜਿਟ੍ਠਕਵਿਮਾਨਵਤ੍ਥੁ

੬੮੯. ‘‘ਮਞ੍ਜਿਟ੍ਠਕੇ [ਮਞ੍ਜੇਟ੍ਠਕੇ (ਸੀ.)] ਵਿਮਾਨਸ੍ਮਿਂ, ਸੋਣ੍ਣਵਾਲੁਕਸਨ੍ਥਤੇ [ਸੋਵਣ੍ਣਵਾਲੁਕਸਨ੍ਥਤੇ (ਸ੍ਯਾ. ਪੀ.), ਸੋਵਣ੍ਣਵਾਲਿਕਸਨ੍ਥਤੇ (ਕ.)];

ਪਞ੍ਚਙ੍ਗਿਕੇ ਤੁਰਿਯੇਨ [ਤੁਰਿਯੇਨ (ਸੀ. ਸ੍ਯਾ. ਪੀ.)], ਰਮਸਿ ਸੁਪ੍ਪਵਾਦਿਤੇ.

੬੯੦. ‘‘ਤਮ੍ਹਾ ਵਿਮਾਨਾ ਓਰੁਯ੍ਹ, ਨਿਮ੍ਮਿਤਾ ਰਤਨਾਮਯਾ;

ਓਗਾਹਸਿ ਸਾਲਵਨਂ, ਪੁਪ੍ਫਿਤਂ ਸਬ੍ਬਕਾਲਿਕਂ.

੬੯੧. ‘‘ਯਸ੍ਸ ਯਸ੍ਸੇਵ ਸਾਲਸ੍ਸ, ਮੂਲੇ ਤਿਟ੍ਠਸਿ ਦੇਵਤੇ;

ਸੋ ਸੋ ਮੁਞ੍ਚਤਿ ਪੁਪ੍ਫਾਨਿ, ਓਨਮਿਤ੍ਵਾ ਦੁਮੁਤ੍ਤਮੋ.

੬੯੨. ‘‘ਵਾਤੇਰਿਤਂ ਸਾਲਵਨਂ, ਆਧੁਤਂ [ਆਧੂਤਂ (ਸੀ.)] ਦਿਜਸੇਵਿਤਂ;

ਵਾਤਿ ਗਨ੍ਧੋ ਦਿਸਾ ਸਬ੍ਬਾ, ਰੁਕ੍ਖੋ ਮਞ੍ਜੂਸਕੋ ਯਥਾ.

੬੯੩. ‘‘ਘਾਯਸੇ ਤਂ ਸੁਚਿਗਨ੍ਧਂ, ਰੂਪਂ ਪਸ੍ਸਸਿ ਅਮਾਨੁਸਂ;

ਦੇਵਤੇ ਪੁਚ੍ਛਿਤਾਚਿਕ੍ਖ, ਕਿਸ੍ਸ ਕਮ੍ਮਸ੍ਸਿਦਂ ਫਲ’’ਨ੍ਤਿ.

੬੯੪. ‘‘ਅਹਂ ਮਨੁਸ੍ਸੇਸੁ ਮਨੁਸ੍ਸਭੂਤਾ, ਦਾਸੀ ਅਯਿਰਕੁਲੇ [ਅਯ੍ਯਿਰਕੁਲੇ (ਸ੍ਯਾ. ਕ.)] ਅਹੁਂ;

ਬੁਦ੍ਧਂ ਨਿਸਿਨ੍ਨਂ ਦਿਸ੍ਵਾਨ, ਸਾਲਪੁਪ੍ਫੇਹਿ ਓਕਿਰਿਂ.

੬੯੫. ‘‘ਵਟਂਸਕਞ੍ਚ ਸੁਕਤਂ, ਸਾਲਪੁਪ੍ਫਮਯਂ ਅਹਂ;

ਬੁਦ੍ਧਸ੍ਸ ਉਪਨਾਮੇਸਿਂ, ਪਸਨ੍ਨਾ ਸੇਹਿ ਪਾਣਿਭਿ.

੬੯੬. ‘‘ਤਾਹਂ ਕਮ੍ਮਂ ਕਰਿਤ੍ਵਾਨ, ਕੁਸਲਂ ਬੁਦ੍ਧਵਣ੍ਣਿਤਂ;

ਅਪੇਤਸੋਕਾ ਸੁਖਿਤਾ, ਸਮ੍ਪਮੋਦਾਮਨਾਮਯਾ’’ਤਿ.

ਮਞ੍ਜਿਟ੍ਠਕਵਿਮਾਨਂ ਪਠਮਂ.

੨. ਪਭਸ੍ਸਰਵਿਮਾਨਵਤ੍ਥੁ

੬੯੭. ‘‘ਪਭਸ੍ਸਰਵਰਵਣ੍ਣਨਿਭੇ, ਸੁਰਤ੍ਤਵਤ੍ਥਵਸਨੇ [ਵਤ੍ਥਨਿਵਾਸਨੇ (ਸੀ. ਸ੍ਯਾ.)];

ਮਹਿਦ੍ਧਿਕੇ ਚਨ੍ਦਨਰੁਚਿਰਗਤ੍ਤੇ, ਕਾ ਤ੍ਵਂ ਸੁਭੇ ਦੇਵਤੇ ਵਨ੍ਦਸੇ ਮਮਂ.

੬੯੮. ‘‘ਪਲ੍ਲਙ੍ਕੋ ਚ ਤੇ ਮਹਗ੍ਘੋ, ਨਾਨਾਰਤਨਚਿਤ੍ਤਿਤੋ ਰੁਚਿਰੋ;

ਯਤ੍ਥ ਤ੍ਵਂ ਨਿਸਿਨ੍ਨਾ ਵਿਰੋਚਸਿ, ਦੇਵਰਾਜਾਰਿਵ ਨਨ੍ਦਨੇ ਵਨੇ.

੬੯੯. ‘‘ਕਿਂ ਤ੍ਵਂ ਪੁਰੇ ਸੁਚਰਿਤਮਾਚਰੀ ਭਦ੍ਦੇ, ਕਿਸ੍ਸ ਕਮ੍ਮਸ੍ਸ ਵਿਪਾਕਂ;

ਅਨੁਭੋਸਿ ਦੇਵਲੋਕਸ੍ਮਿਂ, ਦੇਵਤੇ ਪੁਚ੍ਛਿਤਾਚਿਕ੍ਖ;

ਕਿਸ੍ਸ ਕਮ੍ਮਸ੍ਸਿਦਂ ਫਲ’’ਨ੍ਤਿ.

੭੦੦. ‘‘ਪਿਣ੍ਡਾਯ ਤੇ ਚਰਨ੍ਤਸ੍ਸ, ਮਾਲਂ ਫਾਣਿਤਞ੍ਚ ਅਦਦਂ ਭਨ੍ਤੇ;

ਤਸ੍ਸ ਕਮ੍ਮਸ੍ਸਿਦਂ ਵਿਪਾਕਂ, ਅਨੁਭੋਮਿ ਦੇਵਲੋਕਸ੍ਮਿਂ.

੭੦੧. ‘‘ਹੋਤਿ ਚ ਮੇ ਅਨੁਤਾਪੋ, ਅਪਰਦ੍ਧਂ [ਅਪਰਾਧਂ (ਸ੍ਯਾ.)] ਦੁਕ੍ਖਿਤਞ੍ਚ [ਦੁਕ੍ਕਟਞ੍ਚ (ਸੀ.)] ਮੇ ਭਨ੍ਤੇ;

ਸਾਹਂ ਧਮ੍ਮਂ ਨਾਸ੍ਸੋਸਿਂ, ਸੁਦੇਸਿਤਂ ਧਮ੍ਮਰਾਜੇਨ.

੭੦੨. ‘‘ਤਂ ਤਂ ਵਦਾਮਿ ਭਦ੍ਦਨ੍ਤੇ, ‘ਯਸ੍ਸ ਮੇ ਅਨੁਕਮ੍ਪਿਯੋ ਕੋਚਿ;

ਧਮ੍ਮੇਸੁ ਤਂ ਸਮਾਦਪੇਥ’, ਸੁਦੇਸਿਤਂ ਧਮ੍ਮਰਾਜੇਨ.

੭੦੩. ‘‘ਯੇਸਂ ਅਤ੍ਥਿ ਸਦ੍ਧਾ ਬੁਦ੍ਧੇ, ਧਮ੍ਮੇ ਚ ਸਙ੍ਘਰਤਨੇ;

ਤੇ ਮਂ ਅਤਿਵਿਰੋਚਨ੍ਤਿ, ਆਯੁਨਾ ਯਸਸਾ ਸਿਰਿਯਾ.

੭੦੪. ‘‘ਪਤਾਪੇਨ ਵਣ੍ਣੇਨ ਉਤ੍ਤਰਿਤਰਾ,

ਅਞ੍ਞੇ ਮਹਿਦ੍ਧਿਕਤਰਾ ਮਯਾ ਦੇਵਾ’’ਤਿ;

ਪਭਸ੍ਸਰਵਿਮਾਨਂ ਦੁਤਿਯਂ.

੩. ਨਾਗਵਿਮਾਨਵਤ੍ਥੁ

੭੦੫. ‘‘ਅਲਙ੍ਕਤਾ ਮਣਿਕਞ੍ਚਨਾਚਿਤਂ, ਸੋਵਣ੍ਣਜਾਲਚਿਤਂ ਮਹਨ੍ਤਂ;

ਅਭਿਰੁਯ੍ਹ ਗਜਵਰਂ ਸੁਕਪ੍ਪਿਤਂ, ਇਧਾਗਮਾ ਵੇਹਾਯਸਂ [ਵੇਹਾਸਯਂ (ਸੀ.)] ਅਨ੍ਤਲਿਕ੍ਖੇ.

੭੦੬. ‘‘ਨਾਗਸ੍ਸ ਦਨ੍ਤੇਸੁ ਦੁਵੇਸੁ ਨਿਮ੍ਮਿਤਾ, ਅਚ੍ਛੋਦਕਾ [ਅਚ੍ਛੋਦਿਕਾ (ਸੀ. ਕ.)] ਪਦੁਮਿਨਿਯੋ ਸੁਫੁਲ੍ਲਾ;

ਪਦੁਮੇਸੁ ਚ ਤੁਰਿਯਗਣਾ ਪਭਿਜ੍ਜਰੇ, ਇਮਾ ਚ ਨਚ੍ਚਨ੍ਤਿ ਮਨੋਹਰਾਯੋ.

੭੦੭. ‘‘ਦੇਵਿਦ੍ਧਿਪਤ੍ਤਾਸਿ ਮਹਾਨੁਭਾਵੇ, ਮਨੁਸ੍ਸਭੂਤਾ ਕਿਮਕਾਸਿ ਪੁਞ੍ਞਂ;

ਕੇਨਾਸਿ ਏਵਂ ਜਲਿਤਾਨੁਭਾਵਾ, ਵਣ੍ਣੋ ਚ ਤੇ ਸਬ੍ਬਦਿਸਾ ਪਭਾਸਤੀ’’ਤਿ.

੭੦੮. ‘‘ਬਾਰਾਣਸਿਯਂ ਉਪਸਙ੍ਕਮਿਤ੍ਵਾ, ਬੁਦ੍ਧਸ੍ਸਹਂ ਵਤ੍ਥਯੁਗਂ ਅਦਾਸਿਂ;

ਪਾਦਾਨਿ ਵਨ੍ਦਿਤ੍ਵਾ [ਵਨ੍ਦਿਤ੍ਵ (ਸੀ.)] ਛਮਾ ਨਿਸੀਦਿਂ, ਵਿਤ੍ਤਾ ਚਹਂ ਅਞ੍ਜਲਿਕਂ ਅਕਾਸਿਂ.

੭੦੯. ‘‘ਬੁਦ੍ਧੋ ਚ ਮੇ ਕਞ੍ਚਨਸਨ੍ਨਿਭਤ੍ਤਚੋ, ਅਦੇਸਯਿ ਸਮੁਦਯਦੁਕ੍ਖਨਿਚ੍ਚਤਂ;

ਅਸਙ੍ਖਤਂ ਦੁਕ੍ਖਨਿਰੋਧਸਸ੍ਸਤਂ, ਮਗ੍ਗਂ ਅਦੇਸਯਿ [ਅਦੇਸੇਸਿ (ਸੀ.)] ਯਤੋ ਵਿਜਾਨਿਸਂ;

੭੧੦. ‘‘ਅਪ੍ਪਾਯੁਕੀ ਕਾਲਕਤਾ ਤਤੋ ਚੁਤਾ, ਉਪਪਨ੍ਨਾ ਤਿਦਸਗਣਂ ਯਸਸ੍ਸਿਨੀ;

ਸਕ੍ਕਸ੍ਸਹਂ ਅਞ੍ਞਤਰਾ ਪਜਾਪਤਿ, ਯਸੁਤ੍ਤਰਾ ਨਾਮ ਦਿਸਾਸੁ ਵਿਸ੍ਸੁਤਾ’’ਤਿ.

ਨਾਗਵਿਮਾਨਂ ਤਤਿਯਂ.

੪. ਅਲੋਮਵਿਮਾਨਵਤ੍ਥੁ

੭੧੧. ‘‘ਅਭਿਕ੍ਕਨ੍ਤੇਨ ਵਣ੍ਣੇਨ, ਯਾ ਤ੍ਵਂ ਤਿਟ੍ਠਸਿ ਦੇਵਤੇ;

ਓਭਾਸੇਨ੍ਤੀ ਦਿਸਾ ਸਬ੍ਬਾ, ਓਸਧੀ ਵਿਯ ਤਾਰਕਾ.

੭੧੨. ‘‘ਕੇਨ ਤੇਤਾਦਿਸੋ ਵਣ੍ਣੋ…ਪੇ…

ਵਣ੍ਣੋ ਚ ਤੇ ਸਬ੍ਬਦਿਸਾ ਪਭਾਸਤੀ’’ਤਿ.

੭੧੪. ਸਾ ਦੇਵਤਾ ਅਤ੍ਤਮਨਾ…ਪੇ… ਯਸ੍ਸ ਕਮ੍ਮਸ੍ਸਿਦਂ ਫਲਂ.

੭੧੫. ‘‘ਅਹਞ੍ਚ ਬਾਰਾਣਸਿਯਂ, ਬੁਦ੍ਧਸ੍ਸਾਦਿਚ੍ਚਬਨ੍ਧੁਨੋ;

ਅਦਾਸਿਂ ਸੁਕ੍ਖਕੁਮ੍ਮਾਸਂ, ਪਸਨ੍ਨਾ ਸੇਹਿ ਪਾਣਿਭਿ.

੭੧੬. ‘‘ਸੁਕ੍ਖਾਯ ਅਲੋਣਿਕਾਯ ਚ, ਪਸ੍ਸ ਫਲਂ ਕੁਮ੍ਮਾਸਪਿਣ੍ਡਿਯਾ;

ਅਲੋਮਂ ਸੁਖਿਤਂ ਦਿਸ੍ਵਾ, ਕੋ ਪੁਞ੍ਞਂ ਨ ਕਰਿਸ੍ਸਤਿ.

੭੧੭. ‘‘ਤੇਨ ਮੇਤਾਦਿਸੋ ਵਣ੍ਣੋ…ਪੇ… ਵਣ੍ਣੋ ਚ ਮੇ ਸਬ੍ਬਦਿਸਾ ਪਭਾਸਤੀ’’ਤਿ.

ਅਲੋਮਵਿਮਾਨਂ ਚਤੁਤ੍ਥਂ.

੫. ਕਞ੍ਜਿਕਦਾਯਿਕਾਵਿਮਾਨਵਤ੍ਥੁ

੭੧੯. ‘‘ਅਭਿਕ੍ਕਨ੍ਤੇਨ ਵਣ੍ਣੇਨ…ਪੇ… ਓਸਧੀ ਵਿਯ ਤਾਰਕਾ.

੭੨੦. ‘‘ਕੇਨ ਤੇਤਾਦਿਸੋ ਵਣ੍ਣੋ…ਪੇ…ਵਣ੍ਣੋ ਚ ਮੇ ਸਬ੍ਬਦਿਸਾ ਪਭਾਸਤੀ’’ਤਿ.

੭੨੨. ਸਾ ਦੇਵਤਾ ਅਤ੍ਤਮਨਾ…ਪੇ… ਯਸ੍ਸ ਕਮ੍ਮਸ੍ਸਿਦਂ ਫਲਂ.

੭੨੩. ‘‘ਅਹਂ ਅਨ੍ਧਕਵਿਨ੍ਦਮ੍ਹਿ, ਬੁਦ੍ਧਸ੍ਸਾਦਿਚ੍ਚਬਨ੍ਧੁਨੋ;

ਅਦਾਸਿਂ ਕੋਲਸਮ੍ਪਾਕਂ, ਕਞ੍ਜਿਕਂ ਤੇਲਧੂਪਿਤਂ.

੭੨੪. ‘‘ਪਿਪ੍ਫਲ੍ਯਾ ਲਸੁਣੇਨ ਚ, ਮਿਸ੍ਸਂ ਲਾਮਞ੍ਜਕੇਨ ਚ;

ਅਦਾਸਿਂ ਉਜੁਭੂਤਸ੍ਮਿਂ [ਉਜੁਭੂਤੇਸੁ (ਕ.)], ਵਿਪ੍ਪਸਨ੍ਨੇਨ ਚੇਤਸਾ.

੭੨੫. ‘‘ਯਾ ਮਹੇਸਿਤ੍ਤਂ ਕਾਰੇਯ੍ਯ, ਚਕ੍ਕਵਤ੍ਤਿਸ੍ਸ ਰਾਜਿਨੋ;

ਨਾਰੀ ਸਬ੍ਬਙ੍ਗਕਲ੍ਯਾਣੀ, ਭਤ੍ਤੁ ਚਾਨੋਮਦਸ੍ਸਿਕਾ;

ਏਕਸ੍ਸ ਕਞ੍ਜਿਕਦਾਨਸ੍ਸ, ਕਲਂ ਨਾਗ੍ਘਤਿ ਸੋਲ਼ਸਿਂ.

੭੨੬. ‘‘ਸਤਂ ਨਿਕ੍ਖਾ ਸਤਂ ਅਸ੍ਸਾ, ਸਤਂ ਅਸ੍ਸਤਰੀਰਥਾ;

ਸਤਂ ਕਞ੍ਞਾਸਹਸ੍ਸਾਨਿ, ਆਮੁਤ੍ਤਮਣਿਕੁਣ੍ਡਲਾ;

ਏਕਸ੍ਸ ਕਞ੍ਜਿਕਦਾਨਸ੍ਸ, ਕਲਂ ਨਾਗ੍ਘਨ੍ਤਿ ਸੋਲ਼ਸਿਂ.

੭੨੭. ‘‘ਸਤਂ ਹੇਮਵਤਾ ਨਾਗਾ, ਈਸਾਦਨ੍ਤਾ ਉਰੂਲ਼੍ਹਵਾ;

ਸੁਵਣ੍ਣਕਚ੍ਛਾ ਮਾਤਙ੍ਗਾ, ਹੇਮਕਪ੍ਪਨਵਾਸਸਾ;

ਏਕਸ੍ਸ ਕਞ੍ਜਿਕਦਾਨਸ੍ਸ, ਕਲਂ ਨਾਗ੍ਘਨ੍ਤਿ ਸੋਲ਼ਸਿਂ.

੭੨੮. ‘‘ਚਤੁਨ੍ਨਮਪਿ ਦੀਪਾਨਂ, ਇਸ੍ਸਰਂ ਯੋਧ ਕਾਰਯੇ;

ਏਕਸ੍ਸ ਕਞ੍ਜਿਕਦਾਨਸ੍ਸ, ਕਲਂ ਨਾਗ੍ਘਤਿ ਸੋਲ਼ਸਿ’’ਨ੍ਤਿ.

ਕਞ੍ਜਿਕਦਾਯਿਕਾਵਿਮਾਨਂ ਪਞ੍ਚਮਂ.

੬. ਵਿਹਾਰਵਿਮਾਨਵਤ੍ਥੁ

੭੨੯. ‘‘ਅਭਿਕ੍ਕਨ੍ਤੇਨ ਵਣ੍ਣੇਨ…ਪੇ… ਓਸਧੀ ਵਿਯ ਤਾਰਕਾ.

੭੩੦. ‘‘ਤਸ੍ਸਾ ਤੇ ਨਚ੍ਚਮਾਨਾਯ, ਅਙ੍ਗਮਙ੍ਗੇਹਿ ਸਬ੍ਬਸੋ;

ਦਿਬ੍ਬਾ ਸਦ੍ਦਾ ਨਿਚ੍ਛਰਨ੍ਤਿ, ਸਵਨੀਯਾ ਮਨੋਰਮਾ.

੭੩੧. ‘‘ਤਸ੍ਸਾ ਤੇ ਨਚ੍ਚਮਾਨਾਯ, ਅਙ੍ਗਮਙ੍ਗੇਹਿ ਸਬ੍ਬਸੋ;

ਦਿਬ੍ਬਾ ਗਨ੍ਧਾ ਪਵਾਯਨ੍ਤਿ, ਸੁਚਿਗਨ੍ਧਾ ਮਨੋਰਮਾ.

੭੩੨. ‘‘ਵਿਵਤ੍ਤਮਾਨਾ ਕਾਯੇਨ, ਯਾ ਵੇਣੀਸੁ ਪਿਲ਼ਨ੍ਧਨਾ;

ਤੇਸਂ ਸੁਯ੍ਯਤਿ ਨਿਗ੍ਘੋਸੋ, ਤੁਰਿਯੇ ਪਞ੍ਚਙ੍ਗਿਕੇ ਯਥਾ.

੭੩੩. ‘‘ਵਟਂਸਕਾ ਵਾਤਧੁਤਾ, ਵਾਤੇਨ ਸਮ੍ਪਕਮ੍ਪਿਤਾ;

ਤੇਸਂ ਸੁਯ੍ਯਤਿ ਨਿਗ੍ਘੋਸੋ, ਤੁਰਿਯੇ ਪਞ੍ਚਙ੍ਗਿਕੇ ਯਥਾ.

੭੩੪. ‘‘ਯਾਪਿ ਤੇ ਸਿਰਸ੍ਮਿਂ ਮਾਲਾ, ਸੁਚਿਗਨ੍ਧਾ ਮਨੋਰਮਾ;

ਵਾਤਿ ਗਨ੍ਧੋ ਦਿਸਾ ਸਬ੍ਬਾ, ਰੁਕ੍ਖੋ ਮਞ੍ਜੂਸਕੋ ਯਥਾ.

੭੩੫. ‘‘ਘਾਯਸੇ ਤਂ ਸੁਚਿਗਨ੍ਧਂ, ਰੂਪਂ ਪਸ੍ਸਸਿ ਅਮਾਨੁਸਂ;

ਦੇਵਤੇ ਪੁਚ੍ਛਿਤਾਚਿਕ੍ਖ, ਕਿਸ੍ਸ ਕਮ੍ਮਸ੍ਸਿਦਂ ਫਲ’’ਨ੍ਤਿ.

੭੩੬. ‘‘ਸਾਵਤ੍ਥਿਯਂ ਮਯ੍ਹਂ ਸਖੀ ਭਦਨ੍ਤੇ, ਸਙ੍ਘਸ੍ਸ ਕਾਰੇਸਿ ਮਹਾਵਿਹਾਰਂ;

ਤਤ੍ਥਪ੍ਪਸਨ੍ਨਾ ਅਹਮਾਨੁਮੋਦਿਂ, ਦਿਸ੍ਵਾ ਅਗਾਰਞ੍ਚ ਪਿਯਞ੍ਚ ਮੇਤਂ.

੭੩੭. ‘‘ਤਾਯੇਵ ਮੇ ਸੁਦ੍ਧਨੁਮੋਦਨਾਯ, ਲਦ੍ਧਂ ਵਿਮਾਨਬ੍ਭੁਤਦਸ੍ਸਨੇਯ੍ਯਂ;

ਸਮਨ੍ਤਤੋ ਸੋਲ਼ਸਯੋਜਨਾਨਿ, ਵੇਹਾਯਸਂ ਗਚ੍ਛਤਿ ਇਦ੍ਧਿਯਾ ਮਮ.

੭੩੮. ‘‘ਕੂਟਾਗਾਰਾ ਨਿਵੇਸਾ ਮੇ, ਵਿਭਤ੍ਤਾ ਭਾਗਸੋ ਮਿਤਾ;

ਦਦ੍ਦਲ੍ਲਮਾਨਾ ਆਭਨ੍ਤਿ, ਸਮਨ੍ਤਾ ਸਤਯੋਜਨਂ.

੭੩੯. ‘‘ਪੋਕ੍ਖਰਞ੍ਞੋ ਚ ਮੇ ਏਤ੍ਥ, ਪੁਥੁਲੋਮਨਿਸੇਵਿਤਾ;

ਅਚ੍ਛੋਦਕਾ [ਅਚ੍ਛੋਦਿਕਾ (ਸੀ.)] ਵਿਪ੍ਪਸਨ੍ਨਾ, ਸੋਣ੍ਣਵਾਲੁਕਸਨ੍ਥਤਾ.

੭੪੦. ‘‘ਨਾਨਾਪਦੁਮਸਞ੍ਛਨ੍ਨਾ, ਪੁਣ੍ਡਰੀਕਸਮੋਤਤਾ [ਪਣ੍ਡਰੀਕਸਮੋਨਤਾ (ਸੀ.)];

ਸੁਰਭੀ ਸਮ੍ਪਵਾਯਨ੍ਤਿ, ਮਨੁਞ੍ਞਾ ਮਾਲੁਤੇਰਿਤਾ.

੭੪੧. ‘‘ਜਮ੍ਬੁਯੋ ਪਨਸਾ ਤਾਲਾ, ਨਾਲ਼ਿਕੇਰਵਨਾਨਿ ਚ;

ਅਨ੍ਤੋਨਿਵੇਸਨੇ ਜਾਤਾ, ਨਾਨਾਰੁਕ੍ਖਾ ਅਰੋਪਿਮਾ.

੭੪੨. ‘‘ਨਾਨਾਤੂਰਿਯਸਙ੍ਘੁਟ੍ਠਂ, ਅਚ੍ਛਰਾਗਣਘੋਸਿਤਂ;

ਯੋਪਿ ਮਂ ਸੁਪਿਨੇ ਪਸ੍ਸੇ, ਸੋਪਿ ਵਿਤ੍ਤੋ ਸਿਯਾ ਨਰੋ.

੭੪੩. ‘‘ਏਤਾਦਿਸਂ ਅਬ੍ਭੁਤਦਸ੍ਸਨੇਯ੍ਯਂ, ਵਿਮਾਨਂ ਸਬ੍ਬਸੋਪਭਂ;

ਮਮ ਕਮ੍ਮੇਹਿ ਨਿਬ੍ਬਤ੍ਤਂ, ਅਲਂ ਪੁਞ੍ਞਾਨਿ ਕਾਤਵੇ’’ਤਿ.

੭੪੪. ‘‘ਤਾਯੇਵ ਤੇ ਸੁਦ੍ਧਨੁਮੋਦਨਾਯ, ਲਦ੍ਧਂ ਵਿਮਾਨਬ੍ਭੁਤਦਸ੍ਸਨੇਯ੍ਯਂ;

ਯਾ ਚੇਵ ਸਾ ਦਾਨਮਦਾਸਿ ਨਾਰੀ, ਤਸ੍ਸਾ ਗਤਿਂ ਬ੍ਰੂਹਿ ਕੁਹਿਂ ਉਪ੍ਪਨ੍ਨਾ [ਉਪਪਨ੍ਨਾ (ਕ.)] ਸਾ’’ਤਿ.

੭੪੫. ‘‘ਯਾ ਸਾ ਅਹੁ ਮਯ੍ਹਂ ਸਖੀ ਭਦਨ੍ਤੇ, ਸਙ੍ਘਸ੍ਸ ਕਾਰੇਸਿ ਮਹਾਵਿਹਾਰਂ;

ਵਿਞ੍ਞਾਤਧਮ੍ਮਾ ਸਾ ਅਦਾਸਿ ਦਾਨਂ, ਉਪ੍ਪਨ੍ਨਾ ਨਿਮ੍ਮਾਨਰਤੀਸੁ ਦੇਵੇਸੁ.

੭੪੬. ‘‘ਪਜਾਪਤੀ ਤਸ੍ਸ ਸੁਨਿਮ੍ਮਿਤਸ੍ਸ, ਅਚਿਨ੍ਤਿਯਾ ਕਮ੍ਮਵਿਪਾਕਾ ਤਸ੍ਸ;

ਯਮੇਤਂ ਪੁਚ੍ਛਸਿ ਕੁਹਿਂ ਉਪ੍ਪਨ੍ਨਾ [ਉਪਪਨ੍ਨਾ (ਕ.)] ਸਾਤਿ, ਤਂ ਤੇ ਵਿਯਾਕਾਸਿਂ ਅਨਞ੍ਞਥਾ ਅਹਂ.

੭੪੭. ‘‘ਤੇਨਹਞ੍ਞੇਪਿ ਸਮਾਦਪੇਥ, ਸਙ੍ਘਸ੍ਸ ਦਾਨਾਨਿ ਦਦਾਥ ਵਿਤ੍ਤਾ;

ਧਮ੍ਮਞ੍ਚ ਸੁਣਾਥ ਪਸਨ੍ਨਮਾਨਸਾ, ਸੁਦੁਲ੍ਲਭੋ ਲਦ੍ਧੋ ਮਨੁਸ੍ਸਲਾਭੋ.

੭੪੮. ‘‘ਯਂ ਮਗ੍ਗਂ ਮਗ੍ਗਾਧਿਪਤੀ ਅਦੇਸਯਿ [ਮਗ੍ਗਾਧਿਪਤ੍ਯਦੇਸਯਿ (ਸੀ.)], ਬ੍ਰਹ੍ਮਸ੍ਸਰੋ ਕਞ੍ਚਨਸਨ੍ਨਿਭਤ੍ਤਚੋ;

ਸਙ੍ਘਸ੍ਸ ਦਾਨਾਨਿ ਦਦਾਥ ਵਿਤ੍ਤਾ, ਮਹਪ੍ਫਲਾ ਯਤ੍ਥ ਭਵਨ੍ਤਿ ਦਕ੍ਖਿਣਾ.

੭੪੯. [ਖੁ. ਪਾ. ੬.੬; ਸੁ. ਨਿ. ੨੨੯] ‘‘ਯੇ ਪੁਗ੍ਗਲਾ ਅਟ੍ਠ ਸਤਂ ਪਸਤ੍ਥਾ, ਚਤ੍ਤਾਰਿ ਏਤਾਨਿ ਯੁਗਾਨਿ ਹੋਨ੍ਤਿ;

ਤੇ ਦਕ੍ਖਿਣੇਯ੍ਯਾ ਸੁਗਤਸ੍ਸ ਸਾਵਕਾ, ਏਤੇਸੁ ਦਿਨ੍ਨਾਨਿ ਮਹਪ੍ਫਲਾਨਿ.

੭੫੦. [ਵਿ. ਵ. ੬੪੧] ‘‘ਚਤ੍ਤਾਰੋ ਚ ਪਟਿਪਨ੍ਨਾ, ਚਤ੍ਤਾਰੋ ਚ ਫਲੇ ਠਿਤਾ;

ਏਸ ਸਙ੍ਘੋ ਉਜੁਭੂਤੋ, ਪਞ੍ਞਾਸੀਲਸਮਾਹਿਤੋ.

੭੫੧. [ਵਿ. ਵ. ੬੪੨] ‘‘ਯਜਮਾਨਾਨਂ ਮਨੁਸ੍ਸਾਨਂ, ਪੁਞ੍ਞਪੇਕ੍ਖਾਨ ਪਾਣਿਨਂ;

ਕਰੋਤਂ ਓਪਧਿਕਂ ਪੁਞ੍ਞਂ, ਸਙ੍ਘੇ ਦਿਨ੍ਨਂ ਮਹਪ੍ਫਲਂ.

੭੫੨. [ਵਿ. ਵ. ੬੪੩] ‘‘ਏਸੋ ਹਿ ਸਙ੍ਘੋ ਵਿਪੁਲੋ ਮਹਗ੍ਗਤੋ, ਏਸਪ੍ਪਮੇਯ੍ਯੋ ਉਦਧੀਵ ਸਾਗਰੋ;

ਏਤੇਹਿ ਸੇਟ੍ਠਾ ਨਰਵੀਰਸਾਵਕਾ, ਪਭਙ੍ਕਰਾ ਧਮ੍ਮਮੁਦੀਰਯਨ੍ਤਿ [ਨਤ੍ਥੇਤ੍ਥ ਪਾਠਭੇਦੋ].

੭੫੩. [ਵਿ. ਵ. ੬੪੪] ‘‘ਤੇਸਂ ਸੁਦਿਨ੍ਨਂ ਸੁਹੁਤਂ ਸੁਯਿਟ੍ਠਂ, ਯੇ ਸਙ੍ਘਮੁਦ੍ਦਿਸ੍ਸ ਦਦਨ੍ਤਿ ਦਾਨਂ;

ਸਾ ਦਕ੍ਖਿਣਾ ਸਙ੍ਘਗਤਾ ਪਤਿਟ੍ਠਿਤਾ, ਮਹਪ੍ਫਲਾ ਲੋਕਵਿਦੂਨ [ਲੋਕਵਿਦੂਹਿ (ਕ.)] ਵਣ੍ਣਿਤਾ.

੭੫੪. ‘‘ਏਤਾਦਿਸਂ ਯਞ੍ਞਮਨੁਸ੍ਸਰਨ੍ਤਾ, ਯੇ ਵੇਦਜਾਤਾ ਵਿਚਰਨ੍ਤਿ ਲੋਕੇ;

ਵਿਨੇਯ੍ਯ ਮਚ੍ਛੇਰਮਲਂ ਸਮੂਲਂ, ਅਨਿਨ੍ਦਿਤਾ ਸਗ੍ਗਮੁਪੇਨ੍ਤਿ ਠਾਨ’’ਨ੍ਤਿ.

ਵਿਹਾਰਵਿਮਾਨਂ ਛਟ੍ਠਂ.

ਭਾਣਵਾਰਂ ਦੁਤਿਯਂ ਨਿਟ੍ਠਿਤਂ.

੭. ਚਤੁਰਿਤ੍ਥਿਵਿਮਾਨਵਤ੍ਥੁ

੭੫੫. ‘‘ਅਭਿਕ੍ਕਨ੍ਤੇਨ ਵਣ੍ਣੇਨ…ਪੇ…ਵਣ੍ਣੋ ਚ ਤੇ ਸਬ੍ਬਦਿਸਾ ਪਭਾਸਤੀ’’ਤਿ.

੭੫੮. ਸਾ ਦੇਵਤਾ ਅਤ੍ਤਮਨਾ…ਪੇ… ਯਸ੍ਸ ਕਮ੍ਮਸ੍ਸਿਦਂ ਫਲਂ.

੭੫੯. ‘‘ਇਨ੍ਦੀਵਰਾਨਂ ਹਤ੍ਥਕਂ ਅਹਮਦਾਸਿਂ, ਭਿਕ੍ਖੁਨੋ ਪਿਣ੍ਡਾਯ ਚਰਨ੍ਤਸ੍ਸ;

ਏਸਿਕਾਨਂ ਉਣ੍ਣਤਸ੍ਮਿਂ, ਨਗਰਵਰੇ ਪਣ੍ਣਕਤੇ ਰਮ੍ਮੇ.

੭੬੦. ‘‘ਤੇਨ ਮੇਤਾਦਿਸੋ ਵਣ੍ਣੋ…ਪੇ…ਵਣ੍ਣੋ ਚ ਮੇ ਸਬ੍ਬਦਿਸ੍ਸਾ ਪਭਾਸਤੀ’’ਤਿ.

੭੬੨. ‘‘ਅਭਿਕ੍ਕਨ੍ਤੇਨ ਵਣ੍ਣੇਨ…ਪੇ…ਵਣ੍ਣੋ ਚ ਤੇ ਸਬ੍ਬਦਿਸਾ ਪਭਾਸਤੀ’’ਤਿ.

੭੬੫. ਸਾ ਦੇਵਤਾ ਅਤ੍ਤਮਨਾ…ਪੇ… ਯਸ੍ਸ ਕਮ੍ਮਸ੍ਸਿਦਂ ਫਲਂ.

੭੬੬. ‘‘ਨੀਲੁਪ੍ਪਲਹਤ੍ਥਕਂ ਅਹਮਦਾਸਿਂ, ਭਿਕ੍ਖੁਨੋ ਪਿਣ੍ਡਾਯ ਚਰਨ੍ਤਸ੍ਸ;

ਏਸਿਕਾਨਂ ਉਣ੍ਣਤਸ੍ਮਿਂ, ਨਗਰਵਰੇ ਪਣ੍ਣਕਤੇ ਰਮ੍ਮੇ.

੭੬੭. ‘‘ਤੇਨ ਮੇਤਾਦਿਸੋ ਵਣ੍ਣੋ…ਪੇ…ਵਣ੍ਣੋ ਚ ਮੇ ਸਬ੍ਬਦਿਸਾ ਪਭਾਸਤੀ’’ਤਿ.

੭੬੯. ‘‘ਅਭਿਕ੍ਕਨ੍ਤੇਨ ਵਣ੍ਣੇਨ…ਪੇ…ਵਣ੍ਣੋ ਚ ਤੇ ਸਬ੍ਬਦਿਸਾ ਪਭਾਸਤੀ’’ਤਿ.