੯. ਪੀਤਵਿਮਾਨਵਤ੍ਥੁ

੭੯੫. ‘‘ਪੀਤਵਤ੍ਥੇ ਪੀਤਧਜੇ, ਪੀਤਾਲਙ੍ਕਾਰਭੂਸਿਤੇ;

ਪੀਤਚਨ੍ਦਨਲਿਤ੍ਤਙ੍ਗੇ, ਪੀਤਉਪ੍ਪਲਮਾਲਿਨੀ [ਪੀਤੁਪ੍ਪਲਮਧਾਰਿਨੀ (ਸ੍ਯਾ. ਕ.), ਪੀਤੁਪ੍ਪਲਮਾਲਿਨੀ (ਪੀ.)].

੭੯੬. ‘‘ਪੀਤਪਾਸਾਦਸਯਨੇ, ਪੀਤਾਸਨੇ ਪੀਤਭਾਜਨੇ;

ਪੀਤਛਤ੍ਤੇ ਪੀਤਰਥੇ, ਪੀਤਸ੍ਸੇ ਪੀਤਬੀਜਨੇ.

੭੯੭. ‘‘ਕਿਂ ਕਮ੍ਮਮਕਰੀ ਭਦ੍ਦੇ, ਪੁਬ੍ਬੇ ਮਾਨੁਸਕੇ ਭਵੇ;

ਦੇਵਤੇ ਪੁਚ੍ਛਿਤਾਚਿਕ੍ਖ, ਕਿਸ੍ਸ ਕਮ੍ਮਸ੍ਸਿਦਂ ਫਲ’’ਨ੍ਤਿ.

੭੯੮. ‘‘ਕੋਸਾਤਕੀ ਨਾਮ ਲਤਤ੍ਥਿ ਭਨ੍ਤੇ, ਤਿਤ੍ਤਿਕਾ ਅਨਭਿਚ੍ਛਿਤਾ;

ਤਸ੍ਸਾ ਚਤ੍ਤਾਰਿ ਪੁਪ੍ਫਾਨਿ, ਥੂਪਂ ਅਭਿਹਰਿਂ ਅਹਂ.

੭੯੯. ‘‘ਸਤ੍ਥੁ ਸਰੀਰਮੁਦ੍ਦਿਸ੍ਸ, ਵਿਪ੍ਪਸਨ੍ਨੇਨ ਚੇਤਸਾ;

ਨਾਸ੍ਸ ਮਗ੍ਗਂ ਅਵੇਕ੍ਖਿਸ੍ਸਂ, ਨ ਤਗ੍ਗਮਨਸਾ [ਤਦਗ੍ਗਮਨਸਾ (ਸੀ.), ਤਦਙ੍ਗਮਨਸਾ (ਸ੍ਯਾ.)] ਸਤੀ.

੮੦੦. ‘‘ਤਤੋ ਮਂ ਅਵਧੀ ਗਾਵੀ, ਥੂਪਂ ਅਪਤ੍ਤਮਾਨਸਂ;

ਤਞ੍ਚਾਹਂ ਅਭਿਸਞ੍ਚੇਯ੍ਯਂ, ਭਿਯ੍ਯੋ [ਭੀਯੋ (ਸੀ. ਅਟ੍ਠ.)] ਨੂਨ ਇਤੋ ਸਿਯਾ.

੮੦੧. ‘‘ਤੇਨ ਕਮ੍ਮੇਨ ਦੇਵਿਨ੍ਦ, ਮਘਵਾ ਦੇਵਕੁਞ੍ਜਰੋ;

ਪਹਾਯ ਮਾਨੁਸਂ ਦੇਹਂ, ਤਵ ਸਹਬ੍ਯ [ਸਹਬ੍ਯਤ (ਸੀ. ਸ੍ਯਾ.)] ਮਾਗਤਾ’’ਤਿ.

੮੦੨. ਇਦਂ ਸੁਤ੍ਵਾ ਤਿਦਸਾਧਿਪਤਿ, ਮਘਵਾ ਦੇਵਕੁਞ੍ਜਰੋ;

ਤਾਵਤਿਂਸੇ ਪਸਾਦੇਨ੍ਤੋ, ਮਾਤਲਿਂ ਏਤਦਬ੍ਰਵਿ [ਏਤਦਬ੍ਰੂਵੀਤਿ (ਸੀ.)].

੮੦੩. ‘‘ਪਸ੍ਸ ਮਾਤਲਿ ਅਚ੍ਛੇਰਂ, ਚਿਤ੍ਤਂ ਕਮ੍ਮਫਲਂ ਇਦਂ;

ਅਪ੍ਪਕਮ੍ਪਿ ਕਤਂ ਦੇਯ੍ਯਂ, ਪੁਞ੍ਞਂ ਹੋਤਿ ਮਹਪ੍ਫਲਂ.

੮੦੪. ‘‘ਨਤ੍ਥਿ ਚਿਤ੍ਤੇ ਪਸਨ੍ਨਮ੍ਹਿ, ਅਪ੍ਪਕਾ ਨਾਮ ਦਕ੍ਖਿਣਾ;

ਤਥਾਗਤੇ ਵਾ ਸਮ੍ਬੁਦ੍ਧੇ, ਅਥ ਵਾ ਤਸ੍ਸ ਸਾਵਕੇ.

੮੦੫. ‘‘ਏਹਿ ਮਾਤਲਿ ਅਮ੍ਹੇਪਿ, ਭਿਯ੍ਯੋ ਭਿਯ੍ਯੋ ਮਹੇਮਸੇ;

ਤਥਾਗਤਸ੍ਸ ਧਾਤੁਯੋ, ਸੁਖੋ ਪੁਞ੍ਞਾਨ ਮੁਚ੍ਚਯੋ.

੮੦੬. ‘‘ਤਿਟ੍ਠਨ੍ਤੇ ਨਿਬ੍ਬੁਤੇ ਚਾਪਿ, ਸਮੇ ਚਿਤ੍ਤੇ ਸਮਂ ਫਲਂ;

ਚੇਤੋਪਣਿਧਿਹੇਤੁ ਹਿ, ਸਤ੍ਤਾ ਗਚ੍ਛਨ੍ਤਿ ਸੁਗ੍ਗਤਿਂ.

੮੦੭. ‘‘ਬਹੂਨਂ [ਬਹੁਨ੍ਨਂ (ਸੀ. ਸ੍ਯਾ.)] ਵਤ ਅਤ੍ਥਾਯ, ਉਪ੍ਪਜ੍ਜਨ੍ਤਿ ਤਥਾਗਤਾ;

ਯਤ੍ਥ ਕਾਰਂ ਕਰਿਤ੍ਵਾਨ, ਸਗ੍ਗਂ ਗਚ੍ਛਨ੍ਤਿ ਦਾਯਕਾ’’ਤਿ.

ਪੀਤਵਿਮਾਨਂ ਨਵਮਂ.