੯. ਵਿਸਾਲਕ੍ਖਿਵਿਮਾਨਵਤ੍ਥੁ

੬੬੬. ‘‘ਕਾ ਨਾਮ ਤ੍ਵਂ ਵਿਸਾਲਕ੍ਖਿ [ਵਿਸਾਲਕ੍ਖੀ (ਸ੍ਯਾ.)], ਰਮ੍ਮੇ ਚਿਤ੍ਤਲਤਾਵਨੇ;

ਸਮਨ੍ਤਾ ਅਨੁਪਰਿਯਾਸਿ, ਨਾਰੀਗਣਪੁਰਕ੍ਖਤਾ [ਪੁਰਕ੍ਖਿਤਾ (ਸ੍ਯਾ. ਕ.)].

੬੬੭. ‘‘ਯਦਾ ਦੇਵਾ ਤਾਵਤਿਂਸਾ, ਪਵਿਸਨ੍ਤਿ ਇਮਂ ਵਨਂ;

ਸਯੋਗ੍ਗਾ ਸਰਥਾ ਸਬ੍ਬੇ, ਚਿਤ੍ਰਾ ਹੋਨ੍ਤਿ ਇਧਾਗਤਾ.

੬੬੮. ‘‘ਤੁਯ੍ਹਞ੍ਚ ਇਧ ਪਤ੍ਤਾਯ, ਉਯ੍ਯਾਨੇ ਵਿਚਰਨ੍ਤਿਯਾ;

ਕਾਯੇ ਨ ਦਿਸ੍ਸਤੀ ਚਿਤ੍ਤਂ, ਕੇਨ ਰੂਪਂ ਤਵੇਦਿਸਂ;

ਦੇਵਤੇ ਪੁਚ੍ਛਿਤਾਚਿਕ੍ਖ, ਕਿਸ੍ਸ ਕਮ੍ਮਸ੍ਸਿਦਂ ਫਲ’’ਨ੍ਤਿ.

੬੬੯. ‘‘ਯੇਨ ਕਮ੍ਮੇਨ ਦੇਵਿਨ੍ਦ, ਰੂਪਂ ਮਯ੍ਹਂ ਗਤੀ ਚ ਮੇ;

ਇਦ੍ਧਿ ਚ ਆਨੁਭਾਵੋ ਚ, ਤਂ ਸੁਣੋਹਿ ਪੁਰਿਨ੍ਦਦ.

੬੭੦. ‘‘ਅਹਂ ਰਾਜਗਹੇ ਰਮ੍ਮੇ, ਸੁਨਨ੍ਦਾ ਨਾਮੁਪਾਸਿਕਾ;

ਸਦ੍ਧਾ ਸੀਲੇਨ ਸਮ੍ਪਨ੍ਨਾ, ਸਂਵਿਭਾਗਰਤਾ ਸਦਾ.

੬੭੧. ‘‘ਅਚ੍ਛਾਦਨਞ੍ਚ ਭਤ੍ਤਞ੍ਚ, ਸੇਨਾਸਨਂ ਪਦੀਪਿਯਂ;

ਅਦਾਸਿਂ ਉਜੁਭੂਤੇਸੁ, ਵਿਪ੍ਪਸਨ੍ਨੇਨ ਚੇਤਸਾ.

੬੭੨. ‘‘ਚਾਤੁਦ੍ਦਸਿਂ [ਚਤੁਦ੍ਦਸਿਂ (ਪੀ. ਕ.)] ਪਞ੍ਚਦਸਿਂ, ਯਾ ਚ ਪਕ੍ਖਸ੍ਸ ਅਟ੍ਠਮੀ;

ਪਾਟਿਹਾਰਿਯਪਕ੍ਖਞ੍ਚ, ਅਟ੍ਠਙ੍ਗਸੁਸਮਾਗਤਂ.

੬੭੩. ‘‘ਉਪੋਸਥਂ ਉਪਵਸਿਸ੍ਸਂ, ਸਦਾ ਸੀਲੇਸੁ ਸਂਵੁਤਾ;

ਸਞ੍ਞਮਾ ਸਂਵਿਭਾਗਾ ਚ, ਵਿਮਾਨਂ ਆਵਸਾਮਹਂ.

੬੭੪. ‘‘ਪਾਣਾਤਿਪਾਤਾ ਵਿਰਤਾ, ਮੁਸਾਵਾਦਾ ਚ ਸਞ੍ਞਤਾ;

ਥੇਯ੍ਯਾ ਚ ਅਤਿਚਾਰਾ ਚ, ਮਜ੍ਜਪਾਨਾ ਚ ਆਰਕਾ.

੬੭੫. ‘‘ਪਞ੍ਚਸਿਕ੍ਖਾਪਦੇ ਰਤਾ, ਅਰਿਯਸਚ੍ਚਾਨ ਕੋਵਿਦਾ;

ਉਪਾਸਿਕਾ ਚਕ੍ਖੁਮਤੋ, ਗੋਤਮਸ੍ਸ ਯਸਸ੍ਸਿਨੋ.

੬੭੬. ‘‘ਤਸ੍ਸਾ ਮੇ ਞਾਤਿਕੁਲਾ ਦਾਸੀ [ਞਾਤਿਕੁਲਂ ਆਸੀ (ਸ੍ਯਾ. ਕ.)], ਸਦਾ ਮਾਲਾਭਿਹਾਰਤਿ;

ਤਾਹਂ ਭਗਵਤੋ ਥੂਪੇ, ਸਬ੍ਬਮੇਵਾਭਿਰੋਪਯਿਂ.

੬੭੭. ‘‘ਉਪੋਸਥੇ ਚਹਂ ਗਨ੍ਤ੍ਵਾ, ਮਾਲਾਗਨ੍ਧਵਿਲੇਪਨਂ;

ਥੂਪਸ੍ਮਿਂ ਅਭਿਰੋਪੇਸਿਂ, ਪਸਨ੍ਨਾ ਸੇਹਿ ਪਾਣਿਭਿ.

੬੭੮. ‘‘ਤੇਨ ਕਮ੍ਮੇਨ ਦੇਵਿਨ੍ਦ, ਰੂਪਂ ਮਯ੍ਹਂ ਗਤੀ ਚ ਮੇ;

ਇਦ੍ਧੀ ਚ ਆਨੁਭਾਵੋ ਚ, ਯਂ ਮਾਲਂ ਅਭਿਰੋਪਯਿਂ.

੬੭੯. ‘‘ਯਞ੍ਚ ਸੀਲਵਤੀ ਆਸਿਂ, ਨ ਤਂ ਤਾਵ ਵਿਪਚ੍ਚਤਿ;

ਆਸਾ ਚ ਪਨ ਮੇ ਦੇਵਿਨ੍ਦ, ਸਕਦਾਗਾਮਿਨੀ ਸਿਯ’’ਨ੍ਤਿ.

ਵਿਸਾਲਕ੍ਖਿਵਿਮਾਨਂ ਨਵਮਂ.