੩. ਪਾਰਿਚ੍ਛਤ੍ਤਕਵਗ੍ਗੋ

੧. ਉਲ਼ਾਰਵਿਮਾਨਵਤ੍ਥੁ

੨੮੬. ‘‘ਉਲ਼ਾਰੋ ਤੇ ਯਸੋ ਵਣ੍ਣੋ, ਸਬ੍ਬਾ ਓਭਾਸਤੇ ਦਿਸਾ;

ਨਾਰਿਯੋ ਨਚ੍ਚਨ੍ਤਿ ਗਾਯਨ੍ਤਿ, ਦੇਵਪੁਤ੍ਤਾ ਅਲਙ੍ਕਤਾ.

੨੮੭. ‘‘ਮੋਦੇਨ੍ਤਿ ਪਰਿਵਾਰੇਨ੍ਤਿ, ਤਵ ਪੂਜਾਯ ਦੇਵਤੇ;

ਸੋਵਣ੍ਣਾਨਿ ਵਿਮਾਨਾਨਿ, ਤਵਿਮਾਨਿ ਸੁਦਸ੍ਸਨੇ.

੨੮੮. ‘‘ਤੁਵਂਸਿ ਇਸ੍ਸਰਾ ਤੇਸਂ, ਸਬ੍ਬਕਾਮਸਮਿਦ੍ਧਿਨੀ;

ਅਭਿਜਾਤਾ ਮਹਨ੍ਤਾਸਿ, ਦੇਵਕਾਯੇ ਪਮੋਦਸਿ;

ਦੇਵਤੇ ਪੁਚ੍ਛਿਤਾਚਿਕ੍ਖ, ਕਿਸ੍ਸ ਕਮ੍ਮਸ੍ਸਿਦਂ ਫਲ’’ਨ੍ਤਿ.

੨੮੯. ‘‘ਅਹਂ ਮਨੁਸ੍ਸੇਸੁ ਮਨੁਸ੍ਸਭੂਤਾ, ਪੁਰਿਮਾਯ ਜਾਤਿਯਾ ਮਨੁਸ੍ਸਲੋਕੇ;

ਦੁਸ੍ਸੀਲਕੁਲੇ ਸੁਣਿਸਾ ਅਹੋਸਿਂ, ਅਸ੍ਸਦ੍ਧੇਸੁ ਕਦਰਿਯੇਸੁ ਅਹਂ.

੨੯੦. ‘‘ਸਦ੍ਧਾ ਸੀਲੇਨ ਸਮ੍ਪਨ੍ਨਾ, ਸਂਵਿਭਾਗਰਤਾ ਸਦਾ;

ਪਿਣ੍ਡਾਯ ਚਰਮਾਨਸ੍ਸ, ਅਪੂਵਂ ਤੇ ਅਦਾਸਹਂ.

੨੯੧. ‘‘ਤਦਾਹਂ ਸਸ੍ਸੁਯਾਚਿਕ੍ਖਿਂ, ਸਮਣੋ ਆਗਤੋ ਇਧ;

ਤਸ੍ਸ ਅਦਾਸਹਂ ਪੂਵਂ, ਪਸਨ੍ਨਾ ਸੇਹਿ ਪਾਣਿਭਿ.

੨੯੨. ‘‘ਇਤਿਸ੍ਸਾ ਸਸ੍ਸੁ ਪਰਿਭਾਸਿ, ਅਵਿਨੀਤਾਸਿ ਤ੍ਵਂ [ਅਵਿਨੀਤਾ ਤੁਵਂ (ਸੀ.)] ਵਧੁ;

ਨ ਮਂ ਸਮ੍ਪੁਚ੍ਛਿਤੁਂ ਇਚ੍ਛਿ, ਸਮਣਸ੍ਸ ਦਦਾਮਹਂ.

੨੯੩. ‘‘ਤਤੋ ਮੇ ਸਸ੍ਸੁ ਕੁਪਿਤਾ, ਪਹਾਸਿ ਮੁਸਲੇਨ ਮਂ;

ਕੂਟਙ੍ਗਚ੍ਛਿ ਅਵਧਿ ਮਂ, ਨਾਸਕ੍ਖਿਂ ਜੀਵਿਤੁਂ ਚਿਰਂ.

੨੯੪. ‘‘ਸਾ ਅਹਂ ਕਾਯਸ੍ਸ ਭੇਦਾ, ਵਿਪ੍ਪਮੁਤ੍ਤਾ ਤਤੋ ਚੁਤਾ;

ਦੇਵਾਨਂ ਤਾਵਤਿਂਸਾਨਂ, ਉਪਪਨ੍ਨਾ ਸਹਬ੍ਯਤਂ.

੨੯੫. ‘‘ਤੇਨ ਮੇਤਾਦਿਸੋ ਵਣ੍ਣੋ…ਪੇ…ਵਣ੍ਣੋ ਚ ਮੇ ਸਬ੍ਬਦਿਸਾ ਪਭਾਸਤੀ’’ਤਿ.

ਉਲ਼ਾਰਵਿਮਾਨਂ ਪਠਮਂ.

੨. ਉਚ੍ਛੁਦਾਯਿਕਾਵਿਮਾਨਵਤ੍ਥੁ

੨੯੬. ‘‘ਓਭਾਸਯਿਤ੍ਵਾ ਪਥਵਿਂ [ਪਠਵਿਂ (ਸੀ. ਸ੍ਯਾ.)] ਸਦੇਵਕਂ, ਅਤਿਰੋਚਸਿ ਚਨ੍ਦਿਮਸੂਰਿਯਾ ਵਿਯ;

ਸਿਰਿਯਾ ਚ ਵਣ੍ਣੇਨ ਯਸੇਨ ਤੇਜਸਾ, ਬ੍ਰਹ੍ਮਾਵ ਦੇਵੇ ਤਿਦਸੇ ਸਹਿਨ੍ਦਕੇ [ਸਇਨ੍ਦਕੇ (ਸੀ.)].

੨੯੭. ‘‘ਪੁਚ੍ਛਾਮਿ ਤਂ ਉਪ੍ਪਲਮਾਲਧਾਰਿਨੀ, ਆਵੇਲ਼ਿਨੀ ਕਞ੍ਚਨਸਨ੍ਨਿਭਤ੍ਤਚੇ;

ਅਲਙ੍ਕਤੇ ਉਤ੍ਤਮਵਤ੍ਥਧਾਰਿਨੀ, ਕਾ ਤ੍ਵਂ ਸੁਭੇ ਦੇਵਤੇ ਵਨ੍ਦਸੇ ਮਮਂ.

੨੯੮. ‘‘ਕਿਂ ਤ੍ਵਂ ਪੁਰੇ ਕਮ੍ਮਮਕਾਸਿ ਅਤ੍ਤਨਾ, ਮਨੁਸ੍ਸਭੂਤਾ ਪੁਰਿਮਾਯ ਜਾਤਿਯਾ;

ਦਾਨਂ ਸੁਚਿਣ੍ਣਂ ਅਥ ਸੀਲਸਂਯਮਂ [ਸਞ੍ਞਮਂ (ਸੀ.)], ਕੇਨੂਪਪਨ੍ਨਾ ਸੁਗਤਿਂ ਯਸਸ੍ਸਿਨੀ;

ਦੇਵਤੇ ਪੁਚ੍ਛਿਤਾਚਿਕ੍ਖ, ਕਿਸ੍ਸ ਕਮ੍ਮਸ੍ਸਿਦਂ ਫਲ’’ਨ੍ਤਿ.

੨੯੯. ‘‘ਇਦਾਨਿ ਭਨ੍ਤੇ ਇਮਮੇਵ ਗਾਮਂ [ਗਾਮੇ (ਸ੍ਯਾ. ਕ.)], ਪਿਣ੍ਡਾਯ ਅਮ੍ਹਾਕਂ ਘਰਂ ਉਪਾਗਮਿ;

ਤਤੋ ਤੇ ਉਚ੍ਛੁਸ੍ਸ ਅਦਾਸਿ ਖਣ੍ਡਿਕਂ, ਪਸਨ੍ਨਚਿਤ੍ਤਾ ਅਤੁਲਾਯ ਪੀਤਿਯਾ.

੩੦੦. ‘‘ਸਸ੍ਸੁ ਚ ਪਚ੍ਛਾ ਅਨੁਯੁਞ੍ਜਤੇ ਮਮਂ, ਕਹਂ [ਕਹਂ ਮੇ (ਪੀ.)] ਨੁ ਉਚ੍ਛੁਂ ਵਧੁਕੇ ਅਵਾਕਿਰਿ [ਅਵਾਕਰਿ (ਸ੍ਯਾ. ਕ.)];

ਨ ਛਡ੍ਡਿਤਂ ਨੋ ਪਨ ਖਾਦਿਤਂ ਮਯਾ, ਸਨ੍ਤਸ੍ਸ ਭਿਕ੍ਖੁਸ੍ਸ ਸਯਂ ਅਦਾਸਹਂ.

੩੦੧. ‘‘ਤੁਯ੍ਹਂਨ੍ਵਿਦਂ [ਤੁਯ੍ਹਂ ਨੁ ਇਦਂ (ਸ੍ਯਾ.)] ਇਸ੍ਸਰਿਯਂ ਅਥੋ ਮਮ, ਇਤਿਸ੍ਸਾ ਸਸ੍ਸੁ ਪਰਿਭਾਸਤੇ ਮਮਂ;

ਪੀਠਂ ਗਹੇਤ੍ਵਾ ਪਹਾਰਂ ਅਦਾਸਿ ਮੇ, ਤਤੋ ਚੁਤਾ ਕਾਲਕਤਾਮ੍ਹਿ ਦੇਵਤਾ.

੩੦੨. ‘‘ਤਦੇਵ ਕਮ੍ਮਂ ਕੁਸਲਂ ਕਤਂ ਮਯਾ, ਸੁਖਞ੍ਚ ਕਮ੍ਮਂ ਅਨੁਭੋਮਿ ਅਤ੍ਤਨਾ;

ਦੇਵੇਹਿ ਸਦ੍ਧਿਂ ਪਰਿਚਾਰਯਾਮਹਂ, ਮੋਦਾਮਹਂ ਕਾਮਗੁਣੇਹਿ ਪਞ੍ਚਹਿ.

੩੦੩. ‘‘ਤਦੇਵ ਕਮ੍ਮਂ ਕੁਸਲਂ ਕਤਂ ਮਯਾ, ਸੁਖਞ੍ਚ ਕਮ੍ਮਂ ਅਨੁਭੋਮਿ ਅਤ੍ਤਨਾ;

ਦੇਵਿਨ੍ਦਗੁਤ੍ਤਾ ਤਿਦਸੇਹਿ ਰਕ੍ਖਿਤਾ, ਸਮਪ੍ਪਿਤਾ ਕਾਮਗੁਣੇਹਿ ਪਞ੍ਚਹਿ.

੩੦੪. ‘‘ਏਤਾਦਿਸਂ ਪੁਞ੍ਞਫਲਂ ਅਨਪ੍ਪਕਂ, ਮਹਾਵਿਪਾਕਾ ਮਮ ਉਚ੍ਛੁਦਕ੍ਖਿਣਾ;

ਦੇਵੇਹਿ ਸਦ੍ਧਿਂ ਪਰਿਚਾਰਯਾਮਹਂ, ਮੋਦਾਮਹਂ ਕਾਮਗੁਣੇਹਿ ਪਞ੍ਚਹਿ.

੩੦੫. ‘‘ਏਤਾਦਿਸਂ ਪੁਞ੍ਞਫਲਂ ਅਨਪ੍ਪਕਂ, ਮਹਾਜੁਤਿਕਾ ਮਮ ਉਚ੍ਛੁਦਕ੍ਖਿਣਾ;

ਦੇਵਿਨ੍ਦਗੁਤ੍ਤਾ ਤਿਦਸੇਹਿ ਰਕ੍ਖਿਤਾ, ਸਹਸ੍ਸਨੇਤ੍ਤੋਰਿਵ ਨਨ੍ਦਨੇ ਵਨੇ.

੩੦੬. ‘‘ਤੁਵਞ੍ਚ ਭਨ੍ਤੇ ਅਨੁਕਮ੍ਪਕਂ ਵਿਦੁਂ, ਉਪੇਚ੍ਚ ਵਨ੍ਦਿਂ ਕੁਸਲਞ੍ਚ ਪੁਚ੍ਛਿਸਂ;

ਤਤੋ ਤੇ ਉਚ੍ਛੁਸ੍ਸ ਅਦਾਸਿ ਖਣ੍ਡਿਕਂ, ਪਸਨ੍ਨਚਿਤਾ ਅਤੁਲਾਯ ਪੀਤਿਯਾ’’ਤਿ.

ਉਚ੍ਛੁਦਾਯਿਕਾਵਿਮਾਨਂ ਦੁਤਿਯਂ.

੩. ਪਲ੍ਲਙ੍ਕਵਿਮਾਨਵਤ੍ਥੁ

੩੦੭. ‘‘ਪਲ੍ਲਙ੍ਕਸੇਟ੍ਠੇ ਮਣਿਸੋਣ੍ਣਚਿਤ੍ਤੇ, ਪੁਪ੍ਫਾਭਿਕਿਣ੍ਣੇ ਸਯਨੇ ਉਲ਼ਾਰੇ;

ਤਤ੍ਥਚ੍ਛਸਿ ਦੇਵਿ ਮਹਾਨੁਭਾਵੇ, ਉਚ੍ਚਾਵਚਾ ਇਦ੍ਧਿ ਵਿਕੁਬ੍ਬਮਾਨਾ.

੩੦੮. ‘‘ਇਮਾ ਚ ਤੇ ਅਚ੍ਛਰਾਯੋ ਸਮਨ੍ਤਤੋ, ਨਚ੍ਚਨ੍ਤਿ ਗਾਯਨ੍ਤਿ ਪਮੋਦਯਨ੍ਤਿ;

ਦੇਵਿਦ੍ਧਿਪਤ੍ਤਾਸਿ ਮਹਾਨੁਭਾਵੇ, ਮਨੁਸ੍ਸਭੂਤਾ ਕਿਮਕਾਸਿ ਪੁਞ੍ਞਂ;

ਕੇਨਾਸਿ ਏਵਂ ਜਲਿਤਾਨੁਭਾਵਾ, ਵਣ੍ਣੋ ਚ ਤੇ ਸਬ੍ਬਦਿਸਾ ਪਭਾਸਤੀ’’ਤਿ.

੩੦੯. ‘‘ਅਹਂ ਮਨੁਸ੍ਸੇਸੁ ਮਨੁਸ੍ਸਭੂਤਾ, ਅਡ੍ਢੇ ਕੁਲੇ ਸੁਣਿਸਾ ਅਹੋਸਿਂ;

ਅਕ੍ਕੋਧਨਾ ਭਤ੍ਤੁਵਸਾਨੁਵਤ੍ਤਿਨੀ, ਉਪੋਸਥੇ ਅਪ੍ਪਮਤ੍ਤਾ ਅਹੋਸਿਂ [ਅਪ੍ਪਮਤ੍ਤਾ ਉਪੋਸਥੇ (ਸ੍ਯਾ. ਕ.)].

੩੧੦. ‘‘ਮਨੁਸ੍ਸਭੂਤਾ ਦਹਰਾ ਅਪਾਪਿਕਾ [ਦਹਰਾਸ’ਪਾਪਿਕਾ (ਸੀ.)], ਪਸਨ੍ਨਚਿਤ੍ਤਾ ਪਤਿਮਾਭਿਰਾਧਯਿਂ;

ਦਿਵਾ ਚ ਰਤ੍ਤੋ ਚ ਮਨਾਪਚਾਰਿਨੀ, ਅਹਂ ਪੁਰੇ ਸੀਲਵਤੀ ਅਹੋਸਿਂ.

੩੧੧. ‘‘ਪਾਣਾਤਿਪਾਤਾ ਵਿਰਤਾ ਅਚੋਰਿਕਾ, ਸਂਸੁਦ੍ਧਕਾਯਾ ਸੁਚਿਬ੍ਰਹ੍ਮਚਾਰਿਨੀ;

ਅਮਜ੍ਜਪਾ ਨੋ ਚ ਮੁਸਾ ਅਭਾਣਿਂ, ਸਿਕ੍ਖਾਪਦੇਸੁ ਪਰਿਪੂਰਕਾਰਿਨੀ.

੩੧੨. ‘‘ਚਾਤੁਦ੍ਦਸਿਂ ਪਞ੍ਚਦਸਿਂ, ਯਾ ਚ ਪਕ੍ਖਸ੍ਸ ਅਟ੍ਠਮੀ;

ਪਾਟਿਹਾਰਿਯਪਕ੍ਖਞ੍ਚ, ਪਸਨ੍ਨਮਾਨਸਾ ਅਹਂ [ਅਤਿਪਸਨ੍ਨਮਾਨਸਾ (ਕ.)].

੩੧੩. ‘‘ਅਟ੍ਠਙ੍ਗੁਪੇਤਂ ਅਨੁਧਮ੍ਮਚਾਰਿਨੀ, ਉਪੋਸਥਂ ਪੀਤਿਮਨਾ ਉਪਾਵਸਿਂ;

ਇਮਞ੍ਚ ਅਰਿਯਂ ਅਟ੍ਠਙ੍ਗਵਰੇਹੁਪੇਤਂ, ਸਮਾਦਿਯਿਤ੍ਵਾ ਕੁਸਲਂ ਸੁਖੁਦ੍ਰਯਂ;

ਪਤਿਮ੍ਹਿ ਕਲ੍ਯਾਣੀ ਵਸਾਨੁਵਤ੍ਤਿਨੀ, ਅਹੋਸਿਂ ਪੁਬ੍ਬੇ ਸੁਗਤਸ੍ਸ ਸਾਵਿਕਾ.

੩੧੪. ‘‘ਏਤਾਦਿਸਂ ਕੁਸਲਂ ਜੀਵਲੋਕੇ, ਕਮ੍ਮਂ ਕਰਿਤ੍ਵਾਨ ਵਿਸੇਸਭਾਗਿਨੀ;

ਕਾਯਸ੍ਸ ਭੇਦਾ ਅਭਿਸਮ੍ਪਰਾਯਂ, ਦੇਵਿਦ੍ਧਿਪਤ੍ਤਾ ਸੁਗਤਿਮ੍ਹਿ ਆਗਤਾ.

੩੧੫. ‘‘ਵਿਮਾਨਪਾਸਾਦਵਰੇ ਮਨੋਰਮੇ, ਪਰਿਵਾਰਿਤਾ ਅਚ੍ਛਰਾਸਙ੍ਗਣੇਨ;

ਸਯਂਪਭਾ ਦੇਵਗਣਾ ਰਮੇਨ੍ਤਿ ਮਂ, ਦੀਘਾਯੁਕਿਂ ਦੇਵਵਿਮਾਨਮਾਗਤ’’ਨ੍ਤਿ;

ਪਲ੍ਲਙ੍ਕਵਿਮਾਨਂ ਤਤਿਯਂ.

੪. ਲਤਾਵਿਮਾਨਵਤ੍ਥੁ

੩੧੬. ਲਤਾ ਚ ਸਜ੍ਜਾ ਪਵਰਾ ਚ ਦੇਵਤਾ, ਅਚ੍ਚਿਮਤੀ [ਅਚ੍ਚਿਮੁਖੀ (ਸੀ.), ਅਚ੍ਛਿਮਤੀ (ਪੀ. ਕ.) ਅਚ੍ਛਿਮੁਤੀ (ਸ੍ਯਾ.)] ਰਾਜਵਰਸ੍ਸ ਸਿਰੀਮਤੋ;

ਸੁਤਾ ਚ ਰਞ੍ਞੋ ਵੇਸ੍ਸਵਣਸ੍ਸ ਧੀਤਾ, ਰਾਜੀਮਤੀ ਧਮ੍ਮਗੁਣੇਹਿ ਸੋਭਥ.

੩੧੭. ਪਞ੍ਚੇਤ੍ਥ ਨਾਰਿਯੋ ਆਗਮਂਸੁ ਨ੍ਹਾਯਿਤੁਂ, ਸੀਤੋਦਕਂ ਉਪ੍ਪਲਿਨਿਂ ਸਿਵਂ ਨਦਿਂ;

ਤਾ ਤਤ੍ਥ ਨ੍ਹਾਯਿਤ੍ਵਾ ਰਮੇਤ੍ਵਾ ਦੇਵਤਾ, ਨਚ੍ਚਿਤ੍ਵਾ ਗਾਯਿਤ੍ਵਾ ਸੁਤਾ ਲਤਂ ਬ੍ਰਵਿ [ਬ੍ਰੁਵੀ (ਸੀ.)].

੩੧੮. ‘‘ਪੁਚ੍ਛਾਮਿ ਤਂ ਉਪ੍ਪਲਮਾਲਧਾਰਿਨਿ, ਆਵੇਲ਼ਿਨਿ ਕਞ੍ਚਨਸਨ੍ਨਿਭਤ੍ਤਚੇ;

ਤਿਮਿਰਤਮ੍ਬਕ੍ਖਿ ਨਭੇਵ ਸੋਭਨੇ, ਦੀਘਾਯੁਕੀ ਕੇਨ ਕਤੋ ਯਸੋ ਤਵ.

੩੧੯. ‘‘ਕੇਨਾਸਿ ਭਦ੍ਦੇ ਪਤਿਨੋ ਪਿਯਤਰਾ, ਵਿਸਿਟ੍ਠਕਲ੍ਯਾਣਿਤਰਸ੍ਸੁ ਰੂਪਤੋ;

ਪਦਕ੍ਖਿਣਾ ਨਚ੍ਚਗੀਤਵਾਦਿਤੇ, ਆਚਿਕ੍ਖ ਨੋ ਤ੍ਵਂ ਨਰਨਾਰਿਪੁਚ੍ਛਿਤਾ’’ਤਿ.

੩੨੦. ‘‘ਅਹਂ ਮਨੁਸ੍ਸੇਸੁ ਮਨੁਸ੍ਸਭੂਤਾ, ਉਲ਼ਾਰਭੋਗੇ ਕੁਲੇ ਸੁਣਿਸਾ ਅਹੋਸਿਂ;

ਅਕ੍ਕੋਧਨਾ ਭਤ੍ਤੁਵਸਾਨੁਵਤ੍ਤਿਨੀ, ਉਪੋਸਥੇ ਅਪ੍ਪਮਤ੍ਤਾ ਅਹੋਸਿਂ.

੩੨੧. ‘‘ਮਨੁਸ੍ਸਭੂਤਾ ਦਹਰਾ ਅਪਾਪਿਕਾ [ਦਹਰਾਸ’ਪਾਪਿਕਾ (ਸੀ.)], ਪਸਨ੍ਨਚਿਤ੍ਤਾ ਪਤਿਮਾਭਿਰਾਧਯਿਂ;

ਸਦੇਵਰਂ ਸਸ੍ਸਸੁਰਂ ਸਦਾਸਕਂ, ਅਭਿਰਾਧਯਿਂ ਤਮ੍ਹਿ ਕਤੋ ਯਸੋ ਮਮ.

੩੨੨. ‘‘ਸਾਹਂ ਤੇਨ ਕੁਸਲੇਨ ਕਮ੍ਮੁਨਾ, ਚਤੁਬ੍ਭਿ ਠਾਨੇਹਿ ਵਿਸੇਸਮਜ੍ਝਗਾ;

ਆਯੁਞ੍ਚ ਵਣ੍ਣਞ੍ਚ ਸੁਖਂ ਬਲਞ੍ਚ, ਖਿਡ੍ਡਾਰਤਿਂ ਪਚ੍ਚਨੁਭੋਮਨਪ੍ਪਕਂ.

੩੨੩. ‘‘ਸੁਤਂ ਨੁ ਤਂ ਭਾਸਤਿ ਯਂ ਅਯਂ ਲਤਾ, ਯਂ ਨੋ ਅਪੁਚ੍ਛਿਮ੍ਹ ਅਕਿਤ੍ਤਯੀ ਨੋ;

ਪਤਿਨੋ ਕਿਰਮ੍ਹਾਕਂ ਵਿਸਿਟ੍ਠ ਨਾਰੀਨਂ, ਗਤੀ ਚ ਤਾਸਂ ਪਵਰਾ ਚ ਦੇਵਤਾ.

੩੨੪. ‘‘ਪਤੀਸੁ ਧਮ੍ਮਂ ਪਚਰਾਮ ਸਬ੍ਬਾ, ਪਤਿਬ੍ਬਤਾ ਯਤ੍ਥ ਭਵਨ੍ਤਿ ਇਤ੍ਥਿਯੋ;

ਪਤੀਸੁ ਧਮ੍ਮਂ ਪਚਰਿਤ੍ਵ [ਪਚਰਿਤ੍ਵਾਨ (ਕ.)] ਸਬ੍ਬਾ, ਲਚ੍ਛਾਮਸੇ ਭਾਸਤਿ ਯਂ ਅਯਂ ਲਤਾ.

੩੨੫. ‘‘ਸੀਹੋ ਯਥਾ ਪਬ੍ਬਤਸਾਨੁਗੋਚਰੋ, ਮਹਿਨ੍ਧਰਂ ਪਬ੍ਬਤਮਾਵਸਿਤ੍ਵਾ;

ਪਸਯ੍ਹ ਹਨ੍ਤ੍ਵਾ ਇਤਰੇ ਚਤੁਪ੍ਪਦੇ, ਖੁਦ੍ਦੇ ਮਿਗੇ ਖਾਦਤਿ ਮਂਸਭੋਜਨੋ.

੩੨੬. ‘‘ਤਥੇਵ ਸਦ੍ਧਾ ਇਧ ਅਰਿਯਸਾਵਿਕਾ, ਭਤ੍ਤਾਰਂ ਨਿਸ੍ਸਾਯ ਪਤਿਂ ਅਨੁਬ੍ਬਤਾ;

ਕੋਧਂ ਵਧਿਤ੍ਵਾ ਅਭਿਭੁਯ੍ਯ ਮਚ੍ਛਰਂ, ਸਗ੍ਗਮ੍ਹਿ ਸਾ ਮੋਦਤਿ ਧਮ੍ਮਚਾਰਿਨੀ’’ਤਿ.

ਲਤਾਵਿਮਾਨਂ ਚਤੁਤ੍ਥਂ.

੫. ਗੁਤ੍ਤਿਲਵਿਮਾਨਂ

੧. ਵਤ੍ਥੁਤ੍ਤਮਦਾਯਿਕਾਵਿਮਾਨਵਤ੍ਥੁ

੩੨੭. ‘‘ਸਤ੍ਤਤਨ੍ਤਿਂ ਸੁਮਧੁਰਂ, ਰਾਮਣੇਯ੍ਯਂ ਅਵਾਚਯਿਂ;

ਸੋ ਮਂ ਰਙ੍ਗਮ੍ਹਿ ਅਵ੍ਹੇਤਿ, ‘ਸਰਣਂ ਮੇ ਹੋਹਿ ਕੋਸਿਯਾ’ਤਿ.

੩੨੮. ‘‘ਅਹਂ ਤੇ ਸਰਣਂ ਹੋਮਿ, ਅਹਮਾਚਰਿਯਪੂਜਕੋ;

ਨ ਤਂ ਜਯਿਸ੍ਸਤਿ ਸਿਸ੍ਸੋ, ਸਿਸ੍ਸਮਾਚਰਿਯ ਜੇਸ੍ਸਸੀ’’ਤਿ.

੩੨੯. ‘‘ਅਭਿਕ੍ਕਨ੍ਤੇਨ ਵਣ੍ਣੇਨ, ਯਾ ਤ੍ਵਂ ਤਿਟ੍ਠਸਿ ਦੇਵਤੇ;

ਓਭਾਸੇਨ੍ਤੀ ਦਿਸਾ ਸਬ੍ਬਾ, ਓਸਧੀ ਵਿਯ ਤਾਰਕਾ.

੩੩੦. ‘‘ਕੇਨ ਤੇਤਾਦਿਸੋ ਵਣ੍ਣੋ, ਕੇਨ ਤੇ ਇਧ ਮਿਜ੍ਝਤਿ;

ਉਪ੍ਪਜ੍ਜਨ੍ਤਿ ਚ ਤੇ ਭੋਗਾ, ਯੇ ਕੇਚਿ ਮਨਸੋ ਪਿਯਾ.

੩੩੧. ‘‘ਪੁਚ੍ਛਾਮਿ ਤਂ ਦੇਵਿ ਮਹਾਨੁਭਾਵੇ, ਮਨੁਸ੍ਸਭੂਤਾ ਕਿਮਕਾਸਿ ਪੁਞ੍ਞਂ;

ਕੇਨਾਸਿ ਏਵਂ ਜਲਿਤਾਨੁਭਾਵਾ, ਵਣ੍ਣੋ ਚ ਤੇ ਸਬ੍ਬਦਿਸਾ ਪਭਾਸਤੀ’’ਤਿ.

੩੩੨. ਸਾ ਦੇਵਤਾ ਅਤ੍ਤਮਨਾ, ਮੋਗ੍ਗਲ੍ਲਾਨੇਨ ਪੁਚ੍ਛਿਤਾ;

ਪਞ੍ਹਂ ਪੁਟ੍ਠਾ ਵਿਯਾਕਾਸਿ, ਯਸ੍ਸ ਕਮ੍ਮਸ੍ਸਿਦਂ ਫਲਂ.

੩੩੩. ‘‘ਵਤ੍ਥੁਤ੍ਤਮਦਾਯਿਕਾ ਨਾਰੀ, ਪਵਰਾ ਹੋਤਿ ਨਰੇਸੁ ਨਾਰੀਸੁ;

ਏਵਂ ਪਿਯਰੂਪਦਾਯਿਕਾ ਮਨਾਪਂ, ਦਿਬ੍ਬਂ ਸਾ ਲਭਤੇ ਉਪੇਚ੍ਚ ਠਾਨਂ.

੩੩੪. ‘‘ਤਸ੍ਸਾ ਮੇ ਪਸ੍ਸ ਵਿਮਾਨਂ, ਅਚ੍ਛਰਾ ਕਾਮਵਣ੍ਣਿਨੀਹਮਸ੍ਮਿ;

ਅਚ੍ਛਰਾਸਹਸ੍ਸਸ੍ਸਾਹਂ, ਪਵਰਾ [ਅਚ੍ਛਰਾਸਹਸ੍ਸਸ੍ਸਾਹਂ ਪਵਰਾ, (ਸ੍ਯਾ.)] ਪਸ੍ਸ ਪੁਞ੍ਞਾਨਂ ਵਿਪਾਕਂ.

੩੩੫. ‘‘ਤੇਨ ਮੇਤਾਦਿਸੋ ਵਣ੍ਣੋ, ਤੇਨ ਮੇ ਇਧ ਮਿਜ੍ਝਤਿ;

ਉਪ੍ਪਜ੍ਜਨ੍ਤਿ ਚ ਮੇ ਭੋਗਾ, ਯੇ ਕੇਚਿ ਮਨਸੋ ਪਿਯਾ.

੩੩੬. ‘‘ਅਕ੍ਖਾਮਿ ਤੇ ਭਿਕ੍ਖੁ ਮਹਾਨੁਭਾਵ, ਮਨੁਸ੍ਸਭੂਤਾ ਯਮਕਾਸਿ ਪੁਞ੍ਞਂ;

ਤੇਨਮ੍ਹਿ ਏਵਂ ਜਲਿਤਾਨੁਭਾਵਾ, ਵਣ੍ਣੋ ਚ ਮੇ ਸਬ੍ਬਦਿਸਾ ਪਭਾਸਤੀ’’ਤਿ.

(ਅਨਨ੍ਤਰਂ ਚਤੁਰਵਿਮਾਨਂ ਯਥਾ ਵਤ੍ਥੁਦਾਯਿਕਾਵਿਮਾਨਂ ਤਥਾ ਵਿਤ੍ਥਾਰੇਤਬ੍ਬਂ [( ) ਨਤ੍ਥਿ ਸੀ. ਪੋਤ੍ਥਕੇ])

੨. ਪੁਪ੍ਫੁਤ੍ਤਮਦਾਯਿਕਾਵਿਮਾਨਵਤ੍ਥੁ (੧)

੩੩੭. ‘‘ਅਭਿਕ੍ਕਨ੍ਤੇਨ ਵਣ੍ਣੇਨ…ਪੇ… ਓਸਧੀ ਵਿਯ ਤਾਰਕਾ.

੩੩੮. ‘‘ਕੇਨ ਤੇਤਾਦਿਸੋ ਵਣ੍ਣੋ…ਪੇ… ਯੇ ਕੇਚਿ ਮਨਸੋ ਪਿਯਾ.

੩੩੯. ‘‘ਪੁਚ੍ਛਾਮਿ ਤਂ ਦੇਵਿ ਮਹਾਨੁਭਾਵੇ…ਪੇ…

ਵਣ੍ਣੋ ਚ ਤੇ ਸਬ੍ਬਦਿਸਾ ਪਭਾਸਤੀ’’ਤਿ.

੩੪੦. ਸਾ ਦੇਵਤਾ ਅਤ੍ਤਮਨਾ…ਪੇ… ਯਸ੍ਸ ਕਮ੍ਮਸ੍ਸਿਦਂ ਫਲਂ.

੩੪੧. ‘‘ਪੁਪ੍ਫੁਤ੍ਤਮਦਾਯਿਕਾ ਨਾਰੀ, ਪਵਰਾ ਹੋਤਿ ਨਰੇਸੁ ਨਾਰੀਸੁ;

ਏਵਂ ਪਿਯਰੂਪਦਾਯਿਕਾ ਮਨਾਪਂ, ਦਿਬ੍ਬਂ ਸਾ ਲਭਤੇ ਉਪੇਚ੍ਚ ਠਾਨਂ.

੩੪੨. ‘‘ਤਸ੍ਸਾ ਮੇ ਪਸ੍ਸ ਵਿਮਾਨਂ, ਅਚ੍ਛਰਾ ਕਾਮਵਣ੍ਣਿਨੀਹਮਸ੍ਮਿ;

ਅਚ੍ਛਰਾਸਹਸ੍ਸਸ੍ਸਾਹਂ, ਪਵਰਾ ਪਸ੍ਸ ਪੁਞ੍ਞਾਨਂ ਵਿਪਾਕਂ.

੩੪੩. ‘‘ਤੇਨ ਮੇਤਾਦਿਸੋ ਵਣ੍ਣੋ…ਪੇ…

ਵਣ੍ਣੋ ਚ ਮੇ ਸਬ੍ਬਦਿਸਾ ਪਭਾਸਤੀ’’ਤਿ.

੩. ਗਨ੍ਧੁਤ੍ਤਮਦਾਯਿਕਾਵਿਮਾਨਵਤ੍ਥੁ (੨)

੩੪੫. ‘‘ਅਭਿਕ੍ਕਨ੍ਤੇਨ ਵਣ੍ਣੇਨ…ਪੇ… ਓਸਧੀ ਵਿਯ ਤਾਰਕਾ.

੩੪੬. ‘‘ਕੇਨ ਤੇਤਾਦਿਸੋ ਵਣ੍ਣੋ…ਪੇ… ਯੇ ਕੇਚਿ ਮਨਸੋ ਪਿਯਾ.

੩੪੭. ‘‘ਪੁਚ੍ਛਾਮਿ ਤਂ ਦੇਵਿ ਮਹਾਨੁਭਾਵੇ…ਪੇ…

ਵਣ੍ਣੋ ਚ ਤੇ ਸਬ੍ਬਦਿਸਾ ਪਭਾਸਤੀ’’ਤਿ.

੩੪੮. ‘‘ਸਾ ਦੇਵਤਾ ਅਤ੍ਤਮਨਾ…ਪੇ… ਯਸ੍ਸ ਕਮ੍ਮਸ੍ਸਿਦਂ ਫਲਂ.

੩੪੯. ‘‘ਗਨ੍ਧੁਤ੍ਤਮਦਾਯਿਕਾ ਨਾਰੀ, ਪਵਰਾ ਹੋਤਿ ਨਰੇਸੁ ਨਾਰੀਸੁ;

ਏਵਂ ਪਿਯਰੂਪਦਾਯਿਕਾ ਮਨਾਪਂ, ਦਿਬ੍ਬਂ ਸਾ ਲਭਤੇ ਉਪੇਚ੍ਚ ਠਾਨਂ.

੩੫੦. ‘‘ਤਸ੍ਸਾ ਮੇ ਪਸ੍ਸ ਵਿਮਾਨਂ, ਅਚ੍ਛਰਾ ਕਾਮਵਣ੍ਣਿਨੀਹਮਸ੍ਮਿ;

ਅਚ੍ਛਰਾਸਹਸ੍ਸਸ੍ਸਾਹਂ, ਪਵਰਾ ਪਸ੍ਸ ਪੁਞ੍ਞਾਨਂ ਵਿਪਾਕਂ.

੩੫੧. ‘‘ਤੇਨ ਮੇਤਾਦਿਸੋ ਵਣ੍ਣੋ…ਪੇ…

ਵਣ੍ਣੋ ਚ ਮੇ ਸਬ੍ਬਦਿਸਾ ਪਭਾਸਤੀ’’ਤਿ.

੪. ਫਲੁਤ੍ਤਮਦਾਯਿਕਾਵਿਮਾਨਵਤ੍ਥੁ (੩)

੩੫੩. ‘‘ਅਭਿਕ੍ਕਨ੍ਤੇਨ ਵਣ੍ਣੇਨ…ਪੇ… ਓਸਧੀ ਵਿਯ ਤਾਰਕਾ.

੩੫੪. ‘‘ਕੇਨ ਤੇਤਾਦਿਸੋ ਵਣ੍ਣੋ…ਪੇ… ਯੇ ਕੇਚਿ ਮਨਸੋ ਪਿਯਾ.

੩੫੫. ‘‘ਪੁਚ੍ਛਾਮਿ ਤਂ ਦੇਵਿ ਮਹਾਨੁਭਾਵੇ…ਪੇ…

ਵਣ੍ਣੋ ਚ ਤੇ ਸਬ੍ਬਦਿਸਾ ਪਭਾਸਤੀ’’ਤਿ.

੩੫੬. ਸਾ ਦੇਵਤਾ ਅਤ੍ਤਮਨਾ…ਪੇ… ਯਸ੍ਸ ਕਮ੍ਮਸ੍ਸਿਦਂ ਫਲਂ.

੩੫੭. ‘‘ਫਲੁਤ੍ਤਮਦਾਯਿਕਾ ਨਾਰੀ, ਪਵਰਾ ਹੋਤਿ ਨਰੇਸੁ ਨਾਰੀਸੁ;

ਏਵਂ ਪਿਯਰੂਪਦਾਯਿਕਾ ਮਨਾਪਂ, ਦਿਬ੍ਬਂ ਸਾ ਲਭਤੇ ਉਪੇਚ੍ਚ ਠਾਨਂ.

੩੫੮. ‘‘ਤਸ੍ਸਾ ਮੇ ਪਸ੍ਸ ਵਿਮਾਨਂ, ਅਚ੍ਛਰਾ ਕਾਮਵਣ੍ਣਿਨੀਹਮਸ੍ਮਿ;