੧੦. ਪਾਰਿਚ੍ਛਤ੍ਤਕਵਿਮਾਨਵਤ੍ਥੁ

੬੮੦. ‘‘ਪਾਰਿਚ੍ਛਤ੍ਤਕੇ ਕੋਵਿਲ਼ਾਰੇ, ਰਮਣੀਯੇ ਮਨੋਰਮੇ;

ਦਿਬ੍ਬਮਾਲਂ ਗਨ੍ਥਮਾਨਾ, ਗਾਯਨ੍ਤੀ ਸਮ੍ਪਮੋਦਸਿ.

੬੮੧. ‘‘ਤਸ੍ਸਾ ਤੇ ਨਚ੍ਚਮਾਨਾਯ, ਅਙ੍ਗਮਙ੍ਗੇਹਿ ਸਬ੍ਬਸੋ;

ਦਿਬ੍ਬਾ ਸਦ੍ਦਾ ਨਿਚ੍ਛਰਨ੍ਤਿ, ਸਵਨੀਯਾ ਮਨੋਰਮਾ.

੬੮੨. ‘‘ਤਸ੍ਸਾ ਤੇ ਨਚ੍ਚਮਾਨਾਯ, ਅਙ੍ਗਮਙ੍ਗੇਹਿ ਸਬ੍ਬਸੋ;

ਦਿਬ੍ਬਾ ਗਨ੍ਧਾ ਪਵਾਯਨ੍ਤਿ, ਸੁਚਿਗਨ੍ਧਾ ਮਨੋਰਮਾ.

੬੮੩. ‘‘ਵਿਵਤ੍ਤਮਾਨਾ ਕਾਯੇਨ, ਯਾ ਵੇਣੀਸੁ ਪਿਲ਼ਨ੍ਧਨਾ.

ਤੇਸਂ ਸੁਯ੍ਯਤਿ ਨਿਗ੍ਘੋਸੋ, ਤੂਰਿਯੇ ਪਞ੍ਚਙ੍ਗਿਕੇ ਯਥਾ.

੬੮੪. ‘‘ਵਟਂਸਕਾ ਵਾਤਧੁਤਾ [ਵਾਤਧੂਤਾ (ਸੀ. ਸ੍ਯਾ.)], ਵਾਤੇਨ ਸਮ੍ਪਕਮ੍ਪਿਤਾ;

ਤੇਸਂ ਸੁਯ੍ਯਤਿ ਨਿਗ੍ਘੋਸੋ, ਤੂਰਿਯੇ ਪਞ੍ਚਙ੍ਗਿਕੇ ਯਥਾ.

੬੮੫. ‘‘ਯਾਪਿ ਤੇ ਸਿਰਸ੍ਮਿਂ ਮਾਲਾ, ਸੁਚਿਗਨ੍ਧਾ ਮਨੋਰਮਾ;

ਵਾਤਿ ਗਨ੍ਧੋ ਦਿਸਾ ਸਬ੍ਬਾ, ਰੁਕ੍ਖੋ ਮਞ੍ਜੂਸਕੋ ਯਥਾ.

੬੮੬. ‘‘ਘਾਯਸੇ ਤਂ ਸੁਚਿਗਨ੍ਧਂ [ਸੁਚਿਂ ਗਨ੍ਧਂ (ਸੀ.)], ਰੂਪਂ ਪਸ੍ਸਸਿ ਅਮਾਨੁਸਂ [ਮਾਨੁਸਂ (ਪੀ.)];

ਦੇਵਤੇ ਪੁਚ੍ਛਿਤਾਚਿਕ੍ਖ, ਕਿਸ੍ਸ ਕਮ੍ਮਸ੍ਸਿਦਂ ਫਲ’’ਨ੍ਤਿ.

੬੮੭. ‘‘ਪਭਸ੍ਸਰਂ ਅਚ੍ਚਿਮਨ੍ਤਂ, ਵਣ੍ਣਗਨ੍ਧੇਨ ਸਂਯੁਤਂ;

ਅਸੋਕਪੁਪ੍ਫਮਾਲਾਹਂ, ਬੁਦ੍ਧਸ੍ਸ ਉਪਨਾਮਯਿਂ.

੬੮੮. ‘‘ਤਾਹਂ ਕਮ੍ਮਂ ਕਰਿਤ੍ਵਾਨ, ਕੁਸਲਂ ਬੁਦ੍ਧਵਣ੍ਣਿਤਂ;

ਅਪੇਤਸੋਕਾ ਸੁਖਿਤਾ, ਸਮ੍ਪਮੋਦਾਮਨਾਮਯਾ’’ਤਿ.

ਪਾਰਿਚ੍ਛਤ੍ਤਕਵਿਮਾਨਂ ਦਸਮਂ.

ਪਾਰਿਚ੍ਛਤ੍ਤਕਵਗ੍ਗੋ ਤਤਿਯੋ ਨਿਟ੍ਠਿਤੋ.

ਤਸ੍ਸੁਦ੍ਦਾਨਂ –

ਉਲ਼ਾਰੋ ਉਚ੍ਛੁ ਪਲ੍ਲਙ੍ਕੋ, ਲਤਾ ਚ ਗੁਤ੍ਤਿਲੇਨ ਚ;

ਦਦ੍ਦਲ੍ਲਪੇਸਮਲ੍ਲਿਕਾ, ਵਿਸਾਲਕ੍ਖਿ ਪਾਰਿਚ੍ਛਤ੍ਤਕੋ;

ਵਗ੍ਗੋ ਤੇਨ ਪਵੁਚ੍ਚਤੀਤਿ.