੮. ਮਲ੍ਲਿਕਾਵਿਮਾਨਵਤ੍ਥੁ

੬੫੮. ‘‘ਪੀਤਵਤ੍ਥੇ ਪੀਤਧਜੇ, ਪੀਤਾਲਙ੍ਕਾਰਭੂਸਿਤੇ;

ਪੀਤਨ੍ਤਰਾਹਿ ਵਗ੍ਗੂਹਿ, ਅਪਿਲ਼ਨ੍ਧਾਵ ਸੋਭਸਿ.

੬੫੯. ‘‘ਕਾ ਕਮ੍ਬੁਕਾਯੂਰਧਰੇ [ਕਕਮ੍ਬੁਕਾਯੁਰਧਰੇ (ਸ੍ਯਾ.)], ਕਞ੍ਚਨਾਵੇਲ਼ਭੂਸਿਤੇ;

ਹੇਮਜਾਲਕਸਞ੍ਛਨ੍ਨੇ [ਪਚ੍ਛਨ੍ਨੇ (ਸੀ.)], ਨਾਨਾਰਤਨਮਾਲਿਨੀ.

੬੬੦. ‘‘ਸੋਵਣ੍ਣਮਯਾ ਲੋਹਿਤਙ੍ਗਮਯਾ [ਲੋਹਿਤਙ੍ਕਮਯਾ (ਸੀ. ਸ੍ਯਾ.)] ਚ, ਮੁਤ੍ਤਾਮਯਾ ਵੇਲ਼ੁਰਿਯਮਯਾ ਚ;

ਮਸਾਰਗਲ੍ਲਾ ਸਹਲੋਹਿਤਙ੍ਗਾ [ਸਹਲੋਹਿਤਙ੍ਕਾ (ਸੀ.), ਸਹਲੋਹਿਤਕਾ (ਸ੍ਯਾ.)], ਪਾਰੇਵਤਕ੍ਖੀਹਿ ਮਣੀਹਿ ਚਿਤ੍ਤਤਾ.

੬੬੧. ‘‘ਕੋਚਿ ਕੋਚਿ ਏਤ੍ਥ ਮਯੂਰਸੁਸ੍ਸਰੋ, ਹਂਸਸ੍ਸ ਰਞ੍ਞੋ ਕਰਵੀਕਸੁਸ੍ਸਰੋ;

ਤੇਸਂ ਸਰੋ ਸੁਯ੍ਯਤਿ ਵਗ੍ਗੁਰੂਪੋ, ਪਞ੍ਚਙ੍ਗਿਕਂ ਤੂਰਿਯਮਿਵਪ੍ਪਵਾਦਿਤਂ.

੬੬੨. ‘‘ਰਥੋ ਚ ਤੇ ਸੁਭੋ ਵਗ੍ਗੁ [ਵਗ੍ਗੂ (ਸ੍ਯਾ.)], ਨਾਨਾਰਤਨਚਿਤ੍ਤਿਤੋ [ਨਾਨਾਰਤਨਚਿਤ੍ਤਙ੍ਗੋ (ਸ੍ਯਾ.)];

ਨਾਨਾਵਣ੍ਣਾਹਿ ਧਾਤੂਹਿ, ਸੁਵਿਭਤ੍ਤੋਵ ਸੋਭਤਿ.

੬੬੩. ‘‘ਤਸ੍ਮਿਂ ਰਥੇ ਕਞ੍ਚਨਬਿਮ੍ਬਵਣ੍ਣੇ, ਯਾ ਤ੍ਵਂ [ਯਤ੍ਥ (ਕ. ਸੀ. ਸ੍ਯਾ. ਕ.)] ਠਿਤਾ ਭਾਸਸਿ ਮਂ ਪਦੇਸਂ;

ਦੇਵਤੇ ਪੁਚ੍ਛਿਤਾਚਿਕ੍ਖ, ਕਿਸ੍ਸ ਕਮ੍ਮਸ੍ਸਿਦਂ ਫਲ’’ਨ੍ਤਿ.

੬੬੪. ‘‘ਸੋਵਣ੍ਣਜਾਲਂ ਮਣਿਸੋਣ੍ਣਚਿਤ੍ਤਿਤਂ [ਵਿਚਿਤ੍ਤਂ (ਕ.), ਚਿਤ੍ਤਂ (ਸੀ. ਸ੍ਯਾ.)], ਮੁਤ੍ਤਾਚਿਤਂ ਹੇਮਜਾਲੇਨ ਛਨ੍ਨਂ [ਸਞ੍ਛਨ੍ਨਂ (ਕ.)];

ਪਰਿਨਿਬ੍ਬੁਤੇ ਗੋਤਮੇ ਅਪ੍ਪਮੇਯ੍ਯੇ, ਪਸਨ੍ਨਚਿਤ੍ਤਾ ਅਹਮਾਭਿਰੋਪਯਿਂ.

੬੬੫. ‘‘ਤਾਹਂ ਕਮ੍ਮਂ ਕਰਿਤ੍ਵਾਨ, ਕੁਸਲਂ ਬੁਦ੍ਧਵਣ੍ਣਿਤਂ;

ਅਪੇਤਸੋਕਾ ਸੁਖਿਤਾ, ਸਮ੍ਪਮੋਦਾਮਨਾਮਯਾ’’ਤਿ.

ਮਲ੍ਲਿਕਾਵਿਮਾਨਂ ਅਟ੍ਠਮਂ.