੭. ਪੇਸਵਤੀਵਿਮਾਨਵਤ੍ਥੁ

੬੪੬. ‘‘ਫਲਿਕਰਜਤਹੇਮਜਾਲਛਨ੍ਨਂ, ਵਿਵਿਧਚਿਤ੍ਰਤਲਮਦ੍ਦਸਂ ਸੁਰਮ੍ਮਂ;

ਬ੍ਯਮ੍ਹਂ ਸੁਨਿਮ੍ਮਿਤਂ ਤੋਰਣੂਪਪਨ੍ਨਂ, ਰੁਚਕੁਪਕਿਣ੍ਣਮਿਦਂ ਸੁਭਂ ਵਿਮਾਨਂ.

੬੪੭. ‘‘ਭਾਤਿ ਚ ਦਸ ਦਿਸਾ ਨਭੇਵ ਸੁਰਿਯੋ, ਸਰਦੇ ਤਮੋਨੁਦੋ ਸਹਸ੍ਸਰਂਸੀ;

ਤਥਾ ਤਪਤਿਮਿਦਂ ਤਵ ਵਿਮਾਨਂ, ਜਲਮਿਵ ਧੂਮਸਿਖੋ ਨਿਸੇ ਨਭਗ੍ਗੇ.

੬੪੮. ‘‘ਮੁਸਤੀਵ ਨਯਨਂ ਸਤੇਰਤਾਵ [ਸਤੇਰਿਤਾਵ (ਸ੍ਯਾ. ਕ.)], ਆਕਾਸੇ ਠਪਿਤਮਿਦਂ ਮਨੁਞ੍ਞਂ;

ਵੀਣਾਮੁਰਜਸਮ੍ਮਤਾਲ਼ਘੁਟ੍ਠਂ, ਇਦ੍ਧਂ ਇਨ੍ਦਪੁਰਂ ਯਥਾ ਤਵੇਦਂ.

੬੪੯. ‘‘ਪਦੁਮਕੁਮੁਦੁਪ੍ਪਲਕੁਵਲਯਂ, ਯੋਧਿਕ [ਯੂਧਿਕ (ਸੀ.)] ਬਨ੍ਧੁਕਨੋਜਕਾ [ਯੋਥਿਕਾ ਭਣ੍ਡਿਕਾ ਨੋਜਕਾ (ਸ੍ਯਾ.)] ਚ ਸਨ੍ਤਿ;

ਸਾਲਕੁਸੁਮਿਤਪੁਪ੍ਫਿਤਾ ਅਸੋਕਾ, ਵਿਵਿਧਦੁਮਗ੍ਗਸੁਗਨ੍ਧਸੇਵਿਤਮਿਦਂ.

੬੫੦. ‘‘ਸਲ਼ਲਲਬੁਜਭੁਜਕ [ਸੁਜਕ (ਸੀ. ਸ੍ਯਾ.)] ਸਂਯੁਤ੍ਤਾ [ਸਞ੍ਞਤਾ (ਸੀ.)], ਕੁਸਕਸੁਫੁਲ੍ਲਿਤਲਤਾਵਲਮ੍ਬਿਨੀਹਿ;

ਮਣਿਜਾਲਸਦਿਸਾ ਯਸਸ੍ਸਿਨੀ, ਰਮ੍ਮਾ ਪੋਕ੍ਖਰਣੀ ਉਪਟ੍ਠਿਤਾ ਤੇ.

੬੫੧. ‘‘ਉਦਕਰੁਹਾ ਚ ਯੇਤ੍ਥਿ ਪੁਪ੍ਫਜਾਤਾ, ਥਲਜਾ ਯੇ ਚ ਸਨ੍ਤਿ ਰੁਕ੍ਖਜਾਤਾ;

ਮਾਨੁਸਕਾਮਾਨੁਸ੍ਸਕਾ ਚ ਦਿਬ੍ਬਾ, ਸਬ੍ਬੇ ਤੁਯ੍ਹਂ ਨਿਵੇਸਨਮ੍ਹਿ ਜਾਤਾ.

੬੫੨. ‘‘ਕਿਸ੍ਸ ਸਂਯਮਦਮਸ੍ਸਯਂ ਵਿਪਾਕੋ, ਕੇਨਾਸਿ ਕਮ੍ਮਫਲੇਨਿਧੂਪਪਨ੍ਨਾ;

ਯਥਾ ਚ ਤੇ ਅਧਿਗਤਮਿਦਂ ਵਿਮਾਨਂ, ਤਦਨੁਪਦਂ ਅਵਚਾਸਿਲ਼ਾਰਪਮ੍ਹੇ’’ਤਿ [ਪਖੁਮੇਤਿ (ਸੀ.)].

੬੫੩. ‘‘ਯਥਾ ਚ ਮੇ ਅਧਿਗਤਮਿਦਂ ਵਿਮਾਨਂ, ਕੋਞ੍ਚਮਯੂਰਚਕੋਰ [ਚਙ੍ਕੋਰ (ਕ.)] ਸਙ੍ਘਚਰਿਤਂ;

ਦਿਬ੍ਯ [ਦਿਬ੍ਬ (ਸੀ. ਪੀ.)] ਪਿਲਵਹਂਸਰਾਜਚਿਣ੍ਣਂ, ਦਿਜਕਾਰਣ੍ਡਵਕੋਕਿਲਾਭਿਨਦਿਤਂ.

੬੫੪. ‘‘ਨਾਨਾਸਨ੍ਤਾਨਕਪੁਪ੍ਫਰੁਕ੍ਖਵਿਵਿਧਾ, ਪਾਟਲਿਜਮ੍ਬੁਅਸੋਕਰੁਕ੍ਖਵਨ੍ਤਂ;

ਯਥਾ ਚ ਮੇ ਅਧਿਗਤਮਿਦਂ ਵਿਮਾਨਂ, ਤਂ ਤੇ ਪਵੇਦਯਾਮਿ [ਪਵਦਿਸ੍ਸਾਮਿ (ਸੀ.), ਪਵੇਦਿਸ੍ਸਾਮਿ (ਪੀ.)] ਸੁਣੋਹਿ ਭਨ੍ਤੇ.

੬੫੫. ‘‘ਮਗਧਵਰਪੁਰਤ੍ਥਿਮੇਨ, ਨਾਲ਼ਕਗਾਮੋ ਨਾਮ ਅਤ੍ਥਿ ਭਨ੍ਤੇ;

ਤਤ੍ਥ ਅਹੋਸਿਂ ਪੁਰੇ ਸੁਣਿਸਾ, ਪੇਸਵਤੀਤਿ [ਸੇਸਵਤੀਤਿ (ਸੀ. ਸ੍ਯਾ.)] ਤਤ੍ਥ ਜਾਨਿਂਸੁ ਮਮਂ.

੬੫੬. ‘‘ਸਾਹਮਪਚਿਤਤ੍ਥਧਮ੍ਮਕੁਸਲਂ, ਦੇਵਮਨੁਸ੍ਸਪੂਜਿਤਂ ਮਹਨ੍ਤਂ;

ਉਪਤਿਸ੍ਸਂ ਨਿਬ੍ਬੁਤਮਪ੍ਪਮੇਯ੍ਯਂ, ਮੁਦਿਤਮਨਾ ਕੁਸੁਮੇਹਿ ਅਬ੍ਭੁਕਿਰਿਂ [ਅਬ੍ਭੋਕਿਰਿਂ (ਸੀ. ਸ੍ਯਾ. ਪੀ. ਕ.)].

੬੫੭. ‘‘ਪਰਮਗਤਿਗਤਞ੍ਚ ਪੂਜਯਿਤ੍ਵਾ, ਅਨ੍ਤਿਮਦੇਹਧਰਂ ਇਸਿਂ ਉਲ਼ਾਰਂ;

ਪਹਾਯ ਮਾਨੁਸਕਂ ਸਮੁਸ੍ਸਯਂ, ਤਿਦਸਗਤਾ ਇਧ ਮਾਵਸਾਮਿ ਠਾਨ’’ਨ੍ਤਿ.

ਪੇਸਵਤੀਵਿਮਾਨਂ ਸਤ੍ਤਮਂ.